Friday, 11 November 2011

செய்திகள் 11/11


மீண்டும் பேச்சு
இனப்பிரச்சினைக்கான தீர்வு தொடர்பில் இலங்கை அரசாங்கத்துடன் அடுத்தச் சுற்றுப் பேச்சுவார்த்தையை நடத்தத் தீர்மானித்துள்ளதாக தமிழ்த் தேசியக் கூட்டமைப்பு தெரிவித்துள்ளது.
இதன்படி அரசு - கூட்டமைப்புக்கு இடையிலான அடுத்துச் சுற்றுப் பேச்சுவார்த்தை எதிர்வரும் 16ம் திகதி கொழும்பில் இடம்பெறவுள்ளதாக தமிழ்த் தேசியக் கூட்டமைப்பின் பாராளுமன்ற உறுப்பினர் எம்.ஏ.சுமந்திரன் தெரிவித்தார்.
தமிழ்த் தேசியக் கூட்டமைப்பால் அரச தரப்பிடம் கடந்த சந்திப்புக்களின் போது சமர்பிக்கப்பட்டுள்ள கோரிக்கைகளுக்கு இணக்கம் காண்பது தொடர்பில் இதன்போது கலந்துரையாடப்படவுள்ளதாக சுமந்திரன் தெரிவித்தார்.
அடுத்தச் சுற்றுப் பேச்சுவார்த்தையில் தமிழ்த் தேசியக் கூட்டமைப்பை பிரதிநிதித்துவப்படுத்தி அதன் தலைவர் இரா.சம்பந்தன், பொதுச் செயலாளர் மாவை சேனாதிராஜா, சுரேஸ் பிரேமச்சந்திரன் ஆகியோர் கலந்து கொள்ளவுள்ளதாக அவர் குறிப்பிட்டார்.
தமிழ்த் தேசியக் கூட்டமைப்பின் முக்கிய பிரமுகர்கள் அமெரிக்கா, கனடா, லண்டன் உள்ளிட்ட நாடுகளுக்குச் சென்று இலங்கையின் இனப்பிரச்சினை, தமிழர்கள் எதிர்நோக்கும் சிக்கல்கள் குறித்து கலந்துரையாடிய நிலையில் அரச தரப்புடனான அடுத்தச் சுற்றுப் பேச்சுவார்த்தை முக்கியம் வாய்ந்ததாக அமையுமென கருதப்படுகிறது.
***************

தொடரும் அறிக்கைகள்
இலங்கையின் சமாதான முன்னநகர்வுகள் குறித்து நோர்வேயில் இன்று விசேட அறிக்கை ஒன்று வெளியிடப்படவுள்ள நிலையில் இந்நிகழ்வில் பங்குகொள்ளவென இலங்கை அரசாங்கத்தை பிரதிநிதித்துவப்படுத்தி கொழும்பு மாநகர சபை எதிர்கட்சித் தலைவர் மிலிந்த மொறகொட நோர்வே சென்றுள்ளார்.
அரசுத் தலைவர் மஹிந்த ராஜபக்ஷ்வே மிலிந்த மொறகொடவை நோர்வே அனுப்ப பணித்துள்ளதாக தெரியவருகிறது.
முன்னாள் அமெரிக்க இராஜாங்க செயலாளர் ரிச்சட் ஆர்மிடெஜ் தலைமையில் இவ்வறிக்கை வெளியிடப்படவுள்ளது.
இவ்வறிக்கையானது கிறிஸ்டியன் மிச்சேல்சன் கல்வியகத்தால் தயாரிக்கப்பட்டுள்ளதாக தெரிவிக்கப்படுகிறது.
இலங்கையின் இறுதிக் கட்ட யுத்தம், 2009 சமாதான உடன்படிக்கை காலம், தமிழ் புனர்வாழ்வு அமையம், விடுதலைப் புலிகளின் சமாதான செயலகம், அரச சார்பற்ற நிறுவனங்கள் என்பவை குறித்து அறிக்கையில் தகவல் வெளியிடப்பட்டுள்ளதாக தெரியவருகிறது.
***************

சந்திக்கும் உற்ற நண்பர்கள்
அரசுத் தலைவர் மஹிந்த ராஜபக்ஷவிற்கும் இந்திய பிரதமர் மன்மோகன் சிங்கிற்கும் இடையில் நேற்று மாலைத்தீவில் விசேட சந்திப்பு இடம்பெற்றுள்ளது.
இச்சந்திப்பின்போது வடக்கு கிழக்கில் மேற்கொள்ளப்பட்டு வரும் மீள்குடியேற்றம், இந்திய அரசாங்கத்தினால் வடக்கில் மேற்கொள்ளப்பட்டு வரும் 50 ஆயிரம் வீட்டு திட்டம் மற்றும் இனப்பிரச்சினை தொடர்பான பேச்சுவார்த்தை தொடர்பில் கலந்துரையாடப்பட்டுள்ளதாக அரசுத் தலைவர் ஊடகப் பிரிவு தகவல்கள் தெரிவிக்கின்றன.
மேலும் மீன்பிடியில் ஈடுபடும் மீனவர்கள் எதிர்நோக்கும் பிரச்சினைகள் குறித்தும் கலந்துரையாடப்பட்டுள்ளது.
இதேவேளை, மீள்குடியேற்றம் மற்றும் புனர்வாழ்வுக்கென இலங்கைக்கு 110 மில்லியன் அமெரிக்க டொலர்களை நிதியுதவியாக வழங்க இந்திய இச்சந்திப்பின்போது இணக்கம் வெளியிட்டுள்ளது.
***************

அறிவில்லாத அதிகாரி?
ஜெனிவாவில் நடைபெறும் ஐக்கிய நாடுகளின் சித்திரவதைகளுக்கு எதிரான மாநாட்டில் இலங்கையின் சார்பில் பங்கேற்கும் முன்னாள் சட்டமா அதிபர் மொஹான் பீரிஸ் அடிப்படை குற்றவியல் சட்டஅறிவுகளை கொண்டிருக்கவில்லை என ஆசிய மனித உரிமைகள் ஆணைக்குழு தெரிவித்துள்ளது.
இலங்கையில் இடம்பெற்ற மனித உரிமை மீறல் மற்றும் சித்திரவதைகள் குறித்த குற்றச்சாட்டுக்கள் தொடர்பில் கடந்த 9 ஆம் திகதி அவருக்கு பதிலளிக்க வாய்ப்பு வழங்கப்பட்டது.
இன்போது மொஹான் பீரிஸினால் சரியான புள்ளிவிபரங்களையும் சம்பவங்களையும் கூறமுடியவில்லை.
1978 ஆம் ஆண்டின் அரசியலமைப்பின் கீழ் இலங்கையின் உரிய சட்டமுறைகள் இருப்பதாக குறிப்பிட்டார்.
எனினும் அதனை கண்டித்துள்ள ஆசிய மனித உரிமைகள் ஆணைக்குழு நடைமுறை நிறைவேற்று அதிகாரம் கொண்டு அரசுத் தலைவர் முறையின் கீழ் அந்த சட்டங்கள் வலுவிழந்துள்ளதாக குறிப்பிட்டுள்ளது.
இலங்கை பாதுகாப்பு அமைச்சின் இணைத்தளத்தில் சில சட்டத்தரணிகளை துரோகிகள் என்று குறிப்பிடப்பட்டமை மற்றும் ஊடகவியலாளர்கள் மற்றும் மனித உரிமை காப்பாளர்கள் தாக்கப்பட்டமை குறித்து மொஹான் பீரிஸ் பதில் எதனையும் வழங்க மறுத்துவிட்டார்.
பாதுகாப்பு அமைச்சின் இணையத்தளத்தில் சில சட்டத்தரணிகள் துரோகிகள் என்ற குறிப்பிடப்பட்டமை எவ்வித பாதிப்புக்களையும் ஏற்படுத்தவில்லை என்றும் அவர் தெரிவித்துள்ளார்.
கடந்த அரசுத் தலைவர் தேர்தலின் போது ஊடகவியலாளார் பிரகீத் எக்னெலிகொட காணாமல் போனமை குறித்து கேள்வி எழுப்பப்பட்டபோது அவர் இலங்கைக்கு எதிரான பிரசாரத்துக்காக வெளிநாடு ஒன்றில் அகதியாக சென்றிருக்கலாம் என்று மொஹான் பீரிஸ் பதிலளித்துள்ளார்.
அவரால் வலுவான ஆதாரங்களை சமர்ப்பிக்க முடியவில்லை.
சித்திரவதைகளுக்கு எதிரான சர்வதேச பிரகடனம் கட்டாயம் காணாமல் போனவர்கள் தொடர்பிலான பிரகடனம் சர்வதேச யுத்த நீதிமன்றம் தொடர்பில் கேட்கப்பட்ட கேள்விகளுக்கு பீரிஸ் பதிலளிக்கவில்லை.
வெலியமுன என்பவரது வீட்டின் மீது கிரனைட் தாக்குதல் நடத்தப்பட்டமை குறித்து கேட்டபோது மொஹான் பீரிஸ் அளித்த பதில்களில் அவருக்கு அடிப்படை சட்டஅறிவு இல்லை என்பதை உணர்த்தியதாக ஆசிய மனித உரிமைகள் ஆணைக்குழு தெரிவித்துள்ளது.
இலங்கை சித்திரவதைகள் தொடர்ல் பூஜ்ஜிய நிலை ஏற்படவேண்டும் என்ற அடிப்படையில் செயற்படுவதாக அவர் குறிப்பிட்டபோது அதனை சித்திரவதைகள் தொடர்ன ஐக்கிய நாட்டு அதிகாரிகள் ஏற்றுக்கொள்ளவில்லை.
அவரின் பதில்கள் உண்மையை மறைப்பதாக அமைந்துள்ளதாகவும் ஆசிய மனித உரிமைகள் ஆணைக்குழு குறிப்பிட்டுள்ளது.
***************

அம்பலமாகும் அடாவடி
நட்டமடையும் சொத்துக்களை சுவீகரிக்கும் சட்ட மூலம் நிறைவேற்றப்பட்டதன் மூலம் அரசாங்கத்தின் எதேச்சாதிகாரப் போக்கு அம்பலமாகியுள்ளது என ஐக்கிய தேசியக் கட்சி குற்றம் சுமத்தியுள்ளது.
இச்சட்டமூலத்திற்கு அரசியல் கட்சிகள், பௌத்த பிக்குகள் உள்ளிட்ட பல்வேறு தரப்பினர் எதிர்ப்பை வெளியிட்ட போதிலும் அரசாங்கம் பிடிவாதமாக இந்த சட்டமூலத்தை நாடாளுமன்றில் நிறைவேற்றிய இந்த நடவடிக்கை வன்மையாகக் கண்டிக்கப்பட வேண்டியது என ஐக்கிய தேசியக் கட்சியின் பொதுச் செயலாளர் திஸ்ஸ அத்தநாயக்க தெரிவித்துள்ளார்.
அரசாங்கம் ஜனநாயகத்திற்கு மதிப்பளித்திருந்தால் சட்ட மூலத்தில் திருத்தங்களை மேற்கொண்டு நாடாளுமன்றில் சமர்ப்பித்திருக்க முடியும்.
திடீரென இந்த சட்ட மூலம் நிறைவேற்றப்பட்டதன் மூலம் அரசாங்கத்தின் சர்வாதிகாரப் போக்கு புலனாகியுள்ளது.
இவ்வாறான நடவடிக்கைகள் சர்வதேச முதலீட்டாளர்களை அச்சமடையச் செய்யும் எனவும் அவர் சுட்டிக்காட்டியுள்ளார்.
***************

