Wednesday, 27 July 2011

செய்திகள் 27/07


அமெரிக்க இந்திய ஒற்றுமை தமிழருக்கு நன்மை தருமா?
போர்க் குற்றச்சாட்டுகள் உட்பட இலங்கை தொடர்பான முக்கியமான சகல விடயங்களிலும் புதுடில்லியினதும் வாஷிங்டனினதும் கருத்துகள் ஒரே விதமான தன்மையையே கொண்டிருப்பதாக அமெரிக்காவின் தெற்காசிய, மத்திய ஆசியாவுக்கான உதவி வெளிவிவகார அமைச்சர் ரொபேர்ட் பிளேக் கூறியுள்ளார்.
கடந்த வாரம் அமெரிக்க வெளிவிவகார அமைச்சர் ஹிலாரி கிளின்டன் இந்தியாவுக்கு மேற்கொண்டிருந்த விஜயம் தொடர்பாக வாஷிங்டனிலுள்ள வெளிநாட்டு பத்திரிகையாளர் நிலையத்தில் ஊடகவியலாளர்களுக்கு விளக்கமளிக்கையிலேயே ரொபேர்ட் பிளேக் இதனைத் தெரிவித்துள்ளார்.
கடந்த வெள்ளிக்கிழமை வெளிநாட்டுச் செய்தியாளர்களுடனான சந்திப்பு இடம்பெற்றுள்ளது.
இந்தியா ருடே குழுமத்தின் ஹெட்லைன்ஸ் ருடேயின் தேஜிந்தர் சிங் எழுப்பியிருந்த கேள்விக்கு பதிலளிக்கையிலேயே பிளேக் இதனைக் கூறியிருந்தார்.
மனிதாபிமான உதவியைத் தவிர இலங்கைக்கான ஏனைய உதவிகளை நிறுத்தப் போவதாக அமெரிக்க காங்கிரஸ் குழு தீர்மானம் நிறைவேற்றியுள்ளது தொடர்பாக பிளேக்கிடம் கருத்துக்கேட்கப்பட்ட போது, அந்த சட்டமூலம் நிலுவையாக இருப்பதால் தான் கருத்து தெரிவிக்க விரும்பவிலலையென கூறியுள்ளார்.
அந்தத் தீர்மானமானது சட்ட மூலத்திருத்தம் என்றும் அது இன்னமும் நிறைவேற்றப்படவில்லையெனவும் நிலுவையாக இருக்கும் சட்டமூலம் குறித்து கருத்துத் தெரிவிப்பதில்லையெனவும் ரொபேட் பிளேக் தெரிவித்திருக்கிறார்.
இலங்கை தொடர்பாக ஹிலாரி கிளின்டனும் ஜெயலலிதாவும் நீண்ட கலந்துரையாடலை நடத்தியிருந்ததாகவும் பிளேக் கூறியுள்ளார்.
*********************
பேச்சுக்கள் ஆக்கபூர்வமானதாக அமைய வேண்டும்
தமிழ்த் தேசியக் கூட்டமைப்புடன் அரசாங்கம் நடத்திவரும் பேச்சுவார்த்தைகள் மூலம் ஆக்கபூர்வமான தீர்வொன்று எட்டப்பட வேண்டும் என்பதை நடைபெற்று முடிந்த உள்ளூராட்சி மன்றத் தேர்தல் முடிவுகள் மீண்டும் வலியுறுத்தியிருப்பதாகத் தமிழ்த் தேசியக் கூட்டமைப்பின் பாராளுமன்ற உறுப்பினர் செல்வம் அடைக்கலநாதன் தெரிவித்துள்ளார்.
இனப்பிரச்சினைத் தீர்வு தொடர்பாகப் பேச்சுவார்த்தை நடத்துவதாயின் அது தமிழ்த் தேசியக் கூட்டமைப்புடனேயே நடத்தப்பட வேண்டும் என்ற செய்தியையும் இந்தத் தேர்தல் முடிவு தெளிவாக்கியுள்ளது.
இவ்வாறான நிலையில், தமிழ்த் தேசியக் கூட்டமைப்புடன் அரசாங்கம் நடத்திவரும் பேச்சுவார்த்தைகளின் மூலம் ஆக்கபூர்வமான தீர்வொன்று எட்டப்படவேண்டும் என்பது மீண்டும் வலியுறுத்தப்பட்டுள்ளது என்றும் அவர் தெரிவித்துள்ளார்.
இதுவிடயம் தொடர்பில் மேலும் கருத்துத் தெரிவித்துள்ள அவர், வடக்கு, கிழக்கில் நடத்தப்பட்ட உள்ளூராட்சி சபைகளுக்கான தேர்தலில் தமிழ் மக்கள் அனைவரும் இணைந்து தமிழ்த் தேசியக் கூட்டமைப்புக்கு தன்னிகரற்ற ஆதரவை வழங்கியுள்ளனர்.
தமிழர்களின் ஏகோபித்த கட்சி தமிழ்த் தேசியக் கூட்டமைப்பு என்ற செய்தியை மக்கள் இத்தேர்தல் மூலம் தெளிவாகச் சொல்லியிருக்கிறார்கள் என்றும் செல்வம் அடைக்கலநாதன் குறிப்பிட்டார்.
அரசாங்கத்துக்கும் தமிழ்த் தேசியக் கூட்டமைப்புக்குமிடையில் பல சுற்றுப் பேச்சுவார்த்தைகள் நடைபெற்றுள்ளன.
இப்பேச்சுவார்த்தைகள் வெறுமனே காலத்தை இழுத்தடிக்கும் செயற்பாடாக அல்லாமல் ஆக்கபூர்வமான தீர்வொன்றைப் பெறும் முயற்சியாக அமையவேண்டும் என்பதே தமது எதிர்பார்ப்பு எனவும் தெரிவித்தார்.
இதேவேளை, கடந்த சனிக்கிழமை நடைபெற்ற உள்ளூராட்சி சபைத் தேர்தல்களில் வடக்கு, கிழக்கு மாகாணத்திலிருந்து தெரிவுசெய்யப்பட்டவர்களின் பதவியேற்புத் தொடர்பில் தமிழ்த் தேசியக் கூட்டமைப்பில் அங்கம் வகிக்கும் கட்சிகள் கூடி ஆராய்ந்து தீர்மானம் எடுக்கப்படும் என்று குறிப்பிட்ட அவர், வெற்றிபெற்ற உள்ளூராட்சி மன்றங்களின் செயற்பாடுகளை எவ்வாறு முன்னெடுத்துச் செல்வது என்பது பற்றியும் தீர்மானம் எடுக்கப்படும் என்றும் கூறினார்.
*********************
ஆட்சி அதிகாரம் பகிர்ந்தளிக்கப்பட வேண்டும்
ஆட்சி அதிகாரம் பகிர்ந்தளிக்கப்படவேண்டும்; இரா.சம்பந்தன் தெரிவித்துள்ளார்.
தமிழ் மக்களின் பொருளாதார சமூக கலாசார பண்பாட்டு செயற்பாடுகள் பேணப்படவேண்டும். இதுவே, உள்ளூராட்சித் தேர்தலில் அரசுக்கு தமிழர்கள் வழங்கிய தீர்க்கமான செய்தி என்றும் தமிழ்த் தேசியக் கூட்டமைப்பின் தலைவர் சம்பந்தன் தெரிவித்துள்ளார்.
நடந்து முடிந்த உள்ளூராட்சி மன்றத் தேர்தல்களைப் பொறுத்தவரை வடக்கு, கிழக்கு மாகாணங்களில் வாழும் தமிழ் மக்கள் வழங்கிய முடிவுகள் தமிழ்த் தேசியக் கூட்டமைப்பின் மீதான நம்பிக்கைக்கும் தங்களது எதிர்கால சுபீட்த்திற்கும் அவர்கள் வழங்கிய அழிக்க முடியாத தீர்ப்பு.
பல்வேறு அழுத்தங்கள், பயமுறுத்தல்கள் மத்தியிலும் தமிழ் மக்கள் துணிந்து இத்தகைய முடிவினை அரசுக்கு வெளிப்படுத்தியுள்ளனர்.
ஜனநாயக ரீதியாக மக்களால் வழங்கப்பட்ட இந்த ஆணையை ஏற்று தமிழ் மக்களுக்கென நீதியானதும் நியாயமானதுமான அரசியல் தீர்வினை அரசு வழங்க முன்வரவேண்டும்.
1956இல் இருந்தே தமிழ் மக்கள் ஜனநாயகரீதியில் தங்கள் முடிவினை ஒரே மாதிரி வெளிப்படுத்தி வருகின்றனர்.
எனினும் அரசுகள் இது தொடர்பில் உருப்படியான நடவடிக்கைகளை மேற்கொள்ளாததன் விளைவாகவே இன்றைய நிலை உருவாகியது.
இதனை உணர்ந்து இனியாவது அரசு தமிழ் மக்களுக்கான உரிய தீர்வினை வழங்க முன்வரவேண்டும்
கடந்த காலங்களில் இல்லாத அளவு இந்தத்தேர்தலில் அடாவடித்தனங்கள் இடம்பெற்றுள்ளன.
எப்படியாவது வெற்றி பெற்று விடவேண்டும் என்று அரசு பல தந்திரங்களைக் கையாண்டது.
ஆனால் மக்களின் மனங்களை அவர்களால் வெல்ல முடியவில்லை.
ஆட்சி அதிகாரம் பகிர்ந்தளிக்கப்படவேண்டும், தமிழ் மக்களின் பொருளாதார சமூக கலாசார பண்பாட்டு செயற்பாடுகள் பேணப்படவேண்டும் என்ற செய்தியையே இந்தத் தேர்தல் முடிவுகள் தெரிவிக்கின்றன.
இன்று சர்வதேசமும்கூட தமிழ் மக்களின் ஜனநாயக உரிமைகள் பேணப்படவேண்டும் ஜனநாயகம் மதிக்கப்படவேண்டும் என்ற செய்தியை வெளிப்படுத்தி வருகிறது.
அரசுக்கும் தமிழ் தேசிய கூட்டமைப்பற்கும் இடையிலான பேச்சு ஆக்கபூர்வமாக அமைய வேண்டும் எனவும் சர்வதேச சமூகம் வலியுறுத்தி வருகின்றது.
அமெரிக்கா, இந்தியா போன்ற நாடுகளும் இதனையே வலியுறுத்துகின்றன.
இந்தத் தேர்தலில் எப்படியாவது வெற்றி பெற்று தமிழ் மக்கள் தங்கள் பக்கம் இருக்கின்றனர் என்று சர்வதேசத்திற்குக் காட்ட அரசு முனைப்புடன் செயற்பட்டது.
ஆனால் அரசின் போலித்தனமான நடவடிக்கைகளுக்கு மக்கள் அமைதியாக இருந்தவாறே தமது பதிலை வெளிப்படுத்தி விட்டனர்.
தமிழ் மக்களின் நம்பிக்கையை வீணடிக்காமல் தொடர்ந்தும் தமிழ் தேசியக் கூட்மைப்பு ஆக்கபூர்வமான செயற்பாடுகளை மேற்கொள்ளும் என்று சம்பந்தன் தெரிவித்தார்.
