எமது ஈழத்துக் கலைஞர்களின் பிரமாண்டமான சினிமா தயாரிப்பு தயார்

எமது ஈழத்துக் கலைஞர்களின் பிரமாண்டமான சினிமா தயாரிப்பு தயார்

பிரித்தானியாவில் இருந்து எமது ஈழதுது இழைஞர்களால் தயாரிக்கப்பட்டு பொலிவூட் சினிமாவைவிட எந்த தரத்திலும் குறையாது மிக பிரமாண்டமான முறையில் படமாக்கப்பட்ட ஓளிப்படப் பாடல் வெளியாகியுள்ளது, 

இப்பாடலை பிரித்தானியாவில் வைத்து, மன்னர் கால முறைப்படி, உயர் தொழிலநுட்ப்ப கருவிகளால், பல தெரிவு செய்யப்பட்ட இடங்களில் படமாக்கி யுள்ளனர், இப்பாடலை பார்க்கும் போது எமது கலைஞர்களும் உலகத்தரத்துக்கு இணையான படைபுக்களை தரமுடியும் என்ற நம்பிக்கை பிறக்கின்றது, 

இப்பாடலை நீங்களும் பார்த்து உங்கள் நண்பர்களுக்கும் பகிருங்கள்

 

பாடலை பார்க்க : LINK

நன்றி

செய்திகள் 15/11

அமெரிக்காவின் கவலை

உலக நாடுகளிலிருந்து இலங்கை தனிமைப்படுத்தக்கூடிய அபாயம் காணப்படுவதாக இலங்கைக்கான அமெரிக்கத் தூதுவர் பற்றீசியா புட்னீஸ் தெரிவித்திருந்தார் என விக்கிலீக்ஸ் தகவல் வெளியிட்டுள்ளது.

நல்லிணக்கத்தை ஏற்படுத்தல், குற்றச் செயல்களுக்கு தண்டனை வழங்குதல், மனித உரிமைகளை மேம்படுத்தல் உள்ளிட்ட விடயங்கள் குறித்து கூடுதல் கவனம் செலுத்தப்பட வேண்டும் என்பதே அமெரிக்காவின் எதிர்பார்ப்பு என அவர் தெரிவித்துள்ளார்.

மியன்மாரை மேற்குலக நாடுகள் ஒதுக்கி தனிமைப்படுத்தியுள்ளதனைப் போன்று இலங்கை தனிமைப்படுத்தப்படுவதனை அமெரிக்கா விரும்பவில்லை என அவர் குறிப்பிட்டுள்ளார்.

2009ஆம் ஆண்டு ஒக்ரோபர் மாதம் 30ஆம் திகதி இந்த குறிப்பு அமெரிக்க ராஜாங்கத் திணைக்களத்திற்கு அனுப்ப வைக்கப்பட்டுள்ளது.

மிக நீண்ட காலம் தமிழீழ விடுதலைப் புலிகளுடன் பிரிவினைவாத யுத்தம் நடைபெற்றதாகவும், யுத்தம் முடிவுக்குக் கொண்டு வரப்பட்டுள்ள நிலையில் நல்லிணக்கத்தை ஏற்படுத்த சந்தர்ப்பம் ஏற்பட்டுள்ளதாகவும் சுட்டிக்காட்டப்பட்டுள்ளது.

சந்தர்ப்பத்தை உரிய முறையில் பயன்படுத்திக் கொள்ளக் கூடிய தொலைநோக்குத் திட்டம் இலங்கை அரசிடம் காணப்படுகின்றதா என்பது கேள்விக்குரியே என அவர் குறிப்பிட்டுள்ளதாகத் விக்கிலீக்ஸில் தெரிவிக்கப்பட்டுள்ளது.          

******************

பிரதமரின் கண்டனம்

சிறிலங்காவில் நோர்வேயின் சமாதான முயற்சிகள் தோல்வி கண்டதற்கு, விடுதலைப் புலிகளும் சிறிலங்கா அரசும் தமது கொள்கையில் கடைப்பிடித்த இறுக்கமான நிலைப்பாடே காரணம் என்று நோர்வேயின் மீளாய்வு அறிக்கையில் கூறப்பட்டுள்ள கருத்தை நாடுகடந்த தமிழீழ அரசின் பிரதமர் வி.ருத்ரகுமாரன் நிராகரித்துள்ளார்.

நோர்வேயின் நிலையுடன் சிறிலங்கா அரசுடன் நடத்தப்பட பேச்சுகளின் போது விடுதலைப் புலிகளின் சட்டஆலோசகராக பங்கேற்ற அவர், பிபிசி தமிழோசைக்கு வழங்கிய செவ்வி ஒன்றிலே இந்தக் கருத்தை நிராகரித்துள்ளார்.

விடுதலைப் புலிகள் இந்தப் பேச்சுக்களில் உளச்சுத்தியுடனேயே ஈடுபட்டனர்.

பேச்சுக்கள் நடக்கும்போதே, விடுதலைப் புலிகள் அமைப்பை பயங்கரவாதம் என்ற கண்ணாடியின் ஊடாகப் பார்த்து, அவர்கள் கொண்டிருந்த சமபல நிலையைக் குலைத்த, அனைத்துலக சமூகம் தான் இந்தப் பேச்சுக்கள் தோல்வியடைந்ததற்குக் காரணம்.

விடுதலைப் புலிகள் இந்தப் பேச்சுக்களின் போது, பல விட்டுக் கொடுப்புகளைச் செய்தனர்.

போர்நிறுத்த மீறல்கள் விவகாரத்திலும், சிறிலங்கா அரசே பாரிய மீறல்களில் ஈடுபட்டது.

போர்நிறுத்த மீறல்கள் விடயத்தில், சிறிலங்கா போர்நிறுத்தக் கண்காணிப்பு குழு கூட, மீறல்கள் குறித்த எண்ணிக்கையை மேலோட்டமாகப் பார்க்கக் கூடாது, அதன் கீழுள்ள தார்ப்பரியத்தைப் பார்க்க வேண்டும் என்று குறிப்பிட்டிருந்தது என்று அவர் கூறியுள்ளார்.

இனப்பிரச்சினை விவகாரத்தில் புலம்பெயர் தமிழர்கள் முன்னணி நிலையை எடுக்காமல், தலைமைத்துவத்தை,சிறிலங்காவில் வசிக்கும் தமிழர்கள் எடுக்க வேண்டும் என்று நோர்வே அமைச்சர் எரிக் சொல்ஹெய்ம் குறிப்பிட்டதைப் பற்றிக் கருத்து தெரிவித்துள்ள வி.ருத்திரகுமாரன், புலம்பெயர் தமிழர்கள், உள்நாட்டில் களத்தில் வாழும் தமிழர்கள் என்ற பேதம் உண்மையானதல்ல.

சிறிலங்காவில் வாழும் தமிழர்களுக்கு தங்களது கருத்துக்களை சுதந்திரமாகக் கூறவும் செயல்படவும் தேவையான அரசியல் வெளி, இருக்கவில்லை.

சிறிலங்கா ஒரு ஜனநாயக ரீதியாகத் தோல்வியடைந்த நாடு என்று இந்த அறிக்கையே கூறுகிறது.

எனவே புலம்பெயர் தமிழர்கள், சிறிலங்கா பிரச்சினையில் குரல் கொடுப்பதில் தவறில்லை என்றும் அவர் கூறியுள்ளார்.

******************

அரசு அதிருப்தி

விடுதலைப் புலிகளுடனான அமைதி முயற்சிகள் தோல்வியடைந்தமை தொடர்பாக நோர்வேயால் வெளியிடப்பட்டிருக்கும் கருத்துக்கு இலங்கை அரசு இராஜதந்திர ரீதியிலான அதிருப்தியை வெளியிடத் தீர்மானித்துள்ளது.

இலங்கை அமைதி முயற்சிகள் தோல்வியடைந்தமைக்கு அரசும், புலிகள் இயக்கமும் பொறுப்பேற்கவேண்டுமெனக் கடந்த வாரம் நோர்வேயின் அரச சார்பற்ற அமைப்பு ஒன்று தனது அறிக்கையில் சுட்டிக்காட்டியிருந்தது.

அத்துடன், இது தொடர்பாக பல விமர்சனங்களையும் அது முன்வைத்திருந்தது.

இந்நிலையில், இந்த விமர்சனங்கள் இறைமையுள்ள அரசு ஒன்றின் நற்பெயருக்கு சர்வதேச ரீதியில் களங்கத்தை ஏற்படுத்துமென அரசு கருதுவதாக மூத்த அமைச்சர் ஒருவர் நேற்றுத் தெரிவித்தார்.

இதனடிப்படையில் இந்த விமர்சனங்கள் குறித்து நோர்வே அரசுக்கும் இந்த ஆய்வை நடத்திய நோறாட் அமைப்புக்கும் இராஜதந்திர ரீதியிலான அதிருப்தியை வெளியிட அரசு தீர்மானித்துள்ளது.

இன்னும் ஓரிரு தினங்களில் இந்த நடவடிக்கை மேற்கொள்ளப்படும் என்றும் அவர் குறிப்பிட்டார்.

நோர்வே வெளியிட்ட அறிக்கையில் சமாதான முயற்சியில் இலங்கையின் நடவடிக்கைகள் குறித்து பல்வேறு அதிர்ச்சித் தகவல்கள் அம்பலமானதால், பெரும் சங்டமான நிலைக்கு அரசு தள்ளப்பட்டுள்ளமை குறிப்பிடத்தக்கது.

******************

பல்கலைக்கழக மாணவர்களின் துணிவு

யாழ்.பல்கலைக்கழகத்தில் முன்னாள் இந்திய வெளிவிவகாரச் செயலர் சியாம் சரண் நிகழ்த்திய உரையை மாணவர்கள் புறக்கணித்துள்ளனர்.

கைலாசபதி கலையரங்கில் நேற்று பிற்பகல் இந்தியாவின் அயல்நாட்டுக் கொள்கையும், இந்திய - சிறிலங்கா நட்புறவும் என்ற தலைப்பில் முன்னாள் இந்திய வெளிவிவகாரச் செயலாளரும், நாடுகளின் அபிவிருத்திக்கான ஆராய்ச்சி மற்றும் தகவல் மையத்தின் தலைவருமான சியாம் சரண் உரையாற்றியிருந்தார்.

யாழ்.பல்கலைக்கழக துணைவேந்தர் பேராசிரியர் வசந்தி அரசரட்ணம் தலைமையில் இடம்பெற்ற இந்த நிகழ்வில் வடமாகாண ஆளுனர் ஜ.ஏ.சந்திரசிறி, யாழ்ப்பாணத்தில் உள்ள இந்திய துணை தூதரக அதிகாரி மகாலிங்கம், மற்றும் அரச, இராணுவ அதிகாரிகள் பலரும் கலந்து கொண்டனர்.

இந்த நிகழ்வில் வழமைக்கு மாறாக பெருமளவு இராணுவ அதிகாரிகள் கலந்து கொண்டிருந்தனர்.

அதேவேளை பல்கலைக்கழக மாணவர்கள் எவரும் இந்த நிகழ்வில் பங்கேற்கவில்லை.

குறைந்தளவிலான பல்கலைக்கழக விரிவுரையாளர்களே இதில் பங்குபற்றியிருந்தனர்.

இதனால் பெரும்பகுதி ஆசனங்கள் வெறுமையாகவே காட்சியளித்தன.

******************

எதேச்சதிகார அரசு

பாராளுமன்ற பெரும்பான்மை மூலம் நாட்டின் அனைத்து விடயங்களையும் மாற்றி அமைக்கக்கூடிய நிலை இன்று தோன்றியுள்ளதென ஐக்கிய தேசியக் கட்சியின் பாராளுமன்ற உறுப்பினர் தயாசிறி ஜயசேகர தெரிவித்துள்ளார்.

