Wednesday, 14 September 2011

செய்திகள் 14/09


உரிமை இழந்த நிலை குறித்து விபரிப்பு
யாழ்ப்பாணத்தில் இருக்கும் தாம் மக்களின் உரிமைக்காக அவர்களின் நலன்களுக்காக எதுவும் செய்ய முடியாமல் வாய் திறக்க முடியாத நிலையில், ஜனநாயக ரீதியில் இங்கு எவரும் பேசமுடியாத நிலையே உள்ளது என்று யாழ். மாவட்ட அரச சார்பற்ற நிறுவனங்களின் இணையப் பிரதிநிதிகள் அமெரிக்காவின் உதவி இராஜாங்க செயலாளர் ரொபேர்ட் ஒ பிளேக்கிடம் சுட்டிக்காட்டியுள்ளனர்.
யாழ். மாவட்டத்துக்கு நேற்று விஜயம் செய்த பிளேக் மதியமளவில் அரச சார்பற்ற இணையங்களின் அலுவலகத்துக்கு விஜயம் செய்தார்.
அதன்போதே இன்றைய யாழ்ப்பாணத்தின் நிலைமை தமிழர்களின் நிலை குறித்து அவரிடம் எடுத்துக் கூறப்பட்டது.
ஐக்கிய நாடுகள் சபையின் நிபுணர் குழுவினால் வெளியிடப்பட்ட அறிக்கையை இலங்கை அரசு செயற்படுத்துவதற்கு அமெரிக்கா நடவடிக்கை எடுக்க வேண்டும்.
இளைஞர்கள் பலர் இங்கு வேலைவாய்ப்புகள் இன்றி இருக்கின்றார்கள். அவர்களுக்கான தொழில் வாய்ப்புகள் ஏற்படுத்திக்கொடுக்கப்பட வேண்டும்.
இடம்பெயர்ந்து வாழ்கின்ற மக்கள் மற்றும் மீளக்குடியமர்ந்த மக்கள் உரிய வசதி வாய்ப்புகள் இல்லாமல் இருக்கின்றனர். அவர்களுக்கு உரிய வசதிகள் ஏற்படுத்திக் கொடுக்கப்பட வேண்டும்.
தற்போது யாழ். குடாநாட்டில் கிறீஸ் பூதம் என்ற அச்ச நிலை தோற்றுவிக்கப்பட்டுள்ளது.
யுத்தம் முடிவடைந்தாலும் மக்களை உள ரீதியாக அச்சுறுத்தவே இவ்வாறான நடவடிக்கைகள் திட்டமிடப்பட்டு மேற்கொள்ளப்பட்டு வருகின்றன.
தமிழ் மக்கள் கேட்பது தனி இனமாக கலாசார, பண்பாடுகளுடன் மொழியையும் பாதுகாத்து வாழ விடுங்கள் என்பதேயாகும் எனவும் இந்தச் சந்திப்பின் போது அவரிடம் எடுத்துக் கூறப்பட்டுள்ளது.
இதற்குப் பதிலளித்த பிளேக் தான் இங்குள்ள மக்களிடம் சில கருத்துக்களை கேட்டறிந்ததாகவும் கருத்துக்களை கவனத்தில் எடுப்பதுடன் உரிய மட்டங்களுக்குத் தெரியப்படுத்தப்படும் என்று தெரிவித்தார்.
********************

ஐநா நடவடிக்கை குறித்து மீளாய்வு
இலங்கையில் நடந்த இறுதிப் போரின் போது ஐக்கிய நாடுகள் சபை நடந்துகொண்ட விதம் குறித்து மீளாய்வு செய்வதற்கான அதிகாரி ஒருவரை பொதுச் செயலாளர் பான் கீமூன் நியமித்துள்ளார்.
ஐ.நா. சனத்தொகை நிதியத்தின் முன்னாள் நிறைவேற்றுப் பணிப்பாளரான தொறயா அகமட் ஓபெய்ட் என்ற அதிகாரியே இதற்கென நியமிக்கப்பட்டுள்ளார் என்று ஐ.நா. செயலகம் அறிவித்துள்ளது.
பொதுச் செயலாளர் பான் கீ மூனினால் இந்த நியமனம் வழங்கப்பட்டுள்ளது.
பான் கீமூன் நியமித்த நிபுணர் குழுவின் அறிக்கையில், இலங்கையின் போரில் அதிகளவு பொதுமக்கள் கொல்லப்படுவதற்கான காரணங்களில் ஒன்றாக ஐ.நா. பாதுகாப்பு வலயத்தில் இருந்து வெளியேறியமையும் சுட்டிக்காட்டப்பட்டிருந்தது.
அத்துடன் போரின் போது ஐ.நா. நடந்துகொண்ட விதம் குறித்து மீளாய்வு செய்யப்படவேண்டும் என்றும் அறிக்கை பரிந்துரைத்திருந்தது.
அதன் அடிப்படையிலேயே இந்த நியமனம் வழங்கப்பட்டுள்ளது.
நிபுணர் குழுவின் அறிக்கையை ஐ.நா. மனித உரிமைகள் சபைக்கு முன்னகர்த்திய கையோடு இந்த நியமனத்தையும் பான் கீமூன் வழங்கி உள்ளார்.
ஓபெய்ட் தனது பணிகளை விரைவில் ஆரம்பிப்பார் என்று ஐ.நா. அறிவித்தள்ளது
********************

தமிழ்த் தேசியக் கூட்டமைப்பின் கண்டனம்
போருக்குப் பின்னரான காலப்பகுதியில் இலங்கையில் மேற்கொள்ளப்படும் அமைதி முயற்சிகள் குறித்து ஐக்கிய நாடுகள் மனித உரிமைகள் சபையில் அரசு விடுத்த அறிக்கைக்குத் தமிழ்த் தேசியக் கூட்டமைப்பு கடும் எதிர்ப்புத் தெரிவித்துள்ளது.
குறிப்பாக இனங்களுக்கு இடையே நம்பிக்கையையும் நட்புறவையும் கட்டி எழுப்பும் வகையிலான நல்லிணக்க அணுகுமுறையை இலங்கை அரசு அழுத்தமாகக் கடைப்பிடிக்கிறது என்று அமைச்சர் மஹிந்த சமரசிங்க ஜெனீவாவில் நேற்றுமுன்தினம் ஆற்றிய உரையை எதிர்த்துள்ள கூட்டமைப்பு, இலங்கையில் உள்ள தமிழ் மக்களின் அனுபவங்கள் அமைச்சரின் கூற்றுக்குச் சற்றும் பொருந்தாது என்றும் கூறி உள்ளது.
நாட்டின் நிலவரத்தை அனைத்துலக சமூகத்துக்குத் தெரியப்படுத்தும்போது அரசு மிக நேர்மையாகவும் பொய்யற்ற வகையிலும் நடந்துகொள்ள வேண்டும் என்று கூட்டமைப்பு நேற்று விடுத்த அறிக்கையில் வலியுறுத்தி உள்ளது.
தமிழ்த் தேசியக் கூட்டமைப்பின் தலைவர் இரா. சம்பந்தனின் கையெழுத்துடன் வெளியிடப்பட்ட இந்த அறிக்கை, போர் முடிந்ததன் பின்னர் இலங்கையில் தமிழர்கள் எப்படி மேலும் சிறுமைப்படுத்தப்படுகிறார்கள் என்ற விவரங்களை விலாவாரியாகச் சுட்டிக்காட்டுகிறது.
குறிப்பாக அரசுத் தலைவர் நியமித்த நல்லிணக்கத்துக்கான கற்றுக்கொண்ட பாடங்கள் ஆணைக்குழு, வழங்கிய இடைக்கால அறிக்கையில் கூறப்பட்டுள்ள பரிந்துரைகளைக்கூட இதுவரை அரசு நடைமுறைப்படுத்தவில்லை என்று கூட்டமைப்பு அறிக்கையில் குற்றஞ்சாட்டி உள்ளது.
தனது சொந்த ஆணைக்குழுவின் பரிந்துரைகளையே இலங்கை அரசு நடைமுறைப்படுத்தத் தவறி இருப்பதானது, பொறுப்புக்கூறுதல் மற்றும் நல்லிணக்கத்துக்காக நேர்மையான, நம்பகத்தன்மை வாய்ந்த, சுயாதீனம் வாய்ந்த பொறிமுறை ஒன்று ஏற்படுத்தப்படவேண்டியதன் அவசியத்தை வலியுறுத்தி நிற்பதாக கூட்டமைப்புக் கூறி உள்ளது.
அமைச்சர் மஹிந்த சமரசிங்க நல்லிணக்கம் பற்றி ஜெனீவாவில் உரையாற்றியபோதும், போரின் பின்னர் கூட தமிழ் மக்கள் மீது வன்முறைகள் ஏவப்பட்டுக்கொண்டே இருக்கின்றன என்று அறிக்கை சுட்டிக்காட்டுகிறது.
இடம்பெயர்ந்த 2 லட்சம் மக்களை அவர்களது சொந்த இடங்களில் மீளக்குடியமர அனுமதி மறுப்பது, விவசாய மற்றும் தனியார் நிலங்களை இராணுவமும் பெரும்பான்மை இனத்தைச் சேர்ந்தவர்களும் பலவந்தமாகப் பறிப்பது, எந்தப் பகிரங்க அறிவித்தல்களும் இன்றி வடக்கு கிழக்கில் உள்ள அரச நிலங்களை பெரும்பான்மையினருக்குப் பகிர்ந்தளிப்பது, இனப்பரம்பலில் மாற்றங்களை ஏற்படுத்தக்கூடிய வகையில் சிங்களக் குடியேற்றங்களை மேற்கொள்வது, இந்து கிறிஸ்தவ கலாசாரப் பாரம்பரியங்களை இழிவுபடுத்தி அவற்றை பெரும்பான்மையின அடையாளங்களுக்கு உரியதாக்குவது, எதிர்க் கட்சிகள் மீது நன்கு திட்டமிட்ட ரீதியல் வன்முறைகளைப் பயன்படுத்துவது, வடக்கு கிழக்கில் பொதுமக்களின் ஜனநாயக உரிமையான ஆர்ப்பாட்டங்கள் எதிர்ப்பு நடவடிக்கைகளை அரச படையினரைப் பயன்படுத்தி தடுப்பது, சிறுபான்மை இனங்களை ஒடுக்கும் ஓர் ஆயுதமாகப் பெண்கள் மீதான வன்முறைகளை மேற்கொள்வது போன்றவற்றை தமிழ் மக்கள் மீதான அண்மைக்கால வன்முறைகளாக அறிக்கை சுட்டிக்காட்டுகிறது.
இப்படிப்பட்ட நிலையில் சர்வதேச சமூகத்திடம், இனநல்லிணக்கத்துக்காக அரசு உழைத்து வருவதாகக் கூறுவது முழுப் பொய் எனக்கூறும் அறிக்கை, பல்லின, பல மத, பல்கலாசார இலங்கையைக் கட்டி எழுப்புவதற்கு தனக்குள்ள அர்ப்பணிப்பைக் கூட்டமைப்பு வெளிப்படுத்தும் வகையில் அரசியல் தீர்வு ஒன்றைக் காண்பதில் அரசுடன் பேசுவதே இதில் தமது பங்கு என்றும் கூட்டமைப்புக் கூறி உள்ளது.
********************

