Wednesday, 21 September 2011

செய்திகள் 21/09


வன்னிக்கு பயணிக்கும் அமெரிக்க தூதுவர்
வன்னியின் இன்றைய நிலவரங்களை அறிந்து கொள்ளும் வகையில் இலங்கைக்கான அமெரிக்கத் தூதுவர் பற்றீசியா பியுட்டனிஸ் இன்று அங்கு பயணமொன்றை மேற்கொள்கிறார்.
இந்தப் பயணத்தின் போது அரச அதிகாரிகளை மட்டுமன்றி பொதுமக்களையும் அமைப்புகளையும் சந்தித்து கலந்துரையாடவுள்ளார் எனத் தெரிய வருகிறது.
கிளிநொச்சி மாவட்ட அரசாங்க அதிபர் மற்றும் வன்னிக்குப் பொறுப்பான கட்டளைத் தளபதி ஆகியோரையும் சந்தித்துப் பேசவுள்ளார்.
மேலும், தமிழ்த் தேசியக் கூட்டமைப்பின் நாடாளுமன்ற உறுப்பினரான சிறிதரனையும் அவர் கிளிநொச்சியில் சந்தித்து பல்வேறு விடயங்கள் தொடர்பில் கலந்துரையாடவும் திட்டமிட்டுள்ளார் எனத் தெரிவிக்கப்படுகிறது.
அமெரிக்க ராஜாங்கச் செயலாளர் ரொபர்ட் ஓ பிளேக் பிளக்கின் கொழும்பு மற்றும் யாழ். விஜயத்தையடுத்தே இன்று அமெரிக்கத் தூதுவர் பற்றீசியா பியுட்டனிஸ் வன்னி செல்கிறார் என்பது குறிப்பிடத்தக்கது.
********************

தொடரும் இனவழிப்பு - முறையிடுவது யாரிடம்?
இலங்கை அரசின் திட்டமிட்ட இன ஒழிப்பு நடவடிக்கை, நில அபகரிப்பு என்பன தொடர்பாக சர்வதேச சமூகத்திடம் முறையிடுவோம் என சுரேஸ் பிரேமச்சந்திரன் தெரிவித்துள்ளார்.
நீதிமன்ற நடவடிக்கைகளை முன்னெடுக்க வேண்டிய நிலை ஏற்பட்டால் அதையும் செய்யத் தயார் என்று தமிழ்த் தேசியக் கூட்டமைப்பு நேற்று அதிரடியாக அறிவித்துள்ளது.
தமிழினம் என்றொன்று இலங்கைத் தீவில் இருக்கக்கூடாது என்ற முனைப்புடனேயே இலங்கை அரசு திட்டமிட்டு சிங்களக் குடியேற்றங்களை தமிழர் தாயகப் பிரதேசங்களில் அரங்கேற்றி வருகின்றது என தமிழ்த் தேசியக் கூட்டமைப்பின் ஊடகப்பேச்சாளரும் நாடாளுமன்ற உறுப்பினருமான சுரேஷ் பிரேமச்சந்திரன் குற்றஞ்சாட்டியுள்ளார்.
முல்லைத்தீவு கொக்கிளாய்ப் பகுதியில் நேற்று புதிதாக சிங்களக் குடும்பங்கள் குடியமர்த்தப்பட்டன.
இந்தக் குடும்பங்களுக்கு புதிதாகக் காணிகளும் வழங்கப்பட்டன.
இலங்கைத் தீவில் யார் வேண்டுமானாலும் எங்கும் வாழலாம் என இலங்கை அரசு அறிவித்து ஒருசில நாட்கள் மாத்திரமே கடந்த நிலையில், யாழ்ப்பாணத்தில் ஆரம்பமான சிங்களக் குடியேற்றங்கள் இன்று முல்லைத்தீவு வரை படர்ந்து சென்றுள்ளன.
இது ஒரு திட்டமிட்ட இன ஒழிப்பு நடவடிக்கை என தமிழ்த் தலைமைகள் விசனம் தெரிவித்துள்ளன.
முல்லைத்தீவு, கொக்கிளாய்ப் பகுதியில் சிங்களக் குடும்பங்கள் குடியமர்த்தப்பட்டது தொடர்பாகக் கருத்து வெளியிடும்போதே சுரேஷ் எம்.பி. இதனைத் தெரிவித்தார்.
தெற்கிலிருந்து முல்லைத்தீவு மாவட்டத்திற்கு வந்த சிங்களக் குடும்பங்கள் அன்று கடலோரக் கிராமங்களின் தற்காலிகமாகத் தொழில் நிமித்தம் குடியேறின.
எனவே, இவர்களை அடிப்படையாகக் கொண்டு முல்லைத்தீவு மாவட்டத்தில் ஏற்கனவே சிங்களவர் இருந்ததாகக் கூறி இலங்கை அரசு தமிழ் நிலங்களை அபகரிக்க முயற்சிக்கின்றது.
அநுராதபுர மாவட்டத்தின் சில பகுதிகளையும், முல்லைத்தீவு மாவட்டத்தின் சில பகுதி களையும் இணைத்து வெலிஓயா பிரதேச செயலகமொன்றை இலங்கை அரசு திட்டமிட்டு நிறுவியுள்ளது.
தனித் தமிழ் மாவட்டங்களை சிங்கள கலப்பு மாவட்டங்களாக மாற்றும் அரசின் வியூகங்களுள் இதுவும் ஒன்றுதான்.
யுத்தம் இடம்பெற்ற காலப்பகுதியினுள் ஆயிரக்கணக்கான தமிழ் மக்கள் கொல்லப்பட்டனர்.
ஆயிரத்துக்கும் மேற்பட்ட குடும்பங்கள் இடம்பெயர்ந்தன.
இப்பொழுது இலங்கைத் தீவில் தமிழினம் என்ற ஒன்று இருக்கக்கூடாது என்ற முனைப்புடனேயே இலங்கை அரசு செயற்படுகின்றது.
அதன் செயற்பாடுகளும் இதனை நிரூபிக்கின்றன.
இதன் ஓர் அங்கமே தமிழர் பிரதேசங்களில் அரங்கேற்றப்படும் திட்டமிட்ட சிங்களக் குடியேற்றமாகும்.
இலங்கை அரசின் திட்டமிட்ட இன ஒழிப்பு நடவடிக்கைகள் தொடர்பாக நாம் சர்வதேசத்திடம் முறையிடுவோம்.
ஏனென்றால், இன ஒழிப்பு நடவடிக்கைகள் கூடாது என்றே ஐ.நா. சாசனத்திலும் உள்ளது என்பதைப் புரிந்து இங்குள்ளவர்கள் செயற்பட வேண்டும்.
திட்டமிட்ட சிங்களக் குடியேற்றங்கள், தமிழர் தாயகப் பிரதேசங்கள் இன்று எதிர்நோக்கும் முக்கிய பிரச்சினைகள் தொடர்பாக தமிழ்த் தேசியக் கூட்டமைப்பு விரைவில் கூடி ஆராய்ந்து உறுதியான சில முடிவுகளை முன்னெடுக்கவுள்ளது.
நீதிமன்ற நடவடிக்கைகளை முன்னெடுக்கவேண்டியதொரு நிலை ஏற்பட்டால் அதனையும் செய்ய நாம் தயாராகவே உள்ளோம்.
அரசின் இவ்வாறான நடவடிக்கைகளுக்கு எதிர்ப்புத் தெரிவித்து முன்னெடுக்கவுள்ள சில முக்கிய விடயங்களைப் பின்னர் அறிவிப்போம் என்றும் சுரேஷ் பிரேமச்சந்திரன் தெரிவித்துள்ளார்.
********************

தமிழ்த் தேசியக் சுட்டமைப்பை அழைக்கிறது கனடா
கனேடிய வெளிவிவகார அமைச்சின் தென்னாசியப் பிரிவு தமிழ்த் தேசியக் கூட்டமைப்பை கனடாவிற்கு உத்தியோகபூர்வமாக அழைத்து கலந்துரையாடல் ஒன்றை மேற்கொள்ளவுள்ளதாகத் தெரிய வருகிறது.
இதேவேளை, கனடியத் தமிழ் கொன்சவேட்டிவ் ஆதரவாளர்கள் கனடாவின் ஆளும் கட்சியான கொன்ச வேட்டிவ் கட்சியிடம் இலங்கை விவகாரம் தொடர்பான கனடாவின் தெளிவான கொள்கை மற்றும் நிலைப்பாட்டைத் தெரிவிக்குமாறு விடுத்த வேண்டுகோள்கள் சாதகமாகப் பரிசீலிக்கப்படும் நடவடிக்கைகள் மேற்கொள்ளப்பட்டு வருகின்றன.
அநேகமாக கனடியப் பிரதமர் அலுவலகம் அல்லது வெளிவிவகார அமைச்சு இலங்கை விவகாரம் தொடர்பான கனேடிய அரசின் நிலைப்பாட்டைத் தெரிவிக்கும் அறிக்கையொன்றை அடுத்தடுத்த வாரங்களில் வெளியிடும் என்று எதிர்பார்க்கப்படுகின்றது.
மேலும் கனேடிய வெளிவிவகார அமைச்சின் தென்னாசியப் பிரிவு தமிழ்த் தேசியக் கூட்டமைப்பை கனடாவிற்கு உத்தியோகபூர்வமாக அழைக்கும் செயற்பாட்டை முன்னெடுத்துள்ள இவ்வேளையில் அவர்கள் கனடாவிற்கு வருவதற்கு முன்பாகவே இவ்வறிவிப்பு விடுக்கப்படுமெனவும் தெரிய வருகிறது.
********************

நம்புங்கள் தீர்வு கடைக்கும் இல்லையேல் போராடுவோம் என்கிறார் மாவை
அரசுக்கும், தமிழ்த் தேசியக் கூட்டமைப்புக்கும் இடையே மீண்டும் ஆரம்பிக்கப்பட்டுள்ள பேச்சுக்களின் மூலம் இந்த வருட இறுதிக்குள் நல்ல தீர;வுகிடைக்கும் என்று நம்புவதாக மாவை சேனாதிராஜா தெரிவித்துள்ளார்.
தவறினால் ஜனநாயக ரீதியாக மக்களை அணி திரட்டி அடுத்த கட்ட நகர;வை மேற்கொள்ளத் தயங்கமாட்டோம் என்றும் தமிழ்த் தேசியக் கூட்டமைப்பின் செயலாளரும் யாழ். மாவட்ட நாடாளுமன்ற உறுப்பினருமான மாவை சேனாதிராசா கூறினார;.

தமிழ்த் தேசியக் கூட்டமைப்பின், தமிழரசுக் கட்சியின் அம்பாறை மாவட்ட அரசியல் பணிமனை, பாண்டிருப்பு நற்பிட்டிமுனை பிரதான வீதியில் திறந்து வைக்கப்பட்டது.
இந்தப் பணிமனை திறப்பு விழாவில் கலந்துகொண்டு உரையாற்றுகையிலேயே அவர; இதனைக் கூறினார;.
முன்னாள் கூட்டமைப்பு நாடாளுமன்ற உறுப்பினர; டொக்டர; வில்லியம் தோமஸ் தலைமையில் திறப்பு விழா நடைபெற்றது.

நாடாளுமன்ற உறுப்பினர; மாவை சேனாதிராசா தொடர;ந்து உரையாற்றுகையில் அரசுடன் மீண்டும் பேச்சு ஆரம்பிக்கப்பட்டுள்ளது.
இந்தியா, அமெரிக்கா போன்ற சர;வதேச அழுத்தங்கள் இதற்கு இருந்தது.
தமிழ்த் தேசியக் கூட்டமைப்புடன் தான் தமிழ் மக்களுக்கான இனப் பிரச்சினைத் தீர;பு பற்றிப் பேச வேண்டும் என்ற அழுத்தங்களும் அரசுக்கு விடுக்கப்பட்டன.

