Sunday, 19 June 2011

செய்திகள் 19/06


யாருக்கு வழக்கு?
30 மில்லியன் அமெரிக்க டொலர் நட்டஈடு கோரி அரசுத் தலைவருக்கு எதிராக மூன்று வழக்குகள் தாக்கல் செய்யப்பட்டுள்ளன.
அமெரிக்க நீதிமன்றினால் அனுப்பி வைக்கப்பட்ட அழைப்பாணையை அலரி மாளிகை ஏற்றுக் கொள்ள மறுத்ததாகவும், பின்னர் அந்த அழைப்பாணை நீதி அமைச்சிடம் ஒப்படைக்கப்பட்டதாகவும் தெரிவிக்கப்படுகிறது.
தமது நாட்டின் சட்ட திட்டங்களுக்கு அமைய இவ்வாறான அழைப்பாணைகளுக்கு பதிலளிக்க வேண்டிய அவசியம் கிடையாது என நீதி அமைச்சின் செயலாளர் சுஹத கம்லத் தெரிவித்துள்ளார்.
நாட்டின் இறையாண்மைக்கும் தேசியப் பாதுகாப்பிற்கும் குந்தகம் ஏற்படக் கூடிய வெளிநாட்டு சட்ட நடவடிக்கைகளை நிராகரிப்பதற்கு தமது அரசியல் சாசனத்தில் இடமிருப்பதாகக் குறிப்பிட்டுள்ளார்.
இவ்வாறான நடவடிக்கைகளின் மூலம் அரசுத் தலைவர் மஹிந்த ராஜபக்ஷவின் அமெரிக்க விஜயங்களை தடுத்து நிறுத்த முடியாது என அவர் தெரிவித்துள்ளார்.
*************
என்ன செய்லாம்?
சிறிலங்கா அரசுக்கான அனைத்துலக ஆதரவு குறைந்துள்ளதாகவும் எதிர்வரும் செப்ரெம்பர் மாதம் நடைபெறவுள்ள ஐ.நா மனித உரிமைகள் பேரவையின் கூட்டத் தொடரில் சிறிலங்கா மீது தடைகளை விதிக்கக் கோரும் தீர்மானம் ஒன்று கொண்டு வரப்படுவதற்கு வாய்ப்புகள் இருப்பதாகவும் கொழும்பு செய்திகள் தெரிவிக்கின்றன.
இந்த அச்சுறுத்தலை முறியடிக்கும் வகையில் சிறிலங்கா அரசாங்கம் இதுவரை அனைத்துலக ஆதரவைப் பெறத் தவறியுள்ளதாக சிறிலங்கா அரசின் மூத்த அமைச்சர் ஒருவர் கூறியுள்ளார்.
அத்துடன் அண்மையில் ஜெனிவாவில் நடைபெற்ற ஐ.நா மனித உரிமைகள் பேரவையின் 17வது கூட்டத்தொடரில் பங்கேற்ற அமைச்சர் மகிந்த சமரசிங்க தலைமையிலான சிறிலங்கா அரசகுழு வெளிநாடுகளின் போதுமான ஆதரவைப் பெற்றுக் கொள்ளத் தவறியுள்ளதாகவும் அந்த அமைச்சர் தெரிவித்துள்ளார்.
இந்த நிலைமைகள் தொடர்பாக மகிந்த சமரசிங்க சிறிலங்கா அரசின் முடிவுகளை எடுக்கும் உயர்மட்டங்களுக்குத் தெரியப்படுத்தியுள்ளதாக அவர் கூறியுள்ளார்.
ஐ.நா மனித உரிமைகள் பேரவையில், சிறிலங்காவுக்கு 9 நாடுகளே வெளிப்படையான ஆதரவைத் தெரிவித்திருந்ததாகவும், ஏனைய நாடுகள் கொழும்புக்கு எதிரான நிலைப்பாட்டையே வெளிப்படுத்தியுள்ளதாகவும் சிறிலங்கா அமைச்சர் மேலும் குறிப்பிட்டுள்ளார்.
எதிர்வரும் செப்ரெம்பர் மாதம் நடைபெறவுள்ள ஐ.நா மனித உரிமைகள் பேரவையின் கூட்டத்தொடரில் புதிய தீர்மானம் ஒன்றைக் கொண்டு வர அமெரிக்கா திட்டமிட்டுள்ளது.
இது சிறிலங்காவுக்குப் பாதிப்பை ஏற்படுத்தும்.
இந்த தீர்மானத்துக்கு ஏனைய நாடுகளின் ஆதரவை தேடும் முயற்சியில் அமெரிக்கா ஈடுபட்டுள்ளது என்றும் சிறிலங்காவின் மூத்த அமைச்சர் குறிப்பிட்டுள்ளார்.
இந்தநிலையில் அனைத்துலக சமூகத்தின் பலமான அச்சுறுத்தலை எதிர்கொள்ள வேண்டிய நிலை சிறிலங்காவுக்கு ஏற்பட்டுள்ளதாகவும், அந்த அமைச்சர் எச்சரித்துள்ளதாக கொழும்பு ஆங்கில வார இதழ் மேலும் குறிப்பிட்டுள்ளது.
*************

மீண்டும் மரத்திலேறும் வேதாளம்!
தமிழர் பிரச்சினைக்கு அரசியல் தீர்வு காண்பதற்காக நாடாளுமன்றத் தெரிவுக்குழு ஒன்றை அமைக்கும் அரசின் யோசனையை தமிழ்த் தேசியக் கூட்டமைப்பு அடியோடு நிராகரித்துள்ளது.
அது பற்றிக் கூட்டமைப்பு ஒரு போதும் கண்டுகொள்ளாது என்றும் அப்படி ஒரு குழு அமைக்கப்பட்டால் அதில் பங்கெடுக்கப் போவதில்லை என்றும் கட்சியின் இணைச் செயலாளர் மாவை சேனாதிராசா தெரிவித்துள்ளார்.
இதேவேளை, இந்தியாவும் இந்தத் தெரிவுக்குழு யோசனை தொடர்பில் திருப்தியாக இல்லை என்றும் தெரியவருகிறது.
கடந்த 10ஆம் திகதி கொழும்பு சென்றிருந்த இந்திய மூவரணியைச் சந்தித்த அரசுத் தலைவர், தமிழர் பிரச்சினைக்குத் தீர்வு காண்பதை நோக்காகக் கொண்டு நாடாளுமன்றத் தெரிவுக் குழுவை தான் அமைக்க உத்தேசிக்கிறார் என்று தெரிவித்திருந்தார்.
அதன் பின்னர், அரசுத் தலைவர் மஹிந்த ராஜபக்ஷ் நாடாளுமன்றத்துக்குச் சென்றிருந்த போது, தெரிவுக் குழுவை அமைப்பது குறித்து ஆராய்ந்தார் என்று செய்திகள் வெளியாகி இருந்தன.
ஐக்கிய மக்கள் சுதந்திர முன்னணியில் அங்கம் வகிக்கும் கட்சிகளின் தலைவர்களே நாடாளுமன்றத் தெரிவுக்குழு யோசனையை அப்போது முன்வைத்தார்கள் என்று தெரிவிக்கப்பட்டது.
இந்த வாரத்தில் தெரிவுக் குழு அமைக்கப்படலாம் என்று அரச தரப்புச் செய்திகள் கூறுகின்றன.
இனப்பிரச்சினைக்குத் தீர்வுகாண்பது தொடர்பில் மீண்டும் ஒரு தெரிவுக் குழுவை அரசு அமைப்பதில் இந்தியாவுக்கு உடன்பாடுகள் இல்லை என்று அரசியல் வட்டாரங்கள் தெரிவிக்கின்றன.
இனப்பிரச்சினை இலங்கையின் உள்விவகாரம் என்பதால், அரசியல் தீர்வைக் காண்பது தொடர்பில் கொழும்பு அரசே முடிவு செய்ய வேண்டும் என்று இந்தியா வெளிப்படையாகச் சொல்லி வந்தாலும் தெரிவுக் குழு, அனைத்துக் கட்சிக் குழு போன்றவற்றை அமைத்து காலத்தை மஹிந்த வீணடிப்பதை புதுடில்லி விரும்பவில்லை என்றும் அந்த வட்டாரங்கள் தெரிவித்தன.
இதேவேளை, நாடாளுமன்றத் தெரிவுக்குழு ஒன்று அமைக்கப்பட்டால் தமிழ்த் தேசியக் கூட்டமைப்பு அதனை ஆணித்தரமாக எதிர்க்கும் என்று நாடாளுமன்ற உறுப்பினர் ஒருவர் தெரிவித்தார்.