சர்வதேச நெருக்கடிக் குழு கண்டனம்
போர் நிறைவடைந்து இரண்டு வருடங்களாகியும் இலங்கையில் இன்னும் இனப்பிரச்சினைக்கு தீர்வுக்காணப்படாமை குறித்து சர்வதேச நெருக்கடிகளுக்கான குழு கண்டனம் வெளியிட்டுள்ளது.
போரின் பின்னர் இனங்களுக்கு இடையில் நல்லெணத்தை ஏற்படுத்தி சமாதானத்தை கொண்டு வரும் சந்தர்ப்பத்தை இலங்கை அரசாங்கம் இழந்து வருவதாக அந்தக்குழு நேற்று 13 ஆம் திகதி வெளியிட்ட தமது அறிக்கையில் குற்றம் சுமத்தியுள்ளது.
ஐக்கிய நாடுகளின் நிபுணர் குழு பரிந்துரைத்த, அரசியல் இணக்கம், அதிகாரப்பரவாலாக்கம், இராணுவ பரம்பலை கட்டுப்படுத்தல், அரச அதிகாரிகள் மீது இராணுவத்தினரின் ஆதிக்கத்தை குறைத்தல் போன்ற நடவடிக்கைகள் எதனையும் இலங்கை அரசாங்கம் மேற்கொள்ளவில்லை.
எனவே இலங்கையில் வன்முறைகள் மீண்டும் ஏற்படுவதற்கான சூழ்நிலை ஏற்பட்டு வருவதாக சர்வதேச நெருக்கடிகளுக்கான குழு தெரிவித்துள்ளது.
அவசரகால தடை சட்டம், பயங்கரவாத தடை சட்டம், இராணுவமயம், இடம்பெயர்ந்தோரை மீள்குடியமர்த்தல் , சிறுபான்மையினர் மத்தியில் அதிகாரப்பரவலாக்கம், முன்னாள் போராளிகளை சமூகத்துடன் இணைத்தல் போன்ற நடவடிக்கைகள் தொடர்பில் கேள்விகள் எழுந்துள்ளன.
அரசாங்கம் இவை தொடர்பில் சர்வதேசத்துக்கு ஒன்றை கூறுகிறது.
எனினும் களத்தில் மாறுபட்ட நடவடிக்கைகளே மேற்கொள்ளப்படுகின்றன.
எனவே உண்மை நிலைமையை உலகுக்கு எடுத்துக்காட்ட, காணாமல் போனோர் தொடர்பான விசாரணைகளை மேற்கொளளும் சர்வதேச குழுக்கள், சட்டவிரோத கொலைகள், பெண்கள் சிறுவர்கள் மீதான வன்முறைகளை தொடர்பில் விசாரணை செய்யும் ஐக்கிய நாடுகள் அதிகாரி, போன்றவர்களை நாட்டுக்குள் அனுமதிக்கவேண்டும் என்று சர்வதேச நெருக்கடிகளுக்கான குழு இலங்கை அரசாங்கத்தை வலியுறுத்தியுள்ளது.
********************

தமிழர் விவகாரம் தொடர்பில் ஜே.பிக்குள் கருத்து முரண்பாடு
தமிழர் பிரச்சினைக்குத் தீர்வு காண்பது தொடர்பாக மக்கள் விடுதலை முன்னணிக்குள் ஏற்பட்டிருந்த கருத்து முரண்பாடு தற்போது உச்சக்கட்டத்தை அடைந்துள்ளது என்று கட்சி வட்டாரங்கள் நேற்றுத் தெரிவித்தன.
கட்சிக்குள் ஏற்பட்டுள்ள இந்தப் பிரச்சினைக்குத் தீர்வுகாணும் பொருட்டு விரைவில் இரகசியப் பேச்சுகள் கட்சி உறுப்பினர்கள் மட்டத்தில் நடத்தப்படவுள்ளன என்று மக்கள் விடுதலை முன்னணியின் முக்கியஸ்தர் ஒருவர் தெரிவித்தார்.
தமிழ் மக்களின் மீள்குடியேற்றம், கண்ணிவெடி அகற்றல், தமிழ் அரசியல் கைதிகள் மற்றும் கிறீஸ் மனிதன் விவகாரம் உள்ளிட்ட தமிழர் விடயங்களை முன்னிலைப்படுத்திவரும் மக்கள் விடுதலை முன்னணி, நாடாளுமன்றம் வரை குரல் எழுப்பியது.
தமிழ் மக்களின் பிரச்சினைகளை முன்நிறுத்தி கொழும்பு உட்படப் பல்வேறு பகுதிகளில் ஆர்ப்பாட்டங்களையும் மக்கள் விடுதலை முன்னணி கடந்த காலங்களில் மேற்கொண்டிருந்தது.
அண்மையில் நடந்து முடிந்த உள்ளூராட்சிசபைத் தேர்தலில் வடக்குப் பகுதியிலும் மக்கள் விடுதலை முன்னணி போட்டியிட்டமை குறிப்பிடத்தக்கது. இருந்தும் கட்சி தோல்வியையே சந்தித்தது.
இந்த நிலையில், தமிழ் மக்களின் விவகாரத்தில் அதிக அக்கறை செலுத்தவேண்டாம் என்று மக்கள் விடுதலை முன்னணியின் சில உறுப்பினர்கள் தெரிவித்து வருகின்றனர்.
இதற்கு உள்ளூராட்சி சபைத் தேர்தலில் வடக்கில் ஏற்பட்ட தோல்வியை அந்த உறுப்பினர்கள் உதாரணமாக முன்வைத்துள்ளனர்.
இதேவேளை, தமிழ் மக்களின் பிரச்சினைகள் தொடர்பாக மக்கள் விடுதலை முன்னணியும் குரல் கொடுக்க வேண்டும் என்ற நிலைப்பாட்டில் கட்சியின் சில உறுப்பினர்கள் உள்ளனர்.
இந்த நிலையிலேயே மக்கள் விடுதலை முன்னணிக்குள் கருத்து முரண்பாடு ஏற்பட்டுள்ளமை வெளிவந்திருக்கிறது.
********************

இந்தியா மௌம்
சிறிலங்காவில் இடம்பெற்ற போர்க்குற்றங்கள் தொடர்பான ஐ.நா நிபுணர்குழுவின் அறிக்கை ஐ.நா மனிதஉரிமைகள் பேரவையிடம் சமர்ப்பிக்கப்பட்டுள்ள நிலையில், இந்தியா கருத்து ஏதும் தெரிவிக்காமல் மௌனம் சாதித்து வருகிறது.
சிறிலங்காவில் இடம்பெற்ற போர்க்குற்றங்கள் தொடர்பாக ஆராய நியமிக்கப்பட்ட நிபுணர்குழுவின் அறிக்கையை ஐ.நா பொதுச்செயலர் பான் கீ மூன் நேற்றுமுன்தினம் ஐ.நா மனிதஉரிமைகள் ஆணையாளருக்கும், ஐ.நா மனித உரிமைகள் பேரவையின் தலைவருக்கும் அனுப்பி வைத்திருந்தார்.
இந்த விவகாரம் ஐ.நா மனிதஉரிமைகள் பேரவையில் விவாதத்துக்கு எடுத்துக் கொள்ளப்படும் என்று எதிர்பார்க்கப்படும் நிலையில், ஜெனிவாவிலோ அல்லது புதுடெல்லியிலோ இந்தியா எந்தக் கருத்தையும் வெளியிடவில்லை.
சிறிலங்காவில் இடம்பெற்ற மனிதஉரிமை மீறல்கள் குறித்த இந்தியாவின் நிலைப்பாடு ஐ.நாவில் விவாதத்துக்கு வரும் போது வெளியிடப்படும் என்று இந்திய வெளிவிவகார அமைச்சர் எஸ்.எம்.கிருஸ்ணா அண்மையில் கூறியிருந்தார் என்பது குறிப்பிடத்தக்கது.
ஐ.நாவின் தற்போதைய நகர்வுகள் சிறிலங்காவுக்குப் பாதகமாக இருக்கின்ற நிலையில்- இந்தியா மௌளனமாக இருப்பது சிறிலங்காவுக்கு கலக்கத்தை ஏற்படுத்தியுள்ளதாகவும் தகவல்கள் தெரிவிக்கின்றன.
அதேவேளை நிபுணர்குழு அறிக்கையை சிறிலங்காவுக்கு எதிராகப் பயன்படுத்த ஐ.நா மனிதஉரிமைகள் ஆணையாளர் நவநீதம்பிள்ளை முயன்றால் அதனை எதிர்ப்பதற்கான அணியொன்றை சிறிலங்கா உருவாக்கியுள்ளதாக கொழும்பு ஊடகம் ஒன்று தகவல் வெளியிட்டுள்ளது.
சீனா, ரஸ்யா, மாலைதீவு, மலேசியா, பிலிப்பைன்ஸ், பாகிஸ்தான் போன்ற நாடுகளும் 57 மத்திய கிழக்கு நாடுகளும் சிறிலங்காவுக்கு வெளிப்படையான ஆதரவைத் தெரிவித்துள்ளதாகவும் அந்த ஊடகம் மேலும் கூறியுள்ளது.
********************

ஸ்ரீலங்காவின் மன்றாட்டம்
சிறிலங்கா விவகாரத்தில் பாரபட்சமில்லாத கொள்கையைக் கடைப்பிடிக்குமாறு ஐ.நா மனிதஉரிமைகள் ஆணையாளர் நவநீதம்பிள்ளையை சந்தித்து சிறிலங்கா அரசின் பிரதிநிதிகள் குழு மன்றாடியுள்ளது.
ஜெனிவாவில் நேற்று முன்தினம் ஆரம்பமான ஐ.நா மனிதஉரிமைகள் பேரவைக் கூட்டத்தொடரில் ஐ.நா மனிதஉரிமைகள் ஆணையாளர் நவநீதம்பிள்ளையை கடுமையாகச் சாடிய சிறிலங்கா அரசின் அமைச்சர் மகிந்த சமரசிங்க, அவருடன் சூடான வாக்குவாதத்திலும் ஈடுபட்டிருந்தார்.
இந்தநிலையில் ஐ.நா பொதுச்செயலர் பான் கீ மூன், நிபுணர் குழு அறிக்கையை ஐ.நா மனித உரிமைகள் பேரவைக்கு அனுப்பி வைத்துள்ள நிலையில், சிறிலங்காவுக்கு எதிரான ஆயுதம் இப்போது நவநீதம்பிள்ளையின் கைக்கு மாறியுள்ளது.
இதையடுத்து ஜெனிவா கூட்டத்தொடருக்காக சிறிலங்கா அரசினால் அனுப்பி வைக்கப்பட்ட உயர்நிலைக்குழு நேற்று நவநீதம்பிள்ளை சந்தித்து அவரை சமாதானப்படுத்தும் முயற்சியில் ஈடுபட்டிருந்தது.
சிறிலங்காவுக்கு எதிராக செயற்பட வேண்டாம் என்றும் ஏனைய நாடுகளைப் போன்றே தம்மையும் சமமாக நடத்துமாறும் சிறிலங்கா அமைச்சர் மகிந்த சமரசிங்க இந்தச் சந்திப்பின் போது நவநீதம்பிள்ளையிடம் கேட்டுக் கொண்டுள்ளார்.
இந்தச் சந்திப்பின் போது நிபுணர்குழு அறிக்கையை பான் கீ மூன் ஐ.நா மனிதஉரிமைகள் பேரவைக்கு அனுப்பி வைத்தது குறித்தும், அந்த விவகாரத்தை தாம் மூன்றாவது தரப்பின் ஊடாகவே அறிய நேரிட்டது குறித்தும் மகிந்த சமரசிங்க கவலை வெளியிட்டுள்ளார்.
சிறிலங்கா அமைச்சர்கள் அனுர பிரியதர்சன யாப்பா, நிமால் சிறிபால டி சில்வா மற்றும் ஜெனிவாவுக்கான சிறிலங்காவின் தூதுவர் தாமரா குணநாயகம் ஆகியோரும் இந்தச் சந்திப்பில் கலந்து கொண்டுள்ளனர்.
********************