இதற்கும் போர; குற்றங்களுக்கும் சம்பந்தம் இருந்தாலும் அதனை சம்பந்தப்படுத்தாமல் சந்தர;ப்பத்தை விடாமல், மீண்டும் ஒரு சந்தர;ப்பம் கிடைப்பதை கைவிட்டு விடாமல், சந்தர;ப்பங்களைப் பயன்படுத்த வேண்டும் என விரும்புவதாகத் தெரிவித்தார்.
அடிப்படைக் கோட்பாடுகளிலோ, கொள்கைகளிலோ எந்தவித விட்டுக்கொடுப்புகளும் இல்லாத நிலையில் எமக்கு அரசியல் தீர;வை நிறைவு செய்வதற்கு போராடிக் கொண்டிருப்பதாகவும் குறிப்பிட்டார்.
ஆரம்பிக்கப்பட்டுள்ள அரசு கூட்டமைப்பு பேச்சு மூலம் இந்த வருட இறுதிக்குள் நல்ல தீர;வு கிடைக்கும் என தாம் நம்புவதாகவும் தெரிவித்தார்.
அவ்வாறு இந்த ஆண்டு முடிவதற்குள் அரசின் பதில்சரியாகக் கிடைக்காவிட்டால் சர;வதேச அரங்கிலும், எமதுமக்கள் மத்தியிலும் கருத்துக்களை முன்வைத்து மக்களை ஜனநாயக ரீதியாக அணி திரட்டி அடுத்த கட்ட நடவடிக்கையில் இயங்கத் தயங்கமாட்டோம் என்று கூறிய அவர், இவ்வாறான சந்தர;ப்பத்தில் நம் இளைஞர; சமுதாயம் மிகவும் கட்டுப்பாட்டுடன் தம்முடன் அணி திரள வேண்டும் என கோருவதாக தெரிவித்துள்ளார்.
********************

கிளிங்ரனை சந்தித்த மகிந்த
ஐ.நா பொதுச்சபைக் கூட்டத்தில் பங்கேற்கச் சென்றுள்ள சிறிலங்கா அதிபர் மகிந்த ராஜபக்ச, அமெரிக்காவின் முன்னாள் அதிபர் பில் கிளின்ரனைச் சந்தித்துப் பேசியுள்ளார்.
கிளின்ரன் நிலையத்தின் வருடாந்தக் கூட்டத்தின் போதே பில் கிளின்ரனை சிறிலங்கா அதிபர் மகிந்த ராஜபக்ச நேற்று சந்தித்துள்ளார்.
அதேவேளை, சிறிலங்கா அதிபர் மிகப்பெரிய பட்டாளத்துடன் நியுயோர்க் சென்று பணத்தை வீணடிப்பதாக கொழும்பு ஊடகம் ஒன்று விமர்சித்துள்ளது.
மகிந்த ராஜபக்சவுடன் 116 பேர் நியுயோர்க் சென்றுள்ளனர்.
இவர்கள் தங்குவதற்கு நியுயோர்க்கின் றிட்ஸ் கார்டன் விடுதியிலும், ஹெம்லி காக்லின் விடுதியிலும் அறைகள் ஒதுக்கப்பட்டுள்ளன.
ஐ.நா தலைமையகம் அருகே விடுதிகள் இருந்தும் தொலைவில் உள்ள இந்த விடுதிகளில் தங்குவதால் அதிகளவு போக்குவரத்துச் செலவு ஏற்பட்டுள்ளதாகவும் கூறப்பட்டுள்ளது.
மணித்தியாலம் ஒன்றுக்கு 45 டொலர்படி, 90 சொகுசு வாகனங்கள் சிறிலங்கா அதிபரின் குழுவினரின் பயணத்துக்காக வாடகைக்கு அமர்த்தப்பட்டுள்ளதாகவும், அவற்றின் ஓட்டுனர்களுக்கு மணித்தியாலம் ஒன்றுக்கு 12 டொலர் ஊதியம் வழங்கப்படுவதாகவும் கொழும்பு ஊடகம் குறிப்பிட்டுள்ளது.
நாளொன்றுக்கு இந்த வாகனங்கள் 12 மணி நேரம் பயன்படுத்தப்படுவதாகவம், இதன் மூலம் வாகனங்களுக்கு மட்டும் நாளொன்றுக்கு 68 இலட்சம் ரூபா வரை செலவிடப்படுவதாகவும் அந்த ஊடகம் மேலும் தகவல் வெளியிட்டுள்ளது.
ஜப்பானிய அரசதலைவருக்காக நியுயோர்க்கில் 8 வாகனங்கள் மாத்திரமே வாடகைக்கு அமர்த்தப்பட்டுள்ளதாகவும் கொழும்பு ஊடகம் சுட்டிக்காட்டியுள்ளது.
********************

சித்தம் கலங்கி சீறிப்பாயும் கோத்தாபாய
சிறிலங்காவைக் குறிவைத்து அனைத்துலக போர்க்குற்ற விசாரணைக் குழுவை அமைக்கும் நோக்கில், பிரித்தானிய நாடாளுமன்றத்தில் பல்வேறு பொய்களும் அவிழ்த்து விடப்பட்டுள்ளதாக சிறிலங்கா பாதுகாப்புச் செயலர் கோத்தாபய ராஜபக்ச குற்றம்சாட்டியுள்ளார்.
இதுதொடர்பாக கொழும்பு ஊடகம் ஒன்றுக்கு கருத்து வெளியிட்டுள்ள அவர், போரின் கடைசி 5 மாதங்களில் வன்னியில் ஒரு இலட்சம் பேர் மரணமானதாக பிரித்தானிய நாடாளுமன்ற விவாதத்தில் கூறப்பட்டுள்ளதாவும், இந்த விபரங்கள் அவர்களுக்கு எப்படித் தெரியும் என்றும் கேள்வி எழுப்பியுள்ளார்.
ஜெனிவாவில் நடந்து கொண்டிருக்கும் ஐ.நா மனிதஉரிமைகள் பேரவை கூட்டத்தொடரின் கவனத்தை ஈர்ப்பதற்காக முட்டாள்தனமான முறையில் பிரித்தானிய நாடாளுமன்ற உறுப்பினர் மிகைப்படுத்திய தகவல்களை வெளியிட்டுள்ளதாகவும் கோத்தாபய ராஜபக்ச குறிப்பிட்டுள்ளார்.
நியுயோர்க்கில் நடைபெறும் ஐ.நா பொதுச்சபைக் கூட்டத்துக்கு முன்பாக சிறிலங்காகவுக்கு எதிராக முன்னெடுக்கப்பட்ட பரப்புரைப் போரின் ஒரு பகுதியே இது என்றும் அவர் மேலும் கூறியுள்ளார்.
தொழிலாளர் கட்சியின் மிச்சம் மற்றும் மோடென் தொகுதியின் நாடாளுமன்ற உறுப்பினருமான சியொபெய்ன் மக்டொனா, பிரித்தானிய நாடாளுமன்றத்தில் நடந்த விவாதத்தில் சிறிலங்காவில் போரின் கடைசி 5 மாதங்களில் 1 இலட்சம் பேர் கொல்லப்பட்டதாகவும், அவர்களில் 40ஆயிரம் பேர் பொதுமக்கள் என்றும் தெரிவித்திருந்தார் என்பது குறிப்பிடத்தக்கது.
உலகம் உண்மையை அறிந்திருக்கவில்லை என நம்பியிருந்த ஸ்ரீலங்கா உண்மையான தகவல்கள் தற்போது வெளியாவதை கண்டு சித்தம் கலங்கிப் போயிருப்பதாலாயே இத்தகைய கருத்துக்களை வெளியிட்டு வருவதாக அவதானி ஒருவர் கருத்து வெளியிட்டுள்ளார்.
********************

தமிழரின் பொருளாதாரத்தை இலக்கு வைக்கும் சிங்களம்
பயங்கரவாத சந்தேக நபர்களின் சொத்துக்களை முடக்குவது தொடர்பில் புதிய சட்ட மூலங்கள் அறிமுகம் செய்யப்பட உள்ளது.
பயங்கரவாத நடவடிக்கைகளுடன் தொடர்புடைய சந்தேக நபர்களை கைது செய்த உடனேயே அவர்களது சொத்துக்களை முடக்கக் கூடிய வகையில் சட்டத் திருத்தம் மேற்கொள்ளப்படவுள்ளது.
இந்தச் சட்டத் திருத்தம் இன்று பாராளுமன்றில் விவாதத்திற்கு எடுத்துக் கொள்ளப்படவுள்ளது.
சந்தேக நபர்களின் பணம், வங்கிக் கணக்கு மற்றும் ஏனைய சொத்துக்களை விசாரணையின் ஆரம்ப கட்டத்திலேயே முடக்கி வைக்கக் கூடிய வகையில் சட்டத் திருத்தம் மேற்கொள்ளப்பட உள்ளது.
வெளிநாடுகளில் பயங்கரவாத நடவடிக்கைகளை மேற்கொள்வதற்கு இலங்கையில் சொத்துக்களை திரட்டுவதற்கும் தடை விதிக்கப்பட உள்ளது.
சந்தேக நபர் ஒருவருக்கு நீதிமன்றில் குற்றப் பத்திரிகை தாக்கல் செய்யப்படும் வரையில் தற்போது அவரது சொத்துக்களை முடக்க முடியாது.
வெளிநாட்டு பயங்கரவாத அமைப்புக்களின் நிதிக் கொடுக்கல் வாங்கல்களை கட்டுப்படுத்துவதிலும் சட்ட சிக்கல்கள் காணப்படுவதாகக் குறிப்பிடப்படுகிறது.
********************

கால் பதிக்கும் இந்திய கடற்படை
சிறிலங்கா கடற்படையுடன் போர்ப்பயிற்சியில் ஈடுபடுவதற்காக வந்துள்ள இந்திய கடற்படையின் பாரிய போர்க்கப்பல்கள் திருகோணமலைத் துறைமுகத்தில் நிறுத்தி வைக்கப்பட்டுள்ளன.
அதிகளவிலான பாரிய போர்க்கப்பல்கள் திருகோணமலைத் துறைமுகத்தில் நிறுத்தி வைக்கப்பட்டுள்ளதை அவதானிக்க முடிகிறது
கடந்த 19ம் நாள் திருகோணமலைத் துறைமுகத்தை வந்தடைந்த இந்தப் போர்க்கப்பல்கள், எதிர்வரும் 24ம் நாள் போர்ப்பயிற்சிகள் நிறைவடைந்த பின்னரே புறப்பட்டுச் செல்லும் என்று தெரிவிக்கப்படுகிறது.
ஒரே நேரத்தில் அதிகளவிலான வெளிநாட்டுப் போர்க்ப்பல்கள் தரித்து நிற்பதை தொலைவில் இருந்தே பொதுமக்கள் பார்வையிட்டு வருவதாகவும் தகவல்கள் தெரிவிக்கின்றன.
********************

