Sunday, 11 September 2011

செய்திகள் 10/09


கருத்தறியும் பான் கீ மூன் ஏதும் செய்வாரா?
இலங்கைக்கு எதிரான மனித உரிமை மீறல் குற்றச்சாட்டுகள் தொடர்பில் இந்தியாவின் கருத்தை அறிவதற்கான முயற்சிகளை ஐக்கிய நாடுகள் சபையின் பொதுச் செயலாளர் பான் கீ மூன் நடவ டிக்கை எடுத்திருக்கிறார்.
இலங்கைக்கு எதிரான மனித உரிமை மீறல் குற்றச்சாட்டுகள் குறித்தான விவாதம் ஐக்கிய நாடுகள் மனித உரிமைகள் சபையின் 18 ஆவது கூட்டத் தொடரில் இடம்பெறும் என்று எதிர்பார்க்கப் படுகிறது.
நாளை மறுதினம் ஆரம்பமாகும் கூட்டத் தொடரின் ஆரம்பநாள்களில் இலங்கை விவகாரத்தை மேற்குலகு எழுப்பும் என்று எதிர்பார்க்கப்படு கிறது.
அவ்வாறான ஒரு நிலையில் இந்தியாவின் கருத்து என்னவென்று அறிய ஐ.நா. பொதுச் செயலர் பான் கீ மூன் முற்பட்டிருக்கிறார்.
இதனைக் கொழும்பிலுள்ள மூத்த இராஜதந்திரி ஒருவர் நேற்று தெரிவித்தார்.
சில நாள்களுக்கு முன்னர் ஐ.நா.விலுள்ள இந்தியாவின் இராஜதந்திரிகளுடன் முக்கிய பேச்சுகளை நடத்திய பான் கீ மூன், சர்வதேச போர்க்குற்ற விசாரணைகள் தொடர்பான இந்தியாவின் நிலைப்பாடு குறித்து வினவியிருக்கிறார்.
இந்தக் கூட்டத்தில் போர் நடந்த நேரத்தில் இலங்கையுடன் நெருங்கிச் செயற்பட்ட ஐ.நா. அதிகாரிகளும் உடன் இருந்தனர்.
இந்தியாவின் ஐ.நா.மனித உரிமைகள் சபையில் விவாதம் நடக்கும் போது உத்தியோகபூர்வமாகத் தெரியவரும் என்று இந்தச் சந்திப்பில் இந்திய இராஜதந்திரிகள் பதிலளித்திருக்கின்றார்கள் எனத் தெரியவருகிறது.
பான் கீ மூனுடன் நடத்திய பேச்சுகள் குறித்து இந்திய இராஜதந்திரிகள் புதுடில்லியிலுள்ள வெளியுறவுத்துறை அமைச்சகத்திற்கும் தெரியப்படுத்தியிருக்கின்றனர்.
**********************

சந்திப்பு எதை நோக்கியது?
தமிழ்த் தேசியக் கூட்டமைப்பின் தலைவரும் கூட்டமைப்பு பாராளுமன்றக் குழுத் தலைவருமான இரா.சம்பந்தன் அமெரிக்காவின் தெற்காசியாவுக்கான இராஜாங்க செயலாளர் ரொபேட் ஓ. பிளேக்கை எதிர்வரும் 12 ஆம் திகதி சந்தித்து உரையாடவுள்ளார்.
கொழும்பு ஹில்டன் ஹோட்டலில் 12 ஆம் திகதி காலை 7.10 மணிக்கு நடைபெறும் இச்சந்திப்பில் பல்வேறு விடயங்கள் பற்றி இராஜாங்க செயலாளருடன் சம்பந்தன் உரையாடவிருப்பதாக தெரியவருகிறது.
கடந்த மாத பிற்பகுதியில் வரவிருந்த பிளேக், தவிர்க்க முடியாத காரணத்தினால் இலங்கை விஜயத்தை ஒத்திவைத்தார்.
அவசரகாலச் சட்டம் நீக்கப்பட்டதன் பின்னரான காலப்பகுதியில் இலங்கையின் நிலைவரம் தொடர்பில் கண்டறிவதற்கு வருகை தரும் பிளேக் இலங்கையில் தாம் சந்திக்கவுள்ள நிகழ்ச்சிப்பட்டியலில் இரா.சம்பந்தனை சந்திப்பது கவனத்தில் கொள்ளப்படவேண்டிய விடயமென தகவல் அறிந்த வட்டாரங்கள் தெரிவிக்கின்றன.
இச்சந்திப்பின் போது தமிழ் பேசும் மக்களின் பல்வேறு விடயங்கள் பற்றி சம்பந்தன் விரிவாக பேசவுள்ளதாக தெரியவருகிறது.
**********************

பதிலளிக்குமா அரசு? - ஜயலத்
ஐ.நா. மனித உரிமைகள் 18 ஆவது சபையின் கூட்டத்தொடரின்போது சர்வதேச சமூகம் தொடுக்கும் கேள்விக் கணைகளுக்கு இலங்கை அரசு தக்க பதிலடி கொடுக்கவேண்டும்.
இல்லையேல், இலங்கை பெரும் சர்வதேச அழுத்தங்கள் அதிகரிக்கும் என ஐக்கிய தேசியக் கட்சி எச்சரிக்கை விடுத்துள்ளது.
ஐ.நா. மனித உரிமைகள் சபையின் கூட்டத்தொடர் குறித்துக் கருத்து வெளியிடும்போதே ஐ.தே.கட்சியின் பொதுச் செயலாளரும், அக்கட்சியின் மனித உரிமை விவகாரங்களுக்குப் பொறுப்பானவருமான நாடாளுமன்ற உறுப்பினர் டொக்டர் ஜயலத் ஜயவர்தன இதனைத் தெரிவித்தார்.
மனித உரிமைகள் சபையின் கூட்டத்தொடரில் கலந்துகொள்வதற்குச் சென்றுள்ள இலங்கைக் குழுவிடம் சர்வதேச தரப்பினர் பல்வேறு கோணங்களில் கேள்விகளைத் தொடுப்பர்.
இதற்கு அவர்கள் தக்க பதிலடி கொடுக்கவேண்டும்.
மாறாக மௌனம் காத்தால் பெரும் சர்வதேச அழுத்தம் ஏற்படும்.
இலங்கை தரப்பினர் தக்க பதிலளிப்பார்களா இல்லையா என்பது தொடர்பாக தான் கருத்துக் கூற விரும்பவில்லை என்று ஜெயலத் ஜெயவர்த்தனா தெரிவித்துள்ளார்.
**********************

உருக்குலைந்த சடலம் மீட்பு
வலிகாமம், கிழக்கு புத்தூர் பிரதேசத்தில் நேற்று மாலை ஆண் ஒருவரது சடலம் மீட்கப்பட்டது.
இவர் படுகொலை செய்யப்பட்ட பின்னரே வீசப்பட்டிருக்கலாமென நம்பப்படுகிறது.
இவரது.சடலம் உருக்குலைந்திருந்த போதும் உடலில் சித்திரவதை செய்யப்பட்டமைக்கான தடயங்களும் காணப்பட்டதாக அச்சுவேலி காவல்துறையினர் தெரிவிக்கின்றனர்.
புத்தூர்- மீசாலை வீதிப்பகுதியில் புத்தூர் சந்தியிலிருந்து சுமார் 2 கிலோமீற்றர் தூரத்திலுள்ள விதவாணி பகுதியிலேயே இச்சடலம் கண்டுபிடிக்கப்பட்டுள்ளது.
குறித்த பகுதியில் துர்நாற்றம் வீசுவதனை அவதானித்த வீதியால் பயணித்த சிலர் அங்கு சென்று பார்த்த போதே சடலத்தினைக் கண்டுள்ளனர்.
மீட்டெடுக்கப்பட்ட சடலம் யாழ் போதனா வைத்தியசாலையில் ஒப்படைக்கப்பட்டுள்ளது.
**********************

விடுவிக்க மறுக்கும் ஸ்ரீலங்கா
அவசரகாலச் சட்டத்தின் கீழ் கைதுசெய்யப்பட்டு தடுப்பிலுள்ள சந்தேக நபர்களில் வழக்குத் தொடர முடியாதோரை விடுவிக்க நடவடிக்கை எடுக்கப்படும்.
எனினும், சந்தேகநபர்கள் அனைவரையும் விடுவிக்க முடியாது என்று பொருளாதார அபிவிருத்திப் பிரதி அமைச்சரும், அமைச்சரவைப் பதில் பேச்சாளருமான லக்ஷ்மன் யாப்பா அபேவர்தன தெரிவித்தார்.
அமைச்சரவை முடிவுகளை அறிவிக்கும் வாராந்த ஊடகவியலாளர் மாநாடு நேற்றுக் காலை அரச தகவல் திணைக்களத்தில் நடைபெற்றது.
இதில் கலந்து கொண்டு உரையாற்றிய அவர் அவசரகாலச் சட்டத்தைத் தொடர்ந்து நீடித்து நாட்டை ஆளுகை செய்யும் எண்ணம் அரசுத் தலைவருக்கு இருக்கவில்லை.
அதனால்தான் அமுலிலிருந்த அவசரகாலச் சட்டத்தில் படிப்படியாக சில ஷரத்துக்களை நீக்கி இறுதியில் அச்சட்டத்தை முற்றாக நீக்கினார் எனத் தெரிவித்தார்.
அவசரகாலச் சட்டத்தின் கீழ் கைதுசெய்யப்பட்டு தடுப்பிலுள்ள சந்தேகநபர்கள் மீது வழக்குகள் தொடரப்படும்.
அவ்வாறு வழக்குத் தொடர முடியாதவர்கள் விடுவிக்கப்படுவர். ஆனால், அனைவரையும் விடுவிக்க முடியாது.
நாட்டின் பாதுகாப்புக்குக் களங்கத்தை ஏற்படுத்திய, மனித உயிர்களைக் காவுகொண்ட, சமூகத்துக்குச் சவாலாகச் செயற்பட்ட, பல தீவிரவாத நடவடிக்கைகளில் ஈடுபட்ட பலர் தடுப்பில் உள்ளனர்.
இவர்கள் அனைவரையும் வெளியே கொண்டுவர சிலர் முயற்சித்து வருகின்றனர்.
அவ்வாறு அனைவரையும் விடுவிக்க முடியாது. வழக்குத் தொடர வேண்டியவர்கள் மீது வழக்குத் தொடரப்படும் என்றார்
**********************

