Friday, 4 November 2011

செய்திகள் 01/11


சிலை தகர்ப்பு
தமிழ் மக்களின் விடுதலைக்காக அயராது பாடுபட்டவரும், என்றும் தனது உடல், உயிர் யாவற்றையும் தமிழுக்காக அர்ப்பணித்து இறைபதம் அடைந்த ஈழத் தமிழ் மக்களின் ஆரம்ப தலைவரான தந்தை செல்வாவின் நினைவாக திருமலை மாவட்டத்தில் தாபிக்கப்பட்டிருந்த அவரின் உருவச் சிலையை கடந்த ஒரு சில தினங்களுக்கு முன் உடைத்துள்ள கயவர்களை தான் வன்மையாக கண்டிப்பதாக மட்டக்களப்பு மாவட்ட தமிழ் தேசிய கூட்டமைப்பின் பாராளுமன்ற உறுப்பினர் சீனித்தம்பி யோகேஸ்வரன் தனது கண்டன அறிக்கையில் தெரிவித்துள்ளார்.
யுத்த காலத்திலும் உடைக்கப்படாத இச்சிலை தற்போது தமிழ் மக்களின் பிரச்சனைகள், சர்வதேச மட்டத்தில் எடுத்துச் செல்லப்படும் செயற்பாட்டை விரும்பாத விஷமிகளால் உடைக்கப்பட்டிருப்பது ஒரு திட்டமிட்ட சதியாகும் என்றும், இச்சிலை மக்கள் எவ்வேளையிலும் நடமாடும் பகுதியில் அமைந்துள்ளதால் இது திட்டமிட்டே உடைக்கப்பட்டுள்ளது எனவும் தெரிவித்துள்ளார்.
தந்தை செல்வாவின் உருவச் சிலையை உடைப்பதன் மூலம் தமிழ் மக்களின் தமிழ் உணர்வை அழித்து விடலாம் என எண்ண வேண்டாம் எனவும் இச்செயற்பாடுகள் மேலும் எங்கள் மக்களின் தமிழ் தேசிய உணர்வையும், விடுதலை நோக்கையும் தூண்டிவிடுமே அன்றி அடக்கி விடமாட்டாது எனவும் தெரிவித்துள்ளார்.
வேண்டுமானால் அவர்கள் தந்தை செல்வாவின் சிலையை உடைக்கலாம், ஆனால் எமது மக்களின் மனங்களில் விதைத்துள்ள தமிழ் மக்களின் விடுதலை நோக்கை உடைக்க முடியாது எனவும் தெரிவித்துள்ளார்.
அத்தோடு இச்சிலையை உடைத்தவர்களை கண்டு பிடித்து நடவடிக்கை எடுக்க வேண்டிய பொறுப்பு பாதுகாப்பு தரப்பினரையே சாரும்.
ஏனெனில் இது ஒரு முக்கிய பிரதான வீதியில் அமைந்துள்ளது.
இந்தச் சிலை தற்போது உடைக்கப்பட்டாலும் இந்த இடத்தில் மிகவும் பிரம்மாண்டாக ஒரு உருவச் சிலையை தமிழ் தேசிய கூட்டமைப்பு விரைவில் நிர்மாணிக்கும் எனவும் அவர் தெரிவித்தார்.
*******************

தமிழ்த் தேசிய செயற்பாட்டாளர்களை இலக்கு வைக்கும் ஸ்ரீலங்கா
பாரிஸ் நகரில் தமிழர் ஒருங்கிணைப்புக் குழுவின் முன்னாள் பொறுப்பாளரும், தமிழ்த் தேசிய விடுதலைத் தளத்தின் முக்கிய செயற்பாட்டாளருமான திரு. பருதி அவர்கள் படுமோசமான தாக்குதல்களுக்குள்ளாகி, ஆபத்தான் நிலையில் வைத்தியசாலை அவசரப் பிரிவில் அனுமதிக்கப்பட்டு சிதிச்சையளிக்கப்பட்டு வருகின்றார்.
மூன்று ஆயுததாரிகள் இந்தத் தாக்குதலை மேற்கொண்டுள்ளனர்.
இந்தத் தாக்குதலைத் தடுக்க முயற்சித்த பருதியுடன் கூடச் சென்ற இருவரும் காயங்களுக்குள்ளாகியுள்ளனர்.
பொல்லுகள், இரும்புக் கம்பி, வாள் ஆகியவற்றால் பருதி மீது தாக்குதல் நடாத்தப்பட்டபோது இவர்கள் அதனைத் தடுத்து அவரைக் காப்பாற்றியுள்ளார்கள்.
இந்தத் தாக்குதல் சம்பவம் பற்றிய விசாரணைகள் நடைபெற்று வருகின்றது.
புலம்பெயர் தமிழர்கள் மத்தியில் குழப்பங்களையும், பிளவுகளையும் உருவாக்கும் முயற்சியில் தோல்வியைத் தழுவிய சிங்களப் புலனாய்வாளர்கள், தமிழ்த் தேசிய சிதைவுக்கான உச்ச இலக்காக மாவீரர் தினத்தைக் குறி வைத்துள்ளனர்.
அந்த சிங்களச் சதியினை களத்தில் நின்று எதிர்த்துப் போராடும் தமிழ்த் தேசிய செயற்பாட்டாளர்களை அச்சுறுத்தி, அதிலிருந்து அகற்றும் முயற்சியாகவே இந்தத் தாக்குதல் முயற்சி நோக்கப்படுகின்றது.
ஏற்கனவே, பிரித்தானிய தமிழ்த் தேசிய ஒருங்கிணைப்பாளர் தனம் மீது இதே பாணியில் தாக்குதல் நடாத்தப்பட்டது.
இதைவிட, ஜெர்மனியிலும், பிரித்தானியாவிலும் தமிழ்த் தேசிய செயற்பாட்டாளர்கள இருவர் தாக்கப்பட்டுள்ளார்கள்.
பாரிசில் இருந்து வெளிவரும் ஈழமுரசு பத்திரிகையின் ஊடகவியலாளர் ஒருவர் தாக்குதல் முயற்சியிலிருந்து புத்திசாலித்தனமாகத் தப்பித்துக்கொண்டுள்ளார்.
இந்தத் தாக்குதல்கள் எவையும் தனிப்பட்ட காரணங்களுக்காகவோ, உள் முரண்பாடுகளாலோ இடம்பெற்றவை அல்ல.
மாறாக, திட்டமிட்ட வகையில், தகவல்கள் திரட்டப்பட்டு, தாக்குதலுக்குரிய நபரின் நடமாட்டங்கள் கண்காணிக்கப்பட்டு, வெகு நேர்த்தியாக நடாத்தப்பட்டுள்ளன.
புலம்பெயர் தேசங்களிலும், சிங்களப் புலனாய்வாளர்கள் தமிழ்க் கூலிக் குழுக்களின் உதவியுடன் இந்தத் தாக்குதல்களை மேற்கொள்கின்றனர் என்றே நம்பப்படுகின்றது.
*******************

சிக்கலுக்குள் ஸ்ரீலங்கா
இனப்பிரச்சினைக்கு உரிய தீர்வை வழங்க வேண்டிய கட்டாய நிலைக்கு இலங்கை அரசு தள்ளப்பட்டுள்ளது.
தமிழ் மக்களுக்கு உரிய தீர்வை வழங்குமாறு சர்வதேசம் இலங்கைக்கு நெருக்கடி கொடுத்து வருகிறது.
இதை சாதகமாகப் பயன்படுத்தி தமிழ் மக்கள் தங்கள் வாழ்விடங்களில் சகல உரிமைகளுடன் வாழும் நிலையை ஏற்படுத்துவதற்கு முயற்சிகளை மேற்கொண்டு வருவதாக தமிழ் தேசியக் கூட்டமைப்பின் தலைவர் இரா.சம்பந்தன் கனடாவில் தெரிவித்தார்.
கனடாவின் ஸ்காபுறோ நகரிலுள்ள ஐயப்பன் ஆலய மண்டபத்தில் நேற்றுமுன்தினம் மாலை நடைபெற்ற பொதுக்கூட்டத்தில் கலந்துகொண்டு பேசியபோதே அவர் இதனைத் தெரிவித்தார்.
வடக்கு கிழக்கு தமிழ் மக்களின் உரிமைகள் பற்றி பேசுகின்ற போது, அங்கு வாழ்கின்ற முஸ்லிம் மக்களின் உரிமைகள் பற்றியும் அக்கறை கொண்டுள்ளதாகவும் தெரிவித்தார்.
தமிழ் மக்களுக்கு நிகரான உரிமை பெற்றவர்களாக முஸ்லிம் மக்களும் வாழ வேண்டும் என்பதே தமது நோக்கம் எனவும் குறிப்பிட்டார்.
வடக்கு, கிழக்கு மாகாணங்கள் தமிழ் மக்களின் பாரம்பரிய வாழ்விடம்.
எம்மண்ணில் நாம் வாழவும் அதனை ஆளவும் எமக்கு உரிமை உண்டு.
ஆனால், அந்த உரிமையை வழங்காது அழித்தொழிக்க இலங்கை அரசு தீவிரமாகச் செயற்பட்டு வருகின்றது.
எமது உரிமைகளைப் பெறுவதற்குச் சாதகமான சந்தர்ப்பம் தற்போது ஏற்பட்டுள்ளது.
ஏற்கனவே ஏற்பட்ட பல சந்தர்ப்பங்களை நாம் தவற விட்டுள்ளோம். அதனால், நிதானமாகச் சிந்தித்து செயற்பட வேண்டிய தருணம் இது எனவும் தெரிவித்துள்ளார்.
கட்டாயத் தீர்வை வழங்க வேண்டிய நிர்ப்பந்தம் இலங்கை அரசுக்கு ஏற்பட்டுள்ளது.
நாம் நிதானமாகச் செயற்பட வேண்டும். அதற்கு புலம்பெயர்ந்த நாடுகளில் வாழும் அனைவரினதும் ஆதரவு வேண்டும்.
புலம்பெயர்ந்தவர்கள் மீண்டும் அங்கு வரவேண்டும். சந்தர்ப்பம் ஏற்படும்போது அங்கு முதலீடுகளைச் செய்ய வேண்டும் என்றும் சம்பந்தன் கூறினார்.
மாவை சேனாதிராஜா மற்றும் சுமந்திரன் ஆகியோரும் நிகழ்வில் உரையாற்றினார்கள்.
*******************