கெஞ்சும் ஸ்ரீலங்கா
சர்வதேச சமூகம், அடிப்படையற்ற குற்றச்சாட்டுக்களை சுமத்தக் கூடாது என கனடாவிற்கான இலங்கை உயர்ஸ்தானிகர் சித்ராங்கனி வாகீஸ்வரா தெரிவித்துள்ளார்.
இலங்கையில் சமாதானம் நிலைநாட்டப்படுவதற்கு அனைத்து தரப்பினரும் ஒத்துழைப்பு வழங்க வேண்டும்.
தாருஸ்மன் அறிக்கை அடிப்படையற்றது, அதனை உத்தியோகபூர்வமான ஆவணமாக பயன்படுத்த முடியாது எனத் தெரிவித்துள்ளார்.
கற்றறிந்த பாடங்கள் மற்றும் நல்லிணக்க ஆணைக்குழுவின் அறிக்கை சமர்ப்பிக்கப்படுவதற்கு முன்னதாக இவ்வாறான குற்றச்சாட்டுக்கள் முன்வைப்பதில் அர்த்தமில்லை.
இவ்வாறான குற்றச்சாட்டுக்களின் மூலம் சுயாதீனமான விசாரணைகளுக்கு இடையூறு ஏற்படக்கூடுமென அவர் தெரிவித்துள்ளார்.
கடந்த 30 ஆண்டுகளாக தமிழீழ விடுதலைப் புலிகளினால் மேற்கொள்ளப்பட்ட குற்றச் செயல்கள் தொடர்பில் ஏன் கவனம் செலுத்தப்படவில்லை என அவர் கேள்வி எழுப்பியுள்ளார்.
சர்வதேச அரங்கத்தில் ஸ்ரீலங்காவின் முகத்திரை கிழிந்து வரும் நிலையில் அதனை எதிர்கொள்ள முடியாத ஸ்ரீலங்காவின் பிரதிநிதிகள் இவ்வாறு கூக்குலிடுகின்றனர் என அவதானிகள் சுட்டிக்காட்டியுள்ளனர்.
எப்படித்தான் இவர்கள் முயன்றாலும் உண்மைகள் வெளிவருவதை அவர்களால் தடுக்க முடியாது என்ற உண்மையை அவர்கள் உணர்ந்து கொள்ள வேண்டும் எனவும் தெரிவித்துள்ளனர்.
***************

கவலைப்படும் ஜே.வி.பி
தமது செயற்பாட்டினால் விடுதலைப்புலிகளைத் தோற்கடித்து சர்வதிகார ஆட்சியை ஏற்படுத்த வழிவகுக்கப்பட்டது என ஜே.வி.பி யின் முன்னாள் பாராளுமன்ற உறுப்பினர் லால் காந்த தெரிவித்துள்ளார்.
2003 ஆம் ஆண்டு ஸ்ரீலங்கா சுதந்திரக்கட்சியை போன்ற முதலாளித்துவ கட்சிகளுடன் ஜே.வி.பி கூட்டமைத்து செயற்பட்டமை காரணமாக நாட்டுக்கு பல வெற்றிகள் கிடைத்தன.
அதேபோல கூட்டமைப்பை ஏற்படுத்தியமை காரணமாக பல தீமைகளும் ஏற்பட்டுள்ளன என்றும் அவர் குறிப்பிட்டுள்ளார்.
தமது கூட்டமைப்பினால் தமிழீழம் என்ற எண்ணத்தை கொண்ட தமிழீழ விடுதலைப்புலிகளை தோற்கடிக்க முடிந்தது எனவும், ஆனால் நாட்டில் சர்வதிகார முதலாளித்துவ அரசாங்கம் உருவாவதை ஜே.வி.பியினால் தடுக்கமுடியாமல் போய்விட்டது என்றும் அவர் தெரிவித்துள்ளார்.
இந்தநிலையில் தற்போது தமது கட்சியின் நோக்கம் சர்வதிகார ஆட்சியை முடிவுக்கொண்டு வருவதாகும் என்று லால் காந்த குறிப்பிட்டுள்ளார்.
***************

தொடரும் கொலைகள்
யாழ்ப்பாணம் வரணி கரப்பன்குறிச்சி அரசினர் தமிழ்க்கலவன் பாடசாலையைச் சேர்ந்த அதிபர் வெட்டிக்கொலை செய்யப்பட்ட நிலையில் அவரது சடலம்  இன்று வெள்ளிக்கிழமை காலை மீட்கப்பட்டுள்ளதாக யாழ். காவல்துறையினர் தெரிவித்தனர்.
40 வயதான சிவசுப்பிரமணியம் தயாபரன் என்பவரே இவ்வாறு சடலமாக மீட்கப்பட்டவர் ஆவார்.
யாழ். கந்தர்மடம் ரயில்வே வீதியிலுள்ள அவரது வீட்டின் இரண்டாம் மாடியிலுள்ள அறையொன்றிலிருந்தே அவரது சடலம் மீட்கப்பட்டதாகவும் அவரது வயிறு மற்றும் கழுத்துப் பகுதிகளில் கத்தியால் குத்தப்பட்ட காயங்கள் காணப்படுவதாகவும் யாழ். காவல்துறையினர் குறிப்பிட்டனர்.
யாழ். கந்தர்மடம் ரயில்வே வீதியை சொந்த இடமாகவும் மீசாலையை வசிப்பிடமாகவும் கொண்ட இவர், தனது சொந்த வீட்டிற்கு அவ்வப்போது வந்துசெல்வது வழக்கமாகும்.
அவ்வாறே இவர் தனது சொந்த வீட்டிற்கு நேற்று வியாழக்கிழமை வந்த பின்னர் மீண்டும் மீசாலையிலுள்ள தனது வீட்டிற்கு திரும்பிச்செல்லவில்லையெனவும் இதனால் அவரைத் தேடி கந்தர்மடம் ரயில்வே வீதியிலுள்ள வீட்டிற்கு உறவினர்கள் வந்தபோது அவர் சடலமாக கிடப்பதைக் கண்டனர்.
பின்னர் இது தொடர்பில் அவரது உறவினர்கள் யாழ். காவல்துறையினருக்கு தெரியப்படுத்தவே காவல்துறையினர் சம்பவ இடத்திற்கு விரைந்து சடலத்தை மீட்டுள்ளனர்.
குறித்த வீட்டின் கீழ்த்தளம் இளைஞர்கள் சிலருக்கு வாடகைக்கு விடப்பட்ட நிலையில் அவ்வீட்டின் இரண்டாம் மாடியிலேயே குறித்த நபர் அவ்வப்போது தங்கிச்செல்வது வழமையாகுமெனத் தெரிவிக்கப்படுகிறது.
இக்கொலைச் சம்பவம் தொடர்பில் யாழ். காவல்துறையினர் விசாரணைகளை மேற்கொண்டு வருகின்றனர்
***************

Thursday, 10 November 2011

செய்திகள் 10/11


பதில் மனு
தனக்கு எதிரான போர்க்குற்ற வழக்கைத் தள்ளுபடி செய்யக் கோரி மேஜர் ஜெனரல் சவீந்திர சில்வா நியுயோர்க் தெற்கு மாவட்ட நீதிமன்றத்தில் தாக்கல் செய்திருந்த மனுவுக்கு சட்டவாளர்கள் பதில் மனு ஒன்றை நேற்றுமுன்தினம் தாக்கல் செய்துள்ளனர்.
அதேவேளை, பத்து அனைத்துலக மனிதஉரிமைகள் குழுக்கள் ஒன்றிணைந்து ஐ.நா பொதுச்செயலர் பான் கீ மூனுக்கு அனுப்பியுள்ள கடிதம் ஒன்றில், ஐ.நாவுக்கான சிறிலங்காவின் பிரதித் தூதுவர் பதவிக்காக மேஜர் ஜெனரல் சவீந்திர சில்வா சமர்ப்பித்த அறிமுக ஆவணத்தை நிராகரிக்குமாறு கோரியுள்ளன.
சித்திரவதைகள், நீதிக்குப்புறம்பான படுகொலைகள், பொதுமக்கள் மீதான கண்மூடித்தனமான பீரங்கித் தாக்குதல்கள் போன்ற போர்க்குற்றங்களில் ஈடுபட்டதாக இவர் மீது சமஸ்டி நீதிமன்றத்தில் குற்றச்சாட்டுகளை எதிர்கொண்டுள்ளதாக அந்தக் கடிதத்தில் கூறப்பட்டுள்ளது.
போர்க்குற்றவாளி ஒருவரை ஐ.நா தனது பதவித் தரத்தில் வைத்துள்ளது.
இது ஒரு உளவியல் மற்றும் சட்ட நடவடிக்கை என்று அமெரிக்க பல்கலைக்கழக வொசிங்டன் சட்டக் கல்லூரியின் மனிதஉரிமைகள் பிரிவின் பணிப்பாளர் அலி பேடன் தெரிவித்துள்ளார்.
மிகப்பெரிய அனைத்துலக கட்டமைப்பான ஐ.நா அமைதி மற்றும் நீதியைப் பாதுகாக்க வேண்டிய பொறுப்பிலுள்ளது.
மேஜர் ஜெனரல் சவீந்திர சில்வா மீதான போர்க்குற்றச்சாட்டுகள் குறித்து முழு அளவில் விசாரணை நடத்த அனுமதிக்க வேண்டியது ஐ.நாவின் கடமை.
தனது குற்றங்களில் இருந்து தப்பிக் கொள்வதற்கு அவர் இராஜதந்திர விலக்குரிமையைப் பயன்படுத்த அனுமதிக்கக் கூடாது என அதில் சுட்டிக்காட்டியுள்ளனர்.
போர்க்குற்றங்களிலும், மனிதகுலத்துக்கு எதிரான குற்றங்களிலும் ஈடுபட்ட மேஜர் ஜெனரல் சவீந்திர சில்வாவின் இராஜதந்திர விலக்குரிமையை ரத்துச் செய்து அவரது அறிமுக ஆவணத்தை நிராகரித்து, அவரை விசாரணை செய்வதற்கு ஒத்துழைக்க வேண்டும் என்று பத்து மனிதஉரிமை அமைப்புகள் ஐ.நா பொதுச்செயலரிடம் கோரியுள்ளன.
சிறிலங்கா இராணுவத்தில் போர்க்குற்றங்களைப் புரிந்த அதிகாரிகளை சிறிலங்கா அரசாங்கம் வெளிநாடுகளில் இராஜதந்திரப் பதவிகளில் அமர்த்தியுள்ளது.
உலகெங்கும் 22 முன்னாள் இராணுவ அதிகாரிகள் சிறிலங்கா அரசாங்கத்தினால் இராஜதந்திரப் பதவிகளில் அமர்த்தப்பட்டுள்ளனர்.
இது பாதிக்கப்பட்ட தமிழர்களுக்கு நீதியைப் பெற்றுக் கொடுக்கும் அனைத்துலக முயற்சிகளுக்கு இடையூறாக உள்ளது என்றும் இந்த அமைப்புகள் கூறியுள்ளன
**************

புதிய விதிகள்
இலங்கையில் விரைவில் ஊடகவியலாளர்களுக்கான மற்றும் ஊடக நிறுவனங்களுக்கான ஒழுங்கு விதிகள் அறிமுகப்படுத்தப்படவுள்ளன
இதனை ஒழுங்கு விதிகளை அரசாங்கம் தனியார் ஊடகங்களுடன் இணைந்து உருவாக்கவுள்ளதாக தெரிவிக்கப்பட்டுள்ளது
இதன்பின்னர் அது வர்த்தமானியில் பிரசுரிக்கப்படவுள்ளது
இதற்காக ஊடக அமைச்சினால் விரையில் குழு ஒன்று அமைக்கப்படவுள்ளதாக இலங்கையின் ஊடக அமைச்சின் செயலாளர் கனேகல தெரிவித்துள்ளார்
குறித்த ஊடக ஒழுங்கு விதிகளை உருவாக்குவதற்காக பொதுமக்கள் மத்தியில் இருந்து கருத்துக்களும் பெற்றுக்கொள்ளப்படும் என்று அவர் குறிப்பிட்டுள்ளார்
**************