*********************
சுயநிர்ணய உரிமையை அரசு அங்கீகரிக்க வேண்டும்
உள்ளுராட்சி தேர்தலில் தமிழ்த் தேசிய கூட்டமைப்பு வெற்றிபெற்றமை அரசாங்கத்தின் ஜனநாயக செயற்பாடு என்றும் தமிழ் மக்கள் இப்போதுதான் ஜனநாயக வழிக்கு வருகிறார்களெனவும் விமர்சித்து திசை திருப்பாமல் தமிழ் மக்களின் சுயநிர்ணய உரிமையை அரசாங்கம் அங்கீகரிக்க வேண்டுமென தேசிய சமாதான பேரவையின் தலைவர் ஜெஹான் பெரேரா தெரிவித்துள்ளார்.
தமிழ்த் தேசிய கூட்டமைப்பு அமோக வெற்றியீட்டியமை தொடர்பாக அமைச்சர்கள் ஒவ்வொருவரும் ஒவ்வொரு விதமாக அரசாங்கத்துக்கு சாதகமான முறையில் கருத்துக்களை கூறுவது வேடிக்கையானதென அவர் கூறினார்.
கொழும்பு இதழியல் கல்லுரியின் கேட்போர் கூடத்தில் நேற்றுக் காலை ஊடகத்துறை மாணவர்களுக்கான பயிற்சி கருத்தரங்கு ஒன்றை ஆரம்பித்து வைத்து உரையாற்றிய அவர், சிங்கள ஆங்கில ஊடகங்கள் தமிழ் மக்களின் அரசியல் அபிலாஷைகள் தொடர்பான விடயங்களை திரிவுபடுத்தி வெளியிடுவதாக குற்றம் சாட்டினார்.
தமிழ் மக்களின் அரசியல் கோரிக்கைகள் உறுதியாக உள்ளதாகவும், தமிழர்களின் மனநிலையில் மாற்றத்தை ஏற்படுத்துவதற்கு அபிவிருத்தியை மட்டும் அரசாங்கம் பயன்படுத்த முற்பட்டமை தவறான அனுகுமுறையெனவும் ஜெஹான் பெரேரா கூறினார்.
நிவாரணங்கள், சலுகைகள், அபிருத்தி என்பவற்றை தமிழ் மக்கள் எதிர்பாhத்திருந்தால், அவர்கள் அரசதரப்பு வேட்பாளர்களுக்கு வாக்களித்திருப்பார்களெனவும் அவர் கூறினார்.
யுத்தத்தில் வெற்றி பெற்றதைப் போன்று தமிழர்களின் அரசியல் கோரிக்கைகளை தோல்வி அடைய செய்ய முடியாதெனவும், ஐக்கிய இலங்கைக்குள் வடக்கு கிழக்கு மாகாணத்தக்கு அதிகாரங்களை பரவலாக்க அரசாங்கம் தயாராக வேண்டுமெனவும் ஜெஹான் பெரேரா தெரிவித்தார்.
பொருளாதார உதவிகளை நிறுத்துவது தொடர்பாக அமெரிக்காவில் எடுக்கப்பட்ட தீர்மானத்தைப் போன்ற தீர்மானத்தை ஐரோப்பிய நாடுகளும் எடுக்கக்கூடுமென அவர் எச்சரிக்கை விடுத்தார்.
*********************
தமிழ்த் தேசியக் கூட்டமைப்பை அச்சுறுத்தும் அமைச்சர்.
ஒரு சில பிரதேசங்களில் பெற்றுள்ள வெற்றியைக் கொண்டு தமிழ்த் தேசியக் கூட்டமைப்பு சமஷ்டி நிர்வாக அதிகாரங்களைக் கோரமுடியாது என்று ஜாதிக ஹெல உறுமயவைச் சேர்ந்தவரும் சிறிலங்கா அமைச்சர்களில் ஒருவருமான சம்பிக்க ரணவக்க தெரிவித்துள்ளார்.
உள்ளூராட்சித் தேர்தல் முடிவுகள் தொடர்பாக கொழும்பில் நேற்று நடத்திய ஊடகவியலாளர் சந்திப்பிலேயே அவர் இவ்வாறு கூறியுள்ளார்.
இந்தத் தேர்தலில் வடக்கிலுள்ள 16 சபைகளை கைப்பற்றியதை வைத்துக் கொண்டு, நாட்டின் பெரும்பான்மை வாக்காளர்களின் விருப்புக்கு எதிராக- காவல்துறை, காணி அதிகாரங்களைக் கேட்டுக் கொண்டு தமிழ்த் தேசியக் கூட்டமைப்பின் தலைவர்கள் வரக்கூடாது என்று அவர் எச்சரித்துள்ளார்.
ஆவேசம் பொங்க அமைச்சர் சம்பிக்க ரணவக்க தமிழ்த் தேசியக் கூட்டமைப்பின் தலைவர்களான இரா.சம்பந்தன், சுரேஸ் பிறேமச்சந்திரன் ஆகியோரின் பெயர்களைக் கூறி எச்சரிக்கை செய்த விதம், ஊடகச் சந்திப்பில் பங்கேற்ற ஊடகவியலாளர்களை அதிர்ச்சியடைய வைத்தது.
பிரபாகரன் ஊடாக சிங்கள தேசத்தை மண்டியிட வைக்க முடியும் என்று நினைத்தவர்கள் இன்று அமெரிக்கா ஊடாக அதனைச் செய்ய முயற்சிப்பதாக கூறிய சம்பிக்க ரணவக்க, அது ஒருபோதும் நடக்காது என்றும் சவால் விட்டுள்ளார்.
நாட்டின் ஒருமைப்பாட்டுக்கு ஆதரவாக வடக்கு உட்பட நாடு முழுவதும் 56 வீதமான வாக்காளர்கள் ஐக்கிய மக்கள் சுதந்திர முன்னணிக்கே வாக்களித்துள்ளனர் என்றும் அவர் சுட்டிக்காட்டியுள்ளார்.
வடக்கில் 4 லட்சத்து 35ஆயிரத்து 507 பதிவு செய்யபட்ட வாக்களார்கள் இருந்தபோதும், 1 லட்சத்து 49ஆயிரத்து 053 பேர் மட்டுமே, அதாவது 34 வீதமானோர் மட்டுமே கூட்டமைப்புக்கு ஆதரவாக வாக்களித்துள்ளனர் என்றும் அவர் மேலும் கூறியுள்ளார்.
*********************
அவசாரகால சட்டம் நீக்கப்படுமா?
அவசரகாலச்சட்டத்தை தளர்த்துவது குறித்து அல்லது நாட்டின் தற்போதைய சூழலில் அவசியமல்லாத பாதுகாப்பு கட்டளைச் சட்டத்தின் சில பிரிவுகளை நீக்குவது குறித்து சிறிலங்கா அமைச்சரவையில் இன்று கலந்துரையாடப்படலாம் என்று மூத்த அரசாங்க வட்டாரம் ஒன்று கொழும்பு ஆங்கில ஊடகம் ஒன்றிடம் தகவல் வெளியிட்டுள்ளது.
அவசரகாலச்சட்டத்தை நீக்குவதற்கு இன்றைய அமைச்சரவைக் கூட்டத்தில் முடிவு செய்யப்பட்டால், அடுத்த மாதம் நாடாளுமன்றத்தில் அவசரகாலச் சட்டத்தை நீடிக்கும் பிரேரணையை சிறிலங்கா அரசாங்கம் சமர்ப்பிக்காது என்றும் அந்த வட்டாரம் மேலும் குறிப்பிட்டுள்ளது.
அதேவேளை அவசரகாலச்சட்டத்தின் சில குறிப்பிட்ட பிரிவுகளை நீக்குவதற்கு அமைச்சரவை முடிவு செய்தால், அவற்றை நீக்குவதற்கு சிறிலங்கா அரசாங்கம் நாடாளுமன்றத்தில் பிரேரணை ஒன்றைக் கொண்டு வரும் என்றும் கூறப்படுகிறது.
அவசரகாலச் சட்டத்தை நீக்குவதற்கு சிறிலங்கா அரசாங்கம் முடிவு செய்தால், எஞ்சியுள்ள உள்ளூராட்சி சபைகளுக்கான தேர்தலை அரசாங்கம் உடனடியாக நடத்த வேண்டிய பிரச்சினையை எதிர்கொள்ள நேரிடும்.
அவசரகாலச்சட்டத்தின் கீழேயே சிறிலங்கா அரசாங்கம் 23 உள்ளூராட்சி சபைகளுக்கான தேர்தலை டிசம்பர் 31ம் நாள் வரை பிற்போட்டுள்ளது குறிப்பிடத்தக்கது.
உள்ளூரிலும் அனைத்துலக ரீதியிலும் அவசரகாலச்சட்டத்தை நீக்குமாறு கொடுக்கப்பட்ட அழுத்தங்களின் காரணமாகவே அவசரகாலச்சட்டத்தை முழுமையாகவோ பகுதியாகவோ நீக்குவது பற்றி முடிவு எடுக்கப்படவுள்ளதா என்று எழுப்பிய கேள்விக்கு அந்த அரசாங்க வட்டாரம் விரிவாகப் பதிலளிக்க மறுத்து விட்டது.
எனினும், அவசரகாலச்சட்டத்தை நீக்குவதற்கு அனைத்துலக அழுத்தங்கள் இருப்பதை அந்த வட்டாரம் ஒப்புக்கொண்டுள்ளதும் குறிப்பிடத்தக்கது.
ஐரோப்பிய ஒன்றியமும் அமெரிக்காவும் அவசரகாலச்சட்டத்தை நீக்க வேண்டும் என்று சிறிலங்கா அரசாங்கத்தை தொடர்ச்சியாக வலியுறுத்தி வருகின்றன.
அதேவேளை அவசரகாலச்சட்டத்தை நீக்கினால், சிறிலங்கா அரசாங்கம் கொழும்பு, அனுராதபுரம், பதுளை, தெகிவளை-கல்கிசை, காலி, கம்பகா, கல்முனை, கண்டி, குருணாகல, மாத்தறை, மொறட்டுவ, நீர்கொழும்பு, நுவரெலிய, இரத்தினபுரி, சிறி ஜெயவர்த்தனபுர கோட்டே மாநகரசபைகளுக்கும், அம்பாந்தோட்டை, கொலன்னாவ நகரசபைகளுக்கும், வேறு ஐந்து பிரதேசசபைகளுக்கும் உடனடியாக தேர்தல் நடத்த வேண்டும் என்பது குறிப்பிடத்தக்கது.
*********************
ஐயாயிரம் தமிழ் இளைஞர்கள் மர்ம முகாம்களில்!
அவசரகாலச் சட்டம் மற்றும் பயங்கரவாத தடுப்புச் சட்டம் உட்பட தேசிய மூலச் சட்டத்திற்கு முரணான வகையில் தமிழ் அரசியல் கைதிகள் சிறை வைக்கப்பட்டுள்ளனர்.
இரகசியமான மர்ம முகாம்களில் 5 ஆயிரம் வரையிலான தமிழ் இளைஞர், யுவதிகள் தடுத்து வைக்கப்பட்டுள்ளார்கள் என்று சோஷலிச இளைஞர் சங்கம் குற்றம் சாட்டியுள்ளது.
அரசியல் கைதிகள் மற்றும் மர்ம முகாம்களில் தடுத்து வைக்கப்பட்டுள்ளவர்களின் விபரங்களை அரசாங்கம் உடனடியாக வெளிப்படுத்த வேண்டும்.
