Tuesday, 6 September 2011

செய்திகள் 06/09


தமிழர் கொல்லப்படுவதை பார்த்து பூரித்த மகிந்த!
இறுதிக் கட்ட யுத்தத்தின் போது பொதுமக்கள் மீது எறிகணை நடத்தும் செய்மதிக் காட்சிகள் அரசுத் தலைவர் மஹிந்த ராஜபக்ஷவிற்கு அமெரிக்க ராஜதந்திரிகளினால் காண்பிக்கப்பட்டதாக விக்கிலீக்ஸ் இணையம் தகவல் வெளியிட்டுள்ளது.
கனரக ஆயுத பயன்பாடு நிறுத்தப்பட்டுள்ளதாக அரசாங்கம் அறிவித்ததன் பின்னர் இந்தக் காட்சிகள் படம்பிடிக்கப்பட்டிருந்ததாகக் குறிப்பிடப்படுகிறது.
தமிழீழ விடுதலைப் புலிகளுக்கு எதிரான யுத்தம் நிறைவடைந்ததாக அரசாங்கம் உத்தியோகபூர்வமாக அறிவிப்பதற்கு இரண்டு வாரங்களுக்கு முன்னர் இந்த வீடியோ காட்சிகள் அரசுத் தலைவருக்கும், ஐக்கிய நாடுகளின் இலங்கைக்கான வதிவிடப் பிரதிநிதி பாலித கொஹணேவிற்கும் காண்பிக்கப்பட்டதாக அமெரிக்கத் தூதரக அதிகாரி ஜேம்ஸ் மூர் தெரிவித்துள்ளார்.
பொதுமக்கள் நிலைகள் மீது தாக்குதல் நடத்தப்படவில்லை என அரசுத் தலைவர் அறிவித்ததாகக் குறிப்பிடப்படுகிறது.
மே மாதம் 2ம் திகதி வைத்தியசாலை மீது தாக்குதல் நட்டதப்பட்டதாக விடுதலைப் புலிகள் அறிவித்ததாகவும், அந்தப் பகுதியில் வைத்தியசாலைகள் கிடையாது என அரசுத் தலைவர் அதனை மறுத்ததாகவும் விக்கிலீக்ஸ் தெரிவித்துள்ளது.
எறிகணைத் தாக்குதல்களை தமிழீழ விடுதலைப் புலிகள் மேற்கொண்டுள்ளதாக அப்போதைய வெளிவிவகார அமைச்சர் ரோஹித்த பொகொல்லாகம தெரிவித்துள்ளார்.
தமிழீழ விடுதலைப் புலிகளே பொதுமக்கள் மீது எறிகணைத் தாக்குதல் நடத்தியதாகக் குறிப்பிட்டுள்ளார்.
செய்மதிப் படங்களில் எந்தத் தரப்பினர் தாக்குதல் நடத்தினார்கள் என்பதனை துல்லியமாக வெளிப்படுத்த முடியாது எனவும் அவர் சுட்டிக்காட்டியுள்ளார்.
யுத்த நடவடிக்கைகளை இந்தியா செய்மதி மூலம் கண்காணித்து வருவதாக அரசுத் தலைவர் மஹிந்த ராஜபக்ஷ, டேவிட் மூரிடம் தெரிவித்துள்ளார்.
*******************