தெரிவுக்குழுவை இந்தியாவும் எதிர்க்கும் நிலையில் இலங்கையில் அதனை எதிர்க்கும் சக்திகளுக்குப் புதுடில்லியின் ஆதரவு கிடைப்பதற்கான சாத்தியங்கள் உண்டு என்று கொழும்பு அரசியல் வட்டாரத் தகவல்கள் தெரிவித்துள்ளன.
*************
எதுவுமே தெரியாது - சொல்வது ஐநா! நம்புவது யார்?
ஹெலிகொப்டர்களை இலங்கை வழங்க முன்வந்திருப்பது தொடர்பாக தங்களுக்கு எந்த விபரமும் கிடைக்கவில்லையென ஐ.நா. நேற்று முன்தினம் வெள்ளிக்கிழமை மறுத்துள்ளது.
உக்ரேனில் தயாரிக்கப்பட்ட எம்.ஐ.24 ஹெலிகொப்டர் மற்றும் சீனத்தயாரிப்பான வை12 விமானங்களை தாங்கள் வழங்க முன்வந்திருப்பதாக விமானப்படை பேச்சாளர் அன்டி விஜயசூரிய தெரிவித்தாக மேற்கோள் காட்டப்பட்டிருந்த நிலையில் அவற்றை வழங்குவது தொடர்பான தங்களுக்கு எந்த விபரமும் கிடைக்கவில்லையென ஐ.நா. தெரிவித்திருப்பதாக நியூயோர்க்கைத் தளமாகக் கொண்ட இன்னர் சிற்றிபிரஸ் தெரிவித்துள்ளது.
இலங்கை வழங்க முன்வந்தமை தொடர்பான ஐ.நா.வின் மீளாய்வானது போர்க்குற்றங்கள் தொடர்பான நிபுணர் குழுவின் அறிக்கையில் எவ்வாறான தாக்கத்தை ஏற்படுத்தும் என பான் கீ மூனின் பேச்சாளர் மாட்டின் நீசேர்க்கியிடம் இன்னர் சிற்றிபிரஸ் கேட்டது.
நான்கு மணித்தியாலயங்கள் கடந்த பின்னர் நீசேர்க்கியின் அலுவலகம் இந்தப் பதிலை இன்னர் சிற்றிபிரஸ{க்கு அனுப்பியிருந்தது.
இது தொடர்பாக இதுவரை விபரம் எதனையும் தாங்கள் பெற்றிருக்கவில்லை என்று குறிப்பிடப்பட்டுள்ளது.
2009 இல் கடற்கரை குருதிப்பெருக்கு என்று ஐ.நா.வின் பிரதி உதவிச் செயலாளர் நாயகம் ஜோன் ஹொம்ஸ் குறிப்பிட்டிருந்த விடயத்தில் விமானப்படை சம்பந்தப்பட்டிருந்தது.
மிக அண்மையில் பிரிட்டனின் சனல்4 இல் கொலைக்களங்கள் ஆவணத்திலும் குறிப்பிடப்பட்டிருந்தது.
இந்த ஆவணப்படமானது ஜூன் 21 இல் நியூயோர்க்கிலுள்ள ஐ.நா.வின் உட்புறத்தே திரையிடப்படவுள்ளது.
ஐ.நா.செயலாளர் நாயகமாக பான் கீ மூன் இரண்டாவது ஐந்தாண்டு பதவிக்காலம் தொடர்பாக பொதுச் சபையில் வாக்கெடுப்பு இடம்பெறுவதற்கு முன்பாக இது திரையிடப்படவுள்ளது.
*************
ஆலோசனை சொல்லும் முன்னாள் அமைச்சர்
அதிகரித்து வரும் சர்வதேச அழுத்தமானது இலங்கையை அதிகளவுக்கு மேலும் தனிமைப்படுத்தும் நிலைக்குக் கொண்டு செல்வதாகும் என மங்கள சமரவீர தெரிவித்துள்ளார்.
மோதலுக்குப் பின்னரான தருணத்தில் நாட்டை மீளக்கட்டியெழுப்புவதற்கும் நல்லிணக்கத்தை ஏற்படுத்துவதற்குமான எதிர்பார்ப்புகளில் மோசமான விளைவுகளை ஏற்படுத்தும் நிலைமை தற்போது உருவாகி வருவதாகவும் ஐ.தே.கட்சியின் மாத்தறை மாவட்ட நாடாளுமன்ற உறுப்பினர் மங்கள சமரவீர குற்றஞ்சாட்டியுள்ளார்.
இலங்கை தொடர்பான சனல் 4 இன் ஆவணப் படமானது வெளியிடப்பட்டமை நாட்டின் பிரதிமைக்கு பாரதூரமான பாதிப்பை ஏற்படுத்தியிருப்பதாகவும் அவர் சாடியுள்ளார்.
யுத்தத்தின் இறுதிக் கட்டத்தின் போது நீதி விசாரணைக்குப் புறம்பான கொலைகள் இடம்பெற்றிருப்பதாகக் குற்றஞ்சாட்டும் ஆவணத்தை சனல் 4 வெளியிட்டுள்ளது.
கொடூரமான யுத்த காயங்களை இலங்கை சுமந்து கொண்டிருக்கிறது என்றும் அங்கு மகிழ்ச்சியான நிலைமை ஏற்பட்டுக்கொண்டிருக்கின்றது எனவும் உலகம் கருதியிருந்தது.
ஆனால், இன்று பதிலளிக்கும் கடப்பாட்டிற்கான உலகத்தின் அழைப்பிற்கு பதிலளிப்பது தொடர்பாக அரசாங்கம் தனது அபிப்பிராயத்தை மாற்றிக்கொள்ளாமல் இருக்கின்றமையும் குற்றச்சாட்டுகள் தொடர்பாக தீர்மானிக்கும் நடவடிக்கைகளில் காண்பிக்கப்படும் தன்மையும் நண்பர்களை விட்டுவிலகச் செய்து சர்வதேச ரீதியில் இலங்கைக்கு எதிராக செயற்படுபவர்களுடன் இணைந்துகொள்வதற்கு இட்டுச் செல்கின்றது எனவும் தெரிவித்துள்ளார்.
ஆயினும் குறுகிய பார்வையைக் கொண்ட வெளிவிவகார நிபுணர்கள் இந்த யதார்த்தத்தை உணர்ந்துகொண்டதாகத் தென்படவில்லை.
இராணுவத்தின் நடத்தை பற்றிய எதிர்மறையான தன்மையை முறியடிக்க உடனடியாக நடவடிக்கைகள் மேற்கொள்ளாத வரை சர்வதேச பலம்வாய்ந்த சக்திகளால் தனிப்படுத்தப்படுவதை அதிகரிக்கச் செய்துவிடும் என்றும் எச்சரித்துள்ளார்.
*************
தஞ்சம் விற்பனைக்கு!
இலங்கை உள்ளிட்ட புகலிடக் கோரிக்கையாளர்களை மலேஷியாவிற்கு அனுப்பி வைக்கும் திட்டம் தொடரும் என அவுஸ்திரேலிய பிரதமர் ஜூலியா கில்லார்ட் தெரிவித்துள்ளார்.
படகு மூலம் அவுஸ்திரேலியாவிற்குள் பிரவேசிக்கும் சட்ட விரோத புகலிடக் கோரிக்கையாளர்களை தடுக்கும் நோக்கில் இந்த நடவடிக்கை எடுக்கப்படுவதாக அவர் சுட்டிக்காட்டியுள்ளார்.
புகலிடக் கோரிக்கையாளர்களை மலேஷியாவிற்கு அனுப்பி வைக்கும் திட்டத்திற்கு எதிராக அவுஸ்திரேலிய நாடாளுமன்றில் அண்மையில் தீர்மானம் நிறைவேற்றப்பட்டமை குறிப்பிடத்தக்கது.
சட்டவிரோத ஆட்கடத்தல் வர்த்தகத்தை கட்டுப்படுத்தும் நோக்கில் இந்த நடவடிக்கை எடுக்கப்படுவதாக அவுஸ்திரேலிய பிரதமர் குறிப்பிட்டுள்ளார்.
எவ்வாறாயினும் அவுஸ்திரேலியாவின் இந்தத் திட்டத்தை ஐக்கிய நாடுகளின் மனித உரிமைப் பேரவை ஆணையாளர் மற்றும் பல்வேறு மனித உரிமை அமைப்பு பிரதிநிதிகள் கண்டித்துள்ளனர்.
மலேஷியாவிற்கு புகலிடக் கோரிக்கையாளர்களை அனுப்பி வைக்கும் திட்டம் மனிதாபிமானமற்றது என அவுஸ்திரேலிய க்ரீன் கட்சி சுட்டிக்காட்டியுள்ளது.
இதேவேளை, படகுப் பயணிகளை மலேஷியாவிற்கு அனுப்பி வைக்கும் திட்டத்தில் பல்வேறு பாதக நிலைமைகள் காணப்படுவதாக ஆய்வாளர்கள் சுட்டிக்காட்டியுள்ளனர்
*************



