Sunday, 26 June 2011

செய்திகள் 26/06


ஸ்ரீலங்காவின் சாதனைகள்?
சிறிலங்கா காவல்துறையினரால் செய்யப்பட்ட மிகவும் பாரதூரமான முறையிலான சித்திரவதைகள் பற்றிய தகவல்கள் வெளியாகியுள்ளன.
ஆசிய மனித உரிமைகள் ஆணைக்குழு முன்வைத்துள்ள அறிக்கையில் இந்த தகவல்கள் வெளியிடப்பட்டுள்ளன.
சிறிலங்காவில் காவல்துறையினர் செய்த 323 பாரதூரமான குற்றங்கள் இடம் பெற்றுள்ளன.
1998 ஆம் ஆண்டிருந்து இன்று வரையிலும் சிறிலங்கா காவல்துறையினரால் செய்யப்பட்ட 1500 மனித சித்திரவதைகள் தொடர்பான முறைப்பாடுகளின் அறிக்கையினை ஆசிய மனித உரிமைகள் ஆணைக்குழு முன்வைத்துள்ளது.
இவ்வாறு காவல்துறையினரால் கைது செய்யப்பட்டவர்களுள் பெரும்பான்மையானவர்கள் பொய் முறைப்பாடுகளின் அடிப்படையில் கைது செய்யப்பட்டவர்கள் என அவ்வறிக்கை சுட்டிக்காட்டுகிறது.
**************
யாருக்கு உரிமை?
தென்பகுதி மக்களுக்கும், இராணுவத்தினருக்குமே வடக்கிலும் கிழக்கிலும் அதிக உரிமை இருப்பதாக அமைச்சர் நிமால் சிறிபால டி சில்வா தெரிவித்துள்ளார்.
நேற்று நடைபெற்ற, அரசாங்கத்தின் நமக்காக நாம் என்ற வேலைத்திட்டத்தின் கீழ் நிர்மானிக்கப்பட்ட இராணுவத்தினரின் குடும்பங்களுக்கான வீடுகளினைக் கையளிக்கும் நிகழ்வில் கலந்து கொண்டு உரையாற்றும் போதே அமைச்சர் இவ்வாறு தெரிவித்தார்.
மகிந்த ராஜபக்ஸ தலைமையில் நடைபெற்ற இந்த நிகழ்வுவில் மொனராகலை, வெல்லவாய மற்றும் தேலுள்ள பகுதிகளில் நிர்மானிக்கப்பட்ட வீடுகளே இவ்வாறு வழங்கப்பட்டன.
பதுளை மற்றும் மொனராகலை மாவட்டங்களைச் சேர்ந்த 31 இராணுவக் குடும்பங்களுக்கு இந்த வீடுகள் வழங்கப்பட்டன.
அமைச்சர் அங்கு உரையாற்றுகையில், வடக்கு மற்றும் கிழக்கு மக்கள் தென் பகுதி மக்களை விட தற்போது அதிகமாக சமாதானத்தின் லாபத்தை அனுபவிக்கின்றனர் என்றும் இந்த நிலையில் தென்பகுதி மக்களுக்கும், இராணுவத்தினருக்குமே வடக்கிலும் கிழக்கிலும் அதிக உரிமை இருப்பதாக அவர் குறிப்பிட்டுள்ளார்.
இதேவேளை நாட்டின் எதிர்காலத்தை மக்களே தீர்மானிக்க வேண்டுமே தவிர வெளிநாடுகள் இல்லை எனவும் அவர் மேலும் குறிப்பிட்டுள்ளார்.
**************
ஜனநாயக விரோத அரசு?
எதிர்க்கட்சிகள் சார்பில் தம்மால் பாராளுமன்றத்துக்குச் சமர்ப்பிக்கப்பட்ட தகவல் அறியும் உரிமைப்பிரேரணையை அரசு தோற்கடித்ததன் மூலம் நாட்டில் ஜனநாயகத்துக்குப் பாரிய அச்சுறுத்தல் விடுக்கப்பட்டிருப்பதாக தெரிவித்த ஐக்கிய தேசியக்கட்சிப் பிரதித் தலைவர் கருஜயசூரிய, அரசாங்கத்தின் இந்தச் செயற்பாடானது பாராளுமன்றத்தின் ஸ்திரத்தன்மையைக் கேள்விக்குறியாக்கியுள்ளதாகவும் சுட்டிக்காட்டினார்.
ஐக்கிய தேசியக்கட்சித்தலைமையகமான ஸ்ரீகோத்தாவில் நேற்று சனிக்கிழமை இடம்பெற்ற சந்திப்பொன்றின் போதே கருஜயசூரிய இதனைத் தெரிவித்தார்.
ஒரு ஜனநாயக நாட்டில் தகவல் அறியும் உரிமையை மறுத்திருப்பது இலங்கையில் தான் முதலாவதாக இடம்பெற்றிருப்பதாகவும் அவர் சுட்டிக்காட்டினார்.
கடந்த 21ஆம் திகதி பாராளுமன்றத்தில் தம்மால் சமர்ப்பிக்கப்பட்ட பிரேரணை தோற்கடிக்கப்பட்டமை தொடர்பாக கரு ஜயசூரிய நேற்று கட்சித் தலைமையகத்தில் புத்தி ஜீவிகள் குழுவொன்றுடன் கலந்துரையாடினார்.
அண்மைக்கால அரசாங்கத்தின் செயற்பாடுகளில் நாட்டு மக்களுக்கு சந்தேகம் ஏற்பட்டுள்ளது.
உண்மையை மூடிமறைத்து மக்களை தவறான திசையில் இட்டுச் செல்ல முயற்சிகள் முன்னெடுக்கப்பட்டு வருகின்றது.
இதிலிருந்து மக்களைக் காப்பாற்றும் நோக்கிலேயே இந்தப்பிரேரணையைக் கொண்டுவர வேண்டிய நிலை ஏற்பட்டது எனவும் அவர் தெரிவித்துள்ளார்.
ஜனநாயக உரிமைக்குப் பாதுகாப்பு வழங்க வேண்டிய நாட்டில் அதனை மறுப்பது ஜனநாயகத்துக்கு விடுக்கப்படும் அச்சுறுத்தலாகும்.
இந்த நாட்டில் அரசியல்வாதிகளால் மேற்கொள்ளப்படும் ஊழல், மோசடி, முறைகேடுகள் தொடர்பாக பரவலாகவே பேசப்பட்டு வருகின்றது.
விசாரணைகளும் இடம் பெறுகின்றன. காலப்போக்கில் அவை மறக்கப்பட்டு விடுகின்றன. விசாரணைகளின் முடிவு என்னவென்பதை மக்களால் அறிந்து கொள்ள முடியவில்லை என்றும் அவர் சுட்டிக்காட்டினார்.
மக்களின் அடிப்படை உரிமையை மறுக்கும் முயற்சியானது குறுகியகாலத்தில் மோசமான பின் விளைவுகளை ஏற்படுத்தும் என்றும் தெரிவித்துள்ளார்.
**************
அமெரிக்க வழக்கை எதிர் கொள்ளும் மகிந்த!
சிறிலங்கா அதிபர் மகிந்த ராஜபக்சவுக்கு எதிராக அமெரிக்க நீதிமன்றம் ஒன்று அனுப்பியுள்ள அழைப்பாணைக்குப் பதில் அனுப்பப் போவதில்லை என்று கூறியிருந்த சிறிலங்கா அரசாங்கம், இப்போது இந்த வழக்கை எதிர்கொள்ள சட்டநிபுணர் ஒருவரை நியமிக்க முடிவு செய்துள்ளது.
இந்த வழக்கில் மகிந்த ராஜபக்சவின் நலன்களைக் கவனிக்க அமெரிக்காவைச் சேர்ந்த சட்டநிபுணர் ஒருவரை நியமிப்பதற்கான முயற்சிகளில் சிறிலங்கா அரசாங்கம் இறங்கியுள்ளது.
இதுதொடர்பாக சிறிலங்காவின் நீதி அமைச்சின் செயலர் சுகத கம்லத் தகவல் வெளியிடுகையில், சிறிலங்கா அதிபருக்கு அழைப்பாணை விடுத்துள்ள அமெரிக்க நீதிமன்றில் மகிந்த ராஜபக்சவின் நலன்களைக் கவனிக்க சட்டநிபுணர் ஒருவரை சட்டமா அதிபர் திணைக்களம் பணிக்கு அமர்த்தவுள்ளதாகத் தெரிவித்துள்ளார்.
சிறிலங்காப் படையினரால் படுகொலை செய்யப்பட்டவர்களின் உறவினர்களால் அமெரிக்க நீதிமன்றில் தாக்கல் செய்யப்பட்டுள்ள நட்டஈடு கோரும் மூன்று வழக்குகளிலேயே சிறிலங்கா அதிபருக்கு அழைப்பாணை அனுப்பப்பட்டிருந்தது.
முன்னதாக இந்த அழைப்பாணையை நிராகரித்து ஏற்க மறுத்த சிறிலங்கா அதிபர் மகிந்த ராஜபக்ச, தற்போது இந்த வழக்கை எதிர்கொள்வதற்கு முடிவு செய்துள்ளார்.
**************
இரட்டைக் குடியுரிம குற்றவாளிகளுக்கு ஆபத்து!
போர்க்குற்றச்சாட்டுகள் சுமத்தப்பட்டுள்ள இரட்டைக் குடியுரிமை பெற்ற சிறிலங்காவின் அரசியல் தலைவர்களும், அதிகாரிகளும் அனைத்துலக குற்றவியல் நீதிமன்றத்தில் விசாரிக்கப்படக் கூடும் என்று சட்டத்துக்குப் புறம்பான படுகொலைகள் மற்றும் சித்திரவதைகள் குறித்த ஐ.நாவின் சிறப்பு அறிக்கையாளர் கிறிஸ்ரொவ் ஹெய்ன்ஸ் எச்சரித்துள்ளார்.
இதுதொடர்பாக மேலும் கருத்து வெளியிட்டுள்ள கிறிஸ்ரொவ் ஹெய்ன்ஸ், கடந்த சில ஆண்டுகளாக உலகளாவிய அதிகாரக் கொள்கை, சில புதிய வழிகளில் பயன்படுத்தப்பட்டு வருகிறது எனத் தெரிவித்துள்ளார்.
இரட்டைக் குடியுரிமை பெற்றவர்கள் அனைத்துலக குற்றவியல் நீதிமன்றத்தின் அதிகார வரம்பின் கீழ் கொண்டு வரப்படலாம்.
சிறிலங்காவில் போரின் இறுதிக்கட்டத்தில் பொதுமக்கள் இலக்கு வைக்கப்பட்டது பற்றி அனைத்துலக குற்றவியல் நீதிமன்றில் விசாரணை செய்வதற்குப் போதுமான காரணமாக உள்ளது.
லிபியா மீதான பலமான அனைத்துலக தலையீடானது, சிறிலங்கா மீதான பாரிய அனைத்துலக தலையீடு பற்றிய கேள்வியை எழுப்பியுள்ளது என்றும் கூறியுள்ளார்.
**************
ஆபத்தான நிலையில் தமிழ்ப் பெண்கள்!
கொழும்பில் வேலைவாய்ப்புப் பெற்றுத் தருவதாகக் கூறி வடக்கில் இருந்து அழைத்துச் செல்லப்பட்ட இளவயதுத் தமிழ்ப்பெண்கள் பலர் கட்டாயமாக விபசாரத்தில் ஈடுபடுத்தப்பட்டது கண்டுபிடிக்கப்பட்டுள்ளது.
தேசிய சிறுவர் பாதுகாப்பு அதிகாரசபை அதிகாரிகள் நடத்திய சோதனையின் போதே இந்த அதிர்ச்சியான தகவல் வெளியாகியுள்ளது.
கொழும்பு தேசிய மருத்துவமனையில் கர்ப்பத்தடை சத்திரசிகிசைக்காக அனுமதிக்கப்பட்டிருந்த 16 வயதான சிறுமி ஒருவர் தப்பி ஓடியதை அடுத்தே இந்தவிவகாரம் வெளிச்சத்துக்கு வந்துள்ளது.
மருத்துவமனையில் இருந்து தப்பிய அந்தச் சிறுமி காவல்துறையினரிடம் சென்று தனது நிலையைக் கூறியுள்ளார்.
சிறிலங்கா காவல்துறையினர் அந்தச் சிறுமியை தம்மிடம் ஒப்படைத்ததாக சிறுவர் பாதுகாப்பு அதிகாரசபையின் தலைவர் அனோமா திசநாயக்க தெரிவித்தார்.
தப்பி ஓடிய அந்தச் சிறுமியிடம் இருந்து பெற்றுக் கொள்ளப்பட்ட தகவலின் அடிப்படையில் சிறிலங்கா காவல்துறையினர் மருதானையில் விபசார மையம் ஒன்றைச் சுற்றிவளைத்தனர்.
அங்கு விபசாரத்தில் ஈடுபடுத்தப்பட்ட 16 வயதுக்கும் 24 வயதுக்கும் இடைப்பட்ட 8 பெண்கள் கண்டுபிடிக்கப்பட்டதாகவும் அனோமா திசநாயக்க தெரிவித்தார்.
இவ்வாறு கண்டுபிடிக்கப்பட்ட 9 பெண்களில் 6 பேர் வடபகுதியையும், ஒருவர் கிழக்குப் பகுதியையும் சேர்ந்தவர்களாவர்.
முற்றுகையிடப்பட்ட அந்த விபரசார மையம், விருந்தினர் விடுதி போன்று சந்தேகத்துக்கு இடமின்றி செயற்பட்டு வந்துள்ளது.
தப்பி ஓடிய சிறுமி கொடுத்த தகவலை அடுத்து அங்கு தேடுதல் நடத்தப்பட்ட போது, அலுமாரிகளுக்குள் அந்தப் பெண்கள் எட்டுப் பேரும் மறைத்து வைக்கப்பட்டிருந்தனர்.
அங்கு கண்டுபிடிக்கப்பட்ட எட்டுப் பெண்களில் இருவர் வயது குறைந்த சிறுமிகளாவர்.
இவர்கள் அந்த அறைக்குள் நெருக்கமாக அடைத்து வைக்கப்பட்டிருந்தனர்.
அந்த அறையில் இருந்து 1500 ஆணுறைகளும், காவல்துறையினரால் கைப்பற்றப்பட்டுள்ளன.
மருத்துவமனையில் இருந்து தப்பிச்சென்ற சிறுமி தாம் முல்லைத்தீவில் இருந்து தரகர் ஒருவர் மூலம் கொழும்புக்கு கொண்டு வரப்பட்டதாக கூறியுள்ளார்.
ஒரு முகாமையாளரின் கீழ் தாம் வௌ;வேறு இடங்களில் விபசாரங்களில் ஈபடுத்தப்பட்டதாகவும், அந்தச் சிறுமி கூறியுள்ளார்.
இதற்காக 500 ரூபா தொடக்கம் 1000 ரூபாவரை அந்த முகாமையாளர் அறவிட்டு வந்துள்ளார்.
மற்றொரு 18 வயது இளம்பெண் போரின் இறுதிக்கட்டத்தில் இடம்பெயர்ந்து வவுனியாவில் உள்ள இடம்பெயர்ந்தோர் முகாம் ஒன்றில் வசித்து வந்தவராவார்.
இவருக்கு கொழும்பில் வேலைவாய்ப்புப் பெற்றுத் தருவதாக கூறி தரகர் ஒருவர் அழைத்து வந்து விபசாரத்தில் ஈடுபடுத்தியுள்ளார்.
கொழும்பு தேசிய மருத்துவமனையில் பணியாற்றும் மருத்துவ மாது ஒருவரின் கீழ் இவர்களின் சுகாதாரத் தேவைகள் கவனிக்கப்பட்டுள்ளதும் தெரியவந்துள்ளது.
அவர் மருத்துவர் ஒருவரின் உதவியையும் பெற்றுக் கொடுத்துள்ளார்.
இதையடுத்து விபசார மையத்தை நடத்திய முகாமையாளரும் மேலும் இருவரும் கைது செய்யப்பட்டு விளக்கமறியலில் வைக்கப்பட்டுள்ளனர்.
வேலைவாய்ப்பு பெற்றுத் தருவதாக கூறி இளம்பெண்களை வெளியாருடன் அனுப்புவதை தவிர்க்குமாறு வடக்கு கிழக்குப் பகுதி பெற்றோரிடம் அனோமா திசநாயக்க வேண்டுகோள் விடுத்துள்ளார்.
அவ்வாறு அனுப்பும் பெற்றோர் மீது தாம் நடவடிக்கை எடுக்க நேரிடும் என்றும் அவர் எச்சரித்துள்ளார்.
**************
ஸ்ரீலங்காவுக்கு பொருளாதார தடை?
ஐ.நா. மனித உரிமைக்கவுன்சிலின் அடுத்த அமர்வில் இலங்கைக்கு எதிரான பொருளாதாரத் தடைகள் விதிக்கப்படலாம் என்று தெரிய வருகின்றது.
அண்மையில் நிறைவுற்ற ஐ.நா. மனித உரிமைக் கவுன்சிலில் இலங்கைக்கு எதிரான பொருளாதாரத் தடையை பிரேரிப்பதற்கு பல நாடுகள் தயாராக இருந்த போதும், பல்வேறு காரணங்களால் அதனை நிறைவேற்றிக் கொள்ள முடியாது போயுள்ளது.
அதன் காரணமாக எதிர்வரும் செப்டம்பரில் நடைபெறவுள்ள அடுத்த மனித உரிமை அமர்வில் குறித்த பிரேரணையை முன்வைப்பதற்கான முன்னேற்பாடுகள் தற்போது தீவிரமாக முன்னெடுக்கப்பட்டுக் கொண்டிருக்கின்றன.
அதற்கு ஆதரவளிக்கும் வகையில் எதிர்வரும் செப்டம்பரில் மனித உரிமைக் கவுன்சிலின் ஆரம்பமானவுடன் சனல்4 தொலைக்காட்சி இலங்கை தொடர்பான தனது "இலங்கையின் படுகொலைக்களம்" காணொளியை மீண்டுமொரு தடவை ஒளிபரப்பத் தீர்மானித்துள்ளது.
இதற்கிடையே இலங்கையில் நடைபெற்ற மனித உரிமை மீறல்கள் மற்றும் போர்க்குற்றங்கள் குறித்த சர்வதேச விசாரணையொன்றுக்கான பிரேரணையை செப்டம்பரில் நடைபெறும் மனித உரிமைக் கவுன்சில் அமர்வின் போது அமெரிக்கா முன்மொழியவுள்ளதாகவும் தகவல்கள் வெளியாகியுள்ளன.
**************