அஞ்சும் அரசு
அரசாங்கம் தம்மீதான விமர்சனங்களை கண்டு பயப்படுகிறது.
தமது ஜனநாயக விரோத செயற்பாடுகள் ஊழல்கள் வெளிக்கொணரப்படும் போது ஜனநாயக ரீதியான சவால்களுக்கு முகங்கொடுக்கவேண்டியேற்படும் என்று அரசாங்கம் அஞ்சுவதாக ஜனநாயகத்துக்கான சட்டத்தரணிகள் தெரிவித்துள்ளனர்.
இதன் காரணமாகவே இலங்கையில் செய்தி இணையத்தளங்கள் முடக்கப்பட்;டுள்ளதாக ஜனநாயகத்துக்கான சட்டத்தரணிகள் சுட்டிக்காட்டியுள்ளனர்.
அண்மைக்காலம் வரையில் இலங்கையில் ஊடகங்களுக்கு ஊடகவியலாளர்களுக்கு அச்ச நிலைக்காணப்பட்டது
ஊடகவியலாளர்கள் கொல்லப்பட்டனர். அச்சுறுத்தப்பட்டனர் பல ஊடகவியலாளர்கள் பயம் காரணமாக நாட்டை விட்டு வெளியேறினர்
இந்தநிலையில் இன்று பிரபலமான இணையத்தளங்கள் முடக்கப்பட்டுள்ளன
தனியார் ஊடகங்களில் சுயதணிக்கை மேற்கொள்ளப்பட்டு வருகிறது
ஊடக ஒழுங்கு தொடர்பான நிறுவனங்கள் அரசியலாலும் தனிப்பட்டவர்களாலும் பொதியிடப்பட்டுள்ளதாக ஜனநாயகத்துக்கான சட்டத்தரணிகள் குறிப்பிட்டுள்ளனர்
சுதந்திரத்தை பெற்றுக்கொடுத்தவர்கள் கோழைகள் அல்லர். அவர்கள் அரசியல் மாற்றங்களுக்கு அஞ்சவில்லை.
பயத்தால்; பேச்சு சுதந்திரத்தை நிலைநாட்ட முடியாது என்று ஜனநாயகத்துக்கான சட்டத்தரணிகள் குறிப்பிட்;டுள்ளனர்
எனவே இணையத்தளங்கள் மீது விதிக்கப்பட்ட முடக்கத்தை அரசாங்கம் தளர்த்தவேண்டும் என்று சட்டத்தரணிகள் கோரியுள்ளனர்
ஜனநாயக சட்டத்தரணிகள் அமைப்பில்; சார்பில் லால் விஜேநாயக்க சந்திரா குமாரகே ரட்ணவேல் சுமந்திரன் ஜோதிக்குமார் ஜே வி வெலியமுன உட்பட்டோர் அங்கம் வகிக்கின்றனர்
**************

தவிக்கும் ஸ்ரீலங்கா
தமிழ்த் தேசிய கூட்டமைப்பினர் மேற்கொண்டுள்ள அமெரிக்கா உள்ளிட்ட வெளிநாட்டு விஜயமானது இலங்கை அரசாங்கத்துடனான பேச்சுவார்த்தைகளில் தாக்கத்தை ஏற்படுத்தாது.
அந்த விஜயமானது பேச்சுக்களுக்கு தடையாக அமையாது.
கூட்டமைப்பினர் நாடு திரும்பியதும் அவர்களுடன் பேச்சு நடத்த அரசாங்கம் தயாராக இருக்கின்றது என்று ஆளும் கட்சியின் பிரதம கொறடாவும் அமைச்சருமான தினேஷ் குணவர்த்தன தெரிவித்தார்.
தமிழ்த் தேசிய கூட்டமைப்பினர் எங்கு விஜயம் மேற்கொண்டு யாருடன் பேச்சு நடத்தினாலும் இறுதியில் தீர்வு விடயத்தில் தமது நாட்டு அரசாங்கத்துடனேயே பேச்சு நடத்தவேண்டும் என்ற யதார்த்தத்தைப் புரிந்துகொள்ளவேண்டும் என்றும் அமைச்சர் குறிப்பிட்டார்.
அதாவது வடக்கு கிழக்கு மாகாண மக்களும் இலங்கை மக்கள் என்ற அடிப்படையில் அவர்களுக்கு எவ்விதமான அநீதியும் ஏற்பட்டுவிடக்கூடாது என்பதில் அரசாங்கம் உறுதியாக இருக்கின்றது எனவும் அமைச்சர் கூறினார்.
கூட்டமைப்பினர் அமெரிக்காவுக்கு விஜயம் மேற்கொண்டமையானது அரசாங்கத்துடனான பேச்சுக்களில் எவ்விதமான தாக்கத்தையும் ஏற்படுத்தாது.
அவர்கள் எந்த நாட்டுக்கு விஜயம் மேற்கொண்டு வந்தாலும் இறுதியில் பிரச்சினையைத் தீர்ப்பதற்கு இலங்கைக்கே வரவேண்டும்.
இலங்கை அரசாங்கத்துடனேயே பேச்சு நடத்தவேண்டும் என்பதனைப் புரிந்துகொள்ளவேண்டும் என்றார்.
**************

பதவி வழங்கும் ஐதேக
கொழும்பு மாநகரசபையில் நான்கு குழுக்களில் தலைவர்களாகவும், ஒன்பது குழுக்களில் அங்கத்தவர்களாகவும் ஜனநாயக மக்கள் முன்னணியின் உறுப்பினர்கள் தெரிவு செய்யப்பட்டுள்ளனர்.
கொழும்பு மாநகர சபையில் ஐ.தே.க நிலையான நிர்வாகத்தைக் கொண்டு செல்வதற்காக ஜனநாயக மக்கள் முன்னணியின் ஆதரவை ஐ.தே.க நாடியிருந்தது.
அவ்வாறு ஆதரவு வழங்கும் பட்சத்தில் சபை நிர்வாகக் குழுக்களில் ஜனநாயக மக்கள் முன்னணி உறுப்பினர்களுக்கு தலைமைப் பதவி வழங்க ஐ.தே.க ஒப்புதல் அளித்திருந்தது.
அதன்படி இன்று ஜனநாயக மக்கள் முன்னணி உறுப்பினர்கள் கொழும்பு மாநகரசபையில் நான்கு குழுக்களில் தலைவர்களாகவும், ஒன்பது குழுக்களில் அங்கத்தவர்களாகவும் தெரிவு செய்யப்பட்டுள்ளனர்.
தலைநகரத் தமிழ் மக்கள் தமது கட்சிக்கு வழங்கியுள்ள வாக்குகளின் மூலமாக கிடைத்துள்ள அரசியல் பலத்தின் அடிப்படையில் இந்த அந்தஸ்துகள் கிடைத்துள்ளன என ஜனநாயக மக்கள் முன்னணி இது தொடர்பில் கருத்து தெரிவித்துள்ளது.
**************

பாதுகாப்பு ஏற்பாடு
மாலைதீவில் நடைபெறும் சார்க் உச்சிமாநாட்டுக்காக மாலைதீவு தேசிய பாதுகாப்பு படையினரும், இலங்கையின் விசேட அதிரடிப்படையினரும் இணைந்து மேற்கொள்ளும் பாதுகாப்பு திட்டமொன்று அமுல்படுத்தப்படுகிறது.
மாலைதீவின் அட்டு நகரில் நடைபெறும் இம்மாநாட்டில் கலந்துகொள்ளும் பிரமுகர்களினதும் மாநாடு நடைபெறும் இடத்தினதும் பாதுகாப்பை உறுதிப்படுத்துவதற்காக இரு படையமைப்புகளும் நெருக்கமாக இணைந்து செயற்படுவதாக மாலைதீவில் பணியாற்றும் இலங்கை விசேட அதிரடிப்படையைச் சேர்ந்த சிரேஷ்ட அதிகாரியொருவர் கூறினர்.
மாநாட்டில் கலந்துகொள்ளும் அனைத்து தூதுக்குழுவினரும் உயர் முன்னுரிமை அளிக்கப்பட வேண்டியவர்களாக கருதப்படுகின்றனர்.
தவறில்லாத பாதுகாப்புத் திட்டத்திற்காக மாலைதீவு தேசிய பாதுகாப்பு படையினருடன் இணைந்து அச்சுறுத்தல் மதிப்பாய்வு தொடர்பான பல நடவடிக்கைகளை தாம் நடத்தியுள்ளோம் என அவர் கூறினார்.
மாநாடு இடம்பெறும் இடத்திற்கு வருபவர்களும் வெளியேறுபவர்களும் கண்காணிக்கப்படுகின்றனர்.
பாதுகாப்புச் சோதனைகளும் மேற்கொள்ளப்படுகின்றன எனவும் அவர் தெரிவித்துள்ளார்.
இம்மாநாட்டிற்கு முன்னர், துறைமுகம், விமான நிலையம், மாநாட்டு மண்டபம் ஆகியவற்றுக்கு பாதுகாப்பளிப்பது தொடர்பான பல பயிற்சித் திட்டங்களை இலங்கையின் விசேட அதிரடிப் படையினர் மேற்கொண்டதாக ஹவீரு இணையத்தளம் ஏற்கெனவே தெரிவித்திருந்தது.
**************

அதிகரிக்கும் வீதி விபத்துக்கள்
இலங்கையில் நாளொன்றுக்கு வீதிவிபத்துக்களின் மூலம் 6 பேர் பலியாவதாக தெரிவிக்கப்பட்டுள்ளது.
இதன் அடிப்படையில் வருடம் ஒன்றுக்கு 2000 முதல் 2500 பேர் வீதிவிபத்துக்களில் பலியாவதாக பெருந்தெருக்கள் துறை அமைச்சு தெரிவி;த்துள்ளது.
இந்த விபத்துக்களின் போது குறைந்தது 2 பேராவது கடும் காயங்களுக்கு உள்ளாகின்றனர்.
தரவுகளின்படி நாட்டில் ஒவ்வொரு 10 நிமிடங்களுக்கும் ஒரு வீதி விபத்து இடம்பெறுகிறது.
வருடம் ஒன்றில் 80 ஆயிரம் வீதிவிபத்துக்கள் இடம்பெறுகின்றன.
மது கவனயீனம் போன்ற காரணங்களாலேயே வீதிவிபத்துக்கள் இடம்பெறுகின்றன
**************