மன்னாரில் பேரணி
இலங்கையின் வடக்கே மன்னார் மாவட்டம் முள்ளிக்குளம் கிராமத்தில் இருந்து இடம்பெயர்ந்துள்ள மக்கள் தங்களை அங்கு மீள்குடியேற்றம் செய்ய வேண்டும் எனக்கோரி நேற்றைய தினம் மன்னாரில் பேரணி ஒன்றை நடத்தியிருக்கின்றார்கள்.
மன்னார் ஆயர் உள்ளிட்ட மதத் தலைவர்கள் ஊர் முக்கியஸ்தர்கள், ஊர் மக்கள் என பலதரப்பட்டவர்கள் இதில் கலந்து கொண்டார்கள்.
இந்தப் பேரணி, மன்னார் புனித செபஸ்தியார் ஆலயத்தில் ஆரம்பித்து மன்னார் அரச செயலகத்துக்கு சென்று, அரசுத் தலைவருக்கு எழுதப்பட்ட மகஜர் ஒன்றை அரச அதிபரிடம் கையளித்ததுடன் முடிவடைந்தது.
முள்ளிக்குளம் கிராமத்தைச் சேர்ந்த 300 குடும்பத்தினர் கடந்த பல வருடங்களாக இடம்பெயர்ந்த நிலையில் மன்னார் மாவட்டத்தின் பல இடங்களிலும் மிகுந்த இடர்பாடுகளுக்கு இடையே வாழ்ந்து வருகின்றனர்.
தொழில்வாய்ப்புக்களோ அல்லது அடிப்படை வசதிகளோ அற்ற நிலையில் தற்காலிக உறைவிடங்களிலேயே இவர்கள் தங்கியிருக்கின்றார்கள்.
********************

மீளப் பெறப்படும் தூதுவர்
மனிதஉரிமை மீறல் குற்றச்சாட்டுகளை அடுத்து சுவிற்சர்லாந்து, ஜேர்மனி, வத்திக்கான் ஆகிய நாடுகளுக்கான சிறிலங்காவின் பிரதி தூதுவர் மேஜர் ஜெனரல் ஜெகத் டயஸ், சிறிலங்கா அரசினால் திருப்பி அழைக்கப்பட்டுள்ளார் என்று சுவிஸ் செய்தி நிறுவனம் ஒன்று தகவல் வெளியிட்டுள்ளது.
விடுதலைப் புலிகளுக்கு எதிரான போரில் 57வது டிவிசனின் தளபதியாக இருந்த மேஜர் ஜெனரல் ஜெகத் டயஸ், பொதுமக்கள் மீதும், மருத்துவமனைகள் மீதும் தாக்குதல் நடத்துமாறு உத்தரவிட்டிருந்தார் என்று குற்றம்சாட்டப்பட்டுள்ளார்.
அத்துடன் இவர் போராளிகள் மீதான சித்திரவதை, நீதிக்குப் புறம்பான படுகொலைகளிலும் தொடர்புபட்டிருந்ததாக, அரசியலமைப்பு மற்றும் மனிதஉரிமைகளுக்கான ஐரோப்பிய நிலையத்தின் அறிக்கை ஒன்றிலும் குற்றம்சாட்டப்பட்டுள்ளார்.
இந்தவிவவாரம் தொடர்பாக சுவிற்சர்லாந்து வெளிவிவகார அமைச்சு சிறிலங்கா அதிகாரிகளுடன் கடந்தமாதம் தொடர்பு கொண்டு ஆழ்ந்த வருத்தத்தை தெரிவித்திருந்தது.
இந்தநிலையிலேயே மேஜர் ஜெனரல் ஜெகத் டயஸ் சிறிலங்கா அரசினால் பெர்லினில் இருந்து திருப்பி அழைக்கப்பட்டுள்ளதாக இராஜதந்திர வட்டாரங்கள் தெரிவித்ததாக சுவிஸ் செய்தி நிறுவனம் கூறியுள்ளது.
அதேவேளை, மேஜர் ஜெனரல் ஜெகத் டயஸ் திருப்பி அழைக்கப்பட்டுள்ளதாக சுவிஸ் செய்தி நிறுவனம் வெளியிட்டுள்ள தகவலை சிறிலங்கா வெளிவிவகார அமைச்சு அதிகாரி ஒருவர் நிராகரித்துள்ளதாக ஏசியன் ரிபியூன் இணையத்தளம் செய்தி வெளியிட்டுள்ளது.
சிறிலங்கா வெளிவிவகார அமைச்சின் மூத்த அதிகாரி ஒருவருடன் தொடர்பு கொண்டு வினவிய போதே இந்தச் செய்தி பொய்யானது என்று அவர் கூறியதாக ஏசியன் ரிபியூன் செயதி வெளியிட்டுள்ளது.
இராஜதந்திர சேவையில் இல்லாத இராஜதந்திரிகளுக்கு இரண்டு ஆண்டுகளே வெளிநாடுகளில் சேவையாற்ற வாய்ப்பளிக்கபடும் என்றும், மேஜர் ஜெனரல் ஜெகத் டயசின் இரண்டு ஆண்டு பதவிக்காலம் இந்த மாதத்துடன் நிறைவடைந்த பின்னர் இராணுவ சேவையில் இணைந்து கொள்வார் என்றும் ஏசியன் ரிபியூன் தகவல் வெளியிட்டுள்ளது.
இராஜதந்திர சேவையில் இல்லாத இராஜதந்திரிகள் இரண்டு ஆண்டுகளின் பின்னர் மேலும் ஒரு ஆண்டு சிறிலங்கா அதிபரின் ஆணையில் சேவை நீடிப்பைப் பெற முடியும்.
ஆனால் மனிதஉரிமை மீறல் குற்றச்சாட்டுகளால், மேஜர் ஜெனரல் ஜெகத் டயஸ் நெருக்கடிகளை எதிர்கொள்ளலாம் என்பதாலேயே அவருக்கு சிறிலங்கா அதிபர் சேவை நீடிப்பு வழங்கவில்லை என்றும், இராணுவ சேவைக்கு அவரைத் திருப்பியழைக்க முடிவு செய்யப்பட்டதாகவும் சிறிலங்கா அரசாங்க வட்டாரங்கள் தகவல் வெளியிட்டுள்ளன.
********************

Tuesday, 13 September 2011

செய்திகள் 13/09


அறிக்கை அனுப்பி வைப்பு!
சிறிலங்காவில் இடம்பெற்ற போர்க்குற்றங்கள் குறித்த ஐ.நா நிபுணர்குழுவின் அறிக்கையை ஐ.நா மனிதஉரிமைகள் பேரவைக்கு அனுப்பி வைத்துள்ளதாக பான் கீ மூன் அறிவித்துள்ளார்.
நியுயோர்க்கில் ஐ.நா பொதுச்செயலரின் பேச்சாளர் மார்ட்டின் நெர்ஸ்க்கி இந்தத் தகவலை செய்தியாளர்களிடம் வெளியிடுள்ளார்.
ஐ.நா மனிதஉரிமைகள் பேரவைக்கு நிபுணர்குழுவின் அறிக்கையை அனுப்பவுள்ளது குறித்து நேற்று சிறிலங்கா அரசுக்கு முறைப்படியாக அறிவிக்கப்பட்டுள்ளதாகவும் அவர் மேலும் கூறியுள்ளார்.
ஐ.நா பொதுச்செயலர் பான் கீ மூன் இந்த அறிக்கையை இன்று தமக்கு அனுப்பி வைப்பார் என்று எதிர்பார்ப்பதாக ஐ.நா மனிதஉரிமைகள் ஆணையாளர் நவநீதம்பிள்ளை நேற்று ஏபி செய்தி நிறுவனத்திடம் கூறியுள்ளார்.
இதனால் சிறிலங்கா விவகாரம் ஐ.நா மனிதஉரிமைகள் பேரவையில் மீண்டும் விவாதிக்கப்படும் என்று நம்புவதாகவும் அவர் மேலும் தகவல் வெளியிட்டுள்ளார்.
இந்த நகர்வு சிறிலங்காவை அனைத்துலக விசாரணைகளுக்குக் கொண்டு செல்லக் கூடும் என்று வொய்ஸ் ஒவ் அமெரிக்கா தகவல் வெளியிட்டுள்ளது.
இந்த அறிக்கையில் போரின் இறுதிக்கட்டத்தில் ஆயிரக்கணக்கான மக்கள் கொல்லப்பட்டதாகவும் போர்க்குற்றங்கள் இடம்பெற்றதற்கான நம்பகமான சாட்சியங்கள் இருப்பதாகவும் ஐ.நா நிபுணர்குழு கூறியிருந்ததுடன், இதுபற்றி விசாரிக்க அனைத்துலக விசாரணைப் பொறிமுறை ஒன்றை ஏற்படுத்த வேண்டும் என்றும் கூறியிருந்தது.
இந்த அறிக்கையை ஐ.நா மனிதஉரிமைகள் பேரவையில் விவாதிக்க இணங்கிய பின்னரே ஐ.நா பொதுச்செயலரால் விசாரணை ஒன்றுக்கு ஆணை வழங்க முடியும் என்றும் வொய்ஸ் ஒவ் அமெரிககா தகவல் வெளியிட்டுள்ளது.
*******************

மூன்றாம் தரப்பு மூலம் தெரிந்து கொண்ட ஸ்ரீலங்கா!
ஐ.நா நிபுணர்குழுவின் அறிக்கையை பான் கீ மூன் ஐ.நா மனிதஉரிமைகள் பேரவையிடம் சமர்ப்பிக்க தீர்மானித்துள்ளது பற்றி சிறிலங்கா அரசு மூன்றாவது தரப்பின் ஊடாகவே அறிந்து கொண்டதாக ஜெனிவா தகவல்கள் தெரிவிக்கின்றன.
கடந்த 9ம் நாள் ஜெனிவாவில் சிறிலங்கா பிரதிநிதிகள் குழு, மனிதஉரிமைகள் பேரவையில் அங்கம் வகிக்கும் 29 நாடுகளின் பிரதிநிதிகளை சந்தித்தது.
அந்தச் சந்திப்பின் போதே, நிபுணர் குழு அறிக்கையை பான் கீ மூன் ஐ.நா மனிதஉரிமைகள் பேரவையில் சமர்ப்பிக்க தீர்மானித்துள்ளதாக, நவநீதம்பிள்ளை தமக்குத் தெரியப்படுத்தியதாக சில நாடுகளின் பிரதிநிதிகள் கூறியுள்ளனர்.
இது சிறிலங்கா தரப்புக் குழுவுக்குப் பெரும் அதிர்ச்சியை ஏற்படுத்தியுள்ளது.
இந்த நிலையிலேயே, நேற்றைய கூட்டத்தொடரில் உரையாற்றிய மகிந்த சமரசிங்க, பான் கீ மூன் அறிக்கையை மனிதஉரிமைகள் பேரவைக்கு அனுப்புவது பற்றிய தகவலை தாம் மூன்றாவது தரப்பின் ஊடாகவே அறிந்து கொண்டதாகவும், இது நவநீதம்பிள்ளையின் நம்பகத்தன்மையை கேள்விக்குள்ளாக்குவதாகவும் கூறி அவருடன் வாக்குவாதத்தில் ஈடுபட்டிருந்தார்.
அத்துடன் அவர், இன்று சிறிலங்காவுக்கு நடந்தது நாளை உங்களுக்கும் நடக்கலாம் என்று அனைத்துலக சமூகத்தையும் எச்சரித்துள்ளார்.
சிறிலங்கா குழுவினர் ஜெனிவா சென்றடைந்த பின்னரே ஐ.நா நிபுணர்குழு அறிக்கையை பான் கீ மூன் ஐ.நா மனிதஉரிமைகள் பேரவையிடம் சமர்ப்பிக்கவுள்ள விபரம் தெரியவந்துள்ளது.
இது சிறிலங்கா தரப்புக்குப் பெரும் அதிர்ச்சியாக அமைந்ததாகவும், அதன் காரணமாகவே மகிந்த சமரசிங்க, நவநீதம்பிள்ளையுடன் சூடான வாக்குவாதத்தில் ஈடுபட்டதாகவும் தகவல்கள் தெரிவிக்கின்றன.
*******************