அடக்குமுறை சட்டத்தை எப்படியாவது அமுல் செய்ய விரும்பும் அடக்குமுறை அரசு
சந்தேக நபர்களை 48 மணித்தியாலங்கள் தடுத்து வைக்கும் சட்டத் திருத்தம் அமுல்படுத்தப்படும் என பதில் அமைச்சரவைப் பேச்சாளர் லக்ஷ்மன் யாபா அபேவர்தன தெரிவித்துள்ளார்.
கட்சித் தலைவர்களின் இணக்கப்பாட்டுடன் இந்த சட்டத் திருத்தம் நாடாளுமன்றில் மீள சமர்ப்பிக்கப்படும்.
பாரிய குற்றச் செயல்களுடன் தொடர்புடைய நபர்களை விசாரணை செய்வதற்கு இந்த சட்டத் திருத்தம் அவசியமானது என அவர் குறிப்பிட்டுள்ளார்.
குற்றவியல் திருத்தச் சட்டக் கோவை தொடர்பான யோசனைத் திட்டம் நாடாளுமன்றில் சமர்ப்பிக்கப்பட்ட போது அதற்கு எதிர்க்கட்சிகள் கடும் எதிர்ப்பை வெளியிட்டிருந்தன.
இதனால் சட்டத் திருத்தம் தொடர்பான விவாதத்தை பிரிதொரு தினத்தில் நடத்துவதென பிரதி சபாநாயகர் அறிவித்திருந்தார்.
எனினும் கட்சித் தலைவர்களின் இணக்கப்பாட்டுடன் சில திருத்தங்களை செய்து குறித்த சட்டக் கோவையை மீள நாடாளுமன்றில் சமர்ப்பிப்பதற்கு அராசங்கம் முயற்சித்து வருவதாகத் தெரிவிக்கப்படுகிறது.
தமிழீழ விடுதலைப் புலிகளுக்கு எதிரான போர் நிறைவடைந்த போதிலும், சில தீய சக்திகள் நாட்டில் குழப்பத்தை ஏற்படுத்த முயற்சித்து வருவதாக அவர் குற்றம் சுமத்தியுள்ளார்.
இதேவேளை, கொலை முயற்சி, கொலை, பாலியல் துஸ்பிரயோகம், கொள்ளை, கப்பம் கோரல், கடத்தல், ஆயுத வன்முறைகள் உள்ளிட்ட 15 வகையான குற்றச் செயல்களில் ஈடுபடும் சந்தேக நபர்களை 48 மணித்தியாலங்கள் தடுத்து வைத்து விசாரணை செய்யக் கூடிய வகையில் சட்டத் திருத்தங்கள் மேற்கொள்ளப்பட உள்ளதாக நீதி அமைச்சின் செயலாளர் சுஹத கம்லத் தெரிவித்துள்ளார
**********************

அஞ்சும் அரசு அச்சுறுத்துகின்றது!
தமிழ்த் தேசியக் கூட்டமைப்பைச் சேர்ந்த இரண்டு நாடாளுமன்ற உறுப்பினர்களுக்கு எதிராக விசாரணைகள் ஆரம்பிக்கப்பட்டுள்ளதாக திவயின செய்தி வெளியிட்டுள்ளது.
தமிழ்த் தேசியக் கூட்டமைப்பைச் சேர்ந்த இரண்டு நாடாளுமன்ற உறுப்பினர்கள் அண்மையில் லண்டனுக்கு மேற்கொண்ட விஜயம் தொடர்பில் புலனாய்வுப் பிரிவினர் விசாரணைகளை நடத்தி வருகின்றனர்.
கிறிஸ் பூதங்கள் வடக்கு வாழ் தமிழ் பெண்களை பீதியடைச் செய்து வருவதாக குறித்த நாடாளுமன்ற உறுப்பினர்கள் லண்டனில் போலியான பிரச்சாரங்களை மேற்கொண்டுள்ளனர் என குற்றம் சாட்டப்பட்டுள்ளது.
மேலும் குறித்த இரண்டு நாடாளுமன்ற உறுப்பினர்களும் லண்டனில் நிதி திரட்டல் நடவடிக்கைகளிலும் ஈடுபட்டிருந்ததாகக் குறித்த பத்திரிகை குற்றம் சுமத்தியுள்ளது.
**********************

தொடரும் சிறுவர் துஸ்பிரயோகம்
இலங்கையில் காப்பகங்களில் இருக்கும் சிறார்கள் பெருமளவில் துஷ்பிரயோகத்துக்கு உள்ளாவதாகவும் அதனால் காப்பகங்களை மூடி விட்டு சிறார்களை குடும்பங்களிடம் பொறுப்பு கொடுத்து குடும்ப சூழலில் அவர்கள் வளர உதவ வேண்டும் என்று சிறுவர் பாதுகாப்பு அதிகார சபையின் தலைவர் அனோமா திசாநாயக்க தெரிவித்துள்ளார்.
மன்னாரில் உள்ள 90 சிறார்களும் கிளிநொச்சியில் உள்ள 50 சிறார்களும் இதுபோல குடும்பங்களின் பராமரிப்புக்காக கொடுக்கப்பட்டு விட்டதாகவும் அவர் குறிப்பிட்டார்.
இதேவேளை, குழந்தைகள் சிறப்பான முறையில் வளர குடும்ப சூழல் இன்றியமையாதது என்ற கருத்தாக்கம் பலரிடம் இருந்தாலும் சிறார் காப்பகங்களை மூடுவது என்பது நடைமுறை சாத்தியமான விடயமாக இருக்காது என்று ஆதரவற்ற சிறார்களை பராமரித்து வரும் அமைப்புக்கள் தெரிவிக்கின்றன.
கொழும்பு புறநகர் பகுதியில் செயல்பட்டு வரும் கோகுலம் சிறார் காப்பகத்தின் பொறுப்பாளர் நந்தராணி தேவி இது பற்றி கருத்து தெரிவிக்கையில், தமது காப்பகத்தில் உள்ள 125 குழந்தைகளையும் தான் தினந்தோரும் சந்திப்பதாகவும் தமது நேரடி கண்காணிப்பில் சிறார்களை வைத்திருப்பதன் மூலம் சிறார்களை பாதுகாப்பாக பராமரிக்கக் கூடியதாக இருப்பதாகவும் அவர் தெரிவித்தார்.
உறவினர்களின் பொறுப்பில் விடப்படும் குழந்தைகளும், குழந்தையில்லாத தம்பதியினர் தத்தெடுக்கும் குழந்தைகளும் கூட துஷ்பிரயோகங்களுக்கு உள்ளாவதை தாங்கள் அவதானித்துள்ளதாகவும் கோகுலம் சிறார் காப்பகத்தின் பொறுப்பாளர் நந்தராணி தேவி தெரிவித்தார்.
இலங்கையில் சுமார் 20 ஆயிரம் சிறார்கள் 470 காப்பகங்களில் வளர்ந்து வருவதாக சிறுவர் பாதுகாப்பு அதிகார சபை தெரிவிக்கிறது.
இதில் வெறும் 22 காப்பகங்கள் மட்டுமே அரசால் நடத்தப்படுகின்றன.
மீதியுள்ளவை தனியாராலும், மதச் சார்பு அமைப்புக்களாலும் நடத்தப்படுகின்றன.
**********************

மீளக் குடியமர முடியாத குடாநாட்டு மக்கள்
போர் முடிவடைந்து இரண்டரை ஆண்டுகளுக்கு மேற்பட்ட போதும் யாழ்ப்பாணத்தில் உள்ள உயர்பாதுகாப்பு வலயங்களைச் சேர்ந்த 42 ஆயிரத்துக்கும் மேற்பட்ட மக்கள் இன்னும் தமது சொந்த இடங்களில் மீளக்குடியமராமல் இடம்பெயர்ந்த நிலையிலேயே வாழ்கிறார்கள்.
உயர் நீதிமன்றத்தில் அரசு சமர்ப்பித்த அறிக்கையில் இந்தத் தகவல் தெரிவிக்கப்பட்டுள்ளது.
வலி.வடக்கைச் சேர்ந்த விவசாயிகளால் உயர் நீதிமன்றத்தில் தாக்கல் செய்யப்பட்ட அடிப்படை உரிமை மீறல் மனு மீதான விசாரணை நேற்று முன்தினம் உயர் நீதிமன்றத்தில் நடைபெற்றது.
அப்போது யாழ். மாவட்ட செயலகத்தால் வழங்கப்பட்ட மனுவிலேயே இந்தத் தகவல் தெரிவிக்கப்பட்டுள்ளது.
உயர் பாதுகாப்பு வலயங்கள் காரணமாகத் தாம் பாரம்பரியமாக வாழ்ந்து வந்த நிலங்களைத் இழந்துவிட்டார்கள் என்று தெரிவித்தே வலி. வடக்கு விவசாயிகள் இந்த அடிப்படை உரிமை மீறல் மனுவைத் தாக்கல் செய்திருந்தனர்.
யாழ். மாவட்டச் செயலகம் முன்வைத்த ஆவணத்தின் அடிப்படையில் 11ஆயிரத்து, 648 குடும்பங்களைச் சேர்ந்த 42ஆயிரத்து, 505 பேர் சங்கானை, சாவகச்சேரி, கரவெட்டி, கோப்பாய், காரைநகர் ஆகிய உயர்பாதுகாப்பு வலயப் பிரதேசங்களில் மீளக்குடியமர்த்தப்பட வேண்டியவர்களாக உள்ளனர்.
தெல்லிப்பளையைச் சேர்ந்த 6ஆயிரத்து, 928 குடும்பங்களும் மீளக்குடியமர்த்தப்பட வேண்டி உள்ளன என்று மாவட்டச் செயலகத்தின் அறிக்கை கூறுகின்றது.
பலாலியைச் சுற்றி உள்ள உயர் பாதுகாப்பு வலயங்களைச் சேர்ந்த 7ஆயிரத்து, 456 குடும்பங்களையும் மீளக்குடியமர்த்துமாறு 2006ஆம் ஆண்டு உயர் நீதிமன்றம் அரசுக்கு உத்தரவிட்டிருந்த போதும் அவற்றில் பெரும்பாலான குடும்பங்கள் இன்னும் மீளக்குடியமர்த்தப்படவில்லை.
அவசரகாலச் சட்டம் நீக்கப்பட்ட நிலையில், உயர் பாதுகாப்பு வலயங்கள் என்று எந்த ஒரு பகுதியையும் அரசோ இராணுவத்தினரோ வரையறுத்து வைத்திருக்க முடியாது என்று எதிர்க் கட்சியினர் சுட்டிக்காட்டி வருகின்ற போதும் இந்த 40 ஆயிரம் மக்கள் உயர் பாதுகாப்பு வலயங்களால் பாதிக்கப்பட்டிருக்கிறார்கள்.
**********************