Saturday, 18 June 2011

செய்திகள் 18/06


தாக்குதலாளிகளை அடையாளம் காட்டத் தயார்! தண்டணை வழங்கத் தயாரா?

அளவெட்டியில் தாம் நடத்திய தேர்தல் பிரச்சாரக் கூட்டத்தை கூட்டத்தை நிறுத்துமாறு உத்தரவு பிறப்பித்த இராணுவ மேஜரையும் கூட்டத்தில் நடத்தப்பட்ட தாக்குதலை வழிநடத்தியவரையும் தம்மால் அடையாளம் காட்ட முடியுமென தமிழ்த் தேசியக் கூட்டமைப்பின் பாராளுமன்ற உறுப்பினர் எம்.ஏ.சுமந்திரன் தெரிவித்திருக்கின்றார்.
அளவெட்டியில் இடம்பெற்ற தாக்குதல் சம்பவம் தொடர்பில் மேஜர் ஜெனரல் ஜானக பெரேரா தெல்லிப்பழை காவல் நிலையத்தில் வைத்து பலமுறை தம்மிடம் மன்னிப்புக் கோரினார் எனவும் இத்தாக்குதலுடன் இராணுவம் தொடர்புபடவில்லையென்றால் அவர் ஏன் தம்மிடம் மன்னிப்புக் கோர வேண்டுமெனவும் சுமந்திரன் கேள்வி எழுப்பினார்.
தமிழ்த் தேசியக் கூட்டமைப்பு அளவெட்டியில் வியாழக்கிழமை நடத்திய பிரசாரக் கூட்டத்தின் மீது நடத்தப்பட்ட தாக்குதல் சம்பவம் தொடர்பில் யாழ்நகரில் நடத்திய ஊடகவியலாளர் மாநாட்டிலேயே சுமந்திரன் இவ்வாறு தெரிவித்துள்ளார்.
அளவெட்டியில் தங்களது கூட்டம் நடைபெற்றுக் கொண்டிருந்த போது மேஜர் தரத்திலான ஒரு இராணுவ அதிகாரி கூட்டத்திற்கு வந்து கூட்டம் தொடர்பாக தங்களோடு உரையாடிய போது பாதுகாப்புப் படைகளின் தலைமையகத்தில் இக்கூட்டத்தை நடத்துவதற்கு அனுமதி பெறப்படவில்லையென்றும் இதனால் இக்கூட்டத்தை தடுத்து நிறுத்த தனக்கு தலைமையகத்திலிருந்து உத்தரவு பிறப்பிக்கப்பட்டதாகவும் அவர் தெரிவித்தார் என்றும் சுமத்திரன் குறிப்பிட்டுள்ளார்.
அவர் இவ்வாறு தெரிவித்துக் கொண்டிருக்கையிலேயே இன்னொருவர் தலைமையில் இராணுவத்தினர் பொதுமக்களையும் தங்களையும் தாக்கத் தொடங்கிவிட்டனர் என்றும் மீண்டும் இன்னொரு சந்தர்ப்பத்தில் குறித்த மேஜர் தர இராணுவ அதிகாரியையும் பொது மக்கள் மீதான தாக்குதலை வழிநடத்திய தலைவரையும் தன்னால் அடையாளங் காட்ட முடியும் என்றும் கூறியுள்ளார்.
**************
அடக்குமுறைக்கு எதிராக போராட தயார்!
எமது மக்களை அடக்குமுறைகளில் இருந்து மீட்டெடுக்க நாம் தொடர்ந்தும் போராடுவோம் என்று தமிழ்த் தேசியக் கூட்டமைப்பின் யாழ். மாவட்ட நாடாளுமன்ற உறுப்பினர் மாவை சோ.சேனாதிராசா சூளுரைத்துள்ளார்.
அளவெட்டியில் இடம்பெற்ற கூட்டமைப்பின் வேட்பாளர் அறிமுகக் கூட்டத்தில் அத்துமீறி புகுந்து அடாவடித் தனமாக தாக்குதல் மேற்கொண்டது தொடர்பில் ஊடகங்களுக்கு விளக்கமளிக்கும் ஊடகவியலாளர் சந்திப்பு நேற்று தமிழரசுக் கட்சியின் யாழ். மாவட்டச் செயலகத்தில் நடைபெற்றது.
இச் சந்திப்பின் போதே அவர் இவ்வாறு தெரிவித்துள்ளார்.
இந்த சந்திப்பில் தமிழ்த் தேசிய நாடாளுமன்ற உறுப்பினர்களான சரவணபவன், சிறிதரன், சுரேஸ் பிரேமச்சந்திரன், சுமந்திரன், மற்றும் யாழ். மாநகர சபையின் முன்னாள் ஆணையாளர் சி.வி.கே.சிவஞானம், மற்றும் தமிழரசுக் கட்சி உறுப்பினர்களும் ஊடகவியலாளர்களும் கலந்து கொண்டனர்.
இச்சம்பவத்தில் படையினர் இராணுவ மேலாதிக்கத்தைப் பயன்படுத்தி அடாவடித்தனத்தைக் கட்டவிழ்த்துள்ளனர்.
கூட்டத்திற்கு அனுமதி தேவையில்லை என்பது ஒரு புறமிருக்க அனுமதி பற்றி கேட்கும் அதிகாரம் படையினருக்கு இல்லை. அது காவற்றுறையினருக்கே உண்டு என்றும் அவர் சுட்டிக்காட்டினார்.
சிறிதும் தொடர்பில்லாமல் படையினர் ஆயுதங்களுடன் வந்து தாக்கியது என்பது ஐயத்திற்குரியது.
அவர்கள் அங்கு எதையும் செய்யத் துணிந்து திட்டமிட்டே வந்துள்ளனர் என்றும் அவா தெரிவித்துள்ளார்.
அமைதி திரும்பியுள்ளது என்ற கருத்துக்கு எதிராக இராணுவ அடக்குமுறைக்குள்தான் மக்கள் இன்னும் வாழ்கின்றார்கள் என இந்தத் தாக்குதல் உணர வைத்துள்ளது என்றும் மாவை சேனாதிராஜா குறிப்பிட்டுள்ளார்.
*****************
தாக்குதல் உண்மை என்கிறது காவல்துறை, பொய் என்கிறது இராணுவம்!
அளவெட்டியில் இடம்பெற்ற தமிழ்த் தேசியக் கூட்டமைப்பின் பிரசாரக் கூட்டத்தில் தாக்குதல் இடம்பெற்றதாக கூறப்படுவது உண்மையே என்று பிரதேசத்துக்குப் பொறுப்பான சிரேஷ்ட காவல்துறை அத்தியட்சகர் தெரிவித்துள்ளார்.
காங்கேசன்துறைப் பிரதேசத்துக்குப் பொறுப்பான சிரேஷ்ட காவல்துறை அத்தியட்சகர் காமினி பெரேராவே அவ்வாறு த.தே.கூட்டமைப்பின் மீது தாக்குதல் நடாத்தப்பட்டுள்ளதை உறுதி செய்திருப்பதாக திவயின பத்திரிகை செய்தி வெளியிட்டுள்ளது.
ஆயினும் முன்னதாக யாழ்.பிராந்திய இராணுவக் கட்டளைத் தளபதி அவ்வாறான தாக்குதல் சம்பவம் நடைபெறவில்லை என்று மறுத்திருந்தார்.
தாக்குதல் சம்பவம் நடைபெற்ற இடத்துக்கு தான் நேரில் சென்று பார்வையிட்டதாக குறிப்பிடும் சிரேஷ்ட காவல்துறை அத்தியட்சகர் காமினி பெரேரா, இராணுவத்தினர் தான் அதில் தொடர்புபட்டிருந்தார்களா என்பது குறித்தும் விசாரணைகளை மேற்கொண்டதாகவும் தெரிவிக்கின்றார்.
ஆயினும் விசாரணையின் போது அவ்விடத்தில் இருந்த இராணுவத்தினரும் தாங்கள் தாக்குதல்களை மேற்கொள்ளவில்லை என்று மறுத்ததாக அவர் மேலும் குறிப்பிடுகின்றார்.
இதற்கிடையே இராணுவப் பேச்சாளரிடம் இத்தாக்குதல் சம்பவம் தொடர்பில் வினவப்பட்டபோது அச்சம்பவம் பற்றிக்கூட தான் இதுவரை கேள்விப்படவில்லை என்று நேற்று மாலை அவர் தெரிவித்ததாகவும் திவயின பத்திரிகை செய்தியில் மேலும் குறிப்பிடப்பட்டுள்ளது.
************
அழுத்தத்திற்கு உந்து சக்தி!
இலங்கை மீதான சர்வதேச அழுத்தங்களை அதிகரிக்கச் செய்ய சனல் 4 தொலைக்காட்சி வெளியிட்டுள்ள ஆவணப்படம் உந்துசக்தியாக அமைந்துள்ளதென மக்கள் விடுதலை முன்னணி தெரிவித்துள்ளது.
அதனால் இந்தப் பிரச்சினையை அரசாங்கம் சாதாரணமாக நினைத்துவிடக் கூடாதென முன்னணியின் பிரதான செயலாளர் ரில்வின் சில்வா ஊடகவியலாளர் சந்திப்பில் தெரிவித்தார்.
வெளிநாட்டு நாடுகள், மற்றும் நிறுவனங்கள் இலங்கையின் உள்நாட்டுப் பிரச்சினையில் தலையிட மனித உரிமை பிரச்சினைகளை பயன்படுத்துகின்றனர் என அவர் கூறியுள்ளார்.
இந்த நேரத்தில் இந்த நாட்டு அரசு மனித உரிமையை பாதுகாக்க வேண்டும்.
ஆனால் மனித உரிமையை பாதுகாப்பது போன்று அரசு காட்டிக் கொள்கிறது என ரில்வின் குற்றம் சுமத்தியுள்ளார்.
இந்தப் பிரச்சினை மிகவும் பாரதூரமானது. முழு சமூகமும் அரசும் இப்பிரச்சினையின்பால் கவனம் செலுத்தி தீர்வு பெறாவிட்டால் நாடு பாரிய அனர்த்தத்தை எதிர்கொள்ளும்.
இலங்கை மீது அழுத்தம் செலுத்த விரும்பும் வெளிநாட்டு சக்திகளுக்கு இப்பிரச்சினை ஆதாரமாகவும், உதாரணமாகவும் அமைகிறது.
இது மிகவும் ஆபத்தானது என ரில்வின் சில்வா தெரிவித்தார்.
***************
பாடங்களை கற்றுக் கொள்ள தவறிய கற்றுக் கொண்ட பாடங்களுக்கான ஆணைக்குழு!
கற்றுக் கொண்ட பாடங்கள் குறித்து ஆராய ஆணைக்குழுவொன்றை நியமித்துள்ள அரசாங்கம் இதுவரை பாடம் கற்றுக் கொள்ளவில்லை என்று ஜே.வி.பி. காட்டமாக சாடியுள்ளது.
கற்றுக் கொண்ட பாடங்கள் மற்றும் நல்லிணக்க ஆணைக்குழு யுத்தத்தின் போது மக்களுக்கு ஏற்பட்ட பாதிப்புகள் குறித்து விசாரணைகளை மேற்கொள்ளவே நியமிக்கப்பட்டது.
ஆயினும் அதன் விசாரணைகளில் பொதுமக்கள் சுதந்திரமாக முறைப்பாடுகளை மேற்கொள்ள முடியாத அச்சுறுத்தல் நிலையேற்பட்டிருந்தது.
யாழ்ப்பாணத்தில் பொதுமக்கள் பதிவு நடவடிக்கை மூலம் அங்குள்ள மக்களை அச்சுறுத்தும் இராணுவ நடவடிக்கை வலிகாமம் பிரதேச ஜே.வி.பி. அமைப்பாளர் தங்கேஸ்வரனின் கடும் எதிர்ப்புக் காரணமாகவே இடைநிறுத்தப்பட்டுள்ளது.
இவ்வாறாக அரசாங்கம் நாட்டு மக்களின் துன்பங்களிலிருந்து பாடம் கற்றுக் கொண்டு அவற்றுக்கான தீர்வைத் தேடுவதற்குப் பதிலாக தொடர்ச்சியாக மேலும் மோசமான துன்பங்களை பொதுமக்கள் மீது கட்டவிழ்த்து விட முயற்சிக்கின்றது.
அதன் மூலம் எதிர்காலத்திலும் இந்நாட்டில் பிரச்சினைகள் தலைதூக்குவதற்கான பின்னணியை வேண்டுமென்றே உருவாக்க அரசாங்கம் முயல்கின்றது.
அந்தவகையில் கற்றுக் கொண்ட பாடங்கள் குறித்து ஆராய ஆணைக்குழுவொன்றை நியமித்த அரசாங்கம் அதிலிருந்து சற்றேனும் பாடம் கற்றுக் கொள்ளவில்லை என்பது புலனாகின்றது என்றும் ஜே.வி. பி. சாடியுள்ளது.
***************

என்ன செய்யப் போகின்றது அரசு? கேட்கிறது ததேகூ
பிரித்தானியாவின் சனல் 4 தொலைக்காட்சியின் வீடியோ காட்சிகள் உண்மைத் தன்மை வாய்ந்தவை என்பதை நம்புவதாகத் தெரிவித்துள்ள தமிழ்த் தேசிய கூட்டமைப்பு இக் காட்சிகள் தொடர்பில் இலங்கை அரசு எதனைக் கூறினாலும் உலக நாடுகள் ஏற்றுக்கொள்ளத் தயாரில்லை என்பது புலனாகிவிட்டது என்றும் கூறியுள்ளது.
சனல் 4 விவகாரம் தொடர்பில் சர்வதேச கண்காணிப்பின் கீழ் சுயாதீனமானதும் சர்வதேச தரத்திற்கமைவானதுமான விசாரணைகளை நடத்தி குற்றவாளிகளுக்கு தண்டனையைப் பெற்றுக் கொடுக்க அரசாங்கம் நடவடிக்கை எடுக்க வேண்டும் என்றும் கூட்டமைப்பு வலியுறுத்தியுள்ளது.
சனல் 4 வீடியோ காட்சிகள் தொடர்பில் கருத்து வெளியிடுகையிலேயே கூட்டமைப்பின் பேச்சாளரும் யாழ். மாவட்ட நாடாளுமன்ற உறுப்பினருமான சுரேஷ் பிரேமச்சந்திரன் இதனைத் தெரிவித்தார்.
பிரித்தானிய தொலைக்காட்சியான சனல் 4 இலங்கையின் இறுதிக் கட்டப் போரோடு தொடர்புடைய சில தகவல்களை இதற்கு முன்னரும் வீடியோவாக வெளியிட்டிருந்தது.
ஆனாலும் அப்போது அதனை மறுத்த அரசாங்கம் அந்த வீடியோக் காட்சிகள் பொய்யானவை எனக் கூறி நிராகரித்தது.
அதே போல் கடந்த சில தினங்களுக்கு முன்னரும் இவ்வாறு சனல் 4 தொலைக்காட்சி நீண்டதொரு வீடியோ காட்சியை ஒளிபரப்பியிருந்தது.
இதனையும் அரசாங்கம் முன்னரைப் போலவே நிராகரித்து அது தொடர்பில் பல்வேறு கதைகளை கூறி வருகின்றது.
இதனை ஆராய்ந்து பாராமலேயே அரசாங்கம் வெற்றுக் கதைகளைக் கூறிக் கொண்டிருக்கின்றது.
நடந்து முடிந்த யுத்தத்தில் பல ஆயிரக்கணக்கான இளைஞர், யுவதிகள் கொல்லப்பட்டுள்ளனர்.
இவர்களில் பலர் அடையாளமும் காணப்பட்டிருக்கின்றனர்.
வைத்தியசாலைகள் தகர்க்கப்பட்டுள்ளமை உட்பட ஆண்கள், பெண்கள் என சகலரும் நிர்வாணமாக்கப்பட்டு கொலை செய்யப்படுதல் போன்ற காட்சிகள் மிகக் கொடூரமானவையாகும்.
கைது செய்யப்பட்ட போராளிகள், இளைஞர்கள் சட்டத்தின் முன் நிறுத்தப்பட வேண்டுமே தவிர வீடியோ காட்சியில் காட்டப்படுவது போன்று மிருகத்தனமாக கொலை செய்வதற்கு எவருக்கும் அதிகாரம் கிடையாது என்றும் சுரேஸ் பிரேமச்சந்திரன் தெரிவித்துள்ளார்.
****************




