Tuesday, 7 June 2011

செய்திகள் 07/06


பிரித்தானிய பாதுகாப்பு அமைச்சருடன் ஸ்ரீலங்கா அமைச்சர் சந்திப்பு
சிங்கப்பூருக்கு உத்தியோகபூர்வ விஜயத்தை மேற்கொண்டுள்ள ஸ்ரீலங்கா வெளிவிவகார அமைச்சர் ஜீ.எல்.பீரீஸ் பிரிட்டிஷ் பாதுகாப்பு அமைச்சர் லியாம் பொக்ஸை சந்தித்து பேச்சுவார்த்தை நடத்தியுள்ளார்.
இந்த சந்திப்பில் இரு நாடுகளுக்கும் இடையிலானஉறவுகள் மற்றும் ஏனைய பல்வேறு விடயங்கள் குறித்து விரிவாக ஆராயப்பட்டுள்ளதாக தெரிவிக்கப்படுகின்றது.
சிங்கப்பூல் நடைபெற்ற 10 ஆவது ஆசிய பாதுகாப்பு மாநாட்டில் கலந்துகொள்ளும் பொருட்டே வெளிவிவகார அமைச்சர் அங்கு விஜயம் மேற்கொண்டுள்ளார்.
இந்த மாநாட்டில் ஆயுத பாதுகாப்பு சவால்கள் எனும் தலைப்பில் அமைச்சர் பீரீஸ் உரையாற்றியிருந்தார்.
பிரிட்டிஷ் பாதுகாப்பு அமைச்சருடனான இந்த சந்திப்பின் போது கடற்படை தளபதி வைஸ் அட்மிரல் டி.டபிள்யூ.ஏ.எஸ். திசாநாயக்கவும் கலந்து கொண்டிருந்ததாக தெரிவிக்கப்பட்டுள்ளது.
இதேவேளை வெளிவிவகார அமைச்சர் பீரீஸ் ரஷ்யாவின் பிரதி பிரதமர் சேர்ஜி இவனவ்வுடனும் இருதரப்பு பேச்சு நடத்தியுள்ளார் என்றும் வெளிவிவகார அமைச்சு அறிவித்துள்ளது.
இம் மாநாட்டில் சிறிலங்காவின் சார்பில் பாதுகாப்பு அமைச்சரோ அல்லது பாதுகாப்பு செயலரோ கலந்து கொள்வதைத் தவிர்த்து கொண்டதற்கான காரணம் குறித்து பல்வேறு தகவல்களும் வெளியாகத் தொடங்கியுள்ளன.
இந்த மாநாட்டில் சிறிலங்கா மீதான போர்க்குற்றங்கள் மற்றும் மனிதஉரிமை மீறல் விவகாரங்கள் பற்றி கேள்விகள் எழுப்பப்பட்டால், அதற்குப் பதிலளிப்பதற்கு சிக்கல் ஏற்படலாம் என்பதாலேயே சிறிலங்காவின் சார்பில் வெளிவிவகார அமைச்சர் பீரிஸ் அனுப்பி வைக்கப்பட்டுள்ளார்.
பத்தாவது ஆசிய பாதுகாப்பு மாநாடு கடந்த 3ம் நாள் இரவு ஆரம்பமாகி 5ம் நாள் நிறைவடைந்தது.
சிங்கப்பூரின் சங்கிரி-லா விடுதியில் நடைபெற்ற இந்த மாநாட்டுக்கு மூலோபாயக் கற்கைகளுக்கான அனைத்துலக நிலையம் ஏற்பாடு செய்திருந்தது.
27 நாடுகளின் பாதுகாப்பு அமைச்சர்களுக்கு இந்த மாநாட்டில் பங்கேற்பதற்கான அழைப்புகள் அனுப்பப்பட்டிருந்தன.
சிறிலங்காவின் பாதுகாப்பு அமைச்சர் என்ற வகையில் அதிபர் மகிந்த ராஜபக்சவுக்கும் இந்த அழைப்பு விடுக்கப்பட்டிருந்தது.
பாதுகாப்பு அமைச்சர்களுக்கான இந்த மாநாட்டில், சிறிலங்காவின் சார்பில் வெளிவிவகார அமைச்சர் ஜி.எல்.பீரிஸ் தான் பங்கேற்றார்.
இவருடன் சிறிலங்கா கடற்படைத் தளபதி வைஸ் அட்மிரல் சோமதிலக திசநாயக்கவும் அனுப்பி வைக்கப்பட்டிருந்தார்.
இந்த மாநாட்டில் அமெரிக்க பாதுகாப்பு அமைச்சர் றொபேட் கேற், இந்திய பாதுகாப்பு இணை அமைச்சர் பல்லம் ராஜு, பிரித்தானியப் பாதுகாப்பு அமைச்சர் லியம் பொக்ஸ், ஜப்பான், இந்தோனேசியா, கொரியா, அவுஸ்ரேலியா, சிங்கப்பூர், நியுசிலாந்து, சிலி, ஜேர்மனி, மியான்மர், மலேசியா, வியட்னாம், பிலிப்பைன்ஸ், சீனா உள்ளிட்ட நாடுகளின் பாதுகாப்பு அமைச்சர்கள் கலந்து கொண்டனர்.
ஆனால் ஸ்ரீலங்காவில் இருந்து மட்டும் வெளிவிவகார அமைச்சர் சென்றிருந்தார்.
ஸ்ரீலங்கா அதிபர் இந்த மாநாட்டில் பங்கேற்காது போனாலும், பாதுகாப்புச் செயலர் கோத்தாபய ராஜபக்சவையும் கூட அவர் அனுப்பி வைக்கவில்லை.
சிறிலங்கா மீது எழுந்துள்ள போர்க்குற்றச்சாட்டுகளும் மனிதஉரிமை மீறல் குற்றச்சாட்டுகளுமே இதற்குக் காரணம் என்று கூறப்படுகிறது.
எனவே சிறிலங்கா தொடர்பான கேள்விகள் இந்த மாநாட்டில் கிளப்பப்படுவதை தவிர்க்கும் நோக்கிலேயே சிறிலங்காவின் சார்பில் வெளிவிவிகார அமைச்சர் பீரிஸ் அனுப்பி வைக்கப்பட்டதாகவும் தகவல்கள் தெரிவிக்கின்றன.
அத்துடன் சிறிலங்கா இராணுவம் மீதே அதிக குற்றச்சாட்டுகள் சுமத்தப்படுவதால், வெளிவிவகார அமைச்சருடன் இராணுவத் தளபதி லெப்.ஜெனரல் ஜெகத் ஜெயசூரியவும் அனுப்பி வைக்கப்படவில்லை.
அவருக்குப் பதிலாக கடற்படைத் தளபதி வைஸ் அட்மிரல் சோமதிலக திசநாயக்க ஆனுப்பி வைக்கப்பட்டதாகவும் தகவல்கள் தெரிவிக்கின்றன.
******************

காத்திருந்து கழுத்தறுக்கு வைக்கும் தந்திரம்!
இலங்கைப் போரின் இறுதிக்கால கட்டத்தில் இடம்பெற்ற போர்க் குற்றங்கள் தொடர்பில் ஐ.நா. நிபுணர்குழு வெளியிட்ட அறிக்கைக்கான பதிலை தாம் எதிர்பார்த்திருப்பதாக ஐ.நா. செயலாளர் நாயகம் பான் கீ மூன் தெரிவித்திருக்கின்றார்.
இந்த அறிக்கை தொடர்பில் ஸ்ரீலங்கா அரசாங்கம் உரிய நடவடிக்கையை மேற்கொள்வது அவசியமாகும்.
அதனைத்தான் சர்வதேச சமூகமும் எதிர்பார்த்திருக்கின்றது எனவும் பான் கீ மூன் இன்னர் சிட்டி பிரஸ் எழுப்பிய கேள்வி ஒன்றுக்குப் பதிலளிக்கும் போது தெரிவித்திருக்கின்றார்.
இது தொடர்பில் இன்னர் சிட்டி பிரஸ் வெளியிட்டுள்ள பிந்திய செய்தியில் இலங்கைப் போரின்போது குறிப்பாக போரின் இறுதிக்கால கட்டத்தில் ஐ.நா.வின் மனிதாபிமான மற்றும் பாதுகாப்புக்கான சாசனங்கள் எந்தளவுக்குப் பாதுகாக்கப்பட்டன என்பதையிட்டு நிபுணர்குழு வெளியிட்ட அறிக்கை தொடர்பில் நடவடிக்கை எடுக்கப்போவதாக ஏப்ரல் 25 ஆம் திகதி அறிவித்த பான் கீ மூன், அதனையடுத்து கடந்த 40 நாட்களாக அது தொடர்பாக எந்தக் கருத்தையும் வெளிப்படுத்தவில்லை.
இந்தப் போர்க் குற்றங்கள் தொடர்பில் சுயாதீன விசாரணை ஒன்று நடத்தப்பட வேண்டும் என நவநீதபிள்ளை தெரிவித்திருக்கும் கருத்தை பான் கீ மூன் ஆதரிக்கிறாரா என்பது பற்றியும், ஐ.நா.வின் நடவடிக்கைகளை மறபரிசீலனைக்கு உட்படுத்த வேண்டும் என்ற அவரது பரிந்துரைகள் தொடர்பாகவும், ஐ.நா. அதிகாரியான விஜய் நம்பியார் தொடர்பிலும், குறிப்பாக சரணடையுமாறு கேட்டுக்கொள்ளப்பட்டவர்கள் சுட்டுக்கொல்லப்பட்டமை தொடர்பாகவும் பான் கீ மூனிடம் இன்னர் சிட்டி பிரஸ் கேள்வி எழுப்பியது.
இதற்குப் பதிலளித்த பான் கீ மூன், அங்கத்துவ நாடுகளே இது தொடர்பான தீர்மானத்தை எடுக்க முடியும் எனத் தெரிவித்தார்.
கேள்வியின் இரண்டாவது பகுதிக்கு அவர் பதிலளிக்கவில்லை.
ஸ்ரீலங்கா அரசின் பதிலை தான் எதிர்பார்த்திருப்பதாகவும், தினசரி, வாராந்தம் ஸ்ரீலங்கா அரசிடமிருந்து பதில் வந்திருக்கின்றதா என்பதையிட்டு தான் பார்ப்பதாகவும் தெரிவித்தார்.
நிபுணர்குழுவின் அறிக்கையில் ஸ்ரீலங்கா அரசாங்கத்தினால் செய்யப்பட வேண்டிய பணிகள் தொடர்பாகவே அதிகளவுக்குக் கவனம் செலுத்தப்பட்டுள்ளது.
இலங்கையில் நிலையான சமாதானத்தை ஏற்படுத்துவதற்கு பொறுப்புக்கூறும் கடமைப்பாடு அவசியமானதாகும்.
நிபுணர் குழுவின் அறிக்கையை முழுமையாக அமுல் செய்வது தொடர்பாக ஸ்ரீலங்கா அரசுடன் தான் தொடர்ச்சியாகப் பேச்சுக்களை நடத்தவுள்ளதாகவும் இதனைத்தான் சர்வதேச சமூகமும் விரும்புகின்றது எனவும் ஐ.நா. செயலாளர் நாயகம் தெரிவித்துள்ளார்.
**************