பாராளுமன்றை பிரதிநிதித்துவப்படுத்தும் தலைகளின் எண்ணிக்கையைக் கொண்டு அனைத்தையும் தீர்மானிப்பது கவலைக்குரிய விடயம் என அவர் சுட்டிக்காட்டியுள்ளார்.

106 அரச நிறுவனங்களுக்கு 6ஆயிரத்து, 300 கோடி நட்டம் ஏற்பட்டுள்ளதாகவும் அந்த நிறுவனங்களை யாரிடம் பொறுப்புக் கொடுக்கப் போகிறார்கள் எனவும் தயாசிறி ஜயசேகர கேள்வி எழுப்பியுள்ளார்.

பெற்றோலிய வளக் கூட்டுத்தாபனம், இலங்கை மின்சார சபை உள்ளிட்ட நிறுவனங்கள் இமாலய நட்டத்தில் சென்றுக் கொண்டிருப்பதாக அவர் சுட்டிக்காட்டியுள்ளார்.

குருநாகலில் நேற்று மாலை இடம்பெற்ற நிகழ்வொன்றில் உரையாற்றிய அவர் இக்கருத்துக்களை வெளியிட்டார்

******************

இராணுவ மயமாகும் கல்விக் கூடங்கள்

பல்கலைக்கழகங்களில் காவல்துறை காவலரண்களை அமைக்க ஒருபோதும் இடமளிக்கப் போவதில்லை என அனைத்து பல்கலைக்கழக மாணவர் சங்கம் தெரிவித்துள்ளது.

பல்கலைக்கழகங்களில் காவல்துறை காவலரண் என்ற உயர் கல்வி அமைச்சரின் கூற்றுக்கு பதிலளிக்கும் வகையில் அனைத்துப் பல்கலைக்கழக மாணவர் ஒன்றியத்தின் ஏற்பாட்டாளர் சஜ்சீவ பண்டார விடுத்துள்ள அறிக்கையில் இது தெரிவிக்கப்பட்டுள்ளது.

பல்கலைகழகத்தில் உள் மோதல்களை தவிர்க்கும் பொருட்டு பல்கலைக்கழக பகுதியில் காவல்துறை காவலரண்களை அமைக்கவுள்ளதாக உயர்கல்வி அமைச்சர் தெரிவித்துள்ளார்.

பல்கலைக்கழகத்தில் காவல்துறை என்ற பெயரில் குறித்த வேலைத் திட்டத்தை ஆரம்பிக்கவுள்ளதாகவும் அதற்கான முதல் கட்ட நடவடிக்கைகளை முன்னெடுத்துள்ளதாகவும் உயர் கல்வி அமைச்சர் கூறியுள்ளளார்.

இதற்கு முன்னர் 1984ம் ஆண்டு பல்கலைக்கழகங்களில் காவல்துறை காவலரண் ஏற்படுத்தப்பட்டு அதன்பின்னர் பல்கலைக்கழகத்தில் குற்றச் செயல்களை அரங்கேற்ற ஐதேக அரசு அப்போது செயற்பட்டது.

அதன்போது மாணவர்களின் சுதந்திரத்திற்கு முட்டுக்கட்டை போடப்பட்டது.

இரண்டு மாணவர்களுக்கு மேல் ஒன்றுகூட முடியாது, போஸ்ட்ர் கட்அவுட் காட்சிப்படுத்த முடியாது, அறிவுறுத்தல் மற்றும் கவிதைகூட எழுதி ஒட்ட முடியாத அளவிற்கு கட்டுப்பாடு விதிக்கப்பட்டது.

மாணவர்கள் பலர் கைது செய்யப்பட்டு சிலர் கொலையும் செய்யப்பட்டனர்.

கடந்த காலங்களில் பல்கலைக்கழக விடயங்களில் அரசாங்கத்தின் தலையீட்டை உற்றுநோக்கும் போது 1984ம் ஆண்டு போன்ற திட்டத்தை செயற்படுத்த முனைவதாக தெரிகிறது.

மாணவர் செயற்பாடுகளை அழிக்கும் திட்டம் இதுவென்பதில் சந்தேகம் இல்லை.

எவ்வாறான கஸ்ட நிலை வந்தாலும் பல்கலைக்கழகத்திற்குள் அரசாங்கத்தின் காவல்துறை காவலரண்களை அமைக்க அனுமதி அளிக்க மாட்டோம் என அவ்வறிக்கையில் குறிப்பிடப்பட்டுள்ளது.

******************

சர்வதேச மயப்படும் போராட்டம்

கடந்த காலங்களில் தமிழர்களின் விடுதலைப்போராட்டம் வெறும் இந்தியாவிற்கும், கொழும்பிற்கும் இடையிலேயே மட்டுப்படுத்தப்பட்டிருந்தது.

ஆனால் இப்போது புலம்பெயர்ந்து வாழும் இளையோர் அமைப்பினர் ஊடாகவும் மாணவர்கள் ஊடாகவும் போராட்டம் சர்வதேசமயமாக்கப்பட்டுள்ளது.

அண்மையில் கனடாவில் வாழுகின்ற தமிழ் மாணவர் ஒருவர் 17 வயதிலே வைத்தியர் பட்டம் பெற்றுள்ளதோடு தானாக புற்றுநோயை குணப்படுத்தக்கூடிய ஒரு கருவியை உருவாக்கியுள்ளார்.

இதைப்பார்த்த கனடா நாட்டின் புற்றுநோய் நிபுணர் ஒருவர் அதிர்ச்சியடைந்ததுடன் தான் கூட இந்த வயதுக்கு இவ்வாறான சாதனையை புரியவில்லை என்று கூறியதுடன் இந்த கருவியை வைத்து எதிர்காலத்தில் புற்றுநோயை குணப்படுத்தலாம் என நம்பிக்கை தெரிவித்துள்ளார்.

இவ்வாறான சாதனைகள் தமிழர்களை பெருமையடைய வைத்துள்ளது என மட்டக்களப்பு மாவட்ட தமிழ் தேசியக் கூட்டமைப்பின் பாராளுமன்ற உறுப்பினர் பா.அரியநேத்திரன் தெரிவித்தார்.

மட்டக்களப்பு அம்பிலாந்துறை கலைமகள் வித்தியாலயத்தில் மாணவர் கல்வி அபிவிருத்தி ஒன்றியத்தினர் நடாத்திவரும் இரவு நேரவகுப்பு ஆரம்பிக்கப்பட்டதன் 105வது நாள், பரிசளிப்பு விழா நிகழ்வில் கலந்துகொண்டு உரையாற்றிய போதே இதனைத் தெரிவித்தார்.

******************

செய்திகள் 12/11

வன்மையான கண்டனம்

தமிழர் பிரதேசமான மன்னார் மாவட்டத்துக்கு சிங்கள அரச அதிபரை நியமிப்பதற்கு அரசாங்கம் எடுத்த தீர்மானத்தை மிக வன்மையாகக் கண்டிப்பதாக தமிழ்த் தேசியக் கூட்டமைப்பு தெரிவித்துள்ளது.

இந்த நியமனத்தை அரசாங்கம் உடனடியாக ரத்துச் செய்ய வேண்டும் என்றும் கோரிக்கை விடுத்துள்ளது.

நூறு வீதம் தமிழ் மக்களை கொண்ட மன்னார் மாவட்டத்துக்கு அரச அதிபராக தமிழர் ஒருவரே நியமிக்கப்பட வேண்டும் என கூட்டமைப்பு வலியுறுத்தியுள்ளது.

சிங்களவரை நியமித்திருப்பதால் சாதாரண மக்களின் குறைபாடுகள் எவ்வாறு அரசாங்கத்தை சென்றடையும் என்றும் கேள்வியெழுப்பியுள்ளது.

மன்னார் மற்றும் முல்லைத்தீவு ஆகிய மாவட்டங்களுக்கான அரச அதிபர்கள் இடமாற்றத்தை உடனடியாக அமுலுக்கு வரும் வகையில் அரசாங்கம் நடைறைப்படுத்தியிருக்கின்றது.

இதன் பிரகாரம் மன்னார் மாவட்ட அரச அதிபராக சரத் ரவீந்திர என்ற பெரும்பான்மையைச் சேர்ந்த ஒருவர் நியமிக்கப்பட்டிருப்பது குறித்து கருத்து தெரிவிக்கையிலேயே கூட்டமைப்பின் பாராளுமன்ற உறுப்பினர் எம். சுமந்திரன் இதனைத் தெரிவித்தார்.

வடக்கில் அரச அதிபர்களாக சிங்களவர்களை இணைக்கும் அரசாங்கத்தின் திட்டத்திற்கு தமிழ்த் தேசியக் கூட்டமைப்பு எதிர்ப்பினையே வெளியிட்டு வந்தது.

தமது எதிர்ப்பினை தாம் பாராளுமன்றத்திலும் வெளிப்படுத்தியிருந்ததையடுத்து இந்த இடமாற்றங்கள் இடைநிறுத்தப்பட்டிருந்தன என சுட்டிக்காட்டினார்.

இருப்பினும் தற்போது அரசாங்கம் தனது திட்டத்தை அமுல்படுத்தி மன்னார் மாவட்டத்துக்கு சிங்களவர் ஒருவரை அரச அதிபராக நியமித்துள்ளது.

மன்னார் மாவட்டம் நூறு வீதம் தமிழர்களைக் கொண்டிருக்கின்றது.

இந்த நிலையில் அங்கு சிங்களவரை நியமித்திருப்பதன் மூலம் அந்த மக்களின் குறைபாடுகள் வெளிக்கொணரப்பட முடியாத நிலையொன்று ஏற்பட்டுள்ளது.

தற்போது நியமனம் பெற்றுள்ள அரச அதிபரின் தமிழ் மொழிப் புலமை எவ்வாறு உள்ளது என்பது தெரியாது. இதனால் சாதாரண மக்களின் நிலைமை மோசமாகியுள்ளது.

எனவே அரசாங்கத்தின் இந்த நிலைப்பாட்டினை தமிழ்த் தேசியக் கூட்டமைப்பினராகிய தாம் மிக வன்மையாகக் கண்டிப்பதாக குறிப்பிட்டார்.

அதுமட்டுமல்லாது தமிழர் பிரதேசங்களில் சிங்கள அதிபர்களை உள்வாங்கும் திட்டத்தை அரசாங்கம் நிறுத்திக் கொள்ளவேண்டும் என்பதுடன் தற்போது மன்னார் மாவட்டத்துக்கு அரச அதிபராக நியமிக்கப்பட்டுள்ள நியமனத்தை உடனடியாக ரத்து செய்து அங்கு தமிழ் மொழி மூல அரச அதிபர் ஒருவரை நியமிக்க அரசாங்கம் நடவடிக்கை எடுக்க வேண்டும் என்ற கோரிக்கையையும் முன்வைப்பதாக தெரிவிததார்.

எமது மக்களின் குறைநிறைகளைக் கண்டறிய தமிழ் மொழி மூல அரச அதிபரே அவசியம் எனவும் சுமந்திரன் தெரிவித்துள்ளார்.

****************

தள்ளிப் போகும் அறிக்கை

விசாரணை ஆணைக்குழுக்கள் சட்டத்தின் 2 ஆம் பிரிவின் கீழ் அரசுத் தலைவரால் நியமிக்கப்பட்ட கற்றுக்கொண்ட பாடங்களும் நல்லிணக்கமும் பற்றிய அரசுத் தலைவர் விசாரணை ஆணைக்குழுவின் இறுதி அறிக்கை எதிர்வரும் 20ம் திகதி உத்தியோகபூர்வதாக அரசுத் தலைவரிடம் கையளிக்கப்படவுள்ளதாக ஆணைக்குழுவின் ஊடக அதிகாரி லக்ஷ்மன் விக்ரமசிங்க தெரிவித்துள்ளார்.