அவ்வாறு இல்லையென்றால் அவர்களின் விபரங்களை தாம் விசேட நடவடிக்கைகள் ஊடாக பாராளுமன்றில் சமர்ப்பிக்க நேரிடும் என்றும் அந்த சங்கம் எச்சத்துள்ளது.
பத்தரல்லையில் அமைந்துள்ள ஜே.வி.பி. யின் தலைமையகத்தில் நேற்று செவ்வாய்க்கிழமை நடைபெற்ற விசேட செய்தியாளர் மாநாட்டிலேயே இவ்வவாறு தெரிவிக்கப்பட்டது.
இங்கு உரையாற்றிய சோஷலிச இளைஞர் சங்கத்தின் தேசிய அமைப்பாளரும் முன்னாள் பாராளுமன்ற உறுப்பினருமான பிமல் ரத்னாயக்க கூறுகையில்,
1983 ஆம் ஆண்டில் ஜூலை மாதம் 23 ஆம் திகதி நடைபெற்ற தமிழர்களுக்கு எதிரான வன்செயல்களினால் தேசிய அரசியலில் மாற்றங்கள் ஏற்பட்டது மட்டுமின்றி பிரிவினைவாதம் ஆயுதப் போராட்டம் என்று இன முரண்பாடு தீவிரமடைந்தது.
ஆனால் தற்போது முப்பதாண்டுகால யுத்தம் முடிவடைந்தும் இனங்களுக்கு இடையிலான ஒற்றுமையை கட்டியெழுப்புவதற்கான சிறந்த சந்தர்ப்பம் காணப்படுகின்ற போதிலும் அதனை முறையாக பயன்படுத்துவதில் நடைமுறை தலைமைத்துவம் தோல்வி கண்டுள்ளது.
ஜனநாயகம் மீதும் தேசிய அரசியல் மீதும் தமிழ் மக்களுக்கு நம்பிக்கை ஏற்படுத்தும் வகையில் அரசின் செயற்பாடுகள் அமையவும் இல்லை.
கடந்த 10 வருடத்திற்கும் அதிகமான காலங்களாக தமிழ் அரசியல் கைதிகள் விசாரணைகள் இன்றி தடுத்து வைக்கப்பட்டுள்ளனர்.
பலர் இரகசிய முகாம்களிலும் சிறை வைக்கப்பட்டுள்ளனர்.
தமது தேடல்களின் மூலம் இந்தச் சட்ட விரோதமான தடுத்து வைத்தல் இனம் காணப்பட்டுள்ளது.
ஆனால் அரசாங்கம் காணாமல் போனவர்கள் தொடர்பாகவோ, அரசியல் கைதிகள் தொடர்பாகவோ விசாரணைகளை முன்னெடுப்பதும் இல்லை. விபரங்களை வெளியிடுவதும் இல்லை.
பயங்கரவாதம் இல்லாத போதிலும் நடைமுறையில் உள்ள அவசரகாலச் சட்டம் மற்றும் பயங்கரவாத தடுப்புச் சட்டம் போன்றவற்றில் கூட விசாரணைகள் மற்றும் நீதிமன்றில் ஆஜர்படுத்தல் போன்ற சட்ட வழி முறைகள் உள்ளன.
ஆனால் சிறை வைக்கப்பட்டுள்ள, தடுப்பு காவலில் வைக்கப்பட்டுள்ள தமிழ் இளைஞர், யுவதிகளுக்கு எந்த சட்டம் நடைமுறைப்படுத்தப்படுகின்றது என்பதே தெரியவில்லை.
எனவே அரசாங்கம் தொடர்ந்தும் மௌனம் காக்காமல் தடுப்புக் காவலில் வைக்கப்பட்டுள்ளவர்களின் விபரங்களை வெளியிட வேண்டும்.
தம் வசம் குறிப்பிட்ட விபரங்கள் உள்ளது. அவற்றை விரைவில் பாராளுமன்றில் சமர்ப்பிப்போம் என்றும் தொடர்ந்தும் தமிழ் இளைஞர், யுவதிகளுக்கு அநீதி இழைக்கப்படுவதை அனுமதிக்க முடியாது எனவும் தெரிவித்துள்ளார்.
*********************
வடக்கின் புதிய கட்டளைத் தளபதி
வடக்கின் புதிய கட்டளைத் தளபதியாக மேஜர் ஜெனரல் மானவடு நியமிக்கப்பட்டுள்ளார்.
வட மாகாண கட்டளைத் தளபதியாக இன்று முதல் மேஜர் ஜெனரல் எஸ்.ஆர். மானவடு செயற்படுவார் என தெரிவிக்கப்படுகிறது.
பனாகொடை இராணுவத் தலைமையகத்தில் இருந்து கொண்டு வட மாகாண கட்டளைத் தளபதி பணிகளை ஆற்றுவார் என சிங்கள ஊடகமொன்று தகவல் வெளியிட்டுள்ளது.
கொழும்பு, கம்பஹா, களுத்துறை உள்ளிட்ட 15 மாவட்டங்களின் பாதுகாப்பு தொடர்பிலான கட்டளைத் தளபதியாக மேஜர் ஜெனரல் மானவடு ஏற்கனவே கடமையாற்றியுள்ளார் என்பது குறிப்பிடத்தக்கது.
*********************



Tuesday, 26 July 2011

செய்திகள் 26/07



இனவாதிகளுக்கு தமிழர் சொன்ன செய்தி?
உள்ளூராட்சித் தேர்தலில் தமிழ் மக்கள் வழங்கிய தீர்ப்பினை இனவாதக் கட்சிகளும் சிங்கள மக்களும் புரிந்து கொள்ள வேண்டும் என்று புளொட் அமைப்பின் தலைவரும் முன்னாள் நாடாளுமன்ற உறுப்பினருமான தர்மலிங்கம் சித்தார்த்தன் வலியுறுத்தியுள்ளார்.
அரசியல் தீர்வை வழங்க வேண்டுமென்ற சர்வதேசத்தின் அழுத்தத்திற்கு தமிழர்களின் தீர்ப்பானது உந்து சக்தியாக அமைந்துள்ளதாகவும் அவர் சுட்டிக் காட்டினார்.
உள்ளூராட்சி சபைத் தேர்தல் பெறுபேறுகள் தொடர்பாக கருத்துத் தெவிக்கையிலேயே புளொட் அமைப்பின் தலைவர் தர்மலிங்கம் சித்தார்த்தன் இவ்வாறு தெரிவித்தார்.
உரிமைகள், அரசியல் தீர்வை வழங்க வேண்டுமென்பதிலேயே தமிழ் மக்கள் அக்கறை காட்டியுள்ளனர்.
இதனை அரசாங்கத்தின் பங்காளிக் கட்சிகளான இனவாத ரீதியில் சிந்திக்கும ஜாதிக ஹெல உறுமய மற்றும் அமைச்சர் விமல் வீரவன்சவின் தேசிய சுதந்திர முன்னணி போன்றவர்கள் புரிந்து கொள்ளவேண்டும்.
அரசாங்கம் மட்டுமல்ல, தென்பகுதி பெரும்பான்மை இன மக்களும் இதனைப் புரிந்து கொள்ளவேண்டும்.
இந்தியா உட்பட சர்வதேச நாடுகள் தமிழ் மக்களுக்கு அரசியல் தீர்வை வழங்க வேண்டுமென அரசாங்கத்திற்கு அழுத்தங்களைக் கொடுத்து வருகின்றன.
இந்த அழுத்தத்திற்கு தமிழ் மக்கள் உள்ளூராட்சி சபைத் தேர்தலில் வழங்கிய தீர்ப்பு மேலும் உந்து சக்தியாக அமைந்துள்ளது எனவும் அவர் மேலும் தெரிவித்துள்ளார்.
*****************
புரிந்து கொண்டது இதுவா?
வடக்குத் தேர்தல் முடிவுகளானது முக்கியமான சில செய்திகளை விடுத்துள்ளது.
அதாவது தமிழ்த் தேசிய கூட்டமைப்பானது எதிர்காலத்தில் ஐக்கிய தேசியக் கட்சியை விடுத்து ஆளும் கட்சியுடனேயே பேச்சுக்களை நடத்த வேண்டும் என்று கூட்டமைப்புக்கு ஒரு செய்தியையும் அபிவிருத்தி மட்டுமின்றி தமிழ் மக்களின் பிரச்சினைகளை தீர்க்கும் வகையிலான அரசியல் தீர்வை விரைவாக முன்வைக்க வேண்டும் என்ற செய்தியை அரசாங்கத்துக்கும் வடக்கு மக்கள் விடுத்துள்ளனர் என்று வெளிநாட்டு வேலை வாய்ப்பு மற்றும் நலன்புரி அமைச்சர் டிலான் பெரேரா தெரிவித்தார்.
தான் வல்வெட்டித்துறை உள்ளுராட்சி மன்றத்துக்கு ஆளும் கட்சி சார்பில் பொறுப்பாக செயற்பட்டதாகவும், 1000 வாக்குகள் வல்வெட்டித்துறையில் ஆளும் கட்சிக்கு கிடைக்கும் என்று எதிர்பார்த்தபோதும் 679 வாக்குகளே கிடைத்தன எனத் தெரிவித்தார்.
எனினும் வடக்கு மக்ககளின் தீர்ப்பை தாங்கள் ஏற்பதாகவும் எது எவ்வாறெனினும் வடக்கில் ஜனநாயகம் பாரிய வெற்றியை பெற்றுவிட்டது என்றும் அமைச்சர் குறிப்பிட்டார்.
*****************
தீர்ப்பை ஏற்கலாம் கொள்கையை ஏற்க முடியாது - தடுமாறும் இனவாதம்!
நடைபெற்று முடிந்த உள்ளூராட்சித் தேர்தலில் வடக்கு கிழக்கு தமிழ் மக்கள் வழங்கிய தீர்ப்பை ஏற்றுக்கொள்வதாகவும், ஆனால் தமிழ் தேசியக் கூட்டமைப்பை கொள்கை ரீதியாக புறக்கணிப்பதாகவும் ஜாதிக ஹெல உறுமய தெரிவித்துள்ளது.
கூட்டமைப்பினன் வெற்றியின் ஊடாக தேர்தல் நியாயமானதாகவும் நீதியானதுமாக நடைபெற்றுள்ளது என்பது உறுதியாகின்றது.
அரச வளங்கள் மற்றும் இராணுவம் தேர்தல் நடவடிக்கையில் ஈடுபடுத்தப்பட்டது என்ற குற்றச்சாட்டு போலியானது என்பதுவும் வெளிப்பட்டுள்ளதாகவும் அக் கட்சி குறிப்பிட்டது.
இது தொடர்பாக ஜாதிக ஹெல உறுமயவின் பேச்சாளரும் ஊடகச் செயலாளருமான நிஷாந்த ஸ்ரீ வர்ணசிங்க கூறுகையில், ஐக்கிய மக்கள் சுதந்திர முன்னணியின் சார்பில் உள்ளூராட்சி தேர்தலில் போட்டியிட்ட ஜாதிக ஹெல உறுமயவின் வேட்பாளர்கள் 7 பேர் வெற்றி பெற்றுள்ளனர்.
இதற்காக பொது மக்களுக்கு நன்றி கூறுவதாகவும் தெரிவித்துள்ளார்.
