Monday, 13 June 2011

செய்திகள் 13/06


மீண்டும் இழுத்தடிக்கும் முயற்சி!
இனப்பிரச்சினை தீர்வுக்கு பாராளுமன்ற தெரிவுக்குழு அமைக்கும் அரசாங்கத்தின் முயற்சியானது காலத்தை வீணடிப்பதற்கான நடவடிக் கையாகும் என்றும் இதனை ஒருபோதும் ஏற்றுக்கொள்ள முடியாது என்று தமிழ்த் தேசியக் கூட்டமைப்பு அறிவித்துள்ளது.
கடந்த காலங்களில் பல குழுக்கள் அமைக்கப்பட்ட போதிலும் அவற்றின் அறிக்கைகளோ பரிந்துரைகளோ இதுவரை நடைமுறைப் படுத்தப்படவில்லை.
மங்கள முனசிங்க தலைமையிலான பாராளுமன்றத் தெவுக்குழு அமைக்கப்பட்டது.
இதேபோல் நிபுணர்கள் குழு, சர்வகட்சி பிரதிநிதிகள் குழு என குழுக்கள் அமைக்கப்பட்ட போதிலும் அவற்றினால் கண்ட பலன் எதுவுமில்லை.
எனவே எதிர்காலத்திலும் பாராளுமன்றத் தெரிவுக்குழுவை அமைப்பதென்பது தேவையற்ற நடவடிக்கையாகும் என்றும் கூட்டமைப்பு சுட்டிக்காட்டியுள்ளது.
இலங்கைக்கு விஜயம் செய்திருந்த இந்திய பாதுகாப்பு ஆலோசகர் சிவ்சங்கர் மேனன் தலைமையிலான குழு அரசுத் தலைவர் மஹிந்த ராஜபக்ஷவை அலரி மாளிகையில் சந்தித்து பேச்சுவார்த்தை நடத்தியிருந்தது.
இந்தப் பேச்சுவார்த்தையின்போது இனப்பிரச்சினைக்கு தீர்வினைக் காண பாராளுமன்ற தெரிவுக் குழுவினை அமைக்க திட்டமிட்டுள்ளதாக அரசுத் தலைவர் மஹிந்த ராஜபக்ஷ தெரிவித்துள்ளார்.
அரசுத் தலைவருடனான சந்திப்பையடுத்து இந்திய தூதுக்குழுவினர் தமிழ் தேசியக் கூட்டமைப்பின் பிரதிநிதிகளை சந்தித்து கலந்துரையாடினர்.
இந்தச் சந்திப்பின்போது இனப்பிரச்சினை தீர்வுக்கு பாராளுமன்றத் தெரிவுக் குழுவை அமைக்க அரசுத் தலைவர் மஹிந்த ராஜபக்ஷ திட்டமிட்டுள்ளதாக இந்திய தூதுக்குழுவினர் தமிழ் தேசியக் கூட்டமைப்பினரிடம் தெவித்துள்ளனர்.
இதற்கு கூட்டமைப்பு கடும் எதிர்ப்பு தெரிவித்ததுடன் பாராளுமன்ற தெரிவுக்குழு என்பது காலத்தை இழுத்தடிப்பதற்கான முயற்சியாகும்.
இதனை ஏற்றுக்கொள்ள முடியாது என சுட்டிக்காட்டியுள்ளனர்.
****************
தடுத்து வைக்கப்பட்டோரின் விபரம்?
இறுதிக் கட்டப்போரின்போது படையினரிடம் சரணடைந்து பயங்கரவாத விசாரணைப் பிரிவின் கீழ் தடுத்து வைக்கப்பட்டுள்ளவர்கள், கைதாகி விடுவிக்கப்பட்டோர் குறித்த தகவல்களை அவர்களுடைய நெருங்கிய உறவினர்கள் பெற்றுக்கொள்ளமுடியும் என அறிவிவக்கப்பட்டள்ளது.
கொழும்பு, வவுனியா, பூஸா ஆகிய இடங்களில் உள்ள பயங்கரவாத விசாரணைப் பிரிவில் தொடர்பு கொண்டு தடுத்து வைக்கப்பட்டுள்ளோரின் விவரங்களை பெறலாம் என்று அறிவிக்கப்பட்டுள்ளது.
பயங்கரவாத விசாரணைப் பிரிவுப் பணிப்பாளர் இது தொடர்பாக அறிவித்துள்ளார்.
தடுத்து வைக்கப்பட்டுள்ளவர்களின் மனைவி, கணவர், பிள்ளைகள், பெற்றோர் அல்லது சகோதர, சகோதரிகள் தாம் வசிக்கும் பிரதேச காவல் நிலையப் பொறுப்பதிகாரி அல்லது கிராம சேவகரின் கடிதத்துடன் இந்த இடங்களிலுள்ள பயங்கரவாத விசாரணைப் பிரிவுக்குச் சென்று தகவல்களைப் பெற்றுக்கொள்ள முடியும் எனத் தெரிவிக்கப்பட்டுள்ளது.
அரசுக்கும் தமிழ்த் தேசியக் கூட்டமைப்புக்கும் இடையில் நடைபெற்று வரும் பேச்சுத் தொடர்களின் போது போரின் இறுதிக் கட்டத்தின் போது படையினரிடம் சரண் அடைந்தவர்களின் விவரங்களை வெளியிடுமாறு கூட்டமைப்புக் கோரிவந்தது.
வவுனியா பயங்கரவாதத் தடுப்பு பிரிவுக்கு வருமாறு கூட்டமைப்புக்கு அரசு அழைப்பும் விடுத்திருந்தது.
இரு தடவைகளும் கூட்டமைப்பினர் வவுனியாவுக்குச் சென்றபோதிலும் பட்டியல் ஏதும் கையளிக்கப்படவில்லை.
தடுத்துவைக்கப்பட்டுள்ளவர்கள் விவரம் பத்திரிகைகளில் வெளியிடப்படும் என்று அரசு தெரிவித்திருந்தது.
அதன் பிரகாரம் பயங்கவரவாத விசாரணைப் பிரிவு, தடுத்துவைக்கப்பட்டுள்ளவர் விவரங்களை அவர்களது உறவினர்களுக்குத் தெரிவிக்க மூன்று நிலையங்கள் திறக்கப்பட்டுள்ளதாக இப்போது அரசு அறிவித்துள்ளது.
கைதாகித் தடுத்துவைக்கப்பட்டுள்ளவர்கள், தடுத்துவைக்கப்பட்டு விடுவிக்கப்பட்டவர்கள் ஆகியோரின் விவரங்களை மேற்குறிப்பிட்ட மூன்று நிலையங்களிலும் இன்றிலிருந்து பெற்றுக்கொள்ளலாம் என்று வவுனியா பயங்கரவாத விசாரணைப் பிரிவு அதிகாரி தெரிவித்தார்.
இந்த அறிவித்தலின் பிரகாரம், குறிப்பிட்ட இடங்களுக்குச் சென்று விவரங்களைப் பெற்றுக்கொள்ளுமாறு சம்பந்தப்பட்டவர்களைத் தமிழ்த் தேசியக் கூட்டமைப்பினரும் கேட்டுள்ளனர்.
*************
பிரித்தானிய நாடாளுமன்றில் ஸ்ரீலங்கா மனு!
இலங்கையில் இடம்பெற்ற போர்க்குற்றங்கள் தொடர்பில் ஐக்கிய நாடுகள் சபையின் தலைமையில் சுயாதீன அனைத்துலக விசாரணைப் பொறிமுறை அமைக்கப்பட வேண்டும் எனக்கோரி பிரித்தானிய நாடாளுமன்றத்தில் மனு சமர்ப்பிக்கப்பட்டுள்ளது.
பிரித்தானியாவின் கொன்சவேட்டிவ் கட்சி நாடாளுமன்ற உறுப்பினர் ஸ்கொட் லீ இந்த மனுவை நாடாளுமன்றத்தில் சமர்ப்பித்துள்ளார்.
இலங்கையின் போர்க்குற்றம் தொடர்பில் சுயாதீன அனைத்துலக விசாரணைக்குழு அமைக்கப்படவேண்டும் என்று ஸ்கொட் லீ இனால் சமர்ப்பிக்கப்பட்ட மனு தொடர்பில் பிரித்தானியா நாடாளுமன்றம் இன்னும் விவாதங்களை ஆரம்பிக்கவில்லை.
அதேவேளை எதிர்வரும் 14 ஆம் திகதி பிரித்தானியாவின் சனல்-4 தொலைக்காட்சி ஒளிபரப்பும் ஸ்ரீலங்காப் படையினர் மேற்கொண்ட படுகொலைகள் தொடர்பான காணொளியை அனைத்து நாடாளுமன்ற உறுப்பினர்களும் பார்வையிட வேண்டும் என்ற கோரிக்கையையும் அவர் முன்வைத்துள்ளார்.
சனல் - 4 முன்னர் ஒளிபரப்பிய காணொளி உண்மையானது என்பதை ஐ.நாவின் சுயாதீன நிபுணர்கள் உறுதிப்படுத்தியுள்ளனர் என அவர் மேலும் தெரிவித்தார்.
இதேவேளை கடந்த சில வருடங்களாக இலங்கை அரசுக்கும் லிபியாவின் கேணல் கடாபியின் அரசுக்கும் இடையில் உள்ள நெருக்கமான பிணைப்புக்கள் தொடர்பான மனு ஒன்றையும் பிரித்தானியா நாடாளுமன்ற உறுப்பினர்கள் குழு நாடாளுமன்றத்தில் சமர்ப்பித்துள்ளனர்.
கொன்சவேட்டிவ், தொழிற்கட்சி, லிபரல் டெமோகிரட், டொமோகிரட்டிக் யூனியன் ஆகிய கட்சிகளை சேர்ந்த 12 நாடாளுமன்ற உறுப்பினர்களின் கையொப்பங்களுடன் இந்த மனு சமர்ப்பிக்கப்பட்டுள்ளது.
லிபியா மீதான நேட்டோ படையினரின் தாக்குதலை இலங்கை அரசு வன்மையாக கண்டித்ததுடன், ஐ.நா மனித உரிமைகள் ஆணைக்குழுவில் இலங்கை மீது கொண்டுவரப்பட்ட தீர்மானத்தை லிபியா எதிர்த்ததாகவும் அந்த மனுவில் தெரிவிக்கப்பட்டுள்ளது
****************
தொடரும் இனப்படுகொலை................
பொஸ்னியாவை போன்று இலங்கையிலும் பெண்கள் போரின் போது பிரதான இலக்குகளாக துஸ்பிரயோகத்துக்கு உட்படுத்தப்பட்டதாக நியூமேன் என்பவர் தெரிவித்துள்ளார்.
போல் நியூமேன், இலங்கையின் வடக்கில் இருந்து இடம்பெயர்ந்தோர் மற்றும் மனித உரிமை மீறல் தொடர்பிலான பெங்களுர் பல்கலைக்கழகத்தை சேர்ந்த கலாநிதியாவார்.
அத்துடன், இலங்கைக்கு எதிரான போர்க்குற்ற நிரந்தர தீர்ப்பாயத்தின் நான்கு பேச்சாளர்களில் ஒருவருமாவார்.
எனினும் உலக நாடுகள், இலங்கையின் வடக்கு கிழக்கில் பெண்கள் மீது படையினரால் மேற்கொள்ளப்பட்ட துஸ்பிரயோகங்களை பெரிதாக எடுத்துக் கொள்ளவில்லை என்று நியூமன் குறிப்பிட்டுள்ளார்.
ஐக்கிய நாடுகள் சபையின் நிபுணர் குழு தமது அறிக்கையில் ஸ்ரீலங்காப் படையினர் இறுதி யுத்தத்தின் போது பொதுமக்களை குறிப்பாக பெண்களை காப்பாற்ற தவறிவிட்டது என்பதை சுட்டிக்காட்டியுள்ளது.
இதற்காக போரின் போது பெண்கள் பாலியல் ரீதியில் துன்புறுத்தப்பட்டமையை அது குறிப்பிட்டுள்ளது.
எனினும் இலங்கையின் அதிகாரிகள் இந்த செய்திகளை பொய்யானது. அடிப்படையற்றது என்று கூறிவருகின்றனர்.
இலங்கையி;ல் முன்னர் இடம்பெற்ற இனமுறுகல் மற்றும் வன்முறை சம்பவங்களை கொண்டு புதிய பாடங்களை கற்றுக்கொள்வதற்காக அமைக்கப்பட்டுள்ள நல்லிணக்க ஆணைக்குழுவுக்கு பெண்கள் தொடர்பில் முறைப்பாடுகள் கிடைத்துள்ளன.
இதன்போது சரணடைந்தவர்கள் குறிப்பாக பெண்கள் பலர் காணாமல் போனதாக முறைப்பாடுகள் தெரிவிக்கப்பட்டுள்ளன.
வடக்கு, கிழக்கில் இடம்பெற்ற போர்க்காரமாக சுமார் 80 வீதமான பெண்களும் சிறுவர்களுமே பாதிக்கப்பட்டனர்.
இதேவேளை, விசாரணைகளை மேற்கொண்டு வரும் நல்லிணக்க ஆணைக்குழுவிலும் 8 ஆண்கள் இருக்கும் நிலையில் ஒரு பெண் மாத்திரமே அங்கம் வகிப்பதாக போல் நியூமன் சுட்டிக்காட்டியுள்ளார்.
எனவே அந்தக்குழுவால் பெண்களின் பாதிப்புக்களை புரிந்துக் கொள்ள முடியாத நிலை ஏற்பட்டுள்ளது என்பவதே அவரின் வாதமாக அமைந்துள்ளது.
பிரித்தானிய செனல் 4 தொலைக்காட்சி ஒளிபரப்பிய போர்க்குற்ற காட்சிகளின் போது பெண்கள் பாலியல் வன்புணர்வுக்கு உட்படுத்தப்பட்டு கொலை செய்யப்படுவது உறுதி செய்யப்பட்டுள்ளது.
இலங்கை அரசாங்கத்தின் மதிப்பீட்டின்படி வடக்கு, கிழக்கில் மாத்திரம் 90 ஆயிரம் தமிழ்ப்பெண்கள் கணவர்மாரை இழந்துள்ளனர்.
இதன் காரணமாக அவர்கள் ஆண்கள் மேற்கொள்ளும் கடினமான பணிகளை மேற்கொண்டு தமது குழந்தைகளை காப்பாற்றும் நடவடிக்கைகளில் ஈடுபட்டுள்ளனர்.
இதனை தவிர, வடக்கு, கிழக்கின் குடிப்பரம்பலை மாற்றுவதற்காக, சிங்கள படையினர் இளம் தமிழ் யுவதிகளை திருமணம் செய்ய அரசாங்கம் ஊக்கமளித்து வருகிறது.
இது பொஸ்னியாவிலும் மேற்கொள்ளப்பட்டது.
அத்துடன் தாய்லாந்தை போன்று சுற்றுலாத்தளங்களை தமிழர் பிரதேசமான வடக்கிலும் அமைக்க அரசாங்கம் முயற்சித்து வருகிறது.
புனர்வாழ்வு அளிக்கப்பட்டு விடுவிக்கப்பட்ட முன்னாள் போராளிப் பெண்களையும் ஆண்களையும் தொடர்ந்தும் படையினர் அவர்களின் வீடுகளுக்கு சென்று கிரமமாக கவனித்து வருகின்றனர்.
புனர்வாழ்வுக்கு பின்னரும் அவர்கள் முன்னாள் போராளிகள் என்ற முத்திரைக்குத்தப்பட்டு இந்த கவனிப்பு இடம்பெற்று வருகிறது.
இந்தநிலையில் இவ்வாறான சம்பவங்களை விசாரணை செய்ய இலங்கையின் போர்க்குற்றம் தொடர்பில் சர்வதேச விசாரணை பொறிமுறை தேவை என்று போல் நியூமன் வலியுறுத்தியுள்ளார்.
********************
தீர்வு என்ன? கேட்கும் எதிர்க்கட்சி
அரசியலமைப்பின் பதின்மூன்றாம் திருத்தச்சட்டத்தையே இன்னும் முழுமையாக அமுல்படுத்தாமல் அதற்கப்பால் சென்று எவ்வாறு அதிகாரப் பகிர்வை மேற்கொள்ள முடியும் என்று ஐ.தே.க. பொதுச் செயலாளர் திஸ்ஸ அத்தநாயக்க கேள்வியெழுப்பியுள்ளார்.
பதின்மூன்றாவது திருத்தச்சட்டத்துக்கு அப்பால் சென்று தமிழ் மக்களுக்கான அதிகாரப் பரவலாக்கலை மேற்கொள்ள இந்தியாவிடம் அரசாங்கம் இணக்கம் தெரிவித்துள்ளது.
ஆயினும் இன்னும் 13வது திருத்தச்சட்டமே முழுமையாக அமுல்படுத்தப்படாத நிலையில் அதற்கப்பால் சென்று அதிகாரப் பகிர்வை எவ்வாறு மேற்கொள்ள முடியும் என்று அவர் வினாத் தொடுத்துள்ளார்.
இந்திய - இலங்கை அரசாங்கங்களுக்கிடையிலான அதிகாரப் பரவலாக்கல் தொடர்பான இணக்கப்பாடு குறித்து இன்றைய திவயின சிங்களப் பத்திரிகைக்கு அளித்துள்ள பேட்டியிலேயே அவர் இதனைக் குறிப்பிட்டுள்ளார்.
அதிகாரப் பரவலாக்கல் தொடர்பில் இந்தியாவுடன் இணக்கப்பாடொன்றை ஏற்படுத்திக் கொள்வதற்கு முன் நடைமுறையில் இருக்கும் பதின்மூன்றாவது திருத்தச்சட்டத்தை முழுமையாக செயற்படுத்த அரசாங்கம் நடவடிக்கை எடுத்திருக்க வேண்டும்.
அரசாங்கம் இந்தியாவுடன் இரகசிய பேச்சுவார்த்தைகளை மேற்கொண்டு நாட்டுக்கு தீமை பயக்கும் விதத்திலான தீர்வுத்திட்டங்களை முன்வைத்தால் ஐக்கிய தேசியக் கட்சி ஒருபோதும் அதற்கு ஆதரவு வழங்காது.
பாராளுமன்றத்திற்கு உள்ளேயும் வெளியேயும் அதனை எதிர்க்கும்.
அரசியல் தீர்வொன்றை முன்வைப்பதாயின் நாட்டின் அரசியலமைப்பின் பிரகாரம் அனைத்து இன மக்களினதும் உரிமைகள் பாதுகாக்கப்படும் விதத்தில் அதனை முன்வைக்க வேண்டும்.
மூன்று தசாப்த கால யுத்தம் காரணமாக நாட்டின் பல்லாயிரக்கணக்கான உயிர்களும் பலகோடி ரூபா பெறுமதியான சொத்துக்களும் இழக்கப்பட்ட பின் அன்றைக்கு முன்வைக்கப்பட்ட அதே கோரிக்கையின் பிரகாரம் அரசியல் தீர்வொன்றை வழங்குவதற்கு முன் அது குறித்து அரசாங்கம் இன்னொரு தடவை கவனம் செலுத்த வேண்டும் என்றும் அவர் மேலும் வலியுறுத்தியுள்ளார்.
*****************