நல்லிணக்க ஆணைக்குழுவின் அறிக்கை எதிர்வரும் 15ம் திகதி முழுமையாக நிறைவுக்கு வரும் நிலையில் 20ம் திகதி அது அரசுத் தலைவரிடம் கையளிக்கப்பட வேண்டும் என அரசுத் தலைவரின் செயலாளர் நல்லிணக்க ஆணைக்குழுவின் தலைவருக்கு அறிவுறுத்தியுள்ளார்.

கற்றுக்கொண்ட பாடங்களும் நல்லிணக்கமும் பற்றிய அரசுத் தலைவர் விசாரணை ஆணைக்குழு 2010 மே மாதம் 15ம் திகதி நியமிக்கப்பட்டது.

இவ்வாணைக்குழு 27 பொது சந்திப்புக்களையும் சுமார் 40 இடங்களில் 12 வெளிக்கள விஜயத்திலும் ஈடுபட்டதோடு வடக்கு கிழக்கு உள்ளிட்ட பல பகுதி மக்களிடமும் சாட்சியங்களைப் பெற்றிருந்தது.

ஆயிரத்திற்கும் மேற்பட்ட பொது மக்கள் நேரடி சாட்சியம் அளித்ததோடு 5100 கடிதம் மூலமான சாட்சியங்களும் ஆணைக்குழுவுக்கு கிடைக்கப்பெற்றது.

சுமார் 11 மாதங்களாகச் செயற்பட்ட நல்லிணக்க ஆணைக்குழு தனது அறிக்கையை தயாரித்து எதிர்வரும் 20ம் திகதி அரசுத் தலைவரிடம் கையளிக்கவுள்ளது.

****************

நிராகரிப்பு நாடகம் அரங்கேறியது

இலங்கை வருமாறு அரசுத் தலைவர் மஹிந்த ராஜபக்ஷ மாலைதீவில் நேரில் சந்தித்து விடுத்த அழைப்பை இந்தியப் பிரதமர் மன்மோகன் சிங் நிராகரித்துள்ளார்.

தமிழர்களுக்கு அதிகாரப்பகிர்வு வழங்குவது உட்பட இலங்கைத் தமிழர்கள் பிரச்சினை, இலங்கைக் கடற்படையால் தமிழக மீனவர்கள் தாக்கப்படும் பிரச்சினை ஆகியவற்றுக்கு நல்லதொரு தீர்வு ஏற்படும்வரை தன்னால் இலங்கைக்கு வர இயலாது என்று அரசுத் தலைவர் மஹிந்தவிடம் நேரில் தெரிவித்துள்ளார்.

தெற்கு ஆசிய நாடுகளின் கூட்டமைப்பான சார்க் அமைப்பின் மாநாட்டில் கலந்துகொள்ளச் சென்ற இலங்கை அரசுத் தலைவர் மஹிந்த ராஜபக்ஷ நேற்றுமுன்தினம் இந்தியப் பிரதமர் மன்மோகன் சிங்கை மாலைதீவில் தனியாகச் சந்தித்து இரு நாட்டு உறவுகள் குறித்து பேச்சு நடத்தினார்.

இந்தச் சந்திப்பின்போது இலங்கைத் தமிழர்களின் மீள்குடியமர்வு மற்றும் தமிழக மீனவர்கள் தொடர்ந்து தாக்கப்படும் பிரச்சினைகள் குறித்து பிரதமர் விளக்கம் கேட்டார் எனக் கூறப்படுகிறது.

****************

கடல்சார் பாதுகாப்பு

காலி நகரில் அடுத்தவாரம் நடைபெறவுள்ள கடல்சார் பாதுகாப்பு கருத்தரங்கில் பங்கேற்க, அமெரிக்கப் பாதுகாப்பு திணைக்களத்தின் தெற்கு மற்றும் தென்கிழக்காசியாவுக்கான பிரதி உதவிச்செயலர் றொபேட் ஸ்கெர் சிறிலங்கா செல்லவுள்ளார்.

எதிர்வரும் திங்கட்கிழமை இந்த இரண்டு நாள் கடல்சார் பாதுகாப்பு கருத்தரங்கு காலியில் உள்ள வெளிச்ச வீட்டு விடுதியில் ஆரம்பமாகவுள்ளது.

முதல்நாள் கருத்தரங்கில் அமெரிக்காவின் பாதுகாப்புத் திணைக்கள பிரதி உதவிச் செயலர் றொபேட் ஸ்கெர், பூகோள மற்றும் பிராந்திய கடல்சார் பாதுகாப்பில் பொதுவான மூலோபாயத்தின் முக்கியத்துவம் என்ற பொருளில் ஆய்வு ஒன்றை சமர்ப்பிக்கவுள்ளார்.

ஆசிய விவகாரங்களில் நிபுணரான இவர் முன்னதாக அமெரிக்க இராஜாங்கத் திணைக்களத்தில் பணியாற்றியிருந்தார்.

இந்தநிகழ்வில் சிறிலங்கா பாதுகாப்புச் செயலர் கோத்தாபய ராஜபக்சவும் உரையாற்றவுள்ளார்.

காலி கடல்சார் பாதுகாப்புக் கருத்தரங்கில் அவுஸ்ரேலியா, பிரான்ஸ், ஜப்பான், பாகிஸ்தான், தென்னாபிரிக்கா, இந்தியா, பிரித்தானியா, சீனா, அமெரிக்கா, மாலைதீவு, ஐக்கிய அரசு எமிரேட்ஸ், பங்களாதேஸ், கென்யா, நைஜீரியா, பிலிப்பைன்ஸ், தென்கொரியா, இந்தோனேசியா, மலேசியா, ஓமான், கட்டார் ஆகிய நாடுகள் பங்கேற்கவுள்ளன.

கடல்சார் பாதுகாப்பு மற்றும் அது சார்ந்த சவால்கள் குறித்த ஆய்வுகளை இந்தியா, அமெரிக்கா, சீனா, பாகிஸ்தான், தென்னாபிரிக்கா ஆகிய நாடுகளின் பிரதிநிதிகள் சமர்ப்பிக்கவுள்ளனர்.

இரண்டாவது நாள் அமர்விலும், அமெரிக்காவின் பசுபிக் கட்டளைப் பீடத்தைச் சேர்ந்த பிரிகேடியர் ஜெனரல் மைக்கேல் கிலென் கொம்ரன் ஆய்வு ஒன்றைச் சமர்ப்பிக்கவுள்ளார் என்பது குறிப்பிடத்தக்கது.

****************

தோற்றது ஸ்ரீலங்கா

2018ஆம் ஆண்டு பொதுநலவாய விளையாட்டுப் போட்டிகளை நடத்தும் உரிமையினை அவுஸ்திரேலியாவின் கோல்ட் கோஸ்ட் நகரம் வென்றெடுத்துள்ளது.

இதனால் ஹம்பாந்தோட்டையில் 2018ஆம் ஆண்டு பொதுநலவாய விளையாட்டுப் போட்டிகளை நடத்தும் இலங்கையின் கனவு வீணாகியுள்ளது.

இலங்கையின் ஹம்பாந்தோட்டை நகரமும் அவுஸ்திரேலியாவின் கோல்ட் கோஸ்ட் நகரமும் 2018ஆம் ஆண்டு பொதுநலவாய விளையாட்டுப் போட்டிகளை நடத்தும் உரிமையினை பெறுவதற்குப் போட்டியிட்டன.

இது தொடர்பான பொதுநலவாய விளையாட்டுச் சம்மேளனத்தின் வாக்கெடுப்பு நடைபெற்றது.

இவ்வாக்கெடுப்பில் அவுஸ்திரேலியாவின் கோல்ட் கோஸ்ட் நகரில் 2018ஆம் ஆண்டுக்கான பொதுநலவாய போட்டிகளை நடத்துவதற்கு 43 உறுப்பினர்கள் வாக்களித்திருந்தனர்.

இலங்கையில் குறித்த போட்டியினை நடத்துவதற்கு 27 உறுப்பினர்கள் மாத்திரமே வாக்களித்திருந்தனர்.

பொதுநலவாய போட்டிகளை நடத்தும் உரிமையினை ஐந்தாவது தடவையாக அவுஸ்திரேலியா கைப்பற்றியுள்ளமை குறிப்பிடத்தக்கது.

****************

18வது மகாநாடு எங்கு நடந்தென்ன?

18வது சார்க் உச்சி மாநாட்டை நேபாளத்தின் கத்மன்டு நகரில் நடத்த தீர்மானிக்கப்பட்டுள்ளது.

நேற்று மாலைத்தீவில் நிறைவுற்ற 17வது சார்க் உச்சி மாநாட்டின் இறுதியில் இத்தீர்மானம் எடுக்கப்பட்டுள்ளது.

இம்முறை சார்க் மாநாட்டில் வலய ஒத்துழைப்புக்கள் குறித்து நான்கு பொது உடன்படிக்கைகள் கைச்சாத்திடப்பட்டமை குறிப்பிடத்தக்கது.

****************

தொடரும் கடத்தல்கள்

மிறிஹாண ஜுபிலி கணுவ பிரதேசத்தில் உள்ள புத்தக கடை உரிமையாளர் ஒருவர் இனந்தெரியாத நபர்களால் வெள்ளை வான் ஒன்றில் கடத்திச் செல்லப்பட்டுள்ளார்.

ஜுபிலி கணுவ சந்தியில் நேற்று இரவு 8.35 அளவில் கோட்டே வீதியில் உள்ள புத்தக கடையை மூடிவிட்டு வெளியில் வந்தபோது தனது கணவரை வெள்ளை வானில் வந்தவர்கள் பலவந்தமாக இழுத்துச் சென்றதாக கடத்தப்பட்டவரின் மனைவியான யு.கே.ராஜிகா சுரங்கனி தெரிவித்துள்ளார்.

ஈ.எம்.துஸார சமிந்த பண்டார என்ற நபரே இவ்வாறு கடத்திச் செல்லப்பட்டுள்ளார்.

****************

செய்திகள் 11/11

மீண்டும் பேச்சு

இனப்பிரச்சினைக்கான தீர்வு தொடர்பில் இலங்கை அரசாங்கத்துடன் அடுத்தச் சுற்றுப் பேச்சுவார்த்தையை நடத்தத் தீர்மானித்துள்ளதாக தமிழ்த் தேசியக் கூட்டமைப்பு தெரிவித்துள்ளது.

இதன்படி அரசு - கூட்டமைப்புக்கு இடையிலான அடுத்துச் சுற்றுப் பேச்சுவார்த்தை எதிர்வரும் 16ம் திகதி கொழும்பில் இடம்பெறவுள்ளதாக தமிழ்த் தேசியக் கூட்டமைப்பின் பாராளுமன்ற உறுப்பினர் எம்.ஏ.சுமந்திரன் தெரிவித்தார்.

தமிழ்த் தேசியக் கூட்டமைப்பால் அரச தரப்பிடம் கடந்த சந்திப்புக்களின் போது சமர்பிக்கப்பட்டுள்ள கோரிக்கைகளுக்கு இணக்கம் காண்பது தொடர்பில் இதன்போது கலந்துரையாடப்படவுள்ளதாக சுமந்திரன் தெரிவித்தார்.

அடுத்தச் சுற்றுப் பேச்சுவார்த்தையில் தமிழ்த் தேசியக் கூட்டமைப்பை பிரதிநிதித்துவப்படுத்தி அதன் தலைவர் இரா.சம்பந்தன், பொதுச் செயலாளர் மாவை சேனாதிராஜா, சுரேஸ் பிரேமச்சந்திரன் ஆகியோர் கலந்து கொள்ளவுள்ளதாக அவர் குறிப்பிட்டார்.