எவ்வாறாயினும் உள்நாட்டில் மாத்திரமல்லாது சர்வதேசத்திலும் மிகவும் ஆர்வத்தோடு எதிர்பார்க்கப்பட்ட முடிவுகள் தான் வடக்கு மற்றும் கிழக்கு உள்ளூராட்சி சபை முடிவுகளாகும்.
வடக்கு கிழக்கில் அரசாங்கம் பின் தள்ளப்பட்டுள்ளதுடன் தமிழ் தேசியக் கூட்டமைப்பு வெற்றியீட்டியுள்ளது.
நடைபெற்று முடிந்த உள்ளூராட்சி தேர்தலில் தமிழ் மக்கள் வழங்கிய தீர்ப்பை கௌரவிப்பதாகவும் அம்மக்களின் ஜனநாயக உரிமை முழுமையாக வெளிப்பட்டுள்ளதுடன் தமது பிரதிநிதிகளை சுதந்திரமாகவும் தெரிவு செய்துள்ளனர் எனவும் தெரிவித்துள்ளார்.
எனவே வடக்கில் தேர்தல் மோசடிகள் நடைபெற்றதாக யாரும் கூற முடியாது.
கூட்டமைப்பினரைப் பொறுத்தவரையில் பிரிவினைவாதத்துடன் செயற்படுபவர்களாவர்.
ஐக்கிய இலங்கையை துண்டாடும் சக்திகளை ஏற்றுக் கொள்ள முடியாது. ஆகவே கொள்கை ரீதியாக கூட்டமைப்பை புறக்கணிக்கணிப்பதாகவும் தெரிவித்தார்.
உள்ளூராட்சி சபைகளில் பொதுமக்களுக்காகவும் அப்பிரதேசத்தின் அபிவிருத்திக்காகவும் மாத்திரமே கூட்டமைப்பு செயற்பட வேண்டும்.
பிரிவினைவாதத்தைத் தூண்டி விட்டு மக்களை அழிவுப் பாதையில் இட்டுச் செல்லக் கூடாது என்றும் அவர் தெரிவித்துள்ளார்.
*****************
ஊடகவியலாளர் மீது தாக்குதல்
கொழும்பின் அண்மித்த பிரதேசமான கிரிபத்கொடவுக்குச் செய்தி சேகரிக்கச் சென்ற சிரச ஊடக நிறுவனத்திக் செய்தியாளர்கள்மீது மிலேச்சத்தனமான தாக்குதல் நடத்தப்பட்டுள்ளது.
இவ்வாறு தாக்குதல்களை நடத்தியவர்கள் அமைச்சர் மேர்வின் சில்வாவின் குண்டர்கள் எனத் தெரிய வந்துள்ளது.
கிரிபத்கொடவில் நிர்மாணிக்கப்பட்டுள்ள புதிய கட்டடத் தொகுதியில் தமக்கும் இடம் வழங்க தர வேண்டுமென்ற கோரிக்கையை முன்வைத்து வர்த்தகர்களால் அங்கு நடத்தப்பட்ட ஆர்ப்பாட்டத்தின் போது செய்தி சேகரிக்கச் சென்ற ஊடகவியலாளர்கள் மீதே இந்தத் தாக்குதல் நடத்தப்பட்டுள்ளது.
ஆர்ப்பாட்டம் இடம்பெற்றுக் கொண்டிருந்த போது திடீரென அங்கு வந்த அமைச்சர் மேர்வின் சில்வாவின் குண்டர் படையினர் சிரச ஊடக நிறுவனத்தின் செய்தியாளரையும் புகைப்படப் பிடிப்பாளரையும் தாக்கியுள்ளனர்.
அத்துடன் வீடீயோக்களையும் பறித்துச் சென்றுள்ளனர் என காவல்துறையினரிடம் முறைப்பாடு செய்யப்பட்டுள்ளது.
*****************
ஞானம் பிறந்த கதை!
தமிழர்களுடனான அரசியல் பிரச்சினையைத் தீர்த்துக் கொள்ளும் விடயத்தில் சமஷ்டி ஆட்சிமுறையை நிராகரித்ததன் மூலம் அரசுத் தலைவர் ராஜபக்ஷ அரசு தவறிழைத்துவிட்டதாக முன்னாள் அரசுத் தலைவர் சந்திரிகா குமாரதுங்க தெரிவித்தார்.
இரண்டு பதவிக் காலத்துக்கு அரசுத் தலைவராக இருந்த சந்திரிகா, அதன் பின்னர் தீவிர அரசியலில் இருந்து விலகி இருந்தார்.
கடந்த 5 ஆண்டுகளாக அவர் தீவிர அரசியல் கருத்துக்களைத் தெரிவிப்பதில் இருந்து ஒதுங்கி இருந்தார்.
இப்போது மௌனம் கலைத்து மஹிந்த அரசு மீது குற்றச்சாட்டுக்களைச் சுமத்தி உள்ளார்.
அரசு விடுதலைப் புலிகளுக்கு எதிரான போரில் வெற்றி பெற்றிருந்தாலும்கூட, அதைவிடச் சிக்கலான அமைதிக்கான போராட்டத்தை இன்னும் ஆரம்பிக்கவே இல்லை என்றும் சந்திரிகா தெரிவித்துள்ளார்.
முன்னாள் நீதியரசர் கே.பாலகிட்ணர் நினைவு நிகழ்வில் கொழும்பில் உரையாற்றிபோதே அவர் அரசு மீதும் அரசுத் தலைவர் மீதும் குற்றச்சாட்டுக்களைத் தெரிவித்தார்.
அதிகாரங்களைப் பகிராமல் உண்மையான நல்லிணக்கம் எப்போதுமே சாத்தியம் இல்லை என்பதையும் அவர் இங்கு குறிப்பிட்டார்.
அதிகாரங்கள் இன்றி பொருளாதார அபிவிருத்தியைக் கூட மேற்கொள்ள முடியாது என்றும் அவர் குறிப்பிட்டார்.
14ஆம் நூற்றாண்டில் தென்னிந்திய அரசர்கள் இலங்கை மீது 52 தடவைகள் படையெடுத்தனர் என்று குறிப்பிட்ட சந்திரிகா, அதனால் சிங்களப் பெரும்பான்மையினர் மத்தியில் காணப்படும் அச்ச உணர்வு கூட அகற்றப்பட வேண்டும் என்றும் தெரிவித்தார்.
இருப்பினும் தற்போதைய நிலையில் சிங்கள மக்கள் தமிழர்களுடன் சமஷ்டி அடிப்படையில் அதிகாரங்களைப் பகிர்ந்து கொள்வது அவசியம் என்றும் சந்திரிகா வலியுறுத்தினார்.
சமஷ்டியைப் பின்பற்றியதாலேயே, பல இனங்களைக் கொண்டிருந்த போதும் கடந்த 60 வருடங்களாக இந்தியா ஒற்றுமையுடன் இருக்கின்றதும் என்றும் அவர் குறிப்பிட்டார்.
*****************
அதிகார பகிர்வு?
காணி மற்றும் காவல்துறை அதிகாரங்களைப் பகிராமல் வடக்கில் இறுதியான அமைதி, நீதி மற்றும் ஜனநாயகத்தைக் கொண்டு வருவதும், அரசியல் தீர்வு ஒன்றை அடைவதும் சாத்தியமற்றது என்று தமிழ்த் தேசியக் கூட்டமைப்பின் பேச்சாளர் சுரேஸ் பிறேமச்சந்திரன் கூறியுள்ளார்.
சிறிலங்கா அரசாங்கம் தமிழ்த் தேசிய கூட்டமைப்பின் தேர்தல் வெற்றியின் தாக்கத்தை புரிந்து கொண்டதோ இல்லையோ, தமிழ் சமூகத்தின் அபிலாசைகளையும், அவர்களின் உண்மையான பிரச்சினைகளையும் முழுமையாகப் புரிந்து கொள்ளவில்லை என்பது துரதிஷ்டமே என்றும் அவர் மேலும் தெரிவித்துள்ளார்.
காவல்துறை மற்றும் காணி அதிகாரங்கள் என்பனவற்றை பகிர்ந்து கொள்ள முடியாது அவை பேச்சுக்களுக்கு அப்பாற்பட்ட விடயங்கள் என்ற சிறிலங்கா அதிபர் மகிந்த ராஜபக்சவின் நிலைப்பாடு குறித்து கருத்து வெளியிட்டுள்ள சுரேஸ் பிறேமச்சந்திரன், இந்த இரண்டுமே நீடித்த அமைதி, நீதி, ஜனநாயகம் மற்றும் வடக்கின் வளர்ச்சிக்கு மிகவும் அவசியமானவை என்று குறிப்பிட்டுள்ளார்.
காவல்துறை மற்றும் காணி அதிகாரங்களை பகிர முடியாது என்று சிறிலங்கா அரசாங்கம் தொடர்ந்தும் பிடிவாதமாக இருந்தால் தற்போதைய பேச்சுக்கள் தொடரும் என்று எதிர்பார்க்கக் கூடாது என்றும் அவர் கூறியுள்ளார்.
ஒன்றுபட்ட இலங்கைக்குள் இனப்பிரச்சினைக்கு கண்ணியமான தீர்வு ஒன்றை காண்பதற்கு தமிழ்த் தேசியக் கூட்டமைப்பு தயாராகவே உள்ளது என்றும் சுரேஸ் பிறேமச்சந்திரன் தெரிவித்துள்ளார்.
சிறிலங்கா அரசாங்கத்துடன் தீவிரமான பேச்சுக்களை நடத்த வேண்டிய தேவை உள்ளது.
ஆனால் அதை சிறிலங்கா அரசாங்கம் சரியாகப் புரிந்து கொள்ளாதது வருத்தத்துக்குரியது.
இந்தநிலையை சிறிலங்கா அரசாங்கத்துக்கு எவ்வாறு புரிந்து கொள்ளச் செய்வது என்று தனக்கு தெரியவில்லை என்றும் அவர் தெரிவித்துள்ளார்.
ஐ.நா, அனைத்துலக மன்னிப்புச்சபை, மனித உரிமைகள் கண்காணிப்பகம், மற்றும் அனைத்துலக சமூகம் ஆகியன கோருவது போன்று நம்பகம் வாய்ந்த உள்நாட்டு விசாரணைப் பொறிமுறை ஒன்றை சிறிலங்கா அரசாங்கம் ஏற்படுத்தத் தவறினால், அனைத்துலக சமூகத்திடம் இருந்து சிறிலங்கா தனிமைப்படுத்தப்படுவதை யாராலும் தடுக்க முடியாது என்றும் சுரேஸ் பிறேமச்சந்திரன் குறிப்பிட்டுள்ளார்.
இனப்பிரச்சினைக்கு அரசியல்தீர்வு காண்பதற்கு நாடாளுமன்றத் தெரிவுக்குழுவை அமைப்பது காலத்தை வீணடிக்கும் செயல் என்று கூறியுள்ள அவர், நாடாளுமன்றத்தில் அங்கம் வகிக்கும் சிங்கள தீவிரவாத சக்திகளான ஜேவிபி மற்றும் ஜாதிக ஹெல உறுமய ஆகியனவற்றினால் தீர்வு ஒன்றை எட்டுவது சாத்தியமற்றது என்றும் சுட்டிக்காட்டியுள்ளார்.
*****************
ஸ்ரீலங்காவின் பிரித்தாளும் தந்திரம் அமெரிக்காவில் பலிக்குமா?