Friday, 17 June 2011

செய்திகள் 17/06


நாடு கடத்தப்பட்டோரிடம் விசாரணை
பிரித்தானியாவில் இருந்து நாடு கடத்தப்பட்ட இலங்கைத் தமிழர்கள் 38 பேர் கட்டுநாயக்க விமான நிலையத்தை சென்றடைந்துள்ளனர்.
இந்த நிலையில் இலங்கை சென்றுள்ள 38 தமிழர்களும் விசாரணைக்கென தேசிய இரகசிய விசாரணைப் பிரிவினரிடம் ஒப்படைக்கப்படவுள்ளதாக குடிவரவு மற்றும் குடிகயல்வு திணைக்களக் கட்டுப்பாட்டார்ள் சூலானந்த பெரேரா தெரிவித்துள்ளார்.
பிரித்தானியாவில் இருந்து 28 பேரே நாடு கடத்தப்படவுள்ளதாக தமக்கு கடிதம் மூலம் அறிவிக்கப்பட்டிருந்த நிலையில் 38 பேர் நாட்டை வந்தடைந்துள்ளதாக கட்டுநாயக்க விமான நிலைய கடமைநேரப் பணிப்பாளர் தெரிவித்துள்ளார்.
************
யுத்தக் குற்றவாளிகள் மீது நடவடிக்கை எடுக்க கோரிக்கை!
சேர்பிய அதிகாரிகள் மீது எடுக்கப்பட்ட யுத்தக்குற்ற நடவடிக்கைகளை இலங்கை முக்கியஸ்தர்கள் மீதும் மேற்கொள்ள வேண்டுமென செனல்-04 பிரிட்டன் நாடாளுமன்ற உறுப்பினர்களிடம் வலியுறுத்தியுள்ளது.
செனல்-04 தொலைக்காட்சியின் பணிப்பாளர்களில் ஒருவரான கால்லம் மன்ரே என்பவர் பிரித்தானியப் பாராளுமன்ற உறுப்பினர்களை சந்தித்து இந்த வேண்டுகோளை முன்வைத்து வருவதாக இன்றைய திவயின பத்திரிகை செய்தி வெளியிட்டுள்ளது.
"இலங்கையின் படுகொலைக்களம்" காணொளி செனல்-04 தொலைக்காட்சி சேவையில் ஒளிபரப்பப்பட்டதன் பின் உலகத் தமிழர் பேரவை, பிரித்தானியத் தமிழ் இளையோர் அமைப்பு மற்றும் பிரித்தானியத் தமிழர் பேரவை என்பவற்றின் முக்கியஸ்தர்கள் செனல்-04 முக்கியஸ்தர்களுடன் மேற்கொண்ட கலந்துரையாடலின் போது இந்த விடயம் குறித்தும் வலியுறுத்தப்பட்டுள்ளது எனவும் தெரிவிக்கப்பட்டுள்ளது.
அதனையடுத்து தற்போது இலங்கையின் போர்க்குற்றங்கள் சேர்பியாவில் மேற்கொள்ளப்பட்ட யுத்தக்குற்றங்களுக்கு ஒப்பானது என்ற பிரச்சாரத்தை செனல்-04 தொலைக்காட்சிச் சேவை ஆரம்பித்துள்ளது.
இதுவரையில் இலங்கையின் யுத்தக்குற்றங்கள் தொடர்பில் செனல்-04 தொலைக்காட்சி மூன்று ஒளிநாடாக்களை வெளியிட்டுள்ளமை குறிப்பிடத்தக்கது எனவும் அந்த சிங்களப் பத்திரிகை தகவல் வெளியிட்டுள்ளது.
**************
யுத்தக் குற்ற காட்சிகளை எதிர்க்கும் ஐ.தே.க!
செனல்-04 தொலைக்காட்சியின் காணொளிகளை ஐ.தே.க. கடுமையாக எதிர்க்கின்ற போதிலும் அரசாங்கம் மௌனம் சாதித்து வருவதாக ஐ.தே.க. பொதுச் செயலாளர் திஸ்ஸ அத்தநாயக்க குற்றம் சாட்டியுள்ளார்.
செனல்-04 காணொளிகள் இலங்கையின் நற்பெயருக்குக் கடும் களங்கம் கற்பிக்கக் கூடிய வகையில் அமைந்திருப்பதால் அதனை ஐ.தே.க. வன்மையாக எதிர்க்கின்றது எனத் தெரிவித்துள்ளார்.
ஆயினும் அரசாங்கம் அது குறித்து எதுவித நடவடிக்கையும் எடுக்காமலிருப்பது குறித்து தாங்கள் கவலையடைவதாகவும் அவர் மேலும் குறிப்பிட்டுள்ளார்.
நாட்டுக்கு அபகீர்த்தியை ஏற்படுத்தக் கூடிய இவ்வாறான சம்பவங்களின் போது எந்தக் கட்சி அரசாங்கம் ஆட்சியில் இருந்தாலும் அதற்குப் பதிலளித்தாக வேண்டும்.
ஆனால் மஹிந்த ராஜபக்ஷ தலைமையிலான அரசாங்கம் இதுவரையில் அவ்வாறான நடவடிக்கைகளை மேற்கொள்ளவில்லை என்றும் சுட்டிக்காட்டியுள்ளார்.
இப்போதைக்கு இரண்டு வருடங்களுக்கு முன் செனல்-04 தொலைக்காட்சி வெளியிட்ட இலங்கையின் போர்க்குற்றங்கள் குறித்த முதலாவது காணொளியின் போதும் அரசாங்கம் இதே போன்றே மௌனம் சாதித்திருந்தது.
இரண்டு வருடங்களுக்கு முன்பு வெளியிடப்பட்ட காணொளியின் போது அரசாங்கம் சரியான நடவடிக்கை எடுத்திருக்குமாயின் இன்றைய நிலைமையை எதிர்கொள்ள வேண்டிய இக்கட்டான நிலை ஏற்பட்டிருக்காது.
அரசாங்கம் நாட்டின் ஏனைய பிரச்சினைகளின் போது முகம் கொடுக்கும் கிண்டல் மற்றும் வன்முறை கலந்த நடைமுறையானது இவ்வாறான பிரச்சினைகளின் போது கைகொடுக்காது.
அதற்குப் பதிலாக புத்திசாலித்தனத்துடன் நடந்து கொண்டால் மட்டுமே இவ்வாறான பிரச்சினைகளை எதிர்கொள்ள முடியும் என்றும் நாடாளுமன்ற உறுப்பினர் திஸ்ஸ அத்தநாயக்க மேலும் குறிப்பிட்டுள்ளார்.
*************
தீர்வு எங்கே?
தமிழ் மக்களுக்கான அரசியல் தீர்வுத் திட்டம் தொடர்பில் அக்கறையின்றி செயற்பட்டு வருகின்றமையே அரசாங்கத்திற்கெதிரான சர்வதேச அழுத்தங்களுக்கான பிரதான காரணமாகும் என்று இடது சாரி முன்னணியின் தலைவர் கலாநிதிவிக்கிரமபாகு கருணாரத்ன தெவித்துள்ளார்.
அரசாங்கம் தமிழ் மக்களுக்கு நிரந்தர அரசியல் தீர்வொன்றினை வழங்குமாயின் அரசாங்கத்திற்கெதிரான சர்வதேச அழுத்தங்கள் அப்படியே இல்லாது போய்விடும்.
இல்லையேல் அரசாங்கம் பாரிய பிரச்சினைகளுக்கு முகம் கொடுப்பதை யாராலும் தவிர்க்க முடியாது எனவும் அவர் கூறினார்.
பிரித்தானியாவின் சனல் 4 தொலைக் காட்சி விவகாரம் தொடர்பில் கருத்து தெரிவித்த போதே அவர் இதனை தெவித்தார்.
இது தொடர்பில் மேலும் கருத்து வெளியிட்ட அவர் யுத்தம் நிறைவடைந்து இரண்டு வருடங்கள் கடந்துள்ள போதும் அரசாங்கம் தமிழ் மக்களுக்கு அரசியல் தீர்வொன்றை முன்வைக்காமல் இழுத்தடித்துக் கொண்டுள்ளது.
இதுவே செனல் 4 விடயம் தொடர்பான பல்வேறு அழுத்தங்களுக்கான காரணமாகும்.
இன்று இலங்கைக்கு எதிராக பல்வேறு மட்டங்களில் இருந்து அழுத்தங்கள் எழுந்த வண்ணமேயுள்ளன.
எல்லாவற்றையும் உதாசீனப்படுத்தி விட்டு இருந்து விட முடியாது.
இன்று இலங்கைக்கு எதிராக தமிழ் நாட்டு அரசாங்கம் கூட கிளர்ந்தெழுந்துள்ளது எனவும் சுட்டிக்காட்டியுள்ளார்.
**************
யாழில் மக்களின் அச்ச நிலை
யாழ். குடாநாட்டில் இராணுவத்தினரின் தலையீடுகள் அதிகரித்த வண்ணம் உள்ளதால் மக்கள் மிகுந்த அச்சத்துக்கு மத்தியிலேயே வாழவேண்டிய நிலைமை காணப்படுவதாக தமிழ்த் தேசிய கூட்டமைப்பு, பிரிட்டிஷ் துணைத் தூதுவரிடம் எடுத்துரைத்துள்ளனர்.
இலங்கைக்கான பிரிட்டிஷ் துணைத் தூதுவர் மார்க் கூடிங் யாழ்ப்பாணத்துக்கான விஜயம் ஒன்றை மேற்கொண்டிருந்தார்.
அவரை தமிழ்த் தேசிய கூட்டமைப்பு பாராளுமன்ற உறுப்பினர்களான சுரேஷ் பிரேமச் சந்திரன், அப்பாத்துரை விநாயக மூர்த்தி ஆகியோர் யாழ். நகரில் உள்ள எக்ஸ்போ பவேலியனில் சந்தித்து உரையாடினார்கள்.
இந்தச் சந்திப்பின்போதே யாழ். குடா நாட்டில் இராணுவத்தினரின் தலையீடுகள் அதிகரித்துள்ளமை குறித்தும் மக்கள் எதிர்நோக்கும் நெருக்கடிகள் தொடர்பாகவும் அவர்கள் தூதுவரிடம் எடுத்து விளக்கினர்.
இச்சந்திப்புத் தொடர்பில் பாராளுமன்ற உறுப்பினர் சுரேஷ் பிரேமச்சந்திரன் தெரிவிக்கையில், யாழ்ப்பாணத்துக்கான விஜயம் ஒன்றை மேற்கொண்டு வந்த பிரிட்டிஷ் துணைத் தூதுவர் மார்க் கூடிங், யாழ். குடாநாட்டின் தற்போதைய நிலைமைகள், மீள்குடியேறிய மக்களின் வாழ்வாதாரங்கள், மக்கள் எதிர்நோக்கும் அன்றாட பிரச்சினைகள் தொடர்பில் கேட்டறிந்துகொண்டார்.
மேலும் தற்போதைய சூழலில் இராணுவத்தினன் தலையீடுகள் அதிகத்துள்ளமை குறித்தும் இராணுவ புலனாய்வாளர்கள் எனக் கூறிக்கொண்டு வரும் பலரும் மக்களுக்கு அச்சுறுத்தல்களை விடுப்பது குறித்தும் ஒரு சில பிரதேசங்களில் மீள்குடியேற்றம் நடைபெறும் அதேவேளை சில பகுதிகள் நில ஆக்கிரமிப்புக்கு உட்படுகின்றமை தொடர்பாகவும் அவருக்கு எடுத்துக்கூறியுள்ளனர்.
அதேவேளை நீதிமன்றத் தீர்ப்பினைக் கூட இராணுவத்தினர் அவமதித்து குடா நாட்டு மக்களின் வீடுகளுக்குச் சென்று பதிவு நடவடிக்கைகளை மேற்கொண்டு வருகின்றமை மற்றும் கையடக்கத் தொலைபேசி மூலம் புகைப்படங்களை எடுப்பது குறித்தும் பிரிட்டிஷ் துணைத் தூதுவன் கவனத்துக்கு கொண்டுவரப்பட்டது என்றார்.
இதேவேளை யாழ். விஜயம் மேற் கொண்ட பிட்டிஷ் துணைத் தூதுவர் கூடிங் தெல்லிப்பழை புனர்வாழ்வு நிலையம் மற்றும் மீள்குடியேறிய வலி. வடக்கு பகுதிகளை பார்வையிட்டதுடன் பிரிட்டிஷ் அரசாங்கத்தின் நிதியுதவியுடன் நிர்மாணிக்கப்பட்டுள்ள சங்குப்பிட்டி பாலத்தையும் பார்வையிட்டுச் சென்றுள்ளார்.
*************
ஐநாவில் ஸ்ரீலங்காவின் நிலை?
ஐ.நா. படையினருக்கு 3 எம்.ஐ.-24 ரக தாக்குதல் ஹெலிகொப்டர்கள் மற்றும் இரு விமானங்களை வழங்குவதற்கு இலங்கை முன்வந்துள்ளதாகவும் ஆனால் அவற்றை ஐ.நாவினால் ஏற்றுக்கொள்ள முடியாமல் போகலாம் எனவும் டர்டில்பே செய்தி நிறுவனம் தெரிவித்துள்ளது.
ஆபிரிக்காவின் கொங்கோ, சூடான் ஆகிய நாடுகளில் பணியில் ஈடுபட்டுள்ள ஐ.நா. படையினருக்கு தாக்குதல் வான் கலங்கள் போதாமலுள்ள நிலையில் ஐ.நாவுக்கு உதவுவதற்காக இவ்வான்கலங்களை வழங்க இலங்கை முன்வந்துள்ளதாக ஐ.நா.வைத் தளமாகக் கொண்ட அதிகாரிகளை மேற்கோள்காட்டி டர்டில்பே செய்தி வெளியிட்டுள்ளது.
ஆனால் இலங்கையில் நடந்த இறுதிக்கட்ட யுத்தத்தின்போது இடம்பெற்றதாகக் கூறப்படும் கொடூரங்கள் தொடர்பாக இலங்கைப் படையினர் உன்னிப்பான அவதானத்திற்குள்ளாகி இருக்கும் நிலையில் இலங்கை வழங்க முன்வந்த வான் கலங்களை ஏற்றுக் கொள்வது சர்ச்சையை ஏற்படுத்துவது மட்டுமல்லாமல் இலங்கையின் மனித உரிமை நடவடிக்கை குறித்து அமெரிக்க மீளாய்வையும் தூண்டும் என இச்செய்திச்சேவை தெரிவித்துள்ளது.
**************