தமிழ்த் தேசியக் கூட்டமைப்பின் முக்கிய பிரமுகர்கள் அமெரிக்கா, கனடா, லண்டன் உள்ளிட்ட நாடுகளுக்குச் சென்று இலங்கையின் இனப்பிரச்சினை, தமிழர்கள் எதிர்நோக்கும் சிக்கல்கள் குறித்து கலந்துரையாடிய நிலையில் அரச தரப்புடனான அடுத்தச் சுற்றுப் பேச்சுவார்த்தை முக்கியம் வாய்ந்ததாக அமையுமென கருதப்படுகிறது.

***************

தொடரும் அறிக்கைகள்

இலங்கையின் சமாதான முன்னநகர்வுகள் குறித்து நோர்வேயில் இன்று விசேட அறிக்கை ஒன்று வெளியிடப்படவுள்ள நிலையில் இந்நிகழ்வில் பங்குகொள்ளவென இலங்கை அரசாங்கத்தை பிரதிநிதித்துவப்படுத்தி கொழும்பு மாநகர சபை எதிர்கட்சித் தலைவர் மிலிந்த மொறகொட நோர்வே சென்றுள்ளார்.

அரசுத் தலைவர் மஹிந்த ராஜபக்ஷ்வே மிலிந்த மொறகொடவை நோர்வே அனுப்ப பணித்துள்ளதாக தெரியவருகிறது.

முன்னாள் அமெரிக்க இராஜாங்க செயலாளர் ரிச்சட் ஆர்மிடெஜ் தலைமையில் இவ்வறிக்கை வெளியிடப்படவுள்ளது.

இவ்வறிக்கையானது கிறிஸ்டியன் மிச்சேல்சன் கல்வியகத்தால் தயாரிக்கப்பட்டுள்ளதாக தெரிவிக்கப்படுகிறது.

இலங்கையின் இறுதிக் கட்ட யுத்தம், 2009 சமாதான உடன்படிக்கை காலம், தமிழ் புனர்வாழ்வு அமையம், விடுதலைப் புலிகளின் சமாதான செயலகம், அரச சார்பற்ற நிறுவனங்கள் என்பவை குறித்து அறிக்கையில் தகவல் வெளியிடப்பட்டுள்ளதாக தெரியவருகிறது.

***************

சந்திக்கும் உற்ற நண்பர்கள்

அரசுத் தலைவர் மஹிந்த ராஜபக்ஷவிற்கும் இந்திய பிரதமர் மன்மோகன் சிங்கிற்கும் இடையில் நேற்று மாலைத்தீவில் விசேட சந்திப்பு இடம்பெற்றுள்ளது.

இச்சந்திப்பின்போது வடக்கு கிழக்கில் மேற்கொள்ளப்பட்டு வரும் மீள்குடியேற்றம், இந்திய அரசாங்கத்தினால் வடக்கில் மேற்கொள்ளப்பட்டு வரும் 50 ஆயிரம் வீட்டு திட்டம் மற்றும் இனப்பிரச்சினை தொடர்பான பேச்சுவார்த்தை தொடர்பில் கலந்துரையாடப்பட்டுள்ளதாக அரசுத் தலைவர் ஊடகப் பிரிவு தகவல்கள் தெரிவிக்கின்றன.

மேலும் மீன்பிடியில் ஈடுபடும் மீனவர்கள் எதிர்நோக்கும் பிரச்சினைகள் குறித்தும் கலந்துரையாடப்பட்டுள்ளது.

இதேவேளை, மீள்குடியேற்றம் மற்றும் புனர்வாழ்வுக்கென இலங்கைக்கு 110 மில்லியன் அமெரிக்க டொலர்களை நிதியுதவியாக வழங்க இந்திய இச்சந்திப்பின்போது இணக்கம் வெளியிட்டுள்ளது.

***************

அறிவில்லாத அதிகாரி?

ஜெனிவாவில் நடைபெறும் ஐக்கிய நாடுகளின் சித்திரவதைகளுக்கு எதிரான மாநாட்டில் இலங்கையின் சார்பில் பங்கேற்கும் முன்னாள் சட்டமா அதிபர் மொஹான் பீரிஸ் அடிப்படை குற்றவியல் சட்டஅறிவுகளை கொண்டிருக்கவில்லை என ஆசிய மனித உரிமைகள் ஆணைக்குழு தெரிவித்துள்ளது.

இலங்கையில் இடம்பெற்ற மனித உரிமை மீறல் மற்றும் சித்திரவதைகள் குறித்த குற்றச்சாட்டுக்கள் தொடர்பில் கடந்த 9 ஆம் திகதி அவருக்கு பதிலளிக்க வாய்ப்பு வழங்கப்பட்டது.

இன்போது மொஹான் பீரிஸினால் சரியான புள்ளிவிபரங்களையும் சம்பவங்களையும் கூறமுடியவில்லை.

1978 ஆம் ஆண்டின் அரசியலமைப்பின் கீழ் இலங்கையின் உரிய சட்டமுறைகள் இருப்பதாக குறிப்பிட்டார்.

எனினும் அதனை கண்டித்துள்ள ஆசிய மனித உரிமைகள் ஆணைக்குழு நடைமுறை நிறைவேற்று அதிகாரம் கொண்டு அரசுத் தலைவர் முறையின் கீழ் அந்த சட்டங்கள் வலுவிழந்துள்ளதாக குறிப்பிட்டுள்ளது.

இலங்கை பாதுகாப்பு அமைச்சின் இணைத்தளத்தில் சில சட்டத்தரணிகளை துரோகிகள் என்று குறிப்பிடப்பட்டமை மற்றும் ஊடகவியலாளர்கள் மற்றும் மனித உரிமை காப்பாளர்கள் தாக்கப்பட்டமை குறித்து மொஹான் பீரிஸ் பதில் எதனையும் வழங்க மறுத்துவிட்டார்.

பாதுகாப்பு அமைச்சின் இணையத்தளத்தில் சில சட்டத்தரணிகள் துரோகிகள் என்ற குறிப்பிடப்பட்டமை எவ்வித பாதிப்புக்களையும் ஏற்படுத்தவில்லை என்றும் அவர் தெரிவித்துள்ளார்.

கடந்த அரசுத் தலைவர் தேர்தலின் போது ஊடகவியலாளார் பிரகீத் எக்னெலிகொட காணாமல் போனமை குறித்து கேள்வி எழுப்பப்பட்டபோது அவர் இலங்கைக்கு எதிரான பிரசாரத்துக்காக வெளிநாடு ஒன்றில் அகதியாக சென்றிருக்கலாம் என்று மொஹான் பீரிஸ் பதிலளித்துள்ளார்.

அவரால் வலுவான ஆதாரங்களை சமர்ப்பிக்க முடியவில்லை.

சித்திரவதைகளுக்கு எதிரான சர்வதேச பிரகடனம் கட்டாயம் காணாமல் போனவர்கள் தொடர்பிலான பிரகடனம் சர்வதேச யுத்த நீதிமன்றம் தொடர்பில் கேட்கப்பட்ட கேள்விகளுக்கு பீரிஸ் பதிலளிக்கவில்லை.

வெலியமுன என்பவரது வீட்டின் மீது கிரனைட் தாக்குதல் நடத்தப்பட்டமை குறித்து கேட்டபோது மொஹான் பீரிஸ் அளித்த பதில்களில் அவருக்கு அடிப்படை சட்டஅறிவு இல்லை என்பதை உணர்த்தியதாக ஆசிய மனித உரிமைகள் ஆணைக்குழு தெரிவித்துள்ளது.

இலங்கை சித்திரவதைகள் தொடர்ல் பூஜ்ஜிய நிலை ஏற்படவேண்டும் என்ற அடிப்படையில் செயற்படுவதாக அவர் குறிப்பிட்டபோது அதனை சித்திரவதைகள் தொடர்ன ஐக்கிய நாட்டு அதிகாரிகள் ஏற்றுக்கொள்ளவில்லை.

அவரின் பதில்கள் உண்மையை மறைப்பதாக அமைந்துள்ளதாகவும் ஆசிய மனித உரிமைகள் ஆணைக்குழு குறிப்பிட்டுள்ளது.

***************

அம்பலமாகும் அடாவடி

நட்டமடையும் சொத்துக்களை சுவீகரிக்கும் சட்ட மூலம் நிறைவேற்றப்பட்டதன் மூலம் அரசாங்கத்தின் எதேச்சாதிகாரப் போக்கு அம்பலமாகியுள்ளது என ஐக்கிய தேசியக் கட்சி குற்றம் சுமத்தியுள்ளது.

இச்சட்டமூலத்திற்கு அரசியல் கட்சிகள், பௌத்த பிக்குகள் உள்ளிட்ட பல்வேறு தரப்பினர் எதிர்ப்பை வெளியிட்ட போதிலும் அரசாங்கம் பிடிவாதமாக இந்த சட்டமூலத்தை நாடாளுமன்றில் நிறைவேற்றிய இந்த நடவடிக்கை வன்மையாகக் கண்டிக்கப்பட வேண்டியது என ஐக்கிய தேசியக் கட்சியின் பொதுச் செயலாளர் திஸ்ஸ அத்தநாயக்க தெரிவித்துள்ளார்.

அரசாங்கம் ஜனநாயகத்திற்கு மதிப்பளித்திருந்தால் சட்ட மூலத்தில் திருத்தங்களை மேற்கொண்டு நாடாளுமன்றில் சமர்ப்பித்திருக்க முடியும்.

திடீரென இந்த சட்ட மூலம் நிறைவேற்றப்பட்டதன் மூலம் அரசாங்கத்தின் சர்வாதிகாரப் போக்கு புலனாகியுள்ளது.

இவ்வாறான நடவடிக்கைகள் சர்வதேச முதலீட்டாளர்களை அச்சமடையச் செய்யும் எனவும் அவர் சுட்டிக்காட்டியுள்ளார்.

***************

கெஞ்சும் ஸ்ரீலங்கா

சர்வதேச சமூகம், அடிப்படையற்ற குற்றச்சாட்டுக்களை சுமத்தக் கூடாது என கனடாவிற்கான இலங்கை உயர்ஸ்தானிகர் சித்ராங்கனி வாகீஸ்வரா தெரிவித்துள்ளார்.

இலங்கையில் சமாதானம் நிலைநாட்டப்படுவதற்கு அனைத்து தரப்பினரும் ஒத்துழைப்பு வழங்க வேண்டும்.

தாருஸ்மன் அறிக்கை அடிப்படையற்றது, அதனை உத்தியோகபூர்வமான ஆவணமாக பயன்படுத்த முடியாது எனத் தெரிவித்துள்ளார்.

கற்றறிந்த பாடங்கள் மற்றும் நல்லிணக்க ஆணைக்குழுவின் அறிக்கை சமர்ப்பிக்கப்படுவதற்கு முன்னதாக இவ்வாறான குற்றச்சாட்டுக்கள் முன்வைப்பதில் அர்த்தமில்லை.

இவ்வாறான குற்றச்சாட்டுக்களின் மூலம் சுயாதீனமான விசாரணைகளுக்கு இடையூறு ஏற்படக்கூடுமென அவர் தெரிவித்துள்ளார்.

கடந்த 30 ஆண்டுகளாக தமிழீழ விடுதலைப் புலிகளினால் மேற்கொள்ளப்பட்ட குற்றச் செயல்கள் தொடர்பில் ஏன் கவனம் செலுத்தப்படவில்லை என அவர் கேள்வி எழுப்பியுள்ளார்.

சர்வதேச அரங்கத்தில் ஸ்ரீலங்காவின் முகத்திரை கிழிந்து வரும் நிலையில் அதனை எதிர்கொள்ள முடியாத ஸ்ரீலங்காவின் பிரதிநிதிகள் இவ்வாறு கூக்குலிடுகின்றனர் என அவதானிகள் சுட்டிக்காட்டியுள்ளனர்.