ஆதரவு தேடும் ஸ்ரீலங்கா!
ஐ.நா மனிதஉரிமைகள் பேரவையில் நிபுணர்குழு அறிக்கை தொடர்பாக விவாதிக்கப்பட்டால், தமக்கு ஆதரவாக சீனாவும், பாகிஸ்தானும் துணை நிற்பதாக ஜெனிவா சென்றுள்ள சிறிலங்கா அரசின் பிரதிநிதிகள் குழுவின் தலைவரான அமைச்சர் மகிந்த சமரசிங்க தெரிவித்துள்ளார்.
கொழும்பு ஊடகம் ஒன்றுக்கு தொலைபேசி மூலம் வழங்கிய செவ்வி ஒன்றிலேயே அவர் இவ்வாறு கூறியதாக, இந்திய ஊடகம் ஒன்று தகவல் வெளியிட்டுள்ளது.
சிறிலங்காவுக்காக 54 இஸ்லாமிய நாடுகளின் ஆதரவை பாகிஸ்தான் கோரியுள்ளதாகவும், சீனா தமக்கு பலமான ஆதரவை வழங்குவதாகவும் மகிந்த சமரசிங்க கூறியுள்ளார்.
தமக்கு ஆதரவாக மாலைதீவு அதிபரும் ஜெனிவா வந்துள்ளதாகவும் அவர் கூறியுள்ளதாக இந்திய ஊடகம் தகவல் வெளியிட்டுள்ளது.
அதேவேளை, முன்னதாக தமக்கு ரஸ்யாவும் ஆதரவு வழங்கி வருவதாகவும், ஐ.நாவில் எத்தகைய தீர்மானம் கொண்டு வரப்பட்டாலும் அதனை முறியடிக்க ரஸ்யா உதவும் என்றும் சிறிலங்கா அரசாங்கம் கூறிவந்தது.
ஆனால் இந்தச் செவ்வியில் ரஸ்யாவின் ஆதரவு பற்றி மகிந்த சமரசிங்க தகவல் எதையும் வெளியிடவில்லை.
சீனா, பாகிஸ்தான் நாடுகள் ஆதரவாக இருப்பது பற்றியே கூறியுள்ளார்.
இதனால் ரஸ்யாவின் ஆதரவை சிறிலங்கா இழந்து விட்டதா என்ற சந்தேகங்கள் எழுந்துள்ளன.
*******************

எண்ணிப் பார்க்கும் பீரிஸ்?
47 உறுப்பினர்களைக் கொண்ட ஐக்கிய நாடுகள் மனித உரிமைகள் சபையில் 39 நாடுகள் இலங்கைக்கு ஆதரவாக இருக்கின்றன என்று ஜெனீவாவில் இருக்கும் வெளிவிவகார அமைச்சர் ஜி.எல்.பீரிஸ் தெரிவித்தார்.
சபையின் 18ஆவது கூட்டத் தொடர் நேற்று ஆரம்பமாவதற்கு முன்னதாகக் கடந்த வெள்ளிக்கிழமை தாம் நடத்திய சந்திப்புக்களில் மிகச் சாதகமான மறுமொழி தமக்குக் கிடைத்ததாக அவர் கூறினார்.
மதிய வேளையில் 29 நாடுகளினதும் மாலையில் 10 நாடுகளினதும் பிரதிநிதிகளை தாம் வெள்ளியன்று சந்தித்துப் பேசியதாகவும், இதற்கான விசேட நிகழ்வு இலங்கை அரசால் ஏற்பாடு செய்யப்பட்டது எனவும் தெரிவித்துள்ளார்.
மத்திய கிழக்கு, லத்தீன் அமெரிக்கா, ஆபிரிக்கா ஆகிய பகுதிகளில் உள்ள நாடுகள் தமக்குச் சாதமாகப் பதிலளித்துள்ளன என்றும் அமைச்சர் பீரிஸ் தெரிவித்துள்ளார்.
போர் முடிந்த குறுகிய காலத்துக்குள் இலங்கை அடைந்துள்ள இலக்குகளை அறிவதில் அந்தப் பிரதிநிதிகள் மிக ஆர்வமாக இருந்தார்கள் என்றும் அவர் கூறினார்.
ஐ.நா. கூட்டத் தொடர்களில் எந்த விடயம் விவாதிக்கப்பட முடியும் எத்தகைய ஆவணங்கள் சமர்ப்பிக்கப்பட முடியும் என்பன தொடர்பில் மிகக் கடுமையான சட்ட திட்டங்கள் உள்ளன.
அப்படிப்பட்ட நிலையில் ஐ.நாவின் செயல்பாடுகளில் எத்தகைய குறைகளும் ஏற்படாமல் விழிப்பாக இருங்கள் என்று அந்த நிகழ்வுகளில் உரையாற்றிய அமைச்சர் மஹிந்த சமரசிங்க கேட்டுக் கொண்டார் எனவும் அமைச்சர் பீரிஸ் கூறினார்.
2012ஆம் ஆண்டு நடைபெறவுள்ள 19ஆவது கூட்டத் தொடர் வரைக்கும் இலங்கைக்குக் கால அவகாசம் கொடுக்கப்பட வேண்டும் என்றும் மனித உரிமைகள் சபை உறுப்பு நாடுகளிடம் கேட்கப்பட்டுள்ளது என்றும் அமைச்சர் தெரிவித்துள்ளார்.
*******************

ரொபேர்ட் ஓ பிளேக் யாழிற்கு
இலங்கைக்கு உத்தியோகபூர்வ விஜயம் ஒன்றை மேற்கொண்டுள்ள தெற்கு மற்றும் மத்திய ஆசிய விவகாரங்களுக்கான அமெரிக்க பிரதி இராஜாங்க செயலாளர் ரொபர்ட் பிளேக் இன்று யாழ்ப்பாணத்திற்கு செல்லவுள்ளார்.
அங்கு அவர் பல்வேறு தரப்பினரையும் சந்தித்துக் கலந்துரையாடவுள்ளார்.
மீள்குடியேற்றப்பட்ட பிரதேசங்களுக்கும் சென்று அங்குள்ள மக்களின் பிரச்சினைகளை அவர் நேடியாகக் கேட்டறிந்து கொள்ளவுள்ளார் எனவும் தெரிய வருகிறது.
எதிர்வரும் 14 ஆம் திகதி வரை அவர் இலங்கையில் தங்கியிருப்பார் என வெளிவிவகார அமைச்சின் மக்கள் உறவுகள் மற்றும் தொடர்பாடல் பிரிவு பணிப்பாளர் நாயகம் சரத் திசாநாயக்க தெரிவித்துள்ளார்.
*******************

கொள்ளையடித்த சவேந்திர டி சில்வா!
ஐக்கிய நாடுகளின் இலங்கைக்கான பிரதி விதிவிடப் பிரதிநிதி மேஜர் ஜெனரல் சாவேந்திரா சில்வாவின் நடவடிக்கைகளை கண்காணிப்பதற்கு பாதுகாப்பு அமைச்சைச் சேர்ந்த விசேட புலனாய்வு அதிகாரிகள் அமெரிக்கா சென்றுள்ளதாக சிங்கள இணைய ஊடகமொன்று செய்தி வெளியிட்டுள்ளது.
பாதுகாப்பு அமைச்சின் மூன்று புலனாய்வு அதிகாரிகள் இவ்வாறு அமெரிக்கா சென்றுள்ளனர்.
அதில் இருவர் அரசுத் தலைவரின் நெருங்கிய குடும்ப உறுப்பினர்களின் பாதுகாப்பு தொடர்பான கண்காணிப்பு நடவடிக்கைகளை மேற்கொள்வார்.
மற்றைய அதிகாரி, சாவேந்திரா சில்வாவின் நடவடிக்கைகள் குறித்து கண்காணித்து அறிக்கை சமர்ப்பிப்பார் என அந்த இணைய ஊடகத்தில் குறிப்பிடப்பட்டுள்ளது.
போர் இடம்பெற்றக் காலத்தில் புலிகளிடமிருந்து மீட்கப்பட்ட பெருந்தொகையான தங்க ஆபரணங்களை சவேந்திரா சில்வா பதுக்கி வைத்து, தற்போது அவற்றை பணமாக மாற்றிக் கொண்டுள்ளார்.
இதன் காரணமாக அரசாங்கத்தின் உயர்மட்டத்தினருக்கும் சவேந்திராவிற்கும் இடையில் முறுகல் நிலை ஏற்பட்டுள்ளது என தெரிவிக்கப்பட்டுள்ளது.
அமெரிக்காவில் பாரியளவில் முதலீடுகளை மேற்கொள்வதற்கு சவேந்திரா சில்வா முயற்சி செய்து வருவதாகவும் அந்த இணைய ஊடகத்தில் சுட்டிக்காட்டப்பட்டுள்ளது.
*******************

அமெரிக்காவுக்கு விளக்கமளிக்கும் ஸ்ரீலங்கா
இலங்கையில் இடம்பெற்ற இறுதிப் போரின்போது நடந்தவை குறித்தும் போரின் பின்னரான நடவடிக்கைகள் குறித்தும் அமெரிக்க காங்கிரஸ் உறுப்பினர்களுக்கு விளக்கமளிக்கப்பட்டுள்ளது.
பிரிட்டனைத் தளமாகக் கொண்ட சனல்4 தொலைக்காட்சி, வெளியிட்ட ஸ்ரீலங்காவின் கொலைக்களம் என்ற ஆவணப் படத்துக்குப் பதிலாக இலங்கைப் பாதுகாப்பு அமைச்சு தயாரித்த வீடியோவும் அமெரிக்க நாடாளுமன்ற உறுப்பினர்களுக்கு காண்பிக்கப்பட்டது.
வொஷிங்ரனில் உள்ள அமெரிக்காவுக்கான இலங்கைத் தூதுவர் சாலிய விக்கிரம சூரியவினால் இந்தச் சந்திப்புக்கான ஏற்பாடுகள் மேற்கொள்ளப்பட்டிருந்தன.
போருக்குப் பின்னர் இலங்கை அரசு மேற்கொள்ளும் நடவடிக்கைகள் குறித்தும் அமெரிக்க நாடாளுமன்ற உறுப்பினர்களுக்கு சாலிய விக்கிரமசூரிய விளக்கினார்.
அப்போது அரசுத் தலைவர் மஹிந்த ராஜபக்ஷ நியமித்த நல்லிணத்துக்காக கற்றுக் கொண்ட பாடங்கள் ஆணைக்குழுவின் அறிக்கை எதிர்வரும் நவம்பர் மாதம் நிச்சயமாக வெளியிடப்படும் எனத் தெரிவித்தார்.
*******************


குடும்ப சொகுசுக்கு உலங்குவானூர்தி
அரசுத் தலைவர் மஹிந்த ராஜபக்ஷவின் குடும்ப உறுப்பினர்கள் மற்றும் அவருக்கு மிக நெருக்கமானவர்களின் போக்குவரத்துத் தேவைகளுக்காகவே ரஷ்யாவிடமிருந்து 14 ஹெலிகள் வாங்குவதற்குத் தீர்மானிக்கப்பட்டுள்ளது என்று அரச வட்டாரங்கள் தகவல் தெரிவிக்கின்றன.
ரஷ்யநாட்டு கடனுதவியின் கீழ் கொள்வனவு செய்யப்படவுள்ள ஹெலிகளின் பெறுமதி 135 கோடி ரூபாவாகும்.
அதற்கமைய அரசு ரஷ்யாவிடமிருந்து கடனுக்கு வாங்கவுள்ள 14 ஹெலிகளுக்கும் 1895 கோடி ரூபாவைச் செலுத்த வேண்டியுள்ளது.
அரசு வாங்கவுள்ள இந்த ஹெலிகள் பிரபுக்களின் பயன்பாட்டுக்காகவே தயாரிக்கப்பட்டுள்ளன.
விசேட இலங்கை விமானப்படை மற்றும் ரஷ்யாவிலுள்ள ரொசொ பொரொன் எக்ஸ்போர்ட் நிறுவனத்துக்குமிடையே இந்த ஹெலிகளின் கொடுக்கல் வாங்கல்கள் மேற்கொள்ளப்படவுள்ளன.
அவற்றைத் தருவிப்பது தொடர்பாக அரசும் விமானப்படையும் ஒன்றுக்கொன்று முரணான தகவல்களையே தெரிவிக்கின்றன.
இந்த ஹெலிகள் இலங்கையின் கடல் வலயத்தைப் பாதுகாக்கும் செயற்பாடுகள் தொடர்பாகவே தருவிக்கப்படுவதாக ஊடகத்துறை அமைச்சர் கெஹலிய ரம்புக்வெல தெரிவித்துள்ளார்.
ஆனால் விமானப்படைத்தளபதி எயார் வைஸ்மாஷல் ஹர்ஸ அபேகுணவர்த்தனவின் கூற்றுக்கு அமைய, இந்த ஹெலிகள் சிவில் விமானப்போக்குவரத்துச் செயற்பாடுகளை விரிவுபடுத்தவே தருவிக்கப்படுகின்றன என்று தெரிவிக்கப்படுகின்றது.
இந்த உலங்குவானூர்தியொன்றில் ஒரு தடவை ஒன்பது பயணிகள் மட்டுமே பயணிக்கும் வசதிகளைக் கொண்டுள்ளது.
இரண்டு ஹெலிகளை முன்பு தருவிப்பதற்கு அரசு நடவடிக்கைகளை மேற்கொண்டதோடு அதுதொடர்பாக 231 கோடி ரூபாய்கள் செலவு ஏற்படும் என்று லங்கா செய்திப்பத்திரிகை தகவல் வெளியிட்டிருந்தமை குறிப்பிடத்தக்கது.
*******************