Thursday, 16 June 2011

செய்திகள் 16/06


விசாரணை நடக்குமா?
சனல் 4 வெளியிட்ட காணொளியைத் தொடர்ந்து சிறிலங்கா போர்க்குற்றங்கள் தொடர்பாக சர்வதேச சமூகம் நடவடிக்கை எடுக்கும் என தான் நம்புவதாக பிரபல வழக்கறிஞர் ஒருவர் சனல் 4 தொலைக்காட்சிக்குத் தெரிவித்துள்ளார்.
இது தொடர்பாக சனல் 4 வெளியிட்டுள்ள செய்தியில் பொஸ்னியாவின் முஸ்லிம் மக்கள்மீது சேர்பிய படையினர் மேற்கொண்ட படுகொலைகளை நினைவுபடுத்தும் காட்சிகள் அடங்கிய 'இலங்கையின் கொலைக்களம்' ஆவணப்படம் கடந்த செவ்வாய்க்கிழமை வெளியாகி உலகம் பூராகவும் பெரும் அதிர்ச்சி அலைகளை எழுப்பியிருந்தது.
40 ஆயிரம் வரையான பொதுமக்களைப் பலிகொண்ட, வன்னிப் போரின் இறுதிக்கட்டத்தில் சிறிலங்கா படைகள் மேற்கொண்ட போர்க் குற்றங்கள் தொடர்பான புதிய ஆதாரங்களை சனல் 4 வெளியிட்ட ஆவணப்படம் பதிவு செய்துள்ளது.
கைகள் பின்புறம் கட்டப்பட்டு இருக்கும் நிலையில் போர்க் கைதிகள் சுட்டுக் கொல்லப்பட்டமை, வாகனங்களில் வீசப்படும் பெண் போராளிகளின் உடல்கள் நிர்வாணமாக்கப்பட்டு சிதைக்கப்பட்டமை, பொதுமக்கள் சிகிச்சை பெறும் வைத்தியசாலைகள் மீது குண்டுகள் வீசப்பட்டமை போன்ற காட்சிகளை இந்த ஆவணப்படம் வெளிக்கொண்டு வந்துள்ளது.
இந்தக் காணொளியின் பெரும்பாலான காட்சிகள் இராணுவத்தின் கைத் தொலைபேசிகளினால் எடுக்கப்பட்டவை.
இப் போர்க் குற்றங்களை இழைத்த இராணுவத்தினர் சிலரை அடையாளம் காணக்கூடியதாக உள்ளதுடன் அவர்கள் தாம் மேற்கொண்ட படுகொலைகள் தொடர்பாக உரையாடும் காட்சிகளும் பதிவாகியுள்ளன.
ஒரு காட்சியில் 'நிர்வாணமாக இறந்து கிடக்கும் பெண் ஒருவரின் உடலை சிதைக்க விரும்புவதாக' ஒரு இராணுவத்தினன் கூறும் காட்சியும் பதிவாகியுள்ளது.
இலங்கைப் போர்க்குற்றங்கள் குறித்து விசாரணையொன்றை மேற்கொள்ள வேண்டிய அவசியத்தை இக்காணொளி ஏற்படுத்தியுள்ளதுடன் சர்வதேச சமூகத்தின்மீது இது தொடர்பான அழுத்தத்தையும் அதிகரித்துள்ளதாக சனல் 4 தெரிவித்துள்ளது.
***************
அமெரிக்கா வலியுறுத்தல்!
இலங்கை உட்பட்ட 14 நாடுகளின் மனித உரிமை மீறல்கள் தொடர்பில் ஐக்கிய நாடுகள் விசாரணைகளை மேற்கொள்ளவேண்டும் என்று அமரிக்கா கோரியுள்ளது
இலங்கை, சீனா, ஈரான், லிபியா, வடகொரியா, சூடான், சிரியா, வெனிசூலா, யேமன், ஸிம்பாப்வே, கியூபா, பெலாரஸ், பஹ்ரெய்ன், மியன்மார் ஆகிய நாடுகளிலேயே மனித உரிமைமீறல் இடம்பெறுவதாக அமெரிக்கா குறிப்பிட்டுள்ளது.
அமெரிக்காவின் ஐக்கிய நாடுகளுக்கான தூதுவர் இந்த தகவலை வெளியிட்டுள்ளார்.
*******************
அன்பு வந்தது, ஆசை வந்தது!
இலங்கைத் தமிழர் பிரச்னைக்கு நிரந்தரத் தீர்வு காண தமிழக முதல்வருடன் இணைந்து செயல்பட விரும்புவதாக டில்லியில் உள்ள இலங்கைத் தூதர் பிரசாத் காரியவசம் நேற்று புதன்கிழமை தெரிவித்தார்.
இலங்கைத் தமிழர்கள் தங்களது வசிப்பிடங்களுக்கு மீண்டும் குடியேறுவதற்கான பணிகள் திருப்திகரமான முறையில் நடைபெறவில்லை என்று தமிழக முதல்வர் ஜெயலலிதா டில்லியில் நிருபர்களிடம் கூறியிருந்தார்.
அதுதொடர்பாக தினமணி நிருபர் இலங்கைத் தூதரிடம் கேட்டதற்கு, இலங்கைத் தமிழர் பிரச்னைக்கு நிரந்தரத் தீர்வு காணும் வகையில் தமிழக முதல்வருடன் இணைந்து செயல்பட இலங்கை அரசு அனைத்து நடவடிக்கைகளையும் மேற்கொண்டு வருகிறது, என்று அவர் தெரிவித்துள்ளார்.
தமிழக முதல்வர், தமிழக மக்கள் ஆகியோருடன் உள்ள நல்லெண்ணத்தையும் நம்பிக்கையையும் வலுப்படுத்தும் விதத்தில் நல்ல உறவை வைத்துக் கொள்ள இலங்கை அரசு ஆர்வத்துடன் இருக்கிறது என்றும் கூறியுள்ளார்.
பிரதமர் மன்மோகன் சிங்கை தமிழக முதல்வர் சந்தித்தபோது இலங்கைத் தமிழர் பிரச்சினை குறித்து தெரிவித்த கவலைகளை நீக்க அனைத்து நடவடிக்கைகளும் மேற்கொள்ளப்படும் எனவும் தெரிவித்துள்ளார்.
***************
ஆதரவு தேடி ஓட்டம்?
மகிந்த ராஜபக்ஸ, ரஷ்யாவுக்கான மூன்றுநாள் உத்தியோகபூர்வ விஜயம் ஒன்றை மேற்கொண்டு இன்று புறப்பட்டுச் சென்றார்.
ஸ்ரீலங்கன் வானூர்தி சேவைக்கு சொந்தமான விசேட வானூர்தி மூலம் அவர் ரஸ்யாவுக்கு சென்றுள்ளார்.
மகிந்த ராஜபக்ஸ தமது ரஷ்ய விஜயத்தின் போது செய்ட் பீடர்ஸ்பேர்கில் நடைபெறவுள்ள 15வது முக்கிய சர்வதேச பொருளாதார மாநாட்டில் பங்குபற்றவுள்ளார்.
இந்த மாநாடு நாளை முதல் எதிர்வரும் 18ம் திகதி வரையில் நடைபெறவுள்ளது.
இந்த மாநாட்டில், ரஷ்ய அரசுத் தலைவர் திமிட்ரி மெத்வடோவ், சீன அரசுத் தலைவர் ஹ_ ஜிண்டாவோ உள்ளிட்ட அரச தலைவர்கள் பங்குபகுகொள்கின்றனர்.
அத்துடன் இந்த மாநாட்டில் பங்குபற்றும் அரச தலைவர்களுடனும் மகிந்த ராஜபக்ஸ இருதரப்பு உறவுகள் குறித்து கலந்துரையாடல்களை மேற்கொள்ளவுள்ளார்.
இந்த உத்தியோகபூர்வ ரஷ்ய விஜயத்தில் அரசாங்க அமைச்சர்கள் பலர் பங்குபற்றுவதுடன், பிரதான பொது அதிகாரிகள் பலரும் பங்குகொள்கின்றனர்.
மகிந்த ராஜபக்ஸ இதற்கு முன்னர் கடந்த வருடம் பெப்ரவரி மாதத்தில் ரஷ்யாவுக்கு விஜயம் மேற்கொண்டிருந்தமை குறிப்பிடத்தக்கது.
****************
தமிழக அரசுக்கு நன்றி
மூன்று தீர்மானங்கள் தமிழ் நாடு சட்டப் பேரவையில் நிறைவேற்றப்பட்டமையையிட்டு கோடான கோடி உலகத் தமிழ் மக்கள் மகிழ்ச்சியும் நிம்மதியும் அடைந்துள்ளனர் என தமிழ்த் தேசிய விடுதலைக் கூட்டமைப்பு செயலாளர் நாயகம் எம்.கே.சிவாஜிலிங்கம் தமிழக முதல்வர் ஜெயலலிதாவுக்கு அனுப்பி வைத்துள்ள கடிதத்தில் தெரிவித்துள்ளார்.
இந்தத் தீர்மானங்களைத் துணிச்சலாக நிறைவேற்றியமைக்காகத் ஈழத்தமிழர்கள் சார்பில் தமது கட்சி நெஞ்சார்ந்த பாராட்டுக்;களையும் வாழ்த்துக்களையும் நன்றிகளையும் கூறிக் கொள்வதில் பெருமிதம் அடைகிறது எனவும் அக் கடிதத்தில் தெரிவித்துள்ளார்.
இனப் படுகொலை நடைபெற்றதைச் சுட்டிக்காட்டி சர்வதேச நீதி கிடைக்க வேண்டும் என்பதற்காக ஜக்கிய நாடுகள் சபை யுத்த குற்றங்களை விசாரிக்க வேண்டும், தமிழ் மக்களுக்கு சம உரிமையுடன் கூடிய வாழ்வுரிமை நிலை நாட்ட சர்வதேச அழுத்தங்கள் தேவை என்பதை உணர்த்த பொருளாதாரத் தடை போன்ற இரண்டு தீர்மானங்களை நிறைவேற்றியதையிட்டு மட்டில்லா மகிழ்ச்சி அடைகின்றோம்; எனவும் தெரிவித்துள்ளார்.
மேலும், இராமநாதபுர மன்னரின் ஆட்சியின் கீழ் இருந்த கச்சதீவை மீட்க எடுத்த முயற்சி தமிழக ஈழத்தமிழர் மீனவர்கள் மோதாமல் சுமுக நிலையை எட்டுவதற்கும், ஸ்ரீலங்கா கடற்படையினரின் துப்பாக்கிச் சூட்டுக்குப்பலியான 500க்கு மேற்பட்ட தமிழ் மீனவர்களின் மீதான தாக்குதல்கள் முடிவுக்கு கொண்டு வரப்படவும், வெகுவாக உதவும் என்று நம்புவதாகவும் சுட்டிக்காட்டியுள்ளார்.
********************
சர்வதேச நீதிமன்றில் வழக்கு ஏற்பு
டென்மார்க் தமிழர் பேரவையினர் கடந்த மே மாதம் முதலாம் நாளன்று நீதி கேட்டு கையளித்திருந்த முறைப்பாட்டை தாம் ஏற்றுக்கொண்டு பதிவு செய்துள்ளதாக தெரிவித்துள்ள அனைத்துலக குற்றவியல் நீதிமன்ற பிரதம வழக்கறிஞரின் அலுவலகத்தினர், முறைப்பாட்டை ஆராய்ந்து பதில் அனுப்புவதாக கடிதம் அனுப்பியுள்ளனர்.
தமிழ் மக்கள் மீது இனப்படுகொலை புரிகின்ற சிறிலங்கா அரசு மீது விசாரனை செய்யுமாறு வேண்டி கடந்த ஆண்டு ஒக்ரோபர் மாதத்திலும் அதன் தொடர்ச்சியாக கடந்த பெப்ரவரி மாதத்திலும் வழக்கறிஞரால், அனைத்துலக குற்றவியல் நீதி மன்றத்தை நோக்கி மேற்கொள்ளப்பட்ட நடவடிக்கைகளுக்கு பதில் கிடைக்காததால் டென்மார்க்கிலிருந்து அனைத்துலக மக்களவைகளின் ஆதரவோடு டென்மார்க் தமிழர் பேரவை அமைப்பின் உறுப்பினர்களான திரு பார்த்தீபன் தம்பிராசா, திரு மனோகரன் மனோரஞ்சிதன் ஆகியோர் நீதி கேட்டு 1000 கிலோமீற்றர்கள் என்னும் மிதிவண்டிப் போராட்டத்தை கடந்த மே முதலாம் நாள் முன்னெடுத்து, அனைத்துலக நீதிமன்றத்திடம் தமது முறைப்பாட்டை போர்க்குற்றவியல் நாளன்று நேரடியாகக் கையளித்திருந்தனர்.
அஞ்சல் மூலம் வழக்கறிஞரால் அனுப்பப்பட்ட முறைப்பாடுகளுக்கு எதுவித பதிலும் அனுப்பிவைக்காத அனைத்துலக குற்றவியல் நீதிமன்ற பிரதம வழக்கறிஞரின் அலுவலகத்தினர், இப்பொழுது டென்மார்க் தமிழர்களின் முறைப்பாட்டை தாம் பதிவு செய்துள்ளதாக தெரிவித்துள்ளதுடன், ரோம் உடன்படிக்கைக்கு அமைய முறைப்பாட்டை ஆராய்ந்து பதில் அனுப்புவதாக டென்மார்க் தமிழர்பேரவையின் வழக்கறிஞருக்கு மே 23ம் நாள் அனுப்பியுள்ள கடிதத்தில் குறிப்பிட்டுள்ளனர்.
அண்மையில் ஐக்கிய நாடுகள் அவையின் பாதுகாப்பு அவையால் பரிந்துரைக்கப்படாமல் லிபியா நாட்டு தலைவர்கள் மீது அனைத்துலக குற்றவியல் நீதிமன்ற பிரதம வழக்கறிஞர் அவர்கள் வழக்கு தொடர்ந்தமையை திரு பார்த்தீபன் தம்பிராசா, திரு மனோகரன் மனோரஞ்சிதன் தம்மை சந்தித்த அதே அனைத்துலக குற்றவியல் நீதிமன்ற பிரதம வழங்க்கறிஞரிடம் எடுத்துக்காட்டியிருந்தனர்.
வழக்கறிஞருடன் கலந்தாலோசித்ததும் அனைத்துலக குற்றவியல் நீதிமன்றத்தால் அனுப்பப்பட்ட கடிதம் தொடர்பான மேலதிக விபரங்களையும் இனப்படுகொலை புரிகின்ற சிறிலங்காவிற்கு எதிராக அனைத்துலக குற்றவியல் நீதிமனறில் பதியப்பட்டுள்ள முறைப்பாட்டின் பதிவிலக்கத்தையும் ஊடகங்களுக்கு தெரியப்படுததுவதுடன், சிறிலங்கா அரசு தமிழ் மக்கள் மீது புரிந்த இனப்படுகொலையின் ஆதாரங்களை அனைத்துலக குற்றவியல் நீதிமன்றத்திடம் அனைவரும் வழங்கக்கூடிய வழிமுறைகளையும் வழக்கறிஞருடன் கலந்தாலோசித்ததும் விரைவில் அறியத்தரவுள்ளதாக டென்மார்க் தமிழர் பேரவையினர் அறிவித்துள்ளனர்.
********************