எப்படித்தான் இவர்கள் முயன்றாலும் உண்மைகள் வெளிவருவதை அவர்களால் தடுக்க முடியாது என்ற உண்மையை அவர்கள் உணர்ந்து கொள்ள வேண்டும் எனவும் தெரிவித்துள்ளனர்.

***************

கவலைப்படும் ஜே.வி.பி

தமது செயற்பாட்டினால் விடுதலைப்புலிகளைத் தோற்கடித்து சர்வதிகார ஆட்சியை ஏற்படுத்த வழிவகுக்கப்பட்டது என ஜே.வி.பி யின் முன்னாள் பாராளுமன்ற உறுப்பினர் லால் காந்த தெரிவித்துள்ளார்.

2003 ஆம் ஆண்டு ஸ்ரீலங்கா சுதந்திரக்கட்சியை போன்ற முதலாளித்துவ கட்சிகளுடன் ஜே.வி.பி கூட்டமைத்து செயற்பட்டமை காரணமாக நாட்டுக்கு பல வெற்றிகள் கிடைத்தன.

அதேபோல கூட்டமைப்பை ஏற்படுத்தியமை காரணமாக பல தீமைகளும் ஏற்பட்டுள்ளன என்றும் அவர் குறிப்பிட்டுள்ளார்.

தமது கூட்டமைப்பினால் தமிழீழம் என்ற எண்ணத்தை கொண்ட தமிழீழ விடுதலைப்புலிகளை தோற்கடிக்க முடிந்தது எனவும், ஆனால் நாட்டில் சர்வதிகார முதலாளித்துவ அரசாங்கம் உருவாவதை ஜே.வி.பியினால் தடுக்கமுடியாமல் போய்விட்டது என்றும் அவர் தெரிவித்துள்ளார்.

இந்தநிலையில் தற்போது தமது கட்சியின் நோக்கம் சர்வதிகார ஆட்சியை முடிவுக்கொண்டு வருவதாகும் என்று லால் காந்த குறிப்பிட்டுள்ளார்.

***************

தொடரும் கொலைகள்

யாழ்ப்பாணம் வரணி கரப்பன்குறிச்சி அரசினர் தமிழ்க்கலவன் பாடசாலையைச் சேர்ந்த அதிபர் வெட்டிக்கொலை செய்யப்பட்ட நிலையில் அவரது சடலம்  இன்று வெள்ளிக்கிழமை காலை மீட்கப்பட்டுள்ளதாக யாழ். காவல்துறையினர் தெரிவித்தனர்.

40 வயதான சிவசுப்பிரமணியம் தயாபரன் என்பவரே இவ்வாறு சடலமாக மீட்கப்பட்டவர் ஆவார்.

யாழ். கந்தர்மடம் ரயில்வே வீதியிலுள்ள அவரது வீட்டின் இரண்டாம் மாடியிலுள்ள அறையொன்றிலிருந்தே அவரது சடலம் மீட்கப்பட்டதாகவும் அவரது வயிறு மற்றும் கழுத்துப் பகுதிகளில் கத்தியால் குத்தப்பட்ட காயங்கள் காணப்படுவதாகவும் யாழ். காவல்துறையினர் குறிப்பிட்டனர்.

யாழ். கந்தர்மடம் ரயில்வே வீதியை சொந்த இடமாகவும் மீசாலையை வசிப்பிடமாகவும் கொண்ட இவர், தனது சொந்த வீட்டிற்கு அவ்வப்போது வந்துசெல்வது வழக்கமாகும்.

அவ்வாறே இவர் தனது சொந்த வீட்டிற்கு நேற்று வியாழக்கிழமை வந்த பின்னர் மீண்டும் மீசாலையிலுள்ள தனது வீட்டிற்கு திரும்பிச்செல்லவில்லையெனவும் இதனால் அவரைத் தேடி கந்தர்மடம் ரயில்வே வீதியிலுள்ள வீட்டிற்கு உறவினர்கள் வந்தபோது அவர் சடலமாக கிடப்பதைக் கண்டனர்.

பின்னர் இது தொடர்பில் அவரது உறவினர்கள் யாழ். காவல்துறையினருக்கு தெரியப்படுத்தவே காவல்துறையினர் சம்பவ இடத்திற்கு விரைந்து சடலத்தை மீட்டுள்ளனர்.

குறித்த வீட்டின் கீழ்த்தளம் இளைஞர்கள் சிலருக்கு வாடகைக்கு விடப்பட்ட நிலையில் அவ்வீட்டின் இரண்டாம் மாடியிலேயே குறித்த நபர் அவ்வப்போது தங்கிச்செல்வது வழமையாகுமெனத் தெரிவிக்கப்படுகிறது.

இக்கொலைச் சம்பவம் தொடர்பில் யாழ். காவல்துறையினர் விசாரணைகளை மேற்கொண்டு வருகின்றனர்

***************

செய்திகள் 06/11

பிரித்தானியா கோரிக்கை

மனிதஉரிமை மீறல் சம்பவங்கள் தொடர்பாக விசாரணைகள் நடத்தப்பட வேண்டும் என்றும், அதற்குப் பொறுப்பானவர்கள் சட்டத்தின் முன் நிறுத்தப்பட வேண்டும் என்றும் சிறிலங்காவிடம் கோரியிருப்பதாக பிரித்தானிய வெளிவிவகார மற்றும் கொமன்வெல்த் விவகார அமைச்சர் அலிஸ்ரெயர் பேர்ட் தெரிவித்துள்ளார்.

பிரித்தானியா நாடாளுமன்றத்தில், உறுப்பினர் ஒருவர் கடந்தவாரம் எழுப்பிய கேள்வி ஒன்றுக்குப் பதிலளித்த போதே அவர் இவ்வாறு கூறியுள்ளார்.

இந்த ஆண்டின் தொடக்கத்தில் சிறிலங்காவுக்கு தாம் மேற்கொண்ட பயணத்தின் போது, இராணுவ, பாதுகாப்பு, காவல்துறைக்கான கருவிகளை ஏற்றுமதி செய்வது தொடர்பான எந்த விடயங்கள் குறித்தும் பேசப்படவில்லை என்றும் அவர் தெரிவித்துள்ளார்.

சிறிலங்காவின் பொருளாதார அபிவிருத்தி அமைச்சர் பசில் ராஜபக்ச, பாதுகாப்புச் செயலர் கோத்தாபய ராஜபக்ச, வெளிவிவகார அமைச்சர் ஜி.எல்.பீரிஸ் ஆகியோருடனேயே தாம் பேச்சு நடத்தியதாகவும் அவர் குறிப்பிட்டுள்ளார்.

சிறிலங்காவின் மனிதஉரிமை நிலைமைகள் தொடர்பாக பிரித்தானிய வெளிவிவகார மற்றும் கொமன்வெல்த் பணியகம் வெளியிட்டுள்ள மனிதஉரிமைகள் மற்றும் ஜனநாயகம்-2010 என்ற அறிக்கையில் விபரமாக கூறப்பட்டுள்ளது.

அதில் சிறிலங்கா கவலைக்குரிய நாடாக பட்டியலிடப்பட்டுள்ளது.

கொழும்பிலுள்ள பிரித்தானியத் தூதரகம் தொடர்ந்து நிலைமைகளை கண்காணித்து வருகிறது.

தமது கரிசனைகளை தொடர்ச்சியாக சிறிலங்கா அரசுக்கு எழுப்பி வருவதாகவும், மிகஅண்மையில் கூட, சிறிலங்கா வெளிவிவகார அமைச்சருடன் பேசியதாகவும் தெரிவித்துள்ளார்.

பாதிக்கப்படக் கூடிய குழுக்களின் மனிதஉரிமை நிலைமைகள் முன்னேற்றப்பட வேண்டும் என்று தாம் தொடர்ச்சியாக சிறிலங்கா அரசிடம் வலியுறுத்தி வருவதாகவும் குறிப்பிட்டார்.

மனிதஉரிமை மீறல்கள் குறித்து விசாரிக்கப்பட்டு அதற்குப் பொறுப்பானவர்கள் நீதியின் முன் நிறுத்தப்பட வேண்டும் என்று கூறி வருவதாகவும் அலிஸ்ரெயர் பேர்ட் மேலும் கூறியுள்ளார்

*******************

ஏமாற்றும் அறிக்கை தயார்

இலங்கையின் கற்றுக்கொண்ட பாடங்கள் மற்றும் நல்லிணக்க ஆணைக்குழுவின் அறிக்கை இந்த வாரத்தில் அரசுத் தலைவரிடம் கையளிக்கப்படவுள்ளது.

தமது அறிக்கை நாளை 7 ஆம் திகதி தயாராகிவிடும் என்று குழுவின் பேச்சாளர் லக்ஸ்மன் விக்கிரமசிங்க தெரிவித்துள்ளார்.

ஏற்கனவே இந்த அறிக்கை நவம்பர் 15 ஆம் திகதிக்கு முன்னர் அரசுத் தலைவரிடம் கையளிக்கப்படும் என்று காலவரையறை குறிக்கப்பட்டிருந்தது.

சர்வதேசத்தினால் இலங்கையின் போர்க்குற்ற பொறுப்புக்கூறல் அறிக்கையாக நோக்கப்படும் இந்த அறிக்கையில் சுமார் 5 ஆயிரம் எழுத்து மூல முறைப்பாடுகள் மற்றும் சுமார் 1000 நேரடி சாட்சியங்கள் அடக்கப்பட்டுள்ளன.

இந்தநிலையில் அறிக்கையின் உள்ளடக்கத்தை வெளியிடும் உரிமை அரசுத் தலைவருக்கே உண்டு என்று விக்கிரமசிங்க குறிப்பிட்டார்.

*******************

தன்னார்வ தொண்டு நிறுவனங்கள் மூடல்

இலங்கையில் சுமார் 600 உள்நாட்டு மற்றும் வெளிநாட்டு தன்னார்வ தொண்டு நிறுவனங்கள் மூடப்பட்டுள்ளன.

2009ம் ஆண்டு மே மாதம் யுத்தம் நிறைவடைந்ததன் பின்னர் இதுவரையில் நாட்டில் இயங்கி வந்த 600 தன்னார்வ தொண்டு நிறுவனங்கள் மூடப்பட்டுள்ளதாகத் தெரிவிக்கப்படுகிறது.

அநேகமான தன்னார்வ தொண்டு நிறுவனங்கள் போதியளவு நிதியில்லாத காரணத்தினால் தொடர்ந்தும் இயங்க முடியாது மூடப்பட்டுள்ளன.

வெளிநாட்டு நன்கொடையாளர்கள் திட்டங்களை நிராகரித்தமை, அரசாங்கத்தின் ஒத்துழைப்பின்மை போன்ற காரணிகளினாலும் தன்னார்வ தொண்டு நிறுவனங்கள் மூடப்பட்டுள்ளன.

யுத்தம் நிறைவடைந்த காலத்தில் இலங்கையில் மொத்தமாக 1300 உள்நாட்டு வெளிநாட்டு தன்னார்வ தொண்டு நிறுவனங்கள் இயங்கி வந்தன.

தற்போது இதில் 600 தன்னார்வ தொண்டு நிறுவனங்கள் மூடப்பட்டுள்ளன.

நாட்டுக்கு குந்தகம் ஏற்படுத்தக் கூடிய செயற்பாடுகளில் ஈடுபட்ட சில தன்னார்வ தொண்டு நிறுவனங்களை பாதுகாப்பு அமைச்சு தடை செய்துள்ளது.

இலங்கையில் இயங்கி வரும் சகல தன்னார்வ தொண்டு நிறுவனங்களும் பதிவுக்கு உட்படுத்தப்பட்டு பட்டியல்படுத்தப்படும் என பாதுகாப்பு அமைச்சு தெரிவித்துள்ளது.