கனடாவின் அழுத்தம்
இலங்கையில் தமிழ் மக்களுக்கு மனித உரிமையும் சுதந்திரமும் கிடைப்பதற்கு கனேடியப் பிரதமரும், வெளிநாட்டு அமைச்சரும் தற்போது தீவிர நடவடிக்கை எடுத்து வருகின்றனர் என்று அந்நாட்டு நாடாளுமன்ற உறுப்பினர் ராதிகா சிற்சபேசன் தெரிவித்துள்ளார்.
கனடாவின் ஸ்காபுறோ நகரிலுள்ள ஐயப்பன் ஆலய மண்டபத்தில் நேற்றுமுன்தினம் மாலை நடைபெற்ற பொதுக்கூட்டத்தில் கலந்துகொண்ட தமிழ்க் கூட்டமைப்பின் தலைவர் இரா. சம்பந்தன், மாவை சேனாதிராசா, சுமந்திரன் ஆகியோரை வரவேற்றுப் பேசியபோதே அவர் இதனைத் தெரிவித்தார்.
பல்வேறு இன மக்களும் சேர்ந்து தன்னை தமது நாடாளுமன்ற உறுப்பினராகத் தெரிவு செய்த தொகுதிக்கு வந்துள்ள தமிழ்க் கூட்டமைப்பினரை வரவேற்பதில் தான் பெருமகிழ்ச்சி அடைவதாகவும் தெரிவித்தார்.
இலங்கையில் மேற்கொள்ளப்பட்ட மனித உரிமை மீறல் செயல்கள் குறித்து விசாரணை நடத்தப்பட வேண்டும் என தான் எதிர்க்கட்சியில் இருந்து கனடா அரசுக்கு வலியுறுத்தி வருவதாகவும் தமிழ் மக்களுக்கு மனித உரிமையும் சுதந்திரமும் கிடைக்க வேண்டும் எனவும் தெரிவித்தார்.
இது குறித்து கனேடியப் பிரதமரும், வெளிநாட்டு அமைச்சரும் தற்போது நடவடிக்கை எடுத்து வருகின்றனர் என்றும் ராதிகா குறிப்பிட்டார்.
*******************

கலங்கும் ஐ.தே.க
இனப்பிரச்சினைக்கான தீர்வை வழங்க விடாமல் இலங்கை அரசை இந்தியா கட்டுப்படுத்தி வருகிறது என ஐக்கிய தேசியக் கட்சியின் நாடாளுமன்ற உறுப்பினரும், முன்னாள் வெளிவிவகார அமைச்சருமான லக்ஷ்மன் கிரியெல்ல குற்றம்சாட்டியுள்ளார்.
இனப்பிரச்சினைத் தீர்வு விடயம் தொடர்பாக வெளிநாடுகளுடன் பேச்சு நடத்தாமல், ஐக்கிய தேசியக் கட்சி உட்பட உள்நாட்டு அரசியல் கட்சிகளுடனும் பேச்சுநடத்த தமிழ்த் தேசியக் கூட்டமைப்பு முன்வரவேண்டும் என்று அழைப்பு விடுத்தார்.
அமெரிக்கா சென்று அந்நாட்டு அதிகாரிகள் சிலருடன் பேச்சு நடத்தியுள்ள தமிழத் தேசியக் கூட்டமைப்பினர் கனடாவுக்குச் சென்றுள்ள நிலையில், கூட்டமைப்பின் அமெரிக்கப் பயணம், இலங்கை இந்திய உறவு மற்றும் அரசு கூட்டமைப்பு பேச்சு தொடர்பில் கருத்துத் தெரிவித்தபோதே லக்ஷ்மன் கிரியெல்ல இதனைக் கூறினார்.
போரின் பின்னரான இலங்கைத் தமிழர்களின் விடயங்களில் இந்தியா தலையிடவே இல்லை.
விசேடமாக தமிழ்த் தேசியக் கூட்டமைப்பு அரசு பேச்சுகளில் இந்தியா எவ்வகையிலான அழுத்தத்தையும் இதுவரை பிரயோகிக்கவேயில்லை.
அத்துடன், இலங்கை மீதான சர்வதேச குற்றச்சாட்டுகள் விடயத்திலும் இந்தியா மௌனியானது.
அப்படியிருக்க, இலங்கைத் தமிழர் விவகாரத்தில் தனக்கு பற்று இருப்பதாக இந்தியா பொய்வேடம் தரிக்கிறது.
இந்த நிலையில், இனப்பிரச்சினைக்கான அரசியல் தீர்வை வழங்கவிடாது இலங்கை அரசை இந்தியா தனது கட்டுப்பாட்டுக்குள் வைத்திருக்கிறது.
இலங்கை அரசுக்கும், இந்திய அரசுக்கும் உள்ள இந்த இரகசிய ஒப்பந்தத்தால் இறுதியில் இலங்கைத் தமிழர்களே பாதிக்கப்படுவர்.
தமிழ்த் தேசியக் கூட்டமைப்புக்கும் அரசுக்கும் இடையில் இனப்பிரச்சினைப் பேச்சு ஆரம்பமாகி இன்றுடன் 10 மாதங்களாகின்றன.
இனப்பிரச்சினைக்குத் தீர்வு வழங்கும் கடப்பாடு அரசுக்கு உள்ளபோதிலும், அதனை வழங்கவிடாமல் இந்தியா முட்டுக்கட்டை போடுவதனால் அதிருப்தியும், நம்பிக்கையின்மையும் அடைந்திருக்கும் தமிழ்க் கூட்டமைப்பு இந்தியா தவிர்ந்த வெளிநாடுகளது உதவியைக் கேட்டுச் சென்றுள்ளது.
வெளிநாடுகளினால் இதற்கு அர்த்தம் வழங்க முடியாது.
தமிழ்க் கூட்டமைப்புக்கும் வேறு வழியில்லை. இனப்பிரச்சினை தொடர்பில் இந்தியாவும் கையை விரித்துவிட்டது.
எனவே, தீர்வைப் பெற்றுக்கொள்ள ஐக்கிய தேசியக் கட்சி, அரசு உட்பட உள்நாட்டு அரசியல் கட்சிகளுடன் கூட்டமைப்பு ஒன்றுசேர்ந்து பேச்சு நடத்த முன்வரவேண்டும் என்று அவர் தெரிவித்தார்.
தங்கள் உரிமைகளையே பாதுகாத்துக் கொள்ள முடியாத ஐக்கிய தேசியக் கட்சி தமிழர்களின் உரிமைகளைப் பெற்றுக் கொடுப்பது பற்றி பேசுவது வேடிக்கையானதாக உள்ளது என அவதானிகள் தெரிவித்துள்ளனர்.
*******************

விசுவாசிகளை தேடும் மகிந்த
தற்போதைய பிரதம நீதியரசர் ஷிராணி பண்டாரநாயக்க அரசுத் தலைவர் மஹிந்த ராஜபக்ஷவின் விசுவாசி என விக்கிலீக்ஸ் தகவல் வெளியிட்டுள்ளது.
இலங்கைக்கான அமெரிக்கத் தூதுவர் பெட்ரிசியா புட்டீனாஸ் அந்நாட்டு ராஜாங்கத் திணைக்களத்திற்கு அனுப்பி வைத்த குறிப்புக்களின் அடிப்படையில் இந்தத் தகவல் வெளியிடப்பட்டுள்ளது.
2010ம் ஆண்டு பெப்ரவரி மாதம் 23ம் திகதி அனுப்பி வைக்கப்பட்ட குறிப்பில் இந்தத் தகவல்கள் குறிப்பிடப்பட்டுள்ளது.
முன்னாள் இராணுவத் தளபதி சரத் பொன்சேகாவினால் தாக்கல் செய்யப்பட்ட அடிப்படை உரிமை மீறல் மனு சரியான முறையில் விசாரணைக்கு உட்படுத்தப்படவில்லை என தெரிவிக்கப்பட்டுள்ளது.
அரசியல் ரீதியான முக்கியத்துவம் வாய்ந்த வழக்குகளில் தற்போதைய பிரதம நீதியரசர் பக்கச்சார்பற்ற நிலையிலும், சுயாதீனமாகவும் செயற்படுவாரா என்பது சந்தேகமே என கொழும்பைச் சேர்ந்த மனித உரிமைச் சட்டத்தரணிகள் தெரிவித்துள்ளதாக கொழும்பு டெலிகிராப் என்னும் இணைய தளம் தகவல் வெளியிட்டுள்ளது.
குறிப்பாக அரசுத் தலைவரின் குடும்பத்தார் சம்பந்தப்பட்ட வழக்குகள் என தெரிவிக்கப்பட்டுள்ளது.
முன்னாள் அரசுத் தலைவர் சந்திரிக்கா பண்டாரநாயக்க காலத்தில் அரசியல் நியமனத்தின் மூலமே ஷிராணி பண்டாரநாயக்க உச்ச நீதிமன்ற நீதியரசராக நியமிக்கப்பட்டார் என குறிப்பிடப்பட்டுள்ளது.
*******************

பதவிக்கு அஞ்சும் ஸ்ரீலங்கா
பதவி பறிபோகும் என்ற அச்சம் காரணமாக ஐக்கிய தேசியக் கட்சியின் தலைவர் ரணில் விக்ரமசிங்க வெளிநாட்டு பயணங்களை ரத்து செய்து வருவதாக தினமின பத்திரிகை பிரதான செய்தி வெளியிட்டுள்ளது.
ஐக்கிய தேசியக் கட்சியின் பதில் தலைவர் பதவியை வழங்கி விட்டு செல்வதற்கு விசுவாசமானவர்கள் எவரும் இல்லாத காரணத்தினால் வெளிநாட்டுப் பயணங்களை ரத்து செய்துள்ளதாகக் குறிப்பிடப்படுகிறது.
குறிப்பாக பல முக்கிய வெளிநாட்டுப் பயணங்கள் இவ்வாறு ரத்து செய்யப்பட்டுள்ளதாகத் தெரிவிக்கப்படுகிறது.
இணைப் பிரதித் தலைவர்களான கரு ஜயசூரிய மற்றும் சஜித் பிரேமதாச ஆகியோர் தலைமைப் பதவியை பறிப்பதற்கு ஆர்வம் காட்டி வருவதாகக் குறிப்பிடப்படுகிறது.
ரணில் வெளிநாட்டுப் பயணமொன்றை மேற்கொள்ளும் போது சதித் திட்டத்தின் மூலம் கட்சித் தலைமைப் பதவியை பெற்றுக் கொள்வதற்கு கிளர்ச்சிக் குழுவினர் திட்டமிட்டு வருவதாக தெரிவிக்கப்படுகிறது.
*******************