Saturday, 25 June 2011

செய்திகள் 25/06


இனவெறி அரசின் துடுப்பாட்ட அணியை எதிர்ப்போம்!

ஆளும் மஹிந்த அரசாங்கத்தின் மாத்தறைக்கான நாடாளுமன்ற உறுப்பினராகவுள்ள ஸ்ரீலங்கா கிரிக்கெட் வீரர் சனத் ஜெயசூரிய, இன்று சனிக்கிழமை பிரித்தானியா பிரிஸ்ரலில் நடக்கும் ஆட்டத்தில் ஸ்ரீலங்கா அணியில் இணைந்து கொள்கிறார்.
கொடூரமான ராஜபக்ஷ ஆட்சியிலிருந்து இந்த புகழ்மிக்க பிரதிநிதியை மீள அழைத்துள்ளது பற்றி கார்டியன் பத்திரிகையாளர் கடுமையாக விமர்சித்துள்ளார்.
சனல் 4 நடத்திய ஒரு கருத்துக்கணிப்பின்படி, இங்கிலாந்தானது இலங்கையின் கிரிக்கெட் சுற்றுலா குறித்து மீளக்கருத வேண்டும் என்று 87 வீதமான பிரிட்டன் மக்கள் கேட்டுள்ளனர்.
மஹிந்த அரசு கொலை செய்துள்ள 40ஆயிரம் தமிழர்களுக்காகவும் அவரை விசாரணை செய்ய வேண்டும் என்று சர்வதேச மன்னிப்பு சபை, மனித உரிமைகள் கண்காணிப்பகம் மற்றும் ஐ.நா நிபுணர் குழு ஆகியவை தெரிவித்துள்ளன.
ஆனால் அண்மையில் பி.பி.சி சிங்கள சேவையில் பேசிய ஜெயசூரிய, ஸ்ரீலங்காவானது மிக மோசமான பயங்கரவாதக் குழுவை அழித்துள்ளது என்பதை உலகம் உணர்ந்து கொள்ள வேண்டும் என்று குறிப்பிட்டுள்ளதோடு, அரசின் இச்செயலால் தாம் மகிழ்ச்சி அடைவதாகவும் கூறியுள்ளார்.
இப்போது ஜெயசூரிய ஸ்ரீலங்கா அணியில் இணைக்கப்பட்டுள்ளதும் மஹிந்தவின் உத்தரவின் பேரில்தான் பிரித்தானியத் தமிழர்களை இழிவுபடுத்தவே இவ்வாறு அவர் செய்துள்ளார்.
ஆகவே, பிரித்தானியப் பிரஜைகளாகவும் தமிழர்களாகவும் நாங்கள் எங்களுடைய கோபத்தைக் காட்ட வேண்டும் என பிரித்தானிய இளையோர் அமைப்பு அழைப்பு விடுத்துள்ளது.
கடந்த டிசம்பர் மாதத்தில் மஹிந்தவுக்கு காட்டிய ஒரு எதிர்ப்புப்போல இப்போதும் நாங்கள் தக்க பதிலடி கொடுக்க வேண்டும் எனவும் அறைகூவல் விடுத்துள்ளனர்.
ஆகவே பிரித்தானியத் தமிழர்கள் இந்த எதிர்ப்புப் போராட்டத்தில் கலந்து கொள்ள வேண்டும் என்று பிரித்தானிய தமிழ் இளைஞர் அமைப்பு அழைப்பு விடுத்துள்ளது
***************
ஸ்ரீலங்காவுக்கு எதிராக வழக்கு?
அனைத்துலக மன்னிப்புச் சபை இலங்கைக்கு எதிராக வழக்குத் தொடரத் திட்டமிட்டுள்ளதாக சிங்கள ஊடகமொன்று செய்தி வெளியிட்டுள்ளது.
செனல்4 ஊடகத்தின் முயற்சிகளை மேஜர் ஜெனரல் சவேந்திர சில்வா முறியடித்ததனால் ஆத்திரமடைந்துள்ள சர்வதேச மன்னிப்புச் சபை இவ்வாறு இலங்கைக்கு எதிராக வழக்குத் தொடர திட்டமிட்டுள்ளதாகத் தெரிவிக்கப்படுகிறது.
இலங்கையில் போர்க் குற்றம் இடம்பெற்றதாகத் தெரிவித்து வழக்குத் தொடரப்பட உள்ளதாகக் குறிப்பிடப்படுகிறது.
கடந்த 23ம் திகதி கனடாவில் நடைபெற்ற கூட்டமொன்றின் போது அனைத்துலக மன்னிப்புச் சபை இலங்கைக்கு எதிராக வழக்குத் தொடர்வது குறித்த திட்டத்தை வெளியிட்டுள்ளது.
பிரிட்டன் மற்றும் சுவிட்சர்லாந்தில் உள்ள சிரேஸ்ட சட்ட நிபுணர்களின் ஒத்துழைப்புடன் இலங்கைக்கு எதிராக வழக்குத் தொடரப்பட உள்ளதாகக் குறிப்பிடப்படுகிறது.
செனல்4 ஊடகத்தின் பிரச்சார நடவடிக்கைகளுக்கு ஜே.டி.எஸ் என்னும் ஊடக அமைப்பு ஒத்துழைப்பு வழங்கியுள்ளதாகவும் குற்றம் சுமத்தப்பட்டுள்ளது.
***************