Wednesday, 9 November 2011

செய்திகள் 09/11


சார்க்கில் அமெரிக்க குழு
மாலைதீவில் நடைபெறவுள்ள சார்க் உச்சிமாநாட்டில் தெற்கு, மத்திய ஆசியப் பிராந்தியங்களுக்கான அமெரிக்க உதவி இராஜாங்கச் செயலர் றொபேட் ஓ பிளேக் தலைமையிலான குழுவொன்றும் பங்கேற்கவுள்ளது.
இதன்போது, அங்கு மஹிந்த ராஜபக்ஷவை றொபேட் ஓ பிளேக் சந்தித்துப் பேசவுள்ளார் எனத் தகவல்கள் தெரிவிக்கின்றன.
அட்டு நகரில் எதிர்வரும் 10 ஆம், 11 ஆம் நாள்களில் 17 ஆவது சார்க் உச்சி மாநாடு நடைபெறவுள்ளது.
இந்த மாநாட்டில் இலங்கை உள்ளிட்ட சார்க் அமைப்பில் அங்கம் வகிக்கும் ஆப்கானிஸ்தான், பாகிஸ்தான், இந்தியா, பங்களாதேஷ், பூட்டான், நேபாளம், மாலைதீவு ஆகிய 8 நாடுகளின் தலைவர்கள் கலந்து கொள்ளவுள்ளனர்.
இந்த மாநாட்டில் பார்வையாளராகக் கலந்துகொள்ளவுள்ள அமெரிக்கக் குழுவுக்கு அமெரிக்காவின் உதவி இராஜாங்கச் செயலர் றொபேட் ஓ பிளேக் தலைமையேற்கவுள்ளார்.
சார்க் மாநாட்டில் பங்கேற்கவுள்ள றொபேட் ஓ பிளேக், மாலைதீவில் எதிர்வரும் 13 ஆம் திகதிவரை தங்கியிருப்பார் என்றும் அமெரிக்க இராஜாங்கத் திணைக்களம் அறிவித்துள்ளது.
சார்க் மாநாட்டில் பங்கேற்பதற்கும் அமெரிக்க குழுவில் இலங்கை மற்றும் மாலைதீவுக்கான அமெரிக்க தூதுவர் பற்றீசியாவும் இடம்பெறவுள்ளார்.
இந்த மாநாட்டில் பங்கேற்கும் தெற்காசிய நாடுகளின் தலைவர்கள் மற்றும் அதிகாரிகளுடன் அமெரிக்க அதிகாரிகள் விரிவான பேச்சுகளை நடத்தவுள்ளனர் எனவும் இராஜாங்கத் திணைக்களம் தெரிவித்துள்ளது.
அரசுத் தலைவர் மஹிந்த ராஜபக்ஷவையும் அமெரிக்க உதவி இராஜாங்கச் செயலர் றொபேட் ஓ பிளேக் சந்தித்துப் பேசவுள்ளார் என தகவல்கள் தெரிவிக்கின்றன.
இதன்போது, நல்லிணக்க ஆணைக்குழுவின் அறிக்கை, அதனை விரைவில் பகிரங்கப்படுத்துவது, அறிக்கையின் பரிந்துரைகளின் மீதான மேல் நடவடிக்கைகள் குறித்து அவர், அரசுத் தலைவர் மஹிந்தவிடம் வலியுறுத்தவுள்ளார் எனவும் தகவல்கள் தெரிவிக்கின்றன.
*******************

சித்திரவதைகளை தொடரும் ஸ்ரீலங்கா
ஜெனிவாவில் நேற்று நடைபெற்ற சித்திரவதைகளுக்கு எதிரான ஐ.நா குழுவின் கூட்டத்தில் சிறிலங்கா அரசுக்கு எதிராக கடுமையான குற்றச்சாட்டுகள் முன்வைக்கப்பட்டுள்ளதுடன், இரகசிய தடுப்பு முகாம்கள் குறித்து சுதந்திரமான விசாரணைகள் நடத்தப்பட வேண்டும் என்றும் வலியுறுத்தப்பட்டுள்ளது.
சித்திரவதைகளுக்கு எதிரான ஐ.நா குழுவின் 47வது அமர்வு நேற்று ஜெனிவாவில் நடைபெற்றது.
இந்தக் கூட்டத்தில் மனிதஉரிமைகளைப் பின்பற்றுவதில் சிறிலங்காவுக்கு உள்ள பொறுப்புத் தொடர்பாக கடுமையான கேள்விகள் எழுப்பப்பட்டன.
கேட்கப்படுகின்ற கேள்விகளுக்கு மேலதிகமான தகவல்களை வழங்குவதில்லை என்று குழுவின் பல உறுப்பினர்கள் சிறிலங்கா அரசு மீது குற்றம்சாட்டினர்.
சிறிலங்கா படைகளின் இரகசிய தடுப்பு முகாம்கள் பற்றிய குற்றச்சாட்டுகளை விசாரிக்க சுதந்திரமான விசாரணைகள் அவசியம் என்று சித்திரவதைகளுக்கு எதிரான ஐ.நா குழுவின் உதவித் தலைவர் பெலிஸ் கேர் அம்மையார் இந்த அமர்வில் வேண்டுகோள் விடுத்துள்ளார்.
சிறிலங்கா இராணுவம் மற்றும் அவர்களுடன் சேர்ந்தியங்கும் துணை ஆயுதக்குழுக்களால் இயக்கப்படும் இரகசியத் தடுப்பு முகாம்கள், சித்திரவதைகள் மற்றும் நீதிக்குப் புறம்பான படுகொலைகள் இரகசியமாக இடம்பெறுவதற்கு வாய்ப்பை ஏற்படுத்திக் கொடுத்துள்ளதாகவும், அதுவே அங்கு நடந்துள்ளது என்றும் அவர் காட்டமாக குற்றம்சாட்டியுள்ளார்.
சிறிலங்காவின் வடக்குப் பகுதியில் ஏழு இரகசிய தடுப்புமுகாம்கள் இருப்பதாக அனைத்துலக மன்னிப்புச்சபை அறிக்கை ஒன்றை கையளித்துள்ளதாகவும், அவற்றில் 5 முகாம்கள் வவுனியாவிலும், இரண்டு முகாம்கள் முல்லைத்தீவிலும் இருப்பதாகவும் பெலிஸ் கேர் அம்மையார் குறிப்பிட்டுள்ளார்.
பூந்தோட்டம் மகா வித்தியாலயம், 211 பிரிகேட் தலைமையகம், வெளிக்குளம் மகாவித்தியாலயம், புளொட் துணை ஆயுதக்குழு நிலையம், தர்மபுரம் ஆகிய 5 முகாம்கள் வவுனியாவிலும், மேலும் 2 முகாம்கள் முல்லைத்தீவிலும் செயற்படுவதாகவும் அந்த அறிக்கையில் கூறப்பட்டுள்ளது.
கைவிடப்பட்ட 5 கட்ட்டங்கள், வீடுகளைக் கொண்ட தர்மபுரம் இரகசியத்தடுப்பு முகாமில் ஆண்களும் பெண்களுமாக 700 பேர் தடுத்து வைக்கப்பட்டுள்ளனர் என்றும், இவர்களில் 80 பேர் விடுதலைப் புலிகளின் உயர்மட்டத் தலைவர்கள் என்றும், புலிகளின் ஆதரவாளர்களான 300 பொதுமக்களும் அதில் அடங்குவதாகவும் பெலிஸ் கேர் அம்மையாளர் கூறியுள்ளார்.
காணாமற் போதல்கள் தொடர்பான ஐ.நா பணிக்குழு சிறிலங்காவை உலகில் அதிகளவில் காணாமற்போகும் சம்பவங்கள் இடம்பெறும் நாடுகளில் இரண்டாவது நாடாக பட்டியலிட்டுள்ளதாகவும் அவர் சுட்டிக்காட்டியுள்ளார்.
சிறிலங்காவில் தடுத்து வைக்கப்பட்டுள்ளோர் மீது சுதந்திரமான மருத்துவ பரிசோதனைகள் நடத்தப்படுவதில்லை.
பாரிய மனித உரிமை மீறல்கள் சிறிலங்காவில் இடம்பெற்றதாக தனக்கு பல முறைப்பாடுகள் வந்துள்ளன எனவும் தெரிவித்தார்.
இந்த முறைப்பாடுகளில் பலவந்தமாக காணாமல் போனது, காவல்துறையால் சித்திரவதை செய்யப்பட்டது, பாலியல் தாக்குதல் நடைபெற்றது, மனிதஉரிமை குறித்த வழக்குகளில் முன்னிலையாகும் சட்டவாளர்கள் மிரட்டப்படுவது, சிறையில் நடைபெறும் மரணங்கள் போன்றவை அடங்கும்.
சிறிலங்கா அரசு தான் அறிவித்தபடி தடுத்து வைக்கப்பட்டிருப்போரின் பெயர் விபரங்களை இன்னமும் வெளியிடவில்லை.
தடுத்து வைக்கப்பட்டிருப்போரின் பெயர் விபரங்கள் அரசிடம் இருப்பதாகவும், இதை அவர்களின் உறவினர்கள் பெறலாம் என்றும் சிறிலங்கா வெளிவிவகார அமைச்சு கடந்த ஜனவரி மாதம் கொழும்பில் உள்ள வெளிநாட்டு தூதரக அதிகாரிகளிடம் கூறியிருந்தது.
ஆனால் இதுபோன்ற விபரங்கள் இருப்பதாக கூறப்பட்டாலும், விபரங்களைப் பெற முடியவில்லை என்று அரசசார்பற்ற நிறுவனப் பிரதிநிதிகள் தெரிவிக்கின்றனர் என்றும் பெலிஸ் கேர் அம்மையார் குறிப்பிட்டார்.
சித்திரவதை தொடர்பான ஐ.நா உடன்பாட்டில் சில அம்சங்களில் தனது நாடு கைச்சாத்திடவில்லை என்று, இந்த மாநாட்டில் சிறிலங்காவைப் பிரதிநிதித்துவம் செய்யும் குழுவின் தலைவரான, சிறிலங்கா அமைச்சரவையின் ஆலோசகரும், முன்னாள் சட்டமா அதிபருமான மொகான் பீரிஸ் சுட்டிக்காட்டினார்.
சிறிலங்கா பாதுகாப்புப் படைகளால் மேற்கொள்ளப்படும் சித்திரவதைகளை தடுக்க சிறிலங்கா அரசாங்கம் நடவடிக்கை எடுக்கும் என்றும் அவர் கூறியுள்ளார்.
சித்திரவதைகளை சகிக்கமுடியாது என்ற கொள்கையில சிறிலங்கா அரசாங்கம் 110 வீதம் ஒப்புக்கொள்வதாகவும் அவர் தெரிவித்துள்ளார்.
நேற்றைய அமர்வில் எழுப்பப்பட்ட கேள்விகளுக்கு சிறிலங்கா இன்று பதிலளிக்க வேண்டும் என்றும் பெலிஸ் கேர் அம்மையாளர் கூறியுள்ளார்.
*******************

இந்தோனிய குழு ஸ்ரீலங்காவுக்கு
இந்தோனேஷிய நாடாளுமன்றத்தின் உயர் மட்ட தூதுக்குழுவொன்று இலங்கைக்கு விஜயம் மேற்கொள்ளவுள்ளதாக கொழும்பிலுள்ள இந்தோனேஷிய தூதுவராலயம் இன்று செவ்வாய்க்கிழமை தெரிவித்தது.
எட்டு உறுப்பினர்களை கொண்ட இந்த தூதுக்குழுவினர் எதிர்வரும் நவம்பர் 10ஆம் திகதி முதல் 12ஆம் திகதி வரை இலங்கையில் தங்கியிருக்கவுள்ளதாக இந்தோனேஷிய தூதுவராலய பேச்சாளர் தெரிவித்தார்.
சபாநாயகர் சமல் ராஜபக்ஷவின் அழைப்பிற்கினங்க இலங்கைக்கான விஜயத்தினை மேற்கொள்ளும் இத்தூதுக்குழுவில் இந்தோனேஷிய நாடாளுமன்றத்தின் ஆளும் கட்சி மற்றும் எதிர்க்கட்சி உறுப்பினர்கள் உள்ளடங்குவதாக அவர் குறிப்பிட்டார்.
இக்குழுவினர் அரசுத் தலைவர் மஹிந்த ராஜபக்ஷ, பிரதமர் தி.மு.ஜயரட்ன மற்றும் சபாநாயகர் சமல் ராஜபக்ஷ உள்ளிட்ட பலரை சந்திக்கவுள்ளதாக அவர் மேலும் தெரிவித்தார்
*******************