எல்லை கடந்த அரச பயங்கரவாதம்?
வெளிநாடுகளில் விடுதலைப் புலிகளின் நிதிதிரட்டல், மற்றும் நிதி சார்ந்த நடவடிக்கைகளை கட்டுப்படுத்துவது என்ற போர்வையில் காவல்துறை அதிகாரிகளுக்கு சிறிலங்கா அரசாங்கம் கூடுதல் அதிகாரங்களை வழங்கவுள்ளது.
இது தொடர்பான இரணடு சட்டமூலங்களை சிறிலங்கா அரசாங்கம் நாடாளுமன்றத்தில் சமர்ப்பித்துள்ளது.
இதன்படி உள்நாட்டிலோ வெளிநாடுகளிலோ சிறிலங்காவுக்கு எதிரான தீவிரவாத செயற்பாடுகளில் ஈடுபடுபவர்களின் சொத்துக்களைப் பறிமுதல் செய்யும் அதிகாரங்கள் காவல்துறை அதிகாரிகளுக்கு வழங்கப்படவுள்ளது.
உதவி காவல்துறை அத்தியட்சகர் பதவிக்கு மேல் உள்ள அதிகாரிகள் இந்தச் சட்டத்தின் திருத்தத்தின் மூலம் தீவிரவாதத்துக்குத் துணை போனவர்களின் சொத்துக்களை முடக்குவதற்கும் பறிமுதல் செய்வதற்கும் அதிகாரங்கள் வழங்கப்படவுள்ளன.
அவசரகாலச்சட்டம் நீக்கப்பட்ட பின்னர் அதன் கீழ் வழங்கப்பட்டிருந்த படையினருக்கான அதிகாரங்களை, வௌ;வேறு சட்டங்களின் மூலம் முப்படையினர் மற்றும் காவல்துறையினருக்கு வழங்குவதற்கு சிறிலங்கா அரசாங்கம் நடவடிக்கை எடுத்து வருவது குறிப்பிடத்தக்கது.
**********************

மகிந்த சிந்தனையில் தொடரும் மர்மமனிதன்
சிறிலங்கா அதிபருடனான சந்திப்பின் பின்னர் மர்மமனிதர்களின் பிரச்சினைக்கு முற்றுப்புள்ளி ஏற்படும் என்று நம்பியிருந்த யாழ்ப்பாண மக்கள் ஏமாற்றமடைந்துள்ளனர்.
நேற்றிரவும் யாழ்ப்பாணத்தில் பல்வேறு இடங்களில் மர்ம மனிதர்களின் தாக்குதலுக்குப் பொதுமக்கள் இலக்காகியுள்ளனர்.
நவாலி, அட்டகிரிப் பாடசாலைக்கு முன்பாக வீடு ஒன்றுக்குள் நேற்றிரவு நுழைந்த மர்மமனிதன் உடைகளை உலர விட்டுக் கொண்டிருந்த பெண் ஒருவரை தாக்கி விட்டுத் தப்பியோடியுள்ளார்.
குறித்த பெண்ணை பின்புறமாகக் கட்டிப் பிடித்து கழுத்தை நெரித்த மர்மமனிதன், அவர் கத்திக் குழறியதும் தப்பியோடியுள்ளார்.
பொதுமக்கள் அவரைத் துரத்திக் கொண்டு சென்றபோது அங்கு சிறிலங்கா இராணுவத்தினர் நின்றதாகவும் தகவல்கள் தெரிவிக்கின்றன.
ஊர்காவற்றுறை, பருத்தியடைப்புப் பகுதியில் நேற்றிரவு 9 மணியளவில் சந்தேகத்துக்கிடமான முறையில் நடமாடிய இருவரைப் பின் தொடர்ந்து சென்ற இளைஞர்கள் இருவர், மர்மமனிதர்களினால் தாக்கப்பட்டுள்ளனர்.
இந்தச் சம்பவத்தில் இரு இளைஞர்கள் காயமடைந்துள்ளனர்.
சித்தன்கேணி சிவன் கோவில் பகுதியில் நேற்றிரவு 7 மணியளவில் வீடொன்றுக்குள் நுழைய முற்பட்ட இருவர் அங்கிருந்தவர்கள் விழிப்படைந்ததை அடுத்து தப்பி ஓடியுள்ளதாகவும் தகவல்கள் தெரிவிக்கின்றன.
மர்மமனிதர்கள் பிரச்சினைக்கு உடன் தீர்வு காணப்பட வேண்டும் என்று வலியுறுத்தி யாழ்ப்பாணத்தில் இன்று ஒரு நாள் அடையாள உண்ணாவிரதப் போராட்டம் நடத்த திட்டமிடப்பட்டிருந்தது.
ஆனால் சிறிலங்கா அதிபர் மகிந்த ராஜபக்சவை கடந்த வியாழக்கிழமை மாலை தமிழ்க்கட்சிகளின் பிரதிநிதிகள் சந்தித்ததை அடுத்து இந்தப் போராட்டம் கைவிடப்பட்டது.
சிறிலங்கா அதிபருடனான சந்திப்பின் பின்னராவது மர்மமனிதர்கள் பிரச்சினைக்கு முற்றுப்புள்ளி வைக்கப்படும் என்று நம்பியிருந்த யாழ்ப்பாண மக்கள் நேற்றிரவு ஏற்பட்ட பதற்ற நிலையால் ஏமாற்றமும் அதிர்ச்சியும் அடைந்துள்ளதாகவும் தகவல்கள் தெரிவிக்கின்றன
**********************

Friday, 9 September 2011

செய்திகள் 09/09


விசேட அறிக்கை தாக்கல் செய்ய சர்வதேச மன்னிப்புச் சபை தயார்.
ஜெனிவாவில் ஆரம்பமாகவுள்ள ஐ.நா. மனித உரிமைகள் பேரவைக் கூட்டத் தொடரின்போது இலங்கையின் நல்லிணக்க ஆணைக்குழுவிற்கு எதிரான விசேட அறிக்கையொன்றைத் தாக்கல் செய்வதற்கு சர்வதேச மன்னிப்புச்சபை திட்டமிட்டுள்ளது எனத் தெரிய வருகிறது.
இந்தக் கூட்டத் தொடரில் கலந்துகொள்ளும் இலங்கை அரசு, மனித உரிமை மீறல்கள் சம்பந்தமான சர்வதேசத்தின் குற்றச்சாட்டுகளை சமாளிப்பதற்கு நல்லிணக்க ஆணைக்குழுவைப் பயன்படுத்தலாமெனக் கருதப்படுவதால் மன்னிப்புச்சபை இந்த விசேட அறிக்கையைத் தயார் செய்து வருகிறது என இராஜதந்திர வட்டாரங்கள் தெரிவித்தன.
இறுதிப்போரில் நடைபெற்ற மனித உரிமை மீறல் குற்றச்சாட்டுகள் குறித்து நல்லிணக்க ஆணைக்குழுவின் விசாரணைகளில் ஆராயப்படவில்லையென்று குறிப்பிட்டு தனது அறிக்கையைத் தயார் செய்துவரும் மன்னிப்புச்சபை இது தொடர்பில் இலங்கையின் மனித உரிமை ஆர்வலர்களிடம் கருத்தறியும் செயற்பாடுகளிலும் ஈடுபட்டது என அந்த வட்டாரங்கள் தெரிவித்தன.
இதேவேளை, ஐ.நா.மனித உரிமைகள் சபைக் கூட்டத்தில் அரசுக்கு எதிரான பிரசாரங்களை முறியடிப்பதற்கான ஆதரவைத் திரட்டும் பேச்சுகளில் இலங்கைத் தரப்பினர் ஈடுபட்டு வருகின்றனர் எனத் தெரிவிக்கப்படுகிறது.
*****************

றொபேட் ஓ பிளேக் ஸ்ரீலங்காவுக்கு பயணம்
அமெரிக்க இராஜாங்கத் திணைக்களத்தின் தெற்கு மத்திய ஆசியப் பிராந்தியங்களுக்கான உதவிச் செயலர் றொபேட் ஓ பிளேக் அடுத்த வாரம் சிறிலங்காவுக்குப் பயணம் மேற்கொள்ளவுள்ளார்.
அமெரிக்க இராஜாங்கத் திணைக்களத்தின் பேச்சாளர் பணியகத்தில் இருந்து நேற்று வெளியிடப்பட்ட செய்திக்குறிப்பிலேயே இந்தப் பயணத்திட்டம் குறித்து உறுதிப்படுத்தப்பட்டுள்ளது.
எதிர்வரும் 12ம் நாள் தொடக்கம் 16ம் நாள் வரை சிறிலங்கா மற்றும் இந்தியாவில் பிளேக் பயணம் மேற்கொள்வார் என்றும் அந்தச் செய்திக்குறிப்பில கூறப்பட்டுள்ளது.
சிறிலங்காவில் அரசாங்க அதிகாரிகள், பொது அமைப்புகளின் பிரதிநிதிகள், பல்கலைக்கழக மாணவர்கள், அரசியல் தலைவர்களை அவர் சந்தித்துப் பேசவுள்ளதாகவும் அமெரிக்க இராஜாங்கத் திணைக்களம் அறிவித்துள்ளது.
கடந்தமாதம் 29ம் நாள் சிறிலங்கா செல்லவிருந்த பிளேக், ஐரின் சூறாவளியால் தனது பயணத்திட்டத்தைப் பிற்போட்டிருந்தார் என்பது குறிப்பிடத்தக்கது.
*****************

தடுத்து வைக்கப்பட்டோர் தொடர்பில் ஆய்வு
சட்ட நடவடிக்கை எடுக்காது நீண்ட காலமாக தடுத்து வைக்கப்பட்டுள்ள கைதிகள் தொடர்பில் ஆய்வு நடத்தப்படவுள்ளது.
எவ்வித நீதிமன்ற நடவடிக்கைகளும் எடுக்காது மிக நீண்ட காலமாக தடுத்து வைக்கப்பட்டுள்ள கைதிகள் தொடர்பில் மனித உரிமை ஆணைக்குழு ஆய்வு நடத்த உள்ளது.
சில கைதிகள் பத்து ஆண்டுகளுக்கு அதிகமான காலம் சிறையில் தடுத்து வைக்கப்பட்டுள்ளதாகக் குறிப்பிடப்படுகிறது.
இவ்வாறான நபர்களுக்கு நியாயம் வழங்கும் நோக்கில் ஆய்வு நடத்தப்பட உள்ளது.
பெரும் எண்ணிக்கையிலான தமிழ் அரசியல் கைதிகள் இவ்வாறு நீதிமன்றில் ஆஜர்படுத்தப்படாது தடுத்து வைக்கப்பட்டுள்ளமை குறிப்பிடத்தக்கது.
*****************