பேச்சின் இரகசியம்?
அரசாங்கத்துக்கும் தமிழ்த் தேசிய கூட்டமைப்புக்குமிடையில் வியாழக்கிழமை நடைபெற்ற பேச்சுவார்த்தையின் இறுதியில் கூட்டறிக்கை வெளியிட தீர்மானித்தமையினால் அது தொடர்பில் தனிப்பட்ட ரீதியில் கருத்து தெரிவிப்பது முறையல்ல என்று வெளிவிவகார அமைச்சர் ஜீ.எல். பீரிஸ் தெவித்துள்ளார்.
அமைச்சில் நேற்று நடைபெற்ற செய்தியாளர் மாநாடு ஒன்றில் ஊடகவியலாளர் ஒருவர் எழுப்பிய கேள்விக்கு பதிலளிக்கையிலேயே அமைச்சர் இதனைக் குறிப்பிட்டார்.
அரசாங்கத்துக்கும் தமிழ்த் தேசிய கூட்டமைப்புக்கும் இடையில் வியாழக்கிழமை நடைபெற்ற பேச்சுவார்த்தையின் இறுதியில் கூட்டறிக்கை வெளியிட தீர்மானிக்கப்பட்டது.
இதேவேளை இலங்கை மீனவர்கள் இந்தியாவிலும் இந்திய மீனவர்கள் இலங்கையிலும் கைது செய்யப்படுவது அவ்வப்போது இடம்பெற்றுவருகின்ற சம்பவங்களாகும்.
எனவே இவ்வாறு கைது செய்யப்படும் போது அதற்கென ஒரு முறைமை பின்பற்றப்பட்டு நடவடிக்கைகள் எடுக்கப்படும்.
எவ்வாறெனினும் வன்முறை இதற்கு தீர்வல்ல என்பதனை அனைவரும் ஏற்றுக்கொண்டுள்ளனர்.
இது தொடர்பில் ஆராய இரண்டு நாடுகளுக்கும் இடையில் கூட்டுக்குழு அமைக்கப்பட்டுள்ளது என்றும் தெரிவித்துள்ளார்.
***************

வடக்கில் ஜனநாயகம் எங்கே?
தமிழ்த் தேசியக் கூட்டமைப்பின் ஜனநாயக ரீதியிலான மக்கள் சந்திப்பில் இராணுவம் உட்புகுந்து தாக்குதல்களை மேற்கொண்டுள்ளதை வன்மையாகக் கண்டிப்பதாக புதிய இடதுசாரி முன்னணி தெரிவித்துள்ளது.
ஜனநாயகமோ சிவில் நிர்வாகமோ வடக்கு மக்களுக்கு இன்று இல்லாமல் போயுள்ளது.
தமிழர்களை அடிமைகளாக்கி சமாதானத்தை ஒருபோதும் வென்றெடுக்க முடியாது என புதிய இடதுசாரி முன்னணியின் தலைவர் விக்கிரமபாகு கருணாரட்ன தெரிவித்தார்.
இலங்கை அரசாங்கத்துக்கு எதிராக உலக நாடுகள் எதிர்ப்புக்களை தெரிவிக்க ஆரம்பித்துள்ளது.
இதற்கு வலுச்சேர்க்கும் வகையிலேயே அரசின் நடவடிக்கைகள் அமைந்துள்ளன என்றும் தெரிவித்துள்ளார்.
***************
கண்ணாமூச்சி விளையாட தயார்!
போர்க் காலப்பகுதியில் காணாமல் போனவர்கள் தொடர்பாக மனித உரிமைகள் ஆணைக்குழுவினால் விசாரணைகள் ஆரம்பிக்கப்பட்டுள்ளன என்று ஆணைக்குழுவின் செயலாளர் நிமல் புஞ்சி ஹேவா தெரிவித்துள்ளார்.
இந்த விடயம் தொடர்பிலான விசாரணைகளுக்கான தனியான குழுவொன்று நியமிக்கப்பட்டுள்ளதாகவும் இக்குழு வடக்கு-கிழக்கு பிரதேசங்களில் காணாமல் போனவர்கள் குறித்து முதலில் விசாரணைகள் மேற்கொள்ளும் என்றும் கூறினார்.
ஏற்கெனவே நடத்தப்பட்ட விசாரணைகளுக்கு என்ன நடந்ததென்று தெரியாத நிலையில், புதிய விசாரணை எனக் கூறி காலத்தை இழுத்தடித்து சர்வதேச சமூகத்தை ஏமாற்ற மேற்கொள்ளப்படும் ஒரு முயற்சி என தமிழர் தரப்பில் தெரிவிக்கப்பட்டுள்ளது.
***************
தவறிழைக்கும் இந்தியா!
போருக்கு பிந்தைய நிவாரணப் பணிகளை முடுக்கி விடும்படி, இலங்கை அரசை, இந்தியா வலியுறுத்த வேண்டும் என சர்வதேச நிறுவனம் அழைப்பு விடுத்துள்ளது.
இதன்மூலம், இலங்கையில் மீண்டும் ஒரு மோதல் ஏற்படுவதை தவிர்க்க முடியும் என, சர்வதேச நெருக்கடி கால குழு அறிவித்துள்ளது.
சர்வதேச நெருக்கடி கால குழு வெளியிட்டுள்ள அறிக்கையில் போர் நடந்த பகுதிகளில் நிவாரணப் பணிகள் முழு வீச்சில் மேற்கொள்ளப்படவேண்டும்.
இது தொடர்பாக, இலங்கை அரசை, இந்தியா வலியுறுத்த வேண்டும் எனக் கோரியுள்ளது.
இவ்வாறு வலியுறுத்துவதன் மூலம், இலங்கையில் மீண்டும் ஒரு பெரும் மோதல் ஏற்படுவதை தவிர்க்க முடியும்.
இலங்கையில் நடந்த இறுதிக் கட்ட போரில், ஏராளமான அப்பாவி மக்கள் கொல்லப்பட்டது தொடர்பாக, சர்வதேச விசாரணை நடக்கிறது.
இந்த விவகாரத்தில் இந்தியா ஆர்வம் காட்டவில்லை.
மேலும், நிர்வாக ரீதியிலான விஷயத்திலும், ராஜபக்ஷே அரசை வலியுறுத்துவதற்கும், இந்தியா தயக்கம் காட்டுகிறது.
இலங்கை விவகாரத்தில், இந்தியா தற்போது பின்பற்றும் கொள்கைகள் பலன் அளிக்காது எனவும் அந்த அமைப்பு சுட்டிக்காட்டியுள்ளது.
இந்த விவகாரத்தில், அமெரிக்கா, ஜப்பான் போன்ற நாடுகளுடனும், ஐரோப்பிய யூனியனுடனும், இந்தியா ஒருங்கிணைந்து செயல்பட வேண்டும் என்றும் அந்த அறிக்கையில் கூறப்பட்டுள்ளது.
***************
திடீர் ஞானம் பெறும் ஜே.வி.பி?
மேற்குலக நாடுகள் தமது வல்லரசு கொள்கையை இலங்கை போன்ற சிறிய நாடுகள் மீது திணித்து அவற்றை அடிமைப்படுத்திக் கொள்ள முனைவதாக ஜே வி பியின் செயலாளர் டில்வின் சில்வா குற்றம் சுமத்தியுள்ளார்.
ஜே வி பி கொழும்பில் நேற்று ஏற்பாடு செய்யதிருந்த நிகழ்வொன்றில் கலந்து கொண்டு உரையாற்றும் போது அவர் இவ்வாறு குறிப்பிட்டார்.
வல்லரசு நாடுகள் சிறிய நாடுகளை தமது ஆதிக்கத்தின் கீழேயே வைத்துக்கொள்ள முனைவதாகவும் அவர் குறிப்பிட்டார்.
இந்த நடைமுறையையே இலங்கை விடயத்திலும் தற்போது கடைப்பிடித்து வருவதாகவும் ஜே வி யின்செயலாளர் தெரிவித்தார்.
எவ்வாறாயினும் இலங்கைக்கு எதிரான வெளிநாட்டு சக்திகளின் அதிகாரத்திற்கு தமது கட்சி ஒருபோதும் இடமளிக்காது எனவும் டில்வின் சில்வா குறிப்பிட்டார்.
***************