பொருளாதார தடை அவசியம் - பழ.நெடுமாறன்
இலங்கை அரசின் இன அழிப்புக் கொள்கைக்கு எதிராக அந்த நாட்டின் மீது பொருளாதாரப் புறக்கணிப்பு நடவடிக்கையை மேற்கொள்ள உலக நாடுகளிடையே இந்தியா ஆதரவு திரட்ட வேண்டும் என்று இலங்கைத் தமிழர் பாதுகாப்பு இயக்க ஒருங்கிணைப்பாளர் பழ. நெடுமாறன் வேண்டுகோள் விடுத்துள்ளார்.
இதுதொடர்பாக அவர் வெளியிட்டுள்ள அறிக்கையில், இலங்கைக்கு எதிராக பொருளாதாரத் தடை மேற்கொள்வதன் மூலம் இலங்கையில் வாழும் தமிழர்களும் பாதிப்புக்கு உள்ளாவார்கள் என்ற கருத்தும், அதேபோல, சீனா இலங்கைக்குத் தேவையான உதவிகளைச் செய்யும் என்ற கருத்தும் ஏற்கத்தக்கவையல்ல.
தென்னாபிரிக்க வெள்ளை அரசின் நிறவெறிக் கொள்கைக்கு எதிராக ஐ.நா பேரவையில் இந்தியா கொண்டு வந்த பொருளாதாரத் தடை தீர்மானம் பெரும்பாலான நாடுகளின் ஆதரவுடன் நிறைவேற்றப்பட்டது.
தென்னாபிரிக்காவில் பெரும்பான்மையினராக வாழும் கறுப்பின மக்களுக்கும், இந்தியர்களுக்கும் அதனால் பாதகம் விளையும் என்று யாரும் வாதாடவில்லை.
அமெரிக்கா, பிரிட்டன் உள்பட மேற்கு நாடுகள் சில இந்தத் தீர்மானத்துக்கு எதிராகச் செயல்பட்டன.
ஆனாலும், பெரும்பாலான உலக நாடுகளின் ஆதரவு நடவடிக்கையின் விளைவாக தென்னாபிரிக்க அரசு இறுதியில் பணிய நேர்ந்தது.
எனவே, இலங்கை மீது பொருளாதாரத் தடை விதிக்க உலக நாடுகளின் ஆதரவை இந்தியா திரட்ட வேண்டும் என்பதைத் தமிழக முதல்வர் ஜெயலலிதா தொடர்ந்து வலியுறுத்த வேண்டும் எனக் கேட்டுக்கொளவதாக அவா தனது அறிக்கையில் கூறியுள்ளார்.
****************