தடுத்து வைக்கப்பட்டோரை விடுவிக்க மனு
இலங்கையில் தொடர்ந்து முகாம்களில் அடைத்து வைக்கப்பட்டிருக்கும் தமிழர்களையும், அங்குள்ள கொடிய சித்திரவதை சிறைகளில் உள்ள இளைஞர்களையும் விடுவித்து அவரவர் வாழ்ந்த இடங்களுக்கு அனுப்ப வேண்டும் எனக்கோரி சென்னையில் உள்ள யுனிசெப் அமைப்பிடம் மனு ஒன்று கையளிக்கப்பட்டுள்ளது.
சென்னை அடையாறில் ஐ.நா.சபையின் ஓர் அங்கமான யுனிசெப் அமைப்பில் நேற்றுக் காலை பல்வேறு தமிழ் அமைப்பு பிரதிநிதிகள் மற்றும் மனித உரிமை ஆர்வலர்கள் ஐ.நா. பிரதிநிதிகளிடம் மனு ஒன்றை கொடுத்துள்ளனர்.
இலங்கையில் தொடர்ந்து முகாம்களில் அடைத்து வைக்கப்பட்டிருக்கும் தமிழர்களையும், அங்குள்ள கொடிய சித்ரவதை சிறைகளில் உள்ள இளைஞர்களையும் விடுவித்து அவரவர் வாழ்ந்த இடங்களுக்கு அனுப்ப வேண்டும்.
அவர்கள் அங்கு கௌரவமான வாழ்க்கையைத் தொடங்க உரிய நடவடிக்கையை ஐ.நா. எடுக்க வேண்டும்.
தமிழர் பகுதிகளில் உள்ள இராணுவத்தை திரும்பப் பெற வேண்டும்.
தமிழர் பகுதிகளில் குடியமர்த்தப்பட்ட சிங்களர்களை வெளியேற்ற வேண்டும்.
அங்கு நடந்த யுத்தகுற்றங்களை அந்த நாட்டு அரசே விசாரித்தால் நீதி கிடைக்காது.
சர்வதேச நீதிமன்றம் மூலம் விசாரணை நடத்த வேண்டும்.
சனல் 4 மற்றும் சுதந்திரமான ஊடகங்கள் வெளியிட்ட ஆதாரங்களை இந்த விசாரணைக்கு உரிய ஆதாரங்களாக எடுத்துக் கொள்ள வேண்டும்.
பலத்த குற்றச்சாட்டுக்கு ஆளாகியுள்ள இலங்கைத் தலைவரை சர்வதேச நீதிமன்றத்தில் விசாரிக்க வேண்டும்.
தமிழர் பகுதிகளில் வாழும் மக்களின் கருத்துக்களை அறிவதற்கு அங்கு பொது வாக்கெடுப்பு நடத்த வேண்டும்.
சர்வதேச சமூகத்தின் மேற்பார்வையில் இப்பணிகள் நடைபெறவேண்டும் என்ற இக்கோரிக்கைகள் நிறைவேறும் வரை வெளிநாடுகளில் தஞ்சம் அடைந்துள்ள தமிழர்களை இலங்கைக்கு வெளியேற்றாதபடி, ஐ.நா. சபை பார்த்துக்கொள்ள வேண்டும் என குறிப்பிடப்பட்டுள்ளதாக இந்திய ஊடகங்களில் செய்தி வெளியாகியுள்ளது.
********************

தூக்குத் தண்டனை யாருக்கு?
தூக்கு தண்டனையை நிறைவற்றக் கூடிய வேலையாள் தேவை என்ற விளம்பரத்தை விரைவில் வெளியிடப்போவதாக இலங்கை அதிகாரிகள் தெரிவிக்கின்றனர்.
நாட்டில் 1976 ஆம் ஆண்டுக்குப் பிறகு ஒருவர் கூட தூக்கிலிடப்படவில்லை என்றாலும் மரண தண்டனை நாட்டின் சட்டத்தில் உள்ளது.
கொழும்பு வெலிக்கந்தை சிறைச் சாலையில் தான் இந்தப் பணிக்கான ஆள் கோரப்பட்டுள்ளது.
இந்தப் பணியில் இருந்தவர் சிறைக்காவலராக பதவி உயர்வு பெற்றுச் செல்வதால் சற்றே கீழ் நிலையில் இருககும் இந்தப் பணி காலியாகி உள்ளது.
உடனடியாக ஆட்களைத் தூக்கில் போடும் எண்ணம் தமக்கு இல்லை என்று இலங்கை சிறைத் துறைத் தலைவர் பி.டபிள்யு.கொடிப்பிலி தெரிவித்தார்.
ஆனால், மொத்தமாக 357 பேர் தூக்கு தண்டனை கைதிகளாக இருக்கின்றனர், எனவே தண்டனைகளை நிறைவேற்றப்படுவதற்கான சாத்தியக் கூறுகள் முற்றாக இல்லை என்று கூறிவிட முடியாது.
அலுகோஸ் என்று சொல்லப்படும் தூக்கு தண்டனையை நிறைவேற்றும் பணியில் தற்போது இருப்பவரும் அதற்கு முன்பு அந்தப் பணியை இருந்தவரும் யாரையும் தூக்கிலிட்டதில்லை.
தற்போது தூக்கு தண்டனை நிறைவேற்றும் பணியாளராக இருப்பவர் 9 ஆண்டுகளுக்கு முன்பு தனது 22 ஆவது வயதில் இந்தப் பணிக்கு சேர்ந்தார்.
ஆனால் இவரின் பெயர் விபரம் பகிரங்கமாக அறிவிக்கப்பட்டிருக்கவில்லை.
வறுமை காரணமாக தனது தந்தை செய்த பணியில் தான் சேர நேரிட்டதாக அவர் சில ஆண்டுகளுக்கு முன்பு அளித்த ஒரு செவ்வியில் கூறியிருந்தார்.
மிக மோசமான குற்றங்களைச் செய்தவர்களுக்கு மரண தணடனை விதிக்கப்பட வேண்டும் என்று தான் நம்பினாலும் தனது பணிக்காலத்தில் யாரையும் தூக்கில் போடாதது தனக்கு மகிழ்சியை அளிப்பதாக அவர் கூறினார்.
எல்லோரும் தூக்குப் போடும் வேலையைச் செய்வர்கள் இதயமில்லாதவர்கள் என்று நினைக்கிறார்கள் அது தவறு என்றும் அவர் கூறியிருந்தார்.
அதே போல தனது குழந்தைகள் தம்முடையை குடும்பத் தொழிலை செய்யக் கூடாது என்று விரும்பும் அவர் தான் தனது பணிக் காலத்தில் குமாஸ்த்தா வேலைகளைச் செய்து காலத்தைக் கழித்ததாகத் தெரிவித்தார்.
மீண்டும் மரண தண்டனையைக் கொண்டு வரப் போவதாக அரசு அவ்வப்போது தெரிவித்தாலும், தூக்குதண்டனை அமுலுக்கு வரவில்லை.
இரண்டு ஆண்டுகளுக்கு முன்பு நான்கு இளவயதினரைக் கொன்ற வழக்கில் நான்கு காவல்துறை அதிகாரிகளுக்கு மரண தண்டனை விதிகக்கப்பட்டிருந்தது என பீபீசி செய்தி வெளியிட்டுள்ளது.
********************

நடவடிக்கை இல்லையென முறையிடும் யாழ் அரச அதிபர்
குடாநாட்டில் இடம்பெற்று வருகின்ற அசாதாரண சூழல்களை கட்டுப்படுத்த காவல்துறையினர் நடவடிக்கை எடுக்கவில்லை.
இது தொடர்பில் வடக்கு மாகாண பிரதி காவல்துறை மா அதிபருக்கும் கட்டளைத்தளபதிக்கும் தெரியப்படுத்தியுள்ளதாக அரசாங்க அதிபர் திருமதி இமெல்டா சுகுமார் தெரிவித்தார்.
அவர் இது தொடர்பாக கருத்து வெளியிடுகையில், யாழ்ப்பாணத்தில் கிறிஸ் பூதம் என்ற பதத்தைப் பாவித்து பெண்கள் மீதான சேட்டைகளும், திருட்டுச் சம்பவங்களும் அதிகரித்துள்ளதாகவும் இது தொடர்பில் பொதுமக்களால் காவல் நிலையங்களில் முறைப்பாடுகள் செய்யப்பட்டுள்ள போதும் காவல்துறையினர் விசாரணை மேற்கொள்வதில்லையென தெரிவித்ததுடன் இதற்கு உரிய நடவடிக்கையை எடுக்குமாறு பிரதி காவல்துறை மா அதிபருக்கு தெரிவித்ததாக குறிப்பிட்டார்.
********************

அதிகரிக்கும் கருக்கலைப்புக்கள்!
இலங்கையில் தினமும் 900 கருக் கலைப்புக்கள் இடம்பெறுவதாக குடும்ப சுகாதாரப் பணியகம் தெரிவித்துள்ளது.
இரண்டு இலட்சத்து 50 ஆயிரம் கருக்கலைப்புக்கள் வருடாந்தம் இடம்பெறுகின்றன.
வருடாந்தம் 3 இலட்சத்து 80 ஆயிரம் பிறப்புக்கள் இடம்பெறுகின்ற நிலையிலேயே கருக்கலைப்புக்களும் அதிகரித்திருப்பதாக சமூக, சுகாதார ஆலோசகர் வைத்தியர் கபில ஜெயரட்ண தெரிவித்தார்.
2005 ஆம் ஆண்டிலேயே மிகக் குறைவான 660 கருக்கலைப்புக்கள் நாளாந்தம் இடம்பெற்றிருந்ததுடன், 17 உயிர்கள் வருடாந்தம் இழக்கப்பட்டதாக அவர் தெரிவித்தார்.
கருக்கலைப்பில் 92 வீதமானவை திருமணமான பெண்களுடையது 8 வீதம் திருமணமாகாத பெண்களுடையது.
இடம்பெறுகின்ற கருக்கலைப்புக்களில் 27 வீதமானவை 25 வயது முதல் 29 வயதுக்கு உட்பட்ட பெண்களுடையது என கணக்கெடுப்பொன்றில் கண்டறியப்பட்டுள்ளது.
********************

இலஞ்சம் கொடுத்து வாக்கு கேட்கும் வங்குரோத்து அரசியல்
கோழி குஞ்சுகளையும், சேலைகளையும் வழங்கி அரசாங்கம் வாக்குகளைக் கொள்ளையடிப்பதற்கு முயற்சி மேற்கொண்டு வருவதாக ஐக்கிய தேசியக் கட்சியின் பொதுச் செயலாளர் திஸ்ஸ அத்தநாயக்க தெரிவித்துள்ளார்.
அரசாங்க சொத்துக்கள் துஸ்பிரயோகம் செய்யப்படுவதற்கு மேலதிமாக இவ்வாறு வாக்காளர்களுக்கு வித்தியாசமான லஞ்சம் வழங்கப்படுகின்றது.
தேர்தல் அறிவிக்கப்பட்டதன் பின்னர் இலவச உணவு, இலவச பொருள் மற்றும் ஏனைய அரச சொத்து துஸ்பிரயோக நடவடிக்கைகள் தடை செய்யப்பட்டுள்ளன.
அரசாங்கம் சகல தேர்தல் சட்டங்களையும் மீறிச் செயற்பட்டு வருவதாகவும் அவர் குறிப்பிட்டுள்ளார்.
தேர்தல் தொடர்பில் அரசாங்க உயரதிகாரிகள் மீது ஆளும் கட்சி அரசியல்வாதிகள் அழுத்தங்களை பிரயோகிக்கின்றனர் என அவர் குற்றம் சுமத்தியுள்ளார;.
********************