*******************

ஆலோசனைக்கு இடமில்லை

போருக்குப் பிந்திய இராணுவ மூலோபாயம் குறித்து ஐதேக தலைவர் ரணில் விக்கிரமசிங்க தனக்குப் புத்திமதி சொல்லத் தேவையில்லை என்றும், அவரது ஆலாசனை தனக்குத் தேவையில்லை என்றும் சிறிலங்கா பாதுகாப்புச் செயலர் கோத்தாபய ராஜபக்ச கூறியுள்ளார்.

நோர்வேயின் நடுநிலையுடனான போர்நிறுத்த உடன்பாட்டையும், போர் முயற்சிகளையும் மோசமாக கையாண்ட ஐதேக தலைவர், இராணுவ மற்றும், வெளிவிவகாரக் கொள்கைகள் தொடர்பாக தீவிரமாக எடுத்துக் கொள்வார் என்று எதிர்பார்க்க முடியாது என்றும் அவர் கோபத்துடன் கூறியுள்ளார்.

மகிந்த ராஜபக்ச அரசாங்கம் விடுதலைப் புலிகளின் சொத்துக்களை பறிமுதல் செய்து பொதுமக்களின் நலனுக்குப் பயன்படுத்த வேண்டும் என்று ஐதேக தலைவர் ரணில் விக்கிரமசிங்க கூறியிருந்த கருத்து தொடர்பாக பதிலளித்த போதே அவர் இவ்வாறு கூறியுள்ளார்.

போருக்குப் பிந்திய அபிவிருத்தித் திட்டங்கள், விருத்தியடைந்துள்ள சுற்றுலாத்துறை, மற்றும் முதலீடுகள், தீவிரவாத தாக்குதல் அச்சமின்றி வாழும் தமிழ், சிங்கள, முஸ்லிம் மக்கள் - இவையெல்லாம் ரணில் விக்கிரமசிங்கவின் கண்களுக்குத் தெரியவில்லை என்றும் அவர் குறிப்பிட்டுள்ளார்.

சிறிலங்காவின் பிரதான எதிர்க்கட்சியாக ஐதேக இருந்தாலும், போருக்கு ஆதரவு வழங்கவில்லை.

இராணுவ வழிமுறையின் மூலம் விடுதலைப் புலிகளை மண்டியிடச் செய்ய முடியும் என்று ஐதேக நம்பவில்லை என்றும் கோத்தாபய ராஜபக்ச கூறியுள்ளார்.

நான்காவது கட்ட ஈழப்போர் நடந்த காலத்திலோ அல்லது போருக்குப் பின்னரோ, இராணுவத்துக்கு ஆதரவு தெரிவித்து ஐதேகவினாலோ அல்லது தன்னாலோ வெளியிடப்பட்ட எந்தவொரு அறிக்கையாவது ரணில் விக்கிரமசிங்கவினால் காட்ட முடியுமா? என்றும் கோத்தாபய ராஜபக்ச சலால் விடுத்துள்ளார்.

தேசிய பாதுகாப்பு விடயத்தில் அரசியல் விளையாட்டுகளில் ஈடுபடாமல், பொறுப்புக்கூறும் விவகாரம் தொடர்பாக ஐதேகவின் நிலைப்பாட்டை வெளிப்படுத்த முடியுமா? என்றும் அவர் ரணில் விக்கிரமசிங்கவிடம் சவால் விடுத்துள்ளார்.

ஐதேகவின் பலவீனத்தைப் பயன்படுத்திக் கொண்டு விடுதலைப் புலிகள் தமது மரபுவழி போர்ப்பலத்தை அதிகரித்துக் கொண்ட விபரங்கள் வெளியாகி விடும் என்று ரணில் விக்கிரமசிங்க அச்சம் கொண்டுள்ளதாகவும் கோத்தாபய ராஜபக்ச தெரிவித்துள்ளார்.

*******************

அமைச்சர்களுக்கு எச்சரிக்கை

அரசாங்கத்திற்காக குரல் கொடுக்காத அமைச்சர்களுக்கு எதிராக நடவடிக்கை எடுக்கப்பட உள்ளதாக சிங்கள பத்திரிகையொன்று செய்தி வெளியிட்டுள்ளது.

அமைச்சரவைக் கூட்டங்களில் கலந்து கொள்ளாத, அமைச்சுக்களின் நடவடிக்கைகளை மேற்பார்வை செய்யாத, நாடாளுமன்றில் அரசாங்கத்திற்காக குரல் கொடுக்காத அமைச்சர்கள் தொடர்பில் அறிக்கை சமர்ப்பிக்குமாறு அரசுத் தலைவர் செயலகத்திற்கு அரசுத் தலைவர் உத்தரவிட்டுள்ளார்.

சில அமைச்ர்கள் அரசாங்கத்திற்கு எதிரான குற்றச்சாட்டுக்கள் தொடர்பில் கருத்துக்களை வெளியிடுவதில்லை என தெரிவிக்கப்படுகிறது.

இவ்வாறான அமைச்சர்கள் பற்றி தகவல்களை திரட்டி அவர்களுக்கு எதிராக கடும் நடவடடிக்கை எடுக்க அரசுத் தலைவர் தீர்மானித்துள்ளார்.

அறிக்கையின் அடிப்படையில் நடவடிக்கை எடுப்பதற்கு உத்தேசிக்கப்பட்டுள்ளதாகக் குறிப்பிட்டுள்ளது.

*******************

சலுகைக்காக சந்தித்த ரணில்

இலங்கையில் நட்டமடையும் 36 தனியார் நிறுவனங்களை பொறுப்பேற்கும் தமது திட்டத்தில் மாற்றம் இல்லை என்று அரசாங்கம் அறிவித்துள்ளது.

இதன்படி எதிர்வரும் வாரத்தில் இது தொடர்பான சட்டமூலம் நாடாளுமன்றத்தில் சமர்ப்பிக்கப்படும் என்று தெரியவருகிறது.

தம்மை நேற்று சந்தித்த தனியார் நிறுவனங்களின் பிரதிநிதிகளிடம் அமைச்சர் பசில் ராஜபக்ச இந்த கருத்தை வெளிப்படுத்தியுள்ளார்.

அரசாங்கம் பொறுப்பேற்கவுள்ள தனியார் நிறுவனங்களில் 12 ஆடை ஏற்றுமதி நிறுவனங்களும் 17 உற்பத்தி நிறுவனங்களும் உள்ளடங்குகின்றன.

இதேவேளை இந்த விடயம் தொடர்பில் அரசுத் தலைவர் மஹிந்த ராஜபக்சவுக்கும் எதிர்க்கட்சி தலைவர் ரணில் விக்கிரமசிங்கவுக்கும் இடையில் நேற்று சந்திப்பு ஒன்று இடம்பெற்றது.

இதன்போது அரசாங்கத்தின் நடவடிக்கைகளில் இருந்து ஐக்கிய தேசியக் கட்சியின் ஆதரவு நிறுவனங்களான தயா கமகேயின் செவனகல சீனித்தொழிற்சாலை, ஹரி ஜெயவர்த்தனவின் பெலவத்த சீனி ஆலை, மற்றும் தயா வெத்தசிங்கவின் லங்கா ட்ரக்டர்ஸ் நிறுவனம் என்பனவற்றுக்கு விலக்களிக்குமாறு ரணில் விக்கிரமசிங்க கேட்டுக்கொண்டார்.

இந்தநிலையில் குறித்த நிறுவனங்களை தவிர அரசாங்கம் கையேற்க உத்தேசித்துள்ள தனியார் நிறுவனங்களின் முகாமைகள் அரசாங்கத்தின் நடவடிக்கைக்கு ஆதரவை வெளியிட்டுள்ளதாக அமைச்சர் பசில் ராஜபக்ச குறிப்பிட்டுள்ளார்.

*******************

போதைப் பொருள் தேடும் சிறைச்சாலை

சிறைச்சாலைகளிலும் போதைப் பொருளுக்கு தட்டுப்பாடு ஏற்பட்டுள்ளதாக சிலுமின பத்திரிகை செய்தி வெளியிட்டுள்ளது.

நாட்டில் நிலவி வரும் போதைப் பொருள் தட்டுப்பாடு சிறைக் கைதிகளையும் வெகுவாக பாதித்துள்ளது.

போதைப் பொருளுக்கு அடிமையான சில கைதிகள் 200 ரூபா முதல் 3000 ரூபா வரையில் செலுத்தி சிறியளவு போதைப்பொருளைப் பெற்றுக் கொள்வதாகக் குறிப்பிடப்படுகிறது.

எனினும் நகர புறங்களில் போதைப் பொருளுக்கு ஏற்பட்டுள்ள தட்டுப்பாடு சிறைச்சாலைகளுக்கான போதைப் பொருள் விநியோகத்தை பாதித்துள்ளது.

இதனால் போதைப் பொருளுக்கு அடிமையான சிறைக் கைதிகள் பாதிக்கப்பட்டுள்ளதாகக் குறிப்பிடப்படுகிறது.

*******************

செய்திகள் 26/10

வழக்கை நிராகரித்த பின் போர்க் குற்ற விசாரணைக்கு வலியுறுத்தல்?

இலங்கையில் மோதல் நடைபெற்ற இறுதிக் காலகட்டத்தில் இடம் பெற்ற மனித உரிமை மீறல்கள் மற்றும் போர்க் குற்றங்கள் குறித்து முழு அளவிலான விசாரணைகள் நடத்தப்பட வேண்டுமென்று அவுஸ்திரேலியா நேற்று பகிரங்கமாக அறிவித்திருக்கிறது.

இலங்கைக்கு எதிராகச் சுமத்தப்பட்டுவரும் குற்றச்சாட்டுகள் குறித்து விசாரணைகள் நடத்தப்பட வேண்டுமென்று சர்வதேச சமூகம் வலியுறுத்தி வரும் நிலையிலும், பொதுநலவாய நாடுகளின் தலைவர்களது உச்சி மாநாட்டில் கலந்துகொள்வதற்காக அரசுத் தலைவர் மஹிந்த ராஜபக்ஷ அவுஸ்திரேலியா சென்றுள்ள நிலையிலும் இந்த அறிவிப்பு வெளியிடப்பட்டிருக்கின்றது.

பொதுநலவாய நாடுகளின் தலைவர்களது மாநாட்டுக்கு முன்னோடியாக இடம்பெறும் வர்த்தக மாநாட்டில் கருத்து வெளியிட்ட அவுஸ்திரேலிய பிரதமர் ஜூலியா கில்லார்ட் அவுஸ்திரேலியாவின் ஒத்த எண்ணப்பாடுகளைக் கொண்ட உலக நாடுகள் கூறுவதைப்போல, போர்க்குற்றங்கள் தொடர்பிலான விசாரணைகள் முழு அளவில் நடைபெறவேண்டும் என்பதை அவுஸ்திரேலியாவும் வலியுறுத்துவதாகச் சுட்டிக்காட்டினார்.

தீவிரமான குற்றச்சாட்டுகள், மனித உரிமை மீறல்கள் இறுதி யுத்த கால கட்டத்தில் இடம்பெற்றதாகக் கூறப்படுவது விசாரிக்கப்பட வேண்டும் என்றும் அவுஸ்திரேலிய பிரதமர் வலியுறுத்தினார்.

முன்னதாக அவுஸ்திரேலியாவைப் போன்றே கனடாவும் இவ்வாறு வலியுறுத்தலொன்றை விடுத்திருந்தது.

போர்க்குற்றங்கள் சம்பந்தமான நீதியான விசாரணை நடக்காத பட்சத்தில் 2013 ஆம் ஆண்டில் இலங்கையில் நடைபெறவுள்ளதாகக் கருதப்படும் பொதுநலவாய நாடுகளின் தலைவர்களின் உச்சிமாநாட்டைப் பகிஷ்கரிக்க வேண்டிவருமெனவும் கனடா எச்சரித்திருந்தது.