கிறிஸ் மனிதனுக்கு அஞ்சும் அரசு
தமிழ்த் தேசியக் கூட்டமைப்பால் நேற்று நாடாளுமன்றில் கொண்டுவரப்பட்ட யாழ்.நாவாந்துறை கிறீஸ் மர்ம மனிதன் விவகாரம் தொடர்பான சபை ஒத்திவைப்பு வேளை பிரேரணை ரத்துச் செய்யப்பட்டது.
தமிழ்த் தேசியக் கூட்டமைப்பின் யாழ். மாவட்ட நாடாளுமன்ற உறுப்பினர் அ.விநாயகமூர்த்தி இந்தப் பிரேரணையைக் கொண்டு வந்தார்.
அவர் பிரேரணையை வாசிக்கத் தொடங்கியதும் திடீரெனக் குறுக்கீடு செய்த அரசின் பிரதம கொறடா தினேஷ் குணவர்த்தன நாவாந்துறை மர்ம மனிதன் விவகாரம் நீதிமன்ற விசாரணையில் இருப்பதால் இந்தப் பிரேரணையை இங்கு கொண்டு வரமுடியாது என்று கூறினார்.
இதற்கு எதிர்க்கட்சிகள் எதிர்ப்பைத் தெரிவித்தன. இந்தப் பிரேரணை நன்கு ஆராயப்பட்டே விவாதிப்பதற்கு அனுமதிக்கப்பட்டுள்ளது.
யாருக்கும் தெரியாமல் திருட்டுத்தனமாக இது கொண்டு வரப்படவில்லை.
ஆகவே, இதை விவாதிப்பதற்கு அனுமதி வழங்கப்பட வேண்டும் என்று ஐ.தே.க. நாடாளுமன்ற உறுப்பினர் தயாசிறி ஜயசேகர கூறினார்.
தகவல்கள் அனைத்தும் உடனே கிடைப்பதில்லை. இப்போதுதான் இந்தப் பிரேரணை பற்றிய தகவல்கள் கிடைத்தன.
இதனால் இந்தப் பிரேரணையை விவாதத்திற்கு விட முடியாது என்று தாம் தீர்மானம் எடுத்துள்ளோம் என்று தினேஷ் குணவர்த்தன மீண்டும் கூறினார்.
தினேஷின் இந்தக் கூற்றுக்கு ஐக்கிய தேசியக்கட்சி மற்றும் தமிழத் தேசியக் கூட்டமைப்பு நாடாளுமன்ற உறுப்பினர்கள் எதிர்ப்பைத் தெரிவித்திருந்தனர்.
கிறீஸ் மனிதனுக்குப் பயந்தே அரசு இந்தப் பிரேரணையை எதிர்க்கின்றது என்று கூறினர்.
அதற்கு ஐக்கிய தேசியக்கட்சிதான் தமிழ்த் தேசியக் கூட்டமைப்புக்குப் பயந்து இந்தப் பிரேரணையை ஆதரிக்கின்றது என்று அரச அமைச்சர்கள் கூறினர்.
இந்தப் பிரேரேணை நீதிமன்ற விசாரணைக்கு உட்படுத்தப்பட்டிருப்பதால் இதை விவாதிப்பதற்கு அனுமதி வழங்கமுடியாது என்று அப்போது சபைக்குத் தலைமை தாங்கிக்கொண்டிருந்த குழுக்களின் பிரதித் தலைவரான ஈபிடிபி முருகேசு சந்திரகுமார் தீர்ப்பளித்தார்.
இதனால் இந்தப் பிரேரணை ரத்தானது. இருப்பினும், எதிர்க்கட்சிகள் கடும் எதிர்ப்பைத் தெரிவித்தன.
*****************

ரணிலின் நிலை என்ன?
18 ஆவது திருத்தத்திற்கு பதிலாக ஜனநாயகத்தை பாதுகாக்கும் வகையில் புதியதொரு சட்டத்திருத்தத்தை கொண்டுவர பூரண ஒத்துழைப்பை வழங்க எதிர்க்கட்சிகள் தயாராயிருப்பதாக எதிர்க்கட்சித் தலைவர் ரணில் விக்கிரமசிங்க தெரிவித்துள்ளார்.
17 ஆவது திருத்தத்தை நிறைவேற்றியிருந்தால் இன்று அரசு ஜெனிவாவுக்கு ஓடவேண்டிய தேவை ஏற்பட்டிருக்காது என்றும் அவர்கூறினார்.
பாராளுமன்றத்தில் நேற்று வியாழக்கிழமை இடம்பெற்ற குற்றவியல் நடவடிக்கை முறை சட்டக் கோவை விஷேட ஏற்பாடுகள் சட்டத்தின் கீழான கட்டளைகளை அங்கீகரிப்பதற்கான பிரேரணையை எதிர்த்து உரையாற்றுகையிலேயே ரணில் விக்கிரமசிங்க இதனைத் தெரிவித்தார்.
கைது செய்யப்பட்ட ஒருவருக்காக சட்டத்தரணி ஆஜராக முடியாதென நீதி அமைச்சர் தெரிவித்தார்.
எனினும் அமெரிக்கா, இங்கிலாந்து போன்ற நாடுகளில் முன்னெடுக்கப்படுகின்ற வழக்குகளில் சட்டத்தரணிகள் ஆஜராகியிருக்கின்றனர்.
ஒருவர் கைது செய்யப்பட்டதன் பின்னர் அவருக்காக சட்டத்தரணி ஆஜராகலாம் இது சர்வதேச சட்டத்தில் மிகத் தெளிவாகக் குறிப்பிடப்பட்டுள்ளது.
எனினும் காவல்துறையினரின் அதிகாரம் இன்று இராணுவத்துக்கு வழங்கப்பட்டுள்ளது.
கைது செய்யப்பட்ட ஒருவரை 48 மணிநேரம் தடுத்து வைத்திருக்கலாம் அதற்கான அதிகாரம் உதவி காவல்துறை அத்தியட்சரிடம் உள்ளது.
எனினும் அது இப்போது இராணுவத்தினரிடம் வழங்கப்பட்டுள்ளது எனவும் அவர் தெரிவித்துள்ளார்.
18 ஆவது திருத்தம் நிறைவேற்றப்பட்டநாள் தேசிய துக்க தினமாகும்.
அதேபோல் குற்றவியல் நடவடிக்கை முறை சட்டக் கோவை விஷேட செயற்பாடுகள் சட்டத்தின் கீழான கட்டளைகளை அங்கீகரிப்பதற்கான பிரேரணை சமர்ப்பிக்கப்பட்ட இந்த நாளும் தேசிய துக்க தினமாகும் எனவும் ரணில் விக்கிரமசிங்க தெரிவித்துள்ளார்.
*****************

ஈரானுடன் நட்புறவு பாலம்
ஈரான் இஸ்லாமியக் குடியரசிலிருந்து எட்டு உறுப்பினர்களைக் கொண்ட தூதுக் குழுவொன்று இன்று இலங்கைக்கு விஜயம் செய்கின்றது.
இஸ்லாமியத் தத்துவவியல், சமூகவியல், பொருளியல் உட்பட பல்வேறு துறைகளைச் சார்ந்த நிபுணர்கள் இந்தக் குழுவில் அடங்குகின்றனர்.
இவர்கள் ஒரு வாரகாலம் இலங்கையில் தங்கியிருப்பர்.
இந்தக் காலப் பகுதியில் களனிப் பல்கலைக்கழகத்தின் பாளி மற்றும் பௌத்த பீடத்துக்கு விஜயம் செய்து பௌத்த சமயத் தலைவர்களைச் சந்தித்து இரு சமயங்களுக்கிடையிலான விடயங்கள் குறித்து கலந்துரையாடுவர்.
கொழும்பில் கிறிஸ்தவ சமயத் தலைவர்களைச் சந்தித்துப் பேசுவதற்கும் ஏற்பாடுகள் செய்யப்பட்டுள்ளன.
இரு சமயங்களுக்குமிடையிலான பொதுவான புரிந்துணர்வுகள் எனும் தலைப்பில் இந்தச் சந்திப்பு இடம்பெறவுள்ளது.
ஈரான் தூதுக்குழு கிழக்கிலங்கையில் விரிவான விஜயம் ஒன்றையும் மேற்கொள்ளும்.
தென் கிழக்குப் பல்கலைக்கழகம், அட்டாளைச்சேனை கல்விக் கல்லூரி உட்பட கிழக்கிலங்கையின் பல அரபுக் கல்லூரிகளுக்கும் இந்தக் குழு விஜயம் செய்யும்.
மட்டக்களப்பு நகரில் இந்தக் குழுவினர் இந்து மதத் தலைவர்களையும் சந்தித்து விரிவான கலந்துரையாடல்களை மேற்கொள்வர்.
அகில இலங்கை ஜம்மிய்யத்துல் உலமா பிரதிநிதிகளையும் இக்குழுவினர் சந்தித்து விரிவான கருத்துப் பரிமாறல்களில் ஈடுபடுவர்.
கொழும்பிலுள்ள ஈரான் இஸ்லாமியக் குடியரசு தூதரகத்தின் கலாசாரப் பிரிவு இந்த நிகழ்வுகளை ஏற்பாடு செய்துள்ளது.
*****************

ஸ்ரீலங்காவில் துருக்கியின் போர்க் கப்பல்
நேட்டோவில் அங்கம் வகிக்கும் துருக்கியின் கடற்படைப் போர்க்கப்பல் ஒன்று கொழும்புத் துறைமுகத்துக்கு நான்கு நாள் பயணமாக சென்றுள்ளதாக சிறிலங்கா கடற்படை அறிவித்துள்ளது.
துருக்கிக்கும், சிறிலங்காவுக்கும் இடையில் இராஜதந்திரத் தொடர்புகள் ஏற்பட்டு 104 ஆண்டுகள் கழிந்துள்ள நிலையில் முதல்முறையாக அந்த நாட்டுப் போர்க்கப்பல் ஒன்று கொழும்பு வந்துள்ளதாக சிறிலங்கா கடற்படைப் பேச்சாளர் கொமாண்டர் கோசல வர்ணகுணசூரிய தெரிவித்துள்ளார்.
நேட்டோவில் அங்கம் வகிக்கும் நாடுகளில் இரண்டாவது பெரிய இராணுவத்தைக் கொண்டுள்ள துருக்கி லிபியாவில் மேற்கொள்ளப்படும் நேட்டோ படை நடவடிக்கையிலும் பங்கேற்கிறது.
இந்தநிலையில் துருக்கியக் கடற்படையின் ஜெம்லிக் என்ற போர்க்கப்பல் நேற்று கொழும்புத் துறைமுகத்துக்கு நான்கு நாள் பயணமாக வந்துள்ளது குறித்து சிறிலங்கா கடற்படை மகிழ்ச்சி வெளியிட்டுள்ளது.
இந்தப் போர்க்கப்பலில் 151 வது கூட்டு அதிரடிப் படையின் தளபதி றியர் அடிமிரல் சினான் எருக்ருல் மற்றும், 30 அதிகாரிகளும் 241 கடற்படையினரும் கொழும்பு சென்றுள்ளனர்.
*****************