சிறிலங்காவுக்கான உதவிகளை தடை செய்வதற்கு அமெரிக்க காங்கிரசின் வெளிவிவகாரக் குழுவில் தீர்மானம் நிறைவேற்றப்பட்டுள்ள நிலையில், சில பல்தேசிய நிறுவனங்கள் சிறிலங்காவுடனான வர்த்தக உறவுகளுக்கு முக்கியத்துவம் கொடுக்குமாறு அமெரிக்க அரசுக்கு அழுத்தம் கொடுக்க முனைவதாக தகவல்கள் தெரிவிக்கின்றன.
கொகா கோலா, போயிங் உள்ளிட்ட 12 பல்தேசிய நிறுவனங்கள் சிறிலங்கா-அமெரிக்க வர்த்தக உறவுகளை வலுப்படுத்தும் வகையிலான கூட்டமைப்பு ஒன்றை உருவாக்கவுள்ளதாக அமெரிக்க இராஜாங்கச் செயலர் ஹிலாரி கிளின்ரனுக்கு கடிதம் ஒன்றை அனுப்பியுள்ளன.
இந்தக் கடிதத்தில் சிறிலங்காவின் பொருளாதாரம் விரைவாக வளர்ந்து வருவதைக் காண்பிக்கும் புள்ளிவிபரங்களைச் சுட்டிக்காட்டி, சிறிலங்கா- அமெரிக்க வர்த்தக உறவுகள் வலுப்படுத்தப்படுவது இருநாடுகளுக்கும் நன்மையை ஏற்படுத்தும் என்று கூறப்பட்டுள்ளது.
சிறிலங்காவுக்கான உதவிகளை அமெரிக்கா தடை செய்யவுள்ளது பற்றி இந்தக் கடிதத்தில் நேரடியாக எதுவும் குறிப்பிடப்படாத போதும் அமெரிக்க அரசுக்கு மறைமுகமாக அழுத்தம் ஒன்றைக் கொடுக்கும் முயற்சியாகவே இது கருதப்படுகிறது.
போர்க்குற்றங்களுக்குப் பொறுப்புக் கூறுவதற்கு நடவடிக்கை எடுக்கப்படும் வரை சிறிலங்காவுக்கான உதவிகளைத் தடைசெய்ய அமெரிக்க வெளிவிகாரக்குழு எடுத்துள்ள தீர்மானம் அமெரிக்க செனெட் மற்றும் காங்கிரசில் விவாதிக்கப்பட்டே இறுதி முடிவு எடுக்கப்படும்.
இந்தத் தடை நடைமுறைப்படுத்தப்பட்டால் சிறிலங்கா ஆண்டுதேர்றும் 13 மில்லியன் டொலர் அபிவிருத்தி நிதியை இழக்க வேண்டிய நிலை ஏற்படும் என்றும் அறிவிக்கப்பட்டுள்ளது.
இந்தநிலையிலேயே பல்தேசிய நிறுவனங்கள் சிறிலங்காவுடனான வர்த்தக உறவுகளை வலுப்படுத்துவது தொடர்பாக அமெரிக்க அரசுக்கு அழுத்தம் ஒன்றைக் கொடுக்க முனைந்துள்ளன என்பது குறிப்பிடத்தக்கது.
*****************
பீதியோடு வாழும் மக்கள்
மூன்று தசாப்த காலமாக போரினால் பாதிக்கப்பட்ட வடக்கு மக்கள் தொடர்ந்தும் பீதியுடன் வாழ்ந்து வருவதாக யாழ்ப்பாண பல்கலைக்கழகத்தின் முன்னாள் துணை வேந்தர் பேராசிரியர் பாலசுந்தரம் பிள்ளை தெரிவித்துள்ளார்.
நீண்ட கால போர் மற்றும் பொருளாதார நெருக்கடிகளினால பாதிக்கப்பட்ட மக்களுக்கு நிவாரணங்களை வழங்கும் போது அவர்களின் மனோநிலை கவனத்திற் கொள்ளப்பட வேண்டுமென அவர் சுட்டிக்காட்டியுள்ளார்.
லங்காதீப பத்திரிகைக்கு அளித்த செவ்வியில் அவர் இதனைக் குறிப்பிட்டுள்ளார்.
வடக்கின் பல பகுதிகளில் பௌதீக ரீதியான அபிவிருத்தி ஏற்பட்டுள்ள போதிலும் மக்கள் மத்தியில் இன்னமும் அச்சம் நீடித்து வருவதாகத் தெரிவித்துள்ளார்.
வட பகுதி மக்களின் அச்சத்தைப் போக்கும் வகையில் நடவடிக்கைகள் எடுக்கப்பட வேண்டும் என்பதே தமது கருத்து என குறிப்பிட்டுள்ளார்.
ஜனநாயக உரிமைகள் மற்றும் ஏனைய வரப்பிரசாதங்களை அனுபவிப்பத்தில் வட பகுதி மக்கள் இன்னமும் பின்தங்கிய நிலையில் காணப்படுவதாகத் தெரிவித்துள்ளார்.
வடக்கு மக்களின் தீர்க்கப்படாத பல பிரச்சினைகள் இன்னமும் எஞ்சியிருப்பதாகக் குறிப்பிட்டுள்ளார்.
மக்களின் பிரச்சினைகளை அடையாளம் கண்டு அவற்றுக்கு காத்திரமான வகையில் தீர்வுத் திட்டங்களை முன்வைக்க வேண்டுமென அவர் வலியுறுத்தியுள்ளார்.
போர் நிறைவடைந்துள்ள நிலையில் ஓரளவு சுயாதீனத்தன்மை தங்களுக்கு கிடைக்க வேண்டும் என வடக்கு மக்கள் கருதுவதாகக் குறிப்பிட்டுள்ளார்.
அரச நிர்வாக சேவைகளில் தமிழ் மக்கள் உள்வாங்கப்படதா காரணத்தினால் தாம் ஒதுக்கப்பட்டு விட்டோமோ என்ற எண்ணம் மக்கள் மத்தியில் உருவாகியுள்ளது என அவர் சுட்டிக்காட்டியுள்ளார்.
அண்மையில் அரச நிர்வாக சேவைக்காக 269 பேர் புதிதாக சேவையில் இணைக்கப்பட்ட போதிலும் இதில் ஒரு தமிழருக்குக் கூட சந்தர்ப்பம் வழங்கப்படவில்லை என அவர் தெரிவித்துள்ளார்.
வேலையற்ற இளைஞர்கள் தொடர்பில் அரசாங்கம் கூடுதல் கவனம் செலுத்த வேண்டுமென அவர் வலியுறுத்தியுள்ளார்.
2009ம் ஆண்டு போரின் பின்னர் வடக்கில் பல்வேறு அபிவிருத்தித் திட்டங்கள் முன்னெடுக்கப்பட்டுள்ளதாகவும் அவற்றை மறுப்பதற்கில்லை எனவும் அவர் தெரிவித்துள்ளனர்.
எனினும், மக்களின் தேவைகளை அறிந்து அவற்றுக்கு ஏற்ற வகையில் திட்டமிட்டு இந்த அபிவிருத்தித் திட்டங்கள் முன்னெடுக்கப்பட்டால் சாதகமான பலன்களை அடைய முடியும் என பேராசிரியர் பாலசுந்தரம் பிள்ளை குறிப்பிட்டுள்ளார்.
*****************


Monday, 25 July 2011

செய்திகள் 25/07


அமெரிக்க உதவிக்காக ஏங்கும் நிலை ஏற்படுமா?
இலங்கைக்கான உதவிகளை நிறுத்துவது என முன்வைக்கப்பட்ட தீர்மானத்திற்கு அமெரிக்க செனட் மற்றும் காங்கிரஸ் தரப்பு அங்கீகாரமளித்துள்ளது என சர்வதேச ஊடகங்களில் செய்தி வெளியாகியுள்ளது.
வொஷிங்டனால் எழுப்பப்பட்ட கேள்விகளுக்கு இலங்கை பொறுப்பு கூறாத பட்சத்தில் அபிவிருத்திக்காக வழங்கும் 13 மில்லியன் அமெரிக்க டொலர்களை இழக்க நேரிடும்.
அவசரகால நடமுறைகளை மீளப்பெறுதல், ஊடக சுதந்திரத்துக்கு உறுதியளித்தல் மற்றும் குற்றச்சாட்டுகள் தொடர்பில் இலங்கை அரசு பொறுப்பு கூறாதிருப்பதால் இலங்கைக்கான உதவிகளை நிறுத்துவது தொடர்பில் வாக்கெடுப்பு நடத்தப்படும் என அமெரிக்க வெளிவிவகார செயற்குழு கடந்த வியாழக்கிழமை தீர்மானம் எடுத்திருந்தது.
ஒபாமாவின் நிர்வாக்குழுவின் உயரதிகாரியான அமெரிக்க காங்கிரஸ் கொவார்ட் பேர்மன் இலங்கைக்கு எதிராக தீர்மானத்தை முன்வைத்திருந்தார்.
காங்கிரஸ் அரங்கத்தில் இலங்கையின் கொலைக்களங்கள் ஆவணப்படம் ஒளிபரப்பப்பட்டதை அடுத்தே இவ்வாறான தீர்மானம் முன்வைக்கப்பட்டுள்ளமை குறிப்பிடத்தக்கது.
******************
13 மில்லியனை இழக்கத் தயாராகும் ஸ்ரீலங்கா!
இலங்கைக்கு எதிராக அமெரிக்கா நிதித்தடை விதிக்குமானால் 13 மில்லியன் அமெரிக்க டொலர்களை இலங்கை இழக்கநேரிடும் என்று தெரிவிக்கப்பட்டுள்ளது.
இலங்கையில் இடம்பெற்ற போர்க்குற்றங்களுக்கு பதிலளிக்கத் தவறுதல், ஊடக சுதந்திரத்தை உறுதிப்படுத்தத் தவறுதல் மற்றும் அவசரகாலச்சட்டம் போன்றவற்றை நீக்கத் தவறினால் இலங்கைக்கான அமெரிக்காவின் நிதி உதவிகளை தடை செய்வதற்கான தீர்மானமொன்றை அமெரிக்காவின் வெளிவிவகாரக்குழு கடந்த வியாழக்கிழமை எடுத்துள்ளது.
பிரித்தானிய தொலைக்காட்சியான சனல் 4 வில் ஒளிபரப்பிய ஆவணப்படத்தை அமெரிக்க காங்கிரஸ் அரங்கத்தில் திரையிடப்பட்டதன் பின்னரே இந்த தீர்மானம் எடுக்கப்பட்டது.
அத்துடன் அமெரிக்க உதவி நிறுவனம் எதிர்வரும் ஒக்டோபர் முதலாம் திகதியில் இருந்து 2012 ஆம் ஆண்டு செப்டம்பர் வரையிலுமான நிதி ஆண்டுக்காக இலங்கைக்காக 6 பில்லியன் ரூபாய்களை அமெரிக்க அரசாங்கத்திடம் கோரியுள்ளது.
நிதித்தடை காரணமாக அந்த நிதியும் இலங்கைக்கு கிடைக்காமல் போகும் அபாயம் உள்ளதாக தெரிவிக்கப்பட்டுள்ளது.
******************
சிங்களத்தின் கோர முகத்தை உணர்ந்த முன்னாள் அரசுத் தலைவர்?