Sunday, 12 June 2011

செய்திகள் 12/06


நடந்தது இனப்படுகொலையே - அருந்ததி ராய்

பிரபல எழுத்தாளரான அருந்ததி ராய் லண்டனில் நடைபெற்ற தமிழர்களுடனான சந்திப்பொன்றில் பேசுகையில் சிறீலங்காவில் நடைபெற்றது இனப்படுகொலையே என தெரிவித்துள்ளார்.
சிறீலங்காவில் இடம்பெற்ற இக்கொடுமையை போல் ஒன்றை தான் வேறெங்கும் கண்டதில்லை என அவர் மேலும் தெரிவித்தார்.
சர்வதேச தமிழ் செய்தியாளர் ஒன்றியத்தின் ஏற்பாட்டில் லண்டன் சவுத்ஹோல் பகுதியில் நடைபெற்ற இச்சந்திப்பில் லண்டன் வாழ் புலம் பெயர் தமிழர்களும், சிங்கள ஊடகவியலாளர்கள் சிலரும் கலந்து கொண்டிருந்தனர்.
அவர் அங்கு தொடர்ந்து கருத்து வெளியட்ட அவர் குறுகிய திறந்த வெளி நிலப்பரப்பை போர் அற்ற பாதுகாப்பு பிரதேசமாக அறிவித்து அப்பகுதிகளுக்குள் மக்களை வரச்சொல்லி பின் அப்பகுதிக்குள் தாக்குதல் மேற்கொள்ளப்பட்டதும் தமக்கு தெரியும் எனவும் குறிப்பிட்டார்.
சர்வதேச நாடுகள் தமது பொருளாதார மற்றும் இராணுவ நலன்சார்ந்த தந்திரோபாய ரீதியில் சிறீலங்காவில் இவ்வாறான கொடிய போருக்கும், அதனூடான இனப்படுகொலைக்கும் அனுமதித்துள்ளதாகவும், சிறீலங்காவில் நடைபெற்றதை முன்மாதிரியாக பின்பற்றி பிராந்திய நாடுகளும் செயற்பட வாய்ப்பை ஏற்படுத்தியுள்ளது எனவும் அவர் மேலும் தெரிவித்தார்.
இலங்கைத் தமிழர்களின் இன்னல்களை சொல்லிக்கொண்டு அரசியலில் தம்மை நிலைநிறுத்திக்கொண்ட தமிழக தலைவர்களை தான் நன்கு அறிந்துள்ளதாகவும், அதேவேளை தமிழகத்தில் உள்ள இலங்கை அகதிகள் தங்கியுள்ள முகாம்களுக்கு தான் சென்ற போது அங்கு அவர்கள் மிருகங்களைப்போல் நடாத்தப்படுவதை தான் கண்டதாகவும், இந்த விடயத்தில் தமிழக அரசியல்வாதிகள் அக்கறை கொள்ளவில்லை எனவும் அருந்ததி ராய் மேலும் தெரிவித்தார்.
*************
உறுதிமொழிகளை நம்பி ஏமாறும் உறுதியற்ற கூட்டமைப்பு!
ஏற்றுக்கொள்ளக் கூடியதும் நிலைத்து நீடிக்கக் கூடியதுமான தீர்வு ஒன்றைப் பெற்றுக்கொள்ள இந்தியா தனது முழுப்பங்களிப்பையும் ஒத்துழைப்பையும் தொடர்ந்து வழங்கும் என்று கொழும்பு வந்த இந்திய குழுவினர் சந்திப்பின் போது தம்மிடம் உறுதியளித்ததாக கூட்டமைப்பின் நாடாளுமன்ற உறுப்பினர் சுரேஷ் பிரேமச்சந்திரன் தெரிவித்தார்.
இலங்கைக்கு விஜயம் மேற்கொண்டிருந்த இந்தியாவின் மூவரணிக்கும் தமிழ்த் தேசியக் கூட்டமைப்புக்கும் இடையிலான சந்திப்பு இந்தியத் தூதரகத்தில் நேற்று முற்பகல் 10.30 மணிக்கு ஆரம்பமாகி 11.45 மணி வரை இடம்பெற்றது.
இந்தச் சந்திப்பில் இந்திய வெளிவிவகாரச் செயலர் நிருபமா ராவ், பாதுகாப்பு ஆலோசகர் சிவ்சங்கர் மேனன், பாதுகாப்புச் செயலாளர் பிரதீப்குமார் ஆகியோரும், கூட்டமைப்பின் சார்பில் நாடாளுமன்ற உறுப்பினர்களான இரா.சம்பந்தன், மாவை சேனாதிராசா, சுரேஷ் பிரேமச்சந்திரன், செல்வம் அடைக் கலநாதன், எம்.ஏ.சுமந்திரன், அரசுத் தலைவர் சட்டத்தரணி கனகேஸ்வரன் ஆகியோரும் கலந்து கொண்டனர்.
இந்தச் சந்திப்புக் குறித்து சுரேஷ் பிரேமச்சந்திரன் கருத்து வெளியட்ட போது இந்தியத் தரப்புடன் நடத்திய பேச்சுக்கள் நம்பிக்கை தரக்கூடியனவாக அமைந்திருந்தன.
தமிழ் பேசும் மக்களின் முக்கிய விடயங்கள் குறித்து மூன்று கோரிக்கைகளை முன்வைத்ததாகவும் அந்தக் கோரிக்கைகள் சரியானவை என்றும் ஏற்றுக்கொள்ளக்கூடியவை என்றும் இந்தியத் தரப்புத் தெரிவித்தது எனக் குறிப்பிட்டுள்ளார்.
இனப்பிரச்சினைக்கு நிரந்தரத் தீர்வு ஒன்றை எட்ட இந்தியா தொடர்ந்தும் உதவும் ஒத்துழைப்பு வழங்கும் என்றும் இந்தியத் தரப்பு திட்டவட்டமாகத் தெரிவித்தது.
இலங்கை அரசுடன் ஆறுகட்டப் பேச்சுக்கள் நடந்து முடிந்த போதும் எந்த முன்னேற்றத்தையும் காண முடியவில்லை.
இழுத்தடிக்கும் போக்கே இலங்கை அரசுத் தரப்பில் காணப்படுகின்றது என்றும் தமிழ் பேசும் மக்களின் காணிகளை கையகப்படுத்துவதும் தமிழ்ப் பிரதேசங்களை இராணுவ மயப்படுத்துவதும் தொடர்கின்றன என்றும் இந்தியத் தரப்பிடம் தெரிவித்துள்ளனர்.
**************

ரஷ்ய ஆதரவு தேடிப் பறக்கும் மகிந்த
சர்வதேச ரீதியாக போர்க்குற்றம் தொடர்பான நெருக்கடிகளை எதிர்கொண்டுள்ள மகிந்த ராஜபக்ஷ, அதற்கெதிரான செயற்பாடுகளுக்காக ரஷ்யாவின் ஆதரவைப் பெற்றுக்கொள்ளும் நோக்குடன் செவ்வாய்கிழமை அந்த நாட்டுக்கான விஜயம் ஒன்றை மேற்கொள்ளவுள்ளார்.
சர்வதேச நெருக்கடிகளிலிருந்து மீள்வதற்காக ரஷ்யாவின் ஆதரவைப் பெற்றுக்கொள்வதும், இலங்கையின் தற்போதைய நிலைமைகள் தொடர்பில் ரஷ்யத் தலைவர்களுக்கு விளக்கமளிப்பதும்தான் அவரது இந்த விஜயத்தின் பிரதான நோக்கமாக இருக்கும் என கொழும்பில் வெளிவிவகார அமைச்சு வட்டாரங்கள் தெரிவித்தன.
ரஷ்ய அரசுத் தலைவர் டிமிட்ரி மெட்வீட்டுடன் தனியாகப் பேச்சுக்களை நடத்தவிருக்கும் மகிந்த ராஜபக்ஷ, அதன்போது ஐ.நா. நிபுணர்குழு வெளியிட்ட போர்க் குற்ற அறிக்கை விடயத்தில் இலங்கைக்கு ஆதரவளித்தமைக்காக நன்றிகளையும் தெரிவிக்கவுள்ளார்.
இதனைத்தொடர்ந்து சென் பீற்றர்ஸ்போர்கில் நடைபெறவிருக்கும் சர்வதேச பொருளாதார மநாட்டிலும் பங்குகொள்ளும் அரசுத் தலைவர் மகிந்த ராஜபக்ஷ, உலகத் தலைவர்கள் பலருடனும் பேச்சுக்களை நடத்தவிருக்கின்றார்.
ஜுன் 16 ஆம் திகதி முதல் 18 ஆம் திகதி வரையில் இந்த மாநாடு நடைபெறவிருக்கின்றது.
இதில் சீன அரசுத் தலைவர் ஹ+ ஸின்டாவோவும் பங்குகொள்கின்றார் என்பது குறிப்பிடத்தக்கது.
இலங்கைப் போர்க் குற்றங்கள் தொடர்பான அறிக்கையை ஐ.நா. நிபுணர்குழு வெளியிட்ட பின்னர் உருவாகியிருக்கும் நிலைமைகள் தொடர்பில் இந்தச் சந்திப்பின்போது ரஷ்யத் தலைவருக்கும் ஏனைய நாடுகளின் தலைவர்களுக்கும் அரசுத் தலைவர் மகிந்த ராஜபக்ஷ விளக்குவார் எனத் தெரிகின்றது.
*************
அதிகாரம் வழங்க மறுக்கும் மகிந்த
இனப்பிரச்சினை தீர்வுக்கு 13ஆவது அரசியல் அமைப்பை நடைமுறைப்படுத்தி அதிகாரபரவலாக்கலை மேற்கொண்டாலும் காணி, மற்றும் காவல்துறை அதிகாரங்களை மாகாணசபைக்கு வழங்க முடியாது என சிறிலங்கா அரசுத்தலைவர் மகிந்த ராசபக்ச நேற்று இந்திய உயர்மட்ட குழுவிடம் தெரிவித்து விட்டார் என சண்டே ரைம்ஸ் தெரிவித்துள்ளது.
கடந்த வெள்ளிக்கிழமை நாடாளுமன்ற கட்டிடத் தொகுதியில் நடைபெற்ற ஐக்கிய மக்கள் சுதந்திர முன்னணியின் தலைவர்கள் கூட்டத்தின் போது இந்த அதிகாரங்களை வழங்குவதற்கு கட்சி தலைவர்கள் எதிர்ப்பை தெரிவித்ததாக இந்திய குழுவிடம் மகிந்த ராசபக்ச தெரிவித்துள்ளார்.
1988ஆம் ஆண்டு கொண்டுவரப்பட்ட மாகாணசபைகளுக்கு அதிகாரங்களை வழங்கும் 13ஆவது அரசியல் அமைப்பு திருத்தத்தில் காணி மற்றும் காவல்துறை அதிகாரங்களும் மாகாணசபைக்கு வழங்கப்பட்டிருந்தது.
ஆனால் சிறிலங்கா அரசாங்கம் பின்னர் அதை மீளப்பெற்றுக்கொண்டது.
இந்தியாவில் மாநிலங்களுக்கு காணி காவல்துறை அதிகாரங்கள் வழங்கப்பட்டது போல் இலங்கையில் மாகாணங்களுக்கு இந்த அதிகாரங்களை வழங்கி 13வது அரசியல் அமைப்ப திருத்தத்தை முழுமையாக நடைமுறைப்படுத்த வேண்டும் என்று இந்திய குழு வலியுறுத்திய போது மாகாணசபைகளுக்கு காணி காவல்துறை அதிகாரங்களை வழங்க முடியாது என மகிந்த ராசபக்ச தெரிவித்துள்ளார்.
திட்டமிட்ட சிங்கள குடியேற்றங்களும், தமிழ் மக்களுக்கான பாதுகாப்புமே இனப்பிரச்சினையில் முக்கிய விடயமாக காணப்படுவதாகவும், காணி மற்றும் காவல்துறை அதிகாரங்களை மத்திய அரசாங்கம் தனது கட்டுப்பாட்டில் வைத்திருந்தால் இனப்பிரச்சினை ஒரு போதும் தீராது என தமிழர் தரப்பில் சுட்டிக்காட்டப்படுகிறது.
இனப்பிரச்சினையை தீர்க்க வேண்டுமாக இருந்தால் வடக்கு கிழக்கில் திட்டமிட்ட சிங்கள குடியேற்றங்கள் நிறுத்தப்பட வேண்டும் என்றும், தமிழ் மக்களுக்கான பாதுகாப்பு உறுதிப்படுத்தப்பட வேண்டும் என்றும் தமிழர் தரப்பு வலியுறுத்தி வருகிறது.
*****************
மக்களை ஏமாற்றும் அரசு
அவசர காலச்சட்டத்தைத் தளர்த்தப் போவதாகக் கூறி அரசாங்கம் பொதுமக்களைத் தொடர்ச்சியாக ஏமாற்றி வருவதாக பாராளுமன்ற உறுப்பினர் விஜித ஹேரத் குற்றம் சாட்டியுள்ளார்.
இலங்கையின் பெரும்பாலான ஊடகங்கள் வாயிலாக அவசர காலச் சட்டத்தை தளர்த்தப் போவதாக அரசாங்கம் மேற்கொள்ளும் பிரச்சாரங்களில் எள்ளளவும் உண்மையில்லை என்றும் அவர் மேலும் சுட்டிக்காட்டியுள்ளார்.
"இரிதா திவயின" ஞாயிறு வாராந்த திவயினப் பத்திரிகைக்கு அளித்துள்ள பேட்டியிலேயே ஜே.வி.பி. கட்சியின் பிரச்சாரச் செயலாளரும் பாராளுமன்ற உறுப்பினருமான விஜித ஹேரத் இந்த விடயங்களை முன்வைத்துள்ளார்.
கடந்த காலங்களில் அவசர காலச்சட்ட விதிகளைத் தளர்த்தப் போவதாக ஊடகங்கள் வாயிலாக அரசாங்கம் பெருமெடுப்பில் பிரச்சாரங்களை மேற்கொண்டிருந்தது.
அமைச்சரவை முடிவுகளை அறிவிக்கும் ஊடகவியலாளர் மகாநாடொன்றின் போதும் அமைச்சர் கெஹலிய ரம்புக்வெல்ல அதுபற்றிப் பிரஸ்தாபித்திருந்தார்.
அதுமாத்திரமன்றி சட்டமாஅதிபரே கூட அவசர காலச்சட்டத்தை தளர்த்துவது குறித்து ஊடகமொன்றில் கருத்து வெளியிட்டிருந்தார்.
ஆனாலும் அரசாங்கம் அவ்வாறான செயற்பாடுகள் மூலம் ஒருபுறத்தில் பொதுமக்களை ஏமாற்றிக் கொண்டு மறுபுறத்தில் பாராளுமன்றத்தின் ஊடாக அவசர காலச்சட்டத்தை நீடித்துக் கொண்டிருக்கின்றது.
அந்த வகையில் அவசர காலச்சட்டத்தை நீக்கும் நோக்கம் அரசாங்கத்திடம் அடியோடு இல்லை என்பதையே அது புலப்படுத்துகின்றது என்றும் அவர் மேலும் குறிப்பிட்டுள்ளார
****************