Tuesday, 20 September 2011

செய்திகள் 20/09


பொங்கியெழுந்த தன்மானத் தமிழன்
எழுக தமிழா நீதி கேட்டு! ஐ.நா நோக்கி பொங்கு தமிழராய் என்ற முழக்கத்தை ஏற்று உலகமெங்கும் இருந்து தமிழர்கள் உணர்வெழுச்சியுடன் ஜெனீவாவில் திரண்டது.
பல்வேறு நாடுகளில் இருந்து பொங்குதமிழ் உரிமை முழக்கத்திற்கு பல்லாயிரக்கணக்கில் திரண்டு உரிமைக் குரலை ஓங்கி ஒலித்தார்கள்.
ஜெனீவா தொடரூந்து நிலையத்திற்கு அருகாமையில் உள்ள பூங்காவில் இருந்து ஆரம்பித்த பேரணி ஐ.நா சபை முன்றல்வரை சென்றது.
ஐ.நா சபை முன்றலில் உள்ள ஈகைப்பேரொளி முருகதாசன் திடலில் நிகழ்வுகள் நடைபெற்றது.
3.00 மணியளவில் ஜெனீவா ஐ.நா சபை முன்றலை வந்தடைந்த மக்கள் பெருவெள்ளம், மேடையின் முன் ஒன்றுதிரண்டது.
கொடியேற்றல் நிகழ்வு, ஈகைச்சுடர் ஏற்றல் நிகழ்வுகள் என்பன அடுத்ததாக இடம்பெற்றன.
சிறீலங்கா இறுதி யுத்தத்தை நிறுத்தக்கோரி, ஐ.நா முன்றலில் தன்னை தீயுடன் ஆகுதியாக்கிக்கொண்ட ஈகை பேரொளி முருகதாசன் உட்பட, தமிழகத்தில் ஈழத்தமிழர்களின் விடுதலைக்காக உயிர்தியாகம் செய்தோரின் ஈகைச்சுடரொளி ஏற்றல் வைபவம் அடுத்து இடம்பெற்றது.
தற்காலிக முகாம்களில் உள்ள மக்களையும் சிறையில் உள்ள போராளிகளையும் உடனடியாக விடுதலை செய்வதுடன்  நிபந்தனையின்றிச் சொந்தஇடங்களில் உரிய அடிப்படை வசதிகளுடன் குடியமர்த்த வேண்டும்.
தமிழரின் தாயகப் பிரதேசங்களில் இருந்து சிறிலங்காப் படையினர் வெளியேற்றப்படுவதுடன் - அத்துமீறிய திட்டமிட்ட சிங்களக் குடியேற்றங்கள் உடனடியாக நிறுத்தப்பட வேண்டும்.
சனல்4 தொலைக்காட்சி ஒளிபரப்பிய இலங்கையின் கொலைக்களம் என்ற ஆவணப்படத்தினையும் மேலதிகமாகக் கிடைக்கப் பெற்ற ஆவணங்களையும் மற்றும் நேரடிச் சாட்சியங்களையும் போர்குற்றச் சாட்சியங்களாக கொண்டு சிறிலங்கா போர்குற்றவாளிகளை அனைத்துலக நீதிமன்ற விசாரணைக்கு உட்படுத்த சகல நாடுகளும் ஆதரவு தெரிவிக்க வேண்டும்.
தமிழரின் தாயகம் தேசியம் சுயநிர்ணய உரிமை என்பவற்றின் அடிப்படையில் ஒரு தனிநாட்டை இலங்கைத்தீவிற்குள் அமைப்பதற்கான சுதந்திரமான வெகுசன வாக்கெடுப்பை தமிழர் தாயகத்தில் ஐ.நா.வின் கண்காணிப்பில் நடாத்துவதற்கு ஆவன செய்ய வேண்டும்.
சர்வதேச நாடுகளின் ஆலோசனைகளையும் வேண்டுதல்களையும் சிறிலங்கா அரசு ஏற்பதோடு சர்வதேச ஊடகவியலாளர்கள் சுதந்திரமாக எம் மக்களை சந்திக்க அனுமதிக்க வேண்டும். இவை மறுக்கப்படும் பட்சத்தில் சர்வதேச நாடுகள் சிறிலங்கா அரசிற்கு அழுத்தம் கொடுக்க வேண்டும்.
இந்த கோரிக்கைகள் நடைமுறைப்படுத்தப்பட்டு இலங்கைத்தீவிற்குள் தமிழரின் பாதுகாப்பு உறுதிப்படுத்தப்படும் வரை புலம்பெயர் தேசங்களில் அகதிச் தஞ்சம் கோரிய இலங்கையர்களை திருப்பி அனுப்பபுவதை நிறுத்த வேண்டும் ஆகிய ஆறு கோரிக்கைகளை முன்வைத்து நிகழ்த்தப்பட்ட பொங்குதமிழ் உரிமைமுழக்கப் பேரணியில் பல்லாயிரக்கணக்கிலான தமிழர்கள் கலந்து கொண்டிருந்தனர்.
காலத்தின் தேவை இது கலங்கிக் கிடக்கும் தமிழர் அல்ல நாம் கைகோர்த்து நீதி கேட்போம் வாரீர் என விடுக்கப்பட்ட ஒற்றை அழைப்பினை ஏற்றுக்கொண்டு ஜெனீவா வீதிகளில் அணிதிரண்ட தமிழர் பெரும்படை கண்டு சிங்களம் சித்தம் கலங்கிப் போயுள்ளதாக கொழும்பில் இருந்து கிடைக்கும் செய்திகள் தெரிவிக்கின்றன.
**************************

தொடரும் அழுத்தம்
2012 ஆம் ஆண்டு மார்ச் மாதம் ஜெனிவாவில் நடைபெறவுள்ள 19 ஆவது மனித உரிமைகள் பேரவையில் இலங்கையின் போர்க் குற்றம் தொடர்பான இலங்கை அரசாங்கத்தின் நல்லிணக்க ஆணைக்குழு அறிக்கையும், ஐக்கிய நாடுகள் சபை செயலாளர் பான் கீ மூனின் அறிக்கையும் சமர்ப்பிக்கப்பட வேண்டும் என்று கோரிக்கை விடுக்கப்பட்டுள்ளது.
இக் கோரிக்கையை 16 சர்வதேச அரச சார்பற்ற அமைப்புக்கள் ஐக்கிய நாடுகளின் மனித உரிமைகள் பேரவையின் தலைவராக உள்ள உருகுவேயின் லாவுறா டியுபுனிலரோவிடம் வலியுறுத்தியுள்ளன.
இது தொடர்பில் 16 அரச சார்பற்ற அமைப்புகளும் கடிதம் ஒன்றை அவருக்கு அனுப்பியுள்ளன.
2009 ஆம் ஆண்டு மே 23 ஆம் திகதியன்று இலங்கையின் அரசுத் தலைவர் மஹிந்த ராஜபக்ஷவும் ஐக்கிய நாடுகளின் செயலாளர் பான் கீ மூனும் வெளியிட்ட அறிக்கையில், சர்வதேச மனித உரிமை சட்டங்களுக்கு ஏற்ப, வன்முறைகள் தொடர்பில் இலங்கை அரசாங்கம் உரிய நடவடிக்கைகளை மேற்கொள்ளும் என்ற வசனம் குறிப்பிடப்பட்டுள்ளது.
இதன்படி இலங்கை அரசாங்கம் தமது கடமையை நிறைவேற்ற வேண்டும்.
இறுதிப் போரில் இடம்பெற்ற போர்க்குற்றங்கள் தொடர்பில் தமது நல்லிணக்கக் குழுவின் அறிக்கையை வெளியிட வேண்டும்.
ஏற்கனவே 17ஆவது மனித உரிமைகள் பேரவைக் கூட்டத்தின் போது இலங்கை எதிர்வரும் நவம்பர் மாதம் நல்லிணக்கக் குழுவின் அறிக்கை வெளியாகும் என்று தெரிவித்திருந்தது.
இதன் அடிப்படையில் அந்த அறிக்கையும் பான் கீ மூனின் நிபுணர் குழு அறிக்கையும் 19 ஆவது செயலமர்வில் சமர்ப்பிக்கப்பட வேண்டும் என்று சர்வதேச அரச சார்பற்ற அமைப்புக்கள் கோரியுள்ளன.
**************************


எப்போது உரை?
ஐ.நா பொதுச்சபையின் 66வது கூட்டத்தொடரில் பங்கேற்க சிறிலங்கா அதிபர் மகிந்த ராஜபக்ச நேற்று நியுயோர்க் சென்றடைந்துள்ளார்.
அவரை நியுயோர்க் விமான நிலையத்தில் வரவேற்க அமெரிக்க அதிகாரிகள் எவரும் செல்லவில்லை என்றும் தகவல்கள் தெரிவிக்கின்றன.
அமெரிக்காவுக்கான அரசுமுறைப் பயணமாக அவர் செல்லாததால், அமெரிக்க அதிகாரிகள் மகிந்த ராஜபக்சவை வரவேற்கச் செல்லவில்லை.
சிறிலங்கன் விமானசேவை அதிகாரிகளும், நியுயோர்க்கில் உள்ள மேஜர் ஜெனரல் சவீந்திர சில்வா உள்ளிட்ட சிறிலங்கா தூதரக அதிகாரிகளுமே சிறிலங்கா அதிபரை வரவேற்றுள்ளனர்.
சிறிலங்கா அதிபர் மகிந்த ராஜபக்ச எதிர்வரும் 23ம் நாள்- வெள்ளிக்கிழமை ஐ.நா பொதுச்சபையில் உரையாற்றுவார் என்று அறிவிக்கப்பட்டுள்ளது.
எனினும் அவர் இன்று செவ்வாய்க்கிழமை உரையாற்றவுள்ளதாக சில கொழும்பு ஊடகங்கள் தகவல் வெளியிட்டிருந்தன.
இது சிறிலங்கா அதிபரின் உரை இடம்பெறும் போது அதற்கு எதிர்ப்புத் தெரிவித்து ஐ.நா முன்றலில் நடைபெற ஏற்பாடு செய்யப்பட்டுள்ள பொங்குதமிழ் நிகழ்வை குழப்புகின்ற முயற்சியாகவே கருதப்படுகிறது.
ஆனால் சிறிலங்கா அதிபர் இன்று ஐ.நா பொதுச்சபையில் உரையாற்றுவதற்கு வாய்ப்பே இல்லை என்று நியுயோர்க் தகவல்கள் தெரிவிக்கின்றன.
ஐ.நா பொதுச்சபையில் பொதுவிவாதம் நாளையே தொடங்கவுள்ளது.
நாளை 21ம் நாள் தொடக்கம் 23ம் நாள் வரையும், எதிர்வரும் 26ம் நாள் தொடக்கம் 30ம் நாள் வரையுமே பொதுவிவாதத்துக்கு நேரம் ஒதுக்கப்பட்டுள்ளது.
இம்முறை பொதுவிவாதத்தின் போது, பிரச்சினைகளுக்கு அமைதி வழியில் தீர்வு காண்பதில் நடுநிலைமையின் பங்கு என்ற தொனிப்பொருளில் அரச தலைவர்களின் உரைகள் இடம்பெறவுள்ளன.
இந்த விவாதத்தில் சிறிலங்கா அதிபர் மகிந்த ராஜபக்ச, மூன்றாவது தரப்பின் தலையீடுகள் மற்றும் நடுநிலைமை முயற்சிகளைக் கடுமையாக எதிர்க்கும் வகையில் கருத்துகளை வெளியிடுவார் என்று இராஜதந்திர வட்டாரங்கள் தகவல் வெளியிட்டுள்ளன.
**************************