சுதந்திரத்தை இழந்த சுதந்திர வர்த்தக வலயம்!
கட்டுநாயக்க சுதந்திர வர்த்தக வலயத்தில் இருந்து உடனடியாக இராணுவத்தினர் வெளியேற்றப்பட வேண்டும் என இலங்கையில் சக்தி வாய்ந்த தொழிற் சங்கங்கள் கோரிக்கை விடுத்துள்ளன என பீபீசி செய்தி வெளியிட்டுள்ளது.
இதேவேளை அரசு கட்டுநாயக்க சுதந்திர வர்த்தக வலயத்தில் உயர்பாதுப்பு வலயமாக அறிவிக்கும் திட்டத்தினையும் மீளப்பெற வேண்டும் என சுதந்திர வர்த்தக வலயத் தொழிலாளர் ஒன்றியத் தலைவர் அன்டன் மார்கஸ் தெரிவித்துள்ளார்.
மேலும், கடந்த 30 திகதி இடம்பெற்ற தாக்குதல் சம்பவத்தின் பின்னர் கட்டுநாயக்க சுதந்திர வர்த்தக வலயத்தில் பாதுகாப்பு படையினர் கடமையில் ஈடுபடுத்தப்பட்டுள்ளதாகவும் அவர் பீபீசிக்கு தெரிவித்துள்ளார்.
இந்நிலையில் அவர் போராட்டத்தின் போது இடம்பெற்ற தாக்குதலில் உயிரிழந்த இளைஞன் தொடர்பில் அரசு விசாரணைகளை மேற்கொண்டு உரியவர்களுக்கு தண்டனை வழங்க வேண்டும் என்றும் வலியுறுத்தியுள்ளார்.
அத்துடன் குறித்த சங்கம் ரோஷேன் சானக்க உட்பட பாதிப்புக்குள்ளாகியவர்களுக்கு 5 மில்லியன் வரையில் நஷ்டஈடு வழங்க வேண்டும் என கோரிக்கை விடுத்துள்ளது.
ஊழியர்களுக்கு எதிராக மேற்கொள்ளப்படும் பாதுகாப்பு படையினரின் நடவடிக்கைகள் உடனடியாக நிறுத்தப்பட வேண்டும் என அன்டன் மார்கஸ் தெரிவித்துள்ளார்.
**************

கூட்டமைப்பு உருவாகுமா? உருப்படுமா?
தமிழ்த்தேசியக் கூட்டமைப்பை அரசியல் கட்சியாக பதிவு செய்வது தொடர்பாக ஆராய்வதற்கான முக்கிய கூட்டம் நாளை மறுதினம் வியாழக்கிழமை கொழும்பில் உள்ள கட்சி அலுவலகத்தில் இடம்பெற இருக்கிறது.
கூட்டமைப்பை பதிவு செய்வது தொடர்பாக முன்னர் முயற்சி எடுக்கப்பட்டபோதும், கூட்டமைப்பில் இடம்பெறும் கட்சிகளின் விருப்பைப் பெறுவதில் ஏற்பட்ட சிக்கல் காரணமக அந்த முயற்சி தடைப்பட்டு வந்தது.
நாளை மறுதினம் இடம்பெறும் கூட்டத்தில் அரசியல் கட்சியாக கூட்டமைப்பை பதிவு செய்வது குறித்து முக்கியமாக ஆராயப்படும்.
கூட்டமைப்பின் கிளைகளை வெளிநாடுகளில் திறத்தல், உள்நாட்டில் மேலும் சில கிளைகளைத் திறத்தல் ஆகியன தொடர்பாகவும் கூட்டத்தில் ஆராயப்படும் எனத் தெரிவிக்கப்பட்டுள்ளது.
************

அமெரிக்க இரட்டை வேடம்
அமெரிக்கத் தூதரகப் படைத்துறை அதிகாரி நீதித்துறையில் மேற்கொள்ள முயற்சித்த குழப்பங்கள் மூலம் அமெரிக்காவின் இரட்டை வேடம் கலைந்துள்ளதாக இலிநோயிஸ் பல்கலைக்கழகத்தின் சட்டத்துறை பேராசிரியர் பிரான்சிஸ் பொயில்ட் தெரிவித்துள்ளார்.
அண்மையில் கொழும்பில் நடைபெற்ற யுத்தவெற்றி அனுபவப் பகிர்வு மாநாட்டில் கலந்துகொண்டு கருத்து வெளியிட்ட லெப். கேணல் லோரன்ஸ் ஸ்மித்தின் கருத்தின் பின்னனியில் அமெரிக்காவின் பாதுகாப்பு தலைமையகமான பென்டகனே இயங்கியுள்ளது.
இலங்கையின் அழைப்பை அமெரிக்காவின் வெளிவிவகாரத் திணைக்களம் நிராகரித்துள்ளபோதும், பென்டகனின் அனுமதியுடன் ஸ்மித் மாநாட்டில் பங்குபற்றியுள்ளார்.
உத்தியோகபூர்வமாக பங்குபற்றிய அவரின் கருத்துக்களும் உத்தியோகபூர்வமானவையே பென்ரகனின் கருத்தையே அவர் அங்கு வெளிப்படுத்தியுள்ளார்.
ஆனால் அவரின் கருத்து தனிப்பட்டது என அமெரிக்காவின் வெளியுறவுத்திணைக்களம் மறுத்துள்ளது.
விடுதலைப்புலிகளின் சரணடைவு நடவடிக்கைகளை சந்தேகிப்பதன் மூலம் ஸ்ரீலங்கா அரசு மீதான போர்க்குற்றச்சாட்டுக்களை வலுவிழக்கச் செய்ய அவர் முற்பட்டுள்ளார்.
இது ஒரு இரட்டை நிலைப்பாட்டையே வெளிப்படுத்துகின்றது.
எனவே தமிழ் மக்கள், அமெரிக்காவின் இந்த அணுகுமுறை தொடர்பில் மிகவும் அவதானத்துடன் செயற்பட வேண்டும் என அவர் மேலும் தெரிவித்துள்ளார்.
************
இலங்கையின் படுகொலைக் களம் - என்ன செய்ய வேண்டும்?
பிரித்தானியாவின் சனல்-4 தொலைக்காட்சி எதிர்வரும் ஜூன் 14ஆம் நாள் இரவு 11:00 மணிக்கு வெளியிடவுள்ள 'இலங்கையின் படுகொலைக்களம்' என்ற ஒரு மணித்தியால காணொளி விவரணப் படத்தை வேற்றினத்தவர் மத்தியில் கொண்டு செல்வதன் மூலம் சிறிலங்கா அரசு மீதான அழுத்தத்தை அதிகரிக்க முடியும் என பிரித்தானிய தமிழர் பேரவை விடுத்துள்ள அறிக்கையில் தெரிவித்துள்ளது.  
இலங்கையின் படுகொலைக்களம் எனும் காணொளி கடந்த 3ஆம் நாள் வெள்ளிக்கிழமை ஐக்கிய நாடுகள் சபையில் அனைத்துலக மன்னிப்புச்சபை, மற்றும் சனல்-4 தொலைக்காட்சி ஆகியவற்றின் இணைந்த ஏற்பாட்டில் ஐ.நா பிரதிநிதிகளுக்குக் காண்பிக்கப்பட்டது.
இதனைப் பார்வையுற்ற ஐ.நா மற்றும் மனிதநேய அமைப்புக்களின் பிரதிநிதிகள் அதிர்ச்சியில் உறைந்தது மட்டுமன்றி, ஐக்கிய நாடுகள் சபை நிபுணர் குழுவின் அறிக்கைக்கும் அப்பால் முள்ளிவாய்க்காலில் உண்மையில் என்ன நடந்தது என்பது பற்றி எண்ண தலைப்பட்டுள்ளனர்.
இது பற்றி செய்தி வெளியிட்ட சனல்-4 தொலைக்காட்சி, ஐக்கிய நாடுகள் சபை உரிய நேரத்தில் செயற்படத் தவறியமையை சுட்டிக்காட்டி, இது தமிழ் மக்கள் தமக்கிழைத்த துரோகமாகப் பார்க்கின்றனர் எனக் கூறியதுடன், இனியும் ஐ.நா விரைந்து செயற்படாது மௌனம் காக்கக்கூடாது எனக் கூறியிருந்தது. 
ஐக்கிய நாடுகள் மனித உரிமைகள் சபையில் இடம்பெற்றுவரும் 17வது கூட்டத்தொடர் விவாதத்தில், ஐ.நா மனித உரிமைகள் ஆணையாளரும், அமெரிக்கா, ஐரோப்பிய ஒன்றியம் போன்றனவும் சிறிலங்கா அரசாங்கம் மீதான கண்டனங்களை வெளியிட்டு, அழுத்தங்களைப் பிரயோகித்துள்ள போதிலும், பிரித்தானியா, ஜேர்மனி போன்ற ஐரோப்பிய நாடுகள் அங்கு அமைதி காத்துள்ளமை புலம்பெயர்ந்த மக்களை அதிர்ச்சிக்கு உள்ளாக்கியுள்ளது.  
பிரித்தானிய அரசாங்கம் மற்றும் எதிர்க்கட்சிகளுடன் மிக நெருங்கிய உறவைப்பேணி தமிழ் மக்களிற்கு என்ன நடந்தது, நடந்து கொண்டிருக்கின்றது என்பது பற்றி தொடர்ச்சியாக விளக்கம் அளிக்கப்பட்டு வருகின்ற போதிலும், நாடாளுமன்றத்தில் அனைத்துக் கட்சிக்குழு உருவாக்கப்பட்டு அதன் உறுப்பினர்களின் எண்ணிக்கை படிப்படியாக அதிகரித்து வருகின்ற போதிலும், இன்னும் கடும் பணியாற்றி இந்த அரசாங்கத்தின் ஆதரவை முழுமையாகப் பெற வேண்டிய காலத்தின் கட்டாயத்தில் உள்ளோம் எனவும் அந்த அறிக்கையில் சுட்டிக்காட்டப்பட்டுள்ளது.
புலம்பெயர்ந்த தமிழ் மக்கள் மட்டுமன்றி, எமது பிரச்சினையை வேற்றின மக்கள் மற்றும் அரசாங்க மட்டத்தினர், தொழிற்சங்கங்கள், தொழிலாளர் வர்க்கம், உரிமைக்காகக் குரல் கொடுப்போர், பாடசாலை மற்றும் கல்விச் சமூகம், சாதாரண பொதுமக்கள் என அனைத்துத் தரப்பினர் மத்தியிலும் கொண்டு செல்லும்போது அரசாங்கத்திற்கான அழுத்தம் மேலும் அதிகரிக்கும் என நம்புவதாகவும் பிரித்தானிய தமிழர் பேரவை தெரிவித்துள்ளது.
***************

Monday, 6 June 2011

செய்திகள் 06/06


தமிழரின் விடுதலைக்கான அங்கீகாரம் கோரும் வழக்கு

ஐரோப்பிய ஒன்றியத்தில் விடுதலைப் புலிகள் இயக்கத்துக்கு விதிக்கப்பட்டுள்ள தடை நீக்கப்படவேண்டும் என்று கோரி புலிகளின் ஐரோப்பிய பிரிவின் சார்பாக அம்ஸ்ரர்டாமில் இயங்கும் பொஹ்லர் குரூப்பின் சட்டத்தரணி விக்ரர் கொப்பே கடந்த வியாழன் அன்று ஐரோப்பிய நீதிமன்றில் வழக்குத் தாக்கல் செய்துள்ளார்.
விடுதலைப் புலிகள் தமது இலக்குகளை அடைவதற்கு இப்போது இராணுவ வழிமுறைகள் எதையும் பயன்படுத்துவதில்லை என்றும், முள்ளிவாய்க்கால் சூழலுக்குப் பின்னர் அவர்கள் அரசியல் மற்றும் வன்முறையற்ற முறைகளைப் பயன்படுத்தியே தமிழர்களுக்கான நீதியை அடைய, தமிழ் மக்களின் சுய தீர்மானத்துக்கான உரிமையை நடைமுறைப்படுத்த விளைகிறார்கள் என்றும் அவர் வாதாடியுள்ளார்.
மேலும் இந்த உரிமைகள் அடிப்படைச் சுதந்திரக் கொள்கைகளான பேச்சு, சங்கம், கூட்டம் மற்றும் நடமாட்டம் ஆகியவற்றால் பாதுகாக்கப்படுகின்றன என்றும் வாதாடியுள்ளார்.
ஆனால், விக்ரரின் வாதத்துக்காக ஐரோப்பிய ஒன்றியமோ அல்லது அதன் உறுப்புரிமை நாடுகளோ விட்டுக்கொடுக்கக் கூடாது என்று சட்டச் சவால் குறித்து பொஹ்லர் வெளியிட்டுள்ள ஊடக அறிக்கையில் கூறப்பட்டுள்ளது.
இந்த வழக்கானது சென்ற மாதத் தொடக்கத்தில் தாக்கல் செய்யப்பட்டமை குறிப்பிடத்தக்கது.
ஆனால் இவ்வழக்கில் புலிகள் சார்பாக வாதாடுவதற்கு கொப்பேக்கு சட்டத்தரணி அதிகாரம் லக்சம்பேர்க் நீதிமன்றால் வழங்கப்பட வேண்டும் என்பதால் அதன் விசாரணை தள்ளிப்போடப்பட்டது.
இப்போது சட்டத்தரணி அதிகாரம் கிடைத்துள்ளதை அடுத்து, விசாரணைகள் ஆரம்பமாகியுள்ள நிலையில் ஐரோப்பிய ஒன்றிய உறுப்புரிமை நாடுகளையும் ஐ.ஒ கவுன்சிலையும் நீதிமன்றுக்கு அழைத்து அவர்களின் அபிப்பிராயங்களைக் கேட்பது நீதிமன்றினைப் பொறுத்தது என்று கொப்பே கூறியுள்ளார்.
இந்த வழக்கு சாதகமான முடிவைக் கொண்டுவந்தால், தமிழ் புலம்பெயர்வாளர்கள் சுதந்திரமான சமாதானமான ஜனநாயகச் செயற்பாடுகளைத் தமது நாடுகளில் சுதந்திரமாக முன்னெடுக்கக் கூடியதாக இருக்கும்.
***********