Tuesday, 1 November 2011

செய்திகள் 31/10


பதிவின் அவசியம்
யாழ்ப்பாண மக்கள் வாக்காளர் இடாப்பில் தங்களை பதிவு செய்து கொள்ள நடவடிக்கை எடுக்க வேண்டுமென இலங்கையின் முன்னணி தேர்தல் கண்காணிப்பு அமைப்புக்களில் ஒன்றான பெபரல் கோரியுள்ளது.
வாக்காளர்களை பதிவு செய்யும் விசேட நடவடிக்கைகள் தற்போது மேற்கொள்ளப்பட்டு வருவதாகக் குறிப்பிட்டுள்ளது.
பதிவு செய்யப்பட்ட வாக்காளர்களின் எண்ணிக்கையில் ஏற்பட்ட வீழ்ச்சியினால் யாழ்ப்பாண மாவட்ட பாராளுமன்ற உறுப்பினர்களின் எண்ணிக்கை குறைக்கப்பட்டிருந்தமை குறிப்பிடத்தக்கது.
இதனை தமிழர்களுக்கு எதிரான அடக்குமுறை என தமிழ் அரசியல் கட்சிகள் குற்றம் சுமத்தியிருந்தன.
யாழ்ப்பாண மாவட்டத்தில் ஆயிரக் கணக்கானவர்கள் இன்னமும் வாக்காளர் இடாப்பில் தங்களை பதிவு செய்து கொள்ளவில்லை என பெபரல் அமைப்பின் நிறைவேற்றுப் பணிப்பாளர் ரோஹண ஹெட்டியாரச்சி தெரிவித்துள்ளார்.
வாக்காளா இடாப்பில் தங்களை பதிவு செய்து கொள்வதற்கு மக்கள் ஆர்வம் காட்ட வேண்டுமென அவர் குறிப்பிட்டுள்ளார்.
இன்னமும் 15ஆயிரம் மேலதிக வாக்காளர்கள் பதியப்பட்டால் நாடாளுமன்ற உறுப்பினர்களின் எண்ணிக்கை மேலும் ஒன்றினால் உயர்வடையும் என அவர் தெரிவித்துள்ளார்.
வாக்காளர் பதிவு இணைப்புப் பணிகளை மேற்கொள்வதற்கு யாழ்ப்பாணம் மற்றும் முல்லைத்தீவு ஆகிய பிரதேசங்களில் விரைவில் இரண்டு கிளைக் காரியாலயங்கள் அமைக்கப்படும் என அவர் குறிப்பிட்டுள்ளார்.
******************

திட்டமிட்டபடி சந்திப்பு
தமிழ்த் தேசியக் கூட்டமைப்புக்கும் ஐ.நா. பொதுச் செயலாளர் பான் கீமூனுக்கும் இடையிலான சந்திப்பு திட்டமிட்டபடி நாளை முதலாம் திகதி நியூயோர்க்கில் இடம்பெறும் என்று அறிய வந்துள்ளது.
இலங்கை அரசு இந்தச் சந்திப்புக்கு கடும் எதிர்ப்புத் தெரிவித்தபோதும் திட்டமிட்ட சந்திப்பை இரத்துச் செய்ய முடியாது என்று பான் கீமூன் இலங்கை அரச பிரதிநிதிகளிடம் திட்டவட்டமாகத் தெரிவித்திருக்கிறார்.
இதனை அடுத்து தற்போது கனடாவில் தங்கியுள்ள கூட்டமைப்பின் தலைவர் இரா.சம்பந்தன் பான் கீமூனைச் சந்தித்துப் பேச்சு நடத்துவார் எனத் தெரிகிறது.
தமிழ்த் தேசியக் கூட்டமைப்பு பிரதிநிதிகள் ஐ.நா பொதுச்செயலர் பான் கீமூனைச் சந்திப்பதை தடுத்து நிறுத்த இலங்கை அரசு பல்வேறு முயற்சிகளை மேற்கொண்டிருந்தது.
இலங்கை வெளிவிவகார அமைச்சருக்கோ அல்லது ஐ.நாவில் உள்ள இலங்கையின் தூதுவர் பாலித கொஹன்னவுக்கோ இந்தச் சந்திப்புத் தொடர்பாக அதிகாரபூர்வமாக அறிவிக்கப்படவில்லை.
தமிழ்த் தேசியக் கூட்டமைப்பை பான் கீ மூன் சந்திப்பதற்கு ஐ.நாவுக்கான இலங்கைத் தூதுவர் பாலித கொஹன்ன எதிர்ப்புத் தெரிவித்துள்ளார்.
இந்தச் சந்திப்பை ஐ.நா பொதுச்செயலாளர் கைவிட வேண்டும் என்றும் அவர் கோரிக்கை விடுத்திருந்தார்.
அதேவேளை கடந்த வாரம் ஐ.நா பொதுச்செயலர் பான் கீ மூனைச் சந்தித்த இலங்கை அரசுத் தலைவரின் சிறப்புத் தூதுவர் அமைச்சர் மகிந்த சமரசிங்க, இது தொடர்பான நிலைப்பாட்டை முன்கூட்டியே தெளிவுபடுத்தியுள்ளார்.
தமிழ்த் தேசியக் கூட்டமைப்பு தமிழ் மக்களின் ஒரே பிரதிநிதிகள் அல்லர் என்றும் ஏனைய தமிழ்க் கட்சிகளும் அங்கிருப்பதாகவும் அவர் பான் கீமூனுக்கு எடுத்துக் கூறி இதன் காரணமாகத் தமிழ்த் தேசியக் கூட்டமைப்பைப் பான் கீமூன் சந்திக்கக் கூடாது எனவும் வலியுறுத்தி இருந்தார்.
இந்த நிலையிலேயே இலங்கை அரசின் கடுமையான அழுத்தங்களை பான் கீமூன் நிராகரித்து தமிழ்த் தேசியக் கூட்டமைப்பின் பிரதிநிதிகளைச் சந்திக்க உள்ளார்.
இதேவேளை, நியூயோர்க்கில் ஐ.நா.மனித உரிமைகள் ஆணையாளர் நவநீதம்பிள்ளை உட்பட ஐ.நா. உயரதிகாரிகள் பலரையும் கூட்டமைப்புப் பிரதிநிதிகள் சந்தித்துத் தமிழ்மக்களின் தற்போதைய நிலை தொடர்பில் விரிவாக விளக்குவர் எனத் தெரிகிறது.
******************

பிரித்தானிய பிரதமரின் ஆலோசனை
அடுத்த கொமன்வெல்த் கூட்டம் 2013ம் ஆண்டில் சிறிலங்காவில் நடைபெறும் போது, புறக்கணிப்புகள் இடம்பெறுவதைத் தடுக்க வேண்டுமானால், அதற்கு முன்னதாக சிறிலங்கா அரசாங்கம் மனிதஉரிமை நிலைமைகளில் முன்னேற்றத்தைக் காண்பிக்க வேண்டும் என்று பிரித்தானிய பிரதமர் டேவிட் கமரோன் எச்சரித்துள்ளார்.
கொமன்வெல்த் மாநாட்டின் இறுதி நாளான நேற்று பிபிசிக்கு அளித்துள்ள செவ்வி ஒன்றிலேயே அவர் இவ்வாறு குறிப்பிட்டுள்ளார்.
கொமன்வெல்த் தலைவர்களின் மாநாட்டின் போது சிறிலங்கா அதிபரிடம், உள்நாட்டுப் போர் முடிவுக்கு வந்துள்ள நிலையில் கொழும்பு எதையும் மறைக்க வேண்டியதில்லை என்று தாம் அழுத்தம் திருத்தமாக கூறியுள்ளதாகவும் டேவிட் கமேரான் தெரிவித்துள்ளார்.
சிறிலங்காவில் நடைபெறும் அடுத்த கொமன்வெல்த் கூட்டத்தை கனடா புறக்கணிக்கக் கூடும்.
இதுதொடர்பாக கனேடியர்களுடன் கலந்துரையடியுள்ளதாகவும், தாம் அனைவருமே ஒரேவிதமான கண்ணோட்டத்துடன் தான் இருப்பதாகவே தான் நினைப்பதாகவும் தெரிவித்துள்ளார்.
மனிதஉரிமைகள் விடயத்தில் சிறிலங்கா நிறையவே செய்ய வேண்டும் என்று தாங்கள் எதிர்பார்ப்பதாகவும் குறிப்பிட்டார்.
நல்லிணக்கத்தை ஏற்படுத்த நிறைவே செய்ய வேண்டும். இது பற்றி சிறிலங்கா அதிபர் மகிந்த ராஜபக்சவுடன் கலந்துரையாடியதாகவும் கூறினார்.
அதேவேளை சிறிலங்காவில் நடைபெறவுள்ள அடுத்த கொமன்வெல்த் கூட்டத்தை பிரித்தானியா புறக்கணிக்குமா என்ற கேள்விக்கு அவர் பதிலளிக்க மறுத்துள்ளார்.
******************

கனடாவின் உறுதியான நிலைப்பாடு
தமிழீழ விடுதலை புலிகள் இயக்கத்திற்கும் இலங்கை அரச படைகளுக்கும் இடையில் 2009ம் ஆண்டு இடம்பெற்ற இறுதிக் கட்ட யுத்தத்தின் போது பொது மக்கள் மீது ஷெல் தாக்குதல் நடத்தப்பட்டமை வைத்தியசாலைகள் மீது குண்டுத் தாக்குதல் நடத்தப்பட்டமை என்பவை குறித்து சுயாதீன விசாரணைக்கு இலங்கை இணக்கம் தெரிவிக்காவிடின் 2013ம் ஆண்டு இலங்கையில் நடைபெறவுள்ள பொதுநலவாய நாடுகளின் உச்சிமாநாட்டை புறக்கணிக்கவுள்ளதாக கனடா அறிவித்துள்ளது.
இலங்கை படையினர் மேற்கொண்டதாகக் கூறப்படும் போர் குற்றங்கள் குறித்து விசாரணை நடத்த இலங்கை அரசாங்கம் தவறியுள்ளதென கனேடிய பிரதமர் ஸ்டீபர் ஹார்ப்பர் தெரிவித்துள்ளார்.
இலங்கை அரசுத் தலைவருடன் கதைக்க தனக்கு பல சந்தர்ப்பங்கள் காணப்பட்டதாக அவுஸ்திரேலியாவில் வைத்து ஸ்டீபன் ஹார்ப்பர் குறிப்பிட்டுள்ளார்.
ஆனால் மஹிந்த ராஜபக்ஷ் ஐநா நிபுணர் குழுவின் குற்றச்சாட்டுக்கள் குறித்து விசாரணை செய்ய தவறியுள்ளார்.
இருந்த போதும் கனடா தொடர்ந்தும் தனது நிலைப்பாட்டை மாற்றிக் கொள்ளாது அழுத்தங்களை பிரயோகிக்கும் என கனேடிய பிரதமர் குறிப்பிட்டார்.
இதேவேளை, கனடா இலங்கை விடயத்தில் தலையிடுவதை நிறுத்திக் கொள்ள வேண்டும் என வெளிவிவகார அமைச்சர் ஜீ.எல்.பீரிஸ் அறிவித்திருந்தமை குறிப்பிடத்தக்கது.
******************