பதிலுக்கு பொய்யுரைக்க முனையும் ஸ்ரீலங்கா
வெளிநாடுகளில் உள்ள, விடுதலைப் புலிகளைப் பிரதிநிதித்துவப்படுத்தும் தலைவர்கள் முப்பதாண்டு கால வன்முறைகளுக்குப் பொறுப்புக்கூற வேண்டும் என்று சிறிலங்கா அரசாங்கம் மனிதஉரிமைகள் கண்காணிப்பகத்திடம் வலியுறுத்தியுள்ளது.
அமெரிக்காவைத் தளமாகக் கொண்ட மனிதஉரிமைகள் கண்காணிப்பகத்தின் மூத்த பிரதிநிதிகளை சந்தித்த ஐ.நாவுக்கான, சிறிலங்காவின் நிரந்தர வதிவிடப் பிரதிநிதி கலாநிதி பாலித கொஹன்னவும், பிரதி வதிவிடப் பிரதிநிதி மேஜர் ஜெனரல் சவீந்திர சில்வாவுமே இவ்வாறு கூறியுள்ளனர்.
இந்தச் சந்திப்பின் போது, போரின் இறுதிகட்டம் குறித்தே மனிதஉரிமைகள் கண்காணிப்பகம் கவலைப்படுவதாக குறிப்பிட்டுள்ள மேஜர் ஜெனரல் சவீந்திர சில்வா, விடுதலைப் புலிகள் முப்பதாண்டு கால மரணங்களுக்கும், அழிவுகளுக்கும் காரணமாக இருந்துள்ளதாக சுட்டிக்காட்டியுள்ளார்.
விடுதலைப் புலிகளுடன் தொடர்பு வைத்திருந்த அடேல் பாலசிங்கமும் ருத்திரகுமாரனும் மேற்கு நாடுகளில் சுதந்திரமாக இருப்பதாகவும் அவர் கூறியுள்ளார்.
போரில் அழிந்துபோன புலிகளின் இராணுவத் தலைவர்களை பொறுப்புக்கூற வைக்க முடியாது என்றும் மேஜர் ஜெனரல் சவீந்திர சில்வா தெரிவித்துள்ளார்.
அடேல் பாலசிங்கம் பிரித்தானியாவிலும், ருத்திரகுமாரன் அமெரிக்காவிலும் இருந்து கொண்டு வடக்கு,கிழக்கு மாகாணங்களில் தனிநாடு அமைப்பதற்கான பரப்புரைகளில் ஈடுபடுவதாகவும் அவர் மேலும் குற்றம்சாட்டியுள்ளார்.
வெளிநாடுகளில் வாழும் புலிகளின் தலைவர்கள் மீது குற்றசாட்டுகளை சுமத்துமாறு அந்தந்த நாடுகளுக்கு அழுத்தம் கொடுக்குமாறு மனிதஉரிமைகள் கண்காணிப்பகத்திடம் சிறிலங்கா பிரதிநிதிகள் கேட்டுக் கொண்டுள்ளனர்.
இந்தச் சந்திப்பின்போது மீள்குடியமர்வு, முன்னாள் போராளிகளின் புனர்வாழ்வு, நல்லிக்க ஆணைக்குழுவின் அறிக்கை உள்ளிட்ட பல்வேறு விவகாரங்கள் குறித்தும் கலந்துரையாடப்பட்டுள்ளன.
நல்லிணக்க ஆணைக்குழுவின் இடைக்கால அறிக்கையை சிறிலங்கா அரசாங்கம் நடைமுறைப்படுத்தவில்லை என்று இந்தச் சந்திப்பின்போது மனிதஉரிமைகள் கண்காணிப்பகத்தின் பிரதிநிதிகள் குற்றம்சாட்டினர்.
அதனை நிராகரித்த பாலித கொஹன்ன, காணி விவகாரங்கள் மற்றும் இறப்புச்சான்றிதழ் வழங்கும் விவகாரங்கள் குறித்த அரசின் நிலைப்பாட்டை எடுத்துக் கூறியுள்ளார்.
ஏனைய நாடுகளுடன் ஒப்பிடுகையில் சிறிலங்கா முன்னேற்றமான நிலையில் இருப்பதாகவும் அவர் குறிப்பிட்டுள்ளார்.
அவசரகாலச்சட்டம் நீக்கப்பட்டது நல்லிணக்க ஆணைக்குழுவின் இடைக்கால அறிக்கை நடைமுறைப்படுத்தப்படுவதன் ஆகப்பிந்திய உதாரணம் என்று மேஜர் ஜெனரல் சவீந்திர சில்வா கூறியுள்ளார்.
ஐ.நா நிபுணர்குழு அறிக்கையும், சனல் 4 வெளியிட்ட சிறிலங்காவின் கொலைக்களங்கள் ஆவணப்படமும் விசாரணகளை ஆரம்பிக்கப் போதுமான சான்றுகள் என்று மனிதஉரிமைகள் கண்காணிப்பகம் எடுத்துக் கூறியுள்ளது.
ஆனால் இவையிரண்டும் நம்பகமற்றவை என்று மேஜர் ஜெனரல் சவீந்திர சில்வா பதிலளித்துள்ளார்.
இந்தச் சந்திப்பு சூடானதாக இருந்ததாகவே தகவல்கள் தெரிவிக்கின்றன.
**************************

ஆதரவு தேடும் ஸ்ரீலங்கா
நிகழ்ச்சி நிரலுக்குப் புறம்பாக ஐநா நிபுணர் குழு அறிக்கையை மனித உரிமைகள் கவுன்ஸிலில் சமர்ப்பிக்கக் கூடாது என ஒன்பது நாடுகள் கோரிக்கை விடுத்துள்ளன.
ரஸ்யா, சீனா மற்றும் பாகிஸ்தான் உள்ளிட்ட ஒன்பது நாடுகள் இந்தக் கோரிக்கையை முன்வைத்துள்ளதாகக் குறிப்பிடப்படுகிறது.
குறித்த அறிக்கை திடீரென மனித உரிமை கவுன்ஸிலில் முன்வைக்கப்பட்டமை சந்தேகத்தை ஏற்படுத்தியுள்ளதாக குறித்த நாடுகள் சந்தேகம் வெளியிட்டுள்ளதாக திவயின பத்திரிகை செய்தி வெளியிட்டுள்ளது.
மாலைதீவு, பங்களாதேஸ், அல்ஜீரியா, கியூபா, மலேசியா மற்றும் பிலிப்பைன்ஸ் ஆகிய நாடுகளும் அறிக்கைக்கு எதிர்ப்பை வெளியிட்டுள்ளன.
எனினும், இந்த நடவடிக்கையில் இந்தியா இணைந்து கொள்ளவில்லை என்பது குறிப்பிடத்தக்கது.
**************************

தீர்வு நிச்சயம் என்கிறார் டியூ!
எந்தப் பக்கத்தில் இருந்து எதிர்ப்புகள் கிளம்பினாலும் அரசு முன்வைத்த காலைப் பின் வைக்காது என அமைச்சர் டியூ குணசேகர தெரிவித்துள்ளார்.
நிரந்தரமான அரசியல் தீர்வு ஒன்றை ஏற்படுத்துவதில் அரசு முனைப்பாகவே இருக்கிறது.
எனவே தமிழ் தேசியக் கூட்டமைப்பும் நாடாளுமன்றத் தெரிவுக் குழுவை புறக்கணிக்காது அதில் பங்குகொண்டு ஒத்துழைக்க வேண்டும் என சிரேஷ்ட அமைச்சர் டியூகுணசேகர வலியுறுத்தினார்.
நேற்று யாழ்ப்பாணத்தில் நடைபெற்ற கருத்தரங்கு ஒன்றில் பிரதம அதிதியாகக் கலந்து கொண்ட சிரேஷ்ட அமைச்சர் இதனைத் தெரிவித்தார்.
அரசுக்கும் தமிழ்த் தேசியக் கூட்டமைப்புக்கும் இடையில் நடைபெற்ற 11ஆவது சுற்றுப் பேச்சின் 13ஆவது திருத்தத்துக்கும் அப்பால் சென்று தீர்வு காண இரு தரப்பினரும் இணங்கினர்.
ஆனால், அரசுத் தலைவர் நாட்டில் இல்லாத வேளையில் அரசில் இருக்கும் தீவிரவாதப் போக்குடைய அமைச்சர்கள் சிலர் இதற்குக் கடும் எதிர்ப்பைத் தெரிவித்துள்ளனர்.
கடைசி வரை இதனை அனுமதிக்கப் போவதில்லை என்றும் எச்சரித்துள்ளனர்.
இது குறித்து அமைச்சர் டியூ குணசேகரவிடம் கேட்டபோதே அவர் இதனைக் கூறினார்.
தான் ஆரம்பம் முதலே இனப்பிரச்சினைக்கு பேச்சுகளின் மூலமே தீர்வு காணப்பட வேண்டும் என்ற நோக்கம் கொண்டவன் அப்போதே 13ஆவது திருத்தச் சட்டத்துக்கு ஆதரவாக வாக்களித்தவன் எனவும் குறிப்பிட்டார்.
ஸ்ரீலங்கா சுதந்திரக் கட்சி ஒரு தீர்வை முன்வைத்தால் ஐக்கிய தேசியக் கட்சி எதிர்க்கும்.
ஐக்கிய தேசியக் கட்சி முன் வைத்தால் ஸ்ரீலங்கா சுதந்திரக் கட்சி எதிர்க்கும்.
இவை இரண்டும் ஒரு இணக்கப்பாட்டுக்கு வந்துவிட்டால் ஜே.வி.பி. ஆர்ப்பாட்டம் செய்யும். இதுதான் அரசியல் நிலைப்பாடு எனம் சுட்டிக்காட்டினார்.
**************************

தமிழ்த் தேசியக் கூட்டமைப்பின் இரகசியம்?
அதிகாரங்களைப் பகிர்ந்தளித்து நாட்டில் சமாதானத்தை ஏற்படுத்தும் நோக்கத்துடன் நாடாளுமன்றத் தெரிவுக்குழுவை அரசு அமைக்குமாக இருந்தால், அதில் பங்கெடுப்பது குறித்து தமிழ்த் தேசியக் கூட்டமைப்புச் சாதகமாகப் பரிசீலிக்கத் தயாராக இருக்கிறது என்று தகவல்கள் வெளியாகியுள்ளது.
நாடாளுமன்றத் தெரிவுக்குழுவை அமைப்பதற்கான நோக்கம் பற்றிய கருத்துரையை மாற்றியமைப்பதற்கு அரசுத் தலைமை இணங்குமானால் தெரிவுக்குழுவில் பங்குபற்றுமாறு விடுக்கப்பட்ட கோரிக்கையைத் தாங்கள் சாதகமாகப் பரிசீலிக்கத் தயார் எனத் தமிழ்த் தேசியக் கூட்டமைப்பின் தலைவர் இரா.சம்பந்தன் அரசுத் தலைவரிடம் தெரிவித்திருக்கின்றார் என நம்பகரமாகத் தெரியவந்தது.
கடந்த 2ஆம் திகதி அலரி மாளிகையில் அரசுத் தலைவர் மஹிந்த ராஜபக்ஷவுக்கும் தமிழ்த் தேசியக் கூட்டமைப்பின் தலைவர் இரா.சம்பந்தனுக்கும் இடையில் நடைபெற்ற இரகசிய சந்திப்பில் சம்பந்தர் இதனைத் தெரிவித்திருக்கிறார்.
சில இராஜதந்திர மட்டங்களின் முன் முயற்சி மற்றும் அழுத்தத்தினால் இந்தச் சந்திப்பு ஏற்பாடு செய்யப்பட்டதாக அறியவருகின்றது.
இந்தச் சந்திப்பின்போதே நாடாளுமன்றத் தெரிவுக்குழுவில் பங்குபற்றுவதற்கான நிலைமைகள் தொடர்பான தங்களது தரப்புக் கருத்து நிலைப்பாட்டை இரா.சம்பந்தன் வெளிப்படையாகவும், திட்டவட்டமாகவும் அரசுத் தலைவருக்கு எடுத்துரைத்துள்ளார்.
தமிழ்த் தேசியக் கூட்டமைப்பின் நாடாளுமன்றக் குழுக் கூட்டம் இன்று அல்லது நாளை கொழும்பில் நடைபெறும்போது இந்த விடயங்கள் குறித்து மற்யை நாடாளுமன்ற உறுப்பினர்களுக்குச் சம்பந்தன் விளக்கமளிப்பார் எனவும் அறியவந்தது.
**************************