Wednesday, 15 June 2011

செய்திகள் 15/06


கோரமுகம் அம்பலம்
இந்துசமுத்திரத்தின் அழகிய முத்து, ஜனநாயகத்தை தொடர்ச்சியாகப் பின்பற்றும் நாடு, பயங்கரவாதத்தை ஒழித்த நாடு என சிறிலங்காக கட்டியமைக்க விரும்பிய அத்தனை பொய்களையும் உடைத்து உலகின் பயங்கரவாத நாடு என்ற அதன் உண்மையான கோர முகத்தை நேற்றையதினம் சனல் 4 வெளியிட்ட 'இலங்கையில் கொலைக்களம்' எனும் ஆவணப்படம் அம்பலமாக்கியுள்ளது.
நேற்றிரவு வெளியான இந்த ஆவணப்படம் உலகெங்கும் அதிர்ச்சி அலைகளை ஏற்படுத்தியுள்ளது.
கடந்த 50 வருடங்களாக தமிழர் எதிர்கொண்ட இன ஒடுக்குமுறையின் உண்மையான வடிவத்தை உலகம் முழுமையாகப் புரிந்து கொள்ளத்தக்க ஒரு முழுமையான சாட்சியமாக இந்த ஆவணப்படம் இருப்பதாக கருத்துகள் வெளியாகியுள்ளன.
நாகரீக உலகம் வெட்கித் தலைகுனியும் அளவுக்கு, ஒரு காட்டுமிராண்டித்தனமான இராணுவ வெற்றியை சிறிலங்கா எப்படி பெற்றுக் கொண்டது என்ற உண்மையை, இனி யாரும் மறைக்க முடியாதளவுக்கு, சனல் 4 வெளியிட்ட ஆவணப்படம் போட்டுடைத்துள்ளது என்றே கருதப்படுகிறது.
போராளிகள் மீது இராணுவத்தினர் புரிந்த வன்முறைகளும் குறிப்பாக பெண் போராளிகள்மீது மேற்கொள்ளப்பட்ட பாலியற் கொடுமைகளும் படுகொலைகளும் மனிதகுலத்திற்கு எதிரான கொடுமைகளும் மிகவும் தெளிவாகவே இக்காணொளியில் பதிவாகியுள்ளது.
சர்வதேச சமூகம் இனி என்ன செய்யப் போகின்றது என்பதுவே இப்போது தமிழர்கள் முன்னுள்ள கேள்வியாகவுள்ளது.
**************
விசாரணை வேண்டும் - பிரித்தானியா
யுத்தத்தின் போது இடம்பெற்ற கொடூர சம்பவங்கள் தொடர்பான குற்றச்சாட்டுகளின் மீது இலங்கை விசாரணை மேற்கொள்ள வேண்டும் என சனல் 4வின் ஆவணப்படம் ஒளிபரப்பப்பட்டதை அடுத்து பிரித்தானிய வெளிவிவகார அமைச்சு வலியுறுத்தியுள்ளது என பீபீசி செய்தி வெளியிட்டுள்ளது.
இதுவரை காண்பிக்கப்படாத இலங்கையில் இடம்பெற்ற யுத்த குற்றங்களின் தொகுப்பினை இலங்கையின் கொலைக்களங்கள் என்ற தலைப்பில் சனல் 4 ஒளிபரப்பியது.
இக்காணொளியில் தமிழர்கள் அநீதியான முறையில் இராணுவத்தினால் கொல்லப்படும் காட்சிகள் உள்ளடக்கப்பட்டிருந்தது.
இதேவேளை, குறித்த காணொளி சித்தரிக்கப்பட்டவை என்றும் இலங்கை இராணுவத்துக்கு அபகீர்த்தியேற்படுத்தவே இவ்வாறான நடவடிக்கைகள் முன்னெடுக்கப்படுவதாகவும் ஸ்ரீலங்கா பாதுகாப்பு அமைச்சு தெரிவித்துள்ளது.
குறித்த காணொளியினை பார்த்ததும் தான் அதிர்ச்சியடைந்ததாக பிரித்தானிய வெளிவிவகார அமைச்சர் தெரிவித்துள்ளார்.
அத்துடன் இலங்கை மீது அழுத்தங்களை பிரயோகிக்கும் ஏனைய சர்வதேச சமூகங்களுடன் இணைந்து கொள்ள தயாராக இருப்பதாகவும் அவர் தெரிவித்துள்ளார்.
குறித்த ஆவணப்படம் ஐக்கிய நாடுகள் பாதுகாப்பு கவுன்சில் கூட்டத்தில் காட்சியப்படுத்தப்பட்டமை குறிப்பிடத்தக்கது.
*************
தமிழர்களின் நாடு கடத்தலை தடுத்து நிறுத்து - சனல்-4
இலங்கையில் இருந்து யுத்தம் காரணமாக இலண்டன் வந்து அகதி அந்தஸ்த்து மறுக்கப்பட்ட தமிழர்கள் நாடுகடத்தப்படுதல் நிறுத்தபட வேண்டும் என்று சனல் 4 தொலைக்காட்சி கோரிக்கை விடுத்துள்ளது.
இலங்கைக்கு இந்த வாரம் சுமார் 40 இலங்கை தமிழர்கள்வரை நாடுகடத்தப்பட உள்ளனர் எனவும் தொடர்ந்தும் பலர் கடத்தப்பட உள்ளதாகவும் அண்மையில் செய்திகள் வெளியாகியிருந்தன.
இந்நிலையில் இவர்கள் நாடுகடத்தப்பட்டால் இலங்கையில் அவர்கள் மேன் மேலும் துன்புறுத்தபடலாம் என சனல் 4 தொலைக்காட்சி தனது செய்தியில் தெரிவித்துள்ளது.
இதே நேரம் பிரித்தானிய குடிவரவு திணைக்களம் தமிழர்களின் இரகசியங்களை ஸ்ரீலங்கா அரசிற்கு கசிய விட்டுள்ளதாகவும் அத்தொலைக்காட்சி சுட்டிக்காட்டியுள்ளது.
************
மலேசிய ஆதரவை மீள் பரிசீலனை செய்- புரோஹம்
இலங்கைக்கான ஆதரவை மலேசியா மீள் பரிசோதனை செய்ய வேண்டும் என்று கோலாலம்பூரை தளமாக கொண்டு இயங்கி வரும் புரோஹம் என்கிற மனித உரிமைகள் அமைப்புக் கோரி உள்ளது.
இலங்கையில் இறுதிக் கட்ட யுத்தத்தின்போது பாரிய மனித உரிமை மீறல்கள் இடம்பெற்றன என்று குற்றம் சாட்டுகின்றமைக்கு ஆதாரங்கள் உள்ளன என்று ஐக்கிய நாடுகள் சபையின் சுயாதீன நிபுணர்கள் குழு கண்டறிந்து உள்ளது என்று இவ்வமைப்பு கூறி உள்ளது.
அத்துடன் இம்மனித உரிமை மீறல் குற்றச்சாட்டுக்களை விசாரிக்க சுதந்திரமான நீதி விசாரணைக் குழு ஒன்றை அமைக்க வேண்டும் என்று நிபுணர்கள் குழு சிபாரிசு செய்து உள்ளது என்று இவ்வமைப்பு குறிப்பிட்டு உள்ளது.
இச்சூழ்நிலையில் இலங்கைக்கான ஆதரவை மலேசியா கை விட வேண்டும் என்று இவ்வமைப்பு வலியுறுத்தி உள்ளது.
**************
இராணுவத்தை திசை திருப்ப முயற்சி? எங்கே!
அரசாங்கத்திற்கு எதிராக இராணுவத்தினரை திசை திருப்பும் முனைப்புக்களில் ஜே.வி.பி ஈடுபட்டுள்ளதாக தேசிய பாதுகாப்பு தொடர்பான ஊடக மத்திய நிலையத்தின் பணிப்பாளர் லக்ஸ்மன் ஹ{லுகல்ல தெரிவித்துள்ளார்.
குறுகிய அரசியல் லாபங்களை ஈட்டும் நோக்கில் இவ்வாறான சதி முயற்சிகள் மேற்கொள்ளப்பட்டு வருவதாகக் குறிப்பிட்டுள்ளார்.
படையினர் தங்களது பிள்ளைகளைப் போன்று பாதுகாக்கும் அரசாங்கமாக தற்போதைய அரசாங்கம் திகழ்கின்றது என அவர் சுட்டிக்காட்டியுள்ளார்.
படையினருக்காக அரசாங்கம் முன்னெடுத்து வரும் நலத்திட்டங்களை எவராலும் தடுக்க முடியாது என அவர் குறிப்பிட்டுள்ளார்.
படையினரின் ஓய்வூதியக் கொடுப்பனவு தொடர்பில் ஜே.வி.பி.யினர் சுமத்தி வரும் குற்றச்சாட்டுக்களுக்கு பதிலளிக்கும் வகையில் அவர் இதனைக் குறிப்பிட்டுள்ளதாக லக்பிம பத்திரிகை செய்தி வெளியிட்டுள்ளது.
****************
தீர்வு சொல்லும் விமல்!
அரசியலமைப்பின் பதின்மூன்றாம் திருத்தம் குறித்து இனியும் பேசிக் கொண்டிருப்பதில் பலனேதுமில்லை என்று அமைச்சர் விமல் வீரவங்ச தெரிவித்துள்ளார்.