கொழும்பில் நேற்று நடைபெற்ற மறைந்த முன்னாள் நீதியரசர் அனந்த் பாலகிட்ணரின் நினைவுப் பேருரையில் சொற்பொழிவாற்றிய முன்னாள் அரசுத் தலைவர் சந்திரிகா குமாரதுங்க உரையின் இறுதிக்கட்டத்தின் போது கண் கலங்கியதுடன் தழுதழுத்த குரலில் உரையாற்றினார்.
இனங்களுக்கிடைலான நல்லிணக்கம், சமத்துவம், அரசியல் தீர்வு, அதிகாரப் பகிர்வு, சமமான அபிவிருத்தி உள்ளிட்ட துறைகளின் முக்கியத்துவம் தொடர்பில் தனது உரையில் சுட்டிக்காட்டிய சந்திரிகா குமாரதுங்க உரையின் இறுதிப் பகுதியில் அண்மையில் சர்ச்சையை ஏற்படுத்தியிருந்த இலங்கையின் கொலைக்களம் என்ற காணொளி தொடர்பில் கருத்து வெளியிட்டார்.
அதாவது இந்தக் காணொளியை பிரித்தானிய தொலைக்காட்சியொன்றில் பார்வையிட்ட 28 வயதான தனது மகன் தான் சிங்களவன் என்று கூற வெட்கப்படுவதாக விம்மியழுதவாறு கூறியதாக சந்திரிகா குறிப்பிட்டார்.
மேலும் தனது மகளும் இதே கருத்தை வெளிப்படுத்தியதாகவும் அவர் கூறினார்.
28 வயதான தனது மகன் பிரித்தானிய தொலைக்காட்சியில் பார்த்தபின்னர் தான் ஓர் இலங்கையர் எனவும் பௌத்தர் எனவும் கூறுவதற்கு வெட்கப்படுவதாக தனக்கு தொலைபேசி மூலம் தெரிவித்த காலை வேளையை தான் தனது வாழ்நாள் முழுதும் மறக்கமாட்டேன் எனவும் தெரிவித்துள்ளார்.
இந்தச் சந்தர்ப்பத்தில் கண் கலங்கிய முன்னாள் அரசுத் தலைவர் சந்திரிகா சற்றுநேரம் அமைதியாகிவிட்டு மீண்டும் தழுதழுத்த குரலில் உரையைத் தொடர்ந்தார்.
மேலும் தனது பிள்ளைகள் பாதிக்கப்பட்ட ஏனையவர்களின் நலன் குறித்து சிந்திப்பது தொடர்பில் தான் பெருமையடைவதாகவும் குறிப்பிட்டார்.
அரசுத் தலைவர் சட்டத்தரணி எம்.ஏ. சுரேந்திரன் தலைமையில் நடைபெற்ற இந்நிகழ்வில் இராஜதந்திரிகள், ஊடகவியலாளர்கள், சமூக அமைப்பின் பிரதிகள் உள்ளிட்ட பலர் கலந்துகொண்டனர்.
சமூகங்களையும் சமாதானத்தையும் உள்ளடக்கும் வகையிலான பொருளாதார அபிவிருத்தி என்ற தலைப்பில் சந்திரிகா பண்டாரநாயக்க குமாரதுங்க இந்நிகழ்வில் சொற்பொழிவாற்றியமை குறிப்பிடத்தக்கது.
******************
ஏக பிரதிநிகளை பிரகடனப்படுத்திய தேர்தல்
தமிழ்த் தேசியக் கூட்டமைப்பினர் தான் தங்களின் ஏக பிரதிநிதிகள் என வடக்கு மக்கள் இந்த உள்ளூராட்சி சபைத்தேர்தல்களின் மூலம் ஆணித் தரமாக முழு உலகத்துக்கும் பறைசாற்றியுள்ளனர் என புதிய இடதுசாரி முன்னணியின் தலைவர் கலாநிதி விக்கிரமபாகு கருணாரட்ன தெரிவித்தார்.
நடைபெற்ற உள்ளூராட்சி சபைத் தேர்தல்களில் தமிழ்த்தேசியக் கூட்டமைப்பு 26 சபைகளில் போட்டியிட்டு 21 சபைகளைக் கைப்பற்றி அமோக வெற்றி ஈட்டியது.
தமிழ்த் தேசியக் கூட்டமைப்பின் வெற்றி குறித்து கருத்துத் தெரிவிக்கையிலேயே அவர் இதனைத் தெரிவித்தார்.
அரசு தமிழ் மக்களின் வாக்குகளை பறித்தெடுப்பதற்குப் பல்வேறு யுத்திகளைக் கையாண்டது.
பட்டுவேட்டி, பட்டுச்சேலை, தண்ணீர் பம்புகள், தையல் இயந்திரங்கள் என ஏராளமான பொருள்களை இலவசமாக அமைச்சர்கள் வாரிவாரி வழங்கினர்.
அதுமட்டுமன்றி தென்னிலங்கையிலிருந்து கவர்ச்சிக் கன்னிகளை அழைத்துச் சென்று கூத்து கும்மாளம் என வடக்கு மக்களைக் குதூகலிக்க வைத்தனர்.
ஆனால் வடக்கு மக்கள் தாங்கள் பட்டுவேட்டிக்கும், பட்டுச் சேலைக்கும் சோரம் போகிறவர்கள் அல்லர் என்பதை நிரூபித்துவிட்டனர்.
பல்வேறு இடையூறுகளுக்கு மத்தியிலும் அவர்கள் புத்திசாலித்தனமாகக் கூட்டமைப்புக்கே வாக்களித்தனர்.
தமது கொள்கையில் சற்றும் தளராத அவர்கள் உறுதியாக இருந்துள்ளனர்.
இது பாராட்டுக்குரியதொரு விடயமாகும். இதற்கு தான் வடக்கு மக்களுக்கு நன்றிகளைத் தெரிவித்துக் கொள்வதாகவும் விக்கிரமபாகு கருணாரட்ண தெரிவித்துள்ளார்.
தமிழ் மக்களின் ஏக பிரதிநிதிகள் என்று எவரும் இல்லை என அரசு கூறிவருகின்றது.
மக்களின் ஏக பிரதிநிதிகள் யார் என்பதை தேர்தலே நிர்ணயிக்கும்.
வடக்கு மக்கள் தங்களின் பொன்னான வாக்குகள் மூலம் கூட்டமைப்பினர்தான் தங்களின் ஏக பிரதிநிதிகள் என முழு உலகத்துக்கும் எடுத்துக்காட்டியுள்ளனர்.
எனவே அரசு இனியும் இவ்வாறு பூச்சாண்டித் தனம் காட்டும் வேலைகளைச் செய்யாது, கூட்டமைப்பினருடன் சுமுகமான முறையில் பேச்சு நடத்தி, இனப்பிரச்சினைக்கு அவர்கள் ஏற்றுக்கொள்ளக்கூடிய தீர்வை வழங்க முன்வரவேண்டும்.
இனியும் மௌனம் காத்தால் சர்வதேச தலையீடுகள் தவிர்க்கமுடியாததாகிவிடும் எனவும் சுட்டிக்காட்டினார்.
தமிழ் மக்களுக்கு இந்தத் தேர்தல் வெற்றியானது வரலாற்று முக்கியத்துவம் வாய்ந்தது.
எனவே தமது உரிமைகளை வென்றெடுப்பதற்கு இது உந்துசக்தியாக அமையும்.
சர்வதேச அழுத்தங்களிலிருந்து தப்பிக் கொள்வதற்காக இந்தத் தேர்தல்களைப் பயன்படுத்த முனைந்த அரசு, வடக்கு மக்களை இலகுவில் ஏமாற்றிவிடலாம் என்றும் நினைத்தது.
ஆனால் அங்குள்ள மக்கள் அரசுக்கு தக்க பாடம் புகட்டியுள்ளனர் எனவும் அவர் சுட்டிக்காட்டியுள்ளார்.
******************
ஒருமைப்பாட்டை உறுதிப்படுத்திய தேர்தல்
தேர்தலின் மூலம் தமிழ் மக்கள் தமிழ்த் தேசியத்தின் ஒருமைப்பாட்டை உறுதிப்படுத்தியுள்ளார்கள் என தமிழ்த் தேசியக் கூட்டமைப்பின் முன்னாள் பாராளுமன்ற உறுப்பினர் எம்.கே.சிவாஜிலிங்கம் தெரிவித்துள்ளார்.
2004ம் ஆண்டு தமிழீழ விடுதலைப் புலிகளின் ஆதரவினால் தான் தமிழ்த் தேசிய கூட்டமைப்பு தேர்தலில் வெற்றியீட்டியதாக பலர் தெரிவித்தனர்.
ஆனால் இன்று விடுதலைப் புலிகள் இல்லை இப்போதுகூட தமிழ் மக்கள் தம்மை வெற்றிபெறச் செய்திருக்கிறார்கள் என்றும் தெரிவித்தார்.
இந்நிலையில் தமிழ் மக்கள் தமக்கு வழங்கியுள்ள ஆணையினை அரசும் சர்வதேச சமூகமும் மதித்து ஏற்றுநடக்க வேண்டும்.
இனப்பிரச்சினைக்கு தமிழ் மக்கள் தம்மை தாமே ஆழக்கூடிய தீர்வு குறித்து மக்களால் ஆணை வழங்கப்பட்டுள்ள தமிழ்த் தேசியக் கூட்டமைப்புடன் மாத்திரமே பேசப்பட வேண்டும் என்றும் சிவாஜிலிங்கம் தெரிவித்துள்ளார்.
******************
அரசை துணிந்து நிராகரித்த தமிழர்கள்
சுதந்திரமானதும் நீதியானதுமான தேர்தல் இடம்பெறாத நிலையிலும் வட பகுதி மக்கள் துணிச்சலுடன் அரசாங்கத்தை நிராகரித்துள்ளனர் என்று ஜே.வி.பி. தெரிவித்துள்ளது.
நாட்டில் சவாலுக்கு முகம் கொடுத்துள்ள ஜனநாயகத்தை பாதுகாக்க மக்கள் முன்வர வேண்டுமென்றும் அக்கட்சி அறிவித்துள்ளது.
நடந்து முடிந்த உள்ளூராட்சி சபைத் தேர்தல்கள் தொடர்பாக ஜே.வி.பி. யின் அரசியல் பீடம் விடுத்துள்ள அறிக்கையிலேயே இவ்வாறு தெரிவிக்கப்பட்டுள்ளது.
அரச வளங்களை, அதிகாரத்தை பயன்படுத்தியதோடு மக்களை அச்சுறுத்தி தாக்குதல்களை நடத்திய சூழ்நிலையிலேயே அரசாங்கம் தேர்தலை நடத்தியது.
விசேடமாக வட பகுதி மக்களின் வாக்குகளை பறிப்பதற்கு இராணுவத்தை பயன்படுத்தி பலாத்காரம் மேற்கொள்ளப்பட்டது.
இவ்வாறான செயற்பாடுகள் தொடர்பாக தேர்தல்கள் ஆணையாளருக்கும் காவல்துறை மா அதிபருக்கும் பல முறைப்பாடுகள் செய்யப்பட்டன.
இத்தேர்தலிலும் மக்களின் விருப்பத்தை சுதந்திரமாக வெளியிட முடியாது தடுக்கப்பட்டது.
இவ்வாறானதொரு சூழ்நிலையிலும் வட பகுதி மக்கள் அரசாங்கத்தை நிராகரித்துள்ளனர்.