தொடரும் சிங்கள குடியேற்றம்!
முல்லைத்தீவு, கொக்கிளாய்ப் பகுதியில் இன்று ஒரு தொகுதி சிங்களக் குடும்பங்கள் புதிதாகக் குடியேற்றப்படவுள்ளன என்று கரைதுறைப்பற்று உதவி அரச அதிபர் எஸ்.தயானந்தா தெரிவித்தார்.
அதன்போது அவர் மேலும் தெரிவிக்கையில், 1960 காலப் பகுதியில் கொக்கிளாய், கொக்குத்தொடுவாய்ப் பகுதிகளில் சிங்கள மக்கள் வாழ்ந்தார்கள்.
இவர்களில் ஒருதொகுதி மக்கள் அண்மையில் முகத்துவாரம் பகுதியில் மீளக் குடியமர்த்தப்பட்டுள்ளனர்.
இப்போது மற்றுமொரு தொகுதி மக்கள் மீளக்குடியேற்றப்படவுள்ளனர்.
இதில் 45 குடும்பங்கள் இன்று புதிதாகக் காணிகள் வழங்கப்பட்டு குடியேற்றப்படவுள்ளன.
ஏற்கனவே வெலிஓயா என்ற பிரதேச செயலக பிரிவை புதிதாக உருவாக்கப்பட்டுள்ளதாக அரசால் முல்லைத்தீவு அரச அதிபருக்கு கடிதமூலம் அறிவிக்கப்பட்டுள்ளது.
இதில் 8 கிராம சேவையாளர் பிரிவுகள் உள்ளடங்குகின்றன.
அவற்றில் குமுளமுனை, தண்ணிமுறிப்பு, அளம்பில், கருநாட்டுக்கேணி போன்ற கிராமசேவையாளர் பிரிவுகளும் உள்ளடங்குகின்றன என்று கரைத்துறைப்பற்று உதவி அரச அதிபர் தெரிவித்துள்ளார்.
இதேவேளை, 28 வருடங்களுக்குப் பின்னர் குறித்த பகுதிகளில் வாழ்ந்த தமிழ் மக்கள் மீள் குடியமர்த்தப்பட்ட போதும் அவர்கள் எந்தவித அடிப்படை வசதிகளுமின்றித் தொடர்ந்து வாழ்ந்து வருகின்றனர்.
இந்த நிலையில், ஏற்கனவே சிங்களக் குடியேற்றங்கள் இருந்ததாக பொய் ஆதாரங்கள் காட்டி இந்தப் பகுதிகளில் திட்டமிட்ட சிங்களக் குடியேற்றங்கள் இடம் பெறுகின்றன என்று தமிழ்த் தேசியக் கூட்டமைப்பு குற்றஞ்சாட்டி உள்ளது.
**************************

காமத்துறவி கைது
பிரிட்டனில் உள்ள முன்னணி சிங்கள பௌத்த பிக்கு ஒருவர் மீது சிறுமியை பாலியல் வல்லுறவு கொண்டதாக குற்றஞ்சாட்டப்பட்டுள்ளது.
இதனை லண்டனில் மெட்ரோபொலிட்டன் காவல்துறையினர் உறுதி செய்துள்ளனர் என பீபீசி செய்தி வெளியிட்டுள்ளது.
லண்டனில் குரைடனில் உள்ள தேம்ஸ் பௌத்த விகாரையின் தலைமை பிக்குவான பகலஹம சோமரட்ண தேரோ என்பவர் மீது செப்டம்பர் 12 ஆம் திகதி பாலியல் துஷ்பிரயோகம் உட்பட 4 குற்றச்சாட்டுக்கள் சுமத்தப்பட்டதாக காவல்துறையினர் தெரிவித்துள்ளனர்.
16 வயதுக்கு குறைவான ஒரு பெண்ணின் மீதான இந்த பாலியல் வல்லுறவும், மேலும் மூன்று பாலியல் ரீதியான தாக்குதல்களும் லண்டனில் செல்வந்தர்கள் வாழும் புறநகர் பகுதியான சிஸ்விக் பகுதியில், 1977 ஆம் ஆண்டுக்கும் 1978 ஆம் ஆண்டுக்கும் இடைப்பட்ட காலகட்டத்தில் நடந்ததாக கூறப்படுகின்றது.
கைது செய்யப்பட்டு தற்போது பிணையில் விடுதலை செய்யப்பட்டுள்ள பிக்கு, செப்டம்பர் 23 ஆம் திகதி நீதிமன்றில் மீண்டும் ஆஜர் செய்யப்படுவார் என்று காவல்துறையினர் தெரிவித்துள்ளனர்
**************************

பள்ளிவாசலை இடித்ததை கண்டும் காணாத இஸ்லாமிய அமைச்சர்கள்!
அநுராதபுரத்தில் இடிக்கப்பட்ட தர்காவை மீண்டும் கட்டித்தரப்படுவதற்கு தன்னால் உறுதியளிக்கப்படவில்லை என்று பாதுகாப்பு செயலாளர் கோட்டாபய ராஜபக்ஷ் தெரிவித்துள்ளார்.
மேலும், கோயில்களுக்கும் தர்காக்களுக்கும் பாதுகாப்பு வழங்க தன்னால் ஏற்பாடு செய்ய முடியுமே ஒழிய, இடிக்கப்பட்ட தர்கா மீண்டும் கட்டித்தரப்படுவதற்கு தன்னால் ஏற்பாடு செய்ய முடியாது என அவர் தெரிவித்துள்ளார்.
இந்த தர்கா இடிப்பு தொடர்பில் இலங்கையின் பாதுகாப்புச் செயலரைச் சந்தித்திருந்த முஸ்லிம் பிரதிநிதிகளில் சிலர், இந்த தர்கா மீண்டும் கட்டித்தரப்படும் என்று கோட்டாபய உத்திரவாதம் வழங்கியுள்ளார் என்ற புரிதலுடன் வெளிவந்திருந்தனர்.
அத்தோடு மீள் கட்டுமானம் பற்றி பேசவேண்டுமானால் முஸ்லிம் மற்றும் பௌத்த பிரதிநிதிகள் மதவிவகார அமைச்சிடம் அவ்விவகாரத்தை கொண்டுசெல்ல வேண்டும் என்று அவர் தெரிவித்தார்.
தர்கா இடிக்கப்பட்டது பற்றி கருத்து தெரிவித்த பாதுகாப்புச் செயலர், இப்படியான செயலுக்கு யாரும் ஒப்புதல் அளித்திருக்கவில்லை என்றும், சட்டத்தை யாரும் அவரவர் கைகளில் எடுத்துகொள்ளக்கூடாது என்றும் சமூகங்கள் இடையிலான நல்லுறவை யாரும் கெடுக்கக்கூடாது என்றும் தெரிவித்தார்.
இந்த தர்கா நூற்றாண்டுகள் பழமையானது எனக் கூறப்படுகிறது.
ஆனால் பௌத்தர்கள் புனிதமாக கருதும் ஒரு இடத்தில் அது உள்ளது என அதனை இடிப்பதற்காக சென்றிருந்த குழுவுக்கு தலைமை ஏற்றிருந்த பௌத்த பிக்கு கூறினார்.
இந்த தர்காவை இடித்துவிட வேண்டும் என மத விவகார அமைச்சகத்தில் தாங்கள் முறையிட்டிருந்ததாகவும், ஆனால் அரசாங்கம் நடவடிக்கை எடுப்பதற்கு முன்பாகவே அதனை தாங்களாக இடித்துவிட்டதாகவும் அந்த பிக்கு ஒப்புக்கொண்டுள்ளார்.
தர்கா இடிப்புக்கு அவ்வட்டாரத்தின் முஸ்லிம் தலைவர்கள் எதிர்ப்பு தெரிவித்துள்ளனர். இடித்தவர்களுக்கு எதிராக அரசாங்கம் நடவடிக்கை எடுக்க வேண்டும் என்று எதிர்க்கட்சி அரசியல்வாதி ஒருவர் கூறியுள்ளார்.
முஸ்லிம் வாக்குகள் அதிகமாக உள்ள கொழும்பு உள்ளிட்ட இடங்களில் அடுத்த மாத ஆரம்பத்தில் வரிசையாக உள்ளூராட்சி தேர்தல்கள் நடக்கவிருக்கின்றன என்பது இங்கே குறிப்பிடத்தக்கது.
**************************

நிதி வழங்கல் பின்போடப்பட்டது?
சிறிலங்காவுக்கு ஒன்பதாவது கட்ட நிதியை வழங்குவதை அனைத்துலக நாணய நிதியம் பிற்போட்டுள்ளதாக தகவல்கள் வெளியாகியுள்ளன.
கடந்த ஓகஸ்ட் மாதம் ஒன்பதாவது கட்ட நிதியான 2.9 பில்லியன் டொலரை அனைத்துலக நாணய நிதியம் சிறிலங்காவுக்கு வழங்கியிருக்க வேண்டும்.
ஆனால் நிதியை வழங்க முன்னர், நாட்டின் பொருளாதார நிலை குறித்து மீளாய்வு செய்யப்படும் என்று ஏற்கனவே உடன்பாடு காணப்பட்டுள்ளது.
ஒன்பதாவது கட்ட நிதியை விடுவிப்பதற்கு முந்திய பொருளாதார நிலை குறித்த மீளாய்வை அனைத்துலக நாணய நிதியம் இன்னமும் மேற்கொள்ளவில்லை.
டிசம்பர் மாதம் வரை இந்த மீளாய்வை பிற்போடப்பட்டுள்ளதாக தகவல்கள் தெரிவிக்கின்றன.
அனைத்துலக நாணய நிதியத்தின் வழிகாட்டுதல்களுக்கேற்க சிறிலங்கா அரசாங்க நிறுவனங்கள் நடந்து கொள்ளத் தவறியதனாலேயே இந்த நிதியை விடுவிப்பதில் இழுபறிநிலை தோன்றியுள்ளது.
இதனிடையே, எப்போதும் இல்லாதளவுக்கு மத்திய வங்கியின் வெளிநாட்டு நாணயக் கையிருப்பு 8.1 பில்லியன் டொலராக அதிகரித்துள்ளதாகவும், இந்தநிலையில் தமக்கு அனைத்துலக நாயண நிதியத்தின் நிதி அவசியமில்லை என்றும் சிறிலங்கா மத்திய வங்கி ஆளுனர் அஜித் நிவாட் கப்ரால் கூறியுள்ளார்.
அனைத்துலக நாணய நிதியத்துக்கும் சிறிலங்கா அரசுக்கும் இடையில் செய்து கொள்ளப்பட்ட உடன்பாட்டின்படி இன்னமும் நான்கு கட்ட நிதி விடுவிக்கப்படாமல் இருப்பது குறிப்பிடத்தக்கது.
**************************