Thursday, 8 September 2011

செய்திகள் 07/09


விசாரணைப் பொறிமுறை குறித்து கருத்தாய்வு
போர்க் குற்றச்சாட்டுக்களை விசாரிப்பதற்கான சர்வதேச பொறிமுறை ஒன்றை இலங்கைக்கு எதிராக ஏற்படுத்துவது தொடர்பாக அங்குள்ள அரசியல் கட்சிகளின் கருத்துக்களை அறியும் முயற்சியில் கொழும்பிலுள்ள ஐரோப்பிய நாடுகளின் இராஜதந்திரிகள் ஈடுபட்டுள்ளனர்.
ஐக்கிய நாடுகள் மனித உரிமைகள் சபையின் 18ஆவது கூட்டத்தொடர் அடுத்த வாரம் ஆரம்பமாகும் நிலையில் மேற்கு ராஜதந்திரிகளால் இந்த நகர்வு மேற்கொள்ளப்பட்டுள்ளது.
எதிர்வரும் 12ஆம் திகதி ஜெனீவாவில் ஐ.நா. மனித உரிமைகள் சபைக் கூட்டத் தொடர் ஆரம்பமாகிறது.
அதில் போர்க் குற்றங்களுக்கு இலங்கை பொறுப்புக் கூறுவதற்கான பொறிமுறை ஒன்றை ஏற்படுத்த மேற்கு நாடுகள் கடும் அழுத்தங்களைக் கொடுக்கும் என்று நம்பப்படுகிறது.
அமெரிக்கா, பிரிட்டன், ஜேர்மனி போன்ற நாடுகள் இலங்கை தனது பொறுப்புக்கூறும் கடமையைத் தட்டிக்கழிக்க முடியாது என்ற உறுதியான நிலைப்பாட்டில் இருப்பதால், ஜெனீவா மாநாட்டில் போர்க் குற்றங்களை விசாரிப்பதற்கு அனைத்துலக விசாரணைக் குழு ஒன்றை அமைப்பதற்கான தீர்மானத்தை அவை முன்வைக்கக்கூடும் என்று உறுதியாக நம்பப்படுகிறது என்று நியூயோர்க்கில் உள்ள ஐ.நா. அலுவலக இலங்கை அதிகாரிகள் அரசுக்கு அறிவுறுத்தி உள்ளனர்.
அதேவேளையில், மனித உரிமை மீறல்கள் தொடர்பில் பொறுப்புக் கூறுவதற்கான சர்வதேச விசாரணை ஒன்று குறித்து இலங்கையில் உள்ள அரசியல் கட்சிகள் என்ன நினைக்கின்றன என்பதை அறிய, கொழும்பிலுள்ள இராஜதந்திரிகள் கட்சித் தலைவர்களுடன் சந்திப்புக்களை நடத்தியிருக்கிறார்கள்; நடத்தி வருகிறார்கள்.
சில தினங்களுக்கு முன்னர் ஐரோப்பிய ஒன்றியம், நோர்வே மற்றும் ஜேர்மன் ஆகியவற்றுக்கான தூதவர்கள் எதிர்க்கட்சித் தலைவர் ரணில் விக்கிரமசிங்கவை அவரது உத்தியோகபூர்வ இல்லத்தில் சந்தித்து இது தொடர்பில் கருத்துக்களைப் பரிமாறி இருந்தனர்.
ஜெனிவா கூட்டத் தொடரில் பேசப்படவுள்ள நம்பப்படும் விடயங்கள் குறித்து இரு தரப்பினருக்கும் இடையில் நீண்ட நேரம் கலந்துரையாடப்பட்டதாகப் பெயர் குறிப்பிட விரும்பாத மூத்த இராஜதந்திரி ஒருவர் தெரிவித்தார்.
இதேபோல் கொழும்பிலுள்ள ஐரோப்பிய நாடுகளின் தூதுவர்கள் தமிழ்க்கட்சிகளின் பிரமுகர்களுடனும் பேச்சுகளை நடத்தியிருக்கின்றனர் எனத் தெரிவிக்கப்படுகிறது.
இதே நோக்கத்துக்காகவே கொழும்பு வர இருந்த அமெரிக்க இராஜாங்கத் திணைக்களத்தின் தெற்கு மற்றும் மத்திய ஆசிய விவகாரங்களுக்குப் பொறுப்பான துணைச் செயலர் ரொபேர்ட் ஓ பிளேக் தமிழ்த் தேசியக் கூட்டமைப்பினரைச் சந்தித்துப் பேச இருந்தார் என்றும் தெரிவிக்கப்படுகிறது.
ஆனால், அமெரிக்காவைத் தாக்கிய புயல் காரணமாக அந்தச் சந்திப்பு பின்னர் கைவிடப்பட்டிருந்தது.
பிளேக்கின் பயணத்தின்போது அவர், அரசுத் தலைவர் மஹிந்த ராஜபக்ஷவையும் சந்தித்து இந்த விவகாரம் தொடர்பில் தீர்க்கமாகப் பேச எண்ணியிருந்தார் என்று கொழும்பு இராஜதந்திர வட்டாரங்கள் தெரிவிக்கின்றன.
கொழும்பிலுள்ள தூதவர்களின் இத்தகைய செயற்பாடுகள் குறித்து வெளிவிவகார அமைச்சின் அதிகாரிகள் கடும் அதிருப்தியை வெளியிட்டனர்.
*****************

குடும்ப மயமாகும் ஸ்ரீலங்காவின் சர்வாதிகார ஆட்சி
சிறிலங்கா அதிபரின் பதில் செயலராக கோத்தாபய ராஜபக்ச நியமிக்கப்பட்டுள்ளார்.
சிறிலங்கா அதிபரின் செயலர் லலித் வீரதுங்க வெளிநாடு சென்றுள்ளதாலேயே கோத்தாபய ராஜபக்ச பதில் செயலராக நியமிக்கப்பட்டுள்ளார்.
இதுதொடர்பான சிறப்பு வர்த்தமானி அறிவித்தலை சிறிலங்கா அதிபர் மகிந்த ராஜபக்ச வெளியிட்டுள்ளதாக கொழும்பு ஊடகம் ஒன்று தகவல் வெளியிட்டுள்ளது.
வழக்கத்தில் லலித் வீரதுங்க வெளிநாடு செல்கின்ற போது, சிறிலங்கா அதிபரின் பணியக தலைமை அதிகாரி காமினி சேனாரத் பதில் செயலராக கடமையாற்றுவார்.
ஆனால் இம்முறை கோத்தாபய ராஜபக்ச பதில் செயலராக நியமிக்கப்பட்டுள்ளார்.
லலித் வீரதுங்க நாடு திரும்பும் வரை அவர் இந்தப் பொறுப்பில் இருப்பார்.
சிறிலங்காவின் அடுத்த பிரதமராக கோத்தாபய ராஜபக்சவை முன்னிறுத்த சிறிலங்கா அதிபர் முனைவதையே இது காட்டுவதாக அமைச்சர்கள் பலரும் விசனமடைந்துள்ளதாகவும் கொழும்பு ஊடகம் தகவல் வெளியிட்டுள்ளது.
*****************

நடுநிலையாளரை ஏற்க மறுத்த ஸ்ரீலங்கா
போரின் இறுதிக்கட்டத்தில் பொதுமக்களின் இழப்புகளைத் தவிர்ப்பதற்காக எஞ்சியுள்ள போராளிகள் சரணடைவதற்கான ஏற்பாடுகளை மேற்கொள்ள நடுநிலையாளர் ஒருவரை சிறிலங்காவை ஏற்க வைப்பதற்கு அமெரிக்கா மேற்கொண்ட முயற்சி தோல்வியில் முடிந்ததாக விக்கிலீக்ஸ் தகவல் வெளியிட்டுள்ளது.
2009 மே 17ம் நாள் சிறிலங்காவுக்கான அப்போதைய அமெரிக்கத் தூதுவர் றொபேட் ஓ பிளேக் அமெரிக்க இராஜாங்கத் திணைக்களத்துக்கு அனுப்பிய தகவல் பரிமாற்றக்குறிப்பு ஒன்றிலேயே இந்தத் தகவல் இடம்பெற்றுள்ளது.
சிறிலங்காவின் நிலைமை தொடர்பாக அனுப்பப்பட்ட இந்த அறிக்கையில், மே 17ம் நாள் சிறிலங்கா பாதுகாப்புச் செயலர் கோத்தாபய ராஜபக்ச போர் முடிந்து விட்டதாக அறிவித்துள்ளதாகவும், சிறிலங்கா அதிபர் மகிந்த ராஜபக்ச அதனை மே 19ம் நாள் அதிகாரபூர்வமாக அறிவிக்கவுள்ளதாகவும் கூறப்பட்டுள்ளது.
அன்றைய நாள் முழுவதும் பாதுகாப்புச் செயலர் கோத்தாபய ராஜபக்ச, வெளிவிவகார அமைச்சர் றோகித போகொல்லாகம உள்ளிட்ட சிறிலங்கா அதிகாரிகளுடன் தான் தொடர்பில் இருந்ததாகவும் பிளேக் குறிப்பிட்டுள்ளார்.
பாதுகாப்பு வலயத்துக்குள் அதிக எண்ணிக்கையான மக்கள் இன்னமும் இருப்பதாக மன்னார் ஆயர் தன்னிடம் தொடர்பு கொண்டு கூறியதாகவும், பிளேக்கின் அறிக்கையில் கூறப்பட்டுள்ளது.
அத்துடன் எஞ்சியுள்ள புலிகள் சரணடையத் தயாராக இருப்பதாகவும், அதற்கான ஏற்பாடுகளை செய்யுமாறும் விடுதலைப் புலிகள் கேட்டுக் கொண்டதாக நோர்வே தூதுவர் தன்னிடம் கூறியதாகவும் பிளேக் தனது அறிக்கையில் கூறியுள்ளார்.
பொதுமக்களுக்கு இழப்புகள் ஏற்படுவதைத் தவிர்க்கும் வகையில் எஞ்சியுள்ள போராளிகளை சரணடைவதற்கான நடுநிலையாளர் ஒருவரை ஏற்க வைப்பது தொடர்பாகவே தான் சிறிலங்கா அதிகாரிகளுடன் அன்றைய நாள் முழுவதும் தொடர்பில் இருந்ததாகவும் பிளேக் குறிப்பிட்டுள்ளார்.
மே 17ம் நாள் அனைத்துலக செஞ்சிலுவைக் குழுவை நடுநிலையாளராக ஏற்றுக் கொண்டு விடுதலைப் புலிகளை சரணடைவதற்கு ஏற்பாடு செய்ய முன்வருமாறு கோத்தாபய ராஜபக்சவை சந்தித்து வேண்டுகோள் விடுத்ததாகவும் பிளேக் குறிப்பிட்டுள்ளார்.
ஆனால் போர் முடிந்து விட்டது என்று கூறி கோத்தாபய ராஜபக்ச அந்த நடுநிலை முயற்சியை ஏற்க மறுத்து விட்டதாகவும், ஆனால் சரணடையும் அனைவரையும் ஏற்றுக் கொள்ளுமாறு படையினருக்கு தான் அறுவுறுத்தியிருப்பதாக அவர் கூறியதாகவும் பிளேக் அனுப்பிய குறிப்பில் கூறப்பட்டுள்ளது.
அதேவேளை அன்றையநாள் போர் வலயத்தில் இருந்து சடலங்களையும். காயமடைந்தவர்களையும் மீட்க அனைத்துலக செஞ்சிலுவைக் குழுவை அனுமதிக்குமாறு சிறிலங்கா அதிபரின் ஆலோசகர் பசில் ராஜபக்சவை தான் கேட்டுக் கொண்டதாகவும் பிளேக் குறிப்பிட்டுள்ளார்.
தனது வேண்டுகோளை நிராகரித்த பசில் ராஜபக்ச, சிறிலங்கா அரசாங்கமே அதனைப் பார்த்துக் கொள்ளும் என்று கூறிவிட்டதாகவும் பிளேக் தனது அறிக்கையில் குறிப்பிட்டுள்ளதாக விக்கிலீக்ஸ் தகவல் வெளியிட்டுள்ளது.
*****************