ஐதேகவுடன் கூட்டுச் சேர முடியாது - ஜே.வி.பி
ஐக்கிய தேசியக் கட்சியுடன் கூட்டு இணைந்து அரசாங்கத்தை கவிழ்க்கும் முயற்சிகளில் ஈடுபடப் போவதில்லை என ஜே.வி.பி.யின் பிரச்சாரச் செயலாளர் விஜித ஹேரத் தெரிவித்துள்ளார்.
ஐக்கிய தேசியக் கட்சியும், ஜே.வி.பி.யும் இணைந்து செயற்பட உள்ளதாக வெளியான செய்திகளில் எதுவித உண்மையும் கிடையாது.
வெளிநாடுகளுக்கு அடிபணிந்து, கொள்ளையிடும் பொருளாதார முறைமையை ஐக்கிய தேசியக் கட்சியே நாட்டுக்கு அறிமுகம் செய்தது.
ஐக்கிய தேசியக் கட்சியின் ஆட்சிக் காலத்தில் பாரியளவில் ஊழல் மோசடிகள் இடம்பெற்றதாகக் குற்றம் சுமத்தியுள்ளார்.
அவ்வாறான ஓர் கட்சியுடன் இணைந்து நாட்டை நல்லவழிப்படுத்தும் முயற்சிகளை மேற்கொள்ள முடியாது.
மாற்று சமூகப் பொருளாதார முறைமையுடைய ஓர் ஆட்சியே தற்போது நாட்டுக்கு தேவைப்படுவதாக அவர் குறிப்பிட்டுள்ளார்.
*******************

லஞ்சம் கோரும் காவல்துறை
குற்ற விசாரணைப் பிரிவின் உயரதிகாரி அனுர டி சில்வா லஞ்சம் கோரியதாக பெண் ஒருவர் நீதிமன்றில் முறைப்பாடு செய்துள்ளார்.
முன்னாள் இராணுவத் தளபதி சரத் பொன்சேகாவின் வெள்ளைக் கொடி வழக்கு தொடர்பான விசாரணைகளை காவல்துறைப் பரிசோதகர் அனுர டி சில்வா மேற்கொண்டு வருகின்றமை குறிப்பிடத்தக்கது.
காணி பிணக்கு ஒன்றைத் தீர்ப்பதாகத் தெரிவித்து, குறித்த காவல்துறை உத்தியோகத்தர் ஒரு பகுதி காணியை லஞ்சமாக கோரியதாக குறித்த பெண் முறைப்பாடு செய்துள்ளார்.
காவல்துறையினரிடம் முறைப்பாடு செய்யாது நேரடியாக அவர் நீதிமன்றில் இந்த முறைப்பாட்டை செய்துள்ளார்.
சட்டத்தரணி ஒருவரின் ஊடாக சத்தியக்கடதாசி ஒன்றை சமர்ப்பித்து இந்த முறைப்பாடு செய்யப்பட்டுள்ளது.
அதிகாரத்தைப் பிரயோகம் செய்து தம்மீது போலிக் குற்றச்சாட்டு சுமத்துவதாக குறித்த உயரதிகாரி தம்மை அச்சுறுத்தியதாக முறைப்பாடு செய்துள்ளார்.
காணிப் பிணக்கு தொடர்பான வழக்கிலிருந்து தம்மை விடுவிப்பதாகவும் அதற்கு பிரதி உபகாரமாக 15 பேர்ச் காணியில் ஒரு பகுதியை தமக்கு வழங்குமாறும் காவல்துறை பரிசோதகர் அனுர டி சில்வா தம்மிடம் கோரியதாகவும் சுட்டிக்காட்டியுள்ளார்.
மோசடியான முறையில் தம்மிடம் வாக்குமூலமொன்றை குறித்த அதிகாரி பெற்றுக் கொண்டதாக மேலும் தெரிவித்துள்ளார்.
*******************





Monday, 12 September 2011

செய்திகள் 12/09


கொழும்பு சென்றார் றொபேர்ட் ஓ பிளேக்
ஐந்துநாள் உத்தியோகபூர்வ விஜயமொன்றை மேற்கொண்டு அமெரிக்காவின் பிரதி இராஜாங்கச் செயலாளர் ரொபேர்ட் ஓ பிளேக், இன்று இலங்கை சென்றுள்ளார்.
அரசாங்கத்தின் முக்கியஸ்தர்களையும், சிவில் சமூகப் பிரதிநிதிகளையும் சந்திக்கவிருக்கும் இவர், பல்கலைக்கழக மாணவர்களையும் சந்திக்கவுள்ளார்.
பிளேக், கற்றுக்கொண்ட பாடங்கள் மற்றும் நல்லிணக்க ஆணைக்குழு தொடர்பிலும் கவனம் செலுத்தவிருப்பதாகத் தகவல்கள் வெளியாகியுள்ளமை இங்கு குறிப்பிடத்தக்கது என அரச தகவலறிந்த வட்டாரங்களினால் தெரிவிக்கப்பட்டுள்ளது.
இதேவேளை தமிழ்த் தேசிய கூட்டமைப்பின் பாராளுமன்ற குழுத் தலைவர் இரா.சம்பந்தனையும் ரொபேர்ட் ஓ பிளேக் சந்தித்து கலந்துரையாடுவார் என தமிழ்த் தேசிய கூட்டமைப்பு கடந்த வாரம் வெளியிட்டிருந்த அறிக்கையில் குறிப்பிட்டுள்ளது.
கடந்த மாதம் 29ம் திகதி திட்டமிடப்பட்டிருந்த ரொபேர்ட் ஓ பிளேக்கின் விஜயம் ஐரின் சூறாவளியை அடுத்து செப்டெம்பர் 12 திகதிக்கு பிற்போடப்பட்டிருந்தமை குறிப்பிடத்தக்கது.
********************

எவரின் அழுத்தத்திற்கு அடிபணியப் போவதில்லை - நல்லிணக்க ஆணைக்குழு
அமெரிக்கா அல்ல எவருடைய அழுத்தம் வந்தாலும் அவசரப்பட்டு தாம் அறிக்கை வெளியிடப்போவதில்லை. தமது நிலைப்பாட்டில் இறுதிவரை உறுதியாக இருப்போம் என நல்லிணக்க ஆணைக்குழு திட்டவட்டமாக அறிவித்துள்ளது.
இலங்கை சென்ற தெற்கு மற்றும் மத்திய ஆசிய விவகாரங்களுக்குப் பொறுப்பான அமெரிக்காவின் உதவி இராஜாங்கச் செயலாளர் ரொபேர்ட் ஓ பிளேக் நல்லிணக்க ஆணைக்குழுவின் அறிக்கை தொடர்பாகப் பல்வேறு தரப்பினருடனும் பேச்சு நடத்தவுள்ளார்.
இந்நிலையில், நல்லிணக்க ஆணைக் குழுவின் அறிக்கையை விரைவில் வெளியிடுமாறு அழுத்தம் வந்தால் ஆணைக்குழுவின் நிலைப்பாடு என்னவாக இருக்கும் எனக் கேட்டபோதே ஆணைக்குழுவின் ஊடகப் பேச்சாளர் லக்ஷ்மன் விக்கிரமசிங்க நவம்பர் மாதம் முதல் வாரத்தில் தாம் அறிக்கையை வெளியிட உத்தேசித்துள்ளோம் எனத் தெரிவித்தார்.
சற்றுத் தாமதமானாலும் அதற்கு முன்னர் வெளியிடமாட்டோம். தமது நிலைப்பாட்டில் தாம் சற்றேனும் தளராது இறுதிவரை செயற்படுவோம் எனத் தெரிவித்தார்.
அமெரிக்கா அல்ல. யார் அழுத்தம் கொடுத்தாலும் குறிப்பிட்ட திகதிக்கு முன்னர் தாம் அறிக்கை வெளியிட மாட்டோம். அதற்கான நேரமும் தமக்கில்லை என்றும் தெரிவித்துள்ளார்.
இதை ஸ்ரீலங்காவுக்குச் சென்ற றொபேட் ஓ பிளேக் அறிவாரா என்று கேள்வி எழுப்பியுள்ள அவதானிகள், இது தொடர்பில் பேச்சு நடத்துவதே அவரின் விஜயத்தின் முக்கிய நோக்கம் என முன்னர் அறிக்கை வெளியிடப்பட்டதனையும் சுட்டிக்காட்டியுள்ளார்கள்.
********************

அறிக்கைக்கு பின்னரே நிலைப்பாடு - ததேகூ
நல்லிணக்க ஆணைக்குழுவின் இறுதி அறிக்கை வெளியான பின்னரே அந்த அறிக்கை தொடர்பாகத் தமிழ்த் தேசியக் கூட்டமைப்பு தனது நிலைப்பாட்டை அறிவிக்கும் என கூட்டமைப்புத் தெரிவித்துள்ளது.
எனவே, ரொபேர்ட் ஓ பிளேக்குடனான இன்றைய சந்திப்பின்போது நல்லிணக்க ஆணைக்குழுவின் அறிக்கை குறித்து தாம் கலந்துரையாடமாட்டோம் என நாடாளுமன்ற உறுப்பினர் சுமந்திரன் தெரிவித்தார்.
இலங்கைக்கு இன்று விஜயம் செய்த தெற்கு மற்றும் மத்திய ஆசிய விவகாரங்களுக்குப் பொறுப்பான அமெரிக்காவின் உதவி இராஜாங்கச் செயலாளர் ரொபேர்ட் ஓ பிளேக் இரவு 7 மணியளவில் தமிழ்த் தேசியக் கூட்டமைப்பினரைச் சந்தித்துப் பேச்சு நடத்தவுள்ளார்.
தமிழ்த் தேசியக் கூட்டமைப்பின் சார்பில் அதன் தலைவர் இரா.சம்பந்தன், சுமந்திரன் ஆகியோர் பேச்சில் கலந்துகொள்வர்.
நல்லிணக்க ஆணைக்குழுவின் அறிக்கை தொடர்பாக அரசியல் கட்சிகள், சிவில் சமூகத்தினர் ஆகியோரின் கருத்துகளை அறிந்துகொள்ளும் பொருட்டே ரொபேர்ட் ஓ பிளேக்கின் இலங்கைப் பயணம் அமைந்துள்ளதென தெரிவிக்கப்பட்டுள்ளது.
இலங்கை வரும் தெற்கு மற்றும் மத்திய ஆசிய விவகாரங்களுக்குப் பொறுப்பான அமெரிக்காவின் உதவி இராஜாங்கச் செயலாளருடன் தாம் இன்று பேச்சு நடத்துவோம் எனவும் அதற்கான அழைப்;பு தமக்கு விடுக்கப்பட்டுள்ளது எனவும் தெரிவித்தார்.
முக்கிய பல விடயங்கள் குறித்து தாம் ஆராயத் தீர்மானித்துள்ளதாகவும், நல்லிணக்க ஆணைக்குழுவின் அறிக்கை தொடர்பாகக் கலந்துரையாடமாட்டோம் எனவும் தெரிவித்துள்ளார்.
நல்லிணக்க ஆணைக்குழுவின் இறுதி அறிக்கை வெளியான பின்னரே தமிழ்த் தேசியக் கூட்டமைப்பு தனது உத்தியோகபூர்வ நிலைப்பாட்டை அறிவிக்கும். அதற்கு முன்னர் இது தொடர்பாகக் கருத்துக்கூற மாட்டோம் என்றும் சுமத்திரன் தெரிவித்துள்ளார்.
********************