யாழ் நகரில் பலத்த பாதுகாப்புக்கு மத்தியில் கொள்ளை?
யாழ்நகரப் பகுதியில் ஒரே இரவில் பத்து வர்த்தக நிலையங்கள் உடைக்கப்பட்டு பல இலட்சம் ரூபா பெறுமதியான பொருட்களும் பணமும் கொள்ளையடிக்கப்பட்டுள்ளதாக காவல் நிலையத்தில் முறைப்பாடு செய்யப்பட்டுள்ளது.
இச் சம்பவம் ஞாயிறு இரவு இடம்பெற்றுள்ளது.
யாழ்நகரின் ஸ்ரான்லி வீதி, மணிக்கூட்டு வீதி மற்றும் நகர்ப் பகுதி கடைகளில் கொள்ளையர்கள் குழு ஒன்று வர்த்தக நிலையங்களின் பிரதான வாசல் கதவுகளை உடைத்து அங்கிருந்த தொலைபேசிகளையும் பணங்களையும் கொள்ளையடித்துச்சென்றுள்ளது.
நேற்றுக் காலை வழக்கம் போல் வர்த்தக நிலையத்தைத் திறக்க வந்தபோது தமது கடை உடைக்கப்பட்டு களவாடப்பட்டிருந்ததாக வர்த்தக நிலைய உரிமையாளர் ஒருவர் தெரிவித்தார்.
பாதுகாப்பு அதிகமாக உள்ள இடத்தில் இவ்வாறு நடைபெற்றமை சந்தேகத்தை ஏற்படுத்தியுள்ளதாக அவர் மேலும் கூறினார்.
வர்த்தக நிலையங்களில் இரவு வேளையில் பாதுகாப்பு ஊழியர்கள் நிறுத்தப்படுவதில்லையெனத் தெரிவித்ததுடன் தனியார் வங்கிகள் நிறுவனங்களில் பாதுகாப்பு ஊழியர்கள் கடமையில் இருப்பதாகவும் வர்த்தகர்கள் தெரிவித்தனர்.
யாழ். நகரில் வாகன விற்பனை நிலையம், அழகு சாதன விற்பனை நிலையம், மருந்தகங்கள், ஹாட்வெயார் மற்றும் புடைவைக்கடைகளில் இந்த கொள்ளை சம்பவங்கள் இடம்பெற்றுள்ளன.
இப் பகுதி இராணுவ முகாம்கள் மற்றும் விகாரைகள் கட்சி அலுவலகங்கள் அமைந்துள்ள பகுதியாக இருந்தும் இச் சம்பவம் இடம்பெற்றது சந்தேகத்தைத் தோற்றுவித்ததாக வர்த்தகர்கள் பலர் கவலை தெரிவித்தனர்.
**************************


செய்திகள் 19/09


அம்பலமாகும் உண்மைகள்
இலங்கையின் இறுதிக்கட்ட போரின் போது ஒவ்வொரு மாதமும் பொதுமக்களின் இழப்புகள் கூடிக்கொண்டு சென்றதாக விக்கிலீக்ஸ் தகவல் வெளியிட்டுள்ளது.
அமெரிக்க தூதரகத்தில் இருந்து அமெரிக்க இராஜாங்க திணைக்கத்துக்கு இந்த தகவல் அனுப்பப்பட்டுள்ளதாக விக்கிலீக்ஸ் குறிப்பிட்டுள்ளது.
போரின் போது போர் வலயத்துக்குள்ளும் வெளியிலும் நாள் ஒன்றுக்கு 63 பேர் கொல்லப்பட்டதாக இந்த தகவல் பரிமாற்றம் கூறுகிறது.
2009 ஆம் ஆண்டு ஏப்ரல் 7 ஆம் திகதியன்று, ஐக்கிய நாடுகளின் தகவல்படி, ஜனவரி 20 முதல் ஏப்ரல் 6 ஆம் திகதி வரை 4164 பொதுமக்கள் கொல்லப்பட்டதாக அப்போதைய அமெரிக்க தூதுவர் ரொபட் ஓ பிளெக், அமெரிக்காவுக்கு அறிவித்துள்ளார்.
சுமார் 10 ஆயிரம் பொதுமக்கள் கடும் காயங்களுக்கு உள்ளாகியுள்ளதாகவும் அவர் குறிப்பிட்டுள்ளார்.
ஏப்ரல் 7 ஆம் திகதி இலங்கையின் படையினர் முல்லைத்தீவின் 17 சதுரக்கிலோமீற்றர் பரப்பளவான கரையோரப் பிரதேசத்தில் பல்லாயிரக்கணக்கான பொதுமக்கள் தங்கியிருந்த இடத்தின் மீது தாக்குதல் நடத்தினர்.
2009 ஆம் ஆண்டு ஜனவரி மாதம் முதல் நாள் ஒன்றுக்கு 33 பொதுமக்கள் போரினால் கொல்லப்பட்டனர்.
அது பெப்ரவரி முதல் மார்ச் வரையான காலப்பகுதியில் நாளொன்றுக்கு 63 ஆக உயர்ந்தது.
2009 ஆம் ஆண்டு ஜனவரியில் நாள் ஒன்றுக்கு 184 பொதுமக்கள் வரை காயமடைந்தனர்.
பெப்ரவரி மாதக்காலப் பகுதியில் அது 145 ஆகவும் மார்ச்சில் 115 ஆகவும் இருந்தது.
இலங்கை அரசாங்கத்தினால், முல்லைத்தீவில் இரண்டாவது பாதுகாப்பு வலயம் பிரகடனப்படு;த்தப்பட்ட பெப்ரவரி 12 ஆம் திகதி பிரகடனப்படுத்தப்பட்ட பின்னர் அங்கு 2ஆயிரத்து 452 பொதுமக்கள் கொல்லப்பட்டனர். 5ஆயிரம் பேர் காயமடைந்தனர்.
ஐக்கிய நாடுகளின் தகவல்படி பொதுமக்களின் இலக்குகள் மீது இலங்கைப் படையினர் நாளாந்தம்; எறிகனை தாக்குதல்களை நடத்தி வந்தனர்.
அத்துடன் விமானக்குண்டு வீச்சுகளும் நடத்தப்பட்டன.
ஏ 35 வீதியில் பிரகடனப்படுத்தப்பட்ட பாதுகாப்பு வலயத்தில் மாத்திரம், 860 பொதுமக்கள் கொல்லப்பட்டனர். 3ஆயிரத்து 339 பேர் காயமடைந்தனர்.
பலியானவர்களில் 23 சிறுவர்கள் உள்ளடங்குவர். 345 சிறுவர்கள் காயமடைந்தனர்.
*****************

யாரை நம்புவது?
இந்தியாவையும், அமெரிக்காவையும் நம்புவதால் தமிழ் மக்களுக்கு எந்தவித விமோசனமும் கிடைக்கப் போவதில்லை அதுதான் உண்மையும் கூட என்று புதிய இடதுசாரி முன்னணியின் தலைவர் விக்கிரமபாகு கருணாரத்ன தெரிவித்திருக்கிறார்.
இதேவேளை, தமிழர் பிரச்சினைகளைப் பயன்படுத்தி தனது நாட்டுக்கு ஆதாயம் தேட முனைபவர்களின் மாயைக்குள் தமிழ்த் தலைமைகள் சிக்கிவிடக்கூடாது என்று ஜனநாயக சோஷலிசக் கட்சியின் தலைவர் ஸ்ரீதுங்க ஜெயசூரிய எச்சரித்துள்ளார்.
தமிழர் பிரச்சினை தொடர்பில் இந்திய அரசு இலங்கைக்கு அழுத்தம் கொடுக்க வேண்டும் என அமெரிக்க இராஜாங்கத் திணைக்களத்தின் தெற்கு மற்றும் மத்திய ஆசிய விவகாரங்களுக்குப் பொறுப்பான உதவி செயலாளர் ரொபேர்ட் ஓ பிளேக் டில்லியில் கூறியிருந்தமை குறித்துக் கருத்துத் தெரிவித்த போதே அவர் இவ்வாறு கூறினார்.
அரசுடன் சமரசம் பேசும் பிளேக் இலங்கைக்கு வெளியே சென்றுதான் வீர வசனம் பேசுகின்றார்.
அரசியல் தீர்வு விடயம் தொடர்பாக அடிக்கடி பேசும் இவர், எப்பொழுதாவது காவல்துறை, காணி அதிகாரம் வழங்கப்படவேண்டும் எனக் கூறியுள்ளாரா? எனவும் கேள்வி எழுப்பியுள்ளார்.
தமிழர் விடயம் தொடர்பாக எதையாவது பேச வேண்டும் என்பதற்காகவே ரொபட் ஓ பிளேக் அவ்வாறு கூறியுள்ளார்.
இந்தியாவும் அது தொடர்பில் அலட்டிக்கொள்ளாது. ஏனென்றால், மஹிந்த அரசுதான் அவர்களுக்கு முக்கியம் என்றும் சுட்டிக்காட்டினார்.
அரசுக்கும் கூட்டமைப்புக்கும் இடையே முறிவடைந்திருந்த பேச்சுகள் மீண்டும் ஆரம்பமாகியுள்ளன.
இந்த நிலையில், நாடாளுமன்றத் தெரிவுக்குழுவை அமைக்கும் முயற்சிகளும் தீவிரமாக நடைபெறுகின்றன.
எதை நாம் நம்புவது என்ற சந்தேகமும் மக்கள் மத்தியில் எழுந்துள்ளது.
எனவே, அரசின் பொறிக்குள் கூட்டமைப்பு சிக்காமல், கவனமாகச் சிந்தித்து பேச்சுகளை முன்னெடுக்கவேண்டும்.
அதேவேளை பேச்சுகள் மீண்டும் ஆரம்பமானதை தான் வரவேற்ப்பதாக புதிய இடதுசாரி முன்னணியின் தலைவர் விக்கிரமபாகு கருணாரட்ன தெரிவித்தார்.
இதேவேளை, போர்க் காலத்தில் இலங்கைக்கு ஆயுதங்களை வழங்கி மஹிந்த அரசைக் காப்பாற்றிய அமெரிக்காவும் இந்தியாவும் இப்பொழுது வேறு வடிவில் மஹிந்த அரசைக் காப்பாற்ற முனைகின்றன என்று ஜனநாயக சோஷலிச கட்சித் தலைவர் ஸ்ரீதுங்க ஜெயசூரிய குற்றஞ்சாட்டியுள்ளார்.
புலம்பெயர் தமிழர்கள் இன்று அரசுக்கு எதிராகவும், அரசியல் தீர்வை வலியுறுத்தியும் போராடுகின்றனர்.
இந்நிலையில், உள்நாட்டில் தாமும் போராட்டங்களை முன்னெடுத்தால்தான் உரிமைகளை வென்றெடுக்க முடியும்.
மாறாக அமெரிக்காவையும், இந்தியாவையும் நம்பினால் அது பகல் கனவாகும் எனவும் தெரிவித்தார்.
*****************

சிதைக்கும் முயற்சி தொடர்கின்றது
தமிழ்ப் பெண்களைக் கேவலப்படுத்தி தமிழர்கள் வாழும் பிரதேசங்களை உல்லாச புரியாக்க இலங்கை இராணுவம் முனைகிறது.
போரினால் சிதைந்து போயுள்ள வடபகுதியையும், அவல நிலையில் வாழும் தமிழ் மக்களையும் காட்சிப் பொருளாக்கி இங்கே தென்பகுதிச் சிங்களவர்களை அழைத்து வந்து கண்காட்சி நடத்துகின்றது அரசு என்று கூட்டமைப்பின் இணைச் செயலர் மாவை சேனாதிராசா சாடியுள்ளார்.
நேற்று முன்தினம் நாவாந்துறையில் இடம்பெற்ற மக்கள் சந்திப்பின் போது உரையாற்றிய மாவை சேனாதிராசா இராணுவத்தினர் தான் கிறீஸ் பூதங்களாக நடமாடுகின்றனர் எனத் தெரிவித்தார்.
இவர்கள் குறிப்பாகத் தமிழ்ப் பெண்களின் மீதே குறிவைத்து சேட்டைகளில் ஈடுபட முனைகின்றனர்.
இவ்வாறான செயல்களை எவரும் பொறுக்க மாட்டார்கள், பொங்கி எழுவார்கள் என்ற நோக்குடனேயே இப்படிக் கேவலமான செயல்களில் இராணுவத்தினர் ஈடுபட்டுள்ளனர்.
இப்படித் தரங்கெட்ட முறையில் தமிழ் மக்களின் உணர்வுகளைத் தூண்டிவிட்டு மீண்டும் ஒரு இன அழிப்புக்கே திட்டமிடுகின்றனர்.
இந்தக் கிறீஸ் பூதங்கள் ஏன் தென்பகுதிச் சிங்களப் பெண்களைத் தாக்கவில்லை. தீவகப்பகுதிக்குள் போகவில்லை எனவும் கேள்வி எழுப்பினார்.
*****************