Friday, 24 June 2011

செய்திகள் 24/06


தமிழருக்கு என தனியான கணக்கெடுப்பு!
இராணுவ பதிவு நடைமுறைக்குப் பதிலாக யாழ்ப்பாணத்தில் தனது நேரடிக் கண்காணிப்பில் தனியான சனத்தொகை விபரம் திரட்டல் நடவடிக்கையொன்றை மேற்கொள்ள பாதுகாப்பு அமைச்சு தீர்மானித்துள்ளது.
யாழ். குடாநாட்டிலும் வன்னியிலும் இராணுவம் பதிவுகளை மேற்கொள்வதற்கு அரசியல் கட்சிகளிடம் இருந்தும் மக்களிடம் இருந்தும் கடுமையான எதிர்ப்புக் கிளம்பியதை அடுத்தே பாதுகாப்பு அமைச்சின் மூலம் தனியான குடிசன மதிப்பீடுகளை மேற்கொள்வதற்கான நடவடிக்கைகள் மேற்கொள்ளப்பட்டுள்ளன.
சனத்தொகை மதிப்பீட்டுப் புள்ளிவிவரத் திணைக்களம் மேற்கொள்ள உள்ள சனத்தொகைக் கணக்கெடுப்புப் பணிகளுக்கு மேலதிகமாக வடக்கில் மட்டும் இந்த விசேட கணக்கெடுப்பு நடத்தப்பட உள்ளது.
இதற்கென தெற்கில் இருந்து சிறப்பு அதிகாரிகள் குழுக்களும் வருகைதரவுள்ளன.
புள்ளிவிவரத் திணைக்களத்தினால் ஏற்கனவே மேற்கொள்ளப்பட்ட முதல்கட்டப் பணிகளின் அடிப்படையில் பாதுகாப்பு அமைச்சின் சனத்தொகை மதிப்பீட்டுப் பணிகள் இடம்பெறும் என அதிகாரி ஒருவர் தெரிவித்தார்.
பாதுகாப்பு அமைச்சின் குடிசன மதிப்பீட்டில் வீட்டில் உள்ளவர்கள், வெளியில் உள்ளவர்கள், காணாமல்போனவர்கள், அண்மையில் மரணம் அடைந்தவர்கள், வீட்டில் தங்கியிருக்கும் வெளியாட்கள் போன்ற விவரங்கள் சேகரிக்கப்பட உள்ளன.
வடக்கில் மேற்கொள்ளப்பட்ட இராணுவப் பதிவுகள் கூட்டமைப்பின் நீதிமன்ற நடவடிக்கைகளை அடுத்துக் கைவிடப்படுவதாக அறிவிக்கப்பட்ட நிலையில் பாதுகாப்பு அமைச்சின் தனியான கணக்கெடுப்புக்கு ஏற்பாடு செய்யப்பட்டுள்ளது.
********************

இனப்படுகொலையை மூடிமறைப்பது எப்படி? ஆலோசிக்கும் மகிந்த
அனைத்துலக ரீதியாக எழுந்துள்ள போர்க்குற்றச்சாட்டுகளைத் தோற்கடிப்பது குறித்து, சிறிலங்கா அதிபர் மகிந்த ராஜபக்ச நியுயோர்க்கிலுள்ள ஐ.நாவுக்கான சிறிலங்காவின் பிரதி நிரந்தர வதிவிடப் பிரதிநிதி மேஜர் ஜெனரல் சவீந்திர சில்வாவுடன் தொலைபேசி மூலம் கலந்துரையாடியுள்ளார்.
சனல் 4 தொலைக்காட்சி தயாரித்த ஆவணப்படத்தை முன்னிறுத்தி சிறிலங்காவுக்கு எதிரான போர்க்குற்றச்சாட்டுகள் குறித்த பரப்புரைகள் நியுயோர்க்கில் தீவிரமடைந்துள்ள நிலையிலேயே மேஜர் ஜெனரல் சவீந்திர சில்வாவுடன் சிறிலங்கா அதிபர் மகிந்த ராஜபக்ச கலந்துரையாடியுள்ளார்.
நேற்று இடம்பெற்ற இந்த தொலைபேசி மூலமான உரையாடலின் போது, சனல்-4 ஆவணப்படத்தைப் பயன்படுத்தி மேற்கொள்ளப்படும் சிறிலங்காவுக்கு எதிரான பரப்புரைகளை முறியடிக்க எல்லாவிதமான உத்திகளையும் கையாளுமாறு சிறிலங்கா அதிபர் பணித்துள்ளார்.
அத்துடன் சனல்-4 ஆவணப்படத்தின் மூலம் சிறிலங்காவின் பெயரைக் கெடுக்க அனைத்துலக நிறுவனங்கள் மேற்கொள்ளும் முயற்சிகளை முறியடிப்பதில் திறமையாகச் செயற்படுவதாக மேஜர் ஜெனரல் சவீந்திர சில்வாவுக்கு சிலங்கா அதிபர் பாராட்டும் தெரிவித்துள்ளார்.
ஐ.நா வளாகத்தில் தேவாலய நிலையத்தில் இந்த ஆவணப்படம் திரையிடப்பட்டபோது அங்கு அழையா விருந்தாளியாக நுழைந்த மேஜர் ஜெனரல் சவீந்திர சில்வா அதைக் குழப்பும் வகையில் தன்னிலை விளக்கம் கொடுத்திருந்தார் என்பது குறிப்பிடத்தக்கது.
இதற்காகவே, சிறிலங்கா அதிபர் மகிந்த ராஜபக்சவினால் மேஜர் ஜெனரல் சவீந்திர சில்வா பாராட்டப்பட்டுள்ளார்.
சனல்-4 குற்றச்சாட்டுகள் பொய்யானது- போலியானது என்று சவீந்திர சில்வா நிருபிப்பார் என்றும் சிறிலங்கா அதிபர் இந்த தொலைபேசி உரையாடலின் போது நம்பிக்கை வெளியிட்டதாகவும் சிறிலங்கா அரசாங்க வட்டாரங்கள் தகவல் வெளியிட்டுள்ளன.
********************
தீர்வுக்கு தயாரா? ஐதேக
சகலரும் ஏற்றுக்கொள்ளத்தக்கதான அரசியல் தீர்வொன்றை அரசாங்கம் முன்வைக்கும் பட்சத்தில் ஐ.தே.க. அதற்கு ஆதரவு வழங்கத் தயாராக இருப்பதாக அதன் உபதலைவரான லக்ஷ்மண் கிரியெல்ல தெரிவித்துள்ளார்.
மேலும் ஐக்கிய தேசியக்கட்சியானது ஆரம்பம் தொட்டு இனப்பிரச்சினை விடயத்தில் அரசியல் தீர்வுக்கான நடைமுறைகளை ஆதரித்து வந்திருப்பதாகவும் அவர் தொடர்ந்தும் சுட்டிக்காட்டியுள்ளார்.
மஹிந்த ராஜபக்ஷ தலைமையிலான அரசாங்கம் பதவிக்கு வந்த பின் நியமிக்கப்பட்ட நிபுணர்குழு மற்றும் அதன் பின் நியமிக்கப்பட்ட சர்வகட்சிக் குழு என்பன மூலம் அரசியல் தீர்வு குறித்து முன்வைக்கப்பட்டுள்ள பரிந்துரைகளை தமிழ்த்தரப்பினரும் ஏற்றுக் கொண்டுள்ள நிலையில், அதனை அடிப்படையாக வைத்துக் கொண்டு அரசியல் தீர்வுக்கான முயற்சிகளை முன்னெடுப்பது பொருத்தமானதாக இருக்கும் என்றும் அவர் சுட்டிக்காட்டியுள்ளார்.
எனவே அரசியல் தீர்வுக்கான செயற்பாடுகளை விரைவாக முன்னெடுப்பதுடன், நாடாளுமன்றக் குழு போன்ற காலம் தாழ்த்தும் நடவடிக்கைகளை அரசாங்கம் கைவிட வேண்டும் என்றும் அவர் மேலும் வேண்டுகோள் விடுத்துள்ளார்.
********************
நம்பிக்கையில்லாத பேச்சு!
தமிழ்த் தேசியக் கூட்டமைப்புக்கும் அரசாங்கத்துக்குமிடையில் நேற்று இடம்பெற்ற பேச்சுவார்த்தைகள் கூட நம்பிக்கை ஊட்டக் கூடியதான முன்னேற்றத்துக்குரிய சமிக்ஞைகளை வெளிப்படுத்தவில்லை எனத் தமிழ்த் தேசியக் கூட்டமைப்பின் நாடாளுமன்ற உறுப்பினர் சுரேஷ் பிரேமச்சந்திரன் தெரிவித்தார்.
அரசுடனான நேற்றைய பேச்சுவார்த்தை தொடர்பில் அவர் மேலும் கருத்துத் தெரிவிக்கையில், 13 ஆவது திருத்தச் சட்டமூலத்தின் ஊடான மாகாண சபை முறையில் குறித்துரைக்கப்படும் ஒத்தியங்கல் பட்டியல் தொடர்பில் தாம் சுட்டிக் காட்டி இந்த ஒத்தியங்கல் பட்டியலிலுள்ள பல விடயங்களை மாகாண சபைக்கு வழங்க வேண்டுமென்றும் தெரிவித்ததாக குறிப்பிட்டார்.
ஆனால் அரசு தரப்பினர் இதனை முழுமையாக ஏற்க மறுத்து விட்டனர் என்றும் ஒத்தியங்கல் பட்டியலிலுள்ள சில விடயங்களை மட்டும் மாகாண சபைக்கு வழங்குவது குறித்து கவனம் செலுத்த முடியுமென்ற கருத்தையே அவர்கள் அங்கு வெளியிட்டனர் என்றுநும் தெரிவித்துள்ளார்.
அவர்கள் இவ்வாறு தெரிவித்தமை தம்மைப் பொறுத்த வரையில் திருப்பதியளிக்கக் கூடியதாக இருக்கவில்லை எனவும் குறிப்பிட்டார்.
"ஒத்தியங்கல் பட்டியல்" தொடர்பில் ஒரு வாரத்துக்குள் ஓர் ஆவணத்தை தம்மிடம் தருவதாகவும் அவர்களால் தமக்கு உறுதியளிக்கப்பட்டது என்றும் அந்த ஆவணம் தொடர்பில் மீண்டும் 26 ஆம் திகதி இருதரப்பும் கூடும் போது தமது கருத்துகளைத் தெரிவிக்கவுள்ளதாகவும் அவர் தெரிவித்தார்.
********************
நடக்காத பேச்சு எதற்கு? துரைரட்ணசிங்கம்.
அரசாங்கத்துக்கும் தமிழ்த் தேசியக் கூட்டமைப்புக்குமிடையிலான பேச்சில் உடன்பட்ட விடயங்கள் எவற்றையும் அரசாங்கம் மேற்கொள்ளாததால் திருமலை மாவட்ட மக்கள் இந்தப் பேச்சுக்களில் அவநம்பிக்கை கொண்டுள்ளதாக தமிழ்த் தேசியக் கூட்டமைப்பின் முன்னாள் பாராளுமன்ற உறுப்பினர் கே.துரைரட்ணசிங்கம் தெரிவித்தார்.
இது குறித்து அவர் மேலும் தெரிவிக்கையில்; தமிழ்த் தேசியக் கூட்டமைப்புக்கும் அரசாங்கத்துக்குமிடையில் 8க்கும் மேற்பட்ட தடவைகள் பேச்சுகள் இடம்பெற்றுள்ளன.
எனினும் பேச்சில் உடன்பட்ட விடயங்கள் எவற்றையும் அரசாங்கம் நிறைவேற்றவில்லை.
தனக்கு தெரிந்தளவில் குறிப்பாக திருகோணமலை மாவட்டத்தில் எவையும் மேற்கொள்ளப்படவில்லை.
உதாரணமாக, உயர்பாதுகாப்பு வலயமெனக் கூறி வெளியேற்றப்பட்ட சம்பூர் மக்கள் மீள்குடியேற்றப்படவில்லை.
இதனால் இம்மக்கள் இன்றும் இடம்பெயர்ந்து முகாம்களில் அகதி வாழ்வை வாழ்கின்றனர்.
இங்கு 800 ஏக்கரில் 350 ஏக்கரில் மக்களை முதல் கட்டமாக மீளக்குடியேற்றினால் அங்குள்ள வளமான காணிகளில் தமது வாழ்க்கையை மக்கள் கொண்டு செல்வதற்கு உதவியாக அமையும்.
அதுமட்டுமன்றி நாட்டின் பொருளாதாரத்துக்கும் அம்மக்களால் பங்களிப்புச் செய்ய முடியும்.
இம்மக்கள் மீள்குடியேற்றப்படாது கஷ்டத்தின் மத்தியில் வாழ்கின்றனர்.
அதேபோல தம்பலகமம், புதுக்குடியிருப்பு, பாரதிபுரம் பகுதியில் தமிழ் மக்கள் காணிகளிலும் பொது இடங்களிலும் விரஜயபுர வீட்டுத் திட்டம் முன்னெடுக்கப்படுகின்றது.
முதல்கட்ட 30 வீட்டுத் திட்டத்தில் தமிழ் சிங்கள முஸ்லிம் மக்களுக்கு முறையே தலா பத்து வீடுகள் வழங்கப்பட்டன.
இரண்டாவது கட்டத்தில் கட்டப்படவுள்ள 30 வீடுகள் கொண்ட தொகுதியில் இரு வீடுகள் தமிழருக்கும் 4 வீடுகள் முஸ்லிம்களுக்கும் 24 வீடுகள் சிங்கள மக்களுக்கும் அளிக்கப்படவுள்ளதாகத் தெரியவருகின்றது.
முதலில் வீட்டுத் திட்டமென ஆரம்பித்து பின் சிங்களவர்களை குடியேற்றும் நடவடிக்கை இடம்பெறுகின்றது.
இம்மாவட்டத்தைச் சேர்ந்த மக்கள் வீடின்றியிருக்க வெளியிடங்களைச் சேர்ந்தவர்களுக்கு இவை வழங்கப்படுகின்றமை எந்தளவு நியாயமானது? எனவும் அவர் கேள்வி எழுப்பினார்.
இதனால் கூட்டமைப்புக்கும் அரசாங்கத்துக்குமிடையிலான பேச்சில், குறிப்பாக தமது மாவட்ட மக்களுக்கு அவநம்பிக்கை ஏற்பட்டுள்ளது என்றும் தெரிவித்தார்.
********************
இனப்படுகொலை அணியின் துடுப்பாட்டத்தை புறக்கணிக்க அழைப்பு
சிறிலங்காவிற்கும் இங்கிலாந்திற்குமிடையில் எதிர்வரும் 25ஆம் திகதி சனிக்கிழமை பிற்பகல் 2:30 மணிக்கு பிரிஸ்டல் கவுன்றி மைதானத்தில் நடைபெறவிருக்கும் 20:;20 கிரிக்கெட் விளையாட்டின்போது, பிரித்தானிய தமிழ் இளையோர் அமைப்பினால் மேற்கொள்ளப்படவிருக்கும் சிறிலங்கா கிரிக்கெட் புறக்கணிப்பு போராட்டத்தில் பங்குபற்றி போராட்டம் முழு வெற்றி பெறுவதற்கு ஆதரவளிக்குமாறு, பிரித்தானிய தமிழர் பேரவை தமிழ் மக்களிடம் வேண்டுகோள் விடுத்துள்ளது.
கடந்த மே மாதம் இங்கிலாந்தின் பல்வேறு மைதானங்களிலும் சிறிலங்காவிற்கும் இங்கிலாந்திற்குமிடையில் நடைபெற்ற கிரிக்கெட் போட்டிகளின்போது தமிழ் இளையோர் அமைப்பு தொடர்ச்சியாக சிறிலங்கா கிரிக்கெட் புறக்கணிப்பு போராட்டத்தை நடத்தியிருந்தது.
இந்தப் போராட்டங்களில் கலந்து கொண்ட தமிழ் மக்கள், சிறிலங்கா அரசாங்கத்தின் தமிழ் மக்களுக்கெதிரான இன அழிப்பு பற்றிய தகவல்களை பார்வையாளர்களுக்கு எடுத்துக்கூறியும், துண்டுப் பிரசுரங்களை வழங்கியும் சிறிலங்காவின் கிரிக்கெட்டை புறக்கணிக்குமாறு கோரி வருகின்றமை பல்வேறு மட்டங்களிலும் கவனத்தை ஈர்த்திருக்கின்றது.
இந்த நிலையில், எதிர்வரும் 25ஆம் திகதி பிரிஸ்டலில் (டீசளைவழட) நடைபெறவிருக்கும் முதலாவது 20-20 போட்டியின்போது ஏராளமான பார்வையாளர்கள் கலந்துகொள்வர் என்று எதிர்பார்க்கப்படுவதால், அன்றைய தினம் நடைபெறவிருக்கும் சிறிலங்கா கிரிக்கெட் புறக்கணிப்பு போராட்டத்தில் பெரும் எண்ணிக்கையில் தமிழ் மக்கள் பங்குபற்ற வேண்டும் என்று பிரித்தானிய தமிழர் பேரவை கேட்டுக்கொள்கின்றது.
சனல் 4 தொலைக்காட்சியில் சிறிலங்காவின் கொலைக்களங்கள் எனும் மிகக் கொடூரமான ஆவணப்படம் வெளியாகி அனைத்து இன மக்களும் சிறிலங்கா அரசின் இன அழிப்பினை அறிந்திருக்கும் இந்த வேளையில், இந்தப் போட்டியில், போர்க்குற்றச்சாட்டுக்கு உள்ளாகியுள்ள அரசாங்கமான மகிந்த ராஜபக்ஷ அரசாங்கத்தில் நாடாளுமன்ற உறுப்பினராக இருக்கும் சனத் ஜெயசூரியாவும் விளையாட இருப்பதால், அன்றைய போராட்டம் முக்கியம் பெறுகின்றது.
சிறிலங்கா அரசாங்கம் அதன் மீதான போர்க்குற்றச்சாட்டுக்கள் தொடர்பில் சர்வதேச ரீதியிலான சுயாதீனமான விசாரணைக்கு உட்படுத்தப்பட்டு தண்டனைக்கு உட்படுத்தப்படும்வரை சர்வதேச ரீதியிலான சகல விளையாட்டுப் போட்டிகளிலும் சிறிலங்கா பங்குபற்றுவதை தடை விதிப்பதற்கு, அழுத்தம் கொடுக்கும் போராட்டங்களை தமிழ் மக்கள் சர்வதேச அளவில் இனிவரும் காலங்களில் தீவிரப்படுத்த வேண்டும்.
இதன் ஒரு பகுதியாக இங்கிலாந்து கிரிக்கெட் சபை, சர்வதேச கிரிக்கெட் வாரியம், சர்வதேச விளையாட்டு வீரர்கள், உள்ளுர் விளையாட்டுக் கழகங்கள், ஊடகங்கள், கிரிக்கெட் கவுன்டிஸ் (ஊசiஉமநவ உழரவெல), உள்ளூர் நாடாளுமன்ற உறுப்பினர்கள், நகரசபை உறுப்பினர்கள் ஆகியோரிற்கு இலங்கையின் இன அழிப்பு தொடர்பாகவும், தாய்நாட்டில் தமிழர்களின் இன்றைய அவல நிலை தொடர்பாகவும் கடிதங்கள் எழுதி, ஆவணங்களை அனுப்பி அவர்கள் மூலமாக சர்வதேச விளையாட்டு அரங்குகளில் இருந்து சிறிலங்காவை தடைசெய்ய உதவுமாறு பிரித்தானிய தமிழர் பேரவை வேண்டுகோள் விடுக்கின்றது.
இப்புறக்கணிப்புப் போராட்டத்தில் பங்குபற்றுவதற்காக பிரித்தானியாவின் சகல பகுதிகளில் இருந்தும் போக்குவரத்து ஒழுங்குகளை தமிழ் இளையோர் அமைப்பு செய்துள்ளதையும், பிரித்தானிய தமிழர் பேரவை சுட்டிக்காட்டியுள்ளது.
********************