இனப்படுகொலையை ஏற்றுக் கொள்ளவேண்டிய நிலைக்குள்ளான ஸ்ரீலங்கா!
வன்னி இராணுவ நடவடிக்கையின் போது பொதுமக்களின் உயிரிழப்புக்கள், காயமடைவதைத் தடுப்பதற்காக அரசாங்கம் பாதுகாப்பான நடவடிக்கைகளை மேற்கொண்டதாக அரசுத் தலைவரும், பாதுகாப்புச் செயலாளரும் அடிக்கடி கூறிவரும் நிலையில், இராணுவத் தளபதி லெப்டினன் ஜெனரல் ஜகத் ஜயசூரியா மோதல்களின் போது 1400 பொதுமக்கள் கொல்லப்பட்டதாக தெரிவித்திருப்பதன் மூலம் ஜெனீவா மனித உரிமைகள் ஆணைக்குழுவின் பேரவையில் கலந்துகொள்ள சென்றிருக்கின்ற அரசாங்க அமைச்சர்களும், அதிகாரிகளும் பெரும் சிரமத்திற்கு உள்ளாகியிருப்பதாக தெரியவருகிறது.
பயங்கரவாதத்தைத் தோற்கடித்தமை தொடர்பான செயலமர்வில் உரையாற்றிய இராணுவத் தளபதி சுமார் 1400 பொதுமக்கள் கொல்லப்பட்டிருக்கலாம் என தான் தனிப்பட்ட ரீதியில் நம்பவதாகக் கூறியிருந்தார்.
அத்துடன், காயமடைந்த பொதுமக்கள் தொடர்பாக தகவல்களும், இராணுவத்திடம் இல்லை எனவும் அவர் இந்தியாவில் வெளியாகும் இந்து பத்திரிகையிடம் கூறியிருந்தார்
இராணுவத் தளபதி இவ்வாறு தெரிவித்த போதிலும் சர்வதேச அமைப்புக்களின் கணிப்பீடுகளின் அடிப்படையில், வன்னி இராணுவ நடவடிக்கையின் போது 40 ஆயிரத்திற்கும் மேற்பட்ட பொதுமக்கள் கொல்லப்பட்டுள்ளதாக கூறப்படுகிறது.
எனினும் இலட்சக்கணக்கானவர்கள் கொல்லப்பட்டு விட்டார்கள் என்ற உண்மைத் தகவல்கள் ஏற்றுக் கொள்ளப்பட வேண்டிய ஸழல் வரும் என மனித உரிமை ஆர்வலர்கள் தெரிவித்துள்ளனர்.
************

தமிழ்த் தேசியக் கூட்டமைப்பின் நாடாளுமன்ற உறுப்பினருக்கு கொலை அச்சுறுத்தல்
தமிழ்த் தேசியக் கூட்டமைப்பின் யாழ். மாவட்ட நாடாளுமன்ற உறுப்பினரும், 'உதயன்' மற்றும் 'சுடரொளி' பத்திரிகை நிறுவனங்களின் நிர்வாக இயக்குநருமான ஈ.சரவணபவனுக்கு தொலைபேசி மூலம் கொலை அச்சுறுத்தல் விடுக்கப்பட்டுள்ளது.
நேற்றிரவு 9.25 மணியளவில் அவரது கைத்தொலைபேசிக்கு அடையாளம் தெரியாத ஒருவரிடம் இருந்து கிடைத்த தொலைபேசி அழைப்பு மூலமே கொலை அச்சுறுத்தல் விடுக்கப்பட்டுள்ளது.
அந்த அழைப்பில் பேசிய மர்ம நபர் "இனிமேலும் அரசுக்கும், அமைச்சர்களுக்கும் எதிராக கருத்துக்கள் வெளியிடுவதை நிறுத்த வேண்டும். அத்துடன் இரண்டு நாள்களுக்குள் நாட்டை விட்டுத் தப்பி ஓடிவிட வேண்டும்" என்று எச்சரித்துள்ளார்.
அத்துடன், "அப்படி தப்பி ஓடாவிட்டால் மரண தண்டனை விதிக்கப்படும்" என்றும் அந்த மர்மநபர் அச்சுறுத்தியுள்ளார்.
நீண்ட நேரமாகத் தொலைபேசியில் அச்சுறுத்திய அந்த மர்ம நபர், மிகவும் கீழ்த்தரமான வார்த்தைகளையும் பயன்படுத்தியதாகவும் கூறப்படுகிறது.
இதையடுத்து, இந்தக் கொலை அச்சுறுத்தல் தொடர்பாக யாழ்.காவல் நிலையத்தில் சரவணபவன் முறைப்பாடு ஒன்றைச் செய்துள்ளார்.
யாழ்.மாவட்ட காவல்துறைப் பொறுப்பதிகாரியுடன் உடனடியாகவே தொலைபேசியில் தொடர்பு கொண்ட சரவணபவன் தமக்கு வந்த அச்சுறுத்தல் குறித்து விளக்கியதுடன், அந்த மிரட்டல் அழைப்பு வந்த தொலைபேசி இலக்கத்தையும் வழங்கினார்.
நாடாளுமன்ற உறுப்பினர் என்ற வகையில், தனது அதிகாரபூர்வ கடிதத் தலைப்பில் எழுத்து மூல முறைப்பாட்டையும் அவர் உடனடியாக வழங்கியுள்ளார்.
வலிகாமம் வடக்குப் பகுதியில் நேற்றுக்காலை நடைபெற்ற மக்கள் சந்திப்பின் போது, சிறிலங்கா அரசையும், அமைச்சர் டக்ளஸ் தேவானந்தாவையும் கண்டித்து கடுமையான கருத்துக்களை சரவணபவன் வெளியிட்டிருந்தார் என்றும், இதன் விளைவாகவே தொலைபேசி ஊடான கொலை அச்சுறுத்தல் விடுக்கப்பட்டிருக்கலாம் என்றும் சந்தேகிக்கப்படுகிறது.
**************
சீனாவில் கடற்படைத் தள எண்ணம்?
இலங்கையில் நிரந்தர கடற்படை முகாம் அமைக்கும் திட்டம் கிடையாது என சீனா அறிவித்துள்ளது.
இந்தியாவின் அண்டை நாடுகளான பாகிஸ்தான் மற்றும் இலங்கையில் நிரந்தர கடற்படை முகாம்களை அமைப்பதற்கு சீனா முயற்சி மேற்கொண்டு வருவதாக வெளியாகும் தகவல்களில் உண்மையில்லை என சீன பாதுகாப்பு அமைச்சர் லியாங் கான்கில் தெரிவித்துள்ளார்.
சிங்கப்பூரில் நடைபெற்று வரும் பத்தாவது ஆசிய பாதுகாப்பு மாநாட்டில் கலந்து கொண்ட போது அவர் இதனைக் குறிப்பிட்டுள்ளார்.
இவ்வாறு முகாம் அமைக்கப்பட வேண்டுமென்றால் ஏற்கனவே திட்டமிடப்பட்டிருக்கும் என அவர் சுட்டிக்காட்டியுள்ளார்.
பாகிஸ்தானின் குட்வாரிலும், இலங்கைத் துறைமுகம் ஒன்றிலும் கடற்படை முகாம்களை அமைப்பதற்கு சீனா ஆர்வம் காட்டி வருவதாகக் குற்றம் சுமத்தப்பட்டிருந்தது
*************

அரசைக் கவிழ்க்க சதி? சிங்கள தேசத்தின் குழப்பம்.
ஜே.வி.பி. கட்சியானது அரசாங்கத்தைக் கவிழ்க்கும் சதிமுயற்சிகளில் ஈடுபட்டு வருவதாக அரச புலனாய்வுத்துறையின் சமீபத்திய அறிக்கைகள் தெரிவிக்கின்றன.
அதே நேரம் அரசாங்க உயர்மட்டத்தினரும் அந்த அறிக்கையின் தகவல்களை ஏற்றுக் கொண்டுள்ளதுடன் அவ்வாறான சூழ்ச்சித் திட்டங்களை முன்னெடுக்கும் சக்திகளுக்கு எதிராக சட்ட நடவடிக்கை எடுப்பதற்கு தயங்கப் போவதில்லை என்றும் தகவல் திணைக்களத்தின் அறிக்கை ஊடாக அரசாங்கம் அறிவித்துள்ளது.
சுதந்திர வர்த்தக வலய குழப்ப நிலைமைகளுக்கு ஜே.வி.பி கட்சி பொறுப்புச் சொல்ல வேண்டுமென வலியுறுத்தப்பட்டுள்ளது.
மக்களின் உரிமைப் போராட்டங்களைப் பயன்படுத்தி ஆட்சிய கவிழ்ப்பதற்கு ஜே.வி.பி. முனைப்பு காட்டி வருகின்றது.
எந்தவொரு விடயம் தொடர்பிலும் பேச்சுவார்த்தை நடத்துவதற்கு அலரி மாளிகையின் கதவு எப்போதும் திறந்தே இருக்கும் என அரசாங்கம் அறிவித்துள்ளது.
மேலும் அரச புலனாய்வுப் பிரிவினர் ஜே.வி.பி.யினரின் அரசைக் கவிழ்க்கும் சதி முயற்சிகள் குறித்து விசாரணை நடத்தி வருவதாக அரச புலனாய்வுத்துறை வெளியிட்டுள்ள அறிக்கையில் குறிப்பிடப்பட்டுள்ளது.
ஜே.வி.பி.யின் குண்டர்களே அண்மையில் சுதந்திர வர்த்தக வலய ஆர்ப்பாட்டங்களின் போது காவல்துறையினரைத் தாக்கி வன்முறையை ஏற்படுத்துவதில் மறைமுக பங்காற்றியதாகவும் அரச புலனாய்வுத்துறை அறிக்கைகள் குறிப்பிட்டுள்ளன.
மோதல் சம்பவத்தில் கொல்லப்பட்ட ரொசான் சானக்கவின் இறுதிக் கிரியைகளின் போதும் சிலர் குழப்பங்களை ஏற்படுத்த முயற்சித்த போதிலும், தொழிற்சங்க ஊழியர்கள் புத்திசாதுரியத்துடன் நடந்து அவ்வாறான நடவடிக்கைகளைத் தவிர்த்துக் கொண்டுள்ளனர்.
கலகங்களை ஏற்படுத்தாது அமைதியான முறையில் இறுதிச் சடங்கில் கலந்து கொண்ட அனைவருக்கும் அரசாங்கம் நன்றிகளைத் தெரிவித்துள்ளது.
போராட்டங்களின் போது 'மஹிந்த ராஜபக்ஷவை வீட்டுக்கு அனுப்பு' என்ற பதாகை ஏந்தி ஆர்ப்பாட்டம் நடத்தப்பட்டடுள்ளமை அக்கட்சியின் சதி முயற்சிகளை வெளிப்படையாகப் பிரதிபலிக்கும் ஒரு அம்சமாகும் எனவும் இதன் மூலம் ஜே.வி.பி.யின் உள்நோக்கம் அம்பலமாகியுள்ளது என்றும் தகவல் திணைக்கள அறிக்கையில் மேலும் குறிப்பிடப்பட்டுள்ளது.
***************