அரசுக்கு எதிரானவர்களை அடையாளம் காண ஏற்பாடு
இனிவரும் காலங்களில் அரசாங்கத்துக்கு எதிரான எதிர்ப்பு ஆர்ப்பாட்டங்களை மேற்கொள்வோரை வீடியோ ஒளிப்பதிவு செய்ய அரசாங்கம் தீர்மானித்துள்ளது.
அதன் அடிப்படையில் நாடு முழுவதும் நடைபெறும் அரச எதிர்ப்பு ஆர்ப்பாட்டங்கள் மற்றும் அதில் பங்குபற்றுவோர் இனிவரும் காலங்களில் காவல் திணைக்கள உதவியுடன் வீடியோ ஒளிப்பதிவு செய்யப்படவுள்ளனர்.
அதற்கென காவல் திணைக்களத்தில் விசேட வீடியோ ஒளிப்பதிவாளர்கள் அணியொன்றை உருவாக்கவும் திட்டமிடப்பட்டுள்ளது.
கட்டுநாயக்க சுதந்திர வர்த்தக வலயத்தில் நடைபெற்ற ஆர்ப்பாட்டத்தின் போது இடம்பெற்ற விரும்பத்தகாத சம்பவங்களின் எதிரொலியாகவே அரசாங்கம் இந்த தீர்மானத்தை எடுத்துள்ளது.
அதே நேரம் கட்டுநாயக்கவில் காவல்துறையினர் மீது தாக்குதலை மேற்கொண்டவர்கள் சிலர் சம்பவத்தின் போது எடுக்கப்பட்ட புகைப்படங்களைக் கொண்டு அடையாளம் காணப்பட்டுள்ளதாகவும் அறிய முடிகின்றது.
பெரும்பாலும் அவர்களுக்கெதிராக எதிர்வரும் நாட்களில் கடும் நடவடிக்கைகள் எடுக்கப்படலாம் என்று எதிர்பார்க்கப்படுகின்றது.
************

Saturday, 11 June 2011

செய்திகள் 11/06


தொடர்ந்தும் கைதிகளை மனிதாபிமானமற்று நடத்தும் ஸ்ரீலங்கா!
கொழும்பு மகஸின் சிறைச்சாலையில் தடுத்து வைக்கப்பட்டுள்ள தமிழ் அரசியல் கைதிகள் ஏனைய கைதிகளால் மனிதாபிமானமற்ற வகையில் சித்திரவதை செய்யப்படுகின்றனர்.
அரசியல் கைதிகளின் ஆடைகளை ஏனைய கைதிகள் பலவந்தமாகக் கழற்றி கேவலப்படுத்துகிறார்கள்.
இவற்றை கண்டும், குருடர்களைப் போல சிறை அதிகாரிகள் செயற்படுகிறார்கள் என நாம் இலங்கையர் அமைப்பின் நிறைவேற்றுக் குழு உறுப்பினர் உதுல் பிரேமரட்ண தெரிவித்துள்ளார்.
மகஸின் சிறையில் தடுத்து வைக்கப்பட்டுள்ள தமிழ் அரசியல் கைதிகளைப் பார்வையிட நாம் இலங்கையர் அமைப்பின் நிறைவேற்றுக் குழு உறுப்பினர் உதுல் பிரேமரட்ண நேற்று அங்கு சென்றார்.
அங்கு தமிழ் அரசியல் கைதிகள் எதிர்நோக்கும் பல்வேறு பிரச்சினைகளை அவர் கேட்டறிந்து கொண்டார்.
கொழும்பு மகஸின் சிறைச்சாலைக்கு நேற்றுக்காலை சென்று அங்கு தடுத்து வைக்கப்பட்டுள்ள தமிழ் அரசியல் கைதிகளைச் சந்தித்து, அவர்கள் எதிர்நோக்கும் பிரச்சினைகள் தொடர்பாக கலந்துரையாடினார்.
தாங்கள் எதிர்கொள்ளும் சில பிரச்சினைகள் தொடர்பாக அவர்கள் தன்னிடம் மனம்விட்டுக் கூறியதாகவும் அதில் சில விடயங்கள் தனது கண்களை கலங்க வைத்தன எனவும் தெரிவித்துள்ளார்.
**********

மோசடிகள் நிறைந்த அரச காணி விற்பனை?
கொழும்பில் உள்ள இராணுவத் தலைமையகத்துக்குச் சொந்தமான நிலம் வெளிநாட்டு நிறுவனங்களுக்கு விற்கப்பட்டது தொடர்பான தரவுகள் எதுவும் அரசாங்க கணக்குகளில் பதியப்படவில்லை என்பது தெரியவந்துள்ளது.
நேற்று கொழும்பில் இடம்பெற்ற செய்தியாளர் சந்திப்பின் போது இது தொடர்பாக கருத்துத் தெரிவிக்கையில் ஐக்கிய தேசியக் கட்சியின் தேசியப் பட்டியல் நாடாளுமன்ற உறுப்பினர் ஹர்ஷ டி சில்வா இதனைத் தெரிவித்தார்.
இராணுவத் தலைமையகத்திற்கு சொந்தமான நிலத்தை இரு வெளிநாட்டு நிறுவனங்களுக்கு விற்பனை செய்தது தொடர்பாக எந்தக் கணக்கும் அரசாங்கப் பதிவேடுகளில் பதியப்படவில்லை.
பாதுகாப்புச் செயலாளர் கோட்டாபய ராஜபக்ஸவே இந்த நிலத்தை வெளிநாட்டு நிறுவனங்களுக்கு விற்பனை செய்துள்ளார்.
இது ஆபத்தானதொன்று மட்டுமன்றி அரசியலமைப்புக்கும் முரணான செயலாகும்.
10 - 20 ஏக்கர் வரையிலான நிலம் விற்பனை செய்யப்பட்டுள்ளது தொடர்பான எந்த கணக்கும் திறைசேரியின் கணக்கில் இடம்பெறவில்லை.
இதுபற்றிய தகவல் நாடாளுமன்றத்துக்கும் தெரிவிக்கப்படவில்லை என்றார்.
இராணுவத் தலைமையத்திற்கு சொந்தமான நிலத்தை சங்கிரி லா நிறுவனம் மற்றும் சீன நிறுவனம் கொள்வனவு செய்திருந்தமை குறிப்பிடத்தக்கது.
**********

நல்லிணக்க ஆணைக்குழுவின் அறிக்கை நவம்பரில்?
ஸ்ரீலங்கா அரசாங்கத்தினால் நியமிக்கப்பட்டுள்ள கற்றுக்கொண்ட பாடங்கள் மற்றும் நல்லிணக்க ஆணைக்குழு தனது இறுதி அறிக்கையை எதிர்வரும் நவம்பர் 15 ஆம் திகதிக்கு முன்னர் வெளியிடப்படவிருப்பதாக அறிவித்துள்ளது.
இறுதி அறிக்கை வாய்மூல மற்றும் எழுத்து மூலமாக பெற்ற சாட்சியங்களின் அடிப்படையில் மாத்திரமே அமையும் என்று ஆணைக்குழுவின் ஊடக ஆலோசகர் லக்ஸ்மண் விக்கிரமசிங்கா தெரிவித்தார்.
ஆணைக்குழுவின் உறுப்பினர்கள் ஐநா நிபுணர் குழுவின் அறிக்கையை முழுவதுமாக படித்துள்ளனர்.
ஆனால் ஆணைக்குழுவின் அறிக்கை ஐநா நிபுணர் குழுவின் அறிக்கைக்கு பதிலளிப்பதாக அமையாது என்றும் அவர் கூறினார்.
பெறப்பட்ட சாட்சியங்களை பகுப்பாய்வு செய்வது தற்போது நடைபெறுகின்றது.
மேலும் தகவல்கள் தேவைப்பட்டால் ஏற்கனவே சாட்சியமளித்தவர்கள் மீண்டும் அழைக்கப்பட்டு சாட்சியமளிக்க வைக்கப்படுவர் என்றும் அவர் கூறினார்.
ஆணைக்குழு வடக்கு மாகாணத்தில் சகல பிரதேசயலாளர் பிரிவுகளுக்கும் சென்று விசாரணை நடத்தியது.
கிழக்கிலும் தென்பகுதியிலும் மற்றும் பயங்கரவாதத்தினால் பாதிக்கப்பட்ட பகுதிகளுக்கும் சென்று விசாரணை நடத்தியதாக அவர் தெரிவித்துள்ளார்.
ஆனால் இந்த ஆணைக்குழு மகிந்த ராசபக்ச தரப்பு புரிந்த போர்க்குற்றத்தை மறைப்பதற்கும், போர்க்குற்றவாளிகளை தப்ப வைப்பதற்குமே அமைக்கப்பட்டதாக மனித உரிமை அமைப்புக்கள் குற்றம் சாட்டியுள்ளன.
இந்த ஆணைக்குழுவில் நியமிக்கப்பட்டவர்கள் அனைவரும் நடுநிலையாளர்கள் அல்ல என்றும் அவர்கள் அனைவரும் மகிந்த ராசபக்சவின் ஆதரவாளர்கள் என்றும் மனித உரிமை அமைப்புக்கள் சுட்டிக்காட்டியுள்ளன.
*************

இந்தியக் குழுவுடன் தமிழ்த் தேசியக் கூட்டமைப்பு சந்திப்பு
கொழும்பு சென்றுள்ள இந்திய உயர்மட்டக் குழுவினரை தமிழ்த் தேசியக் கூட்டமைப்பு இன்று சந்தித்து இனப்பிரச்சினைத் தீர்வு, மீள்குடியேற்றம், தடுத்துவைக்கப்பட்டுள்ள தமிழ்க் கைதிகள் ஆகிய முக்கிய விடயங்கள் தொடர்பாக பேச்சு நடத்தவுள்ளது என கூட்டமைப்பு நாடாளுமன்ற உறுப்பினர் செல்வம் அடைக்கலநாதன் தெரிவித்தார்.
இந்திய வெளியுறவுச் செயலர் நிருபமாராவ், பாதுகாப்பு ஆலோசகர் சிவ்சங்கர் மேனன், பிரதமரின் செயலாளர் கே.நாயக் ஆகியோர் நேற்றுப் பகல் இலங்கை சென்று சேர்ந்தனர்.
இலங்கை வரும் முன்னர் இந்தக் குழுவில் அங்கம் வகிக்கும் பாதுகாப்பு ஆலோசகர் சிவ்சங்கர் சென்னை சென்று, தமிழக முதலமைச்சர் ஜெயலலிதாவைச் சந்தித்து, இலங்கை தொடர்பான விடயங்கள் குறித்து ஆராய்ந்தார்.
யுத்தத்தால் இடம்பெயர்ந்த மக்களின் மறு வாழ்வு, தமிழக சட்டசபையில் இலங்கைக்கு எதிராக நிறைவேற்றப்பட்ட தீர்மானம் குறித்து இலங்கையுடன் எவ்வாறு பேச்சு நடத்தப்படும் என இந்தப் பேச்சுகளில் ஆராயப்பட்டதாக இந்திய ஊடகங்கள் செய்தி வெளியிட்டுள்ளன.
தமிழக முதலமைச்சர் ஜெயலலிதாவைச் சந்தித்த பின்னர் இலங்கை சென்றுள்ள இந்திய உயர் மட்டக் குழுவினருடன் கூட்டமைப்பு நடத்தும் பேச்சுகள் முக்கியத்துவம் வாய்ந்தவையாக இருக்கும் என ஆய்வாளர்கள் தெரிவிக்கின்றனர்.
இந்திய உயர்மட்டக் குழு கூட்டமைப்பை இன்று காலை சந்திக்கும். கூட்டமைப்பின் சார்பில் அதன் நாடாளுமன்றக் குழுத்தலைவர் இரா. சம்பந்தன், மாவை சேனாதிராசா, சுரேஷ் பிரேமச்சந்திரன், எம்.ஏ.சுமந்திரன், செல்வம் அடைக்கலநாதன் ஆகியோர் கலந்துகொள்வர்.
புதுடில்லியின் செய்தியை கொழும்புக்குத் தெரிவிக்கும் அதேசமயம், 2009 மே யில் ஐ.நா. செயலாளர் நாயகம் பான் கீ மூனும் அரசுத் தலைவர் மகிந்த ராஜபக்ஷவும் இணங்கிக் கொண்ட கூட்டறிக்கை தொடர்பாக இலங்கை அரசாங்கம் செயற்பட வேண்டுமென தூண்டுதல் அளிக்கக்கூடுமென இந்திய ஊடகங்கள் தெரிவித்துள்ளன.
***********