பணத்தைக் கொட்டித் தீர்த்த தேர்தல்
மூன்று கட்டங்களாக இடம்பெற்றுள்ள உள்ளூராட்சித் தேர்தலை நடத்தி முடிப்பதற்கு தேர்தல் திணைக்களத்துக்கு 195 கோடி ரூபா செலவாகியுள்ளது.
இதற்கமைய மூன்று கட்டங்களாக நடைபெற்ற இந்தத் தேர்தலில் காவல்துறை திணைக்களத்துக்கு 31 கோடி ரூபாவும், தபால் திணைக்களத்துக்கு 25 கோடி ரூபாவும், அரச அச்சகத்துக்கு 13 கோடி ரூபாவும் செலவாகியுள்ளதாகத் தகவல்கள் தெரிவிக்கின்றன.
இவற்றுக்கு மேலதிகமாகத் தேர்தல் கடமைகளில் ஈடுபட்டிருந்த உதியோகத்தர்களுக்கான எரிபொருள் செலவினம் மற்றும் தேர்தல்கள் அலுவலகத்தின் செயற்பாடுகள் ஆகியவற்றுக்குக் கணிசமான தொகையொன்று செலவாகியுள்ளதாகவும் தேர்தல்கள் செயலகம் தெரிவித்துள்ளது.
இந்த உள்ளூராட்சித் தேர்தல்களுக்காகத் தேர்தல் செயலகம், இந்த ஆண்டின் ஆரம்பத்தில் 200 கோடி ரூபாவை ஒதுக்கியிருந்தது.
மேலும் 2011 ஆம் ஆண்டு உள்ளூராட்சித் தேர்தலின் முதற்கட்டம் கடந்த மார்ச் மாதம் 17 ஆம் திகதியிலும், இரண்டாம் கட்டம் ஜூலை மாதம் 23 ஆம் திகதியிலும், மூன்றாம் கட்டம் ஒக்ரோபர் மாதம் 08 ஆம் திகதியிலும் இடம்பெற்றிருந்தது.
இந்த மூன்று கட்டங்களிலும் 322 உள்ளூராட்சி நிறுவனங்களுக்கு உறுப்பினர்களைத் தெரிவு செய்வதற்கு வாக்களிப்பு இடம்பெற்றுள்ளது.
*******************

மனோ கணேசனுக்கு பதவி
ஐக்கிய தேசியக் கட்சியின் தேசியப் பட்டியல் பாராளுமன்ற உறுப்பினராக ஜனநாயக மக்கள் முன்னணியின் தலைவர் மனோ கணேசன் விரைவில் நியமிக்கப்படுவார் என ஐக்கிய தேசியக் கட்சி மற்றும் ஜனநாயக மக்கள் முன்னணியின் உள்ளகத் தகவல்கள் தெரிவிக்கின்றன.
மனோ கணேசனுக்கு பாராளுமன்ற பதவியை வழங்குவதன் பொருட்டு ஐக்கிய தேசியக் கட்சியின் தற்போதைய தேசியப் பட்டியல் பாராளுமன்ற உறுப்பினர் எம்.சுவாமிநாதன் இராஜினாமா செய்வார் என நம்பத்தகுந்த தகவல்கள் தெரிவிக்கின்றன.
கடந்த பொதுத் தேர்தலில் ஜனநாயக மக்கள் முன்னணி, ஸ்ரீலங்கா முஸ்லிம் காங்கிரஸ், தொழிலாளர் தேசிய சங்கம் உள்ளிட்ட கட்சிகள் ஐக்கிய தேசியக் கட்சியுடன் இணைந்து ஐக்கிய தேசிய முன்னணி என யானைச் சின்னத்தில் போட்டியிட்டன.
இத்தேர்தலில் மனோ கணேசன் கண்டி மாவட்டத்தில் போட்டியிட அவரது கட்சி சார்பில் பிரபா கணேசன் மற்றும் குமர குருபரன் ஆகியோர் கொழும்பு மாவட்டத்தில் போட்டியிட்டனர்.
இதன்போது ஜனநாயக மக்கள் முன்னணிக்கு தேசியப் பட்டியல் பாராளுமன்ற உறுப்பினர் பதவி ஒன்று வழங்கப்படும் என ரணில் விக்ரமசிங்க உறுதியளித்தபோதும் பின்னர் அது வழங்கப்படவில்லை.
இதனால் ஆத்திரமும் ஏமாற்றமும் அடைந்த மனோ கணேசன் கட்சி ஐக்கிய தேசிய முன்னணியிலிருந்து விலகி சுயாதீனமாகச் செயற்படத் தொடங்கியது.
அதன் பின்னர் 18வது திருத்தச் சட்டம் பாராளுமன்றிற்கு கொண்டுவரப்பட்ட சமயத்தில் ஜனநாயக மக்கள் முன்னணியின் பாராளுமன்ற உறுப்பினர் பிரபா கணேசன் தன்னிச்சையாக அரசுடன் இணைந்து கொண்டார்.
இதன் பின்னர் பாராளுமன்ற அங்கத்துவம் இல்லாமல் கட்சி நடவடிக்கைகளை மேற்கொண்டுவந்த ஜனநாயக மக்கள் முன்னணிக்கு தற்போது புதிய வாய்ப்பு கிட்டியுள்ளது.
அண்மையில் இடம்பெற்ற உள்ளூராட்சி சபைத் தேர்தலில் கொழும்பு மாநகர சபையை ஐக்கிய தேசியக் கட்சி கைப்பற்றியதுடன் ஜனநாயக மக்கள் முன்னணி 6 ஆசனங்களை பெற்றது.
இதன் பின்னர் ஐக்கிய தேசியக் கட்சி ஸ்த்திரமாக கொழும்பு மாநகர சபையின் நடவடிக்கைகளை முன்னெடுத்துச் செல்ல மனோ கணேசன் கட்சியின் ஆதரவை நாடினார்.
இதன் ஒரு அங்கமாக ரணில் விக்ரமசிங்க மனோ கணேசனை தனது இல்லத்திற்கு அழைத்து பேச்சுவார்த்தை நடத்தி உடன்படிக்கைகள் சிலவற்றை ஏற்படுத்திக் கொள்ள முயற்சித்தார்.
இந்த நிலையில் ரணில் விக்ரமசிங்க லண்டன் செல்வதற்கு முன்னர் மனோ கணேசனுக்கு கடிதம் ஒன்றை எழுதியதோடு 8ம் திகதி கொழும்பு மாநகர சபை கூட்டத்தில் தமது கட்சிக்கு ஆதரவு அளிக்குமாறும் தான் லண்டனில் இருந்து திரும்பியதும் உடன்படிக்கைகள் செய்து கொள்ள முடியும் எனவும் கூறியிருந்தார்.
உடன்படிக்கையில் எவ்வாறான விடயங்கள் நிபந்தனைகள் அடங்கியுள்ளன என்று இதுவரை முழுமையான தகவல்கள் வெளிவராத நிலையில் மனோ கணேசனுக்கு தேசியப் பட்டியல் பாராளுமன்ற உறுப்பினர் பதவி வழங்குவது என்ற உடன்படிக்கை உள்ளடங்கலாம் என நம்பப்படுகிறது.
மனோ கணேசனுக்கு ரணில் விக்ரமசிங்க வரலாற்றுத் துரோகம் இழைத்துவிட்டார் என்று எழுந்த குற்றச்சாட்டுக்களுக்கு இந்த சந்தர்ப்பத்தை பயன்படுத்தி ரணில் விக்ரமசிங்க பரிகாரம் தேடிக் கொள்வார் என எதிர்பார்க்கப்படுகிறது.
*******************

மனித உரிமை ஆணைக்குழுவில் முறைப்பாடு
முல்லேரிய துப்பாக்கிச் சூட்டுச் சம்பவத்தில் உயிரிழந்த கொழும்பு மாவட்ட முன்னாள் பாராளுமன்ற உறுப்பினரும் அரசுத் தலைவரின் ஆலோசகருமான பாரத லக்ஷ்மன் பிரேமச்சந்திரவின் கொலை தொடர்பில் அவரது மனைவியான சுமனா பிரேமச்சந்திர இலங்கை மனித உரிமை ஆணைக்குழுவிடம் நேற்று முறைப்பாடு ஒன்றைச் செய்துள்ளார்.
தனது கணவரின் கொலையுடன் தொடர்புடையோர் என சந்தேகிக்கப்படும் பாதுகாப்பு அமைச்சின் ஆலேசாகரும் கொழும்பு மாவட்ட பாராளுமன்ற உறுப்பினருமான துமிந்த சில்வா உட்பட மேலும் பலரும் இதுவரை கைது செய்யப்படவில்லை எனவும் அவர் தனது முறைப்பாட்டில் தெரிவித்துள்ளார்.
*******************

Tuesday, 8 November 2011

செய்திகள் 08/11


சனல்4 அம்பலமாக்கிய உண்மை
போர் முடிவடைந்து 2 வருடங்கள் பூர்த்தியாகியுள்ள நிலையில் இலங்கையில் உள்ள இரகசியச் சிறைச்சாலைகளில் தமிழ் கைதிகள் இன்னும் சித்திரவதைக்கு உள்ளாக்கப்படுவதாக சனல் 4 தொலைக்காட்சி தெரிவித்துள்ளது.
அதற்கான ஆதாரக் காணொளியையும் அது வெளியிட்டுள்ளது.
சமீபத்தில் இலங்கைச் சிறையில் இருந்து தப்பி பின்னர் பிரித்தானியா வந்து அகதிகள் அந்தஸ்த்து கோரிய இருவரது காணொளிகளை அது தற்போது வெளியிட்டுள்ளது.
இலங்கை இராணுவத்தினர் தமிழ் இளைஞர்களைக் கட்டிவைத்து வயராலும் மற்றும் கம்புகளாலும் முதுகில் பலமாக அடித்துள்ளனர்.
அதுமட்டும் அல்லாது கழுத்தில் கம்பியைப் போட்டு சுருக்கிட்டு பின்னர் தண்ணீர் தொட்டி ஒன்றில் தன் தலையை மூழ்க்கவிட்டதாகவும் அப்போது தான் மூச்சுத் திணறி கிட்டத்தட்ட தான் இறக்கும் நிலைக்குச் சென்றதாகவும் ஒரு தமிழ் இளைஞர் தெரிவித்துள்ளார்.
மற்றுமொரு தமிழ் இளைஞர் தெரிவிக்கையில் தன்னைக் கட்டி வைத்து அடித்ததாகவும் பல நாட்களாக தான் சிறையில் வாடிய நிலையில் தாகத்துக்கு தண்ணீர் கேட்டவேளை சிறு நீரை இராணுவத்தினர் தந்து குடிக்கச் சொன்னதாகவும் கூறியுள்ளார்.
இதனை விட தான் போரில் அகப்பட்டு இறந்திருக்கலாமே எனத் தான் எண்ணியதாக அவர் மேலும் தெரிவித்துள்ளார்.
இலங்கையானது ஐ.நாவின் உறுப்பு நாடாக இருக்கின்ற போதும் அது ஐ.நா சாசனங்களை மீறி பாரிய சித்திரவதைகளை மனித குலத்துக்கு எதிராகச் செய்துவருகிறது என்ற குற்றச்சாட்டு தற்போது எழுந்துள்ளது.
போர் குற்றம் மற்றும் இன அழிப்பு என்பன ஒரு புறம் இருக்க தற்போது தமிழ் இளைஞர்களை சித்திரவதை செய்யும் மேலதிக குற்றச்செயல்களில் இலங்கை ஈடுபட்டும் வருகிறது என சனல் 4 தொலைக்காட்சி தெரிவித்துள்ளது.
இதுவரை பிரித்தானியாவில் உள்ள சுமார் 35 தமிழ் இளைஞர்களை சனல் 4 தொலைக்காட்சி தொடர்புகொண்டு அவர்களிடம் இருந்து வாக்குமூலங்களைப் பெற்றுள்ளதாக தெரியவருகிறது.
இவர்களில் பலர் ஒரே வகையான சித்திரவதை தமக்கு இழைக்கப்பட்டதாகத் தெரிவித்துள்ளனர்.
சித்திரவதைக்கு எதிரான மனித உரிமை அமைப்புகள் சில ஐ.நா விடம் இது குறித்து முறைப்பாடு ஒன்றை மேற்கொண்டுள்ளதாகவும் மேலும் அறியப்படுகிறது.
இதன் அடிப்படையில் சித்திரவதைக்கு எதிரான ஐ.நா வின் அதிகாரிகள் இது குறித்து ஆராய உள்ளனர்.
இதனால் இலங்கை மேலும் சிக்கலுக்குள் தள்ளப்படும் அபாயம் தோன்றியுள்ளது.
போர்குற்றச்சாட்டு இன அழிப்பு என்று இலங்கை மீது இரு முனைத் தாக்குதல் தொடுக்கப்பட்டுள்ள நிலையில் சித்திரவதை என்னும் ஒரு களமும் புதிதாகத் திறக்கப்பட்டு இலங்கை அரசு மீது மும்முனைத் தாக்குதல் நடைபெற ஆரம்பமாகியுள்ளது.
********************