ஜெனிவாவில் இன்று ஆரம்பமாகும் கூட்டத்தொடர் எதையாவது சாதிக்குமா?
ஜெனிவாவில் இன்று ஆரம்பமாகும் ஐ.நா மனிதஉரிமைகள் பேரவையின் 18வது கூட்டத்தொடரில், சிறிலங்காவுக்கு எதிரான முறைப்படியான தீர்மானம் எதுவும் கொண்டு வரப்படாது என்று சிறிலங்கா அரசாங்க வட்டாரங்கள் நம்பிக்கை வெளியிட்டுள்ளன.
சிறிலங்காவுக்கு எதிரான தீர்மானம் ஏதும் கொண்டு வரப்படுவதற்கான அறிகுறிகள் தென்படவில்லை என்றும் அந்த வட்டாரங்கள் மேலும் கூறியுள்ளன.
இந்தக் கூட்டத்தொடரில் சிறிலங்காவுக்கு எதிரான தீர்மானம் கொண்டு வரப்படுவதற்கு வாய்ப்புகள் இல்லை என்ற தகவலை இராஜதந்திர வழிமுறைகளின் ஊடாக சிறிலங்கா அரசாங்கம் பெற்றுள்ளதாகவும் கூறப்படுகிறது.
என்றாலும், ஜெனிவாவுக்குச் சென்றுள்ள சிறிலங்கா பிரதிநிதிகள் குழுவினரை ஆறுதலாக இருக்கக் கூடாது என்றும், எதற்கும் எந்த நேரத்திலும் பதிலளிக்கத் தயாராக இருக்குமாறும் சிறிலங்கா அதிபரால் அறிவுறுத்தப்பட்டுள்ளதாகவும் சிறிலங்கா அரசாங்க வட்டாரங்கள் மேலும் தகவல் வெளியிட்டுள்ளன.
இந்தக் கூட்டத்தொடருக்கு சிறிலங்கா அரசாங்கம் அமைச்சர் மகிந்த சமரசிங்க தலைமையிலான ஐந்து அமைச்சர்கள் மற்றும் மூத்த இராஜதந்திரிகள், அதிகாரிகளை அனுப்பி வைத்துள்ளது.
ஜெனிவா நேரப்படி இன்று காலை 10 மணியளவில், சிறிலங்கா பிரதிநிதிகள் குழுவுக்குத் தலைமை தாங்கும் அமைச்சர் மகிந்த சமரசிங்க ஐ.நா மனிதஉரிமைகள் பேரவையில் உரையாற்றுவார் என்றும் அறிவிக்கப்பட்டுள்ளது.
********************

மனித உரிமை மேம்பட கனடா விலியுறுத்தல்
மனித உரிமைகள் அரசியல் உரிமைகள் நிலைப்பாட்டில் இலங்கையில் முன்னேற்றம் ஏற்படாவிடில் அடுத்து இலங்கையில் நடைபெறவுள்ள பொதுநலவாய நாடுகளின் மாநாட்டில் தான் கலந்துகொள்ளப் போவதில்லை என்றும் ஏனைய நாட்டின் தலைவர்களும் இவ்வாறான நிலைப்பாட்டினையே மேற்கொள்வார்கள் என்று தான் எதிர்பார்ப்பதாகவும் தெரிவித்துள்ளார்.
கடந்த வெள்ளிக்கிழமை நடைபெற்ற ஊடகவியளாளர்களுடனான சந்திப்பு நிகழ்வொன்றின்போது கனடிய பல்கலாச்சார வானொலியின் ஊடகவியளாளர் ராகவன் பரஞ்சோதியின் கேள்விக்கு பதிலளித்த கனடியப் பிரதமர் இதனைத் தெரிவித்தார்.
இலங்கையில் நடைபெற்ற மனித உரிமை மீறல்கள் தொடர்பாக சுதந்திரமான விசாரனை அவசியம் எனக்குறிப்பிட்ட அவர் இலங்கையில் ஐனநாயக உரிமைகள் மதிக்கப்பட்டு நம்பகத்தன்மையும் ஏற்படுத்தப்பட வேண்டும் எனவும் இலங்கையில் நடைபெற்ற மனித உரிமை மீறல்கள் தொடர்பாக சுதந்திரமான விசாரணைகள் மேற்கொள்ளப்பட வேண்டும் என்ற ஐக்கிய நாடுகள் சபையின் கோரிக்கைக்கும் கனடா தொடர்ந்தும் ஆதரவளிக்கும் என அவர் குறிப்பிட்டுள்ளார்
********************

நீதிமன்றத்தில் ஆஜர் செய்யப்படுவர்!
அவுஸ்திரேலியாவுக்கு செல்லமுற்பட்டு நேற்றையதினம் கடற்படையினரால் கைது செய்யப்பட்டவர்கள் 44 பேரும் 24 மணி நேரம் குற்றப் புலனாய்வுப் பிரிவினரால் தடுத்து வைக்கப்பட்டு விசாரணை செய்யப்பட்டதன் பின்னரே நீதிமன்றத்தில் ஆஜர்படுத்தப்படுவார்கள் என்று இலங்கை காவல்துறை ஊடகப் பேச்சாளர் பிரஷாந்த ஜயக்கொடி கூறியுள்ளார்.
மேலும், கடல் வழியாக நாட்டை விட்டு வெளிறே முயன்ற இந்த 44 பேருக்கு எதிராகவும் குடிவரவு குடியகல்வு சட்ட விதிகளுக்கு ஏற்ப நடவடிக்கை எடுக்கப்படும் என்றும் காவல்துறை ஊடகப் பேச்சாளர் தெரிவித்துள்ளார்.
இதேவேளை, ஒருசிலர் போலி வாக்குறுதிகளை வழங்கி பணத்துக்காக இவ்வாறு ஆட்கடத்தல்களில் ஈடுபட்டு வருவதாகவும் இதனை தவிர்க்குமாறு அரசு வலியுறுத்தி வருவதுடன் அதற்கான விசேட வேலைத்திட்டங்களை முன்னெடுத்து வருவதாகவும் கடற்படைத் தளபதியான வைஸ் அட்மிரல் டீ.டபிள்யூ.ஏ.எஸ் திஸாநாயக்க தெரிவித்துள்ளார்.
********************

பயங்கரவாத சட்டத்தை நீக்க வேண்டும் - ம.ம.மு
பயங்கரவாதத் தடைச் சட்டத்தினை நீக்காது நாட்டில் இயல்பு நிலையை ஏற்படுத்த முடியாது என மலையக மக்கள் முன்னணி கட்சி சுட்டிக்காட்டியுள்ளது.
மூன்று தசாப்த காலமாக நீடித்து வந்த அவசரகாலச் சட்டம் நீக்கப்பட்ட போதிலும் அதற்கு நிகரான பயங்கரவாதத் தடைச் சட்டம் அமுலில் இருப்பதாகவும் மலையக மக்கள் முன்னணியின் பொதுச் செயலாளர் ஏ. லோரன்ஸ் தெரிவித்துள்ளார்.
போர் நிறைவடைந்து இரண்டாண்டுகள் கடந்துள்ள நிலையில் அனைவரினதும் எதிர்ப்பார்ப்புக்களை பூர்த்தி செய்யும் வகையில் அவசரகாலச் சட்டம் நீக்கப்பட்டமை வரவேற்கப்பட வேண்டியது.
முகாம்களிலும், சிறைகளிலும் நீண்ட காலமாக தடுத்து வைக்கப்பட்டுள்ள நபர்களை விடுதலை செய்ய நடவடிக்கை எடுக்கப்பட வேண்டும்.
தடுத்து வைக்கப்பட்டுள்ள 800க்கும் மேற்பட்ட தமிழ் அரசியல் கைதிகளை விடுதலை செய்வதற்கு நடவடிக்கை எடுக்க வேண்டும்.
இவ்வாறு கைது செய்யப்பட்டு தடுத்து வைக்கப்பட்டுள்ளவர்களில் 700க்கும் மேற்பட்டவர்கள் மலைய பெருந்தோட்டப் பிரதேசங்களைச் சேர்ந்த இளைஞர்கள் என அவர் சுட்டிக்காட்டியுள்ளார்.
தடுத்து வைக்கப்பட்டுள்ளவர்களை விடுதலை செய்வதற்கு உடனடியாக நடவடிக்கை எடுக்கப்பட வேண்டுமென கோரிக்கை விடுத்துள்ளார்.
சிங்கள ஊடகமொன்றுக்கு அளித்த நேர்காணலின் போது அவர் இதனைக் குறிப்பிட்டுள்ளார்.
********************

மாணவர்களை மூளைச் சலவை செய்யும் அரசு
மாணவர்களது பிரச்சினைகளுக்கு தீர்வு காண்பதற்கு பதிலாக தலைமைத்துவ பயிற்சியின் மூலம் பல்கலைக்கழக மாணவர்களது மூளையினை சலவை செய்ய முயற்சிப்பதாக குற்றம் சுமத்தப்பட்டுள்ளது.
இந்நிலையில் இந்த குற்றச்சாட்டை மறுத்துள்ள உயர்கல்வி அமைச்சு, தலைமைத்துவ பயிற்சியானது பரந்த சீர்திருத்தத்துக்கான முதற்கட்ட முயற்சி என தெரிவித்துள்ளது.
இவ்வருட கல்வியாண்டுக்காக பல்கலைக்கழகத்துக்கு தெரிவாகும் மாணவர்களுக்கு என இராணுவ முகாம்களில் மூன்று வார தலைமைத்துவ பயிற்சி உயர்கல்வி அமைச்சினால் அறிமுகப்படுத்தப்பட்டது.
இந்த பயிற்சியில் மாணவர்கள் பங்கேற்க வேண்டும் என கட்டாயப்படுத்தபட்ட போதும் மாணவர்கள் பின்பு தாமே ஆர்வம் கொண்டு பங்கேற்றதாக தெரிவிக்கப்பட்டது.
ஆனால் இந்த அவசர அறிவிப்புடன் கூடிய நடவடிக்கை புதிய தலைமுறையினரின் மூளையை சலவை செய்யும் ஒரு நடவடிக்கை என மாணவர் அமைப்புகளின் தலைவர்கள் தெரிவித்துள்ளனர்.
மக்களுடன் கலந்துரையாடப்படாமலும் விவாதிக்கபடாமலும் இவ்வாறனதொரு பயிற்சியின் அவசரத் தேவைப்பாடு அரசுக்கு தேவைப்பட்டுள்ளதனாலேயே இராணுவ பயிற்சியினை தலைமைத்துவ பயிற்சி என்ற பேரில் முன்னெடுத்துள்ளதாக அனைத்து பல்கலைக்கழக மாணவர் ஒன்றிய இணைப்பாளர் சஞ்ஐPவ பண்டார தெரிவித்துள்ளார்.
ஆனால் குறித்த குற்றச்சாட்டையும் உயர்கல்வி அமைச்சின் செயலாளர் கலாநிதி.சுனில் ஜயந்த நவரட்ன மறுத்துள்ளார்.
அத்தோடு இந்த பயிற்சித் திட்டமானது பல்கலைக்கழக கல்வியில் சிறந்ததொரு மாற்றத்தை ஏற்படுத்தும் முயற்சி என அவர் தெரிவித்துள்ளார்.
ஆனாலும் இந்த கருத்தினை மாணவர் சார்பிலான ஒன்றிய தலைவர்கள் ஏற்றுக்கொள்ளவில்லை.
அத்தோடு, பயிற்சி நெறியில் ஈடுபடும் மாணவர்கள் முகாம்களில் உடல் உள உலைச்சல்களுக்கு முகம்கொடுப்பதாக மாணவர் ஒன்றியம் தெரிவித்துள்ளது.
********************