அரச ஆலவட்டங்களாகும் அதிகாரிகள்?
மக்களின் வரிப்பணத்தில் சம்பளம் பெறும் அரசாங்க உத்தியோகத்தர்கள் அரசாங்கத்தின் ஆலவட்டங்களாக உள்ளமை வேதனைக்குரியது என தமிழ்த் தேசியக் கூட்டமைப்பின் நாடாளுமன்ற உறுப்பினர் சுரேஷ் பிரேமச்சந்திரன் தெரிவித்தார்.
அத்துடன் வடக்கு கிழக்கில் அனைத்து நடவடிக்கைகளும் இராணுவ நிகழ்ச்சி நிரலின் கீழ் நடைபெறுவதாகவும் அவர் குற்றம் சாட்டினார்.
வலி.வடக்கில் மீள்குடியமரும் மக்களின் தேவை குறித்து நேற்று நடைபெற்ற விசேட கூட்டத்தில் கலந்துகொண்டு உரையாற்றுகையிலேயே நாடாளுமன்ற உறுப்பினர் சுரேஷ் பிரேமச்சந்திரன் இதனைத் தெரிவித்தார்.
இக்கூட்டம் மீள்குடியேறும் மக்களின் பிரச்சினைகளுக்கு தீர்வு காண்பதற்காக கூட்டப்பட்டது.
எனினும் யாழ்.அரச அதிபரோ, தெல்லிப்பழை பிரதேச செயலரோ, கிராம உத்தியோகத்தர்களோ இக்கூட்டத்திற்கு வருகை தரவில்லை.
இவ்வாறு அரச அதிகாரிகள் இக்கூட்டத்தில் கலந்துகொள்ளாமைக்கு காரணம் கொக்காவிலுக்கு இன்று அரசுத் தலைவர் வருகை தருவதால் அதற்கான ஒழுங்கமைப்பு கூட்டம் ஒன்றை யாழ்.அரச அதிபர் ஒழுங்கமைத்தால் செல்லவில்லை எனத் தெரிவிக்கப்பட்டுள்ளது.
எனவே மக்களின் வரிப்பணத்தில் சம்பளம் பெறும் அரச உத்தியோகத்தர்கள் அரசாங்கத்தின் ஆலவட்டங்களாக செயற்படுகின்றமை வேதனைக்குரியது.
நாடாளுமன்ற உறுப்பினர்கள் கலந்துகொள்ளும் இக்கூட்டத்தில் மக்களின் சேவைக்காக வழங்கப்பட்டுள்ள உத்தியோகத்தை இவ் அதிகாரிகள் துஷ்பிரயோகம் செய்கிறார்கள் எனவும் அவர் தெரிவித்துள்ளார்.
**************