Thursday, 23 June 2011

செய்திகள் 23/06


அதிர்ந்து என்ன பயன்?
பிரித்தானிய சனல் 4 தொலைக்காட்சியின் 'இலங்கையின் கொலைக்களம்' எனும் ஆவணப்படம் நியூயோர்க்கில் நேற்று காண்பிக்கப்பட்டபோது இராஜதந்திரிகள், மனிதவுரிமை செயற்பாட்டாளர்கள் மற்றும் அமெரிக்க ஊடகவியலாளர்கள் பெரும் அதிர்ச்சி அடைந்ததாக தெரிவிக்கப்படுகிறது.
சர்வதேச மன்னிப்புச் சபையும், மனிதவுரிமைகள் கண்காணிப்பகமும் கூட்டாக இணைந்து இந்த ஆவணப்படத்தை நியூயோர்க்கில் அமைந்துள்ள மன்னிப்புச் சபை அலுவலகத்தில் காட்சிப்படுத்தியிருந்தது.
பெரும் அளவிலான இராஜதந்திரிகள் இக் காணொளியைப் பார்வையிட்டிருந்தனர்.
இதன்போது ஐக்கிய நாடுகள் சபைக்கான சிறிலங்காவின் வதிவிடப் பிரதிநிதி பாலித்த ஹோகன்ன மற்றும் பிரதி வதிவிடப் பிரதிநிதி மேஜர் ஜெனரல் சவேந்திர சில்வா ஆகியோர் தலைமையில் சுமார் 15 பேர் வரையிலான சிறிலங்கா அரசாங்கத்தின் பிரதிநிதிகளும் கலந்து கொண்டதாக தெரிவிக்கப்படுகின்றது.
மேஜர் ஜெனரல் சில்வா போர் நடைபெற்ற காலத்தில் 58 வது படைப்பிரிவின் தளபதியாக பணியாற்றியிருந்ததுடன் இந்த ஆவணப்படத்திலும் இடம்பெற்றிருந்தார்.
போரின் இறுதிக்கட்டத்தில் சரணடைய முன்வந்த விடுதலைப் புலிகள் இயக்கத்தின் தலைவர்களை சுட்டுக்கொன்ற குற்றச்சாட்டும் அவர்மீது உள்ளது.
இந்த ஆவணப்படம் வெளியிடப்பட்டபோது மண்டபத்தில் மிகுந்த அமைதி காணப்பட்டதாகவும் ஆவணப்படத்தைப் பார்வையிட்ட எவருமே அதில் இடம்பெற்றுள்ள இதயத்தை உறையவைக்கும் காட்சிகளையும் இதுபோன்ற கொடுரங்களையும் எதிர்பார்த்திருக்கவில்லை எனவும் சர்வதேச மன்னிப்புச் சபை தெரிவித்துள்ளது.
இந்த ஆவணப்படம் வெளியிடப்பட்ட பின்னர் இடம்பெற்ற கலந்துரையாடலில் வழமைபோல் அங்கு போர்க்குற்றங்கள் எதுவும் இடம்பெறவில்லை எனவும், அவ்வாறு இடம்பெற்றிருந்தால் லிபியா மற்றும் சூடான் போன்று சர்வதேச சமூகம் பொறுப்புக்கூறும் பொறிமுறை ஒன்றை உருவாக்கி இருக்கும் எனவும் பாலித்த ஹோகன்ன தெரிவித்தார்.
ஆனால் சர்வதேச மன்னிப்புச் சபையின் பிரதிநிதிகள் அங்கு இடம்பெற்ற நிகழ்வுகள் தொடர்பில் நீண்ட விளக்கம் அளித்த பின்னர், ஒரு சில சம்பவங்கள் இடம்பெற்றிருந்ததை பாலித்த ஹோகன்ன ஏற்றுக் கொண்டதுடன் அது தொடர்பாக விசாரிக்கப்படும் எனவும் தெரிவித்தார்.
பாலித்தவின் இந்த விசாரணை குறித்த கருத்தை இதுவரை காலமும் சிறிலங்காவில் இடம்பெற்ற விசாரணைகளதும் ஆணைக்குழுக்களதும் வரலாறு குறித்த பின்னணியுடனேயே பார்க்க வேண்டும் எனச் சுட்டிக்காட்டப்பட்டுள்ளது.
ஜெனிவாவில் இடம்பெற்ற ஐக்கிய நாடுகள் சபையின் மனிதவுரிமைகள் ஆணைக்குழுவின் 17வது கூட்டத்தொடரில் கடந்த 3ஆம் திகதி இந்த ஆவணப்படம் காண்பிக்கப்பட்டபோது பிரித்தானியா, அமெரிக்கா, இந்தியா, இந்தோனேசியா, மெக்சிக்கோ, பிரான்ஸ், சுவிற்சர்லாந்து, ஒஸ்திரியா மற்றும் பின்லாந்து ஆகிய நாடுகளின் இராஜதந்திரிகள் பார்வையிட்டிருந்தனர்.
இந்த ஆவணப்படத்தின் எதிரொலியாக பிரித்தானியப் பிரதமர் டேவிட் கமரூன் மற்றும் தெற்காசியாவுக்கான வெளிவிவகார அமைச்சர் ஆகியோர் போர்க்குற்றங்கள் மற்றும் மனிதவுரிமை மீறல்கள் தொடர்பில் சுயாதீனமான சர்வதேச விசாரணைகளை வலியுறுத்தி இருந்தனர்.
அதேபோன்று ஐக்கிய நாடுகள் சபை நிபுணர்கள் குழு பரிந்துரைத்தபடி சர்வதேச நடவடிக்கைகளை முன்னெடுக்க சிறிலங்கா அரசாங்கத்திற்கு காலக்கெடு ஒன்றை விதிக்க வேண்டும் என பிரித்தானியாவின் முன்னாள் வெளிவிவகார அமைச்சர் மற்றும் பிரான்சின் முன்னாள் வெளிவிவகார அமைச்சர் ஆகியோரும் கூட்டாக கோரிக்கை விடுத்திருந்தமை குறிப்பிடத்தக்கது
****************
பேச்சின் நோக்கம் என்ன?
அரசாங்கத்துடன் இன்று நடத்தப்படும் ஏழாம் கட்டப் பேச்சுவார்த்தையில் அரசியல் தீர்வு விடயம் முக்கியத்துவம் பெறுமென்று தமிழ்த் தேசியக் கூட்டமைப்பின் நாடாளுமன்ற உறுப்பினர் சட்டத்தரணி எம்.ஏ. சுமந்திரன் தெரிவித்தார்.
அரசுக்கும் கூட்டமைப்புக்குமிடையிலான பேச்சுவார்த்தையின் ஊடாக அரசியல் தீர்வொன்றை எட்ட முடியுமென்ற நம்பிக்கையுடன் பேச்சுவார்த்தையை முன்னெடுத்து வருவதாகக் குறிப்பிட்ட சுமந்திரன் அரசாங்கத்துடன் தீர்வு யோசனைகள் அடங்கிய அறிக்கையொன்றை ஏற்கனவே சமர்பித்துள்ளதாகவும் அதனடிப்படையில் பேச்சுக்களைத் தொடர்வதாகவும் குறிப்பிட்டார்.
ஆனால் கூட்டமைப்பின் யோசனைகள் தொடர்பாக இன்னமும் எந்தவொரு பிரதிபலிப்பும் தென்படவில்லையென்றும் இன்றைய பேச்சுவார்த்தை அதற்கான களத்தை உருவாக்குமென்றும் சுமந்திரன் சுட்டிக்காட்டினார்.
இதேவேளை தேசிய பிரச்சினைக்குத் தீர்வொன்று காண்பதற்காகப் பாராளுமன்றத் தேர்வுக் குழுவொன்றை அமைப்பது காலத்தை வீணடிக்கும் செயலாகுமென்பதே கூட்டமைப்பின் தற்போதைய கருத்தாகுமென்று தெரிவித்த அவர் அது பற்றி இன்னமும் உத்தியோகபூர்வமாக அரசாங்கம் அறிவிக்கவில்லையென்றும் அறிவிக்கும் போது அதுபற்றிச் சிந்திக்கலாமென்றும் கூறினார்.
அதே நேரம் தமிழ் தேசியக் கூட்டமைப்புதான் தமிழ் மக்களின் ஏகப்பிரதிநிதி என்று ஒரு போதும் கூறவில்லை என்று வலியுறுத்திய சுமந்திரன் தமிழ் தேசியக் கூட்டமைப்பை புறந்தள்ளி தீர்வொன்றை எட்ட முடியாது என்றும் சுட்டிக்காட்டினார்.
இதனையே சம்பந்தன் தெளிவாகக் கூறியுள்ளார் என்றும் அவர் மேலும் தெரிவித்தார்.
****************
இராணுவ ஆட்சியே தமிழர் பிரதேசத்தில் - சம்பந்தன்
தமிழ்த் தேசியக் கூட்டமைப்பினரின் அளவெட்டித் தேர்தல் கூட்டத்தின் மீது இராணுவத்தினர் தாக்குதல் நடத்தியுள்ளமை, நாட்டின் வடபகுதியில் இராணுவ ஆட்சிதான் நடக்கிறது என்பதை நிரூபித்துள்ளது என இரா.சம்பந்தன் தெரிவித்துள்ளார்.
அங்கு சிவில் நிர்வாகம் நடைபெறவில்லை என்றும் கூறிய அவர், அளவெட்டித் தாக்குதலை நடத்திய இராணுவத்தினர் அனைவரையும் உடனடியாகக் கைதுசெய்யவேண்டும் எனவும் வேண்டுகோள் விடுத்துள்ளார்.
நாடாளுமன்றத்தில் நேற்று சிறப்புரிமை மீறல் பிரச்சினையை எழுப்பி உரையாற்றிய, தமிழ்த் தேசியக் கூட்டமைப்பின் தலைவர் இரா.சம்பந்தன் இவ்வாறு வலியுறுத்தினார்.
அளவெட்டிச் சம்பவத்தில் ஈடுபட்டவர்கள் இராணுவத்தினர்தான் என்று பாதுகாப்பு அமைச்சின் செயலாளர் கோத்தபாய ராஜபக்ஷ உறுதிப்படுத்திய நிலையிலும்கூட அவர்கள் ஏன் இதுவரை கைது செய்யப்படவில்லை என்றும் அவர் சபையில் கேள்வி எழுப்பினார்.
இந்தச் சம்பவம் நாடாளுமன்ற உறுப்பினர்களின் சிறப்புரிமையை மீறும் விவகாரம் என்ற பிரச்சினை சம்பந்தன் நேற்று நாடாளுமன்றில் கிளப்பினார்.
அளவெட்டியில் என்ன நடந்தது என்பதை அவர் நாடாளுமன்றில் விபரமாக பதிவு செய்தார்.