Sunday, 11 September 2011

செய்திகள் 11/09


தமிழ் மக்கள் மீதான தொடரும் அழுத்தங்கள்
அவசரகாலச் சட்டத்தின் மூலம் தமிழ் மக்கள் மீது பிரயோகிக்கப்பட்ட அழுத்தங்களையும் விட மிக மோசமான வகையில் அரசாங்கம் அம்மக்களிடம் நடந்துகொள்கிறது.
அதற்காகவே கிறீஸ் பூதத்தை உருவாக்கி தமிழ் மக்களை தொடர்ந்தும் கஷ்டங்களுக்குள் சிக்கவைக்க அரசாங்கம் முயற்சிக்கின்றது என மன்னார் மாவட்ட ஆயர் இராயப்பு ஜோசப் ஆண்டகை தெரிவித்தார்.
நாட்டுக்குள் இராணுவ ஆட்சியை கொண்டுவர விரும்பும் இந்த அரசாங்கம், அதற்காக பாதுகாப்பு தரப்பினரையே பயன்படுத்தி வடக்கு கிழக்கு மற்றும் மலையகப் பிரதேசங்களில் வாழும் அப்பாவித் தமிழ் மற்றும் முஸ்லிம் மக்களை அச்சத்துக்குள் தள்ளப்பார்க்கிறது என்றும் அவர் குறிப்பிட்டார்.
தமிழ், முஸ்லிம் மக்கள் செறிந்து வாழும் பிரதேசங்களில் குழப்பத்தை ஏற்படுத்தும் முயற்சியாகவே இந்த கிறீஸ் மனிதர் பிரச்சினை உருவாக்கப்பட்டுள்ளது.
இந்த விவகாரத்தில் அரசாங்கம் மௌனம் சாதிப்பது சந்தேகத்துக்கு வழிவகுக்கிறது.
இந்தப் பிரச்சினை மிகவும் சின்ன விடயமாகும். இதற்கு தீர்வு காண அரசால் முடியும்.
அதற்கு அரசாங்கத்துக்கு வெகு நேரம் ஆகப்போவதில்லை. ஆனால் அரசாங்கம் இந்தப் பிரச்சினைக்கு தீர்வு வழங்குவதில் தள்ளியே நிற்கிறது.
இதன்மூலம், தனக்கும் கிறீஸ் மனிதன் பிரச்சினைக்கும் தொடர்பு உள்ளது என்பதை அரசாங்கம் நிரூபித்து வருகின்றது.
அவ்வாறு தொடர்பு இல்லை என்றால், பாதிக்கப்பட்ட மக்களுடன் கலந்துரையாடி இதற்கு தீர்வு காண அரசாங்கம் முயற்சித்திருக்கும். ஆனால் அப்படி செய்யவில்லை.
திட்டமிட்டு மேற்கொள்ளப்படும் இந்த சிறிய பிரச்சினையிலிருந்து பாரியதொரு நடவடிக்கையை நோக்கிப் பயணிக்க அரசாங்கம் முயற்சிக்கின்றது.
அதற்காகவே பொதுமக்கள் மீது தாக்குதல்களை நடத்தி, கிறீஸ் மனிதர்கள் என மக்களால் பிடிக்கப்படும் பாதுகாப்பு தரப்பினரையும் காப்பாற்றி வருகின்றது.
இந்த பிரச்சினைக்கு எதிராக தமிழ் அரசியல் தலைமைகள் நடவடிக்கை எடுக்க வேண்டும்.
மக்களின் குரலுக்கு மதிப்பளித்து அவர்களை இந்தப் பிரச்சினையிலிருந்து மீட்க வேண்டும்.
இதனை நீடிக்க விடாது மக்களின் பாதுகாப்பையும் நிம்மதியான வாழ்க்கையையும் நிலைநாட்ட வேண்டும்.
அதற்கு உரிய தரப்பினர் நடவடிக்கை எடுக்க வேண்டும் என்றும் ஆயர் தெரிவித்துள்ளார்.
*****************

தமிழரின் பொருளாதாரத்தை சிதைக்க முயலும் சிங்களம்
வெளிநாட்டு துரித பணப்பரிமாற்ற நடவடிக்கைகளில் ஈடுபடும் முகவர் நிலையங்களை மூடுவதற்கு நடவடிக்கை எடுக்குமாறு சிறிலங்கா காவல்துறைமா அதிபர் நிகால் இலங்ககோன் உத்தரவிட்டுள்ளதாக கொழும்புப் பத்திரிக்ககை ஒன்று இன்று செய்தி வெளியிட்டுள்ளது.
புலம்பெயர் தமிழர்கள் தமது உறவினர்களுக்கு குறித்த சட்டத்திற்கு மாறான நிலையங்களின் ஊடாக பணம் அனுப்புவதை தடுக்கவே சிறிலங்கா அரசாங்கம் இந்த அதிரடி நடவடிக்கையில் இறங்கியுள்ளதாக குறிப்பிடப்பட்டுள்ளது.
சிறிலங்காவில் சுமார் 700 தனியார் பணப்பரிமாற்று முகவர் நிலையங்கள் செயற்படுவதாக சிறிலங்கா காவல்துறைமா அதிபர் தெரிவித்துள்ளார்.
கொட்டாஞ்சேனை, புத்தளம், கறுவாத்தோட்டம், நீர்கொழும்பு, பம்பலப்பிட்டி, வெள்ளவத்தை, வவுனியா, காத்தான்குடி உள்ளிட்ட பல பகுதிகளில் இவை அதிகமாக இயங்குவதாகவும் நிகால் இலங்கக்கோன் கூறியுள்ளார்.
இந்த முகவர் நிலையங்கள் ஊடாகவே கனடா, ஜேர்மனி இந்தியா, பிரித்தானியா, அவுஸ்ரேலியா போன்ற நாடுகளில் இருந்து புலம்பெயர் தமிழர்கள் தமது உறவினர்களுக்கு பணம் அனுப்பி வருகின்றனர்.
சட்டவிரோதமாக செயற்படும் இத்தகைய முகவர் நிலையங்களை மூடுவதன் மூலம் புலம்பெயர் தமிழர்களால் அனுப்பப்படும் நிதியை ஒழுங்குபடுத்த சிறிலங்கா அரசாங்கம் திட்டமிட்டுள்ளதாகவும் தெரியவருகிறது.
கடந்தவாரம் புறக்கோட்டை 2ம் குறுக்குத்தெருவில் இயங்கி வந்த முகவர் நிலையம் ஒன்றை முற்றுகையிட்ட சிறிலங்கா காவல்துறையினர் அங்கிருந்து 84 இலட்சம் ரூபா பணத்தை கைப்பற்றியதுடன் அந்த வர்த்தக நிலையத்தையும் முத்திரையிட்டு மூடியுள்ளனர்.
*****************

தமிழரின் காணிகளை பறிக்க திட்டமிடும் ஸ்ரீலங்கா
வடபகுதியிலுள்ள உயர் பாதுகாப்பு வலயங்களில் காணப்படும் தனியார் காணிகளை அரசாங்கம் சுவீகரித்துக் கொள்ளத் திட்டமிட்டுள்ளதாக அரச தகவல்கள் தெரிவித்துள்ளன.
பாதுகாப்பு காரணங்களுக்காக தொடர்ந்தும் உயர் பாதுகாப்பு வலயங்களாக பேணப்பட வேண்டிய பிரதேசங்களில் காணப்படும் தனியார் காணிகளை இவ்வாறு அரசாங்கம் பொறுப்பேற்றுக் கொள்ளும் என நீதி அமைச்சர் ரவூப் ஹக்கீமும் தெரிவித்துள்ளார்.
சட்ட ரீதியான முறையில் இந்தக் காணிகள் பொறுப்பேற்றுக் கொள்ளப்படும் என சுட்டிக்காட்டியுள்ளார்.
இதனால் பாதிக்கப்படும் மக்களுக்கு மாற்றுக் காணிகள் வழங்கப்பட உள்ளதாகக் குறிப்பிட்டுள்ளார்.
அவசரகாலச் சட்டம் நீக்கப்பட்டதனால் உயர் பாதுகாப்பு வலயங்களில் அமைந்துள்ள தனியார் காணிகள் தொடர்பில் சட்ட சிக்கல் எழுந்துள்ளதாக சுட்டிக்காட்டப்படுகிறது.
உயர் பாதுகாப்பு வலயங்களில் அமைந்துள்ள தனியார் காணிகளை அரசாங்கம் பறிமுதல் செய்து கொண்டு அதற்கு மாற்றுக் காணிகளை வழங்குவதற்கு திட்டமிடப்பட்டுள்ளதாகக் குறிப்பிடப்படுகிறது.
யாழ்ப்பாண மாவட்டத்தின் வடமராட்சி, வலிகாமம் மற்றும் தென்மராட்சி ஆகிய பிரதேசங்களில் இவ்வாறு தனியார் காணிகளை சுவீகரிக்க வேண்டிய நிலைமை ஏற்பட்டுள்ளதாக அமைச்சர் சுட்டிக்காட்டியுள்ளார்.
இதேவேளை, உயர் பாதுகாப்பு வலயங்களில் காணப்படும் தமது காணிகளை ஒப்படைக்குமாறு யாழ்ப்பாணத்தைச் சேர்ந்த விவசாயிகள் உச்ச நீதிமன்றில் மனுவொன்றை தாக்கல் செய்துள்ளனர் என்பது குறிப்பிடத்தக்கது.
*****************

ஸ்ரீலங்காவை காப்பாற்ற முற்படும் நாடுகள்
ஐக்கிய நாடுகள் மனித உரிமை கவுன்ஸில் அமர்வுகளில் பத்துக்கும் மேற்பட்ட நாடுகள் இலங்கைக்கு ஆதரவளிப்பதாக உறுதியளித்துள்ளன.
தமிழ் புலம்பெயர் சமூகமும், மேற்குலக நாடுகளும் இலங்கைக்கு எதிராக ஐக்கிய நாடுகள் மனித உரிமை கவுன்ஸில் அமர்வுகளில் தீர்மானம் நிறைவேற்ற முயற்சிப்பதாக சிங்கள ஊடகமொன்று செய்தி வெளியிட்டுள்ளது.
ரஷ்யா, சீனா, இந்தியா, பாகிஸ்தான் உள்ளிட்ட பத்துக்கும் மேற்பட்ட நாடுகள் இலங்கைக்கு ஆதரவளிப்பதாக உறுதியளித்துள்ளன.
இறுதிக் கட்ட போரின் போது இலங்கையில் உரிமை மீறல்கள் இடம்பெற்றதாக அமர்வுகளில் குற்றம் சுமத்த சில தரப்பினர் திட்டமிட்டுள்ளதாக வெளிவிவகார அமைச்சுத் தகவல்கள் தெரிவிக்கின்றன.
*****************