Sunday, 5 June 2011

செய்திகள் 05/06


எச்சரிக்கைக்கு எச்சரிக்கை விடும் இராஜதந்திரம்?
தனக்கு எச்சரிக்கை விடுத்த ஜேர்மனி நாட்டுத் தூதுவரை பாதுகாப்பு அமைச்சுக்கு அவசரமாக அழைத்து சிறிலங்காவின் பாதுகாப்புச் செயலர் கோத்தாபய ராஜபக்ச கண்டித்துள்ளார்.
கட்டுநாயக்கவில் சுதந்திர வர்த்தக வலய ஊழியர்கள் மீது சிறிலங்கா காவல்துறை நடத்திய தாக்குதலைக் கண்டித்து கடும்தொனியில்- எச்சரிக்கை விடுக்கும் இரண்டு பக்கக் கடிதம் ஒன்றை ஜேர்மனித் தூதுவர் ஜீன்ஸ் புளொட்னர் சிறிலங்கா பாதுகாப்பு செயலருக்கு அனுப்பியிருந்தார்.
இதையடுத்து அவரை பாதுகாப்பு அமைச்சுக்கு அழைத்த கோத்தாபய ராஜபக்ச, தனக்கு எச்சரிக்கை கடிதம் அனுப்பியதன் மூலம் இராஜதந்திர வழி முறையை மீறியுள்ளதாக கண்டித்துள்ளார்.
இந்தச் சம்பவம் பற்றிக் கவலை கொண்டால் அதுபற்றி வெளிவிவகார அமைச்சுக்கே கடிதம் எழுதியிருக்க வேண்டும் என்றும், பாதுகாப்பு அமைச்சுக்கு எழுதியிருக்கக் கூடாது என்றும் அவர் அழுத்திக் கூறியுள்ளார்.
அத்துடன் ஜேர்மனித் தூதுவர் இந்தச் சம்பவத்தில் காவல்துறைக் கொமாண்டோக்களும் தொடர்புபட்டிருந்ததாக கூறியுள்ள குற்றச்சாட்டையும் நிராகரித்துள்ளார்.
சிறப்பு அதிரடிப்படையினர் இதில் சம்பந்தப்படவில்லை என்பதை அவர் வலியுறுத்தியுள்ளார்.
மேலும் காவல்துறை மா அதிபர் ஒருவர் உள்ளிட்ட 25 காவலர்கள் இந்தச் சம்பவத்தில் எப்படிக் காயமடைந்தனர் என்பதையும் ஜேர்மனித் தூதுவர் புறக்கணித்து விட்டதாகவும் அவர் கடிந்து கொண்டுள்ளார்.
*************
இந்திய தூதுக்குழு விரைவில் கொழும்புக்கு!
இந்திய வெளிவிவகாரச் செயலர் நிருபமா ராவ் மற்றும் தேசிய பாதுகாப்பு ஆலோசகர் சிவசங்கர் மேனன் ஆகியோர் அடுத்த வார பிற்பகுதியில் கொழும்பு செல்லவுள்ளனர்.
இதன்போது இவர்கள் அண்மையில் சிறிலங்கா வெளிவிவகார அமைச்சர் ஜி.எல்.பீரிசின் புதுடெல்லிப் பயணத்தின் போது வெளியிடப்பட்ட கூட்டறிக்கையில் கூறப்பட்டுள்ள விடயங்களை நடைமுறைப்படுத்துமாறு மீளவும் வலியுறுத்தவுள்ளதாக சண்டே ரைம்ஸ் தகவல் வெளியிட்டுள்ளது.
இந்தியாவின் உயர்மட்டக் குழுவினர், சிறிலங்கா அதிபர் மகிந்த ராஜபக்ச உள்ளிட்ட பல தலைவர்களையும் சந்தித்துப் பேசவுள்ளனர்.
முன்னதாக இந்தக் குழுவினர் மேற்கொள்ளத் திட்டமிட்ட பயணம் காரணம் ஏதும் கூறப்படாமல் பிற்போடப்பட்டிருந்தது.
முன்னர் இந்தக் குழுவில் இடம்பெற்றிருப்பதாக அறிவிக்கப்பட்ட இந்தியாவின் பாதுகாப்புச் செயலர் பிரதீப் குமார் கொழும்பு வரமாட்டார் என்றும் அறிவிக்கப்பட்டுள்ளது.
இவர் இந்தப் பதவியில் நீடிப்பாரா என்ற சந்தேகம் உள்ளதால், கொழும்புக்கான பயணத்தை மேற்கொள்ளவில்லை என்றும் அந்தச் செய்தியில் கூறப்பட்டுள்ளது.
இதனிடையே இந்தியாவின் உயர்மட்டக் குழுவினரின் பயணத் திகதி இன்னும் தீர்மானிக்கப்படவில்லை என்றும், பெரும்பாலும் இம்மாதம் 16ம் நாள் அல்லது அதற்குப் பின்னராக இருக்கலாம் என்றும் லக்பிம வாரஏடு தகவல் வெளியிட்டுள்ளது.
இதனிடையே, சிறிலங்கா கூட்டறிக்கையை நடைமுறைப்படுத்துவதன் முன்னேற்றங்கள் குறித்து இந்தியா உன்னிப்பாக அவதானித்து வருவதாக புதுடெல்லி சென்றிருந்த எதிர்க்கட்சித் தலைவர் ரணில் விக்கிரமசிங்கவிடம், இந்திய வெளிவிவகார அமைச்சர் எஸ். எம்.கிருஸ்ணா, நிதி அமைச்சர் பிரணாப் முகர்ஜி, வெளிவிவகார செயலர் நிருபமா ராவ், தேசிய பாதுகாப்பு ஆலோசகர் சிவசங்கர் மேனன் ஆகியோர் கூறியுள்ளனர்.
இந்தத் தகவலை கொழும்பு திரும்பிய ரணில் விக்கிரமசிங்க வெளியிட்டுள்ளார்
****************
மீண்டும் அழுத்தம், எதையாவது சாதிக்குமா?
ஜெனீவாவில் நடைபெற்று வரும் ஐக்கிய நாடுகள் மனித உரிமைகள் சபையின் 17ஆவது கூட்டத் தொடரில் "சிறிலங்காவின் கொலைக்களம்" என்ற ஆவணப்படம் அனைத்துலக மன்னிப்புச் சபையின் ஏற்பாட்டில் காண்பிக்கப்பட்டதைத் தொடர்ந்து, போர்க்குற்றச் சாட்டுக்கள் தொடர்பான விசாரணைகள் நடத்தப்பட வேண்டும் என்று புதிய அழுத்தங்கள் ஸ்ரீலங்கா அரசுக்கு ஏற்பட்டுள்ளன.
மேற்கு நாடுகளின் பிரதிநிதிகளும் மனித உரிமை அமைப்புக்களும் இந்த அழுத்தங்களைக் கொடுக்க ஆரம்பித்துள்ளன.
இறுதிப் போரின் போது இடம்பெற்ற மனிதப் பேரவலத்தைப் பற்றி பிரிட்டனின் "சனல்4" தொலைக்காட்சி ஒருமணி நேர ஆவணப்படத்தைத் தயாரித்திருந்தது.
அனைத்துலக மன்னிப்புச் சபையின் ஏற்பாட்டில் இந்த ஆவணப்படம் ஐ.நா. மனித உரிமைகள் சபையில் காண்பிக்கப்பட்டது.
பலநாடுகளின் தூதர்கள் அதனைப் பார்த்துக் கண்ணீர் விட்டுக் கலங்கினர்.
அதில் இடம்பெற்றிருந்த பல காட்சிகளைத் தம்மால் பார்க்க முடியவில்லை என்று பலர் தெரிவித்தனர்.
ஆவணப்படம் காட்சிப்படுத்தப்பட்ட போது ஸ்ரீலங்காவின் பிரதிநிதியாகக் கலந்து கொண்டிருந்த பிரதி சட்டமா அதிபர் ஏ.எம்.டி.நவாஸ், அந்தக் காட்சிகள் பொய்யானவை என்று பின்னர் கலந்துரையாடலில் மறுத்தார்.
அந்த வீடியோ நம்பகத்தன்மையற்றது என்றார்.
ஆனால், கலந்துரையாடலுக்குத் தலைமை வகித்த அனைத்துலக மன்னிப்புச் சபையின் ஆசிய பிராந்திய பணிப்பாளர், போர்க் குற்றங்கள் என்று திட்டவட்டமாகத் தெரிவிக்கக்கூடிய குற்றங்களில் ஸ்ரீலங்கா அரசு ஈடுபட்டுள்ளது என்பதை இந்த ஆவணப்படம் உறுதிப்படுத்துவதாகத் தெரிவித்தார்.
அனைத்துலக மனித உரிமைச் சட்டங்களும் மனிதாபிமானச் சட்டங்களும் மீறப்பட்டுள்ளன என்பது தெளிவாகிறது.
வைத்தியசாலைகள் போன்ற இடங்கள் மீது மீண்டும் மீண்டும் ஷெல் தாக்குதல்கள் நடத்தப்பட்டுள்ளன.
ஒரு தடவை இரண்டு தடவைகள் அல்ல. 65 தடவைகள் நடத்தப்பட்டுள்ளன என்றார்.
ஆவணப்படத்தைப் பார்வையிட்ட பின்னர் கருத்துத் தெரிவித்த மனித உரிமைகள் சபைக்கான அமெரிக்கா தூதர் எலீன் டொனாகோ, போர்க் குற்றச்சாட்டுக்களுக்குப் பொறுப்புக்கூற வேண்டிய அவசியத்தை மீண்டும் ஒரு தடவை இது நிரூபித்துள்ளது என்றார்.
ஐ.நா. நிபுணர் குழுவின் அறிக்கைக்கு ஆக்கபூர்வமான வகையில் பதிலளிக்குமாறு ஸ்ரீலங்கா அரசிடம் தாம் வலியுறுத்துவதாகவும் இலங்கை மக்களின் நல்லிணக்கத்துக்கும் குற்றச்சாட்டுக்களுக்குப் பொறுப்புக் கூறுவதற்குமான அடுத்த கட்ட நடவடிக்கைகள் குறித்து கொழும்பு சிந்திக்க வேண்டும் என்றும் அவர் தெரிவித்தார்.
இலங்கையில் நல்லிணக்கம் பற்றி அரசு கூறிவருகின்ற போதும், வடக்கு மக்களின் சார்பில் பேசவல்லவர்களிடம் கேட்டால் அங்கு எதுவுமே நடக்கவில்லை என்பதை அறிய முடியும் என்று அனைத்துலக மன்னிப்புச் சபையைச் சேர்ந்த பீற்றர் பிலின்டர் தெரிவித்துள்ளார்.
**************
அறியாமாலே வெளியாகும் உண்மைகள்!
கொழும்பில் கடந்த வாரம் இடம்பெற்ற சர்வதேச இராணுவக் கருத்தரங்கின் போது உண்மையில் கடினமான விதத்தில் சில கேள்விகளே எழுப்பப்பட்டிருந்ததாகவும் இறுதியில் அவை எவற்றிற்கும் பதிலளிக்கப்பட்டிருக்கவில்லையெனவும் த எக்கனோமிஸ்ட் சஞ்சிகை வெள்ளிக்கிழமை தெரிவித்துள்ளது.
உரிமைகள் குழுக்கள் இதனை போர்க்குற்ற வெள்ளையடிப்புக்கான முயற்சி எனக் குறிப்பிட்டிருந்தனர்.
ஸ்ரீலங்கா இராணுவத்தால் நடத்தப்பட்ட இந்த மூன்றுநாள் கருத்தரங்கில் கலந்துகொண்ட பேராளர்களில் பலர் அதனிலும் பார்க்க சிறப்பான ஏதோ ஒன்று இருக்கும் என்று கருதியிருந்தனர்.
பொது மக்கள் இழப்புகள் எதுவுமின்றி தமிழ்ப் புலிகளை ஸ்ரீலங்கா இராணுவம் எவ்வாறு தோற்கடித்தது என்பது தொடர்பாக உலகின் கிளர்ச்சிக்கெதிரான நடவடிக்கைகளுக்குக் கற்பிப்பதற்கு உதவியாக இந்த அமர்வுகள் இடம்பெற்றதாகக் கருதப்பட்டது.
ஜூன் 2 இல் கருத்தரங்கு முடிவடைந்தது.
ஜெனீவாவிலுள்ள ஐ.நா. மனித உரிமைகள் பேரவையில் யுத்தத்தின் இறுதி நாட்களின் போது ஸ்ரீலங்காப் படையினர் பொதுமக்களுக்கு நீதி விசாரணைக்குப் புறம்பான தண்டனைகளை நிறைவேற்றுவதாகக் குற்றஞ்சாட்டப்படும் ஒளிநாடாவை ஐ.நா. விசேட அறிக்கையாளர் காண்பித்த மறுதினம் இந்த கருத்தரங்கு முடிவடைந்திருந்தது.
போர்க் குற்றச்சாட்டு தொடர்பாக முன்வைக்கப்படும் ஒவ்வொரு கருத்துகளையும் அரசாங்கம் மறுத்துள்ளது.
கருத்தரங்கில் சுய பாராட்டு உரைகள் இடம்பெற்றதுடன், பொது மக்களின் இழப்புகள் மிகவும் சொற்பமானவை எனத் தெரிவிக்கப்பட்டது.
பொது மக்கள் மத்தியிலிருந்து புலிகள் படையினர் மீது ஆட்லறி மோட்டார்த் தாக்குதல்களை மேற்கொண்ட போது அதற்குப் பதில் தாக்குதல்களை மேற்கொள்வதை இராணுவம் தவிர்த்திருந்ததாகத் தெரிவிக்கப்பட்டது.
ஆனால், பொதுமக்களின் இழப்புகள் ஏற்படாமல் எவ்வாறு புலிகளை அழிக்க முடிந்தது என்று அமர்வுகளில் கலந்துகொண்டோரிடம் சபையிலுள்ள உறுப்பினர்கள் கேள்வி எழுப்பியிருந்தனர்.
ஆயிரக் கணக்கான பொதுமக்களைப் புலிகள் பணயக் கைதிகளாக வைத்திருந்த நிலையிலும் முன்னேறி வரும் படையினருக்கு எதிராக மனிதக் கேடயங்களாக வைத்திருந்த நிலையிலும் எவ்வாறு புலிகளை ஏனையோரிடமிருந்து வேறுபடுத்தி அழிக்க முடிந்தது என்று கேட்கப்பட்டது.
பதில்கள் நம்பிக்கையை ஏற்படுத்துபவையாக இருக்கவில்லை.
தற்போது நியூயோர்க்கில் ஐ.நா.வுக்கான இலங்கையின் பிரதித் தூதுவராக பணிபுரியும் மேஜர் ஜெனரல் சவேந்திர சில்வா மாநாட்டு அமர்வுகளில் பங்கேற்றிருந்தார்.
புலிகளின் நிலைகள் மீதே இராணுவம் தாக்குதல்களை மேற்கொண்டதாகவும் அத்துடன் அடையாளம் காணப்பட்ட புலிகள் மற்றும் அவர்களின் இலக்குகள் மீதே துப்பாக்கிப் பிரயோகம் மேற்கொண்டதாகவும் அவர் தெரிவித்துள்ளார்.
ஆனால், யுத்தத்தின் இறுதிக் கட்டத்தில் புலிகள் சிவில் ஆடைகளுடன் சண்டையிட்டதாக இராணுவத் தரப்பில் தெரிவிக்கப்பட்டிருந்தது.
இவ்வாறான நிலையில் அப்பாவிகளிடமிருந்து புலிகளை எவ்வாறு வேறுபடுத்தியிருக்க முடியும். அதனை ஜெனரல் சில்வா விளங்கப்படுத்தியிருக்கவில்லை எனவும் அதில் சுட்டிக்காட்டப்பட்டுள்ளது.
மனித உரிமைகள் துஷ்பிரயோக குற்றச்சாட்டு குறித்து ஒரேயொரு பேச்சாளர் மட்டுமே உரையாற்றிருந்தார்.
அவர் இலங்கையர் அல்லர் அவுஸ்திரேலியாவின் கிளர்ச்சிக்கெதிரான நடவடிக்கைகளுக்கான ஆலோசகரான டேவிட் கில்சுலன் என்பவரே மனித உரிமைகள் துஷ்பிரயோகங்கள் குறித்து கேள்வி எழுப்பியிருந்தார்.
துஷ்பிரயோகக் குற்றச்சாட்டுகள் தொடர்பாக வெளிப்படையானதும் நேர்மையானதுமான கலந்துரையாடல்கள் இல்லாமல் இலங்கையின் முன்மாதிரியை சர்வதேச சமூகம் எவ்வாறு ஏற்றுக்கொள்ளும் என்பதைப் பார்ப்பது கடினமான விடயம் என அவர் கூறியிருந்தார் என்று த எக்கனமிஸ்ட் சஞ்சிகை தெரிவித்துள்ளது.
******************
சிங்கள ஜனநாயகத்தை கட்டுப்படுத்த தமிழின அழிப்புப் படையா?
எதிர்வரும் காலங்களில் போராட்டங்கள் மற்றும் ஆர்ப்பாட்டங்களை தடுப்பதற்கு இராணுவத்தினரை ஈடுபடுத்துவதற்கு அரசாங்கம் திட்டமிட்டுள்ளது.
கட்டுநாயக்க சுதந்திர வர்த்தக வலய மோதல் சம்பவத்தில் காவல்துறையினர் பல்வேறு தவறுகளை இழைத்துள்ளதாக குற்றம் சுமத்தப்பட்டுள்ளது.
எனவே எதிர்வரும் காலங்களில் கலகங்களை தடுப்பதற்கு காவல்துறையினரை ஈடுபடுத்தும் உத்தேசம் கிடையாது எனவும், போராட்டங்கள் மற்றும் ஆர்ப்பாட்டங்களைத் தடுப்பதற்கு இராணுவத்தினரை கடமையில் ஈடுபடுத்தத் திட்டமிட்டுள்ளதாகவும் குறிப்பிடப்படுகிறது.
கட்டுநாயக்கவை அண்டிய முதலீட்டு ஊக்குவிப்பு வலயத்தின் பாதுகாப்பும் இராணுவத்தினரிடம் ஒப்படைக்கப்பட்டுள்ளது.
கட்டுநாயக்க சம்பவத்தின் காரணமாக ஊழியர்கள் காவல்துறையினர் மீது கோபம் கொண்டுள்ளதாகவும், மீளவும் காவல்துறையினரை கடமையில் ஈடுபடுத்துவது பிரச்சினைகளை தோற்றுவிக்கும் எனவும் அரசாங்கத் தரப்பு தகவல்கள் தெரிவிக்கின்றன.
இதேவேளை, காவல்துறையினருக்கு ஒழுக்கம் தொடர்பான வழிகாட்டல்கள் வழங்கப்படவுள்ளன.
முரண்பாடான நிலைமைகளின் போது எவ்வாறு செயற்பட வேண்டும் என்பது தொடர்பில் பயிற்சி அளிக்கப்பட உள்ளது.
******************
மக்கள் பணத்தைச் சுரண்டும் தனியார் ஓய்வூதியம்!
தனியார்தறை ஊழியர்களின் பணத்தை அபகரிக்கும் நோக்கில் ஓய்வூதியத் திட்டம் முன்வைக்கப்பட்டதாக தமிழ்த் தேசியக் கூட்டமைப்பு நாடாளுமன்ற உறுப்பினர் எம்.சுமந்திரன் தெரிவித்துள்ளார்.
கட்டுநாயக்க சுதந்திர வர்த்தக வலய தாக்குதல் சம்பவம் தொடர்பில் கருத்து வெளியிட்ட போது அவர் இதனைக் குறிப்பிட்டுள்ளார்.
தனியார்துறை ஊழியர்கள் ஆயுள் முழுவதிலும் உழைத்த பணத்தை அரசாங்கம் கபடமான முறையில் அபகரிக்க முயற்சிப்பதாக அவர் சுட்டிக்காட்டியுள்ளார்.
தனியார்துறை ஊழியர்களுக்கு ஓய்வூதியம் வழங்கப்பட வேண்டும் என்பதில் மாற்றுக் கருத்து இல்லை எனினும், அது அரசாங்கத்தின் பணத்திலிருந்து வழங்கப்பட வேண்டுமென அவர் வலியுறுத்தியுள்ளார்.
தனியார்துறை ஓய்வூதியத் திட்டத்திற்கு எதிர்ப்பு வெளியிடும் நபர்களை கட்டுப்படுத்தும் நோக்கில் தாக்குதல்கள் நடத்தப்பட்டதாக அவர் தெரிவித்துள்ளார்.
ஆர்ப்பாட்டங்கள் மற்றும் போராட்டங்களை நடத்தும் மக்களின் உரிமைகளை முடக்குவதற்கு அரசாங்கம் முயற்சி மேற்கொண்டு வருவதாக அவர் குற்றம் சுமத்தியுள்ளார்.
இவ்வாறான தாக்குதல்களின் மூலம் நாட்டின் முதலீட்டுத் துறைக்கு பெரும் பாதிப்பு ஏற்படக் கூடுமெனவும் அவர் சுட்டிக்காட்டியுள்ளார்.
*************