வழமையாக இத் தேர்தலுக்கு பின்னரும் மக்கள் மீதான வரிகளை அரசாங்கம் அதிகரிக்கும்.
அச்சுறுத்தல்கள் இருந்தபோதும் தமது கட்சிக்கு வாக்களித்த மக்களுக்கு நன்றியை தெரிவிப்பதாகவும் ஜே.வி.பி. அறிவித்துள்ளது
****************** 


Sunday, 24 July 2011

செய்திகள் 24/07


அரச அடக்குமுறையை ஜனநாயக வழியில் தோற்கடித்த தன்மானத் தமிழருக்கே வெற்றி!
நேற்று நடைபெற்று முடிந்த உள்ளூராட்சித் தேர்தலில் தமிழர்களுக்குப் பெரு வெற்றி கிடைத்துள்ளது.
அரச அடக்குமுறைக்கு எதிராக மக்களை வாக்களிக்கக் கோரிய தமிழ்த் தேசியக் கூட்டமைப்புக்குத் தமது ஏகோபித்த ஆதரவைத் தெரிவித்ததன் மூலம் தமிழர்கள் இந்தப் பெரு வெற்றியைப் பெற்றுள்ளார்கள்.
வடக்கில் உள்ள 20 பிரதேச சபைகளில் 18 சபைகளையும் கிழக்கில் அம்பாறை மாவட்டத்தில் நடந்த இரு சபைகளையும்கூட கூட்டமைப்பே கைப்பற்றி உள்ளது.
யாழ். மாவட்டத்தில் 3 நகரசபைகளுக்கும் 13 பிரதேச சபைகளுக்கும் கிளிநொச்சியில் 3 பிரதேச சபைகளுக்கும் முல்லைத்தீவில் ஒரு பிரதேச சபைக்கும் தேர்தல் நடத்தப்பட்டது.
கிழக்கில் அம்பாறை மாவட்டத்தில் 2 பிரதேச சபைகளுக்கும் வாக்களிப்பு இடம்பெற்றது.
திருகோணமலை மாவட்டத்தில் 3 பிரதேச சபைகளுக்கும் தேர்தல் நடைபெற்றது.
வன்னியில் சுமார் 30 வருடங்களின் பின்னர் முதல் தடவையாக உள்ளூராட்சித் தேர்தல் நடைபெற்றுள்ளது.
படையினரின் கெடுபிடிகள், அச்சுறுத்தல்கள் மற்றும் லஞ்சம் கொடுத்தல் ஆகிய பல முறைப்பாடுகள் பதிவாகி இருந்த நிலையிலும் வாக்காளர்கள் தமிழ்த் தேசியக் கூட்டமைப்புக்கே தமது பெரும் ஆதரவையும் வழங்கி உள்ளனர்.
அரச தரப்பினரின் சட்டவிரோதச் செயற்பாடுகள், கடும் அச்சுறுத்தல்கள், அராஜகங்களின் மத்தியில் வடக்கில் உள்ளூராட்சித் தேர்தல்கள் நடத்தப்பட்ட நிலையிலும் மக்கள் தமிழ்த் தேசியக் கூட்டமைப்புக்கு வாக்களித்திருப்பது அவர்களின் தேசிய உணர்வைக் காட்டுகின்றது என்று கூட்டமைப்பின் யாழ். மாவட்ட நாடாளுமன்ற உறுப்பினர் ஈ.சரவணபவன் தெரிவித்தார்.
தமக்குப் பெரு வெற்றியை ஈட்டித் தந்த தமிழ் மக்களுக்கு கூட்டமைப்பினர் தமது நன்றிகளையும் தெரிவித்துள்ளனர்.
*****************

தமிழரின் தாகம் தணியாது என்பது மீள் நிரூபணம்
நேற்று சனிக்கிழமை நடைபெற்ற 65 உள்ளூராட்சி மன்றங்களுக்கான தேர்தல்களில் ஆளும் ஐக்கிய மக்கள் சுதந்திர முன்னணி 45 சபைகளை கைப்பற்றியுள்ளது.
இலங்கை தமிழரசுக் கட்சி 18 உள்ளூராட்சி சபைகளை வென்றது.
தமிழர் விடுதலைக் கூட்டணி 2 பிரதேச சபைகளை கைப்பற்றியது.
வடக்கு கிழக்கில் இலங்கை தமிழரசுக் கட்சி பெரு வெற்றி பெற்றுள்ளது.
யாழ்ப்பாணத்தில் தேர்தல் நடைபெற்ற 16 சபைகளில் 13 சபைகளை இலங்கை தமிழரசுக் கட்சி வென்றது.
ஊர்காவற்துறை, நெடுந்தீவு, வேலணை பிரதேச சபைகளை ஐக்கிய மக்கள் சுதந்திர முன்னணி கைப்பற்றியது. 
முல்லைத்தீவு மாவட்டத்தின் துணுக்காய் பிரதேச சபை, கிளிநொச்சி மாவட்டத்தின் கரைச்சி பிரதேச சபை என்பனவும் தமிழரசு கட்சி வசமாகின.
கிளிநொச்சியின் பச்சிலைப்பள்ளி மற்றும் கரைச்சி பிரதேச சபைகளை தமிழர் விடுதலைக் கூட்டணி சின்னத்தில் போட்டியிட்ட தமிழ் தேசிய கூட்டமைப்பு கைப்பற்றியது.
அம்பாறையில் தேர்தல் நடைபெற்ற காரைதீவு பிரதேச சபை மற்றும் திருக்கோவில் பிரதேச சபைகளை தமிழரசுக் கட்சி கைப்பற்றியது.
திருகோணமலையில் பட்டணமும் சூழலும் பிரதேச சபை தமிழரசுக்கட்சி வசமானது.
அங்கு தேர்தல் நடந்த குச்சவெளி, சேருவில, கந்தளாய் பிரதேச சபைகளை ஐக்கிய மக்கள் சுதந்திர முன்னணி கைப்பற்றியது.
இத்தேர்தல்களில் ஐக்கிய தேசியக் கட்சி, மக்கள் விடுதலை முன்னணி, ஸ்ரீலங்கா முஸ்லிம் காங்கிரஸ் ஆகியன ஒரு சபையையும் கைப்பற்றவில்லை.
*****************

முறைகேடான தேர்தல் பற்றிய முறைப்பாடு
கிளிநொச்சி மாவட்டத்தில் கரைச்சி பிரதேச சபை மற்றும் பச்சிலைப்பள்ளி பிரதேச சபை ஆகியவற்றிற்கு நடத்தப்பட்ட தேர்தல்களில் இடம்பெற்ற அச்சுறுத்தல் மற்றும் சட்டவிரோத நடவடிக்கைகள் காரணமாக மக்கள் சுதந்திரமாக வாக்களிக்க முடியாத நிலை ஏற்பட்டுள்ளது.
இது தொடர்பாகப் பொருத்தமான நடவடிக்கைகளில் ஒன்றாக தற்போதைய தேர்தலை ரத்துச் செய்துவிட்டு வேறொரு தினத்தில் புதிதாகத் தேர்தலை நடத்துவதாக அமைய வேண்டும் என்று தமிழ்த் தேசியக் கூட்டமைப்புத் தலைவர் இரா.சம்பந்தன் தேர்தல் ஆணையாளருக்கு திருகோணமலையிலிருந்து அனுப்பிய அவசர தொலைநகல் மூலமான கடிதத்தில் கேட்டுள்ளார்.
முறைகேடுகள் பற்றி தகவல் கிடைத்ததும் சம்பந்தன் முதலில் தேர்தல் ஆணையாளருடன் தொலைபேசி மூலம் தொடர்புகொண்டு விபரங்களைத் தெரிவித்தார்.
பின்னர் தொலைநகல் மூலம் அனுப்பிய கடிதத்தில், கரைச்சி பிரதேச சபைக்குட்பட்ட வட்டக்கச்சி, இராமநாதபுரம், கல்மடுநகர், சம்புக்குளம், மாயவனூர், மலையாளபுரம், கிருஷ்ணபுரம், பாரதிபுரம், கோணாவில், உருத்திரபுரம், செல்வநகர், திருவையாறு, தெட்சணாபுரம் கிராமங்களில் ஆயுதங்களுடனான குழுக்கள் இரவு முதல் சனி காலை வரை வீடுவீடாகச் சென்று வாக்காளர் அட்டைகளைப் பறித்து வாக்களிக்கச் செல்லக்கூடாது என்று அச்சுறுத்தியுள்ளனர்.
சில இடங்களில் அடையாள அட்டைகளைப் பறித்துள்ளனர்.
பச்சிலைப்பள்ளி பிரதேச சபை எல்லைக்குள் வரும் அரசர்கேணி, செந்தில்நகர், தம்பலகமம், முள்ளியடி, பளைநகரம், பெரியபளை ஆகிய கிராமங்களிலும் வாக்காளர்கள் இவ்வாறு அச்சுறுத்தப்பட்டுள்ளனர்.
எனவே இப்பகுதிகளில் சுதந்திரமானதும் நீதியானதுமான தேர்தல் உறுதி செய்யப்பட வேண்டும் அல்லது தேர்தலை இரத்துச் செய்து வேறொரு திகதியில் புதிதாகத் தேர்தலை நடத்த வேண்டும் என்று சம்பந்தன் தேர்தல் ஆணையாளரைக் கேட்டுள்ளார்.
இதேவேளை, கிளிநொச்சி மாவட்டத்தில் தேர்தல் நீதியாகவும் நேர்மையாகவும் இடம்பெறவில்லையென்ற சம்பவங்களைக் குறிப்பிட்டு கிளிநொச்சி மாவட்டத்தின் உள்ளூராட்சி சபைகளுக்கான தேர்தலை இரத்து செய்யுமாறு இலங்கைத் தமிழரசுக் கட்சியின் பொதுச் செயலாளர் மாவை சேனாதிராஜா கடிதம் மூலம் தேர்தல்கள் ஆணையாளருக்கு நேற்று சனிக்கிழமை மாலை அனுப்பியுள்ளார்.
இல்லையேல் குறிப்பிட்ட சம்பவங்கள் இடம்பெற்ற தொகுதிகளில் வாக்களிப்பை மீள நடத்துமாறும் அவர் கேட்டுள்ளார்.
இதேவேளை கிளிநொச்சி மாவட்டத்தில் கரைச்சி மற்றும் பச்சிலைப்பள்ளி ஆகிய பிரதேச சபை வாக்காளர்களின் வீடுகளுக்கு ஆயுதத்துடன் புகுந்த சிலர் அவர்களது வாக்கு அட்டைகளைப் பறித்துச் சென்றதாக புத்திஜீவிகள் ஒன்றியத்திடம் முறைப்பாடு செய்யப்பட்டுள்ளது.
இந்நிலையில் குறித்த பகுதிகளின் வாக்காளர்கள் தங்களது வாக்குகளை அளிப்பதற்கான உரிய நடவடிக்கையை எடுத்து நீதியானதும் சுதந்திரமானதுமான தேர்தல் நடைபெறுவதற்கான சூழலை ஏற்படுத்துமாறு அதன் பிரதம நிறைவேற்று அதிகாரி பேராசிரியர் உதித குணசேகர தேர்தல்கள் ஆணையாளருக்குக் கடிதம் எழுதியதாகத் தெரிவித்துள்ளார்.