தொடரும் சித்திரவதை
இலங்கையில் கைதிகள் மிகவும் மோசமான முறையில் சித்திரவதை செய்யப்படுவதாக சர்வதேச மன்னிப்புச் சபை முறையிட்டுள்ள போதும் இலங்கை அது குறித்து விசாரணை நடத்த தவறியுள்ளதாக தெரிவிக்கப்பட்டுள்ளது.
இலங்கை சித்திரவதைக்கு எதிரான சட்டங்களைக் கொண்டுள்ள போதும் இடம்பெறும் சித்திரவதைகள் குறித்து முறையான விசாரணை நடத்தப்படுவதில்லை என உரிமைக் குழுவின் இலங்கை நிபுணர் யொலன்டா பொஸ்டர் குற்றம் சுமத்தியுள்ளார்.
இலங்கையில் பாதுகாப்பு பிரிவினர் மேற்கொள்ளும் சித்திரவதைகளை விசாரணை செய்ய சுயாதீன அலகு ஒன்று இல்லை என அவர் சுட்டிக்காட்டியுள்ளார்.
இலங்கையில் கைதிகள் மீது காவல்துறையினர், துணை இராணுவக் குழுக்கள், சிறைச்சாலை அதிகாரிகள் சித்திரவதைகளை கட்டவிழ்த்துள்ளதாக சர்வதேச மன்னிப்புச் சபை குற்றம் சுமத்தியிருந்தது.
********************

சார்க் அமைச்சர்கள் மகாநாடு
சார்க் மாநாட்டை முன்னிட்டு இடம்பெறும் வெளிவிவகார துறை அமைச்சின் செயலாளர் மாநாடு இன்று இடம்பெறவுள்ளது.
17 வது சாக் மாநாடு இந்த முறை மாலைதீவின் அட்டு நகரில் இடம்பெறவுள்ளது.
இலங்கையை பிரதிநிதித்துவப்படுத்தும் வகையில் இன்றைய மாநாட்டில் வெளிவிவகார அமைச்சின் செயலாளர் கருணாதிலக அமுனுகம கலந்து கொள்ளவுள்ளார்.
இதனிடையே, நாளையதினம் வெளிவிவகாரத்துறை அமைச்சர்களின் மாநாடு இடம்பெறவுள்ளமை குறிப்பிடத்தக்கது.
அத்துடன், எதிர்வரும் 10ம் , 11ம் திகதிகளில் இடம்பெறவுள்ள சார்க் அரச தலைவர்கள் மாநாட்டில் கலந்து கொள்வதற்காக அரசுத் தலைவர் மஹிந்த ராஜபக்ஷ நாளையதினம் புறப்பட்டுச் செல்லவுள்ளதாக அரசுத் தலைவர் ஊடகப்பிரிவு தெரிவித்துள்ளது.
இதனிடையே, அரசின் செயற்பாடுகளுக்கு பங்கம் விளைவிக்கும், மற்றும் போலி பிரசாரங்களை மேற்கொள்ளும் இணையத்தளங்களை சார்க் வலயத்தில் இருந்து அகற்றுவது தொடர்பான யோசனையொன்றும் இலங்கையினால் முன்வைக்கப்படவுள்ளதாக தெரிவிக்கப்பட்டுள்ளது.
நாட்டின் அரசியல் செயற்பாடுகளுக்கும், அரசியல் பிரமுகர்களுக்கும், அபகீர்த்தியை ஏற்படுத்தும் வகையில் மக்கள் மத்தியில் செய்திகளை வெளியிட்டு வந்ததாக கூறப்படும் 5 செய்தி இணையத்தளங்கள் தடைசெய்யப்பட்டுள்ளன.
பிரிவினைகளை தூண்டும்வகையிலும், ஒருவரின் சுயகௌரவத்தை பாதிக்கும் வகையிலும் குறித்த இணையத்தளங்கள் செய்திகளையும், ஆக்கங்களையும் வெளியிட்டு வந்ததாக தகவல் மற்றும் ஊடகத்துறை அமைச்சு செயலாளர் டப்ளியு.பி.கனேகல தெரிவித்துள்ளார்.
********************

மகிந்தவை சந்திக்கும் மன்மோகன்
சார்க் மாநாட்டில் பங்கேற்கும் சிறிலங்கா அதிபர் மகிந்த ராஜபக்சவும், இந்தியப் பிரதமர் மன்மோகன்சிங் தனியாகச் சந்தித்துப் பேச்சு நடத்தவுள்ளதாக புதுடெல்லித் தகவல்கள் கூறுகின்றன.
தமிழ் மக்களின் பிரச்சினைகளுக்கு அரசியல் தீர்வு காணும் முயற்சிகள் தேக்கமடைந்துள்ள பின்னணியில் இந்தச் சந்திப்பு இடம்பெறவுள்ளதாக இந்திய நாளேடு ஒன்று தகவல் வெளியிட்டுள்ளது.
சிறிலங்கா அரசுடன் இனப்பிரச்சினைக்கான அரசியல்தீர்வு தொடர்பாக பேச்சு நடத்தி வரும் தமிழ்த் தேசியக் கூட்டமைப்பு, இடைநிறுத்திய பேச்சுக்களை மீள ஆரம்பித்த போதும் எந்த முன்னேற்றங்களும் எட்டப்படாத நிலையில், அமெரிக்க, பிரித்தானிய, கனேடிய அதிகாரிகளுடன் பேச்சுக்களை நடத்தி வருகிறது.
தமிழ்த் தேசியக் கூட்டமைப்பின் வெளிநாட்டுப் பயணங்கள் சிறிலங்கா அரசுக்கு மகிழ்ச்சியை ஏற்படுத்தவில்லை.
சிறிலங்கா அமைச்சர்கள் பலரும் இதற்கு எதிராக குரல் கொடுத்து வருகின்ற நிலையிலேயே, இந்தியப் பிரதமரும் சிறிலங்கா அதிபரும் மாலைதீவில் சந்திக்கவுள்ளனர்.
இந்தச் சந்திப்பின் போது பல்வேறு பிரச்சினைகள் குறித்து இருவரும் கலந்துரையாடவுள்ளதாக கூறப்படுகிறது.
அண்மையில் பேர்த்தில் நடைபெற்ற கொமன்வெல்த் தலைவர்கள் மாநாட்டில் இந்தியப் பிரதமர் கலந்து கொள்ளவில்லை.
அதற்கு முன்னதாக கடந்த செப்ரெம்பர் மாதம் நியுயோர்க்கில் நடைபெற்ற ஐ.நா பொதுச்சபைக் கூட்டத்தில் பங்கேற்கச் சென்றிருந்த போதே மகிந்த ராஜபக்சவும் மன்மோகன்சிங்கும் சந்தித்துப் பேசியிருந்தனர்.
இந்தச் சந்திப்பின்போது நல்லிணக்க ஆணைக்குழுவின் அறிக்கை தொடர்பாக இருவரும் கலந்துரையாடுவதற்கு வாய்ப்புகள் இருப்பதாக இராஜதந்திர வட்டாரங்கள் தகவல் வெளியிட்டுள்ளன.
இந்த அறிக்கை எதிர்வரும் 15ம் நாள் அளவில் சிறிலங்கா அதிபரிடம் கையளிக்கப்படவுள்ளது.
சார்க் மாநாட்டில பங்கேற்பதற்காக சிறிலங்கா அதிபரும், இந்தியப் பிரதமரும் நாளை மாலைதீவுக்குப் புறப்பட்டுச் செல்லவுள்ளதாகவும் தகவல்கள் தெரிவிக்கின்றன.
********************

சார்க் மகாநாட்டில் பார்வையாளராக அமெரிக்கா
மாலைதீவில் நடைபெறவுள்ள சார்க் உச்சிமாநாட்டில், தெற்கு,மத்திய ஆசியப் பிராந்தியங்களுக்கான அமெரிக்க உதவி இராஜாங்கச் செயலர் றொபேட் ஓ பிளேக் தலைமையிலான குழுவொன்றும் பங்கேற்கவுள்ளது.
அட்டு நகரில் எதிர்வரும் 10ம், 11ம் நாட்களில் 17வது சார்க் உச்சி மாநாடு நடைபெறவுள்ளது.
இந்த மாநாட்டில் சிறிலங்கா அதிபர் உள்ளிட்ட சார்க் அமைப்பில் அங்கம் வகிக்கும் ஆப்கானிஸ்தான், பாகிஸ்தான், இந்தியா, பங்களாதேஸ், பூட்டான், நேபாளம், மாலைதீவு ஆகிய 8 நாடுகளின் தலைவர்கள் கலந்து கொள்ளவுள்ளனர்.
இந்த மாநாட்டில் பார்வையாளராக கலந்து கொள்ளவுள்ள அமெரிக்க குழுவுக்கு அமெரிக்காவின் உதவி இராஜாங்கச் செயலர் றொபேட் ஓ பிளேக் தலைமையேற்கவுள்ளார்.
சார்க் மாநாட்டில் பங்கேற்பதற்காக றொபேட் ஓ பிளேக் இன்று மாலைதீவு பயணமாவதாகவும், இவர் எதிர்வரும் 13ம் நாள் வரை அங்கு தங்கியிருப்பார் என்றும் அமெரிக்க இராஜாங்கத் திணைக்களம் அறிவித்துள்ளது.
சார்க் மாநாட்டில் பங்கேற்பதற்கும் அமெரிக்க குழுவில் சிறிலங்கா மற்றும் மாலைதீவுக்கான அமெரிக்க தூதுவர் பற்றீசியா புற்ரெனிசும் இடம்பெறவுள்ளார்.
இந்த மாநாட்டில் பங்கேற்கும் தெற்காசிய நாடுகளின் தலைவர்கள் மற்றும் அதிகாரிகளுடன் அமெரிக்க அதிகாரிகள் விரிவான பேச்சுக்களை நடத்தவுள்ளதாகவும் இராஜாங்கத் திணைக்களம் கூறியுள்ளது.
சிறிலங்கா அதிபர் மகிந்த ராஜபக்சவையும் அமெரிக்க உதவி இராஜாங்கச் செயலர் றொபேட் ஓ பிளேக் சந்தித்துப் பேசவுள்ளதாக தகவல்கள் தெரிவிக்கின்றன.
இதன்போது, நல்லிணக்க ஆணைக்குழுவின் அறிக்கை, அதனை விரைவில் பகிரங்கப்படுத்துவது, அறிக்கையின் பரிந்துரைகளின் மீதான மேல் நடவடிக்கைகள் குறித்து அவர், சிறிலங்கா அதிபரிடம் வலியுறுத்தவுள்ளதாகவும் தகவல்கள் தெரிவிக்கின்றன.
********************

அதிகார மாற்றம் குறித்த முறைப்பாடு
பிரதி எதிர்க்கட்சித் தலைவர் ஒருவரை செயற்குழு நியமித்துள்ள நிலையில் எதிர்கட்சித் தலைவரின் அதிகாரங்கள் வேறு ஒருவரிடம் கையளிக்கப்பட்டுள்ளமை கட்சியின் யாப்பை மீறும் செயலாகும் என தென்மாகாண சபை உறுப்பினர் சட்டத்தரணி மைத்திரி குணரத்ன சுட்டிக்காட்டியுள்ளார்.
கடந்த மார்ச் மாதம் 23 ஆம் திகதி கூடிய ஐக்கிய தேசியக் கட்சியின் செயற்குழுவின் தீர்மானத்திற்கு அமைய பிரதி எதிர்கட்சித் தலைவர் மற்றும் ஐக்கிய தேசியக் கட்சியின் பிரதித் தலைவர் பதவிக்கு பாராளுமன்ற உறுப்பினர் சஜித் பிரேமதாஸ நியமிக்கப்பட்டார்.
இவ்வாறு பிரதித் தலைவர் ஒருவர் நியமிக்கப்பட்டுள்ள நிலையில் பதில் எதிர்க்கட்சித் தலைவராக வேறொருவர் நியமிக்கப்பட்டதன் மூலம் கட்சியின் தலைமைத்துவம், கட்சியின் யாப்பை மீறியுள்ளதாக தென் மாகாண சபை உறுப்பினர் சட்டத்தரணி மைத்திரி குணரத்ன சுட்டிக்காட்டினார்.
********************