Saturday, 4 June 2011

செய்திகள் 04/06


நீதிகோரி யாழில் உண்ணாவிரதம்!
போரினால் பாதிக்கப்பட்ட மக்களின் பிரச்சினைகளை தீர்க்கக் கோரி யாழ். துரையப்பா விளையாட்டரங்களில் ஒருவர் இன்று உண்ணாவிரதம் ஆரம்பித்துள்ளார்.
போரினால் பாதிக்கப்பட்ட பிரதேச மக்கள் அமைப்பின் பிரதிநிதியான வவுனியாவைச் சேர்ந்த என். சகாதேவன் என்பவரே இவ்வாறு உண்ணாவிரதம் மேற்கொள்கிறார்.
கடந்த கால போரின் காரணமாக, இழக்கப்பட்ட உயிர் உடமைகளுக்கு இதுவரை நிவாரணம் வழங்கப்படவில்லை எனவும் போரினால் பாதிக்கப்பட்ட மக்களுக்கு ஐ.நா. உதவி வழங்க வேண்டுமெனவும் கோரி அவர் உண்ணாவிரதம் ஆரம்பித்துள்ளார். 
இம்மக்களின் பிரச்சினைகள் தீர்க்கப்படவில்லையெனில் சாகும் வரையிலான உண்ணாவிரதப் போராட்டத்தை மேற்கொள்ளவுள்ளதாகவும் அவர் தெரிவித்துள்ளார்.
************
கட்டுநாயக்கா ஊமியரின் இறுதிச் சடங்கு இன்று
சிறிலங்கா காவல்துறையினரின் துப்பாக்கிச் சூட்டில் காயமடைந்து மருத்துவமனையில் மரணமான கட்டுநாயக்க சுதந்திர வர்த்தக வலய ஊழியரின் இறுதிச்சடங்கு இன்று மினுவாங்கொடையில் நடைபெறவுள்ளது.
சுதந்திர வர்த்தக வலய ஊழியர்கள் மீதான தாக்குதல்களைக் கண்டித்து சிறிலங்காவில் பரவலான எதிர்ப்புப் போராட்டங்கள் நடைபெற்று வருகின்ற நிலையில், இறுதிச்சடங்கிலும் மோதல்கள் வெடிக்கலாம் என்று சிறிலங்கா அரசாங்கம் அச்சம் கொண்டுள்ளது.
மினுவாங்கொட கல்ஒலுவ கத்தோலிக்க சேமக்காலையில் இறுதிச்சடங்கு நடைபெறவுள்ளது.
இதனால் வன்முறைகள் வெடிப்பதை தடுக்கும் நோக்கில் கம்பகா மாவட்டத்தில் சிறிலங்கா காவல்துறையினர், சிறப்பு அதிரடிப்படையினர், இராணுவத்தினர் என்று ஆயிரக்கணக்கான படையினர் குவிக்கப்பட்டு பாதுகாப்பு பலப்படுத்தப்பட்டுள்ளது.
இந்த நிகழ்வில் பெருந்தொகையான சுதந்திர வர்த்தக வலய ஊழியர்கள், தொழிற்சங்கங்களின் பிரதிநிதிகள் கலந்து கொள்வர் என்று எதிர்பார்க்கப்படுகிறது.
கொல்லப்பட்ட ஊழியரின் இறுதிச்சடங்கை முன்னிட்டு சுதந்திர வர்த்தக வலய ஊழியர்கள் இன்று விடுமுறை வழங்குமாறு விடுத்த வேண்டுகோளும் நிராகரிக்கப்பட்டுள்ளது.
அதேவேளை இந்த இறுதிச்சடங்கில் எவரும் எதிர்ப்பு முழக்கங்களை எழுப்பக் கூடாது என்றும், அவ்வாறு முழக்கங்களை எழுப்புவோர் நீதிமன்ற அவமதிப்பு வழக்கைச் சந்திக்க நேரிடும் என்றும் சிறிலங்கா காவல்துறையினர் எச்சரித்துள்ளனர்.
*************
ஐதேக ஆர்ப்பாட்டம்
கட்டுநாயக்கா சுதந்திர வர்த்தக வலயத்தில் ஊழியர் ஒருவர் சுட்டுக்கொல்லப்பட்டதற்கும் ஆர்ப்பாட்டத்தில் ஈடுபட்ட தொழிலாளர்கள் மீது கண்மூடித்தனமான தாக்குதல் நடத்தப்பட்டதற்கும் முழுப்பொறுப்பேற்று, பாதுகாப்புச் செயலாளர் கோத்தபாய ராஜபக்ஷ பதவி விலக வேண்டும் என்று ஐக்கியத் தேசியக் கட்சி வலியுறுத்தி உள்ளது.
ஐக்கிய தேசியக் கட்சியின் ஊடகவியலாளர் மாநாடு நேற்றுக் காலை எதிர்க்கட்சித் தலைவரின் உத்தியோகபூர்வ இல்லத்தில் நடைபெற்றது.
இதில் கலந்துகொண்டு உரையாற்றிய அக்கட்சியின் பதுளை மாவட்ட நாடாளுமன்ற உறுப்பினர் ஹரின் பெர்னாண்டோ காவல்துறை மா அதிபரைப் போன்று பாதுகாப்புச் செயலரும் பதவி விலக வேண்டும் என்று கோரிக்கை விடுத்துள்ளார்.
கட்டுநாயக்க சுதந்திர வர்த்தக வலய ஊழியர் ரொஷான் சானக்க காவல்துறையினரின் துப்பாக்கிப் பிரயோகத்தில் பலியான சம்பவத்துக்கு எதிராக ஐக்கிய தேசியக்கட்சி மாபெரும் ஆர்ப்பாட்டமொன்றை நடத்த உள்ளது.
இந்த ஆர்ப்பாட்டத்தை எதிர்வரும் 9ஆம் திகதி வியாழக்கிழமை எதிர்க்கட்சித் தலைவர் ரணில் விக்கிரமசிங்க தலைமையில் மருதானைச் சந்தியில் நடத்த தீர்மானித்துள்ளதாகவும் தெரிவித்துள்ளார்.
ஐக்கிய நாடுகளின் கொழும்பு அலுவலகத்துக்கு முன்பாக அமைச்சர் விமல் வீரவன்ஸ ஆர்ப்பாட்டத்தில் ஈடுபட்டபோதும் அங்கிருந்த காவல்துறை அதிகாரியின் தொப்பியைக் கழற்றி அவமானப்படுத்திய போதும் ஆத்திரமடைந்து தாக்குதல் நடத்தாத காவல்துறையினர் அமைதியான முறையில் ஆர்ப்பாட்டம் நடத்திய கட்டுநாயக்க சுதந்திர வர்த்தக வலய ஊழியர்கள் மீது தாக்குதல் நடத்தியது ஏன்? இதன் பின்புலம் என்ன? எனவும் அவர் கேள்வி எழுப்பினார்.
***************
படகு விபத்தில் ஓரே குடுப்பத்தைச் சேர்ந்த ஐவர் பலி
மட்டக்களப்பு மாவட்டத்தின் களுவாஞ்சிகுடிக் காவல்துறை பிரிவுக்குட்பட்ட கோட்டைக் கல்லாறில் உள்ள ஓடைக் கரையில் படகு கவிழ்ந்ததில் மூன்று வயது குழந்தை உட்பட காணாமல் போன ஒரே குடும்பத்தை சேர்ந்த ஐந்து பேரின் சடலங்களும் மீட்கப்பட்டுள்ளன.
கோட்டைக்கல்லாறு நடேசபதி வீதியை சேர்ந்த ஐவரே இவ்வாறு காணாமல்போயிருந்தனர்.
நேற்று பிற்பகல் 5.30மணியளவில் சொந்தங்களுடன் வள்ளத்தில் சென்ற 11பேர் ஓடையின் நடுப்பகுதியில் வைத்து வள்ளத்தின் தாங்கிக்கம்பு உடைந்த காரணத்தினால் வள்ளம் கவிழ்ந்துள்ளது.
இந்த நிலையில் அப்பகுதியில் விளையாட்டு மைதானத்தில் விளையாடிக் கொண்டிருந்த இளைஞர்கள் அவர்கள் தத்தளிப்பதைக் கண்டு அவர்களை மீட்க பல்வேறு பிரயத்தனங்களை மேற்கொண்ட போதும் ஆறு பேரையே மீட்க முடிந்ததாக அப்பகுதி மக்கள் தெரிவித்தனர்.
இந்நிலையில் காணமல் போன 5 பேரின் சடலம் மீட்கப்பட்டு களுவாஞ்சிக்குடி ஆதர வைத்தியசாலையில் ஒப்படைக்கப்பட்டு பிரேத பரிசோதனை மேற்கொண்டதன் பின்னர் இன்று காலை உறவினர்களிடம் ஒப்படைக்கப்பட்டுள்ளது.
*************
யாழிற்கு சென்ற வெளிநாட்டு படைப் பிரதிநிதிகள்!
கொழும்பில் நடைபெற்ற போர் அனுபவப் பகிர்வு மாநாட்டில் கலந்துகொள்வதற்காக சென்றிருந்த நாடுகளில் 15 நாடுகளைச் சேர்ந்த உயர்மட்ட படை அதிகாரிகள் நேற்று யாழ்ப்பாணம் சென்று நிலைமைகளை நேரில் பார்த்து சென்றனர்.
நேற்று விசேட விமானத்தில் சென்ற அவர்கள் பலாலி தலைமையகத்தில் யாழ்.படைகளின் தளபதி மேஜர் ஜெனரல் மஹிந்த ஹத்துருசிங்கவுடன் கலந்துரையாடினர்.
அதன் பின்னர் நல்லூர் கந்தசுவாமி கோயிலில் வழிபாடுகள் செய்த அவர்கள் யாழ். நூலகம், கோட்டை ஆகிய பகுதிகளுக்கும் சென்றனர்.
பின்னர் யாழ். நகரின் தற்போதைய நிலைமையைப் பார்த்த அவர்கள் பலாலி திரும்பி மூன்று மணி நேர பயணத்தை முடித்துக்கொண்டு கொழும்பு திரும்பினர்.
நேற்று சென்ற படை அதிகாரிகளில் யாழ்ப்பாணத்தில் முன்னர் பணிபுரிந்த இந்திய படையைச் சேர்ந்த முன்னாள் மேஜர் ஜெனரல் அசோக்குமார் மேத்தாவும் அடங்கியிருந்தார் என்பது குறிப்பிடத்தக்கது.
***************
ஸ்ரீலங்காப் படைகளினால் கொல்லப்பட்ட தமிழர்கள் எத்தனை பேர்?
அண்மையில் வடக்கில் மேற்கொண்ட வாக்காளர் பதிவுகளில் நீக்கப்பட்ட 3 லட்சத்து 31ஆயிரத்து 214 தமிழர்களில் பெருமளவானோர் வெளிநாடுகளுக்கு சென்றுள்ளதாக சிறீலங்கா அரசு தெரிவித்துள்ள போதும், அவர்களில் பெருமளவானோர் வன்னிப் போரில் படையினரால் கொல்லப்பட்டவர்கள் என தெரிவிக்கப்படுகின்றது.
2009 ம் ஆண்டுகளில் யாழ் மற்றும் கிளிநொச்சி மாவட்டங்களில் பதிவுசெய்யப்பட்ட வாக்காளர்களின் எண்ணிக்கை 8 லட்சத்து 16ஆயிரத்து 5 ஆகும்.
ஆனால் 2010 ம் வருடம் சிறீலங்கா அரசு மேற்கொண்ட வாக்காளர் பதிவுகளில் தற்போது 4 லட்சத்து 81ஆயிரத்து 791 பேரின் விபரங்களே உள்ளன.
இதில் 3 லட்சத்து 31ஆயழரத்து 214 பேர் வாக்காளர்களின் பெயர்கள் இடாப்பில் இருந்து நீக்கப்பட்டுள்ளனர்.
இந்த தகவலை யாழ் மாவட்டத்தின் சிறிலங்கா தேர்தல் திணைக்கள உதவி ஆணையாளர் எஸ் கருணாநிதி உறுதிப்படுத்தியுள்ளார்.
வாக்காளர் பட்டியலில் இருந்து நீக்கப்பட்டவர்கள் வெளிநாடுகளுக்கு சென்றுள்ளாதாக சிறீலங்கா அரசு தெரிவித்துள்ளபோதும், அவர்களில் பெரும்பாலோனோர் சிறீலங்கா அரசு மேற்கொண்டுவரும் இனஅழிப்பில் கொல்லப்பட்டவர்கள் என யாழ் தகவல்கள் தெரிவித்துள்ளன.
75 ஆயிரத்திற்கும் மேற்பட்ட மக்கள் வன்னியில் கொல்லப்பட்டதுடன், வடக்கில் இராணுவக்கட்டுப்பாட்டுப் பகுதியிலும் பல ஆயிரம் மக்களை சிறீலங்கா படையினர் பலவந்தமாக கடத்திச் சென்று படுகொலை செய்துள்ளனர்.
எனவே சிறீலங்கா அரசு அண்மையில் மேற்கொண்ட புதிய வாக்காளர் பதிவுகளில் இருந்து நீக்கப்பட்டவர்களில் மூன்றில் ஒரு பகுதியினர் நாலாவது ஈழப்போரில் கொல்லப்பட்டவர்கள் என தெரிவிக்கப்படுகின்றது.
இதேவேளை, எதிர்வரும் ஜுலை 23 ம் நாள் சிறீலங்கா அரசு வடக்கில் உள்ளுராட்சி தேர்தல்களை நடத்துவதற்கு திட்டமிட்டுள்ளது.
ஆனால் 1983 ஆம் ஆண்டு ஈழத்தமிழ் மக்கள் மீது சிறீலங்கா அரசும், சிங்கள காடையர்களும் இணைந்து மேற்கொண்ட தாக்குதல்களில் பல ஆயிரம் மக்கள் கொல்லப்பட்டும், பல இலட்சம் மக்கள் அகதிகளாக இடம்பெயர்ந்தும், பல கோடி ரூபாய்கள் பெறுமதியான தமிழ் மக்களின் சொத்துக்கள் சிங்களவர்களால் சூறையாடப்பட்ட நாளும் ஜுலை 23 ஆகும்.
இந்த நாளை தமிழ் மக்கள் கறுப்பு ஜுலை என நினைவுகூர்ந்து வருகையில் சிறீலங்கா அரசு திட்டமிட்ட வகையில் இந்த நாளில் தேர்தலை நடத்தத் திட்டமிட்டுள்ளது.
**************