தாக்குதல் நடத்தியவர்கள் இராணுவத்தினர்தான் என்று நாடாளுமன்ற உறுப்பினர்கள் திட்டவட்டமாகத் தமது முறைப்பாட்டில் தெரிவித்த போதும், மறுநாள் நீதிமன்றுக்கு ஆரம்ப அறிக்கையில் இனந்தெரியாத நபர்களே தாக்கினர் என்று காவல்துறையினர் தெரிவித்துள்ளனர் என்ற விடயத்தையும் அவர் அங்கு சுட்டிக்காட்டினார்.
சட்டமும் ஒழுங்கும் பாதுகாக்கப்படவேண்டும் என்று கோரிக்கை விடுத்த சம்பந்தன், அளவெட்டிச் சம்பவம் போன்ற அராஜகங்களையும் அடாவடித்தனங்களையும் புரிவதற்கு வாய்ப்பாக இருக்கும் அவசரகாலச் சட்டத்தை வாபஸ் பெற வேண்டும் எனவும் குறிப்பிட்டார்.
****************
விசாரிக்கிறார்களாம்! எதை?
யாழ். அளவெட்டியில் தமிழ் தேசியக் கூட்டமைப்பின் கலந்துரையாடல் நடைபெற்ற போது தாக்குதல்கள் நடத்தப்பட்ட சம்பவம் தொடர்பாக விசேட விசாரணைகள் ஆரம்பிக்கப்பட்டுள்ளன.
இது வரை 11பேரிடமிருந்து வாக்கு மூலங்கள் பதிவு செய்யப்பட்டுள்ளதாக பிரதமர் டி.எம். ஜயரத்ன நேற்று பாராளுமன்றத்தில் தெரிவித்தார்.
இராணுவத்தினர் தான் இத்தாக்குதல்களை நடத்தினார்கள் என்று விசாரணைகளிலிருந்து உறுதியானால் அவர்களுக்கு எதிராக நடவடிக்கை எடுக்கப்படுமென்றும் பிரதமர் தெரிவித்தார்.
எனினும் கூட்டமைப்பினர் முன்வைத்துள்ள குற்றச்சாட்டுகள் அனைத்தையும் ஏற்றுக்கொள்ள முடியாது எனவும் இதில் குறிப்பிடப்பட்ட விடயங்களில் பொய்யான தகவல்களும் உள்ளடக்கப்பட்டுள்ளன என்றும் அவர் தெரிவித்துள்ளார்.
தமிழ்த்தேசிய கூட்டமைப்பினரின் தேர்தல் பிரசாரக் கூட்டத்திற்கு பூரண பாதுகாப்பு வழங்கப்படும் என்றும் முன்கூட்டியே கூட்டங்களுக்கு அனுமதி பெறுவதும் மிக முக்கியமானதென்றும் பிரதமர் டி.எம்.ஜயரத்ன தெரிவித்துள்ளார்.
****************
இந்திய அரசியலமைப்புக்கு ஆலோசனை கூறும் பீரிஸ்!
இந்திய அரசியலமைப்பிற்கிணங்க மாநில அரசாங்கங்களுக்கு வழங்கப்பட்டுள்ள அதிகாரத்தை மீறி தமிழ் நாட்டு அரசாங்கம் மத்திய அரசுக்கு அழுத்தங்களையோ சிபாரிசுகளையோ வழங்க முடியாதென ஜீ.எல். பீரிஸ் தெரிவித்துள்ளார்.
இலங்கை அரசாங்கம் தமிழக மாநில அரசாங்கத்துடன் தொடர்ந்தும் நல்லுறவைப் பேணும் என குறிப்பிட்ட அமைச்சர், அண்மையில் நடைபெற்ற தேர்தலில் தமிழக முதலமைச்சராக செல்வி ஜெயலலிதா பதவியேற்ற போது தாம் இலங்கை அரசின் சார்பில் அவருக்கு வாழ்த்துக்களைத் தெரிவித்ததாகவும் தெரிவித்தார்.
நேற்றைய தினம் வெளிவிவகார அமைச்சில் நடைபெற்ற விசேட செய்தியாளர் மாநாட்டில் ஊடகவியலாளர் எழுப்பிய கேள்வியொன்றுக்குப் பதிலளிக்கையிலேயே அமைச்சர் இவ்வாறு தெரிவித்தார்.
அமைச்சர் ஜீ.எல். பீரிஸ் இது தொடர்பில் மேலும் தெரிவிக்கையில், இலங்கை அரசாங்கம் மத்திய அரசாங்கத்துடனேயே முக்கிய தொடர்புகளைக் கொண்டுள்ளது.
அதுபற்றிய தீர்மானம் எடுக்கும் அதிகாரம் தமிழ் நாட்டுக்குக் கிடையாது.
தமிழ் நாடு மாநில அரசாங்கத்துடன் இலங்கை சம்பந்தப்பட்ட பல்வேறு பேச்சுவார்த்தைகளை எதிர்காலத்தில் மேற்கொள்வோம் எனவும் அதில் எவ்வித பிரச்சினையுமில்லை எனவும் அமைச்சர் மேலும் தெரிவித்தார்.
****************
கிளிநொச்சியில் ஆர்ப்பாட்டம்
தடுத்து வைக்கப்பட்டுள்ளோர் மற்றும் காணாமல் போனோரின் பெயர் விபரங்களை வெளியிடுமாறும் தடுத்து வைக்கப்பட்டுள்ளவர்களை விடுதலை செய்யுமாறு கோரி இன்று பாரிய ஆர்ப்பாட்டமொன்று கிளிநொச்சியில் ஏற்பாடு செய்யப்பட்டுள்ளது.
நாம் இலங்கையர் அமைப்பினால் ஏற்பாடு செய்யப்பட்ட இந்த ஆர்ப்பாட்டம் முற்பகல் 10 மணிக்கு கிளிநொச்சி பஸ் தரிப்பிடத்தில் நடத்தப்படவுள்ளதாக அதன் பிரதான அமைப்பாளர் உதுல் பிரேமரட்ண தெரிவித்தார்.
யுத்தம் முடிவடைந்து இரு வருடங்கள் கடந்துள்ள நிலையில் தடுத்து வைக்கப்பட்டவர்கள் மற்றும் காணாமல் போணவர்கள் தொடர்பில் விபரங்கள் வெளியிடப்படவில்லை.
இதனால் பாதிக்கப்பட்ட தமிழ் மக்கள் தமது உறவுகளுக்காக ஏங்கிக் கொண்டுள்ளதாக ஜே.வி.பி யின் யாழ் மாவட்ட அமைப்பாளர் லலித் தெரிவித்தார்.
இந்த உறவுகள் தனது தந்தையை, கணவனை மற்றும் சகோதர,சகோதரிகளை காணாது தவிப்பது மட்டுமின்றி, அவர்களது குடும்ப வருமானத்தினை ஈட்டிக் கொடுக்கும் இவர்கள் இலலாமையால் கஸ்டநிலைக்கு தள்ளப்பட்டுள்ளனர்.
இதனாலேயே தடுத்து வைக்கப்பட்டவர்களை விடுதலை செய்யுமாறு கோருகின்றோம் எனவும் தெரிவித்தார்.
இதேவேளை, இவ்வாறான ஆர்ப்பாட்டங்களை தாம் ஏற்கனவே திருகோணமலையிலும் வவுனியாவிலும் நடத்தியுள்ளதாகவும், இந் நிலையில் ஒரு கட்டமாக கிளிநொச்சியில் ஆர்ப்பாட்டத்தினை நடத்த ஏற்பாடு செய்துள்ளதாகவும் நாம் இலங்கையர் அமைப்பில் பிரதான அமைப்பாளர் உதுல் பிரேமரட்ன என தெரிவித்தார்.
எதிர்காலத்தில் இப்போராட்டங்களை மன்னாரிலும் யாழ்ப்பாணத்திலும் நடத்தவுள்ளதாகவும் இதற்கு அரசாங்கம் உரிய நடவடிக்கை எடுக்காத பட்சத்தில் அனைவரையும் ஒன்று திரட்டி கொழும்பில் பாரிய ஆர்ப்பாட்டமொன்றை மேற்கொள்ளவுள்ளதாகவும் அவர் குறிப்பிட்டார்.
****************
இராணுவப் பயிற்சி எதற்கு?
இராணுவத்திலிருந்து தப்பிச் சென்றவர்களே கொலை, கொள்ளை, கற்பழிப்பு போன்ற குற்றச்சாட்டுகளில் பெருமளவில் கைது செய்யப்படுகின்றனர்.
இந்த நிலையில் பல்கலைக்கழக மாணவர்களுக்கு இராணுவப் பயிற்சி வழங்கப்பட வேண்டுமா? என்று ஐக்கிய தேசியக் கட்சியின் நாடாளுமன்ற உறுப்பினர் ஹரின் பெர்னாண்டோ கேள்வி எழுப்பி உள்ளார்.
ஐக்கிய தேசியக் கட்சியின் ஊடகவியலாளர் மாநாடு எதிர்க் கட்சித் தலைவரின் உத்தியோகபூர்வ வாசஸ்தலத்தில் நடைபெற்ற போது அதில் கலந்துகொண்டு உரையாற்றிய அவர் பல்கலைக்கழக மாணவர்கள், பேராசிரியர்கள் ஆகியோர் மீது தாக்குதல் முயற்சிகளையும், அவர்களை சிறையில் அடைக்கும் முயற்சிகளையும் உயர்கல்வி அமைச்சர் மேற்கொள்கிறார்.
மிகவும் காட்டுமிராண்டித்தனமாக அமைச்சர் செயற்படுகிறார் எனவும் தெரிவித்தார்.
திருகோணமலை மாவட்டத்தில் பல்கலைக்கழக மாணவர்களுக்கு இராணுவப் பயிற்சி வழங்கப்பட்டு வரும் முகாமில் இரண்டு மலசலகூடங்களே உள்ளன.
அங்கு பயிற்சி பெறும் 300 மாணவர்களும் அந்த இரண்டு மலசலகூடங்களையே பயன்படுத்தும் துர்ப்பாக்கிய நிலை காணப்படுகிறது.
ஆனால், அரச ஊடகங்களில் இந்த விடயங்கள் வெளிப்படுத்தப்படுவதில்லை.
இராணுவப் பயிற்சி பெறும் மாணவர்களுக்கு அனைத்து வசதிகளும் செய்து கொடுக்கப்பட்டுள்ளன என அரச சார்பு ஊடகங்கள் தெரிவித்து வருகின்றன.
அதேவேளை, ஆசனிக் இரசாயனக் கலவை மற்றும் பக்றீரியாவால் விவசாயிகள் தற்போது பாதிக்கப்பட்டுள்ளனர்.
இலாபம் என்பதை மட்டும் பார்த்து 350 ரூபாய் உர மூடை விவசாயிகளுக்கு வழங்கப்பட்டமையாலேயே இந்நிலைமை ஏற்பட்டுள்ளது.
இலாபத்தைப் பார்த்து அரசு செயற்பட்டதால் விவசாயிகளே துன்பத்தை அனுபவித்து வருகின்றனர்.
அதே போன்று ஆயிரக்கணக்கான டெங்கு நோயாளர்கள் அடையாளம் காணப்பட்டுள்ளனர்.
ஆனால், அவர்களுக்கு வழங்க வைத்தியசாலைகளில் மருந்து இல்லை எனவும் அவர் தெரிவித்துள்ளார்.
****************