மன்மோகனுக்கு மகிந்த அழைப்பு
இலங்கைக்கு விஜயம் செய்யுமாறு அரசுத் தலைவர் மஹிந்த ராஜபக்ஷ விடுத்த அழைப்பை இந்திய பிரதமர் மன்மோகன் சிங் ஏற்றுக்கொண்டுள்ளதாக அரசுத் தலைவரின் ஊடகப்பிரிவு இன்று அறிவித்துள்ளது. 
இலங்கைக்கு விஜயம் மேற்கொண்டுள்ள இந்திய வெளிவிவகார செயலாளர் நிருபமா ராவ், தேசிய பாதுகாப்பு ஆலோசகர் சிவ்சங்கர் மேனன் ஆகியோரடங்கிய இந்திய உயர் மட்ட தூதுக்குழு, இந்த அழைப்பை இந்திய பிரதமர் ஏற்றுக்கொண்டமை தொடர்பான கடிதத்தை அரசுத் தலைவர் மஹிந்த ராஜபக்ஷவிடம் கையளித்ததாக அரசுத் தலைவரின் ஊடகப் பிரிவுப் பணிப்பாளர் பந்துல ஜயசேகர தெரிவித்தார்
*************

கைதிகளை வைத்து அரசியல் நடத்தும் அரசு
கொழும்பு சிறைச்சாலைகளில் உள்ள கைதிகளைப் பார்வையிடச் செல்லும் உறவினர்கள், உணவுப் பண்டங்களை கொண்டுசெல்ல அனுமதி மறுக்கப்படுவதாக காணாமல் போனோரை தேடியறியும் குழுவிடம் முறைப்பாடு செய்யப்பட்டுள்ளதாக அக்குழுவின் செயலாளர் சுந்தரம் மகேந்திரன் தெரிவித்துள்ளார்.
இது தொடர்பாக அவர் விடுத்துள்ள அறிக்கையொன்றில் கடந்த சில தினங்களாக கொழும்பு சிறைச்சாலைகளில் கைதிகளை பார்வையிட செல்லும் தமது உறவினர்கள் கொண்டு செல்லும் உணவுப் பண்டங்களை கைதிகளிடம் ஒப்படைப் பதற்கு அனுமதி வழங்கப்படவில்லை.
இது தொடர்பாக அரசியல் கைதிகளின் உறவினர்களால் காணாமல் போனோரை தேடியறியும் குழுவுக்கு முறைப்பாடு செய்யப்பட்டது எனத் தெரிவித்துள்ளார்.
இந்த விடயம் தொடர்பாக காணாமல் போனோரை தேடியறியும் குழுவின் போசகர் கலாநிதி விக்கிரமாகு கருணாரட்ன மூலம் சிறைச்சாலை ஆணையாளரின் கவனத்திற்கு கொண்டுவரப்பட்டது.
இது தொடர்பாக சிறைச்சாலை ஆணையாளர் விளக்கமளிக்கையில் உணவுப் பொருட்கள் மூலமாக போதை வஸ்துப் பொருட்கள் கொண்டுசெல்லப்படுவதால் அதை கட்டுப்படுத்த இந்நடவடிக்கை மேற்கொள்ளப்பட்டது எனத் தெரிவித்தார்.
இந்த பதிலில் திருப்தியடையாத கலாநிதி விக்கிரமபாகு கருணாரட்ன, தமிழ் அரசியல் கைதிகளிடமும் இத்தகைய நடைமுறை மேற்கொள்ளப்படுவதாக கைதிகளின் உறவினர்கள் முறைப்பாடு செய்துள்ளனர் எனத் தெரிவித்தார்.
அதையடுத்து இவ்விடயம் தொடர்பாக ஆராய்ந்து பார்த்து நடவடிக்கை மேற்கொள்வதாக சிறைச்சாலை ஆணையாளர் தெரிவித்தார்.
எனவே அரசியல் கைதிகள் இது தொடர்பாக பிரச்சினை ஏற்பட்டால் அது தொடர்பாக தமக்கு அறியக்கிடைத்தால் அவற்றிற்கான தீர்வை பெற்றுத்தர தாம் நடவடிக்கை மேற்கொள்வோம் எனவும் அந்த அறிக்கையில் தெரிவிக்கப்பட்டுள்ளது.
***********




Friday, 10 June 2011

செய்திகள் 10/06


அமெரிக்க இரட்டை வேடம்!

போருக்குப் பின்னரான சூழலில் அமெரிக்கா தொடர்ந்தும் சிறிலங்கா கடற்படைக்கு உதவிகளை வழங்கும் என்று அமெரிக்கக் கடற்படையின் பசுபிக் பிராந்திய கட்டளைத் தளபதி அட்மிரல் றொபேட் எவ்.வில்லாட் உறுதியளித்துள்ளார்.
சிறிலங்கா கடற்படைத் தளபதி வைஸ் அட்மிரல் சோமதிலக திசநாயக்கவை சிங்கப்பூரில் சந்தித்துப் பேசிய போதே அவர் இந்த உறுதிமொழியை வழங்கியுள்ளார்.
சங்கிரிலா கருத்தரங்கு என்ற பெயரில் சிங்கப்பூரில் நடத்தப்பட்ட ஆசிய பாதுகாப்பு மாநாட்டில் பங்கேற்கச் சென்றிருந்த போதே, அமெரிக்க- சிறிலங்கா கடற்படைத் தளபதிகளுக்கு இடையிலான இந்தச் சந்திப்பு இடம்பெற்றது.
விடுதலைப் புலிகளுக்கு எதிரான போரில் சிறிலங்கா அரசாங்கம் வெற்றி பெறுவதற்கு அமெரிக்கா வழங்கிய உதவிகள் குறித்து தாம் எப்போதும் மதிப்புடன் நோக்குவதாக சிறிலங்கா கடற்படைத் தளபதி இந்தச் சந்திப்பின்போது, அமெரிக்கத் தளபதியிடம் கூறியுள்ளார்.
அதேவேளை, சிறிலங்காவின் போருக்குப் பிந்திய நிலைமைகள் தொடர்பாக அமெரிக்கத் தளபதி விபரங்களைக் கேட்டறிந்துள்ளார்.
குறிப்பாக சிறிலங்கா கடற்படை தொடர்பாகவும், விடுதலைப் புலிகளின் ஆயுதக் கப்பல்களை மூழ்கடிக்கும் நடவடிக்கையில் பங்கேற்ற- அமெரிக்கா வழங்கிய 'சமுத்திர' என்ற போர்க்கப்பலின் செயற்பாடு பற்றியும் அவர் விபரங்களைக் கேட்டறிந்து கொண்டுள்ளார்.
அமைதி திரும்பியுள்ள நிலையில் அமெரிக்கப் போர்க்கப்பல்கள் சிறிலங்கா துறைமுகங்களுக்கு வரமுடிந்துள்ளதாகவும், எனவே சிறிலங்காவுக்கான பயணங்களை அவை மேற்கொள்ள வேண்டும் என்றும் சிறிலங்கா கடற்படைத் தளபதி இந்தச் சந்தப்பின் போது வேண்டுகோள் விடுத்துள்ளார்.
************

தடுத்து வைக்கப்பட்டுள்ளோர் எத்தனை பேர்?
பூஸா, கொழும்பு, வவுனியா தடுப்புமுகாம்களில் தடுத்து வைக்கப்பட்டுள்ள 839 தமிழீழ விடுதலைப் புலிகள் இயக்க அங்கத்தவர்களில் இருவருக்கு எதிராக மாத்திரமே குற்றப்பத்திரம் தாக்கல் செய்யப்பட்டுள்ளதாக அரசாங்கம் நேற்று வியாழக்கிழமை நாடாளுமன்றத்தில் அறிவித்தது.
ஜே.வி.பி. நாடாளுமன்ற உறுப்பினர் அநுரகுமார திசாநாயக்க எழுப்பிய கேள்வியொன்றுக்கு பதிலளிக்ககையில் அரசாங்கத் தரப்பு பிரதம கொறடாவான அமைச்சர் தினேஷ் குணவர்தன இதைத் தெரிவித்தார்.
அரசாங்கம் தெரிவித்த எண்ணிக்கையை ஆட்சேபித்த அநுரகுமார திசாநாயக்க அமைச்சர்கள் 11ஆயிரம், 12ஆயிரம், 15ஆயிரம் என பல்வேறு எண்ணிக்கையில் விடுதலைப் புலிகள் தடுத்துவைக்கப்பட்டுள்ளதாக கூறியிருந்தனர்.
ஆனால் இன்று அரசாங்கத் தரப்பு பிரதம கொறடா 839 பேர் தடுத்து வைக்கப்பட்டுள்ளதாக கூறுகிறார்.
பூஸா, வவுனியா, கொழும்பு ஆகிய 3 தடுப்பு முகாம்கள் மாத்திரமே குறிப்பிடப்பட்டது.
தனக்குத் தெரிந்தவரை வெலிகந்தை, திருகோணமலை ஆகிய இடங்களிலும் தடுப்புமுகாம்கள் உள்ளன என்றார்.
அப்போது அமைச்சர் தினேஷ் குணவர்தன பேசுகையில், பாதுகாப்பு அமைச்சினால் வழங்கப்பட்ட தகவல்களின் அடிப்படையிலேயே தான் பதிலளித்தாக தெரிவித்தார்.
இதேவேளை, தடுத்து வைக்கப்பட்டுள்ள விடுதலைப் புலியினருக்கு எதிரான நீதிவிசாரணைகள் சிங்கள மொழியில் நடத்தப்படுவதால் அவர்கள் பெரும் பிரச்சினையை எதிர்நோக்குவதாக அநுர குமார திசாநாயக்க தெரிவித்தார்.
அப்போராளிகள் சிங்கள மொழி பரிச்சயமானவர்கள் அல்லர் எனவும் அத்தகைய ஒருவருடன் தான் பேசியதாகவும் அவருக்கு நீண்ட சிறைத்தண்டனை வழங்கப்பட்டுள்ளது. ஆனால் அவர் அதை அறிந்திருக்கவில்லை என அவர் கூறினார்.
************