எவ்வாறாயினும், போர்க்குற்றச்சாட்டுகளை முற்றுமுழுதாக நிராகரிக்கும் இலங்கை அரசு, 50 இற்கும் மேற்பட்ட நாடுகள் அங்கம் வகிக்கும் பொதுநலவாய அமைப்பு இந்த விவகாரத்தினால் பிளவுபட்டுவிடும் அபாயம் இருப்பதாகவும் எச்சரித்துள்ளமை குறிப்பிடத்தக்கது.

இலங்கைக்கு எதிராகப் போர்க்குற்ற விசாரணைகள் நடத்தப்படவேண்டுமென வலியுறுத்தி தமது நாட்டில் தீவிர அழுத்தங்கள் வந்துள்ள நிலையில் அவுஸ்திரேலிய பிரதமரின் இந்த அறிவிப்பு வெளியாகியுள்ளது.

********************

பாரபட்டமாக நடக்கும் அவுஸ்திரேலியா!

சிறிலங்கா அதிபருக்கு எதிரான போர்க்குற்ற வழக்கை விசாரிக்க முடியாமல் தடுத்ததன் மூலம் அவுஸ்ரேலிய அரசாங்கம் பாரபட்சமாக நடந்து கொண்டுள்ளதாக அவுஸ்ரேலியாவில் வாழும் தமிழ்ச் சமூகத்தினர் கவலை வெளியிட்டுள்ளனர்.

அவுஸ்ரேலிய அரசின் இந்த முடிவு அவுஸ்ரேலிய தமிழ்ச் சமூகத்தை அதிர்ச்சியடைய வைத்துள்ளதாக ஏபிசி ஊடகம் தகவல் வெளியிட்டுள்ளது.

அவுஸ்ரேலிய அரசின் முடிவு தமக்கு ஏமாற்றத்தை அளித்துள்ளதாக அவுஸ்ரேலிய தமிழ் காங்கிரசின் பெண் பேச்சாளரான சாம்பரி, ஏபிசியிடம் தெரிவித்துள்ளார்.

அவுஸ்ரேலிய நீதிமன்றம் இந்த வழக்கை விசாரிக்கும் திகதியை அறிவித்த நிலையில், அரசியல்வாதி ஒருவர் அதற்கு அனுமதி அளிக்க முடியாது என்று அறிவித்தது தமக்குப் பெரிதும் ஏமாற்றத்தை ஏற்படுத்தியுள்ளதாக அவர் மேலும் கூறியுள்ளார்.

பாரபட்சமாக தாம் நடத்தப்பட்டுள்ளதாகவே உணர்கிறோம் என்றும் அவர் மேலும் தெரிவித்துள்ளார்.

அதேவேளை, சிறிலங்கா அதிபருக்கு எதிரான போர்க்குற்ற வழக்கை விசாரிக்க அனுமதி அளித்தால் அது அனைத்துலக சட்டங்களை மீறியதாகி விடும் என்று அவுஸ்ரேலிய சட்டமா அதிபர் மக் கிளெல்லன்ட் கூறியிருப்பது தவறானது என்று முன்னாள் அவுஸ்ரேலிய இராஜதந்திரியான புரூஸ் ஹை ஏபிசியிடம் தெரிவித்துள்ளார்.

சட்டமா அதிபரின் இந்த முடிவு முற்றிலும் அரசியல் ரீதியானது என்றும் அவர் குறிப்பிட்டுள்ளார்.

அவுஸ்ரேலிய சட்டம் பற்றியோ அனைத்துலக சட்டம் பற்றியோ அவர் பார்க்கவில்லை.

கொமன்வெல்த் மாநாட்டின் சூழ்நிலை கருதி அவர் அரசியல் ரீதியாகவே முடிவெடுத்துள்ளார் என்றும் அவர் மேலும் குறிப்பிட்டுள்ளார்.

சிறிலங்கா அதிபரைக் காப்பாற்ற அவுஸ்ரேலிய அரசு எடுத்துள்ள இந்த முடிவு, அங்கு வாதப்பிரதிவாதங்களை ஏற்படுத்தியுள்ளது குறிப்பிடத்தக்கது.

********************

அவுஸ்திரேலியாவில் பேச்சு நடத்தும் மகிந்த

கொமன்வெல்த் உச்சிமாநாட்டில் பங்கேற்க எட்டு நாள் பயணமாக அவுஸ்ரேலியா சென்றுள்ள சிறிலங்கா அதிபர் மகிந்த ராஜபக்ச நேற்று அவுஸ்ரேலிய வெளிவிவகார அமைச்சர் கெவின் ரூட்டைச் சந்தித்துப் பேசியுள்ளார்.

இன்று அவர் அவுஸ்ரேலியப் பிரதமர் ஜுலியா கிலாட்டை சந்தித்துப் பேசவுள்ளதாகவும் தகவல்கள் தெரிவிக்கின்றன.

நேற்றைய சந்திப்பின் போது அவுஸ்ரேலிய வெளிவிவகார அமைச்சருடன் இருதரப்பு விவகாரங்கள், அவுஸ்ரேலியாவுடனான உறவுகளைப் பலப்படுத்திக் கொள்ளுதல், கொமன்வெல்த் மாநாடு, 2013இல் சிறிலங்காவில் நடத்தப்படவுள்ள கொமன்வெல்த் மாநாடு ஆகியன குறித்து கலந்துரையாடப்பட்டதாக சிறிலங்கா அரசாங்கம் தகவல் வெளியிட்டுள்ளது.

சிறிலங்கா அதிபர் தங்கியுள்ள விடுதியி இடம்பெற்ற இந்தச் சந்திப்பில் வெளிவிவகார அமைச்சர் ஜி.எல்.பீரிசும் பங்கேற்றிருந்தார்.

இதனிடையே வெள்ளிக்கிழமை ஆரம்பமாகவுள்ள கொமன்வெல்த் உச்சிமாநாட்டை முன்னிட்டு பேர்த் நகரில் பாதுகாப்பு பலப்படுத்தப்பட்டுள்ளது.

கொமன்வெல்த் தலைவர்கள் மாநாடு நடைபெறும் போது பேர்த் நகரில் எதிர்ப்புப் போராட்டங்களுக்கு அனுமதி வழங்கப்படாது என்றும், போராட்டக்காரர்கள் அங்கிருந்து வெளியேற்றப்படுவர் என்றும் தெரிவித்துள்ளனர்.

எதிர்ப்பாளர்கள் தமது கருத்தை அமைதியாக வெளிப்படுத்தலாம், ஆனால் கொமன்வெல்த் மாநாட்டிலோ, பொது நிகழ்வுகளிலோ தலையிட அனுமதிக்கப்படமாட்டார்கள் என்றும் தெரிவிக்கப்பட்டுள்ளது.

********************

அவுஸ்திரேலியாவில் தமிழ் இளைஞர் தற்கொலை

தீபாவளியன்று சமயச் சடங்கில் பங்கேற்க அவுஸ்ரேலிய அதிகாரிகளால் அனுமதி மறுக்கப்பட்ட ஈழத்தமிழ் இளைஞர் ஒருவர் சிட்னி தடுப்புமுகாமில் தற்கொலை செய்து கொண்டுள்ளார்.

சிட்னி குடிவரவு வதிவிட வீடுமைப்புத் தொகுதியில், நஞ்சருந்திய நிலையில் மீட்கப்பட்ட இவர் மருத்துவமனைக்கு கொண்டு செல்லப்பட்ட போது உயிரிழந்ததாக அவுஸ்ரேலிய குடிவரவுத் திணைக்களம் அறிவித்துள்ளது.

இன்று அதிகாலை 3 மணியளவில் இவர் மரணமாகியுள்ளார்.

இவரது மரணம் இடம்பெற்ற சூழல் தொடர்பாக விசாரணை நடத்தப்படும் என்று அவுஸ்ரேலிய காவல்துறை அதிகாரிகள் கூறியுள்ளனர்.

வில்லாவூட் தடுப்பு முகாமில் கடந்த ஆண்டு அடுத்தடுத்து நிகழ்ந்த நான்கு தற்கொலைகளை அடுத்து கூரை மீதேறி போராட்டம் நடத்தியவர்களில், இன்று மரணமான இளைஞரும் ஒருவராவார்.

சூட்டி என்று நண்பர்களால் அழைக்கப்பட்ட இவர் அனைவருடனும் நட்புடன் பழகக் கூடியவர் என்றும் அனைவருக்கும் உதவும் மனப்பாங்குடையவர் என்றும் அகதிகளுக்கான நடவடிக்கை கூட்டமைப்பின் பேச்சாளர் இயன் றின்ரோல் தெரிவித்துள்ளார்.

எனினும் இவரது முழுப்பெயர் மற்றும் சொந்த இடம் பற்றிய தகவல்களை அவுஸ்ரேலிய அதிகாரிகள் இன்னமும் வெளியிடவில்லை.

தீபாவளி பண்டிகையை முன்னிட்டு சமய விழாவில் பங்கேற்க அனுமதி மறுக்கப்பட்டதால் இவர் வெறுப்படைந்திருந்தார் என்றும் அதுபற்றி நண்பர்களுடன் பேசியுள்ளார் என்றும் கூறப்படுகிறது.

இவர் இது தொடர்பாக விண்ணப்பம் செய்தது தனக்குத் தெரியும் என்றும், ஆனால் அவரது விண்ணப்பத்தை அதிகாரிகள் நேற்று நிராகரித்து விட்டதாகவும் அகதிகளுக்கான நடவடிக்கை கூட்டமைப்பின் பேச்சாளர் இயன் றின்ரோல் குறிப்பிட்டுள்ளார்.

மரணமான இளைஞரின் உறவினர்கள் வெளிநாட்டில் இருப்பதாகவும், அவர்களுக்குத் தகவல் பரிமாற ஏற்பாடுகள் செய்யப்பட்டுள்ளதாகவும் அவுஸ்ரேலிய காவல்துறை அதிகாரிகள் கூறியுள்ளனர்.

இருபதுகளின் நடுப்பகுதி வயதையுடைய இந்த இளைஞரின் அடைகலக் கோரிக்கை மூன்று மாதங்களுக்கு முன்னர் ஏற்கப்பட்டிருந்தது.

ஆனாலும், பாதுகாப்பு அனுமதி வழங்குவதில் ஏற்பட்ட தாமதத்தினால், அவர் விடுவிக்கப்படாமல் தொடர்ந்தும் தடுத்து வைக்கப்பட்டிருந்தார்.

இரண்டு ஆண்டுகளுக்கு முன்னர் அவுஸ்ரேலியாவில் அடைக்கலம் தேடிய இவர் முன்னதாக வில்லாவூட் தடுப்புமுகாமில் தடுத்து வைக்கப்பட்டிருந்தார்.

இவருடைய இளைய சகோதரன் சிறிலங்காவில் வாழ்வதாகவும் அதிகாரிகள் கூறியுள்ளனர்.

இதனிடையே இவரது மரணம் மிகவும் வருந்தத்தக்க நிகழ்வு என்று அவுஸ்ரேலியாவின் முன்னாள் குடிவரவு அமைச்சர் கிறிஸ் இவான்ஸ் தெரிவித்துள்ளார்.

********************

அரசாங்கத்திற்கு எதிராக செயற்பட அழைப்பு விடுக்கும் ரணில்

அரசாங்கத்திற்கு எதிரான மக்கள் செயற்பாடுகள் உடனடியாக ஆரம்பிக்கப்பட வேண்டுமென எதிர்க்கட்சித் தலைவர் ரணில் விக்ரமசிங்க தெரிவித்துள்ளார்.

அரசாங்கம் மக்களின் அதிகாரங்களை பறித்துக் கொண்டுள்ளது, இவற்றை மீளப் பெற்றுக்கொள்ள நடவடிக்கை எடுக்கப்பட வேண்டும்.