Wednesday, 22 June 2011

செய்திகள் 22/06



தமிழ்த் தேசியக் கூட்டமைப்பு எச்சரிக்கை!
வடக்கு - கிழக்கு பிரச்சினைக்கு தீர்வு காண்பதற்கு நாடாளுமன்ற தெரிவுக்குழுவொன்றை அரசாங்கம் நியமிக்குமாயின் தமிழ் தேசிய கூட்டமைப்பு அரசாங்கத்துடனான பேச்சுவார்த்தையிலிருந்து விலகிக்கொள்ளும் என தெரிவித்துள்ளது.
நாடாளுமன்ற தெரிவுக்குழு உருப்படியாக எதையும் செய்யப்போவதில்லை என்றும் இது காலத்தை வீணே போக்குகின்ற ஒரு முயற்சி என்றும் நாடாளுமன்ற உறுப்பினரும் தமிழ் தேசிய கூட்டமைப்பின் பேச்சாளருமான சுரேஷ் பிரேமசந்திரன் தெரிவித்தார்.
முன்னைய அரசாங்கங்களின் கீழ் அமைந்த பல்வேறு குழுக்களின் இறுதி அறிக்கைகள், சிபாரிசுகள் என்பன நிறைய உள்ளன.
இவை இனப்பிரச்சினை தீர்வுக்கு வழிகாட்டல்களாக அமைந்துள்ளன.
அரசாங்கம் இனப்பிரச்சினை தீர்வில் உண்மையான அக்கறையுடையதாயின் இவற்றை பயன்படுத்திக்கொள்ள முடியும் என பிரேமசந்திரன் கூறினார்.
கடந்த பெப்ரவரியிலிருந்து தமிழ்த் தேசியக் கூட்டமைப்பு அரசாங்கத்துடன் ஆறு சுற்று பேச்சுக்களை நடத்தியுள்ளது.
ஆனால் கிடைத்த பயன் சொற்பம் அல்லது எதுவுமில்லை என்றளவுக்கே உள்ளது.
நீண்டகாலமாக தடுத்துவைக்கப்பட்டுள்ள 850 அரசியல் கைதிகளை விடுவிக்கும்படி கேட்டதாகவும், இடம்பெயர்ந்தோருக்கான வசதிகள் பற்றி பேசியதாகவும் தெரிவித்த அவர் எதுவுமே நடக்கவில்லை என்றும் குறிப்பிட்டார்.
அரசாங்கம் முக்கியமல்லாத, தேவையில்லாத விடயங்கள் பற்றியே பேசுகின்றது என சுரேஷ் பிரேமசந்திரன் மேலும் கூறினார்.
*****************