நோர்வேயுடன் உறவு?
நோர்வேயுடன், போருக்குப் பின்னரான புதிய அபிவிருத்தித் திட்டங்களை முன்னெடுப்பதற்கான பேச்சுக்களில் ஈடுபட அரசாங்கம் எதிர்பார்த்துள்ளதாக தெரிவிக்கப்படுகிறது.
இலங்கைக்கான முன்னாள் சமாதானத் தூதுவராக செயற்பட்ட எரிக் சொல்ஹெய்முடன் ஒஸ்லோவில் பேச்சுக்கள் நடத்த மகிந்த ராஸபக்ஸ அனுமதியளித்துள்ளதாக அமைச்சர் ராஜித சேனாரத்ன தெரிவித்துள்ளார்.
பாணந்துறையில் உள்ள புதிய மீன்பிடித் துறைமுகத்தை திறந்து வைத்து உரையாற்றுகையிலேயே அமைச்சர் இதனைத் தெரிவித்தார்.
போருக்கு பின்னர் இயல்புநிலையை ஏற்படுத்துவதற்காக அரசாங்கத்தினால் முன்னெடுக்கப்பட்டுவரும் மீள்கட்டுமானப்பணிகள் தொடர்பாக எரிக் சொல்ஹெய்மிடம் விளக்கமளிக்கவுள்ளதாக அமைச்சர் மேலும் தெரிவித்தார்.
இலங்கை மக்களை பாதிப்படையச் செய்யக்கூடிய பொருளாதாரத்தடையை இலங்கை மீது விதிக்கக்கூடாது என்று ஐரோப்பிய நாடுகளைச் சேர்ந்த பிரிதிநிதிகளை ஏற்கனவே சந்தித்து கலந்துரையாடியுள்ளதாக அமைச்சர் மேலும் தெரிவித்தார்.
************
இராணுவ மயமாகும் தேசம்!
அமெரிக்க கடவுச் சீட்டை உடைய அரசாங்கத்தின் உயரதிகாரியொருவர் நாட்டை இராணுவ மயப்படுத்த முயற்சிப்பதாக ஐக்கிய தேசியக் கட்சியின் பாராளுமன்ற உறுப்பினர் மங்கள சமரவீர தெரிவித்துள்ளார்.
நாட்டின் பல பகுதிகளும் இராணுவ மயப்படுத்தப்பட்டு வருவதாகக் குறிப்பிட்டுள்ளார்.
குறிப்பாக மாத்தறை மாவட்டம் அரசாங்கத்தின் திட்டங்களினால் பாதிக்கப்பட்டுள்ளதாகக் குறிப்பிட்டுள்ளார்.
யுத்தம் நிறைவடைந்து இரண்டு ஆண்டுகள் பூர்த்தியடைந்த போதிலும் அரசாங்கம், மக்களை அமைதியாக வாழ்வதற்கு இடமளிக்கவில்லை என அவர் தெரிவித்துள்ளார்.
****************
நீதிமன்ற அவமதிப்புக்கு அனுமதியா?
யாழ் மாவட்டத்தில் சிவில் உடையில் வரும் இராணுவத்தினர் வீடு வீடாகச் சென்று புதிய முறையில் இராணுவப் பதிவுகளை மேற்கொள்வதனாலும், வீட்டிலுள்ளவர்களை வித்தியாசமான கோணங்களில் விசாரணை செய்து வருவதனாலும் மக்கள் மத்தியில் பீதியும் பதற்றமுமானதொரு நிலை காணப்படுகின்றது.
இராணுவத்தினர் வீட்டில் உள்ளவர்களை குடும்பமாக புகைப்படம் எடுப்பதுடன் தனித்தனியாகவும் குடும்ப உறுப்பினர்களைப் புகைப்படம் எடுத்து வருகின்றார்கள்.
உடுவில், தெல்லிப்பளை, கோப்பாய் பிரதேச செயலாளர் பிரிவுகளில் உள்ள சில பகுதிகளில் இத்தகைய நடவடிக்கைகள் இடம் பெற்றுள்ளன.
இது சம்பந்தமாக யாழ் மாவட்டத்தின் நிர்வாகத்திற்குப் பொறுப்பாக இருக்கும் யாழ் மாவட்ட அரச அதிபரோ அன்றி யாழ் மாவட்ட படைகளின் கட்டளைத்தளபதியோ பொது அறிவித்தல் எதனையும் விடாத நிலையில் எவ்வாறு இத்தகைய பதிவுகளை இராணுவத்தினர் தான் மேற்கொள்கின்றார்கள் என உறுதிப்படுத்த முடியும் என பொது மக்கள் பலத்த சந்தேகத்துடன் கேள்வி எழுப்பியுள்ளனர்.
இதே வேளை யாழ். நகரை அண்டிய பகுதியிலுள்ள சில வீடுகளுக்கு இதே பாணியில் கடந்த வாரம் சிவிலுடையில் சென்ற இராணுவத்தினர் இராணுவப் பதிவு அட்டைகளை காட்டுமாறு கோரி, வீட்டிலுள்ளவர்களை தனித்தனியாக விசாரித்துமுள்ளனர்.
குறிப்பாக புனர்வாழ்வு பெற்று விடுதலையான முன்னாள் போராளிகளின் வீடுகளுக்கு சென்று இராணுவத்தினர் இத்தகைய விசாரணைகளை மேற்கொண்டதாகத் தெரிவிக்கப்படுகிறது.
*****************
கடத்தப்பட்டவர் படுகொலை!
நீர்கொழும்பு பிரதேசத்தில் நேற்று கடத்தப்பட்ட வர்த்தகர் இன்று படுகொலை செய்யப்பட்ட நிலையில் சடலமாக மீட்கப்பட்டுள்ளார்.
சிலாபம் பகுதியில் வைத்தே கத்திக்குத்துக் காயங்களுடன் வர்த்தகரின் சடலம் இன்று மீட்கப்பட்டதாக காவல்துறையினர் தெரிவித்துள்ளனர்.
நீர்கொழும்பைச் சேர்ந்த வர்த்தகரான 58 வயதுடைய எம்.கிருஷாந்த என்பவர் நேற்று தனது வாகனத்தில் சென்றுகொண்டிருந்த போது வாகனத்துடன் கடத்தப்பட்டிருந்தார்.
இந்த நிலையில் நீர்கொழும்பை அண்மித்த பிரதேசமான சிலாபம் நயினாமடு என்ற இடத்தில் கைவிடப்பட்ட நிலையில் காணப்பட்ட வாகனம் காவல்துறையினரால் கைப்பற்றப்பட்டுள்ளது.
வர்த்தகரின் உடல், மற்றுமொரு இடத்தில் வைத்து மீட்கப்பட்டதாக காவல்துறையினர் தெரிவித்தனர்.
இவரின் உடலின் கத்திக்குத்து காயங்கள் காணப்படுவதாகவும் காவல்துறையினர் தெரிவித்துள்ளனர்.
பிரேத பரிசோதனைக்காக சடலம் வைத்தியசாலைக்கு எடுத்துச்செல்லப்பட்டுள்ளது.
நீர்கொழும்பு மற்றும் சிலாபம் காவல்துறையினர் விசாரணைகளை நடத்தி வருகின்றனர்.
ஆனால் இதுவரை யாரும் கைது செய்யப்பட்டதாக தகவல் இல்லை.
ஊடகவியலாளர் பிரகீத் கடத்தப்பட்டு 500நாட்கள் கடந்த நிலையில் நேற்று கொழும்பில் கடத்தப்பட்டு காணாமல் போனவர்கள், மனித உரிமை அமைப்புக்கள் ஆர்ப்பாட்டத்தை நடத்திக்கொண்டிருந்த வேளையில் நீர்கொழும்பில் வைத்து வர்த்தகர் கடத்தப்பட்டுள்ளார்
*******************

Thursday, 9 June 2011

செய்திகள் 09/06


தமிழக தீர்மானத்திற்கு நன்றி

ஸ்ரீலங்கா அரசு மீது பொருளாதாரத் தடை விதிக்க வேண்டும் என தமிழக சட்டசபையில் முதலமைச்சர் ஜெயலலிதாவினால் முன்மொழியப்பட்டு நிறைவேற்றப்பட்ட தீர்மானத்தை தமிழ் தேசிய கூட்டமைப்பு வரவேற்பதாக கூட்டடைப்பு பாராளுமன்ற உறுப்பினர் பா.அரியநேத்திரன் தெரிவித்துள்ளார்.
இலங்கையில் உள்ள தமிழ் மக்களாகிய நாம் எமது சுயநிர்ணய உரிமையுடன் வாழ வேண்டும் என்பதற்காக ஆறு தசாப்தங்களுக்கும் மேலாக போராடி வருகிறோம்.
இலங்கை அரசு எமக்கு பல தடவைகள் வழங்கிய வாக்குறுதிகளை நிறைவேற்றவில்லை மாறாக எமது உரிமைகளை நசுக்கிக்கொண்டே வருகின்றது.
கடந்த 2009 ம் ஆண்டு வன்னியில் இடம்பெற்ற உக்கிரமான யுத்தத்தில் பல்லாயிரக்கணக்கான மக்கள் கொல்லப்பட்டதுடன் பல லட்சம் பேர் இடம்பெயர்ந்தார்கள்.
அவர்களின் வாழ்விடங்கள் தரைமட்டமாகி சொத்துக்கள் அழிக்கப்பட்ட நிலையில் இரண்டு வருடங்கள் கடந்தும் இன்னுமே அந்த மக்கள் இருப்பிடங்கள் இன்றி தங்களது மண்ணில் சுதந்திரமாக வாழ முடியாமல் இருப்பதைக் காணலாம்.
விடுதலைப் புலிகளை முற்றாக அழித்துவிட்டதாக ஸ்ரீலங்கா அரசு அறிவித்ததன் பிற்பாடும் தொடர்ந்து இராணுவ ஆக்கிரமிப்புகள் தமிழர் பகுதிகளில் தொடர்வதுடன் தமிழ் மக்களின் உரிமைகள் தொடர்ச்சியாக பறிபோய்க்கொண்டேதான் இருக்கின்றன.
இந்த நேரத்தில் ஐ.நா. சபையும் தமிழ் மக்களின் உரிமைகளை உறுதிப்படுத்தும்படி கோரி அறிக்கை இட்டுள்ளது.
இந்த அறிக்கையையும் தமிழ் தேசிய கூட்டமைப்பு வரவேற்றுள்ளது.
அத்துடன் தற்போது தமிழக சட்டசபையில் முதலமைச்சர் ஜெயலலிதாவினால் முன்மொழியப்பட்டு நிறைவேற்றப்பட்ட "இலங்கை மீது பொருளாதாரத் தடை விதிக்க வேண்டும்" என்ற தீர்மானத்தையும் தமிழ் தேசிய கூட்டமைப்பு வரவேற்பதுடன் முதலமைச்சர் ஜெயலலிதா அவர்களுக்கு நன்றியையும் தெரிவித்துக்கொள்கின்றது.
மேலும் முதலமைச்சர் ஜெயலலிதா அவர்களும் தமிழக மக்களும் இலங்கைத் தமிழ் மக்களுக்கு ஒரு நிரந்தரத் தீர்வைப் பெற்றுத்தர தொடர்ந்தும் பாடுபடவேண்டும் எனவும் அவர் மேலும் தெரிவித்தார்.
**********

நிலைப்பாடு என்ன?
தமிழ்நாடு சட்டப்பேரவையில் சிறிலங்கா அரசுக்கு எதிராக நிறைவேற்றப்பட்ட தீர்மானம் தொடர்பாக சிறிலங்கா நாடாளுமன்றத்தில் எழுப்பப்பட்ட கேள்விக்கு சிறிலங்கா வெளிவிவகார அமைச்சர் ஜி.எல்.பீரிஸ் பதிலளிக்க முடியாமல் திணறும் நிலை ஏற்பட்டது.
நேற்றுப் பிற்பகல் சிறிலங்கா நாடாளுமன்றம் கூடிய போது, தமிழ்நாடு சட்டப்பேரவையில் நிறைவேற்றப்பட்ட தீர்மானம் குறித்த தகவல் உறுப்பினர்களிடம் பரவியதால் பரப்பரப்பாக இருந்தது.
இந்தநிலையில் ஐதேக நாடாளுமன்ற உறுப்பினர் ரவி கருணாநாயக்க எழுந்து, தமிழ்நாடு சட்டசபையில் சிறிலங்கா மீது பொருளாதாரத் தடை விதிக்கக் கோரும் தீர்மானம் நிறைவேற்றப்பட்டுள்ளது தொடர்பாக அரசாங்கத்தின் கருத்து என்ன என்று வெளிவிவகார அமைச்சர் பீரிசிடம் கேள்வி எழுப்பினார்.
சிறிலங்காவுக்கு எதிரான தீர்மானத்தை தமிழ்நாடு சட்டப்பேரவை நிறைவேற்றியுள்ளது. இது மிகவும் முக்கியமான விவகாரம்.
இந்தியா விடயத்தில் எல்லாமே சரியாகத் தான் இருப்பதாக அரசாங்கம் கூறியிருந்தது.
ஆனால் என்ன நடக்கிறது அங்கே? என்று ரவி கருணாநாயக்க, வெளிவிவகார அமைச்சர் பீரிசிடம் கேள்வி எழுப்பினார்.
ஆனால் பீரிஸ் அதற்கு எந்தப் பதிலையும் கூறாமல் உதடுகளை இறுக்கப் பிடித்தபடி அமர்ந்திருந்தார்.
பின்னர் அமைச்சர் நிமால் சிறிபால டி சில்வா எழுந்து இதுபற்றி அரசாங்கம் ஆராய்வதாகக் கூறி சமாளித்துக் கொண்டார்.
************