தமிழின செயற்ப்பாட்டாளர்கள் மீது குறிவைத்து தாக்குதல்
பிரான்ஸ் தலைநகர் பாரிசில் ஆயுததாரிகள் நிகழ்த்திய வாள்வீச்சில் தமிழர் ஒருங்கிணைப்புக் குழுவின் முக்கிய பிரதிநிதியான திரு.பருதி அவர்கள் படுகாயமடைந்து ஆபத்தான நிலையில் மருத்துவமனையில் அனுமதிக்கப்பட்டுள்ளார்.
ஞாயிற்றுக்கிழமை இரவு தமிழர் ஒருங்கிணைப்புக் குழுவின் செயலகத்தை விட்டு வெளியில் வந்த பொழுது, வெளியில் காத்திருந்த முகமூடியணிந்த ஆயுதபாணிகளால் கத்திகள், வாள்கள் சகிதம் இவர் மீது கொலைவெறித் தாக்குதல் நிகழ்த்தப்பட்டுள்ளது.
இதில் படுகாயமடைந்த திரு.பருதி அவர்கள் ஆபத்தான நிலையில் மருத்துவமனையில் அனுமதிக்கப்பட்டு அவசர சிகிச்சைகளுக்கு உட்படுத்தப்பட்டுள்ளார்.
1996ஆம் ஆண்டு ஒக்ரோபர் 26ஆம் திகதி இதேபாணியில் பாரிசில் நிகழ்த்திய கொலைவெறித் துப்பாக்கிச்சூட்டில் தமிழீழ விடுதலைப் புலிகளின் அனைத்துலக நிதிப் பொறுப்பாளர் லெப்.கேணல் கந்தையா நாதன், ஈழமுரசு இதழின் நிறுவக ஆசிரியர் கப்டன் கஜன் ஆகியோர் படுகொலை செய்யப்பட்டனர்.
தற்பொழுது இதேபாணியில் பருதி அவர்கள் மீது ஆயுதபாணிகளால் கொலைவெறித் தாக்குதல் நிகழ்த்தப்பட்டுள்ளது.
******************

தொடரும் அரச பயங்கரவாதம்
நாட்டில் அரச பயங்கரவாதம் தொடர்வதாக ஜனநாயக மக்கள் முன்னணியின் தலைவர் மனோ கணேசன் தெரிவித்துள்ளார்.
வடக்கின் வசந்தம், கிழக்கின் உதயம் போன்ற அபிவிருத்தித் திட்டங்கள் தொடர்பில் குறித்த பிரதேச மக்களே தீர்மானம் எடுக்க வேண்டும்.
அரசாங்கம் வடக்கு கிழக்கு தமிழ் மக்களுக்கு மெய்யான சேவை ஆற்றியிருந்தால் உள்ளுராட்சி மன்றத் தேர்தல்களில் தோல்வியடைந்திருக்க வாய்ப்பில்லை.
30 ஆண்டுகளாக தமிழ் மக்கள் எதிர்நோக்கி வந்த அரசியல் பிரச்சினைகளை இனம் கண்டு அவற்றுக்கு தீர்வு வழங்கப்பட வேண்டும்.
வடக்கு, கிழக்கு பிரச்சினைக்கு அரசியல் தீர்வுத் திட்டம் வழங்கும் முயற்சிகளுக்கு முற்றுப்புள்ளி வைக்கப்பட்டுள்ளது.
கூட்டமைப்பினர் வெளிநாடுகளுக்கு சென்று பேச்சுவார்த்தை நடத்துவதற்கு விமல் வீரவன்ச, சம்பிக்க போன்றவர்கள் எதிர்ப்பை வெளியிட்டு வருகின்றனர்.
எனினும், பல சுற்று பேச்சுவார்த்தைகள் நடத்தப்பட்ட போதிலும் எந்தவிதமான முன்னேற்றமும் இதுவரையில் ஏற்படவில்லை.
இந்த அரசாங்கம் நாட்டின் தமிழ் மக்களை மட்டுமன்றி சிங்கள மக்களையும் ஏமாற்றி வருகின்றது.
இலங்கை மத்திய வங்கியினால் தயாரிக்கப்படும் நிதி அறிக்கைகள் அரசியல் நோக்கங்களை அடிப்படையாகக் கொண்டவை என மனோ கணேசன் தெரிவித்துள்ளார்.
சிங்கள பத்திரிகை ஒன்றுக்கு அளித்த நேர் காணலில் அவர் இதனைக் குறிப்பிட்டுள்ளார்.
******************

ஊழலின் சுமை
அரசாங்கத்தினால் மேற்கொள்ளப்படும் ஊழல் மோசடிகளின் சுமை மக்கள் மீது திணிக்கப்படுவதாக ஐக்கிய தேசியக் கட்சி குற்றம் சுமத்தியுள்ளது.
ஊழல், மோசடி மற்றும் வீண் விரயத்தினால் ஏற்பட்ட பாதிப்புக்களை அரசாங்கம் அப்பாவி மக்கள் மீது சுமத்துவதாக ஐக்கிய தேசியக் கட்சியின் தவிசாளர் காமினி ஜயவிக்ரம தெரிவித்துள்ளார்.
எரிபொருள் விலையேற்றத்தை போன்றே மின்சாரக் கட்டணங்களை உயர்த்துவதற்கும் முயற்சி எடுக்கப்பட்டு வருவதாகக் குறிப்பிட்டுள்ளார்.
மக்களை கொல்லாமல் கொல்லும் அரசாங்கத்தை விரட்டியக்க வேண்டும்.
வரவு செலவுத் திட்டம் முன்வைக்கப்பட உள்ள நிலையில் இவ்வாறு எந்தவொரு அரசாங்கமும் பொருட்கள் சேவைகளின் விலையை உயர்த்தியதில்லை என அவர் சுட்டிக்காட்டியுள்ளார்.
எரிபொருள் விலையை அதிகரிப்பதில்லை என உறுதிமொழி வழங்கி சில வாரங்களில் எரிபொருட்களின் விலை உயர்த்தப்பட்டுள்ளது.
இந்த விலையேற்றங்களை ஈடு செய்ய வேண்டுமாயின் அரசாங்க ஊழியர்களின் சம்பளம் குறைந்தபட்சம் 10ஆயிரம் ரூபாவினால் உயர்த்தப்பட வேண்டுமென அவர் வலியுறுத்தியுள்ளார்.
******************






செய்திகள் 30/10


கனடா மீண்டும் எச்சரிக்கை
இலங்கையில் இடம்பெற்ற மனித உரிமை மீறல் குற்றச்சாட்டுக்கள் குறித்து கனடிய அரசு மீண்டும் எச்சரிக்கை விடுத்துள்ளது.
மனித உரிமை மீறல் தொடர்பிலான குற்றச்சாட்டுக்களுக்கு உரிய தீர்வு வழங்கப்படாவிட்டால் கனடா அதனை வேடிக்கை பார்த்து கொண்டிருக்காது என சுட்டிக்காட்டப்பட்டுள்ளது.
எதிர்வரும் 2013ம் ஆண்டில் இலங்கையில் பொதுநலவாய நாடுகள் தலைவர்கள் மாநாடு நடைபெறவுள்ளதாகவும், அந்த மாநாட்டிற்கு முன்னதாக மனித உரிமை மீறல் குற்றச்சாட்டுக்களுக்கு அரசாங்கம் தீர்வு வழங்க வேண்டுமெனவும் வலியுறுத்தப்பட்டுள்ளது.
இலங்கை விவகாரத்தில் கனடா வெறுமனே வார்த்தைகளினால் கருத்துக்களை வெளியிட்டு அமைதி காக்காது என கனேடிய வெளிவிவகார அமைச்சரின் பாராளுமன்ற செயலாளர் தீபக் ஒபராய் தெரிவித்துள்ளார்.
இலங்கையில் மனித உரிமை நிலைநாட்டப்பட வேண்டும் என்பதற்காக செயல் ரீதியான பங்களிப்பினை கனடா வழங்கும் என அவர் நம்பிக்கை வெளியிட்டுள்ளார்.
இலங்கை விவகாரம் தொடர்பிலான கனடாவின் நிலைப்பாட்டில் எவ்வித மாற்றமும் கிடையாது என அவர் குறிப்பி;ட்டுள்ளார்.
மனித உரிமை மீறல் குற்றச்சாட்டுக்கள் தொடர்பில் இலங்கை நடவடிக்கை எடுக்க வேண்டும் எனவும் எவ்வித நடவடிக்கையும் எடுக்காத பட்சத்தில் இலங்கையில் நடைபெறவுள்ள பொதுநலவாய அமர்வுகளில் பங்கேற்பது குறித்து மீள சந்திக்க நேரிடும் எனவும் கனேடிய பிரதமர் தெரிவித்துள்ளார்.
இலங்கை விவகாரத்தில் கனடா வெறும் வார்த்தைகளினால் மட்டும் எதிர்ப்பை வெளியிடுவதில் அர்த்தமில்லை என கனேடிய எதிர்க்கட்சி பாராளுமன்ற உறுப்பினர் ராதிகா சிற்சபேசன் தெரிவித்துள்ளார்.
இலங்கை தொடர்பில் ராஜதந்திர ரீதியில் நடவடிக்கை எடுக்கப்பட்டு வருவதாகவும், ஏற்கனவே இலங்கையில் ஆளும் தரப்பினருக்கு கனடாவின் நிலைப்பாடு அறிவிக்கப்பட்டுள்ளதாகவும் தீபக் ஒபராய் தெரிவித்துள்ளார்.
உலக மனித உரிமைகளுக்காக கனடா உரக்கக் குரல் கொடுக்கும் எனவும், குறிப்பாக இலங்கை விவகாரத்தில் கனடா தனியான கரிசனை காட்டும் எனவும் அவர் குறிப்பிட்டுள்ளார்.
******************