இரகசியப் பதில்?
ஐ.நா. நிபுணர் குழுவின் அறிக்கையில் அரசிடம் கேட்கப்பட்டுள்ள 31 கேள்விகளுக்கு அரசு மிகவும் இரகசியமாகப் பதில் அளித்துவிட்டது என்று ஐக்கிய தேசியக் கட்சி நாடாளுமன்ற உறுப்பினர் லக்ஷ்மன் கிரியயல்ல நேற்று நாடாளுமன்றில் தெரிவித்துள்ளார்.
ஐ.நா. நிபுணர் குழுவின் அறிக்கை தொடர்பாகவும், சனல் 4 வீடியோ காட்சி தொடர்பாகவும் சர்வதேசத்துக்கு விளக்கமளிக்க அரசு இன்னும் நடவடிக்கை எடுக்கவில்லை.
இதுதொடர்பாக சர்வதேச சமூகத்துடன் பேச்சு நடத்த அரசு முயற்சி எடுக்கவில்லை.
இரண்டு வருடங்களுக்கு முன்பும் சனல் 4இல் வீடியோ காட்சி ஒன்று ஒளிபரப்பப்பட்டது.
இதற்கு எதிராகச் சட்ட நடவடிக்கை எடுக்கப்படும் என்று அரசு தெரிவித்தது ஆனால், இதுவரையும் எந்த நடவடிக்கையும் எடுக்கப்படவில்லை என்றும் அவர் தெரிவித்துள்ளார்.
ஐ.நா. நிபுணர் குழுவின் அறிக்கைக்கு அரசு கடும் எதிர்ப்பைத் தெரிவித்தது. ஆனால், அந்த அறிக்கையில் அரசிடம் கேட்கப்பட்டிருக்கும் 31 கேள்விகளுக்கு அரசு மிகவும் இரகசியமாகப் பதில் வழங்கிவிட்டது.
இறுதிக்கட்ட யுத்தத்தின்போது ஒருவர்கூட கொல்லப்படவில்லை என்று அரசு கூறுகிறது. இதை எவரும் நம்பமாட்டார்கள். இதை அரசு சர்வதேசத்திடம் விளக்கிக் கூறவேண்டும் எனவும் தெரிவித்தார்.
ஐ.நா. மனித உரிமைகள் சபையின் அலுவலகம் ஒன்றை கொழும்பில் திறந்து இலங்கை தொடர்பான குற்றச்சாட்டுகளை பொய்யாக்க அரசு அனுமதி வழங்கவேண்டும் என்றும் அவர் தெரிவித்துள்ளார்.
*****************
இணைந்த தீர்வு?
வடக்கு, கிழக்கு இணைந்த மாகாணத்துக்கு அதிகாரத்தை வழங்குவதன் மூலமே இனப் பிரச்சினைக்குத் தீர்வு காணமுடியும் என விக்கிரமபாகு கருணாரட்ண தெரிவித்துள்ளார்.
அதிகாரம் பரவலாக்கப்படாவிட்டால் நாடு பாரிய சிக்கல்களை எதிர்நோக்க வேண்டிய சூழ்நிலை ஏற்படும் என கலாநிதி விக்கிரமபாகு கருணாரட்ன நேற்று தெரிவித்தார்.
நவ சமசமாஜக் கட்சியின் செய்தியாளர் மாநாடு நேற்றுக்காலை கொழும்பில் கட்சியின் தலைமையகத்தில் நடைபெற்றது.
அளவெட்டியில் நடைபெற்ற கூட்டமைப்பின் பிரசாரக் கூட்டத்தின் மீது நடத்தப்பட்ட தாக்குதல் கண்டிக்கப்பட வேண்டியதொன்றாகும்.
வடக்கு, கிழக்கில் இராணுவ பிரசன்னத்தை தமிழ்த் தேசியக் கூட்டமைப்பு எதிர்ப்பதனாலேயே இந்தத் தாக்குதல் நடத்தப்பட்டுள்ளது.
வடக்கு, கிழக்கை இராணுவம் தனது கட்டுப்பாட்டின் கீழ் வைத்திருக்கவே விரும்புகின்றது.
தமிழ் மக்களுக்கு உரிய தலைமையை வழங்கி ஜனநாயக செயற்பாட்டைக் கூட்டமைப்பு முன்னெடுத்து இன்று தமிழ் மக்களின் குரல் ஒடுக்கப்படுகின்ற நிலையே காணப்படுகின்றது.
கூட்டமைப்பு நாடாளுமன்ற உறுப்பினர்களுக்கு பாதுகாப்பு வழங்கிய காவல்துறை பாதுகாப்புப் பிரிவினர் தாக்கப்பட்டுள்ளனர்.
இவர்கள் மீது இராணுவத்தினரே தாக்குதல் நடத்தியுள்ளனர். அப்படியாயின் ஆட்சித் தரப்பில் முரண்பாடு உள்ளதா? எனவும் அவர் கேள்வி எழுப்பினார்.
*****************
பிரித்தானிய விவாதம்
சிறிலங்காவில் இடம்பெற்ற போர்க்குற்றங்கள் குறித்த குழுநிலை விவாதம் ஒன்று பிரித்தானிய நாடாளுமன்றக் கட்டடத்தில் இன்று நடைபெறவுள்ளது.
பிரதிநிதிகள் சபையின் நாடாளுமன்ற அமைப்புகளுக்கான அறையில் இந்த விவாதம் நடைபெறவுள்ளது.
நாடாளுமன்ற மனித உரிமைகள் குழு மற்றும் லண்டனைத் தளமாகக் கொண்ட அனைத்துலக மன்னிப்புச் சபை ஆகியன இன்றைய இந்த விவாதத்துக்கான ஒழுங்குகளைச் செய்துள்ளதுடன், சனல் 4 ஒளிரப்பிய சிறிலங்காவின் கொலைக்களங்கள் என்ற ஆவணப்படத்தையும் திரையிட்டுக் காண்பிக்கவுள்ளன.
இந்த விவாதத்தில் பிரித்தானியாவின் பிரதி வெளிவிவகார அமைச்சர் அலிஸ்ரெயர் பேர்ட் உள்ளிட்ட பலரும் கலந்து கொண்டு உரையாற்றவுள்ளனர்.
போர்க்குற்றங்கள் தொடர்பாக இந்த ஆண்டுக்குள் முறைப்படியான விசாரணை நடத்த வேண்டும் என்று சிறிலங்காவுக்கு எச்சரிக்கை விடுத்த பிரித்தானிய அமைச்சர் அலிஸ்ரெயர் பேர்ட், இந்த விவாதத்தின் போது, தமது நிலைப்பாட்டை மீண்டும் வலியுறுத்துவார் என்று எதிர்பார்க்கப்படுகிறது.
சிறிலங்காவின் கொலைக்களங்கள் ஆவணப்படத்தை தயாரித்த சனல் 4 தொலைக்காட்சியின் வெளிவிவகாரப் பிரிவு செய்தியாளர் ஜொனாதன் மில்லர் இன்றைய விவாதத்துக்குத் தலைமை தாங்குவார்.
*****************
உலக ஆதரவு தேடும் பீரிஸ்?
ஐக்கிய நாடுகளின் பாதுகாப்புச் சபையில் அங்கம் வகிக்கும் வீட்டோ அதிகாரம் கொண்ட இரண்டு நாடுகளான சீனாவும் ரஷ்யாவும் இலங்கைக்கு பக்கபலமாக உள்ளன என ஸ்ரீலங்காவின் வெளிவிவகார அமைச்சர் தெரிவித்துள்ளார்.
நாட்டினதும் அரசாங்கத்தினதும் செயற்பாடுகளை அங்கீகரிக்கும் நண்பர்களாக அவர்கள் உள்ளனர்.
தங்களுக்காக அவர்களின் குரல்கள் ஒலிக்கும் என்ற நம்பிக்கை இருக்கின்றது எனவும் தெரிவித்துள்ளார்.
அந்நாட்டுத் தலைவர்களுடன் தமது அரசுத் தலைவர் கலந்துரையாடிய போது அவர்களால் வெளியிடப்பட்ட கருத்துக்கள் மூலம் இது புலனாகின்றது என்றும் தெரிவித்துள்ளார்.
இலங்கையின் உள்விவகாரங்களில் அந்நிய நாடுகள் தலையிடுவதை ஒருபோதும் அங்கீகரிக்க முடியாது என்பதையும் அவ்வாறான செயற்பாட்டை வன்மையாகக் கண்டிப்பதாகவும் அரசுத் தலைவருடனான சந்திப்பின்போது சீன அரசுத் தலைவர் மிகவும் திடமான முறையில் தெரிவித்தார்.
சீன அரசுத் தலைவரின் இந்தக் கூற்று இலங்கைக்கு பெரிதும் உறுதுணையாக அமைகின்றது எனவும், இதன் மூலம் இலங்கை தனிமைப்படவில்லை என்பதுவும் தமக்குப் பக்கபலமாக பல உலக நாடுகள் உள்ளன என்பதும் தெளிவாகின்றது என்றும் பீரிஸ் தெரிவித்துள்ளார்.
*****************
பொய் யாருக்கு?
அரச ஊடகங்கள் அனைத்தும் வடிகட்டின பொய்களையே செய்திகளாக வெளியிட்டுக் கொண்டிருப்பதாக ஐக்கிய தேசியக் கட்சியின் பிரதித்தலைவர் கரு ஜயசூரிய தெரிவித்துள்ளார்.
அரச ஊடகங்கள் ஊடக தர்மத்துக்கு அப்பால் சென்று தங்கள் எஜமானர்களைத் திருப்திப்படுத்தும் நோக்கிலான செய்திகளை வெளியிடுவதற்கே முன்னுரிமை கொடுப்பதாகவும் அவர் மேலும் குற்றம் சாட்டியுள்ளார்.
இன்றைய லக்பிம சிங்கள நாளேட்டிற்கு அளித்துள்ள விசேட நேர்காணலிலேயே நாடாளுமன்ற உறுப்பினர் கரு ஜயசூரிய இக் கருத்தைத் தெரிவித்துள்ளார்.
அரசாங்கம் இன்றைய நிலையில் தான் மேற்கொள்ளும் ஜனநாயக விரோத நடவடிக்கைகளை இலகுவாக முன்னெடுப்பதற்கு எதிர்க்கட்சிகளை முடக்கி வைக்க முனைகின்றது.
அதன் காரணமாக நாட்டில் எந்தவொரு எதிர்க்கட்சிக்கும் அரசாங்கத்திற்கெதிரான ஆர்ப்பாட்டங்களையோ, ஊர்வலங்களையோ நடாத்த முடியாதுள்ளது.
அத்துடன் அரச ஊடகங்கள் அனைத்தும் மக்களிடம் உண்மையைக் கொண்டு செல்வதற்குப் பதிலாக வடிகட்டின பொய்கள் மூலமாக அரசாங்கத்தின் நோக்கங்களைப் பூர்த்தி செய்யவே துணை போகின்றன.
அவற்றுக்கு எதிராக வழக்குத் தொடர்வதாயின் நாளாந்தம் பல வழக்குகளைத் தொடுத்துக் கொண்டிருக்க வேண்டும்.
ஆயினும் எதிர்க்கட்சிகள் மட்டுமன்றி பொதுமக்களும் அரசாங்க ஊடகங்களின் பக்கச்சார்பான நடத்தை குறித்து நன்றாகவே புரிந்து கொண்டுள்ளதால், அதன் போலியான செய்திகள் மக்களிடம் எடுபடுவதில்லை என்றும் கரு ஜயசூரிய தொடர்ந்தும் சுட்டிக்காட்டியுள்ளார்.
*****************