பதின்மூன்றாவது திருத்தம் தொடர்பில் தொடர்ந்தும் கவனத்தைச் செலுத்துவதைக் கைவிட்டு யுத்தத்தால் பாதிக்கப்பட்ட மக்களுக்குத் தேவையான வசதிகளைச் செய்து கொடுப்பது குறித்துக் கவனம் செலுத்த வேண்டியதே தற்போதைய தலையாய பணியாகும் என்றும் அவர் மேலும் வலியுறுத்தியுள்ளார்.
சிங்களப் பத்திரிகையொன்றுக்கு அளித்துள்ள நேர்காணல் ஒன்றின் போதே வீடமைப்பு, பொறியியல் சேவைகள் மற்றும் நிர்மாண, பொதுவசதிகள் அமைச்சர் விமல் வீரவங்ச இதனைத் தெரிவித்துள்ளார்.
யுத்தத்தால் பாதிக்கப்பட்ட மக்களுக்குத் தொழில், வீடமைப்பு, சுகாதாரம், கல்வி போன்ற பிரச்சினைகளுக்குத் தீர்வைக் காண்பது தவிர மாகாண சபைகளுக்கு அதிகாரம் வழங்கும் பதின்மூன்றாம் திருத்தச் சட்டம் குறித்தெல்லாம் கவனம் செலுத்த நேரமில்லை.
அத்துடன் மக்களின் பிரச்சினைகளுக்கான தீர்வு பதின்மூன்றாவது திருத்தச் சட்டத்தை அமுல்படுத்துவதால் மட்டும் வந்துவிடப்போவதில்லை.
அதற்குப் பதிலாக நீண்டகாலத் திட்டத்தின் அடிப்படையில் மக்களின் பிரச்சினைகளுக்கான தீர்வொன்று உருவாக்கப்பட வேண்டும்.
நாட்டில் கட்டியெழுப்பப்பட்டுள்ள சமாதானத்தைச் சீர்குலைக்கும் செயற்பாடுகளில் ஒருசில அரசியல்வாதிகள் ஈடுபடுகின்றனர்.
ஆயினும் மிகுந்த சிரமங்களின் மத்தியில் வென்றெடுத்த சமாதானத்தை மீண்டும் சீர்குலைப்பதற்கு யாருக்கும் இடமளிக்க முடியாது என்றும் அமைச்சர் விமல் வீரவங்ச தனது நேர்காணலில் மேலும் தெரிவித்துள்ளார்.
*****************

Tuesday, 14 June 2011

செய்திகள் 14/06


இலங்கையின் கொலைக்களம் - இன்று இரவு 11.05இற்கு

இலங்கையின் போர்க் குற்றங்கள் தொடர்பாக சனல்-4 தயாரித்துள்ள ஒரு மணி நேர விவரணப் படம் இன்று 14ஆம் திகதி லண்டன் நேரப்படி இரவு 11.05 ஒளிபரப்பப்படுகின்றது.
இந்த விவரணப் படத்தைப் பார்க்குமாறு சகல நாடாளுமன்ற உறுப்பினர்களுக்கும் ஆளும் கன்சர்வேர்டிவ் கட்சியின் நாடாளுமன்ற உறுப்பினர் ஸ்கொட் லீ வேண்டுகோள் விடுத்துள்ளார்.
சனல் 4 வீடியோவிலுள்ள காட்சிகள் உண்மையானவை எனவும், போர்க் குற்றத்திற்கான சாட்சியங்களாக உறுதிப்படுத்தப்பட்டுள்ளன எனவும் சட்டத்திற்கு புறம்பான படுகொலைகள் தொடர்பான ஐ.நாவின் விசேட பிரதிநிதி தெரிவித்தார்.
இதேவேளை, இலங்கையின் போர்க் குற்றங்கள் தொடர்பில் ஐ.நா. சுயாதீனமான சர்வதேச விசாரணைக்கான பொறிமுறை ஒன்றை ஏற்படுத்தி இலங்கையில் நீதி, பொறுப்புக் கூறும் கடப்பாடு, உண்மை ஆகியவற்றை உறுதிப்படுத்தும் விதத்தில் நடவடிக்கைகள் மேற்கொள்ளப்படவேண்டும் என பிரிட்டிஷ் நாடாளுமன்றத்தில் பிரேரணை ஒன்றையும் ஸ்கொட் லீ முன்வைத்துள்ளார்.
இந்தப் பிரேரணையில் கன்சர்வேட்டிவ், லிபரல், லேபர் மற்றும் டெமோக்கிரட்டிஸ் யூனியன் ஆகிய கட்சிகளைச் சேர்ந்த 12 எம்.பிக்கள் கைச்சாத்திட்டுள்ளனர்.
கடந்த 26 வருடங்களாக நடைபெற்று வந்த போரின் இறுதிக் கட்டத்தில் இடம்பெற்ற போர்க்குற்றங்கள் குறித்து ஐ.நா. மனித உரிமைக் கவுன்ஸிலில் கொண்டுவந்த தீர்மானத்தை எதிர்த்த நாடுகளில் லிபியாவும் ஒன்று என்பது அந்தப் பிரேரணையில் சுட்டிக் காட்டப்பட்டுள்ளது.
நேட்டோ தலைமையில் லிபியா மீது மேற்கொள்ளப்படும் தாக்குதல் நடவடிக்கைகளை இலங்கை கடுமையாக எதிர்த்துள்ளதையும் அது சுட்டிக் காட்டியுள்ளது.
போரின் இறுதிக்கட்டத்தில் பொதுமக்களுடைய பாதுகாப்பில் இலங்கை தோல்வியடைந்துள்ளது என்றும், இலங்கை அரசு பொதுமக்களுடைய பாதுகாப்பையும் நல்வாழ்வையும் உறுதிப்படுத்த வேண்டும் என்றும் அந்தப் பிரேரணை சுட்டிக்காட்டியுள்ளது.
************

பிரித்தானிய தொழிற்கட்சி வேண்டுகோள்
ஐக்கிய நாடுகள் சபையால் நியமிக்கப்பட்டிருந்த நிபுணர் குழு வெளியிட்டுள்ள அறிக்கையையும், அதன் பரிந்துரைகளையும் சிறீலங்கா அரசாங்கம் கவனத்தில் எடுத்து செயற்பட வேண்டும் என, பிரித்தானிய தொழிற்கட்சியின் நிழல் வெளிவிவகாரச் செயலர் டக்ளஸ் அலென்சாண்டர் கோரிக்கை விடுத்துள்ளார்.
இலங்கைத்தீவின் அண்மைய அரசியல் நிலை மற்றும் ஐக்கிய நாடுகள் மனித உரிமைகள் சபையின் 17வது கூட்டத்தொடர் ஆரம்பத்தில் அதன் ஆணையாளர் நவனீதம் பிள்ளை அம்மையார் ஆற்றிய உரை என்பன பற்றி அவர் கருத்து வெளியிட்டிருக்கின்றார்.
இது தொடர்பாக அவர் வெளியிட்டுள்ள அறிக்கையில் இலங்கையில் இடம்பெற்ற இறுதிக்கட்டப் போரில் 2009ஆம் ஆண்டு ஜனவரி முதல் மே மாதம் இடையான பகுதியில் சிறீலங்கா அரசாங்க படைகளும், தமிழீழ விடுதலைப் புலிகளும் பாரிய மனித உரிமை மீறல்களில் ஈடுபட்டதாகவும், இவை போர்க்குற்றத்திற்கு இட்டுச் செல்லும் எனவும், ஐ.நா நிபுணர் குழுவின் அறிக்கையில் கூறப்பட்டுள்ளது.
ஐ.நா அறிக்கையில் கூறப்பட்டுள்ள விடயங்களுக்கு சிறீலங்கா அரசாங்கம் பதில் கூற வேண்டும் என்பதுடன், அறிக்கையில் கூறப்பட்டுள்ள பரிந்துரைகளையும் மிகவும் கவனத்தில் கொள்ள வேண்டும்.
கற்றுக்கொண்ட பாடங்களும், நல்லிணக்க ஆணைக்குழு என்ற பெயரில் அமைக்கப்பட்டுள்ள சிறீலங்கா அரசாங்கத்தின் சொந்த விசாரணைக்குழுவின் நம்பகத்தன்மை பற்றி பரந்துபட்ட கரிசனை வெளியிடப்பட்டுள்ளது.
எனவே இந்த ஆணைக்குழு அனைத்துலகப் பிரதிநிதிகளையும் உள்வாங்கிக்கொள்ள வேண்டும் என்பதுடன், ஏற்கனவே கால எல்லை நீடிக்கப்பட்டுள்ள 2011 நவம்பருக்கு முன்னர் தனது அறிக்கையை வெளியிட வேண்டும்.
இந்த அறிக்கை ஐ.நா நிபுணர் குழு பரிந்துரைத்துள்ள விடயங்களை உள்ளடக்கியதாகவும், நம்பகத்தன்மை கொண்டதாகவும், வெளிப்படையானதாகவும் இருத்தல் அவசியம்.
இலங்கையில் அமைதியைக் கட்டியெழுப்ப ஒரேயொரு வழி, உண்மையான இன நல்லிணக்கத்தை ஏற்படுத்துவதுடன், பாதிக்கப்பட்ட குடும்பங்களிற்கு நீதி கடைக்க வழி செய்து, போர்க்குற்றம் புரிந்தவர்கள் நீதியின் முன் நிறுத்தப்படுவது மட்டுமே எனவும் பிரித்தானிய தொழிற்கட்சியின் நிழல் வெளிவிவகாரச் செயலர் டக்ளஸ் அலென்சாண்டர் தனது அறிக்கையில் தெரிவித்திருக்கின்றார்.
***************