சிக்கித் தவிக்கும் ஸ்ரீலங்கா
அவுஸ்திரேலியாவின் பேர்த் நகரில் நடைபெற்றுவரும் பொதுநலவாய நாடுகளின் 22வது உச்சி மாநாட்டில் மனித உரிமைகள் பற்றிய விவகாரம் முக்கிய இடம்பிடித்திருந்தது.
மனித உரிமைகள் பாதுகாக்கப்படுவதை உத்தரவாதப்படுத்துவதற்கான கட்டமைப்பொன்றை உருவாக்க உலகின் பலநாடுகளின் தலைவர்களும் முன்வைத்த யோசனைகள் இலங்கை உள்ளிட்ட சில நாடுகளுக்கு விசனத்தை ஏற்படுத்தியுள்ளது.
பிரித்தானிய பிரதமர் டேவிட் கமரோன், மனித உரிமைகள் பாதுகாப்பு விவகாரத்தில் முன்னேற்றம் ஏற்படுவதற்கான நடவடிக்கைகளை துரிதப்படுத்தவேண்டும் என்று வலியுறுத்தியுள்ளார்.
மனித உரிமைகளுக்கான அடிப்படை மூலதர்மங்களை உறுதிப்படுத்துவதற்கான வேலைகள் முன்னெடுக்கப்பட வேண்டும் என்றும் கமரோன் சுட்டிக்காட்டியிருந்தார்.
இந்தப் பின்னணியில், இலங்கைப் பற்றி கேட்கப்பட்ட போது பதிலளித்துள்ள பிரித்தானிய பிரதமர் டேவிட் கமரோன், இலங்கையில் என்னதான் நடந்தது, போர்க்குற்றங்கள் நடந்தனவா, அவற்றுக்கு யார் பொறுப்புக்கூற வேண்டும் என்பவற்றை முழுமையாகக் கண்டறிவதற்காக முறையான, சுயாதீனமான, விசாரணை நடைமுறைகள் அவசியம் என்று சுட்டிக்காட்டியுள்ளார்.
இதேவேளை, பிரித்தானியாவின் முன்னாள் வெளியுறவு அமைச்சர் சேர் மல்கொம் ரிஃப்கின் உட்பட பொதுநலவாய நாடுகளின் முக்கிய பிரமுகர்களை உள்ளடக்கிய குழுவொன்று, கொமன்வெல்த் நாடுகள் எதிர்நோக்கியுள்ள சவால்கள் பற்றி ஆராய்ந்து 100க்கும் அதிகமான பரிந்துரைகளை முன்வைத்துள்ளது.
பொதுநலவாய நாடுகள் அமைப்பு 21ம் நூற்றாண்டு உலகுக்கு பொருத்தமாக அமைய வேண்டும் என்ற கோரிக்கை இந்த முயற்சியில் முன்வைக்கப்பட்டுள்ளது.
இதன்படி, உரிமைகள் மற்றும் சுதந்திரம் தொடர்பான புதிய சமவாயம் ஒன்றை உருவாக்குவது பற்றியும் டேவிட் கமரோன் கருத்து வெளியிட்டுள்ளார்.
இதுதவிர இன்னும் சர்ச்சைக்குரிய விவகாரமாக, மனித உரிமைகள் மற்றும் சட்டத்தின் ஆட்சி பற்றிய சுயாதீனமான ஆணையர் ஒருவரை நியமிப்பது பற்றியும், ஒருபால் உறவு திருமணங்களை தடைசெய்யும் சட்டங்களை நாடுகள் நீக்கவேண்டும் என்ற கோரிக்கை தொடர்பிலும் பரிந்துரைகள் முன்வைக்கப்பட்டுள்ளன.
இதேவேளை, கொமன்வெல்த் அமைப்பிலிருந்து இலங்கையை நீக்க வேண்டும் என்று கோரி பேர்த் நகரில் தமிழர் அமைப்புகள் போராட்டங்களை நடத்தியுள்ளன.
இலங்கைப் போரில் ஆயிரக்கணக்கான தமிழர்கள் கொல்லப்பட்டதாகவும் படையினரால் போர்க்குற்றங்கள் இழைக்கப்பட்டதாகவும் காட்டும் படங்களையும் பதாகைகளையும் தாங்கிய ஆர்ப்பாட்டக்காரர்கள் இந்த போராட்டத்தில் ஈடுபட்டிருந்தனர்.
ஆனால், தன்மீதான போர்க்குற்றங்களை மறுத்துவரும் இலங்கை அரசு, சர்வதேச ரீதியான, சுதந்திரமான விசாரணைகள் தேவையில்லையென்றும் கூறிவருகின்றமை குறிப்பிடத்தக்கது.
******************

ஸ்ரீலங்காத் தூதரகத்தின் ஆர்ப்பாட்டம்
தமிழர்களுக்குச் சார்பாக செய்திகளை வெளியிடுவதாக கூறி கொமன்வெல்த் மாநாடு நடைபெறும் பேர்த் நகரில், ஏபிசி தொலைச்சாட்சி நிலையத்துக்கு முன்பாக சிங்களவர்கள் நேற்று போராட்டம் ஒன்றை நடத்தியுள்ளனர்.
விடுதலைப் புலிகளுக்கு சார்பான வகையில் செய்திகளை வெளியிடுவதாக இந்தப் போராட்டத்தில் பங்கேற்றவர்கள் ஏபிசி அலைவரிசை மீது குற்றம்சாட்டியதுடன், கண்டனம் தெரிவித்து முழக்கங்களையும் எழுப்பியிருந்தனர்.
அத்துடன் இதுதொடர்பாக தமது எதிர்ப்பைத் தெரிவிக்கும் வகையிலான கடிதம் ஒன்றையும் போராட்டத்தில் ஈடுபட்ட சிங்களவர்கள் ஏபிசி தொலைக்காட்சி நிறுவன அதிகாரிகளிடம் கையளித்திருந்தனர்.
சிறிலங்காவில் இடம்பெற்ற போர்க்குற்றங்கள் தொடர்பான ஆவணப்படங்களை அவுஸ்ரேலியாவின் ஏபிசி தொலைக்காட்சி அண்மையில் ஒளிபரப்பியிருந்தது.
அத்துடன், சிறிலங்கா அதிபர் மகிந்த ராஜபக்ச மற்றும் சிறிலங்காவின் தூதுவர் அட்மிரல் திசார சமரசிங்க ஆகியோருக்கு எதிரான போர்க்குற்றச்சாட்டுகள் தொடர்பான செய்திகளையும் ஏபிசி முக்கியத்துவப்படுத்தி வந்தது.
அவுஸ்ரேலியாவின் பிரதான செய்தி ஊடகமாக ஏபிசியில் வெளியாகின்ற போர்க்குற்றம் தொடர்பான செய்திகள் சிறிலங்கா அரசுக்கு வெறுப்பை ஏற்படுத்தியுள்ள நிலையிலேயே, அங்குள்ள சிறிலங்கா தூதரகத்தின் ஏற்பாட்டில் சிங்களவர்களைக் கொண்டு இந்தப் போராட்டத்தை நடத்துவதற்கு ஏற்பாடுகள் செய்யப்பட்டன.
கொமன்வெல்த் மாநாட்டில் பங்கேற்க வந்துள்ள சிறிலங்கா அதிபரை கைது செய்யக் கோரி நேற்று முன்தினம் பேர்த் நகரில் தமிழர்கள் போராட்டம் நடத்திய நிலையில், அதற்குப் போட்டியாக சிறிலங்கா அரசு சிங்களவர்களை இறக்கிவிட்டு இந்தப் போராட்டத்தை நடத்தியுள்ளது.
******************

கிலாரி சந்திப்பாரா?
சிறிலங்கா அரசின் எதிர்ப்புக் காரணமாக தமிழ்த் தேசியக் கூட்டமைப்பின் பிரதிநிதிகள் குழுவைச் சந்திக்கும் திட்டத்தை அமெரிக்க இராஜாங்கச் செயலர் ஹிலாரி கிளின்ரன் கைவிட்டு விட்டதாக கொழும்பு ஊடகம் ஒன்று தகவல் வெளியிட்டுள்ளது.
அமெரிக்க இராஜாங்கத் திணைக்களத்தின் அழைப்பின் பேரில் வொசிங்டன் சென்ற தமிழ்த் தேசியக் கூட்டமைப்பு பிரதிநிதிகள் நால்வரும் அங்கு இராஜாங்கத் திணைக்கள அதிகாரிகள் பலருடனும் சந்திப்புகளை மேற்கொண்டுள்ளனர்.
அமெரிக்க இராஜாங்கச் செயலர் ஹிலாரி கிளின்ரனையும் இவர்கள் சந்திக்கவுள்ளதாக தகவல்கள் வெளியான போதும், இதுவரை சந்திப்பு இடம்பெற்றதாகத் தகவல் இல்லை.
இந்தநிலையில் சிறிலங்கா அரசின் எதிர்ப்புக் காரணமாக ஹிலாரி கிளின்ரன், தமிழ்த் தேசியக் கூட்டமைப்பைச் சந்திப்பதைக் கைவிட்டுள்ளதாக கொழும்பு ஊடகம் தகவல் வெளியிட்டுள்ளது.
அதேவேளை, அமெரிக்காவின் உதவி இராஜாங்கச் செயலர் றொபேட் ஓ பிளேக் மற்றும் அரசியல் விவகாரங்களுக்கான கீழ்நிலைச் செயலர் வெட்டி சேர்மன் ஆகியோரை கூட்டமைப்பு பிரதிநிதிகள் சந்தித்துள்ளனர்.
மேலும் அமெரிக்க இராஜாங்கத் திணைக்களத்தின் மூத்த கொள்கை வகுப்பு அதிகாரிகளுடனும் சந்திப்புகள் இடம்பெற்றுள்ளன.
அமெரிக்க இராஜாங்கத் திணைக்கள அதிகாரிகளுடனான சந்திப்புகளின் போது தமிழ்த் தேசியக் கூட்டமைப்பு 30 பக்க ஆவணம் ஒன்றை கையளித்துள்ளது.
மனிதஉரிமை மீறல்கள், மற்றும் போர்க்குற்றங்கள் தொடர்பான விபரங்கள் அடங்கிய இந்த ஆவணத்தை கருத்தில் கொண்டு சிறிலங்கா அரசின் மீது அமெரிக்கா அழுத்தங்களைக் கொடுக்க வேண்டும் என்று தமிழ்த் தேசியக் கூட்டமைப்புப் பிரதிநிதிகள் கேட்டுக் கொண்டுள்ளதாகவும் கொழும்பு ஊடகத் தகவல்கள் தெரிவிக்கின்றன.
******************