Friday, 3 June 2011

செய்திகள் 03/06


”சிறிலங்காவின் கொலைக்களம்”

ஐக்கிய நாடுகள் மனித உரிமைகள் சபையில் சனல் 04 தொலைக்காட்சி ஊடகத்தினால் இன்று காட்சிப்படுத்தப்படவுள்ள இலங்கையின் போர்குற்றங்கள் தொடர்பான ஆவணப்படத்தின் தலைப்பு ”சிறிலங்காவின் கொலைக்களம்” என்பதாகும்.
ஐ.நா. மனித உரிமைகள் சபைக் கூட்டத் தொடரில் பேசு பொருளாக இருக்கும் என எதிர்பார்க்கப்படும், இந்தப் போர்க்குற்ற ஆவணப்படம் ஒரு மணி நேரத்துக்கு ஓடுகிறது.
சரணடைந்த தமிழ்க் கைதிகள் ஆயுதப் படைகளால் சுடப்படும் காட்சிகள் இதில் முதலில் காண்பிக்கப்படும்.
கைத்தொலைபேசியில் பதியப்பட்ட, தமிழ் பொது மக்கள் படையினரால் தாக்கப்பட்டுத் துன்புறுத்தப்படும் காட்சியும் இந்த ஆவணப்படத்தில் மிகவும் இலாவகமாக சனல் 04 தொலைக்காட்சியின் செய்தியாளரான ஜோன் ஸ்னோவால் காட்சிப்படுத்தப்பட்டுள்ளது.
சரணடைந்தவர்கள் மீது மேற்கொள்ளப்பட்ட மிகவும் காடைத்தனமான தாக்குதல் காட்சிகள், பொதுமக்கள் தங்கியிருந்த இடங்கள் மீதான கண்மூடித்தனமான எறிகணைத் தாக்குதல்கள், பெண் புலி உறுப்பினர்கள் மீதான பாலியல் துன்புறுத்தல்கள் மற்றும் பாலியல் வன்புணர்வுகளும் அதன் பின்னர் அவர்கள் கொலை செய்யப்பட்ட காட்சிகளும் சனல் 04 தொலைக்காட்சியின் ஆவணப்படத்தில் உள்ளடக்கப்பட்டுள்ளன என்று கூறப்படுகிறது.
சனல் 04 தொலைக்காட்சியானது இதுவரை காண்பத்திருக்காத மிகவும் பயங்கரமான காட்சிகளையும் இந்த ஆவணப்படத்தில் சேர்த்துள்ளது.
மிகவும் அவதானமாக முக்கிய சில விடயங்களைக் கருத்தில் எடுத்த பின்னரே இந்த ஆவணப்படத்தை காட்சிப்படுத்த முடிவெடுக்கப்பட்டது என்று சனல்4 தொலைக்காட்சியைச் சேர்ந்த டொரோத்தி பர்னே தெரிவித்தார்.
ஒளிப்படங்கள், இராணுவத்தின் உத்தியோகபூர்வமான வீடியோக் காட்சிகள், செய்மதி மூலம் பெறப்பட்ட படங்கள் போன்றவற்றை உள்ளடக்கி இந்த ஆவணப்படம் கலும் மக்ரேயின் நெறிப்படுத்தலில் உருவாக்கப்பட்டுள்ளது.
ஸ்ரீலங்கா அரசானது அதன் போர் வலயங்களுக்குச் சுயாதீன ஊடகவியலாளர்கள் செல்லத் தடைவிதித்திருந்தது.
அத்துடன் ஐக்கிய நாடுகள் சபைப் பிரதிநிதிகளையும் அங்கிருந்து வெளியேற்றி இருந்தது.
இவ்விரு தரப்பினர்களினதும் பிரசன்னம் யுத்த வலயங்களில் தடுக்கப்படும்போது, தனது சொந்த நாட்டு மக்கள் மீதுதான் மேற்கொள்ளும் தாக்குதல்களை நிரூபிக்க எந்தவொரு ஆதாரங்களும் சாட்சியங்களும் இருக்கமாட்டா என ஸ்ரீலங்கா அரசு நினைத்திருந்தது.
ஆனால் மறுதலையாக, கைத்தொலைபேசிகள் மற்றும் செய்மதி தொழிநுட்பம் போன்றவற்றிற்குள்ள சக்திகளை அரசு கவனத்தில் எடுக்கத் தவறிவிட்டது.
பலவருட காலங்களாக யுத்தக் காட்சிகளை ஆவணப்படுத்தி வருபவா; என்ற வகையில் இலங்கையில் இடம்பெற்ற காட்சிகள் பார்ப்பதற்கு மிகவும் கடினமானவையாக உள்ளன என மக்ரே தெரிவித்துள்ளார்.
அந்தக் காட்சிகள் தமக்கு மிகுந்த வலிகளைக் கொடுத்துள்ளன என்றும் ஐக்கிய நாடுகள் சபை இது தொடர்பாகச் சரியான நடவடிக்கையை எடுக்கத் தவறுமானால் சிறிலங்காவின் கொலைக்களம் என்ற இந்தப் படம் பல கேள்விகளைக் கேட்டு நிற்கும் என்றும் மக்ரே தெரிவித்தார;.
**************