உள்ளூராட்சி சபைத் தேர்தல் சுமுகமாக இடம்பெற்ற போதும் கிளிநொச்சியில் வாக்காளர் அட்டைகள் அபகரிக்கப்பட்டமை பாரதூரமான செயலெனவும் தேர்தலைக் கண்காணிப்பதற்கான அமைப்பான கபே தெரிவித்துள்ளதுடன் கிளிநொச்சியில் 20 க்கும் மேற்பட்ட கிராமங்களில் இவ்வாறான சம்பவங்கள் இடம்பெற்றுள்ளதாகவும் தெரிவித்துள்ளது.
65 உள்ளூராட்சி சபைகளின் தேர்தல் வாக்களிப்பு தொடர்பில் அந்த அமைப்பு நேற்று சனிக்கிழமை மாலை கொழும்பிலுள்ள நிப்பொன் ஹோட்டலில் நடத்திய ஊடகவியலாளர் சந்திப்பில் அதன் பணிப்பாளர் கீர்த்தி தென்னக்கோன் பேசுகையிலேயே இவ்வாறு தெரிவித்தார்.
தேர்தல் தினத்தன்று தேர்தலுடன் தொடர்புபட்ட 73 சம்பவங்கள் இடம்பெற்றுள்ளன.
இதில் தேர்தல் சட்ட விதிகள் மீறப்பட்ட 32 சம்பவங்களையும் சட்டவிரோத பிரசாரம் தொடர்பில் 12 முறைப்பாடுகளும் அடங்குகின்றன.
அதேபோல், 20 அச்சுறுத்தல் சம்பவங்கள் தொடர்பாகவும் ஆறு தாக்குதல் சம்பவங்களும் இடம்பெற்ற நிலையில் மரணம் உட்பட பல சம்பவங்கள் உள்ளன.
தெற்கில் தேர்தல் சுமுகமாக இடம்பெற்றாலும் கடுவல, மினுவாங்கொட உட்பட ஏனைய சில பகுதிகளில் சட்டவிரோத பிரசாரம் இடம்பெற்றுள்ளது.
இவை தவிர மக்கள் சாதாரண சூழ்நிலையில் வாக்களித்தனர்.
எனினும் கிளிநொச்சியில் வாக்காளர் அட்டைகள் அபகரிக்கப்பட்ட பல சம்பவங்கள் இடம்பெற்றுள்ளன.
இங்கு 20 க்கும் மேற்பட்ட கிராமங்களில் வாக்காளர் அட்டைகள் பறிமுதல் செய்யப்பட்டுள்ளன. இத்தேர்தலில் இது பாரதூரமான விடயமாகவுள்ளது.
நாடு முழுவதும் 55 முதல் 58 வீதம் வாக்களிப்பு இடம்பெற்றுள்ளது.
முல்லைத்தீவில் 62 வீதமும் கிளிநொச்சி மற்றும் யாழ்ப்பாணத்தில் தலா 55 வீதமான வாக்களிப்பும் இடம்பெற்றுள்ளதாகவும் அவர் தெரிவித்தார்.
*****************
ஊர்வலங்களுக்குத் தடை
இன்று முதல் ஒருவார காலத்திற்கு ஊர்வலங்கள் நடத்துவதற்கு தடை விதிக்கப்பட்டுள்ளதாக காவல்துறையினர் தெரிவிக்கின்றனர்.
உள்ளூராட்சி மன்றத் தேர்தல் சட்டத்தின் பிரகாரம் இந்த தீர்மானம் மேற்கொள்ளப்பட்டதாக காவல்துறை ஊடகப் பேச்சாளரும், காவல்துறை அத்தியட்சகருமன பிரிஷாந்த ஜயகொடி தெரிவித்துள்ளார்.
இதற்கமைய பேரணிகள் வாகன ஊர்வலங்கள் என்பவற்றிற்கு முற்றாக தடை விதிக்கப்பட்டுள்ளது எனவும் அவர் தெரிவித்தார்.
தேர்தல் நடைபெற்ற நேற்றைய தினத்தில் அமைதியான சூழ்நிலை நிலவியதாகவும் காவல்துறை ஊடகப் பேச்சாளர் மேலும் தெரிவித்தார்.
*****************
கறுப்பு யூலை நினைவேந்தலில் பெரும் எண்ணிக்கையிலான தமிழர்கள்
தமிழ் மக்கள் மீதான இன அழிப்பின் முக்கிய நாளான கறுப்பு ஜூலை படுகொலைகளை நினைவேந்தி, பிரித்தானியப் பிரதமர் அலுவலகம் முன்பாக நேற்று நடைபெற்ற நினைவேந்தல் நிகழ்வு உணர்வு பூர்வமாக இடம்பெற்றது.
இதில் ஆயிரத்திற்கு மேற்பட்ட மக்கள் கலந்துகொண்டனர்.
கறுப்பு ஜூலை இன அழிப்பு மற்றும், அனைத்துலக சுயாதீன போர்க்குற்ற விசாரணைகளை வலியுறுத்தும் துண்டுப் பிரசுரங்களை மாலை 3:00 மணி முதல் 6:00 மணிவரை பொதுமக்கள் மத்தியில் வழங்கல் செய்த பிரித்தானிய தமிழர் பேரவையின் தொண்டர்களும், பொதுமக்களும், மாலை 6:00 முதல் இரவு 9:00 மணிவரை நினைவு நிகழ்வை நடத்தியிருந்தனர்.
மக்கள் தமது உள்ளுணர்வை வெளிப்படுத்தும் வகையில் கறுப்புடை அணிந்து காணப்பட்டதுடன், கறுப்புக் கொடிகளையும் தாங்கி நின்று, இழந்த எம் உறவுகளுக்காக மெழுகுவர்த்தி கொழுத்தி ஆத்ம வணக்கம் செலுத்தினர்.
இந்த நினைவு வணக்க நிகழ்வில் இன அழிப்பிற்கு எதிரான தமிழர்கள் அமைப்பைச் சேர்ந்த ஜனனி ஜனநாயகம், பிரித்தானிய தமிழர் பேரவையின் முக்கிய உறுப்பினர் ரவிக்குமார் ஆகியோர் உரையாற்றியிருந்தனர்.
ஈழத்தமிழ் மக்கள் மீது சிறீலங்கா இனவெறி அரசாங்கங்கள் மேற்கொண்டுவந்த இன அழிப்பின் ஆரம்ப நிகழ்வுகளில் ஒன்றாக 1983 கறுப்பு ஜூலைப் படுகொலைகள் திகழ்கின்றன.
இதேவேளை, சர்வதேச மன்னிப்புச் சபையும் அனைத்துலக சுயாதீன போர்க்குற்ற விசாரணையை வலியுறுத்தி கையெழுத்துப் பெறும் போராட்டத்தை இன்று நடத்தியிருந்தது.
*****************

போர்க் குற்றவாளிகள் - தமிழில் புத்தகமாக!
ஐ.நா.நிபுணர் குழு, இலங்கையின் மீது சுமர்த்தியுள்ள போர்க் குற்றச்சாட்டுக்களை உள்ளடக்கிய ஆவண அறிக்கையை மனிதம் வெளியீடு தமிழில் மொழி மாற்றம் செய்துள்ளது.
போர்க் குற்றவாளி என்ற தலைப்புடைய இப்புத்தகம் இன்னும் சில தினங்களில் தமிழகம் மற்றும் உலக முழுக்க விற்பனைக்கு வர உள்ளது.
முதல் பாகத்தில், ஐ.நா.நிபுணர் குழு அறிக்கையை சார்ந்துள்ள பல்வேறு செய்திகளை கொண்ட நான்கு கட்டுரைகள் கொடுக்கப்பட்டுள்ளன.
இரண்டாம் பாகம் முழுவதும், 444 குறிப்பு எண்களைக் கொண்டுள்ள ஐ.நா.நிபுணர் குழுவின் அறிக்கை படங்களோடு, முழுமையாக வாசிப்புத் தமிழில் தொகுக்கப்பட்டிருக்கிறது.
வடகிழக்கு மனித உரிமை செயலகத்தால் தொகுக்கப்பட்ட, தமிழினப் படுகொலைகள் என்ற புத்தகத்தை 2009-ல் தமிழிலும், ஆங்கிலத்திலும் வெளியிட்டு உலக முழுக்க பரவ செய்துள்ள, மனிதம் வெளியீட்டாளரின் இரண்டாவது ஆவணப் புத்தகமாக, "போர்க் குற்றவாளிகள்" வெளிவருகிறது.
*****************
ஸ்ரீலங்கா இராணுவத்தின் மீது குற்றம் சாட்டும் அரச சார்பற்ற நிறுவனங்கள்
இராணுவத்தினர் மீது போர்க் குற்றச்சாட்டுக்களை சுமத்துவதற்கு மூன்று அரச சார்பற்ற நிறுவனங்கள் முயற்சி மேற்கொண்டுள்ளதாக திவயின சிங்களப் பத்திரிகை செய்தி வெளியிட்டுள்ளது.
எனினும், இந்த முயற்சியில் தோல்வியடைந்துள்ளதாகக் குறிப்பிடப்படுகிறது.
2011ம் ஆண்டு ஜூலை மாதத்தில் ஐக்கிய நாடுகள் அமைப்பு புதிய பிரகடனம் ஒன்றை அறிவித்துள்ளது.
எனினும், இந்தப் பிரகடனத்தின் கீழ் கடந்த காலச் சம்பவங்களுக்கு எதிராக நடவடிக்கை எடுக்கப்பட முடியாது என தெரிவிக்கப்பட்டுள்ளது.
இலங்கையில் இடம்பெற்ற யுத்தம் தொடர்பில் இந்தப் பிரகடனத்தின் அடிப்படையில் குற்றச்சாட்டுக்களை சுமத்துவதற்கு குறித்த சர்வதேச அரச சார்பற்ற நிறுவனங்கள் முயற்சித்துள்ளதாகக் குறிப்பிடப்படுகிறது.
வைத்தியசாலைகள் மீது தாக்குதல் நடத்துதல், சம்பந்தப்பட்டவர்களை பெயரிடுதல் போன்ற விடயங்கள் புதிய பிரகடனத்தில் உள்ளடக்கப்பட்டுள்ளது.
சர்வதேச நெருக்கடிக் குழு, அனைத்துலக மன்னிப்புச் சபை மற்றும் நாடு கடந்த தமிழீழ இராச்சிய அமைப்பு ஆகியன இவ்வாறு அரசாங்கத்திற்கும் படையினருக்கும் எதிராக குற்றச்சாட்டுக்களை சுமத்தி வருவதாகக் குற்றம் சுமத்தப்பட்டுள்ளது.
ஐக்கிய நாடுகள் சிறுவர் பாதுகாப்பு அமைப்பினால், பாதுகாப்புச் சபைக்கு சனல்4 காணொளி தொடர்பில் அறிவிக்கப்பட்டிருந்தாகத் தெரிவிக்கப்படுகிறது.
இந்த விடயம் அம்பலமானதன் பின்னர், தமக்கும் இந்த முறைப்பாட்டிற்கும் தொடர்பில்லை என சிறுவர் பாதுகாப்பு சபையின் பிரதிநிதி ராதிகா குமாரசுவாமி தெரிவித்துள்ளார் என செய்தியில் தெரிவிக்கப்பட்டுள்ளது.
*****************