தெரியாது திணறும் ஸ்ரீலங்கா!
தமிழ்த்தேசியக் கூட்டமைப்பின் அமெரிக்க விஜயமானது உணர்ச்சி பூர்வமான விடயம் என்று இலங்கை பாராளுமன்ற சபை முதல்வரும் அமைச்சருமான நிமல் சிறிபால டி சில்வா தெரிவித்துள்ளார்.
அந்த விஜயம் பற்றி உத்தியோகபூர்வமாக அரசாங்கத்துக்கு எதுவும் தெரியாத நிலையில் அது குறித்து கருத்து வெளியிட முடியாது என்றும் கூறியுள்ளார்.
இந்த விஜயத்திற்கும் அரசுடன் தமிழ்த்தேசியக் கூட்டமைப்பு நடத்திவரும் பேச்சுகளுக்கும் எந்தவித தொடர்புமில்லையென்றும் கூறினார்.
ஐ.நா. செயலாளர் நாயகம் பான் கீ மூனை தமிழ்க் கூட்டமைப்பினர் சந்திப்பதற்கான சாத்தியங்கள் பற்றியும் தகவல்கள் வெளியாகியுள்ளன.
இதற்கிடையே அரசாங்கத்தினர் முதற்கொண்டு இலங்கையிலுள்ள பல்வேறு அரசியல் கட்சிகளும் தமிழ்த்தேசியக் கூட்டமைப்பின் அமெரிக்க விஜயம் பற்றி பல்வேறு கருத்துகளை வெளியிட்டுள்ளனர்.
இதில் எதிர்க்கட்சியினர் சிலர் அரசாங்கத்தின் மீதும் குற்றச்சாட்டுகளை முன்வைத்திருந்தனர்.
இவ்வாறான நிலைமையிலேயே தமிழ்த்தேசியக் கூட்டமைப்பினரின் அமெரிக்க விஜயம் பற்றி அரசாங்கத்துக்கு உத்தியோகபூர்வமாக எதுவும் தெரியாது என்று தமிழ்க் கூட்டமைப்புடன் பேச்சுகளில் ஈடுபடும் அரச குழுவின் தலைவர் அமைச்சர் நிமல் சிறிபால டி சில்வா தெரிவித்துள்ளார்.
இவ்விஜயம் பற்றி தாம் பல்வேறு ஊடகச் செய்திகள் மூலம்தான் தகவல்களை அறிந்துள்ளோமே தவிர, உத்தியோகபூர்வமாக எதுவும் தெரியாது என அமைச்சர் தெரிவித்துள்ளார்.
******************

முயற்சி பலிக்கவில்லை
தமிழ்த் தேசியக் கூட்டமைப்பின் பிரதிநிதிகள் ஐ.நா பொதுச்செயலர் பான் கீ மூனைச் சந்திப்பை தடுத்து நிறுத்த சிறிலங்கா அரசு மேற்கொண்ட முயற்சி பலளிக்கவில்லை என்று கொழும்பு ஆங்கில வாரஇதழ் ஒன்று தகவல் வெளியிட்டுள்ளத
தமிழ்த் தேசியக் கூட்டமைப்பின் தலைவர் இரா.சம்பந்தனும், நாடாளுமன்ற உறுப்பினர் எம்.ஏ.சுமந்திரனும் நியுயோர்க்கில் ஐ.நா பொதுச்செயலர் பான் கீ மூனை சந்திக்கவுள்ளனர்.
இந்தச் சந்திப்புத் தொடர்பாக தமிழ்த் தேசியக் கூட்டமைப்பு மௌனம் காத்து வருகிறது.
ஆனால் ஊடகங்கள் இந்தத் தகவலை வெளியிட்டுள்ளன.
சிறிலங்கா வெளிவிவகார அமைச்சுக்கோ அல்லது ஐ.நாவில் உள்ள சிறிலங்காவின் தூதுவர் பாலித கொஹன்னவுக்கோ இந்தச் சந்திப்புத் தொடர்பாக அதிகாரபூர்வமாக அறிவிக்கப்படவில்லை.
ஐ.நா மனிதஉரிமைகள் ஆணையாளர் நவநீதம்பிள்ளையே தமிழ்த் தேசியக் கூட்டமைப்புக்கும் ஐ.நா பொதுச்செயலருக்கும் இடையிலான சந்திப்பை ஒழுங்கு செய்து கொடுத்துள்ளதாக தகவல்கள் வெளியாகியுள்ளன.
தமிழ்த் தேசியக் கூட்டமைப்பை பான் கீ மூன் சந்திப்பதற்கு ஐ.நாவுக்கான சிறிலங்காவின் தூதுவர் பாலித கொஹன்ன எதிர்ப்புத் தெரிவித்துள்ளார்.
இந்தச் சந்திப்பை ஐ.நா பொதுச்செயலர் கைவிட வேண்டும் என்றும் அவர் கோரிக்கை விடுத்திருந்தார்.
ஆனால் இந்தக்கட்டத்தில் சந்திப்பை இடைநிறுத்த முடியாது என்று சிறிலங்காவின் கோரிக்கையை பான் கீ மூன் நிராகரித்து விட்டதாகவும் தெரியவந்துள்ளது.
அதேவேளை கடந்தவாரம் ஐ.நா பொதுச்செயலர் பான் கீ மூனைச் சந்தித்த சிறிலங்கா அதிபரின் சிறப்புத் தூதுவர் அமைச்சர் மகிந்த சமரசிங்க, இதுதொடர்பான நிலைப்பாட்டை முன்கூட்டியே தெளிவுபடுத்தியுள்ளார்.
தமிழ்த் தேசியக் கூட்டமைப்பு தமிழ் மக்களின் ஒரே பிரதிநிதிகள் அல்ல என்றும் ஏனைய தமிழ்க் கட்சிகளும் அங்கிருப்பதாகவும் அவர் பான் கீ மூனுக்கு எடுத்துக் கூறியுள்ளார் என்றும் கொழும்பு ஆங்கில வாரஇதழ் குறிப்பிட்டுள்ளது.
******************

கண்டறிந்த உண்மை இரகசியமானது!
இலங்கையின் கற்றுக் கொண்ட பாடங்கள் மற்றும் நல்லிணக்க ஆணைக்குழுவின் இறுதி அறிக்கை பொதுமக்கள் பார்வைக்கு வழங்கப்படாது என்று தெரிவிக்கப்பட்டுள்ளது.
ஆணைக்குழுவின் ஊடக தொடர்பாளரான லக்ஸ்மன் விக்கிரமசிங்க இதனை தெரிவித்துள்ளார்.
தமது இறுதி அறிக்கையின் நகல் தயாரிக்கப்பட்டுள்ளது.
இந்தநிலையில் இறுதி அறிக்கை மகிந்த ராஜபக்ஷவிடம் அடுத்த மாதம் இரண்டாவது வாரத்தில் கையளிக்கப்படும் என்றும் அவர் கூறியுள்ளார்.
இந்தநிலையில் ஆணைக்குழுவின் அறிக்கையைப் பகிரங்கப்படுத்துவது தொடர்பில் அரசுத் தலைவரே தீர்மானிக்க வேண்டும் எனவும் லக்ஸ்மன் விக்கிரமசிங்க கூறியுள்ளார
******************

மோசமான பரீட்சை முறைமை
உலகின் மிகவும் இழிவான பரீட்சை முறைமை இலங்கையில் காணப்படுவதாக பரீட்சைகள் ஆணையாளர் நாயகம் அனுர எதிரிசிங்க தெரிவித்துள்ளார்.
கண்டி உயர் பாடசாலையில் நடைபெற்ற வருடாந்த பரிசளிப்பு விழாவில் கலந்து கொண்டு உரையாற்றிய போது அவர் இதனைக் குறிப்பிட்டுள்ளார்.
சில பரீட்சை வினாத் தாள்களுக்கு மாணவர்களுக்கு மட்டுமன்றி அதனைத் தயாரிக்கும் பேராசிரியர்களினாலும் விடை எழுத முடியாது.
தன்னைப் பற்றி நினைக்கும் போது தான் சிறுவர் துஸ்பிரயோகத்தில் ஈடுபடுகின்றேனா எனத் தோன்றுகின்றது என அவர் தெரிவித்துள்ளார்.
ஆபிரிக்க கோத்திர சமூகங்களைத் தவிர இவ்வாறு கடுமையான பரீட்சை முறைமைகள் உலகில் வேறு எங்கும் கிடையாது.
மாணவர்களின் ஆற்றலை மதிப்பீடு செய்வதற்காக பயன்படுத்தப்படும் ஒர் பொறிமுறையாக பரீட்சை அமைந்துள்ள போதிலும் நாட்டில் அமுலில் உள்ள பரீட்சை முறைமையினால் எவருக்கும் நன்மையில்லை.
நாட்டின் ஒட்டுமொத்த பரீட்சை முறைமையிலும் மாற்றம் ஏற்படுத்தப்பட வேண்டுமென பரீட்சை ஆணையாளர் அனுர எதிரிசிங்க தெரிவித்துள்ளார்.
******************