இணையவழி நுழைவிசைவு ஏன்?
சிறிலங்காவுக்கான இணையவழி நுழைவிசைவு பெறுவதற்கான விண்ணப்பங்களை செப்ரெம்பர் 28ம் நாள் தொடக்கம் இணையத்தளம் மூலம் பெற்றுக் கொள்ள முடியும
78 நாடுகளைச் சேர்ந்தவர்கள் சிறிலங்கா வரும்போது முன்கூட்டியே நுழைவிசைவுக்கு விண்ணப்பித்து அதற்கான அனுமதியைப் பெற்றுக் கொள்ள வேண்டும் என்று அறிவிக்கப்பட்டுள்ளது.
தற்போது இந்த நாடுகளைச் சேர்ந்தவர்களுக்கு வருகை நுழைவிசைவு கட்டுநாயக்க விமான நிலையத்தில் வைத்து வழங்கப்பட்டு வருகிறது.
ஆனால் இந்த நடைமுறை அடுத்த ஆண்டு ஜனவரி 1ம் நாளுடன் நிறுத்தப்படவுள்ளது.
ஜனவரி 1ம் நாளுக்குப் பின்னர் சிறிலங்கா வரவிரும்பும் 78 நாடுகளின் குடிமக்கள் முன்கூட்டியே இணைய மூலம் விண்ணப்பித்து நுழைவிசைவு பெற்றுக் கொள்ள வேண்டும் என்றும், சிங்கப்பூர் , மாலைதீவு நாடுகளுக்கு மட்டும் இதிலிருந்து விதிவிலக்கு அளிக்கப்படும் என்றும் குடிவரவுத் திணைக்கள அதிகாரி மேலும் கூறியுள்ளார்.
எந்தெந்த நாடுகளைச் சேர்ந்தவர்கள் இவ்வாறு விண்ணப்பிக்க வேண்டும் என்று குடிவரவுத் திணைக்கள அதிகாரிகள் இன்னமும் அறிவிக்கவில்லை என்பது குறிப்பிடத்தக்கது.
*****************

பதிவு ஏன்?
யுத்தம் காரணமாக இடம்பெயர்ந்தோருக்கு காணிகளை வழங்குவதாகவும் அவர்களது காணிக்கான அனுமதிப்பத்திரம் மற்றும் உறுதியினை வழங்குவதற்கு ஏற்பாடுகளை முன்னெடுக்கவுள்ளதாகவும் தெரிவித்து காணி மற்றும் காணி அபிவிருத்தி அமைச்சின் ஊடாக முன்னெடுக்கப்பட்டு வரும் மண்ணின் மகிமை வேலைத்திட்டம் வட மாகாணத்தில் ஆரம்பிக்கப்பட்டுள்ளது.
யாழ்ப்பாணம், மன்னார், வவுனியா , முல்லைத்தீவு மற்றும் கிளிநொச்சி பகுதிகளில் கிராம சேவகர் பிரிவு ரீதியாக செயற்படுத்தப்பட்டு வரும் இவ்வேலைத்திட்டம் பல்வேறு சர்ச்சைகளை கிளப்பும் என பலரும் தெரிவிக்கின்றனர்.
2 மாத கால தவணையில் காணிகள் அனைத்திற்குமான பதிவுகளை மேற்கொள்ள வேண்டுமென பதில் காணி உரித்து நிர்ணய ஆணையாளர் அறிவித்துள்ளார்.
இந்தவகையில் தற்போது புலம்பெயர் நாடுகளில் வசிப்பவர்கள் மற்றும் வேறு பிரதேசங்களில் வசிப்பவர்களும் தமது காணிக்கான பதிவுகளை மேற்கொள்ளவேண்டுமெனவும் தெரிவிக்கப்பட்டுள்ளமையால் பலரும் இப்பதிவு தொடர்பில் சந்கேத்துடன் பார்க்கின்றனர்.
வடபகுதியில் மட்டுமே மேற்கொள்ளப்படும் இப்பதிவு நடவடிக்கையால் பதிவு செய்யப்படாத அனைத்து காணிகளையும் அரசு சுவீகரித்துக்கொள்ளும் வாய்ப்புள்ளதாகவும் வட மாகாண காணித்திணைக்கள அதிகாரி ஒருவர் தெரிவித்தார்.
இத்திட்டம் தொடர்பாக மேலதிக விபரங்களை அதற்கான இணையத்தள முகவரிகளில் பார்வையிட முடியும்.
*****************

யுத்தக் குற்றவாளிகளுக்கு ஆப்பு!
மேஜர் ஜெனரல் ஜெகத் டயசை பதில் தூதுவராக ஏற்றுக்கொள்ள சுவிற்சர்லாந்து அரசாங்கம் மறுத்து விட்டதாக கொழும்பு ஆங்கில ஊடகம் ஒன்று தகவல் வெளியிட்டுள்ளது.
ஜேர்மனி, சுவிற்சர்லாந்து, வத்திக்கான் ஆகிய நாடுகளுக்கான சிறிலங்காவின் தூதுவர் ரி.பி.மடுவெகெதரவின் பதவிக்காலம் கடந்த ஜுன் மாதத்துடன் முடிவடைந்துள்ளது.
இந்தநிலையில் பேர்லினில் உள்ள சிறிலங்காவின் பிரதித் தூதுவர் மேஜர் ஜெனரல் ஜெகத் டயசிடம் பதில் தூதுவருக்குரிய பொறுப்புகளை ஒப்படைக்க திட்டமிட்டிருந்தார்.
ஆனால் அவரை பதில் தூதுவராக ஏற்றுக் கொள்ள சுவிற்சர்லாந்து அரசாங்கம் மறுத்து விட்டதாக ஜெனிவா அதிகார வட்டாரங்கள் தகவல்கள் தெரிவித்துள்ளன.
இதனால் அவர் அந்தப் பதவியை ஏற்றுக் கொள்ளவில்லை என்றும் கொழும்பு ஆங்கில ஊடகத்துக்கு ரி.பி.மடுவெகெதர தெரிவித்துள்ளார்.
போர்க்குற்றங்களுக்குத் துணைபோனதாக குற்றச்சாட்டுகள் சுமத்தப்பட்டுள்ளதால் சுவிற்சர்லாந்து அரசாங்கம் மேஜர் ஜெனரல் ஜெகத் டயசை ஏற்க மறுப்பதாகவும், அவர் கூறியுள்ளார்.
ஆனால் சிறிலங்கா வெளிவிவகார அமைச்சு இந்தத் தகவலை நிராகரித்துள்ளாகவும் கொழும்பு ஊடகம் தகவல் வெளியிட்டுள்ளது.
அதேவேளை ஜேர்மனிக்கான தூதுவராக இருந்த மடுவெகெதர தற்போது கொழும்பு திரும்பியுள்ளார்.
அவருக்குப் பதிலாக சரத் கொங்கஹகே தூதுவர் பதவியை ஏற்கவுள்ளார்.
மேஜர் ஜெனரல் ஜெகத் டயசும் விரைவில் கொழும்பு திரும்பவுள்ளதாகவும் கொழும்பு ஆங்கில ஊடகம் தகவல் வெளியிட்டுள்ளது.
*****************

ஆளும் கட்சியின் அட்டகாசம்
தெஹிவளை கல்கிஸை மாநகரசபைக்கு அரச தரப்பின் மேயர் வேட்பாளராகக் களமிறங்கியுள்ள வேட்பாளரொருவர் முற்றிலும் வித்தியாசமான முறையில் தேர்தல் பிரசார நடவடிக்கைகளை முன்னெடுத்து வருகின்றார்.
அரசுத் தலைவர்த் தேர்தல், பொதுத்தேர்தல் ஆகியவற்றை மிஞ்சும் வகையில் அவரது பிரசார நடவடிக்கைகள் அமைந்துள்ளன.
உள்ளூராட்சி சபைத் தேர்தல் என்பதால் பிரசார நடவடிக்கைகளுக்கு வாகனங்களைக்கூடப் பயன்படுத்த வசதியில்லாமல் வேட்பாளர்கள் தவிக்கும் நிலையில், குறித்த வேட்பாளர் உலங்குவானூர்தி மூலம் பறந்து சென்று துண்டுப்பிரசுரங்களை விநியோகிக்கின்றார்.
ஆடம்பரமாகவும், சற்று வித்தியாசமாகவும் இருக்கட்டும் என்று பறந்து பறந்து நேற்று உலங்கு வானூர்திகளில் இருந்து விநியோகிக்கப்பட்ட துண்டுப்பிரசுரங்கள் தெஹிவளை கல்கிஸை மாநகரசபைக்கு உட்பட்ட பிரதேசத்திலுள்ள வடிகான்களிலும், குப்பைத் தொட்டிகளிலும், தரைகளிலும், வீட்டுக் கூரைகளிலும் விழுந்துள்ளன என்று தகவல்கள் தெரிவிக்கின்றன.
*****************

தொடரும் சந்திப்புக்கள்
பாரதீய ஜனதாக் கட்சியின் மூத்ததலைவர் முரளி மனோகர் ஜோசியை தமிழ்த் தேசியக் கூட்டமைப்பின் தலைவர் இரா.சம்பந்தன் கொழும்பில் சந்தித்துப் பேசியுள்ளதாக இந்திய ஊடகம் ஒன்று தகவல் வெளியிட்டுள்ளது.
இந்தச் சந்திப்பின் போது, சிறிலங்கா அரசாங்கம், தேசிய பிரச்சினைக்குத் தீர்வு காண உறுதியானதும் வெளிப்படையானதுமான நடவடிக்கைகளை விரைவாக முன்னெடுக்க வேண்டும் என்று இரா. சம்பந்தன் வலியுறுத்திக் கூறியுள்ளார்.
மகாபோதி நிலையதில் அநகாரிக தர்மபால நினைவுச்சொற்பொழிவு ஆற்றுவதற்காக முரளிமனோகர் ஜோசி கொழும்பு சென்றிருந்த போது, அவரை சிறிலங்கா பிரதமர் டி.எம்.ஜெயரட்ண, வெளிவிவகார அமைச்சர் ஜி.எல்.பீரிஸ், தமிழ்த் தேசியக் கூட்டமைப்பின் தலைவர் இரா.சம்பந்தன் ஆகியோரைச் சந்தித்துப் பேசியுள்ளார்.
கொழும்புக்கான பயணத்தின் முடிவில் கருத்து வெளியிட்டுள்ள முரளி மனோகர் ஜோசி, எல்லாக் குடிமக்களும் சமமானவர்கள் என்பதே ஜனநாயகத்தின் அடிப்படை என்றும் அதற்கு சிறிலங்காவின் வடபகுதி விதிவிலக்காக இருக்க முடியாது என்றும் கூறியுள்ளார்.
சிறிலங்காவில் வடக்கிலுள்ள மக்கள் தமக்கும் சமஉரிமை உள்ளது என்று உணரத்தக்க நிலை விரைவாக ஏற்படுத்தப்பட வேண்டும் என்றும், எல்லா வாக்குறுதிகளும் விரைவாக நடைமுறைப்படுத்தப்பட வேண்டும் என்றும் அவர் வலியுறுத்தியுள்ளார்.
*****************