பொய் சொல்லும் ஆவணப்படம்
சிறிலங்காவின் கொலைக்களங்கள் ஆவணப்படத்துக்குப் போட்டியாக, சிறிலங்கா பாதுகாப்பு அமைச்சு தயாரித்த "டுநைள யுபசநநன ருpழn" என்ற ஆவணப்படம் ஐ.நா வளாகத்தில் நேற்று திரையிடப்பட்டுள்ளது.
இதையடுத்து ஐ.நாவுக்கான சிறிலங்காவின் நிரந்தர வதிவிடப் பிரதிநிதி பாலித கொஹன்னவும், பிரதி வதிவிடப் பிரதிநிதி மேஜர் ஜெனரல் சவீந்திர சில்வாவும் ஊடகவியலாளர்களின் கேள்விகளுக்குப் பதிலளித்துள்ளனர்.
சரணடைய முன்வந்த விடுதலைப் புலிகளின் தலைவர்கள் படுகொலை செய்யப்பட்ட- வெள்ளைக்கொடி விவகாரத்தில் பாலித கொஹன்னவின் பங்கு என்ன என்று அவரிடம் இன்னர் சிற்றி பிரஸ் கேள்வி எழுப்பியிருந்தது.
அதற்கு அவர் நம்பியாரிடம் கேளுங்கள் என்று பதிலளித்துள்ளார்.
இதுபற்றி தாம் நம்பியாரிடம் எழுப்பிய கேள்விகளுக்கு அவர் பதிலளிக்கவில்லை என்று இன்னர்சிற்றி பிரஸ் கூறியுள்ளது.
ஆனால் அல்-ஜெசீராவுக்கு அவர் அளித்துள்ள செவ்வி ஒன்றில், அப்போதைய வெளிவிவகார செயலர் பாலித கொஹன்னவுடன் பேசுமாறு கூறியிருந்தாகவும் இன்னர் சிற்றிபிரஸ் சுட்டிக்காட்டியுள்ளது.
ஆனால் நேற்று பாலித கொஹன்னவிடம் இதுகுறித்து கேள்வி எழுப்பிய போது இராணுவத்தில் தனது பங்கு இல்லை என்று குறிப்பிட்டுள்ளார்.
ஒரு விடுதியில் நம்பியாரைச் சந்தித்துப் பேசியதை ஒப்புக்கொண்ட கோஹன்ன, அந்த உரையாடலை நினைவுபடுத்த முடியவில்லை என்றும் கூறியுள்ளார்.
அதேவேளை, புதுக்குடியிருப்பு மருத்துவமனை மீதான எறிகணைத் தாக்குதலில் 58வது டிவிசன் தொடர்புபட்டிருந்ததாக ஐ.நா அறிக்கையில் கூறப்பட்டுள்ளது குறித்து மேஜர் ஜெனரல் சவீந்திர சில்வாவிடம் இன்னர்சிற்றி பிரஸ் கேள்வி எழுப்பியிருந்தது.
அதற்கு, தனது 58வது டிவிசன் பற்றி அந்த அறிக்கையில் கூறப்படவில்லை என்று முதலில் மேஜர் ஜெனரல் சவீந்திர சில்வா பதிலளித்திருந்தார்.
இதையடுத்து இன்னர்சிற்றி பிரஸ் செய்தியாளர் 55வது, 58வது டிவிசன்களின் பெயர்கள் குறிப்பிடப்பட்டுள்ள அந்த பந்தியை உரத்து வாசித்துக் காண்பித்தார்.
இதையடுத்து மேஜர் ஜெனரல் சவீந்திர சில்வா, அந்த அறிக்கை தவறானது என்றும், அது 53வது டிவிசன் என்றும் கூறியதுடன் 55வது டிவிசன் அப்போது வேறாரு இடத்தில் இருந்ததாகவும் குறிப்பிட்டுள்ளார்.
ஐ.நா நிபுணர்குழுவின் அறிக்கைக்கு சிறிலங்கா அரசாங்கம் ஏன் பதிலளிக்கவில்லை என்று இன்னர்சிற்றி பிரஸ் கேள்வி எழுப்பிய போது, அது ஐ.நா அறிக்கை அல்ல என்று பாலித கொஹன்ன வாதிட்டுள்ளார்.
*****************

கொடிய சட்டங்களை உருவாக்க தயங்காத அரசு!
நாட்டைப் பாதுகாப்பதற்கும், பயங்கரவாதம் மீண்டும் தலைதூக்குவதைத் தடுப்பதற்கும் என அரசு புதிய சட்டங்களைக் கொண்டு வரத் தயங்காது என்று அமைச்சர் நிமல் சிறிபால டி சில்வா நேற்று நாடாளுமன்றில் கூறினார்.
யாழ்ப்பாணத்தின் தற்போதைய நிலை தொடர்பில் எதிர்க் கட்சித் தலைவர் ஆற்றிய உரைக்குப் பதிலளித்த அமைச்சர் இதனைக் கூறினார்.
இராணுவத்தினர்தான் வடக்கு, கிழக்கில் மக்களைப் பயங்கரவாதத்தில் இருந்து காப்பாற்றினர்.
அவர்களால் கிறீஸ் பூத பீதியைக் கட்டுப்படுத்த முடியாது என்று ரணில் கூறுவது அபத்தம்.
யாழ். மக்கள் இப்போது இயல்பு வாழ்க்கை நடத்துகின்றனர்.
இந்த நிலையைக் குழப்புவதற்காக மக்கள் மத்தியில் பீதி கிளப்பப்பட்டுள்ளது என்றும் அமைச்சர் தெரிவித்தார்.
ரணில் விக்ரமசிங்கவின் முயற்சி வெளிநாட்டுச் சக்திகளைப் பயன்படுத்தி இலங்கை மீது அழுத்தங்கொடுப்பதே என்றும் அவர் சாடினார்.
நாட்டைப் பாதுகாப்பதற்கும், பயங்கரவாதம் மீண்டும் தலைதூக்காதிருப்பதற்கும் அரசு புதிய சட்டங்களைக் கொண்டுவருவதற்குத் தயங்காது என்றும் அமைச்சர் தெரிவித்துள்ளார்.
*****************

அவசரப்பட்டு அவசரகாலச் சட்டத்தை நீக்கியதன் மர்மம் என்ன?
ஐக்கிய நாடுகள் மனித உரிமைகள் பேரவையின் 18 வது அமர்வு ஆரம்பமாவதை முன்னிட்டே இலங்கையில் அவசரகால சட்டம் நீக்கப்பட்டதாக தெ புரொன்ட் லைன் இணையத்தளம் தெரிவித்துள்ளது.
இலங்கை அரசாங்கத்தின் மீது எண்ணற்ற மனித உரிமைமீறல் குற்றச்சாட்டுக்கள் சுமத்தப்பட்டு வருகின்றன.
இந்தநிலையில் மனித உரிமைகள் பேரவையில் இலங்கைக்கு எதிராக பிரேரணை ஒன்றை கொண்டு வர மேற்குலக நாடுகளும் முயற்சித்து வருகி;ன்றன.
இந்தநிலையிலேயே அரசுத் தலைவர் மஹிந்த ராஜபக்ச, இலங்கை நாடாளுமன்றத்தில் அவசரகால சட்டத்தை செப்டெம்பர் 8 ஆம் திகதி முதல் நீக்குவதாக கடந்த ஆகஸ்ட் 25 ஆம் திகதி அறிவித்தார் என்றும் அந்த இணையத்தளம் குறிப்பிட்டுள்ளது.
இலங்கையில் அவசரகால சட்டம் நீக்கப்பட்டமைக்கு இந்திய அழுத்தமே காரணம் என்று கூறப்பட்டது.
எனினும் அதனை இலங்கை மறுத்துள்ளது.
இலங்கையில் அவசரகால சட்டம் நீக்கப்படுவதை பல நாடுகளும் வரவேற்றுள்ளன.
எனினும் இந்த அவசரகால சட்டத்தின் கீழ் கைது செய்யப்பட்ட நூற்றுக்கணக்கான தமிழ் இளைஞர்களின் விடுதலைக்குறித்து சர்வதேச மன்னிப்பு சபை கேள்வி எழுப்பியுள்ளது.
மன்னிப்பு சபையின் ஆசிய பசுபிக் பணிப்பாளர் சேம் ஸராபி, இது தொடர்பில் கருத்துரைக்கையில், ஐக்கிய நாடுகள் மனித உரிமைகள் பேரவையின் 18 வது அமர்வு ஆரம்பிப்பதற்கு முன்னர் இலங்கை தாம் தடுத்து வைத்துள்ள தமிழ் இளைஞர்களின் விடுதலைக் குறித்தும் பயங்கரவாத தடைச்சட்டத்தை மீளமைக்கும் திட்டம் குறித்தும் விளக்கமளிக்க வேண்டும் என்று கேட்டுள்ளார்.
குற்றம் புரிந்தவர்கள் மீது வழக்கு தொடரப்பட வேண்டும் அல்லது நிரபராதிகள் விடுவிக்கப்பட வேண்டும் என்றும் ஸராபி கோரிக்கை விடுத்துள்ளார்.
*****************

பொதுச் சொத்துக்களின் துஸ்பிரயோகம் தொடர்கின்றது.
இம்முறை தேர்தலின் போதும் அரச சொத்துக்கள் துஸ்பிரயோகம் செய்யப்படுவதாக தேர்தல் முக்கிய கண்காணிப்பு அமைப்பான பெபரல் அமைப்பு அறிவித்துள்ளது.
எதிர்வரும் ஒக்ரோபர் மாதம் நடைபெற்ற உள்ளுராட்சி மன்றத் தேர்தல்களை முன்னிட்டு மேற்கொள்ளப்படும் பிரச்சார நடவடிக்கைகளின் போது அரச சொத்துக்கள் துஸ்பிரயோகம் செய்யப்படுவதாகக் குறிப்பிடப்பட்டுள்ளது.
இரத்தினபுரி பிரதேசத்தில் நடைபெற்ற கூட்டமொன்றில் கலந்து கொண்ட போது பெபரல் அமைப்பின் நிறைவேற்றுப் பணிப்பாளர் ரொஹண ஹெட்டியாரச்சி குறிப்பிட்டுள்ளார்.
சட்டவிரோத தேர்தல் பிரச்சார நடவடிக்கைகள் ஏற்கனவே ஆரம்பிக்கப்பட்டுள்ளன.
அரசாங்க வாகனங்கள் மற்றும் ஏனைய சொத்துக்கள் பயன்படுத்தப்படுவதுடன், சட்டவிரோத பதவி உயர்வு, இடமாற்றம் போன்ற நடவடிக்கைகளும் இடம்பெறுவதாக அவர் குற்றம் சுமத்தியுள்ளார்.
இதேவேளை, தேர்தல் சட்ட விதிகளை மீறியக் குற்றச்சாட்டின் பேரில் இதுவரையில் 19 பேர் கைது செய்யப்பட்டுள்ளனர்.
*****************