அறிக்கை விடுமா?
தமிழகச் சட்டசபையில், இந்திய மத்திய அரசு இலங்கைக்கு எதிராகப் பொருளாதார தடை விதிக்கக் கோரி தீர்மானம் நிறைவேற்றியிருப்பது தொடர்பாக இலங்கை அரசு அறிக்கை ஒன்றை விடுமா என பாராளுமன்றில் நேற்று ஐக்கிய தேசியக் கட்சி கேள்வி எழுப்பியுள்ளது
பிரதான எதிர்க்கட்சியான ஐக்கிய தேசியக் கட்சியின் தேசிய அமைப்பாளரும் கொழும்பு மாவட்ட நாடாளுமன்ற உறுப்பினருமான ரவி கருணாநாயக்க இக்கேள்வியை தொடுத்தார்.
அவர் மேலும் தெரிவிக்கையில், தமிழக சட்டசபையில் ஆளுங்கட்சியான அண்ணாதிராவிட முன்னேற்றக் கழகம், முன்னாள் முதல்வர் கருணாநிதியின் திராவிட முன்னேற்றக் கழகம் உட்பட அனைத்துக் கட்சிகளும் இலங்கைக்கு எதிராக தீர்மானம் ஒன்றை நிறை வேற்றியுள்ளன.
இது மிகவும் அவதானமாக நோக்கப்படவேண்டிய ஒரு விடயம்.
இந்திய மத்திய அரசு இலங்கைக்கு எதிராகப் பொருளாதார தடை விதிக்கக் கோரி தமிழக அரசு வலியுறுத்தியுள்ளது.
பாரதூரமான இந்தத் தீர்மானத்தை கண்டித்தோ ஆட்சேபித்தோ அறிக்கை வெளியிட முடியுமா? அந்தத் துணிச்சல் இந்த அரசுக்கு உண்டா? என்று ரவி கருணாநாயக்க கேள்வி எழுப்பினார்.
இதற்குப் பதிலளித்த சபையின் முதல்வர் நிமல் சிறி பால டி சில்வா இலங்கை இந்திய அரசுகளுக்கிடையிலான உறவு பலமானதாகவும் நெருக்கமானதாகவும் உள்ளது என்று கூறியதோடு நேரடியான பதில் எதனையும் அளிக்கவில்லை.
வடக்கு, கிழக்கு மக்கள் திருப்பதியடையும் வகையில் மட்டுமல்லாது தென் பகுதி மக்களும் திருப்தியடையும் வகையிலேயே அரசியல் தீர்வு காணப்படும் என்று நிமல் சிறிபால டி சில்வா தெரிவித்தார்.
இதேவேளை, இலங்கை தமிழர்களுக்கு ஆதரவாக தமிழக சட்டசபையில் தீர்மானம் நிறைவேற்றிய தமிழக முதல்வர் ஜெயலலிதாவுக்கு இலங்கை நாடாளுமன்றத்தில் தமிழ்த் தேசியக் கூட்டமைப்பு நேற்று நன்றி தெரிவித்தது.
நாடாளுமன்றத்தில் அவசரகாலச்சட்டம் தொடர்பான விவாதத்தில் உரையாற்றிய வன்னி மாவட்ட தமிழ்த் தேசியக் கூட்டமைப்பு உறுப்பினர் விநோநோகராதலிங்கம், இலங்கைத் தமிழ் மக்கள் மீது அக்கறை கொண்ட தமிழக முதல்வர் செல்வி ஜெயலலிதாவுக்கு கூட்டமைப்பு சார்பிலும் இலங்கையில் வாழும் தமிழ் மக்கள் சார்பிலும் நன்றி தெரிவிப்பதாகக் கூறினார்.
*************
சந்திப்பிற்கு விளக்கம்
சிறிலங்கா அரசுக்கு ரஸ்யா ஆதரவளிக்கக் கூடாது என்று தமிழ்த் தேசியக் கூட்டமைப்பு தம்மிடம் கோரவில்லை என்று கொழும்பிலுள்ள ரஸ்யத் தூதுவர் விளாடிமிர் மிக்கலோவ் தெரிவித்துள்ளார்.
கொழும்பு ஆங்கில நாளிதழ் ஒன்று நேற்று வெளியிட்ட செய்தி தொடர்பாக அவர் விளக்கமளித்துள்ளார்.
தமிழ்த் தேசியக் கூட்டமைப்பின் நாடாளுமன்ற உறுப்பினர்கள் சிலர் கடந்த திங்களன்று தன்னை சந்தித்துப் பேசியதாகவும், ஆனால் அவர்கள் சிறிலங்கா அரசுக்கான ஆதரவை நிறுத்திக் கொள்ளுமாறு கோரவில்லை என்றும் அவர் தெரிவித்துள்ளார்.
சிறிலங்காவுக்கான ஆதரவை ரஸ்யா நிறுத்திக் கொள்ள வேண்டும் என்று தமிழ்த் தேசியக் கூட்டமைப்பு கோரியதாக செய்தி வெளியிட்டதன் மூலம் மக்களை தவறாக வழிநடத்த முனைவதாகவும் அவர் கொழும்பு ஆங்கில நாளேட்டின் மீது குற்றம் சுமத்தியுள்ளார்.
தேசிய நல்லிணக்கம் தொடர்பாக தமிழ்த் தேசியக் கூட்டமைப்பின் நிலைப்பாடுகள் பற்றி அவர்கள் விளக்கமளித்தாகவும் ரஸ்யத் தூதுவர் தெரிவித்துள்ளார்.
அர்த்தமுள்ள பேச்சுக்கள் மூலம் பிரச்சினைக்குத் தீர்வு காண முடியும் என்று அவர்கள் நம்பிக்கை வெளியிட்டதாகவும் அவர் குறிப்பிட்டுள்ளார்.
இந்தச் சந்திப்பின் போது, ரஸ்யாவின் நிலைப்பாட்டை எடுத்து விளக்கியதாகவும், சிறிலங்கா அரசுக்கு கூட்டமைப்புக்கும் இடையிலான பேச்சுக்களின் மூலம் எதிர்காலத்தில் நல்லிணக்க சூழல் உருவாகும் என்று நம்பிக்கை வெளியிட்டதாகவும் ரஸ்யத் தூதுவர் மேலும் தெரிவித்துள்ளார்.
************
தஞ்சம் கோரிய தமிழர்களை நாடு கடத்த முயலும் பிரித்தானியா?
அடைக்கலக் கோரிக்கை நிராகரிக்கப்பட்ட சிறிலங்காவைச் சேர்ந்த 300 பேரை பிரித்தானியா திருப்பி அனுப்பவுள்ளதாக கொழும்பு ஊடகம் ஒன்று தகவல் வெளியிட்டுள்ளது.
எதிர்வரும் ஜுன் 16ம் நாள் வாடகைக்கு அமர்த்தப்பட்ட சிறப்பு விமானம் ஒன்றில் இவர்கள் கொழும்புக்கு அனுப்பி வைக்கப்படவுள்ளதாக பிரித்தானிய எல்லை முகவரகத்தை மேற்கோள் காட்டி அந்த ஊடகம் தகவல் வெளியிட்டுள்ளது.
அடைக்கலம் நிராகரிக்கப்பட்ட பலருக்கு பிரித்தானிய எல்லை முகவரகம் வெளியேற்ற அறிவுறுத்தலை வழங்கியுள்ளதாக மனித உரிமைகள் சட்டவாளர் நிசாம் பரஞ்சோதி தெரிவித்துள்ளார்.
பிரித்தானியவில் இருந்து வெளியேற்றப்படவுள்ள 300 பேரில் பெரும்பாலானவர்கள் தமிழர்கள் என்பது குறிப்பிடத்தக்கது.
எதிர்வரும் 16ம் நாள் பிற்பகல் 5 மணிக்கு இந்த சிறப்பு விமானம் லண்டனில் இருந்து புறப்படவுள்ளதாகவும் கொழும்பு ஊடகம் மேலும் தகவல் வெளியிட்டுள்ளது.
************
இலங்கையின் கொலைக்களம்!
யூன் 14ம் திகதி லண்டன் சனல்4 தொலைக்காட்சியில் ஒளிபரப்பவுள்ள இலங்கையில் கொலைக்களம் என்ற தொகுப்பு காண்பிக்கப்படல் வேண்டுமா? காண்பிக்கப்படக்கூடாதா? என்ற வாதம் பிபிசி வானொலியில் நேற்று நடைபெற்றுள்ளது.
இவ்வாதத்தில் இக் காணொளித் தொகுப்பினை தயாரித்து வெளியிடும் ஊடகவியலாளர்கள் பங்கெடுத்தனர்.
இப்படியான கொலைகள் இனிமேல் உலகின் எந்த ஊடகங்களிலும் வெளிவராமல் இருக்க வேண்டுமாயின் இந்த தொகுப்பு காண்பிக்கப்படல் வேண்டும் என இவர்கள் வலியுறுத்தினார்கள்.
மேலும் இவை காண்பிக்கப்படாது போனால் இலங்கை அரசும், இதுபோன்ற சம்பவங்களைச் செய்பவர்களும், இப்படியான சம்பவங்கள் நடைபெறவில்லை என்றே கருத்து வெளியிடுவார்கள் என்றும் கருத்துத் தெரிவித்தார்கள்.
இந்த தொகுப்பை பலர் பார்ப்பதை தவிர்த்துக் கொள்ளவார்கள் என்று கருதியபோதும் இதிலுள்ள உள்ளடக்கம் மானிடத்தின் உயிர் நாடியை உலுப்பும் செயலாக உள்ளதாகவும் இப்படியான சம்பவங்களை வெளிப்படுத்ததாமல் இருப்பது ஆபத்தானது என்றும் கருத்து வெளியிட்டனர்
*************