அரசியல் மயப்படும் காவல்துறை
சட்டம் சீர்குலைக்கப்பட்டு காவல்துறை அரசியல் மயப்படுத்தப்பட்டுள்ளதாக ஐக்கிய தேசியக் கட்சியின் பாராளுமன்ற உறுப்பினர் தயாசிறி ஜயசேகர தெரிவித்துள்ளார்.
பன்டுவஸ்நுவர பிரதேசத்தில் இடம்பெற்ற நிகழ்வொன்றின் போதே அவர் இதனைக் கூறியுள்ளார்.
அனைத்துப் பகுதிகளிலும் மக்கள் காவல்துறையினரால் தாக்கப்படுவதாகவும், காவல்துறையினரை மக்கள் தாக்கும் நிலை ஏற்பட்டுள்ளதாகவும் பாராளுமன்ற உறுப்பினர் சுட்டிக்காட்டினார்.
காவல்துறையினருக்கும் மக்களுக்கும் இடையிலும், காவல்துறையினருக்கு மத்தியிலும் மோதல்கள் இடம்பெறுவதாக அவர் குறிப்பிட்டார்.
காவல்துறை அரசியல் மயப்படுத்தப்பட்டுள்ள நிலையில் அரசியல்வாதிகள் ஒருவருக்கொருவர் துப்பாக்கிப் பிரயோகம் மேற்கொள்வதாகவும் மக்கள் சட்டத்தை கையில் எடுத்து செயற்படுவதாகவும் தயாசிறி ஜயசேகர மேலும் தெரிவித்தார்.
********************

சொத்துப் பறிப்பு சட்டம்?
குறைவருமானம் பெறும் வர்த்தகங்கள் மற்றும் உடமைகளை மீளமைப்பது குறித்து தயாரிக்கப்பட்ட சட்டமூலம் இன்று நாடாளுமன்றத்தில் தாக்கல் செய்யப்படவுள்ளது.
அந்த சட்டமூலத்தின் மீதான விவாதம் நாளை இடம்பெறும் என ஆளும் கட்சியின் சிரேஷ்ட பேச்சாளர் ஒருவர் தெரிவித்தார்.
நட்டத்தில் இயங்கும் வர்த்தக நடவடிக்கைகளை அரசிற்கு கையேற்கும் சட்டமூலம் பிரதமர் டி.எம்.ஜயரட்னவினால் மன்றில் சமர்ப்பிக்கப்படவுள்ளதாக பேச்சாளர் குறிப்பிட்டார்.
அதேவேளை, அந்த சட்டமூலம் தொடர்பான உயர் நீதிமன்றத்தின் நிலைப்பாடு சபாநாயகரினால் இன்று சபைக்கு அறிவிக்கப்படவுள்ளது.
இதன்கீழ், குறைவருமானத்தில் இயங்குவதாக கூறப்படும் 37 வர்த்தக நடவடிக்கைகளை அரசு கையேற்க திட்டமிடப்பட்டுள்ளது.
செவனகல மற்றும் பெல்வத்தை சீனி தொழிற்சாலைகளும் இதில் உள்ளடங்குகின்றன.
இந்தநிலையில், நாடாளுமன்றில் இன்று சமர்ப்பிக்கப்படவுள்ள சட்டமூலம் தொடர்பாக மேலும் பொதுமக்களின் கருத்துக்கள் பெற்றுக்கொள்ளப்பட வேண்டும் என சில அரசியல் கட்சிகள் வலியுறுத்தியுள்ளன.
********************

Monday, 7 November 2011

செய்திகள் 07/11


தொடரும் சந்திப்பு
லண்டன் வந்துள்ள தமிழ்த் தேசியக் கூட்டமைப்பினர் இன்று பிரிட்டன் நாடாளுமன்ற உறுப்பினர்கள் உட்பட முக்கிய அரசியல் பிரமுகர்கள் பலரைச் சந்திக்கவுள்ளனர்.
அமெரிக்க மற்றும் கனடா ஆகிய நாடுகளுக்கு உத்தியோகபூர்வ பயணம் மேற்கொண்டிருந்த தமிழ்த் தேசியக் கூட்டமைப்பின் நாடாளுமன்ற உறுப்பினர்கள் நேற்றுமுன்தினம் லண்டனில் வந்திறங்கினர்.
முற்பகல் 10.40 மணிக்கு ஹீத்துறூ விமான நிலையத்தில் வந்தடைந்த தமிழ்த் தேசியக் கூட்டமைப்பின் நாடாளுமன்ற உறுப்பினர்களை, ஆதரவாளர்கள் மலர்மாலை அணிவித்து வரவேற்றனர்.
பின்னர் நேற்று லண்டனில் அவர்களை வரவேற்கும் மதிய உபசார ஒன்று கூடல் இடம்பெற்றது.
இதில் லண்டனில் உள்ளவர்கள் எந்த வேறுபாடுமின்றி ஒற்றுமையுடன் பல நூற்றுக்கணக்கில் கலந்து கொண்டு தமது மிகப் பெரும் ஆதரவை வழங்கினர்.
சகல அமைப்புக்களையும் பிரதிநிதித்துவப் படுத்தும் வகையில் பிரமுகர்கள் கலந்து கொண்டு சிறப்பித்தனர்.
பொது அமைப்புக்கள், பொது நிறுவனங்கள், ஊடக நிறுவனங்கள், பொது மக்கள் என அனைவரும் ஒன்று கூடிய இந்த நிகழ்வில் தமிழ்த் தேசியக் கூட்டமைப்பின் பிரதிநிதிகள் தமது கருத்துக்களை பகிர்ந்து கொண்டனர்.
இனைத்து தரப்பினரும் வழங்கிய இந்த ஒத்துழைப்பையிட்டு தமிழ்த் தேசியக் கூட்டமைப்பினர் மகிழ்ச்சியும் நன்றியும் தெரிவித்தனர்.
அதேவேளை தமிழ்த் தேசியக் கூட்டமைப்பினர் அடுத்த கட்ட நடவடிக்கைகள் தொடர்பில் தமிழ் மக்கள் மிகவும் விழிப்புடனும் எதிர்பார்ப்புடனும் உள்ளனர் எனவும் அங்கு கலந்து கொண்மடவர்களால் சுட்டிக்காட்டப்பட்டது.
மூன்று நாள்கள் லண்டனில் தங்கியிருக்கவுள்ள இவர்கள் இன்று திங்கட்கிழமை காலை 11 மணிக்கு பிரிட்டன் நாடாளுமன்ற உறுப்பினர்கள் உட்பட அரசியல் பிரமுகர்கள் பலரைச் சந்திக்கவுள்ளனர் எனத் தெரிவிக்கப்படுகிறது.
*******************

தவறை உணர்ந்த ஜே.வி.பி
அரசுத் தலைவர்த் தேர்தல்களில் முதலில் மஹிந்த ராஜபக்ஷவையும் பின்னர் சரத் பொன்சேகாவையும் ஆதரித்தது தவறு என்று ஜே.வி.பி கூறியுள்ளது.
ஜே.வி.பி. புலிகளுக்கு எதிரான போரைக் கண்மூடித்தனமாக ஆதரித்ததன் மூலம், தேசியப் பிரச்சினைகளை மஹிந்த அரசு புறந்தள்ள வாய்ப்பளித்து விட்டதாகவும் அது மகாதவறு என்றும் அந்தக் கட்சி முதல் தடவையாக நேற்று ஒப்புக்கொண்டது.
இனிவரும் காலங்களில் யாருடனும் தேர்தல் கூட்டு ஒப்பந்தங்களைச் செய்து கொள்வதில்லை என்ற கொள்கை முடிவையும் அது அறிவித்துள்ளது.
2005ஆம் ஆண்டு அரசுத் தலைவர்த் தேர்தலில் மஹிந்த ராஜபக்ஷவுக்கு ஜே.வி.பி. முழுமையான ஆதரவு தெரிவித்தது.
2010ஆம் ஆண்டு அவரது முக்கிய எதிரியாகப் போட்டியிட்ட, இராணுவத்தின் முன்னாள் தளபதி சரத் பொன்சேகாவுக்கு ஆதரவளித்தது.
தற்போது, கட்சியின் அந்த முடிவுகள் மகா தவறானவை என்று ஜே.வி.பி. தெரிவித்துள்ளது.
எதிர்காலத்தில் எந்தவொரு கட்சியுடனோ தனி மனிதர்களுடனோ தேர்தல் கூட்டு ஒப்பந்தங்கள் எதையும் செய்து கொள்ளப் போவதில்லை என்று நாடாளுமன்ற உறுப்பினர் அனுரகுமார திஸநாயக்க நேற்றுக் கொழும்பில் தெரிவித்தார்.
பொன்சேகா தலைமையிலான ஜனநாயக தேசியக் கூட்டணியின் நாடாளுமன்றக் குழுத் தலைவராக திஸநாயக்க தொடர்ந்த போதும் இதனை நேற்று அறிவித்தார்.
கட்சியின் தவறுகளுக்காக அவர் பொதுமக்களிடம் மன்னிப்பும் கேட்டுக்கொண்டார்.
நாட்டின் தேசியப் பிரச்சினைகள் தொடர்பாகக் காணப்பட்ட சமநிலைத் தன்மை, போருக்குத் தமது கட்சி காட்டிய முழுமையான ஆதரவால் சமநிலை இழந்துபோனதாகவும் அவர் குறிப்பிட்டார்.
அது மிகத் தவறான முடிவு என்று கட்சி இப்போது புரிந்துகொண்டுள்ளது.
பொதுவுடமையை நோக்கி நாட்டை முறையாக முன்னகர்த்துவதற்கு சிறிய மறுசீரமைப்பு நடவடிக்கைகள் அவசியம் என்றும் திஸநாயக்க பத்திரிகையாளர்களிடம் கூறினார்.
கட்சியின் தற்போதைய தலைமை கைக்கொண்ட கொள்கை தொடர்பாக ஏற்பட்ட முரண்பாடுகள் காரணமாக ஜே.வி.பி. இரண்டாகப் பிளவுபட்டுள்ளது என்று செய்திகள் வெளியாகி வரும் நிலையில் இந்த ஒப்புதல் வாக்குமூலமும் மன்னிப்புக்கோரலும் வெளிவந்துள்ளன.
*******************