இந்திய நிலைப்பாடு?
நிரந்தரமான அரசியல் தீர்வு விவகாரம் தொடர்பில் இலங்கை அரசாங்கத்தின் மீது இந்திய மத்திய அரசு வலுவான நிலைப்பாட்டினைக் கடைப்பிடிக்க வேண்டும் என்று தமிழ்த் தேசியக் கூட்டமைப்பு வேண்டுகோள் விடுத்துள்ளது.
பதின்மூன்று பிளஸ் என்பதிலோ பதின்மூன்று மைனஸ் என்பதிலோ காலத்தை வீணடிக்க தமிழ்த் தேசியக் கூட்டமைப்பு தயாரில்லை.
13 என்பதற்கு அப்பாலான ஒரு தீர்வுத் திட்டத்தை தமிழ் மக்கள் விரும்புகின்றனர் என்றும் கூட்டமைப்பு தெரிவித்துள்ளது.
இந்திய உயர் மட்டத் தூதுக் குழுவுடனான சந்திப்பின் போது காவல்துறை, காணி அதிகாரங்கள் தீர்வுத் திட்டத்தில் உள்வாங்கப்படமாட்டாது என்று அரசாங்கத்தின் தரப்பில் திட்டவட்டமாக அறிவித்திருந்தமை தொடர்பில் கருத்து வெளியிடுகையிலேயே கூட்டமைப்பின் வன்னி மாவட்ட எம்.பி.செல்வம் அடைக்கலநாதன் இதனைத் தெரிவித்தார்.
அரசியல் தீர்வு என்ற விவகாரமானது காலாகாலமாக இழுபறிக்குள்ளேயே இருந்து வருகின்றது.
இதனைத் தீர்த்து வைக்க வேண்டும் என்பதிலோ தமிழ் மக்களுக்கு உரிய உரிமைகளை வழங்க வேண்டும் என்பதிலோ அரசாங்கத்திடம் நாட்டம் இல்லை.
கடந்த காலங்களில் தமிழ் மக்களின் பிரச்சினைகள் பேசப்பட்டபோது 13 பிளஸ் என்று இலங்கை அரசு இந்தியாவுக்கு உறுதியளித்தது.
தற்போது 13ஆவது திருத்தத்தின் உள்ளடங்கலான காணி அதிகாரம் மற்றும் காவல்துறை அதிகாரத்தை வழங்க முடியாது என அரசுத் தலைவரே இந்திய தூதுக்குழுவிடம் திட்ட வட்டமாக தெரிவித்துள்ளார்.
அப்படியென்றால் இது 13 மைனஸ் ஆகவே அமையும்.
அதிகாரங்களை இல்லாது செய்து முன் வைக்கப்படுகின்ற திட்டம் முழுமையானதாக அமையாது என்றும் சுட்டிக்காட்டியுள்ளார்.
எனவே இலங்கைத் தமிழர் விவகாரம் தொடர்பில் இந்திய மத்திய அரசு இலங்கை அரசாங்கத்தின் மீது வலுவான போக்கையும் நிலைப்பாட்டையும் கடைப்பிடிக்க வேண்டும் என்று கேட்டுக்கொள்வதாகவும் தெரிவித்து அவர் இலங்கைத் தமிழர் தொடர்பில் இந்தியாவுக்கு ஒரு கடமைப்பாடு இருக்கின்றது. அது உணரப்பட வேண்டும் எனவும் வலியுறுத்தியுள்ளார்.
************
நோர்வே சிங்களத்தின் நண்பணா?
அரசுக்கும் தமிழ்த் தேசியக்கூட்டமைப்புக்கும் இடையில் நடைபெற்று வரும் பேச்சுக்களின் முன்னேற்றம் குறித்து இலங்கை அரசின் தூதுக்குழு நோர்வே அரசுடன் பேச்சு நடத்த இருக்கிறது.
நோர்வேயின் சர்வதேச விவகார அமைச்சர் எரிக்சொல் ஹெய்முடன் இலங்கைத் தூதுக்குழு பேச்சு நடத்தவிருக்கிறது.
அரசு கூட்டமைப்பு பேச்சுக் குழுவில் இடம்பெறும் அமைச்சர் நிமால் டி சில்வா தலைமையில் செல்லும் இலங்கைத் தூதுக்குழு நோர்வே அரசின் உயர் மட்டத்தலைவர்களுடன் பேச்சுக்களை நடத்தும் என்று நோர்வே தூதரக வட்டாரங்கள் தெரிவித்தன.
நோர்வேக்கும் இலங்கைக்கும் இடையில் நிலவிய முரண்பாடுகளை நீக்கி, நல்லுறவை கட்டி எழுப்பும் நோக்குடன் இந்த விஜயத்தை இலங்கை மேற்கொள்வதாகத் தெரிவிக்கப்பட்டது.
நோர்வே வாழ் தமிழ் மக்களுடன் இந்தக் குழுவினர் சந்திப்புக்களை நடத்தவுள்ளனர்.
மேலும் இலங்கையில் தற்போது மேற்கொள்ளப்பட்டு வரும் மீள்குடியேற்ற நல்லிணக்க நடவடிக்கைககள் தொடர்பிலும் நோர்வே அரசுக்கு தெரிவிக்கப்படவுள்ளது.
இதேவேளை இலங்கையின் கடற்தொழில் நீரியல்வள அமைச்சர் ராஜித சேனாரத்ன அண்மையில் ஐலண்ட் பத்திரிகைக்கு வழங்கிய நேர்காணலில் நோர்வே அரசுடனான உறவுகளை புதுப்பிப்பதற்கு மஹிந்த ஆர்வம் கொண்டுள்ளார் என்று தெரிவித்திருந்தது குறிப்பிடத்தக்கது.
***************

பதிவு எதற்கு? அச்சுறுத்தும் அரச பயங்கரவாதம்!
யாழ். குடாநாட்டில் பொதுமக்களையும் அவர்கள் தங்கியுள்ள வீடுகளையும் படம் பிடித்து பதிவு செய்யும் நடவடிக்கைகள் நேற்று பல்வேறு இடங்களிலும் இடம்பெற்றன.
இந்த நடவடிக்கைகளில் சில இடங்களில் இராணுவத்தினர் ஈடுபட்டனர்.
வேறு சில இடங்களில் இராணுவத்தினர் என்று தெரிவித்து சிவில் உடையில் வந்தவர்களும் ஈடுபட்டனர் என்றும் தெரிவிக்கப்பட்டது.
இதனால் பொதுமக்கள் மத்தியில் மனக்கிலேசம் ஏற்பட்டுள்ளது.
வீடுகளுக்கு வந்தவர்கள் குடும்ப பதிவு அட்டையிலுள்ள விவரங்களை தாம் கொண்டு வந்த படிவங்களில் நிரப்பியுள்ளனர்.
அத்துடன் வீட்டில் இருந்தவர்களைத் தனித் தனியாக படமும் எடுத்துள்ளனர்.
வீட்டில் எத்தனைபேர் இருக்கின்றீர்கள்? எல்லோரும் என்ன செய்கின்றனர். எத்தனைபேர் வேலை செய்கின்றனர். வீட்டில் எத்தனை அறைகள் உள்ளன என்று கேட்டு விவரங்களை பதிவு செய்துள்ளனர்.
சில இடங்களில் விடுதலைப் புலிகளால் கரைச்சல் இருக்கிறதா என்றும் கேட்டுள்ளனர்.
அத்துடன் அவர்கள் தாம் கொண்டுவந்த புகைப்படக் கருவியினால் வீட்டையும் படம் பிடித்துச் சென்றுள்ளனர்.
தங்களின் இந்தப் பணிகளை முடித்துக்கொண்டு வீட்டில் ஸ்ரிக்கர் ஒன்றையும் ஒட்டிச் சென்றுள்ளனர்.
இது குறித்து பிரதேச காவல் நிலையம் ஒன்றுடன் தொடர்புகொண்டு கேட்ட போது, தாம் அவ்வாறான பதிவு நடவடிக்கைகளில் ஈடுபடவில்லை. அத்துடன் இவ்வாறானதொரு நடவடிக்கை மேற்கொள்வது தொடர்பில் தமக்கு எதுவும் தெரியாது என்று தெரிவித்துள்ளனர்.
*************

காலத்தை கடத்தும் நாடகம்!
வடக்கு, கிழக்கு தமிழ் மக்களின் அரசியல் பிரச்சினைகளுக்கான தீர்வைக்காணும் விடயத்தை பாராளுமன்றத் தெரிவுக்குழுவொன்றிடம் ஒப்படைக்க அரசாங்கம் தீர்மானித்துள்ளது.
அதன் பிரகாரம் பிரஸ்தாப விடயத்துக்காக பாராளுமன்றத் தெரிவுக்குழுவொன்றை அமைக்குமாறு இவ்வாரத்துக்குள் அரசுத் தலைவரிடமிருந்து சபாநாயகர் சமல் ராஜபக்ஷவுக்கு உத்தியோகபூர்வமான கோரிக்கையொன்று விடப்படவுள்ளது.
தமிழ் மக்களின் அரசியல் பிரச்சினைகளுக்கான தீர்வைக் காணும் நோக்கில் அமைக்கப்படும் பாராளுமன்றத் தெரிவுக்குழுவில் அனைத்துக் கட்சிகளினதும் பிரதிநிதிகள் உள்ளடக்கப்படவுள்ளனர்.
தமிழ் மக்களுக்கான அரசியல் தீர்வை பாராளுமன்றத்தினூடாக முன்மொழிய வைப்பதன் மூலம் அதுதொடர்பில் எழக்கூடிய எதிர்ப்பலைகளை சமாளிக்க முடியும் என்றும் அரசாங்கம் கருதுவதாக தெரிய வருகின்றது.
அத்துடன் இவ்விடயம் தொடர்பில் கடந்த வெள்ளிக்கிழமை அரசாங்கத்தின் பங்காளிக்கட்சிகளின் தலைவர்களுடன் மஹிந்த ராஜபக்ஷ விரிவான கலந்துரையாடல் ஒன்றையும் நடாத்தியுள்ளார்.
************