Saturday, 29 October 2011

செய்திகள் 29/10


தொடரும் பேச்சுக்கள்
அமெரிக்க இராஜாங்கத் திணைக்களத்தின் அழைப்பின் பேரில் வொசிங்டன் சென்றுள்ள தமிழ்த் தேசியக் கூட்டமைப்பின் பிரதிநிதிகள் குழு, அமெரிக்க கொள்கை வகுப்பாளர்களுடன் அங்கு தொடர்ச்சியான பேச்சுக்களை நடத்தி வருவதாக தகவல்கள் தெரிவிக்கின்றன.
இரா.சம்பந்தன் தலைமையிலான இந்தக் குழுவில் மாவை.சேனாதிராசா, சுரேஸ் பிறேமச்சந்திரன், எம்.ஏ.சுமந்திரன் ஆகியோர் இடம்பெற்றுள்ளனர்.
கடந்த 26ம் நாள் தொடக்கம் அமெரிக்க அதிகாரிகளுடன் பேச்சுக்களை நடத்தி வருவதாகவும், அடுத்த மாதம் 4ம் நாள் வரை பேச்சுக்கள் தொடரும் என்றும் தமிழ்த் தேசியக் கூட்டமைப்பின் நாடாளுமன்ற உறுப்பினர் சுரேஸ் பிறேமச்சந்திரன் தகவல் வெளியிட்டுள்ளதாக பிபிசி கூறியுள்ளது.
அமெரிக்க இராஜாங்கத் திணைக்களத்தின் மூத்த அதிகாரிகள் பலரையும் இதுவரை சந்தித்திருப்பதாகவும், மேலும் சில முக்கிய செனெட் உறுப்பினர்களையும், நாடாளுமன்ற உறுப்பினர்களையும் சந்திக்கவிருப்பதாகவும் அவர் தெரிவித்துள்ளார்.
போருக்குப் பிந்திய நல்லிணக்கம் குறித்து சிறிலங்கா அரசாங்கம் வெளி உலகுக்குக் கூறினாலும், உண்மையான நடப்புகள் அதற்கு நேர்மாறாக இருப்பது குறித்து சந்திப்புகளின் அமெரிக்க அதிகாரிகளுடன் விவாதித்தாகவும் அவர் கூறியுள்ளார்.
அரசியல்தீர்வு தொடர்பாக சிறிலங்கா அரசு சரியான பாதையில் சென்று கொண்டிருக்கிறதா என்பது குறித்தும் விவாதிக்கப்பட்டதாகவும் சுரேஸ் பிறேமச்சந்திரன் அவர் தெரிவித்துள்ளார்.
சிறிலங்கா அரசு மீது அரசியல்தீர்வு குறித்து ஏற்கனவே அமெரிக்கா அழுத்தங்களை கொடுத்துக் கொண்டிருக்கிறது.
ஆனால் இதை சிறிலங்கா அரசு சரியாகப் புரிந்து கொண்டிருக்கிறதா என்று சரியாகத் தெரியவில்லை.
அமெரிக்காவின் அழுத்தம் மட்டும் போதாது, இந்தியா மற்றும் ஐரோப்பிய ஒன்றியம் போன்ற, ஏனைய அனைத்துலக சமூகத்தின் அழுத்தமும் ஒத்துழைப்பும் தேவை என்றும் அவர் மேலும் கூறியுள்ளார்.
அதேவேளை, அமெரிக்க இராஜாங்கத் திணைக்களச் சந்திப்புகளின் முடிவில் தமிழ்த் தேசியக் கூட்டமைப்பு அறிக்கை ஒன்றை வெளியிடவுள்ளதாகவும் தகவல்கள் தெரிவிக்கின்றன.
இன்றுடன் அமெரிக்கச் சந்திப்புகளை முடித்துக் கொண்டு கனடா செல்லவுள்ள சுரேஸ் பிறேமச்சந்திரன் தவிர்ந்த ஏனைய மூவரும், மீண்டும் அமெரிக்கா திரும்பி வந்து பேச்சுக்களைத் நடத்தவுள்ளதாகவும் கூறப்படுகிறது.
புலம்பெயர் சமூகத்துடனான சந்திப்புக்குச் கனடா செல்வதற்கு சுரேஸ் பிறேமச்சந்திரனுக்கு நுழைவிசைவு வழங்கப்படவில்லை என்பது குறிப்பிடத்தக்கது.
*********************

தீர்வின் அவசியம்
இலங்கை அரச தலைவர்கள் மீதான போர்க் குற்றச்சாட்டுக்கள் ஒரு பக்கம் இருக்க, கொழும்புடன் பேசித் தமிழர்களுக்கு நீதியான தீர்வு ஒன்றை வென்றெடுப்பதில் கவனம் செலுத்தும்படி தமிழ்த் தேசியக் கூட்டமைப்புக்கு ஒபாமா நிர்வாகம் எடுத்துக் கூறி இருப்பதாக வொஷிங்ரனில் இருந்து கிடைக்கும் தகவல்கள் தெரிவிக்கின்றன.
அதாவது போர்க் குற்றச்சாட்டால் நெருக்கடிக்குள் சிக்கியுள்ள இலங்கை அரசின் பலவீனங்களைப் பயன்படுத்தி தமிழர்களின் நலன்களை வென்றெடுக்கப் பாருங்கள் என்பதே அமெரிக்க அதிகாரிகள் தெரிவித்த கருத்துக்களின் சாரம் என்று கூறப்படுகிறது.
அமெரிக்க ராஜாங்கத் திணைக்களத்தின் அழைப்பின் பேரில் தமிழ்த் தேசியக் கூட்டமைப்பின் நான்கு நாடாளுமன்ற உறுப்பினர்கள் அங்கு சென்றுள்ளனர்.
இரு தரப்பினருக்கும் இடையிலான சந்திப்புக்கள் நேற்று மூன்றாவது நாளாகவும் தொடர்ந்தன என்று கூட்டமைப்பினர் கூறினர்.
இந்தச் சந்திப்புகளில் ஆராயப்பட்ட விடயங்கள் குறித்து அனேகமாக இன்று தமிழ்த் தேசியக் கூட்டமைப்பு சார்பில் அறிக்கை ஒன்று வெளியிடப்படும் என்று எதிர்பார்க்கப்படுவதாக அமெரிக்கத் தமிழ்த் தரப்புத் தகவல்கள் தெரிவிக்கின்றன.
இதற்கிடையே, வழக்கத்துக்கு மாறாக அமெரிக்க ராஜாங்கத் திணைக்கள அதிகாரிகள் தமிழ்த் தேசியக் கூட்டமைப்பினருடன் தொடர்ச்சியாக மூன்று நாள்கள் சந்திப்புக்களை நடத்தியிருப்பது ஆச்சரியமளிப்பதாக அரசியல் அவதானிகள் கருத்து வெளியிட்டுள்ளனர்.
அதேவேளை, கூட்டமைப்பினருடனான சந்திப்புக்கள் அனைத்தையும் ராஜாங்கத் திணைக்களமே ஏற்பாடு செய்தது என்பதால் அங்கேயே அவர்களது சந்திப்புக்கள் இடம்பெற்று வருகின்றன.
அதற்காக அவை ராஜாங்கத் திணைக்கள அதிகாரிகளுடன்தான் நடக்கின்றன என்று கருதிக் கொள்ளத் தேவையில்லை என்று கொழும்பில் உள்ள அமெரிக்கத் தூதரக வட்டாரங்கள் கூறின.
ராஜாங்கத் திணைக்கள அதிகாரிகளுடனான சந்திப்பின்போது, இலங்கை அரசுடன் பேசி தீர்வைப் பெறுவதில் அதிக அக்கறை காட்டுமாறு கூட்டமைப்பினருக்கு ஆலோசனை வழங்கப்பட்டதாகத் தெரிகிறது.
போர்க் குற்றச்சாட்டு என்ற விடயத்தில் தமிழர் தரப்பு அழுங்குப் பிடியாக இல்லாமல் அதனைப் பயன்படுத்தி தமக்கான நலன்களை வென்றெடுப்பதில் அதிக கவனத்தைச் செலுத்த வேண்டும் என்றும் சர்வதேச நாடுகள் அதற்கே ஆதரவாகச் செயற்படும் என்றும் அமெரிக்க அதிகாரிகள் தெரிவித்திருக்கின்றனர்.
தாயகத்தில் உள்ள தமிழர்களின் அசைக்க முடியாத பிரதிநிதிகள் என்ற வகையில், தமிழர்களின் தலைமைத்துவ வகிபாகத்தை ஈழத் தமிழர்கள் மத்தியிலும் புலம்பெயர் தமிழர்கள் மத்தியிலும் கூட்டமைப்பு பலப்படுத்த வேண்டியதன் அவசியம் குறித்தும் அமெரிக்க அதிகாரிகளால் எடுத்துரைக்கப்பட்டுள்ளதாகவும் தகவல்கள் தெரிவிக்கின்றன.
*********************

அலறும் அரசாங்கம்
தமிழ்த் தேசிய கூட்டமைப்பினர் தமிழ் மக்களின் ஏகப் பிரதிநிதிகளல்லர் என ஸ்ரீலங்கா அரசாங்கம் தெரிவித்துள்ளது.
அவர்களை ஐ.நா சபையின் பிரதிநிதிகள் சந்தித்துப் பேசுவதென்பது யதார்த்தமற்ற செயற்பாடாகும் என அரசாங்கம் வலியுறுத்தியுள்ளது.
ஐ.நா.பொதுச்சபையின் மூன்றாவது குழுக்கூட்டத்தில் கலந்துகொள்வதற்காக நியூயோர்க் சென்றுள்ள அமைச்சர் மஹிந்த சமரசிங்க ஐ.நா.சபையின் பிரதிநிதிகளைச் சந்தித்தபோதே இதனைக் குறிப்பிட்டுள்ளார்.
நியூயோர்க் சென்றுள்ள அமைச்சர் மஹிந்த சமரசிங்க கடந்த புதன்கிழமை ஐ.நா.வின் செயலாளர் நாயகம் பான் கீ மூனை சந்தித்து பேச்சுவார்த்தை நடத்தியிருந்தார்.
வியாழக்கிழமை ஐ.நா.பொதுச்சபையின் மூன்றாவது குழுக்கூட்டத்திலும் கலந்துகொண்டு உரையாற்றினார்.
பான் கீ மூனுடனான சந்திப்பில் ஐ.நா.வின் அரசியல் விவகாரங்களுக்கான பொறுப்பாளர் லின் பஸ்கோ மற்றும் விஜய் நம்பியார் ஆகியோரும் கலந்துகொண்டனர்.
அமைச்சர் மகிந்த சமரசிங்கவுடன் ஐ.நாவுக்கான நிரந்தர வதிவிடப் பிரதிநிதி கலாநிதி பாலித கொஹண பங்குபற்றியிருந்தார்.
தமிழ்த் தேசியக் கூட்டமைப்பினர் எதிர்வரும் முதலாம் திகதி ஐ.நா.வின் செயலாளர் நாயகம் பான் கீ மூனைச் சந்திக்கலாம் என தகவல்கள் வெளியாகியுள்ளன.
இது குறித்து மஹிந்த சமரசிங்கவுடன் தொடர்புகொண்டு கேட்டபோது தமிழ்த் தேசிய கூட்டமைப்பின் பிரதிநிதிகளை பான் கீ மூன் சந்திக்க மாட்டார் என்றே தாங்கள் நம்புவதாகவும் இதற்கான சந்தர்ப்பங்கள் அரிதாகவே உள்ளதெனத் தெரிவித்தார்.
இவ்விடயம் தொடர்பில் அமைச்சர் மேலும் கருத்து தெரிவிக்கையில், தமிழ்த் தேசியக் கூட்டமைப்பினர் தமிழ் மக்களின் ஏகப் பிரதிநிதிகள் அல்லர்.
இன்னும் பல தமிழக் கட்சிகள் நாட்டில் உள்ளன என்பதை தாம் ஐ.நா.வின் பிரதிநிதிகளுக்கு விளக்கியுள்ளதாகவும் கூட்டமைப்பினரைச் சந்திப்பது யதார்த்தமற்ற விடயமாகும் என்றும் தெரிவித்துள்ளார்.
இத்தகைய குறுகிய மனப்பான்மை கொண்டவர்களிடம் இருந்து தமிழர்கள் நியாயமான தீர்வை எதிர்பார்ப்பது காலத்தை வீணடிக்கும் செயலென அவதானிகள் கருத்து வெளியிட்டுள்ளனர்.
*********************