தமிழரை அடக்க புதிய சட்டம் உருவாக்கும் சிங்கள இனவாதம்
பயங்கரவாதத் தடைச் சட்டத்திற்கு பதிலீடாக தாய்நாட்டை பாதுகாக்கும் சட்டமொன்று அறிமுகம் செய்யப்பட உள்ளதாகத் தெரிவிக்கப்படுகிறது.
தேசத்தின் பாதுகாப்பை உறுதிப்படுத்தும் நோக்கில் பயங்கரவாதத் தடைச்சட்டத்தை உள்ளடக்கிய வகையில் புதிய பாதுகாக்கும் சட்டம் அமுல்படுத்தப்பட உள்ளது.
தாய்நாட்டை பாதுகாக்கும் சட்டம் அமுல்படுத்தப்படுவதுடன் பயங்கரவாதத் தடைச் சட்டம் உள்ளிட்ட சில சட்டங்கள் வலுவிழக்கும்.
இலங்கையின் சகல இன மக்களையும் பாதுகாக்கும் வகையில் புதிய சட்டம் அமையும் எனத் தெரிவிக்கப்படுகிறது.
அவசரகாலச் சட்டம் நீக்கப்பட்ட போதிலும் பயங்கரவாதத் தடை மற்றும் பிரிவினைவாதத்தை தடக்கும் சட்டங்கள் அமுலில் இருக்க வேண்டியது அவசியமானது என அரசாங்கம் சுட்டிக்காட்டியுள்ளது.
25 ஆண்டுகளுக்கு முன்னர் உருவாக்கப்பட்ட பயங்கரவாதத் தடைச் சட்டத்தை அமுல்படுத்துவதில் நடைமுறைச் சிக்கல்கள் காணப்படுவதாகவும் இதனால் தாய்நாட்டை பாதுகாக்கும் புதிய சட்டமொன்று அமுல்படுத்தப்படுவதாகவும் தெரிவிக்கப்படுகிறது.
இது தமிழர்களை அடக்கும் சட்டமாகவே அமைய வேண்டும் என்பது சிங்கள அரசின் எண்ணமாக உள்ளது என அவதானிகள் சுட்டிக்காட்டியுள்ளனர்.
*****************

பொறுப்பை கொடுத்து வெறுப்பை சம்பாதிக்கும் ஐநா
ஐநா சபையின் அபிவிருத்தித்திட்டமிடல் உரிமைகள் குழுவுக்கு தலைமை தாங்கும் பொறுப்பின் விசேட அதிகாரியாக இலங்கையின் ஜெனீவாவுக்கான நிரந்தர வதிவிடப்பிரதிநிதியாக செயற்பட்டுவரும் தாமரா குணநாயகம் தெரிவு செய்யப்பட்டுள்ளார்.
இந்த நியமனத்தை அணிசேரா நாடுகள் அமைப்பு அவரருக்கு வழங்கியுள்ளது.
கடந்த 7 ஆம் திகதி சுவிட்ஸர்லாந்தில் இடம்பெற்ற நிகழ்வில் இந்த பொறுப்பு அவருக்கு வழங்கப்பட்டது.
இந்தக்குழு, அரசாங்கங்களின் நடவடிக்கைகள், அரச சார்பற்ற நிறுவனங்களின் நடவடிக்கைகள் உட்பட்ட பொருளாதார திட்டங்களை கண்காணிக்கும் கடமைகளை கொண்டுள்ளது.
இதன்படி தாமரா குணநாயகம், அரச அரசசார்பற்ற மற்றும் அபிவிருத்தி நடவடிக்கைகள் தொடர்பான இறுதி அறிக்கையை ஐக்கிய நாடுகள் மனித உரிமைகள் பேரவைக்கு சமர்பிக்கும் கடமையை கொண்டுள்ளார் என அரச தகவல்கள் தெரிவித்துள்ளன.
இதேவேளை கற்றுக்கொண்ட பாடங்கள் மற்றும் நல்லிணக்க ஆணைக்குழுவின் அறிக்கை வெளியாவதன் முன்னர், அது தொடர்பாக முன் கூட்டியே அனுமானித்து கருத்து வெளியிடுவது ஏற்றுக்கொள்ள முடியாது என இலங்கைக்கான ஐக்கிய நாடுகளின் நிரந்தர பிரதிநிதி தமரா குணநாயகம் தெரிவித்துள்ளார்.
கற்று கொண்ட பாடங்கள் மற்றும் நல்லிணக்க ஆணைக்குழுவின் அறிக்கை தொடர்பாக சர்வதேச மன்னிப்பு சபையினால் அண்மையில் கருத்துக்கள் வெளியிடப்பட்டன.
இதற்கு எதிர்ப்பு தெரிவிக்கும் முகமாகவே அவர் இந்த கருத்தை வெளியிட்டுள்ளார்.
இந்த அறிக்கை நவம்பர் மாதம் 15ம் திகதியே கையளிக்கப்படவுள்ள நிலையில் அது தொடர்பாக விமர்சிப்பது இலங்கை அரசாங்கத்தின் இறைமையை பாதிக்கும் செயல் எனவும் ஐக்கிய நாடுகளின் நிரந்தர பிரதிநிதி தமரா குணநாயகம் தெரிவித்துள்ளார்.
*****************

மன்னிப்புச் சபையின் அறிக்கையால் ஆடிப்போன ஸ்ரீலங்கா
இலங்கை தொடர்பாக சர்வதேச மன்னிப்புசபை தெரிவித்துள்ள கருத்துக்கள், நாட்டின இறைமையை பாதிக்கும் வகையில் அமைந்துள்ளதாக குற்றம் சுமத்தப்பட்டுள்ளது.
இலங்கை நாட்டில் விடயத்தில் தலையிடுவது மாத்திரமன்றி அது இறைமைக்கு அச்சுறுத்தலான கருத்துமாகும் என்று இலங்கையின் வெளியுறவு அமைச்சு தெரிவித்துள்ளது.
இலங்கை மீது சுமத்தப்பட்டுள்ள போர்க்குற்றச்சாட்டுக்களை விசாரணை செய்ய சர்வதேச விசாரணையை தவிர வேறு நடவடிக்கை இல்லை என்று கடந்த புதன்கிழமையன்று சர்வதேச மன்னிப்பு சபை தெரிவித்திருந்தது.
ஜெனீவாவில் மனித உரிமைகள் பேரவையின் அமர்வு இடம்பெறவுள்ள நிலையிலேயே தமது 69 பக்க அறிக்கையை சர்வதேச மன்னிப்பு சபை வெளியிட்டுள்ளது.
இந்தநிலையில் இலங்கையின் போர்குற்றவிடயம் ஜெனீவா அமர்வில் விவாதிக்கப்படும் என்று எதிர்ப்பார்க்கப்படுகிறது.
சர்வதேச மன்னிப்பு சபையின் குற்றச்சாட்டின்படி இலங்கை அரசாங்கத்தின் நல்லிணக்க ஆணைக்குழு போர்க்குற்றச்சாட்டு தொடர்பில் உள்ளக விசாரணையிலும் தோல்வி கண்டுள்ளதாக தெரிவிக்கப்பட்டுள்ளது.
*****************

தமிழ் மீனவர்களை சுரண்டும் இனவாத கும்பல்கள்
இலங்கையின் வடக்கே மன்னார் மாவட்டத்தில் உள்ள சுமார் 8ஆயிரம் மீனவ குடும்பங்களைச் சேர்ந்த 30 ஆயிரம் பேர் மீன்பிடி தொழிலில் பல்வேறு பிரச்சினைகளை எதிர்கொண்டு வருகின்றார்கள்.
இந்தப் பிரச்சினைகள் தொடர்பாக பல்வேறு தரப்பினரின் ஊடாக அரசாங்கத்தின் கவனத்திற்குக் கொண்டுவந்தபோதும் தீர்வுகள் கிடைக்கவில்லை என மீனவ அமைப்புக்களின் பிரதிநிதிகள் கூறுகின்றார்கள்.
இந்தப் பிரச்சினைகளை தென்பகுதியில் உள்ள சிங்கள மக்களுக்கும் அரசியல்வாதிகளுக்கும் ஊடகங்களின் ஊடாக வெளிப்படுத்தி அரசாங்கத்தின் கவனத்தை ஈர்க்கும் நோக்கத்துடன் மன்னார் மாவட்ட மீனவர் கூட்டுறவுச் சங்கங்களின் சமாசம், தேசிய மீனவர் ஒத்துழைப்பு இயக்கத்தின் ஒத்துழைப்புடன் செய்தியாளர் சந்திப்பொன்றை நடத்தியது.
யுத்தம் முடிவடைந்து இரண்டு வருடங்களுக்கு மேலாகிவிட்ட நிலையில் மீன்பிடிப்பதற்கு மீண்டும் பாஸ்நடைமுறை வந்துள்ளது.
இதனால் மன்னார் மீனவர்கள் சுதந்திரமாக மீன்பிடி தொழிலை மேற்கொள்ள முடியாத நிலை ஏற்பட்டுள்ளது என்று மன்னார் மாவட்ட மீனவர் கூட்டுறவுச் சங்கங்களின் சமாசத் தலைவர் என்.எம்.ஆலம் தெரிவித்தார்.
நீண்ட காலமாக இந்திய மீனவர்கள் இலங்கைக் கடற்பரப்பில் அத்துமீறி மீன்பிடிப்பது முன்னரைவிட அதிகரித்துள்ளது.
இதனால் மன்னார் மாவட்ட மீனவர்கள் பெரும் சிரமங்களையும் கஷ்டங்களையும் எதிர்நோக்கியிருக்கின்றார்கள் என்றும் அவர் கூறினார்.
இதேவேளை, பாஸ் நடைமுறைகள் நடைமுறையில் இருக்கும் நிலையில் தென்பகுதி மீனவர்கள் அத்துமீறி மன்னார் கடற்பரப்பில் பிரவேசித்து மீன்பிடி தொழிலில் ஈடுபட்டு வருவதனாலும் மன்னார் மாவட்ட மீனவர்களுக்கு கஸ்டங்கள் அதிகரித்திருப்பதாக தேசிய மீனவர் ஒத்துழைப்பு இயக்கத்தின் வட கிழக்கு பிரதேச இணைப்பாளர் அன்ரனி ஜேசுதாசன் சுட்டிக்காட்டினார்.
*****************

ஸ்ரீலங்கா இனவழிப்பு படையின் எல்லை தாண்டிய சர்வதேச காமக்களியாட்டம்
ஐ.நா அமைதிப்படையில் இடம்பெற்றிருந்த சிறிலங்காப் படையினர் சிறார்களைக் கூட பாலியல் வன்புணர்வுக்கு உட்படுத்தியதாக ஹெய்டி அதிகாரிகள் குற்றம்சாட்டியுள்ளனர்.
இது தொடர்பாக தி நியூ அமெரிக்கன் இணையத்தளத்துக்கு ஹெய்டி சட்டவாளர்கள் தலைமைத்துவ தகவல் வலையமைப்பு தகவல் வெளியிடுகையில், சிறிலங்கா படையினரால் ஏழு வயது சிறுமிகள் கூட பாலியல் வல்லுறவுக்கு உட்படுத்தப்பட்டதாக கூறியுள்ளது.
2007ம் ஆண்டில் பாலியல் துன்புறுத்தல் மற்றும் பாலியல் வன்புணர்வு குற்றச்சாட்டுகளால் சிறிலங்காவுக்கு நாடு கடத்தப்பட்ட 114 சிறிலங்கா படையினர் தண்டிக்கப்படவில்லை என்றும் அந்த இணையத்தளம் கூறியுள்ளது.
சிறிலங்கா படையினர் ஹெட்டிய பெண்களையும், பெண்பிள்ளைகளையும், 7 வயதான சில சிறுமிகளையும் கூட பாலியல் வன்புணர்வுக்கு உட்படுத்தியதாக ஹெய்டி சட்டவாளர்கள் தலைமைத்துவ வலையமைப்பின் தலைவர் எசிலி டன்ரோ குற்றம்சாட்டியுள்ளார்.
டசின் கணக்கான தமது படையினர் பாலியல் துன்புறுத்தல் குற்றச்சாட்டுக்காக தண்டிக்கப்பட்டுள்ளதாக ஐ.நா கூறியுள்ளதாகவும், ஆனால் பெரும்பாலானவர்கள் நீதியின் முன் நிறுத்தப்படாமல் தப்பி விட்டதாகவும் தி நியூ அமெரிக்கன் இணையத்தளம் தகவல் வெளியிட்டுள்ளது.
*****************