அவசரகாலச் சட்டம் அமுலில் உள்ளதா?
அவசரகாலச்சட்டம் நீக்கப்பட்டபோதிலும் அச்சட்டத்தின் கீழ் புனர்வாழ்வு ஆணையாளர் நாயகத்தை அரசாங்கம் நியமித்துள்ளதாக தமிழ் தேசியக் கூட்டமைப்பு நாடாளுமன்ற உறுப்பினர் எம்.ஏ. சுமந்திரன் குற்றம் சுமத்தினார்.
அவசரகாலச்சட்டம் பின்கதவால் மீள அறிமுகப்படுத்தப்படுவதாகவும் அவர் விமர்சித்தார்.
22 ஆம் இலக்க பொதுமக்கள் பாதுகாப்புச் சட்டத்தின் கீழ் அரசுத் தலைவருக்கு வழங்கப்பட்டுள்ள அதிகாரத்தின் கீழான இந்நியமனம் குறித்த வர்த்தமானி அறிவித்தல் வெளியிடப்பட்டுள்ளதாகவும் அவர் தெரிவித்தார்.
தற்போது இல்லாத சட்டத்தின் கீழ் எப்படி இந்த நியமனத்தை மேற்கொள்ள முடியும் என அவர் கேள்வி எழுப்பினார்.
அவசரகாலச்சட்டம் பின்கதவால் மீள அறிமுகப்படுத்தப்படுகிறது.
குறைந்தபட்சம் 4 வர்த்தமானி அறிவித்தல்கள் பொதுமக்கள் பாதுகாப்புச் சட்டத்தின் கீழ் வெளியிடப்பட்டுள்ளன என அவர் கூறினார்.
வெளிப்படைத்தன்மையை பேணுவதற்காக வர்த்தமானிகள் அரசாங்க இணையத்தளத்தில் வெளியிடப்பட வேண்டும் எனவும் சுமந்திரன் யோசனை தெரிவித்தார்.
*****************

இனக்கலவரம்?
சிறிலங்காவின் தென் மாகாணத்தில் சிங்கள-முஸ்லிம் இனத்தவர்களுக்கு இடையில் பெரும் மோதல் ஒன்று இடம்பெற்றுள்ளதாக கொழும்பு ஊடகத் தகவல்கள் தெரிவிக்கின்றன.
மாத்தறை மாவட்டத்தில் உள்ள டிக்வெல்ல என்ற இடத்தில் கடந்தவாரம் இடம்பெற்ற இந்த மோதல் சிங்கள மற்றும் முஸ்லிம் இளைஞர்களுக்கு இடையில் நடத்தப்பட்ட நட்புறவு துடுப்பாட்டப் போட்டி ஒன்றை அடுத்தே ஆரம்பமானதாக தெரிவிக்கப்பட்டுள்ளது.
இந்த மோதலின் போது முஸ்லிம்களுக்குச் சொந்தமான வர்த்தக நிலையங்கள், வீடுகளும், வழிபாட்டு இடம் ஒன்றும் தீயிட்டு எரிக்கப்பட்டுள்ளன.
சிங்களவர்கள் சிலர் தாக்கப்பட்டு மருத்துவமனையில் அனுமதிக்கப்பட்டதாகவும் அந்த தகவல் மேலும் கூறியுள்ளது.
இந்த மோதலைக் கட்டுப்படுத்த சிறிலங்கா காவல்துறை தவறிய நிலையில் சிறிலங்கா அரசாங்கம் சிறப்பு அதிரடிப்படையை அனுப்பி நிலைமையைக் கட்டுப்பாட்டுக்குள் கொண்டு வந்துள்ளது.
அரசியல் மற்றும் வர்த்தகப் போட்டியே இதன்பின்னணியில் இருந்துள்ளதாகவும் தகவல்கள் தெரிவிக்கின்றன.
*****************






செய்திகள் 08/09


மக்கள் போராட்டம் வெடிக்கும் - ததேகூ எச்சரிக்கை
இராணுவத்தால் உருவாக்கப்பட்ட கிறீஸ்பூதம் என்ற மர்ம மனிதப் பீதிக்கு முற்றுப்புள்ளி வைக்காவிட்டால், அதனைத் தடுக்கத் தவறினால் மீண்டும் ஒரு மக்கள் போராட்டம் வெடிக்கும் என தமிழ்த் தேசியக் கூட்டமைப்புத் தெரிவித்துள்ளது.
தமிழ் மக்களை அடக்கி ஒடுக்கி அடிமைப்படுத்த நினைத்தால் தமிழ் மக்கள் ஒருபோதும் அடங்கிப் போகமாட்டார்கள் என தமிழ்த் தேசியக் கூட்டமைப்பு யாழ். மாவட்ட நாடாளுமன்ற உறுப்பினர் சுரேஷ் பிரேமச்சந்திரன் கூறினார்.
அவசரகாலச் சட்டத்தை நீக்கிய அரசுத் தலைவருக்கு நன்றி தெரிவிக்கும் பிரேரணை மீதான விவாதத்தில் உரையாற்றும் போதே சுரேஷ் பிரேமச்சந்திரன் இதனைக் கூறினார்.
அவசரகாலச் சட்டம் நீக்கப்பட்டுள்ளதாகக் கூறப்பட்ட போதும் வடக்கு,கிழக்கில் தொடர்ந்தும் இராணுவம் ஆட்சி புரிகின்றது.
நிலைமையில் எந்த மாற்றமும் இல்லை. வடக்கு, கிழக்கு மாகாணம் இலங்கையில் ஒரு பகுதியாக இல்லையா? ஏன் இந்தப் பாரபட்சம்? எனவும் கேள்வி எழுப்பினார்.
கடந்த ஜூலை மாதம் மலையகத்தில் ஆரம்பித்த கிறீஸ் பூதங்களின் அச்சுறுத்தல் படிப்படியாகப் புத்தளம், கிழக்கு மாகாணம் எனப் பரவி இப்பொழுது யாழ்ப்பாண மக்களையும் பீதிக்கு உள்ளாக்கியுள்ளது.
இவர்கள் பெண்களைத் தேடித் தேடித் தாக்குகின்றனர். இம்சிக்கின்றனர்.
இப்பிரதேச மக்கள் மிகவும் பீதியுடன் வாழ்கின்றனர். கோயில்களிலும் பாடசாலைகளிலும் கூட்டம் கூட்டமாகத் தங்கியுள்ளனர்.
வடக்கு, கிழக்கில் இராணுவத்தினரும் பொலிஸாரும் கிறீஸ் பூதம் என்று ஒன்று இல்லை என்று கூறுகின்றனர்.
ஆனால் பொதுமக்களால் விரட்டிச் செல்லும் இந்த மர்ம மனிதர்கள் இராணுவ முகாம்களுக்குள் சென்று மறைகின்றனர்.
இராணுவம் அவர்களுக்குப் பாதுகாப்பு வழங்குகின்றது. மக்கள் பிடித்து ஒப்படைத்தால் அவர்கள் எல்லோருமே மனநோயாளர்கள் என்று கூறி விடுதலை செய்யப்படுகின்றனர்.
இந்த மர்ம மனிதர்களைப் பிடிக்க முயற்சிக்கும் பொதுமக்களை இராணுவத்தினர் கைதுசெய்து சித்திரவதை செய்கின்றனர்.
நாவாந்துறையில் நூற்றுக்கும் அதிகமான பொதுமக்கள் கைதுசெய்யப்பட்டு, நிர்வாணப்படுத்தப்பட்டு காட்டுமிராண்டித்தனமாகத் தாக்கப்பட்டுள்ளனர்.
கை, கால்கள் முறிக்கப்பட்ட அவர்கள் இப்பொழுதும் யாழ். வைத்தியசாலையில் சிகிச்சைபெற்று வருகின்றனர்.
சிறுபான்மை மக்களைத் தொடர்ந்தும் ஒரு அச்ச சூழலில் அடக்கி, ஒடுக்கி வைப்பதே இந்த அரசின் நோக்கம் எனவும் அவர் தெரிவித்தார்.
ஐக்கியத்துடன் வாழ விரும்பும் தமிழ் மக்களை அடக்கி அடிமைப்படுத்த முனைகின்றனர்.
முல்லைத்தீவு மாவட்டத்தில் தமிழ் மக்களின் பூர்வீகக் காணிகள் மகாவலித் திட்டம் என்ற பெயரில் அபகரிக்கப்பட்டு சிங்களவர்கள் குடியமர்த்தப்பட்டுள்ளனர்.
தனியான ஒரு செயலாளர் பிரிவை உருவாக்கும் பொறுப்பு அநுராதபுர அரச அதிபரிடம் ஒப்படைக்கப்பட்டுள்ளது.
ஒரு பக்கம் அவசரகாலச் சட்டத்தை நீக்கிவிட்டு பயங்கரவாத தடைச்சட்டத்தை அரசுத் தலைவர் மேலும் பலப்படுத்தி உள்ளார்.
மர்ம மனிதப் பீதிக்கு முற்றுப்புள்ளி வைக்கத் தவறினால் அங்கு மீண்டும் ஒரு மக்கள் போராட்டம் வெடிக்கும் என்றும் சுரேஷ் பிரேமச்சந்திரன் கூறினார்.
***************

அவசரகாலச் சட்ட நீக்கத்தின் பின்னும் தொடரும் இராணுவ ஆட்சி
அவசரகாலச் சட்டம் நீக்கப்பட்டு விட்டதாக ஆட்சியாளர்கள் மக்களிடம் கூறி வருகின்றனர்.
ஆனால், இராணுவக் கெடுபிடிகள் தொடர்வதாக மாத்தறை மாவட்ட பாராளுமன்ற உறுப்பினர் மங்கள சமரவீர தெரிவித்துள்ளார்.
மாத்தறை வக்மனை வீதியிலுள்ள ஐ.தே.க. அலுவலகத்தில் நடைபெற்ற கூட்டத்தில் அவர் பேசுகையிலேயே இவ்வாறு கூறினார்.
அவசரகாலச் சட்டத்தை நீக்குமாறு எதிர்க்கட்சியினர் மேற்கொண்ட போராட்டமே இதற்குக் காரணம் இதற்காக அரசுத் தலைவர்க்கு நன்றி கூற வேண்டும்.
அவசரகாலச் சட்டம் அகற்றப்பட்டால் 18 ஆவது அரசியல் திட்டத்தையும் ஒழிக்க வேண்டும்.
இன்று ஸ்ரீலங்கா சுதந்திரக் கட்சியிடம் ஜனநாயகம் ஒழுக்கக் கோட்பாடுகள் அறவே கிடையாது.
ஜனநாயகத்தைப் பாதுகாப்போர் ஐக்கிய தேசியக் கட்சியினரே. அதனால்தான் மக்கள் இன்று ஐக்கிய தேசியக் கட்சியைச் சூழ்ந்து நிற்கின்றனர்.
எவராலும் எப்போதும் பொய்யான நாடகங்களை நடிக்க முடியாது. ஏமாற்றவும் முடியாது என்றார்.
மாத்தறை மாநகரசபை முன்னாள் மேயர் உப்புல் நிசாந்த தமது உரையில் தான் மாத்தறை மேயராகப் பணியாற்றியபோது அகில இலங்கையில் மாத்தறை மாநகரசபை சிறந்தது எனப் பரிசும் வழங்கப்பட்டது.
அதற்குக் காரணம் சிறந்த நிர்வாகம், ஊழலற்ற பணிகளே.
ஆனால், தன்மீது வீணான குற்றச்சாட்டுகளைச் சுமத்தி பழிவாங்கியுள்ளனர் என்று தெரிவித்தார்.
***************