அண்மையில் நடைபெற்று முடிந்த உள்ளூராட்சி மன்றத் தேர்தலில் வெற்றியீட்டிய எதிர்க்கட்சித் தலைவர்களுக்கு பதவிகளை வழங்கும் நிகழ்வு ஒன்று சிரிகொத்தவில் நேற்று நடைபெற்றது.

இந்த நிகழ்வில் கலந்து கொண்ட போது ரணில் விக்ரமசிங்க இந்தக் கருத்துக்களை தெரிவித்துள்ளார்.

உள்ளூராட்சி மன்றத் தேர்தல்களின் போது அரசாங்கம் பல்வேறு வழிகளில் தேர்தல் சட்டங்களை மீறிச் செயற்பட்டது.

அரசுத் தலைவர்த் தேர்தலுக்கு நிகரான முக்கியத்துவத்துடன் நடைபெற்ற கொழும்பு மாநகரசபைத் தேர்தலில் ஐக்கிய தேசியக் கட்சி, ஆளும் கட்சியை வீழ்ச்சியடைச் செய்தது.

காவல்துறை சேவை அரசியல்மயப்படுத்தப்பட்டுள்ளது.

17ம் திருத்தச் சட்ட மூலத்தை ரத்து செய்ததன் மூலம் அரசாங்கம் நாட்டின் சட்டம் ஒழுங்கை கையகப்படுத்திக் கொண்டுள்ளது என அவர் குற்றம் சுமத்தியுள்ளார்.

********************

அச்சம் வேண்டாம் என அழைக்கும் சரத் பொன்சேகா

லிபியாவில் இடம்பெற்ற நிகழ்வுகளின் மூலம் மக்கள் பாடங்களைக் கற்றுக் கொள்ள வேண்டுமென முன்னாள் இராணுவத் தளபதி சரத் பொன்சேகா தெரிவித்துள்ளார

ஊழல் அரசியல்வாதிகளுக்கும், வாகனத் தொடரணிகளுக்கும் மக்கள் அஞ்ச வேண்டிய அவசியமில்லை.

பாதாள உலகக் குழுவினரின் நடவடிக்கைகளைக் கண்டு அச்சமடையத் தேவையில்லை.

அநீதிக்கு எதிரான போராட்டத்தின் போது கட்சி பேதங்களைக் களைந்து அனைவரும் அணி திரள வேண்டுமென அவர் வலியுறுத்தியுள்ளார்.

மருத்துவ பரிசோதனைகளுக்காக சென்றிருந்த போது அவர் இதனைக் குறிப்பிட்டுள்ளார்.

********************

சர்வதேச சமூகத்தின் பாதுகாப்பு கோரும் பல்கலைக்கழக மாணவர்கள்

யாழ்பல்கலைக்கழக மாணவர் மீது நடாத்தப்படும் தாக்குதலின் தொடர்ச்சியாக மற்றுமொரு மாணவனும் இனந்தெரியாத நபர்களின் மிலேச்சதனமான தாக்குதலுக்கு இலக்காகி உள்ளார்.

இந்த தாக்குதலுக்கு இலக்காகி உள்ளவர் கலைப்பீட நான்காம் வருடத்தைச்சேர்ந்த செல்வன் இராஜவரோதயம் கவிராஜன் எனும் மாணவனாவார்.

கடந்த 22ஆம் திகதி உறவினர் வீட்டுக்கு சென்றுவிட்டு பரந்தன் பூநகரி வீதியால் தனது வீடு நோக்கி பயணித்துக் கொண்டிருந்த போது இரவு 8.45மணியளவில் ஆட்டோவில் வந்த தாக்குதலாளிகள் சரமாரியாக கற்களால் தாக்கிவிட்டு தப்பிச்சென்றுள்ளனர்.

மாணவர் ஒன்றியத்தலைவர் தாக்கப்பட்டு பல்கலைக்கழக வகுப்புப் பகிஸ்கரிப்புப் போராட்டத்தில் மாணவர்கள் ஈடுபட்டுள்ள அதே காலப்பகுதியில் இம்மாணவன் தாக்கப்பட்டுள்ளார்.

மாணவர் தாக்கப்படுவது தொடர்பாக பல்கலைக்கழக நிர்வாகத்தினர் வடபகுதி இராணுவத்தளபதி மற்றும் யாழ்ப்பாண காவல்துறை அத்தியட்சகர் ஆகியோருடன் இடம் பெற்ற பேச்சுவார்த்தையில் மாணவர்கள் எந்தவித அச்சமுமின்றி தமது கல்விச் செயற்பாட்டைத் தொடரலாம் என்று வடபகுதி இராணுவத்தளபதி உறுதி மொழி வழங்கி சுமார் 48 மணித்தியாலத்திற்குள் மற்றுமொரு மாணவன் தாக்கப்பட்டுள்ளது பலத்தசந்தேகத்தையும் தோற்றுவித்துள்ளது.

மேலும் சிவில் சமூகப்பிரதிநிதிகளுடனான சந்திப்பின் போது விடுக்கப்பட்ட கோரிக்கைக்கு அமைவாக பகிஸ்கரிப்பை இடைநிறுத்துவது தொடர்பாக மாணவர் ஒன்றியம் சாதகமாக பரிசீலித்து வரும் இச்சூழ்நிலையில் மற்றுமொரு மாணவன் தாக்கப்பட்டுள்ளமையால் இது தொடர்பாக ஆழமாக ஆராய வேண்டி உள்ளது.

எனவே இத்தாக்குதல் சம்பவத்தை வன்மையாகக் கண்டிப்பதோடு பாதுகாப்புத்தரப்பினர் உறுதி மொழி வழங்கிய பின்னரும் இப்படியான உயிர் அச்சுறுத்தல் சம்பவங்கள் தொடர்கின்ற நிலையில் எவ்வாறு மாணவர்கள் தமது கல்வியை சுமூகமாகத்தொடர முடியும் என்ற கேள்வி எழுகின்றது.

எனவே தமிழ் பேசுகின்ற மாணவர்களுடைய பாதுகாப்பை உறுதிப்படுத்த தகுந்த நடவடிக்கை எடுக்குமாறு சர்வதேச நாடுகளை மனிதாபிமான அடிப்படையில் வேண்டிக்கொள்வதாக யாழ் பல்கலைக்கழக மாணவர்ஒன்றியம், விடுத்துள்ள அறிக்கையில் கோரியுள்ளது.

********************

ஆட்சியாளர்களின் கொலை கலாச்சாரத்தை கண்டு அஞ்சும் ஆட்சியாளர்கள்?

நாடு முழுவதும் கொலை கலாசாரம் உருவாகி உள்ளதாகவும் கடந்த 8 ஆம் திகதி கொட்டிகாவத்தை- முல்லேரிய பிரதேசத்தில் ஏற்பட்ட சம்பவம் போன்ற சம்பவங்கள் மீண்டும் ஒரு முறை ஏற்படாத வகையில் கூட்டாகவோ, கட்சி என்ற முறையிலோ தனித்தனியாகவும் ஒன்றாகவும் இணைந்து மேற்கொள்ள வேண்டிய அனைத்து பொறுப்புகளை நிறைவேற்ற வேண்டும் என ஐக்கிய மக்கள் சுதந்திர முன்னணியின் செயலாளரும் அமைச்சருமான சுசில் பிரேமஜயந்த தெரிவித்துள்ளார்.

கொட்டிக்காவத்தை- முல்லேரிய பிரதேச சபைக்கு தெரிவுசெய்யப்பட்ட ஐக்கிய மக்கள் சுதந்திர முன்னணியின் பிரதிநிதிகள் அமைச்சர் சுசில் பிரேமஜயந்த முன்னிலையில் பதவியேற்றுக்கொண்ட போதே அவர் இதனை கூறியுள்ளார்.

இம்முறை 23 உள்ளுராட்சி சபைகளுக்கு நடைபெற்ற தேர்தல் தினம் கொலன்னாவ அரசியல் வரலாற்றிலும், நாட்டில் அரசியல் வரலாற்றிலும் அழியாத தினமாக மாறியது.

இந்த தினத்தில் ஏற்பட்ட துரதிஷ்டவசமான மற்றும் கவலைகுரிய சம்பவத்தின் பிரதிபலன்கள் எவ்வித பேதமும் இன்றி சகலரும் உணரும் வகையில் இருந்தது.

பல காலமாக தம்முடன் அரசியலில் ஈடுபட்ட முன்னாள் நாடாளுமன்ற உறுப்பினர் பாரத லக்ஷ்மன் பிரேமசந்திரவின் மரணமும், பிரதேசத்திற்கு பொறுப்பான அமைப்பாளர் நாடாளுமன்ற உறுப்பினர் துமிந்த சில்வா படுகாயமடைந்து, வைத்தியசாலையில் அனுமதிக்கப்பட்டமை ஆகிய இரண்டு சம்பவங்களும், தமக்கு மிகவும் கவலையளிக்கும் சம்பவங்களாகும் என குறிப்பிட்டார்.

தேர்தலுக்கு முன்னர் இருந்த விருப்பு வாக்கு தொடர்பான குரோதங்கள் இத்துடன் முடிவுக்கு கொண்டு வரப்பட வேண்டும் எனவும் சுசில் பிரேமஜயந்த தெரிவித்துள்ளார்.

********************

ஸ்ரீலங்காவில் கால் பதிக்கும் பாகிஸ்த்தான் இராணுவம்?

சிறிலங்காவுக்குப் பயணம் மேற்கொண்டுள்ள பாகிஸ்தான் இராணுவத்தைச் சேர்ந்த பத்து அதிகாரிகள் முல்லைத்தீவுக்கு செல்லவுள்ளதாக கொழும்பிலுள்ள பாகிஸ்தான் தூதுரகம் அறிவித்துள்ளது.

பாகிஸ்தான் இராணுவத்தின் பொறியியல் படைப்பிரிவைச் சேர்ந்த இந்த அதிகாரிகள் பத்துப் பேரும் கண்ணிவெடிகளை அகற்றும் நிபுணர்கள் பாகிஸ்தான் தூதரகம் கூறியுள்ளது.

இரு நட்புநாடுகளுக்கும் இடையிலான இருதரப்பு பாதுகாப்பு உறவுகளைப் பலப்படுத்திக் கொள்ளும் நோக்கிலேயே இந்தப் பயணம் அமைந்துள்ளதாகவும் அந்த அறிக்கையில் குறிப்பிடப்பட்டுள்ளது.

கேணல் சபீர் நிசார் தலைமையில் பாகிஸ்தான் இராணுவ அதிகாரிகள் பத்துப் பேரும் கடந்த 13ம் திகதி சிறிலங்கா சென்றிருந்தனர்.

எதிர்வரும் 28ம் திகதி வரை இவர்கள் அங்கு தங்கியிருப்பர் என்றும் அறிவிக்கப்பட்டுள்ளது.

இவர்கள் அனைவரும் சூடான் மற்றும் கம்போடியாவில் கண்ணிவெடிகளை அகற்றும் மனிதாபிமான பணியில் ஈடுபட்டவர்கள் என்றும் கூறப்பட்டுள்ளது.

பாகிஸ்தான் இராணுவ அதிகாரிகள் குழு சிறிலங்கா சென்று இரண்டு வாரங்களாகியுள்ளன.

ஆனாலும் இவர்கள் நாடு திரும்புவதற்கு மூன்று நாட்கள் இருக்கின்ற நிலைலேயே இதுபற்றிய செய்திகள் வெளியே கசிய விடப்பட்டுள்ளன.

அத்துடன் கண்ணிவெடிகளை அகற்றும் நிபுணர்களான பாகிஸ்தான் படை அதிகாரிகள் இன்னமும், வன்னியில் கண்ணிவெடிகள் அகற்றப்படும் பகுதிகளை சென்று பார்வையிடவில்லை என்பதும் குறிப்பிடத்தக்கது.

********************