இன்று கனாடவில் பொங்கு தமிழ்
கனடியத் தமிழர்களால் நிகழ்த்தப்படும் மூன்றாவது பொங்கு தமிழுக்கான இறுதி ஏற்பாடுகள் யாவும் மேற்கொள்ளப்பட்டுள்ளன.
தமிழர்கள் பெருமளவில் வாழும் கனடிய நகரங்கள் எங்கும் பொங்கு தமிழ் பற்றிய செய்திகள் பரவலாகி களைகட்டியுள்ளது.
சுமார் ஒரு வாரத்துக்கு முன்னரே இங்குள்ள பொது நிறுவனங்கள், வர்த்தக நிறுவனங்கள் அனைத்திலும் பொங்கு தமிழை எழுச்சியூட்டும் சுவரொட்டிகள் அலங்கரித்திருந்தன.
காலமும் நேரமும் இதில் தெரிவிக்கப்பட்டிருந்ததாயினும், எங்கே நடைபெறும் என்பதை அப்போது அறிவிக்கப்படாததால், இது எங்கே நடைபெறுகின்றது என்ற கேள்வி தேசியத்தை நேசிக்கும் ஒவ்வொருவரிடமும் எழும்பியிருந்தது.
வாராவாரம் வித்தியாசமான சுவரொட்டிகளை வௌ;வேறு இடங்களில் காணக்கூடியதாக இருந்தது.
ஆர்வமுள்ள பல தொழிலதிபர்கள் தாமே முன்வந்து இது தொடர்பான துண்டுப் பிரசுரங்களையும் பல்லாயிரக்கணக்கில் அச்சடித்து விநியோகித்தார்கள்.
2004ஆம் ஆண்டு செப்டெம்பர் மாதத்தில், கனடாவின் முதலாவது பொங்கு தமிழ் எந்த இடத்தில் நடைபெற்றதோ, அதே குயின்ஸ் பார்க் திடலில் இன்று சனிக்கிழமை பகல் 2 மணி முதல் 6 மணி வரை பொங்கு தமிழ் இடம்பெறவுள்ளது.
இந்நிகழ்வுக்குக் கட்டியம் கூறுவதுபோல இங்குள்ள சமூக வர்த்தகர்கள் பொங்கு தமிழ் பொறிக்கப்பட்ட மஞ்சள்-சிவப்பு வர்ணத்தினாலான பிளாஸ்டிக் பைகளில் தமது விற்பனைப் பொருட்களை வழங்கி தங்களுடைய தார்மீக ஆதரவைக் காட்டினர்.
இதனை ஏற்பாடு செய்துள்ள கனடியத் தமிழர் சமூகத்துக்கும் தமிழ் இளையோர் சமூகத்துக்கும் அங்குள்ள பொது அமைப்புகள், விளையாட்டுக் கழகங்கள், பழைய மாணவர் மன்றங்கள், ஊர்ச் சங்கங்கள் என்பன ஒன்றுபட்டு முழுமையான ஆதரவை வழங்கி வருகின்றன.
*********************

எதிர்க்கும் ஸ்ரீலங்கா
பொதுநலவாய நாடுகளில் மனித உரிமைகள் பேணப்படுவதை உறுதிப்படுத்தும் விதமாக சிறப்புத் தூதுவர் ஒருவரை நியமிக்க சில நாடுகள் எடுத்துள்ள முயற்சியை இலங்கை எதிர்க்குமென்று அந்நாட்டு அரச பேச்சாளர் கூறியுள்ளார்.
ஆலோசனைக் குழுவொன்று தாயாரித்துள்ள அறிக்கையொன்று, பொதுநலவாய நாடுகளில் இடம்பெறக்கூடிய மனித உரிமை மீறல்கள் தொடர்பில் எப்படியான அணுகுமுறைகளை கைக்கொள்ள வேண்டும் என்று 100க்கும் அதிகமான ஆலோசனைகளை முன்வைத்துள்ளது.
இதன்படியான, மனித உரிமைகள் பற்றிய சிறப்புத் தூதுவர் ஒருவரை நியமிக்கும் யோசனைக்கு இலங்கை உள்ளிட்ட நாடுகள் தமது எதிர்பபைத் தெரிவிக்கும் என்று மகிந்த ராஜபக்ஷவின் பேச்சாளரான பந்துல ஜயசேகர சுட்டிக்காட்டினார்.
54 நாடுகள் அங்கம் வகிக்கும் பொதுநலவாய நாடுகளின் உச்சி மாநாட்டில் மனித உரிமை மீறல்கள் தொடர்பான பிரச்சனைகளை ஆராய வேண்டும், குறிப்பாக இலங்கையில் நடைபெற்றதாக்க கூறப்படும் மனித உரிமை மீறல்கள் குறித்து விவாதிக்கப்பட வேண்டும் என்று கனடா, அவுஸ்திரேலியா உள்ளிட்ட நாடுகள் வலியுறுத்துகின்றன.
*********************

உதவும் ஜப்பான்
வடபகுதியில் முன்னெடுக்கப்பட்டிருக்கும் கண்ணிவெடி அகற்றும் பணிகளுக்கு ஜப்பான் அரசாங்கம் மேலதிக நிதியுதவி அளிக்கவுள்ளது.
டீ. ஏ. எஸ். எச். எனும் கண்ணிவெடி அகற்றும் அரசசார்பற்ற நிறுவனத்தின் ஊடாக இந்த நிதியுதவி வழங்கப்படவுள்ளது.
இந்நிதியுதவி தொடர்பாக ஜப்பான் தூதரகத்துக்கும், டீ. ஏ. எஸ். எச். நிறுவனத்துக்கும் இடையில் ஒப்பந்த மொன்று எதிர்வரும் திங்கட்கிழமை கைச்சாத்திடப்படவுள்ளது.
வடபகுதியில் கண்ணிவெடி அகற்றும் பணிகளின் முக்கியத்துவத்தை அறிந்தே நிதியுதவி வழங்கவிருப்பதாக ஜப்பான் தூதரகம் அறிவித்துள்ளது.
அதேநேரம், வடபகுதியில் முன்னெடுக்கப்படும் மீளிணைவு மற்றும் நல்லிணக்கப் பணிகளுக்கு 122 மில்லியன் ஜப்பான் யென்களை வழங்க ஜப்பான் அரசாங்கம் முன்வந்துள்ளது.
குடியகல்வுக்கான சர்வதேச நிறுவனத்தில் ஊடாக இந்த நிதியுதவி வழங்கப்படவுள்ளதாக அந்நிறுவனம் அறிவித்துள்ளது.
*********************

வலியுறுத்தும் ரணில்
அவைரும் ஏற்றுக்கொள்ளும் அதிகாரப் பகிர்விற்கு தமிழ்த் தேசிய கூட்டமைப்பு இணக்கம் தெரிவிக்க வேண்டியதன் அவசியத்தை எதிர்க்கட்சி தலைவர் ரணில் விக்ரமசிங்க வலியுறுத்தியுள்ளார்.
இதனை அடிப்படையாக கொண்ட எந்தவொரு திட்டத்தினையும் முன்னெடுப்பதற்கான ஒத்துழைப்பை ஐக்கிய தேசிய கட்சி வழங்குமென அவர் தெரிவித்துள்ளார்.
எதிர்க்கட்சி தலைவர் அலுவலகத்தில் நேற்று நடைபெற்ற ஊடகவியலாளர் சந்திப்பின் போதே எதிர்க்கட்சி தலைவர் இவ்வாறு குறிப்பிட்டார்.
சர்வதேச நடவடிக்கைகளுக்கான பாராளுமன்ற உறுப்பினர்களுக்கான 33 அமர்வில் பங்கேற்கும் முகமாக கொழும்பிற்கு சென்றுள்ள வெளிநாட்டு பிரதிநிதிகள் குழுவொன்று எதிர்க்கட்சி தலைவர் தலைவர் ரணில் விக்ரமசிங்கவை சந்தித்துள்ளது.
உலகிலுள்ள அனைத்து பாராளுமன்றங்களுக்கும் இதனை விட அதிகமான அதிகாரங்கள் வழங்கப்பட வேண்டும் என்பதே தனதும் தமது கட்சியினதும் எண்ணமென ரணில் விக்ரமசிங்க தெரிவித்தார்.
நாட்டின் பிரச்சினைகளுக்கு பாராளுமன்றத்தினூடாக தீர்வினைப் பெறவேண்டிய அவசியம் தமக்குள்ளதாகவும் யுத்தம் முடிவிற்கு கொண்டுவரப்பட்ட போதிலும் பிரச்சினைகள் தீர்க்கப்படவில்லை என அவர் தெரிவித்துள்ளார்.
தமிழ் தேசியக் கூட்டமைப்பும், ஸ்ரீலங்கா சுதந்திரக் கட்சியும், அரசாங்கமும் மீண்டும் பேச்சுவார்த்தைகளை ஆரம்பித்ததையிட்டு தாம் மகிழ்ச்சியடைவதாக குறிப்பிட்ட அவர், இந்த வருட இறுதிக்குள்ளாவது அதற்கான உறுதியான தீர்வை பெற்றுக்கொடுக்க வேண்டுமெனவும் தெரிவித்தார்.
அரசாங்கம் தமது வார்த்தை அளவில் இதனை வரையறுக்காமல் தமிழ் மக்களின் நியாயமான உரிமைகள் தொடர்பில் கவனம் செலுத்தி அவற்றை வழங்குவதற்கு இணக்கம் தெரிவிக்க வேண்டும் என அவர் குறிப்பிட்டுள்ளார்.
அனைவராலும் ஏற்றுக்கொள்ளக்கூடிய அடிப்படையில் தமிழ் கூட்டமைப்பிற்கான அதிகாரப் பகிர்வினை வழங்குவதனை தம்மால் ஏற்றுக்கொள்ள முடியுமென ரணில் விகரமசிங்க மேலும் தெரிவித்துள்ளார்.
*********************