உலகை ஏமாற்ற அமைச்சரவையின் அங்கீகாரம்!
மனித உரிமையை விஸ்தரிப்பதும் பாதுகாப்பதும் தொடர்பில் அமைச்சரவையில் சமர்பிக்கப்பட்ட திட்டத்துக்கு அமைச்சரவையினால் அங்கீகாரம் வழங்கப்பட்டுள்ளதாக பெருந்தோட்டக் கைத்தொழில் அமைச்சர் மஹிந்த சமரசிங்க தெரிவித்துள்ளார்.
ஜெனிவாவில் நடைபெறவுள்ள ஐக்கிய நாடுகள் சபையின் மனித உரிமை மாநாட்டு கூட்டத்தொடரில் கலந்து கொள்வதற்காக செல்லும்போது நாம் அவரை தொடர்பு கொண்டு கேட்டபோதே அவர் இவ்வாறு தெரிவித்துள்ளார்.
மேலும், அமைச்சரவையினால் அங்கீகாரமளிக்கப்பட்டுள்ள திட்டம் தொடர்பில் ஜெனிவாவில் நடைபெறவுள்ள ஐக்கிய நாடுகள் சபையின் மனித உரிமை மாநாட்டு கூட்டத்தொடரில் உரையாற்றுவதற்கு நேரம் ஒதுக்கப்பட்டுள்ளதாகவும் அவர் தெரிவித்துள்ளார்.
இதேவேளை ஐக்கிய நாடுகள் சபையின் ஆலோசனைக்கு இணங்க முன்வைக்கப்பட்ட தீர்மானத்துக்கே தற்போது அமைச்சரவையில் அங்கீகாரம் கிடைத்துள்ளதாகவும் அவர் தெரிவித்துள்ளார்.
ஜெனிவாவில் நடைபெறவுள்ள ஐக்கிய நாடுகள் சபையின் மனித உரிமை மாநாட்டு கூட்டத்தொடரில் கலந்து கொள்வதற்காக அமைச்சர் மஹிந்த சமரசிங்க, அமைச்சர் நிமல் சிறிபால டி சில்வா, அமைச்சர் அநுர பிரியதர்ஷன யாப்பா, பாராளுமன்ற உறுப்பினர் சச்சின் வாஸ் குணவர்த்தன ஆகியோர் இன்று காலை ஜெனீவாவிற்க்கு விஜயம் மேற்கொண்டுள்ளனர்.
***************

தடுத்து வைக்க கால அவகாசம், கடத்தப்படுவேரா விடுவிக்க.......?
கைது செய்யப்படும் சந்தேக நபர்களை 48 மணித்தியாலங்கள் வரையில் தடுத்து வைப்பதற்கு அரசாங்கம் அனுமதி கோரவுள்ளது.
தற்போது அமுலில் உள்ள சாதாரண சட்டத்தின் கீழ் காவல்துறையினரால் கைது செய்யப்படும் சந்தேக நபர்களை 24 மணித்தியாலங்களுக்கு மேல் நீதிமன்றில் ஆஜர்படுத்தாமல் தடுத்து வைக்க முடியாது.
இந்த கால அவகாசத்தை 48 மணித்தியாலங்கள் வரையில் நீடிப்பதற்கு தீர்மானிக்கப்பட்டுள்ளது.
இதற்காக குற்றவியல் சட்டத்தில் திருத்தங்களை ஏற்படுத்த அரசாங்கம் உத்தேசித்துள்ளது.
சட்டத் திருத்தம் குறித்த பிரேரணை இன்று பாராளுமன்றில் முன்வைக்கப்பட உள்ளது.
விசாரணைகளை நடத்துவதற்கு 24 மணித்தியாலங்கள் போதுமானதல்ல என நீதி அமைச்சர் ரவூப் ஹக்கீம் தெரிவித்துள்ளார்.
இதேவேளை, மாற்றுக் கருத்துக்களை வெளியிடுவோரை அடக்குமுறைக்கு உட்படுத்த அரசாங்கம் இந்தச் சட்டத்தை அமுல்படுத்துவதாக எதிர்க்கட்சிகள் குற்றம் சுமத்தியுள்ளன.
***************

ஸ்ரீலங்காவின் படுகடன் தொகை அதிகரிப்பு?
இலங்கையின் அண்மைக்கால பொருளாதார நிலைமைகளில் கடன் அல்லாத இருப்புகள் துரிதமான வீழ்ச்சியை நோக்கிச் சென்று கொண்டிருப்பதாகவும் படுகடன் தொகை அதிகரித்துச் செல்லுவது கண்டறிப்பட்டுள்ளதாகவும் சர்வதேச நாணய நிதியம் தெரிவிக்கிறது.
இந்தப் படுகடன் தொகையில் துரித அதிகரிப்பு குறித்து மிகவும் எச்சரிக்கையாக இருக்கவேண்டும் எனவும் அது தெரிவித்துள்ளது.
சர்வதேச நாணய நிதியம் இலங்கைக்கு வழங்கும் கடனுதவி தொகையின் ஏழாம் கட்ட தவணைக் கடன் தொடர்பிலான ஆய்வின் நிறைவில் கொழும்பில் நேற்று ஊடவியலாளர் மகாநாடு இடம்பெற்றது.
அதன்போது கருத்துத் தெரிவித்த கலாநிதி பிரயன் எய்ட்கான் வெளிநாட்டுக் கடன்களை அடிப்படையாகக் கொண்டு இருப்புகளை பேணுகின்றமை அவதானத்திற்குரிய ஓர் நிலைமையாகும் எனத் தெரிவித்தார்.
இலங்கையின் கடன் அல்லாத இருப்புகள் துரித வீழ்ச்சி கண்டுள்ளன.
எனினும் இலங்கையின் படுகடன் தொகையில் துரித அதிகரிப்பு தொடர்பில் மிகவும் எச்சரிக்கையாக இருக்கவேண்டும் என்று சர்வதேச நாணய நிதியம் தெரிவிக்கிறது.
எதிர்காலத்தில் சந்தை தலையீடுகளை இலங்கை மத்திய வங்கி வரையறுக்க நேரிடும் என்பதுடன், அந்நிய செலாவனி சுயமாக தீர்மானிக்கப்படுவதற்கு இடமளிக்கப்படவேண்டுமெனவும் குறிப்பிடப்பட்டுள்ளது.
இந்த நடவடிக்கை பின்பற்றப்படாத பட்சத்தில் ஏற்றுமதிக்கான போட்டித் தன்மையை பேணுவதில் சவாலை எதிர்நோக்க நேரிடும் என்பது சர்வதேச நாணய நிதியத்தின் நிலைப்பாடாக உள்ளதென இந்த ஊடக சந்திப்பில் சுட்டிக்காட்டப்பட்டுள்ளது.
***************

உறவாடும் இந்திய ஸ்ரீலங்கா படைகளின் பேச்சுவார்த்தை!
இந்திய சிறிலங்கா கடற்படை அதிகாரிகள் மட்டத்திலான பேச்சுக்கள் கொழும்பில் ஆரம்பமாகியுள்ளன.
சிறிலங்கா கடற்படைத் தலைமையகத்தில் நேற்று ஆரம்பமான இந்தப் பேச்சுக்கள் நாளை வரை தொடர்ந்து நடைபெறவுள்ளதாக அறிவிக்கப்பட்டுள்ளது.
இரு நாடுகளின் கடற்படைகளுக்கு இடையிலான உறவுகளை வலுப்படுத்திக் கொள்வது மற்றும் இருதரப்பு முக்கியத்துவம் வாய்ந்த விவகாரங்கள் குறித்து இந்தப் பேச்சுக்களின் போது ஆராயப்படுவதாக சிறிலங்கா கடற்படை தகவல் வெளியிட்டுள்ளது.
இந்தியக் கடற்படையின் வெளிநாட்டு உறவுகளுக்கான பிரிவின் உதவித் தலைமை அதிகாரி றியர் அட்மிரல் முருகேசன் தலைமையில் ஆறு பேர் கொண்ட குழு இந்தப் பேச்சுக்களில் பங்கேற்க கொழும்பு சென்றுள்ளது.
சிறிலங்கா கடற்படையின் நடவடிக்கைகள் பணிப்பாளர் றியர் அட்மிரல் ஜெயந்த பெரேரா தலைமையிலான குழுவினருடன் இவர்கள் பேச்சுக்களை நடத்தி வருகின்றனர்.
இரு நாட்டுக் கடற்படைகளுக்கும் இடையில் நடவடிக்கை, பயிற்சி, விநியோகம், தொழில்நுட்பம் ஆகிய விடயங்களில் ஒத்துழைப்புகளை வலுப்படுத்திக் கொள்வது குறித்து இந்தச் சந்திப்பில் கவனம் செலுத்தப்படுவதாக சிறிலங்கா கடற்படை தகவல் வெளியிட்டுள்ளது.
பாக்கு நீரிணையில் சட்டவிரோத கடத்தல்கள், ஆயுத மற்றும் ஆட்கடத்தல்களை தடுப்பது குறித்தும் பேச்சுக்கள் நடத்தப்பட்டு வருவதாகவும் சிறிலங்கா கடற்படை வட்டாரங்கள் கூறியுள்ளன.
***************

ஊடகத்தின் அவசியம்
ஊடகங்களின் மீது விதிக்கப்படும் கட்டுப்பாடு முழு நாட்டையும் மக்களையும் பாதிக்கும் என இலங்கையின் பத்திரிகை முறைப்பாட்டு ஆணைக்குழுவின் முறுகல் தீர்வு சபையின் தலைவர் சாம் விஜேசிங்க தெரிவித்துள்ளார்.
நாடு ஒன்றில் ஊடகங்கள் பிழையாக வழிநடத்தப்பட்டால் அது மக்களை பாதுகாக்கும் செயற்பாட்டை மேற்கொள்ள முடியாது.
இந்த தகவலை ஊடகத்தின் சுய ஒழுங்கு சம்பந்தமாக கொழும்பில் நேற்று நடைபெற்ற மாநாட்டின் போது அவர் வெளியிட்டார்.
இதன்போது உரையாற்றிய காப்புறுதி ஒம்புட்சுமன் விக்கிரம வீரசூரிய 1970 ஆம் ஆண்டில் இருந்து அரசாங்கங்கள் ஊடக அடங்குமுறையை கையாண்டதாக குறிப்பிட்டார்.
செய்திதாள் நிறுவனங்கள் மூடப்பட்டன, ஊடகவியலாளர்கள் கொல்லப்பட்டனர், பயமுறுத்தல்கள் விடுக்கப்பட்டன, செய்தி தணிக்கை உட்பட்ட விளம்பரங்களுக்கும் கட்டுப்பாடு விதிக்கப்பட்டதாக அவர் சுட்டிக்காட்டினார்.
***************