Wednesday, 8 June 2011

செய்திகள் 08/06


கட்டுநாயக்க உள்ளக பாதுகாப்பில் இருந்து இராணுவம் விலகல்
கட்டுநாயக்க சுதந்திர வர்த்தக வலயத்தின் உள்ளக பாதுகாப்பிற்கான சேவையில் ஈடுபட்டிருந்த ராணுவத்தினர் அங்கிருந்து அகற்றப்பட்டனர்.
நேற்றிரவு அளவில் இவர்கள் அகற்றப்பட்டதாக ராணுவ ஊடக பேச்சாளர் மேஜர் ஜெனரல் உபய மெதவல தெரிவித்துள்ளார்.
சுதந்திர வர்த்தக வலயம் மற்றும் அதனைச் சூழவுள்ள பிரதேசத்தின் நிலைமை தற்போது சுமூகநிலைக்கு திரும்பியுள்ளதாக அவர் குறிப்பிட்டார்.
கடந்த 26 ம் திகதி ஏற்பட்ட குழப்பநிலை காரணமாக காவல்நிலையம் மற்றும் பிரதேசத்தின் பாதுகாப்பின் பொருட்டு படையினர் ஈடுபடுத்தப்பட்டனர்.
இந்தநிலையில், நேற்றிரவு முதல் ராணுவத்தினர் அகற்றப்பட்டு கட்டுநாயக்க காவல்நிலையத்தின் பொது பாதுகாப்பு நடவடிக்கைகள் நேற்றிரவு முதல் ஆரம்பிக்கப்பட்டதாக காவல்துறை ஊடகப்பேச்சாளர் தெரிவித்தார்.
**********
ரஷ்ய தூதுவருடன் தமிழ் தேசிய கூட்டமைப்பு சந்திப்பு
கொழும்பிலுள்ள ரஸ்யத் தூதுவர் விளாடிமிர் மிக்கெலோவை தமிழ்த் தேசியக் கூட்டமைப்பு நாடாளுமன்ற உறுப்பினர்கள் குழுவொன்று சந்தித்துப் பேசியுள்ளது.
நேற்று முன்தினம் கொழும்பிலுள்ள ரஸ்யத் தூதரகத்தில் இந்தச் சந்திப்பு இடம்பெற்றுள்ளது.
இதன்போது மகிந்த ராஜபக்ச அரசுக்கான ஆதரவை ரஸ்யா விலக்கிக் கொள்ள வேண்டும் என்று தமிழ்த் தேசியக் கூட்டமைப்பு நாடாளுமன்ற உறுப்பினர்கள் கேட்டுக் கொண்டதாக கொழும்பு ஆங்கில ஊடகம் ஒன்று தகவல் வெளியிட்டுள்ளது.
புலம்பெயர் தமிழர்கள் சிறிலங்கா அரசுக்கு எதிரான போர்க்குற்ற விசாரணை நடத்தப்பட வேண்டும் என்று பரப்புரைகளை மேற்கோண்டு வரும் நிலையில், சிறிலங்கா அரசுக்கு ஆதரவளித்து வரும் ரஸ்யாவிடம் தமிழ்த் தேசியக் கூட்டமைப்பு இந்த வேண்டுகோளை விடுத்துள்ளதாகவும் கொழும்பு ஊடகம் செய்தி வெளியிட்டுள்ளது.
சிறிலங்கா அரசுக்கு ஆதரவு வழங்கி வரும் ரஸ்யா, சீனா போன்ற நாடுகளின் தூதுவர்களைச் சந்தித்து உண்மை நிலையை விளக்கப் போவதாக தமிழ்த் தேசியக் கூட்டமைப்பு ஏற்கனவே அறிவித்திருந்தது குறிப்பிடத்தக்கது.
***********



யாழ் பல்கலைக்கழக செயற்பாடுகள் முடக்கம்
யாழ். பல்கலைக்கழகத்தில் துறைத்தலைவர்கள் தொழிற்சங்க நடவடிக்கை காரணமாக பதவி விலகியதன் எதிரொலியாக நேற்று முதல் பல்கலைக்கழக செயற்பாடுகள் யாவும் செயலிழந்தன.
யாழ். பல்கலைக்கழகத்தின் துறைத்தலைவர்கள் மே மாதம் 9 ஆம் திகதி தமது பதவிகளில் இருந்து விலகிய போதும் மாணவர்களுக்கான விரிவுரைகள் இடம்பெற்று வந்தன.
எனினும் பரீட்சைகள், செயன்முறை ஆய்வுப் பணிகள் இடம்பெறவில்லை.
இதன் காரணமாக வெளி மாவட்ட மாணவர்கள் விரிவுரைகளைக் கைவிட்டு நேற்று தமது வீடுகளுக்குச் சென்றனர்.
இதனால் விரிவுரைகள் நேற்று நடைபெறாததுடன், கல்விச் செயற்பாடுகள் யாவும் நிறுத்தப்பட்டன.
பல்கலைக்கழக விரிவுரையாளர்களின் பிரச்சினைக்குத் தீர்வு ஏற்பட்டு, சுமுக நிலை திரும்பும் போதே பல்கலைக்கழகம் மீள ஆரம்பிக்கும் எனத் தெரிவிக்கப்பட்டது.
************
பேச்சுக்களை முறிக்க முயற்சியா?
சிறிலங்கா அரசுக்கும் தமிழ்த் தேசிய கூட்டமைப்புக்கும் இடையிலான பேச்சுக்களின் முடிவு எவ்வாறானதாக இருக்கும் என்பதை இப்போதே கணித்து விட முடியாது என்று சிறிலங்கா வெளிவிவகார அமைச்சர் ஜி.எல். பீரிஸ் தெரிவித்துள்ளார்.
நேற்று சிறிலங்கா நாடாளுமன்றத்தில் ஜேவிபி உறுப்பினர் அனுரகுமார திசநாயக்கவின் கேள்வி ஒன்றுக்குப் பதிலளித்த போதே அவர் இவ்வாறு சந்தேகம் வெளியிட்டுள்ளார்.
சிறிலங்கா அரசாங்கம் தமிழ்த் தேசியக் கூட்டமைப்பு மற்றும் ஈபிடிபியுடன் பேச்சுக்களைத் தொடர்ந்து நடத்தி வருகிறது.
இந்தப் பேச்சுக்களின் மூலம் உருப்படியான தீர்வுகளை எட்டவே முற்படுவதாகவும், அரசியலமைப்பில் திருத்தங்களைக் கொண்டு வர வேண்டுமானால் அது தொடர்பாகப் பேசவேண்டும். பேசாமல் எதுவும் செய்ய முடியாது எனவும் தெரிவித்தார்.
பிரச்சினைகளை கலந்துரையாடல்களின் மூலம் தீர்க்கவே முற்படுவதாகவும், ஆனால் இறுதி முடிவுகள் எவ்வாறானதாக இருக்கும் என்பதை எவராலும் இப்போதே கணித்துக் கூறிவிட முடியாது என்றும் அமைச்சர் ஜி.எல்.பீரிஸ் குறிப்பிட்டார்.
இவரது நேற்றைய நாடாளுமன்ற உரையில் காணப்படும் நம்பிக்கையீனம் தமிழ்த் தேசியக் கூட்டமைப்புடனான பேச்சுக்களை முறித்துக் கொள்வதற்கு சிறிலங்கா அரசாங்கம் முனைகிறதா என்ற சந்தேகத்தை கிளப்பியுள்ளது.
**********



இந்திய உயர் மட்டக்குழு என்ன பேசும்?
உயர்மட்ட இந்திய அதிகாரிகள் குழு எதிர்வரும் வெள்ளிக்கிழமை சிறிலங்காவுக்குப் பயணம் மேற்கொள்ளவுள்ளதாக கொழும்பு ஆங்கில நாளேடு ஒன்று செய்தி வெளியிட்டுள்ளது.
இந்தியாவின் தேசிய பாதுகாப்பு ஆலோசகர் சிவ்சங்கர் மேனன், வெளிவிவகாரச் செயலர் நிருபமா ராவ், பாதுகாப்புச் செயலர் பிரதீப் குமார் ஆகியோரைக் கொண்ட குழுவே வெள்ளியன்று கொழும்பு செல்லவுள்ளது.
இரண்டு நாட்கள் கொழும்பில் தங்கியிருக்கும் இந்தக் குழுவினர் இருதரப்பு விவகாரங்கள் குறித்து பேச்சுக்களை நடத்தவுள்ளதாகவும் கூறப்பட்டுள்ளது.
கடந்த மாதம் வெளியிடப்பட்ட இந்திய - சிறிலங்கா கூட்டறிக்கையின் அடிப்படையில் அரசியல் தீர்வு மற்றும் இந்தியாவின் திட்டங்களை துரிதமாக நடைமுறைப்படுத்துவது குறித்து ஆராய்வதே இந்தக் குழுவினது வருகையின் முக்கிய நோக்கம் என்றும் கூறப்படுகிறது.
இவர்கள் சிறிலங்கா அதிபர் மகிந்த ராஜபக்ச உள்ளிட்ட சிறிலங்கா அரசின் முக்கிய பிரமுகர்கள் பலரையும் சந்தித்துப் பேசத் திட்டமிட்டுள்ளனர்.
************



பான் கீ முனின் பதவிக்கான மௌனம்?
ஐ.நா பொதுச் செயலாளராக இரண்டாவது தடவையாக பான் கீ மூன் தெரிவு செய்யப்படுவதற்கு சிறிலங்கா அரசாங்கம் ஆதரவளிக்க முன்வந்துள்ள நிலையில், சிறிலங்காவின் போர்க்குற்ற விவகாரம் தொடர்பாக பான் கீ மூன் மௌனம் சாதிப்பதாக இன்னர் சிற்றி பிரஸ் சந்தேகம் வெளியிட்டுள்ளது.
இது விவகாரம் தொடர்பாக இன்னர் சிற்றி பிரஸ் வெளியிட்டுள்ள செய்திக்குறிப்பில் கடந்த 40 நாட்களாக சிறிலங்கா விவகாரத்தில் ஐ.நா பொதுச் செயலாளர் பான் கீ மூன் எவ்வித மீளாய்வு நடவடிக்கைகளையும் முன்னெடுக்கவில்லை எனச் சுட்டிக்காட்டியுள்ளது.
சிறிலங்காவின் மனித உரிமைகள் மற்றும் இறுதிக்கட்ட போர் விவகாரங்களுக்கான பொறுப்புக் கூறும் நடவடிக்கைகள் தொடர்பான நிபுணர் குழு அறிக்கையின் பரிந்துரைகளுக்கு அமைய ஐ.நாவின் நடவடிக்கைகள் ஆராயப்படுமென கடந்த ஏப்ரல் 25ஆம் நாள் பான் கீ மூன் தெரிவித்திருந்தார்.
நிபுணர் குழு அறிக்கைக்கு அமைய போர் குற்றங்களை விசாரிக்க சுயாதீனமான சர்வதேசப் பொறிமுறை ஒன்று அவசியம் எனக் கோரிய மனித உரிமை ஆணையர் நவநீதம்பிள்ளையின் அழைப்பினை பான் கீ மூன் ஆதரிக்கின்றாரா எனவும் அவ்வாறாயின் அவரின் பரிந்துரைகளுக்கு அமைய எவ்வாறான நடவடிக்கைகளை பான் கீ மூன் எடுக்கப்போகின்றார் எனவும் இன்னர் சிற்றி பிரஸ் கேள்வி எழுப்பியுள்ளது.
குறிப்பாக சரணடைந்தபோது கொல்லப்பட்ட விடுதலைப் புலிகளுக்கு சரணடைவு தொடர்பாக உறுதிமொழி வழங்கப்பட்டதில் பான் கீ மூனின் செயல் ஆளணியைச் சேர்ந்த விஜய் நம்பியாருக்கு உள்ள தொடர்பு குறித்தும் இன்னர் சிற்றி பிரஸ் கேள்வி எழுப்பியுள்ளது.
இதற்குப் பதிலளிக்கையில், இவ்விவகாரம் ஐ.நா உறுப்பு நாடுகளில் தஙகியுள்ளது என்று குறிப்பிட்ட பான் கீ மூன், கேள்வியின் இரண்டாவது பகுதிக்குப் பதிலளிக்கவில்லை.
சிறிலங்காவின் பதிலுக்காகத் தான் தொடர்ச்சியாகக் காத்திருப்பதாகவும் அவர் கூறியிருந்தார்.
ஐக்கிய நாடுகள் அவையின் ஆசிய நாடுகளுக்கான குழுவுடனான சந்திப்பினைத் தான் மேற்கொண்டிருந்ததாக ஒரு ஊடவியலாளர் சந்திப்பில் அவர் குறிப்பிட்டபோதே சிறிலங்கா விவகாரம் தொடர்பான இந்தப் பதிலை பான் கீ மூன் வெளிப்படுத்தியிருந்தார்.
ஐ.நா பொதுச் செயலாளராக தான் இரண்டாவது தடவையும் போட்டியிடுவதற்கு ஐ.நாவின் ஆசிய நாடுகளுக்கான குழு ஆதரவு தெரிவித்திருந்ததாக அவர் கூறியமை இங்கு சுட்டிக்காட்டத்தக்கது.
************