ஊழியர் மீதான வன்முறைக்கு ஜேர்மனி கண்டனம்! தமிழின படுகொலைக்கு?
கட்டுநாயக்க சுதந்திர வர்த்தக வலய ஊழியர்கள் மீது சிறிலங்கா காவல்துறையினர் மேற்கொண்ட தாக்குதல் தொடர்பாக, சிறிலங்காவுக்கான ஜேர்மனி தூதுவர் ஜீன்ஸ் புளொட்னர் கடும் விசனம் வெளியிட்டுள்ளார்.
இதுதொடர்பாக அவர் சிறிலங்கா பாதுகாப்புச் செயலர் கோத்தாபய ராஜபக்சவுக்கு, எச்சரிக்கை விடுக்கும் வகையில்- கடும் தொனியிலான கடிதம் ஒன்றை அனுப்பி வைத்துள்ளார்.
இதன் பிரதி ஒன்றை சிறிலங்காவின் பொருளாதார அபிவிருத்தி அமைச்சர் பசில் ராஜபக்சவுக்கும் அனுப்பி வைக்கப்பட்டுள்ளது.
இந்தக் கடிதத்தில், மிகையான பலத்தை தொழிலாளர்கள் மீது பிரயோகிக்கக் கூடாது என்று பாதுகாப்புச் செயலரை எச்சரித்துள்ள ஜேர்மனி தூதுவர் ஜீன்ஸ் புளொட்னர், சிறிலங்கா காவல்துறையினர் கட்டுநாயக்க சுதந்திர வர்த்தக வலயத்தில் எல்லைமீறி நடந்து கொண்டதாகவும் குற்றம்சாட்டியுள்ளார்.
இது சிறிலங்காவில் ஜேர்மனியின் தற்போதைய மற்றும் எதிர்கால முதலீடுகளில் எதிர்மறையான பாரிய தாக்கத்தை ஏற்படக் கூடும் என்றும் அவர் எச்சரித்துள்ளார்.
கட்டுநாயக்க சுதந்திர வர்த்தக வலயத்தில் அமைந்துள்ள பல ஜேர்மனி நிறுவனங்கள் சிறிலங்கா காவல்துறையினரின் நடவடிக்கைகளால் பாதிக்கப்பட்டுள்ளதாகவும், சிறப்பு அதிரடிப் படையினர் கூட ஜேர்மனி நாட்டு நிறுவனங்களின் கட்டங்களுக்குள் புகுந்து தொழிலாளர்களைத் தாக்கியதாகவும், அவர் தனது கடிதத்தில் குற்றம்சாட்டியுள்ளார்.
இந்தச் சம்பவங்கள் தொடர்பாக சிறிலங்கா பாதுகாப்புச் செயலர் உடனடியாக விசாரணைகளை நடத்த வேண்டும் என்றும் அவர் கோரியுள்ளார்.
ஆனால் இதுபற்றிக் கருத்து வெளியிட்டுள்ள சிறிலங்கா அரசின் மூத்த அதிகாரி ஒருவர், ஜேர்மனி தூதுவர் புளொட்னர், இந்த விவகாரம் தொடர்பாக வெளிவிவகார அமைச்சர் ஜி.எல்.பீரிசுக்கே கடிதம் எழுதியிருக்க வேண்டும் என்றும், பாதுகாப்புச் செயலருக்கு அல்ல என்றும் குறிப்பிட்டுள்ளார்.
இதனிடையே, ஜேர்மனித் தூதுவர் விடுத்துள்ள இந்த எச்சரிக்கை கோத்தாபய ராஜபக்சவை பெரிதும் எரிச்சலடைய வைத்துள்ளதாகவும், தகவல்கள் தெரிவிக்கின்றன.
அதேவேளை, வழக்கத்துக்கு மாறாக- ஜேர்மனித் தூதுவர் கோத்தாபய ராஜபக்சவுக்கு எழுதியுள்ள கடிதம், கட்டுநாயக்க தாக்குதல்களால் சிறிலங்காவில் முதலீடு செய்துள்ள நாடுகள் மத்தியில் ஏற்பட்டுள்ள அச்சத்தையும் கோபத்தையும் வெளிப்படுத்துவதாக கொழும்பு இராஜதந்திரி ஒருவர் கூறியுள்ளார்.
*************
இந்திய இரகசியப் பயணமும் பரகசியமான தோல்விச் செய்தியும்!
சிறிலங்காவின் பொருளாதார அபிவிருத்தி அமைச்சர் பசில் ராஜபக்ச புதுடெல்லிக்கு இரகசியப் பயணம் ஒன்றை மேற்கொண்டு திரும்பியுள்ளதாக தகவல்கள் வெளியாகியுள்ளன.
இந்தியாவின் ஆதரவைப் பெறும் நோக்கில் சிறிலங்கா அதிபரால் அமைச்சர் பசில் ராஜபக்ச, கடந்த 26ம் நாள் காலை புதுடெல்லிக்கு அனுப்பி வைக்கப்பட்டிருந்தார்.
ஆனால் இந்தியா அவரை கண்டுகொள்ளாமல் அன்றையதினமே திருப்பி அனுப்பி விட்டதாகவும் தெரிவிக்கப்படுகிறது.
மனிதஉரிமை மீறல் குற்றச்சாட்டுகளால் சிறிலங்கா அரசு அனைத்துலக அரங்கில் கடும் நெருக்கடியை எதிர்கொண்டுள்ளது.
இந்தநிலையைச் சமாளிக்க இந்தியாவின் ஆதரவைப் பெறுவதற்கு சிறிலங்கா வெளிவிவகார அமைச்சர் ஜி.எல்.பீரிஸ் புதுடெல்லிக்கு மேற்கொண்ட பயணமும் தோல்வியிலேயே முடிந்தது.
இதையடுத்து இந்தியா கொடுத்துள்ள அழுத்தங்களை குறைத்து , நெகிழ்வுப்போக்கை கடைப்பிடிக்குமாறு கேட்டுக் கொள்ளும் நோக்கில், தனது சகோதரரான அமைச்சர் பசில் ராஜபக்சவை, சிறிலங்கா அதிபர் இரகசியமாக புதுடெல்லிக்கு அனுப்பி வைத்திருந்தார்.
ஜெனிவாவில் ஐ.நா மனிதஉரிமைகள் பேரவையின் கூட்டத்தொடர் ஆரம்பமாவதற்கு நான்கு நாட்கள் முன்னதாக பசில் ராஜபக்ச புதுடெல்லி சென்றிருந்தார்.
அங்கு அவருக்கு அங்கு பெரிய வரவேற்பு ஏதும் அளிக்கப்படாததுடன், இந்திய உயர் தலைவர்கள் எவரையும் சந்திப்பதற்கு வாய்ப்பும் வழங்கப்படவில்லை.
இந்தியாவின் தேசிய பாதுகாப்பு ஆலோசகர் சிவ்சங்கர் மேனன் மட்டுமே பசில் ராஜபக்சவைச் சந்தித்துள்ளதாக இந்திய வெளிவிவகார அமைச்சின் அதிகாரி ஒருவர் கூறியுள்ளார்.
இதன்போது, சிறிலங்கா வெளிவகார அமைச்சர் ஜி.எல்.பீரிசுடனான பேச்சுக்களில் இணக்கம் காணப்பட்ட விடயங்களை நடைமுறைப்படுத்தும் விடயத்தில் காணப்படும் முன்னேற்றங்களை அடிப்படையாகக் கொண்டே, இந்தியாவின் எதிர்கால நடவடிக்கைகள் தீர்மானிக்கப்படும் என்று பசில் ராஜபக்சவிடம் எடுத்துக் கூறப்பட்டுள்ளதாகவும் தகவல்கள் தெரிவிக்கின்றன.
அதேவேளை. இந்தியாவின் உயர்மட்ட அரசியல் தலைவர்களைச் சந்திக்க அமைச்சர் பசில் ராஜபக்ச கடுமையான முயற்சிகளை மேற்கொண்ட போதும் அவை வெற்றியளிக்கவில்லை.
இதனால், அவர் கடந்த 26ம் நாள் மாலையே கொழும்பு திரும்பியுள்ளார்.
கடந்த 26ம் நாள் காலையில் இந்தியா சென்ற பசில் ராஜபக்ச, தேசிய சிவ்சங்கர் மேனனைச் சந்தித்து விட்டு அன்று மாலையே கொழும்பு திரும்பியதை, சிறிலங்காவில் உள்ள இந்தியத் தூதரக அதிகாரி ஒருவர் உறுதிப்படுத்தியுள்ளார்.
*****************
ஊடகவியாலளரை பாதுக்காக்க அனுமதியில்லை! கொல்லவே அனுமதி!
இலங்கையில் படுகொலை செய்யப்பட்ட, காணாமல் போன, தாக்குதல்களுக்கு உள்ளாகி வரும் ஊடகவியலாளர்கள் குறித்து விசாரணை நடத்தி வரும் ஐ.நாவின் சிறப்பு பிரதிநிதி பிராங்க லா றூ சிறிலங்கா வருவதற்கான அனுமதியை இரண்டாவது தடவையாகவும் சிறிலங்கா அரசு மறுத்துள்ளது.
கருத்து சுதந்திரத்தை ஊக்குவிப்பதற்கும் பாதுகாப்பதற்குமான ஐக்கிய நாடுகள் சபையின் சிறப்பு பிரதிநிதி பிராங்க லா றூவை சிறிலங்காவிற்கு அழைத்து காணாமல் போன ஊடகவியலாளர் பிரகீத், படுகொலை செய்யப்பட்ட லசந்த விக்கிரமதுங்க, உட்பட காணாமல் போன மற்றும் படுகொலை செய்யப்பட்ட ஊடகவியலாளர்கள் பற்றிய விசாரணை நடத்துவதற்கு அனுமதிக்குமாறு சிறிலங்கா அதிபர் மகிந்த ராசபக்சவை 37 சர்வதேச ஊடக மற்றும் மனித உரிமை அமைப்புக்கள் கேட்டுள்ளன.
இது தொடர்பான தீர்மானம் ஒன்றையும் லெபனான் தலைநகர் பேரூட்டில் கூடிய இந்த அமைப்புக்கள் எடுத்துள்ளன.
37 சர்வதேச ஊடக மற்றும் மனித உரிமை அமைப்புக்களை உள்ளடக்கிய சர்வதேச சுதந்திரமான கருத்துக்கூறல் பரிவர்த்தனை அமைப்பு சிறிலங்கா அரசுத்தலைவர் மகிந்த ராசபக்சவுக்கு கடிதம் ஒன்றையும் அனுப்பி வைத்துள்ளன.
***********

அரச இனவழிப்பு பயங்கரவாத பரப்புரையில் யாழ் அரச அதிபர்!
சிறிலங்கா இராணுவம் நடத்திய போர்க்கருத்தரங்கில் யாழ்.மாவட்ட அரசாங்க அதிபர் இமெல்டா சுகுமாரும் உரையாற்றியுள்ளார்.
வன்னியில் இடம்பெற்ற போர் நடவடிக்கையின் போது சிறிலங்காப் படையினர் மேற்கொண்ட மனிதாபிமான உதவிகள் குறித்து யாழ்.மாவட்ட அரசாங்க அதிபர் இமெல்டா சுகுமார் வெளிநாட்டு இராணுவ அதிகாரிகள், இராஜதந்திரிகள் மத்தியில் விளக்கமளித்துள்ளார்.
நேற்றைய இறுதிநாள் அமர்வில் சிறிலங்கா மத்திய வங்கி ஆளுனர் அஜித் நிவாட் கப்ரால், பேராசிரியர் ரஜீவ விஜேசிங்க ஆகியோருடன் இமெல்டா சுகுமாரும் மனிதாபிமான உதவிப் பணிகள் பற்றி விளக்கமளித்தார்.
இங்கு இமெல்டா சுகுமார் உரையாற்றிய போது, விடுதலைப் புலிகளுக்கு எதிரான பிரச்சாரத்தை மேற்கொண்டுள்ளார்.
வடக்கு மக்களை புலிகள் பணயமாக வைத்துக் கொண்டே போர் செய்தனர் எனவும் இந்த மக்களை பாதுகாப்பாக மீட்டெடுப்பதற்கு சிறிலங்கா இராணுவம் மிகவும் நியாயபூர்வமாக செயற்பட்டது எனவும் தனது உரையில் தெரிவித்துள்ளார்.
மனிதாபிமான நடவடிக்கைகளின் போது இராணுவம் எந்த வகையிலும் பொதுமக்களுக்கு தீங்கிழைக்கவில்லை என்றும் வடக்கு மக்களை பயங்கரவாத அச்சுறுத்தலில் இருந்து மீட்டெடுத்தனர் எனவும் தெரிவித்துள்ளார்.
போர் நடைபெற்ற காலத்தில் முல்லைத்தீவு மாவட்ட அரசஅதிபராக இருந்த இமெல்டா சுகுமார், 2009 ஜனவரி மாத இறுதியில் அறிவிக்கப்பட்ட தற்காலிக போர் நிறுத்தத்துடன் அங்கிருந்து வெளியேறி வவுனியாவில் தங்கியிருந்தார்.
இவர் நல்லிணக்க ஆணைக்குழு முன்னிலையில் சாட்சியம் அளித்த போதும் சிறிலங்காப் படையினர் போர்க்குற்றங்கள் எதிலும் ஈடுபடவில்லை என்று கூறியிருந்தார்.
இந்தப் போர்க் கருத்தரங்கில் சிறிலங்கா அரசுக்கு மிகவும் நெருக்கமான- தெரிவு செய்யப்பட்ட சில இராணுவ அதிகாரிகளும், அதிஉயர் நிர்வாக அதிகாரிகளும், வெளிநாட்டுப் பேராளர்களுக்குமே உரையாற்றச் சந்தர்ப்பம் அளிக்கப்பட்டிருந்தது.
யாழ்.படைகளின் தளபதி மேஜர் ஜெனரல் மகிந்த ஹத்துருசிங்கவின் ஏற்பாட்டிலேயே இந்த போர்க் கருத்தரங்கில் இமெல்டா சுகுமார் உரையாற்றியதாகவும் தகவல்கள் தெரிவிக்கின்றன.
*************

ஒளிந்து கொள்ளும் அரசு?
உத்தேச தனியார்துறை ஓய்வூதியத் திட்டத்திற்கான பலத்த எதிர்ப்பு காரணமாக அதனைக் கைவிட அரசாங்கம் தீர்மானித்துள்ளது.
வாராந்த அமைச்சரவை முடிவுகளை அறிவிக்கும் முகமாக நேற்று தகவல் திணைக்களத்தில் நடைபெற்ற ஊடகவியலாளர் மகாநாட்டின் போதே அமைச்சர் கெஹலிய ரம்புக்வெல்ல இந்த தகவலை வெளியிட்டுள்ளார்.
ஆயினும் தொழிற்சங்க நடவடிக்கைகள் காரணமாக அரசாங்கம் பணிந்து போயுள்ளதை ஏற்றுக்கொள்ள மறுக்கும் வகையில் அதனை வேறு ஒரு பெயரிலும், மாற்று வழியிலும் நிறைவேற்றிக் கொள்வதற்கான வாய்ப்பும் அரசாங்கத்திடம் இருப்பதாகவும் அமைச்சர் கெஹலிய ரம்புக்வெல்ல தெரிவித்துள்ளார்.
அமைச்சரவையின் முடிவினையடுத்து பாராளுமன்ற நிகழ்ச்சி நிரலில் இருந்தும் தனியார் துறை ஓய்வூதியத் திட்டம் குறித்த மசோதா அகற்றிக் கொள்ளப்பட்டுள்ளது.
அதற்கிடையே மீண்டும் அவ்வாறான ஒரு திட்டத்தை பாராளுமன்றத்தில் முன்வைப்பதாயின் முதலில் அதனை வௌ;ளை அறிக்கையாகவே முன்வைக்க வேண்டும் என்று அரசாங்கத்திடம் ஐ.தே.க. கோரிக்கை விடுத்துள்ளது.
**************