புரட்சிக்கு அழைப்பு
தற்போதைய அரசாங்கத்தின் ஜனநாயக விரோத நடவடிக்கைகளை எதிர்கொள்வதற்கு டியூனிஷியா, எகிப்தில் நடந்ததைப் போன்று மக்கள் சக்தி பயன்படுத்தப்படுத்தப்பட வேண்டுமென ஜே.வி.பி. நேற்று வலியுறுத்தியுள்ளது.
நேற்று ஞாயிற்றுக்கிழமை நடைபெற்ற செய்தியாளர் மாநாடொன்றில் உரையாற்றிய ஜே.வி.பி. நாடாளுமன்ற குழுத் தலைவர் அநுர குமார திஸாநாயக்க, டியூனிஷியா போன்ற நாடுகளில் பெரும்பான்மை நாடாளுமன்ற உறுப்பினர்களின் பலத்தைக் கொண்டிருந்த அரசாங்கங்கம் மக்கள் சக்தியினால் கவிழ்க்கப்பட்டது எனக் கூறினார்.
இலங்கையிலும் சர்ச்சைக்குரிய தனியார் ஓய்வூதியச் சட்டமூலத்தை வாபஸ் பெறச் செய்வதற்கு மக்கள் சக்தி பயன்படுத்தப்பட்டது என அவர் கூறினார்.
ஜனநாயக விரோத நடவடிக்கைகளை முறியடிப்பதில் நாடாளுமன்றத்தில் எம்.பிகளின் எண்ணிக்கையை கையாளாமல் மக்கள் சக்தி ஒரு கருவியாக பயன்படுத்தப்பட வேண்டும் எனவும் அவர் தெரிவித்தார்.
சர்ச்சைக்குரிய, செயற்பாடு குறைந்த நிறுவனங்கள், பயன்பாடு குறைந்த சொத்துக்கள் மீளாய்வு சட்டமூலம் குறித்து அவர் கூறுகையில், இதை அரசாங்கம் சட்டமாக்குவதற்கான எந்த காரணமும் இல்லை.
இது நாடாளுமன்றத்தில் சட்டமாக நிறைவேற்றப்பட்டால், எந்த சொத்துகளையும் வெறும் வர்த்தமானி அறிவித்தல் மூலம் சுவீகரிப்பதற்கு அரசாங்கத்தினால் முடியும் எனக் கூறினார்.
சுவீகரிப்பதற்காக 37 நிறுவனங்கள் பட்டியல்படுத்தப்பட்டுள்ளன.
ஆனால் ஏனயை தனியார் நிறுவனங்கiயும் இந்த சட்டத்தின்கீழ் வேறொரு வர்த்தமானி அறிவித்தலை விடுப்பதன் மூலம் சுவீகரிக்கலாம் என அவர் கூறினார்.
அரசாங்கத்தில் இவ்விவகாரங்களை கையாள்வதற்குப் பொறுப்பான தனிநபர், தனது சொந்த விருப்பு விருப்புக்கேற்ப தீர்மானம் மேற்கொள்ள முடியும்.
இது வர்த்தகர்களை அச்சுறுத்துவதற்கான ஒரு நடவடிக்கையே அன்றி வேறல்ல.
இனிமேல் அரசாங்கம் தனது தேர்தல் பிரசாரங்களுக்கு நிதியளிக்காத தொழில்முனைவோர் மீது பாயும்.
இதுதான் இத்திட்டத்தில் மறைந்துள்ள நிகழ்ச்சி நிரலாகும் என அநுர குமார திஸாநாயக்க கூறினார்.
இது ஒரு ஹிட்லர் பாணி அரசாங்கமாகும். இதைத்தான் ஸிம்பாப்வேயில் ரொபர்ட் முகாபேயும் செய்தார் எனவும் அநுர குமார திஸாநாயக்க விமர்சித்தார்.
*******************

அரசுடமையாக்கும் திட்டம் தொடருமா?
நட்டத்தில் இயங்கும் அரசு, தனியார் நிறுவனங்களை அரசுடைமையாக்குவது தொடர்பாக அரசின் உத்தேச சட்டமூலம் நாளைமறுதினம் நாடாளுமன்றில் சமர்ப்பிக்கப்படும் என முன்னதாக அறிவிக்கப்பட்டிருந்தாலும் அதனை ஒத்திவைப்பது குறித்து அரசு ஆலோசித்து வருகிறது எனத் தெரியவருகிறது.
இந்த உத்தேச சட்டமூலம் நாளைமறுதினம் சபையில் சமர்ப்பிப்பதாக கடந்த வாரம் சபாநாயகர் சமல் ராஜபக்ஷ தலைமையில் நடைபெற்ற கட்சித் தலைவர்கள் மாநாட்டின்போது தீர்மானிக்கப்பட்டிருந்தது.
அத்துடன், சட்டமூலம் சபையில் சமர்ப்பிக்கப்பட்டால், அதனை எதிர்ப்பதற்கு ஐக்கிய தேசியக் கட்சி, ஜே.வி.பி. மற்றும் தமிழ்த் தேசியக் கூட்டமைப்பு என்பனதீர்மானித்திருந்தமை தெரிந்ததே.
இதற்கிடையில், இந்த உத்தேச சட்டமூலத்திற்கு எதிராக பிக்கு ஒருவர் உயர் நீதிமன்றத்தில் மனு ஒன்றைத் தாக்கல் செய்துள்ளார்.
அந்த மனு மீதான தீர்ப்பை உயர் நீதிமன்றம் நாளை அறிவிக்கவுள்ளது.
இந்த நிலையில், நேற்றுமுன்தினம் எதிர்க்கட்சித் தலைவர் ரணில் விக்கிரமசிங்க, அரசுத் தலைவர் மஹிந்த ராஜபக்ஷவை சந்தித்துப் பேசியபோதும் குறித்த சட்டமூலத்திலுள்ள விளைவுகளைச் சுட்டிக்காட்டியதுடன் அவசர அவசரமாக இதனை செய்யக்கூடாது என்றும் அதில் மாற்றங்கள் கொண்டுவரவேண்டும் என்றும் வலியுறுத்தியிருப்பதாகத் தெரிகிறது.
இந்தச் சட்டமூலத்தின்படி சுமார் 35இற்கும் மேற்பட்ட நிறுவனங்களை அரசுடைமையாக்க அரசு உத்தேசித்துள்ளது எனத் தெரிவிக்கப்படுகிறது.
இந்தச் சூழ்நிலையில் அரசியற் கட்சிகளின் எதிர்ப்புகளை கருத்திற்கொண்டுள்ள அரசு, இதனை உடனடியாக சபையில் சமர்ப்பிப்பதா, இல்லையா என்பது குறித்து தீவிரமாகப் பரிசீலித்து வருகிறது.
சட்டத்துறை நிபுணர்களுடனும் இதுகுறித்து அரசு தீவிரமாக ஆலோசித்து வருகிறது எனத் தெரிவிக்கப்படுகிறது.
*******************

சுயாதீன விசாரணை?
இலங்கையில் இடம்பெற்ற இறுதிக்கட்டப் போரின் போது மேற்கொள்ளப்பட்ட போர்க் குற்றங்கள் மற்றும் மனிதவுரிமை மீறல்கள் குறித்து சுயாதீனமான விசாரணைகள் மேற் கொள்ளப்பட்டு குற்றவாளிகள் சட்டத்தின் முன்னிறுத்தப்பட வேண்டும் என இலங்கை அரசாங்கத்திடம் வலியுறுத்தியுள்ளதாக பிரித்தானியாவின் வெளிவிவகார மற்றும் பொதுநலவாய விவகார அமைச்சர் அலிஸ் ரெயர் பேர்ட் தெரிவித்துள்ளார்.
பிரித்தானியா நாடாளுமன்றத்தில் நாடாளுமன்ற உறுப்பினர் ஒருவர் கடந்த வாரம் எழுப்பிய கேள்வி தொடர்பில் பதிலளித்த போதே அவர் இவ்வாறு குறிப்பிட்டுள்ளார்.
இலங்கைக்கு இவ்வாண்டின் ஆரம்பத்தில் தான் மேற்கொண்ட விஜயத்தின் போது இலங்கைக்கு ஆயுதங்களை ஏற்றுமதி செய்வது தொடர்பான எந்த விவகாரங்கள் குறித்தும் பேச்சுவார்த்தை நடத்தப்படவில்லை என அவர் தெரிவித்துள்ளார்.
இவ் விஜயத்தின் போது இலங்கையின் பொருளாதார அபிவிருத்தி அமைச்சர் பசில் ராஜபக்ஷ‌ பாதுகாப்புச் செயலாளர் கோத்தபாய ராஜபக்ஷ‌­ மற்றும் வெளி விவகார அமைச்சர் ஜி.எல்.பீரிஸ் ஆகியோருடன் பேச்சுவார்த்தை நடத்தப்பட்டது.
இலங்கையின் மனிதவுரிமை விவகாரங்கள் குறித்து பிரித் தானியாவின் வெளிவிவகார மற்றும் பொதுநலவாய அமைச்சின் அலுவலகம் வெளியிட்ட மனிதவுரிமைகள் மற்றும் ஜனநாயகம் -2010 என்ற அறிக்கையில் தெளிவாக விபரிக்கப்பட்டுள்ளது.
இவ்வறிக்கையில் மனிதவுரிமை விவகாரங்கள் தொடர்பில் இலங்கை கவலைக்குரிய நாடாக பட்டியலிடப்பட்டுள்ளது.
இலங்கையின் மனிதவுரிமை விவகாரங்கள் குறித்த தமது கரிசனைகளை தொடர்ச்சியாக இலங்கை அரசிற்கு தெரிவித்து வருவதாகக் குறிப்பிட்ட அவர், இவ்விவகாரம் தொடர்பில் அண்மையில் இலங்கை வெளிவிவகார அமைச்சருடன் பேசியதாகவும் கூறியுள்ளார்.
அத்துடன், பாதிக்கப்படக்கூடிய மக்களின் மனிதவுரிமை நிலைமைகள் மேம்பாடு காணப்பட வேண்டும் என்பதை பிரித்தானிய அரசாங்கம் தொடர்ந்தும் வலியுறுத்தி வருவதாகவும் அவர் சுட்டிகாட்டியுள்ளார்.
இலங்கையில் இடம் பெற்ற இறுதிக் கட்டப் போரின்போது மேற்கொள்ளப்பட்ட போர்க்குற்றங்கள் மற்றும் மனிதவுரிமை குறித்து சுயாதீனமான விசாரணைகள் மேற் கொள்ளப்பட்டு, அதற்குப் பொறுப்பானவர்கள் நீதியின் முன்னிறுத்தப்பட வேண்டும் என்பதை இலங்கை அரசாங்கத்திடம் வலியுறுத்தி வருகிறோம் என அலிஸ்ரெயர் பேர்ட் மேலும் தெரிவித்துள்ளார்.
*******************

இல்லாததை எதிர்பார்ப்பது!
உலக நடைமுறையில் உள்ள ஊடக முறைமைக்கு எதிராக சிறிலங்கா அரசாங்கம் செயற்பட முனைவதாக, இணையத்தளங்களை தடைசெய்யும் நடவடிக்கைளுக்கு சுதந்திர ஊடக மையம் கண்டித்துள்ளது.
ஐக்கிய தேசியக் கட்சியின் உத்தியோகபூர்வ இணையத்தளங்கள் முடக்கப்பட்டுள்ளன.
அத்துடன் சிறிலங்கா தொடர்பான செய்தி இணையத்தளங்கள் பதிவு செய்துகொள்ள வேண்டும் என்று அண்மையில் ஊடக அமைச்சு அறிவித்திருந்தது.
இந் நிலையில் குறித்த தீர்மானம் தொடர்பில் அரசாங்கம் ஊடக அமைப்புக்களுடன் கலந்துரையாட வேண்டும் எனச் சுட்டிக்காட்டியுள்ள சுதந்திர ஊடக அமைப்பின் அமைப்பாளர் சுனில் ஜெயசேகர, உலகில் கடைப்பிடிக்கப்பட்டு வருகின்ற ஊடக நடைமுறைகளுக்கு எதிராக செயற்பட அரசாங்கம் முனைப்பு காட்டி வருவதாக கண்டித்துள்ளார்.
அதேவேளை முடக்கப்பட்ட எந்த இணையத்தளங்களையும் புரொக்சி முறையின் மூலம் பார்க்க முடியும் என தொழில் நுட்ப நிபுணர் கிஹான் மெண்டிஸ் சுட்டிக்காட்டியுள்ளார்.
சிறிலங்காவில் செய்தி இணையத்தளங்கள் தடை செய்யப்படுவதற்கு எதிர்ப்புத் தெரிவித்து அமெரிக்க தூதரகம் அண்மையில் அறிக்கை ஒன்றை வெளியிட்டிருந்தமை குறிப்பிடத்தக்கது.
*******************