எதையும் சமாளிக்கலாம் என எதையும் சமாளிக்க முடியாமல் திணறும் ஸ்ரீலங்கா!
ஐ.நா. சபையின் மனித உரிமைகள் பேரவையின் கூட்டத்தொடரின்போது இலங்கைக்கு எதிராக எந்தவகையான அழுத்தங்கள் வந்தாலும் அதனை சமாளிக்கும் நோக்குடனேயே அங்கு செல்வதாக மனித உரிமைகள் அமைச்சர் மஹிந்த சமரசிங்க தெரிவித்துள்ளார்.
இலங்கைக்கு எதிராகக் கேள்விகள் எழுப்பப்படும் பட்சத்தில் இலங்கையில் தாம் மேற்கொண்டுள்ள நடவடிக்கைகள் தொடர்பாக உலக நாடுகளுக்கு தெளிவுபடுத்தி அந்த நாடுகளின் ஆதரவைப் பெறுவோம் என்ற நம்பிக்கை உள்ளது என்றும் அவர் கூறினார்.
சிங்கள ஊடகமொன்றுக்கு அவர் வழங்கிய செவ்வியிலேயே இதனைத் தெரிவித்துள்ளார்.
இது தொடர்பாக அவர் மேலும் தெரிவிக்கையில், சர்வதேச அழுத்தங்களுக்கு அடிபணிந்தே அரசு அவசரகாலச் சட்டத்தை நீக்கியது எனக் கூறப்படும் கருத்துகளை தான் அடியோடு மறுப்பதாக தெரிவித்தார்.
அவசரகாலச் சட்டத்தை நீக்குவது தொடர்பாக தாம் கடந்த வருடம் நடைபெற்ற ஜெனிவா கூட்டத்தொடரின்போதே கவனஞ் செலுத்தியதாகவும், அரசு தாமாகவே முன்வந்துதான் அவசரகாலச் சட்டத்தை நீக்கியது. இதனை அரசுத் தலைவர் நாடாளுமன்றில் அறிவித்திருந்தார். இதன் பின்னணியில் எதுவும் இல்லை எனவும் குறிப்பிட்டார்.
நாட்டின் பாதுகாப்பு மற்றும் நாட்டு மக்களின் பாதுகாப்பு என்பவற்றை கருத்திற்கொண்டே அரசு இதுவரைகாலமும் அவசரகாலச் சட்டத்தை அமுல்படுத்தியது.
ஆனால், தற்போது நாட்டில் சுமூகமான நிலை ஏற்பட்டுள்ளது. அதனைக் கருத்திற்கொண்டே அவசரகாலச் சட்டத்தை நீக்குவதற்குத் தீர்மானித்ததாகவும் தெரிவித்துள்ளார்.
அவசரகாலச் சட்டத்தை நீக்கிவிட்டதாக தெரிவிக்கும் அரசு அதைவிட மோசமான விதிகளை பயங்கரவாத தடைச் சட்டத்தில் இணைத்துள்ளதைச் சுட்டிக்காட்டியுள்ள அவதானிகள் இதனை சர்வதேச சமூகம் நன்கு புரிந்து கொள்ள வேண்டும் எனவும் சுட்டிக்காட்டியுள்ளனர்.
*******************

பிதற்றும் சிங்களம்?
சுவிட்சர்லாந்தின் ஜெனீவாவில் நடைபெறவுள்ள மனித உரிமை கவுன்ஸில் கூட்டத்தில் இலங்கைக்கு எதிராக தீர்மானம் நிறைவேற்ற சில அரச சார்பற்ற நிறுவனங்கள் முயற்சி செய்து வருவதாக திவயின பத்திரிகை செய்தி வெளியிட்டுள்ளது.
உள்நாடு மற்றும் வெளிநாடுகளைச் சேர்ந்த 46 அரச சார்பற்ற நிறுவனங்களும், 262 நபர்களும் இலங்கைக்கு எதிராக குற்றச்சாட்டுக்களை சுமத்தி வருவதாகக் குறிப்பிடப்படுகிறது.
இந்த அரச சார்பற்ற நிறுவனங்களில் 95 வீதமானவை மேற்குலக நாடுகளைச் சேர்ந்தவை.
இந்த நிறுவனங்களுக்காக குரல் கொடுக்கும் உள்நாட்டு முகவர்கள் பற்றியும் விசாரணைகளின் மூலம் தெரியவந்துள்ளது என அரசாங்கத் தகவல்கள் தெரிவிக்கின்றன.
கடந்த அரசுத் தலைவர்த் தேர்தலுக்கு முன்னதாக குறித்த அரச சார்பற்ற நிறுவனங்களில் ஒன்று 200 மில்லியன் ரூபா பணத்தைப் பெற்றுக் கொண்டுள்ளது எனவும் அந்தச் செய்தியில் தெரிவிக்கப்பட்டுள்ளது.
எதிர்வரும் 8ம் திகதி ஐக்கிய நாடுகள் மனித உரிமை கவுன்ஸில் கூட்டம் நடைபெறவுள்ளது.
இதில் இலங்கை அரசு பலமான சர்வதேச நெருக்கடியைச் சந்திக்கும் என எதிர்பார்க்கப்படும் நிலையில் அரசும் அரசு சார்புடையவர்களும் செய்வதறியாது தம்மை மறந்து உளறுவதாக அவதானியொருவர் சுட்டிக்காட்டியுள்ளார்.
*******************

மறுக்கும் அமெரிக்க தூதரகம்
அமெரிக்காவின் உதவி இராஜாங்கச் செயலர் றொபேட் ஓ பிளேக் செப்ரெம்பர் 14ம் நாள் சிறிலங்கா வரவள்ளதாக வெளியாகியுள்ள செய்தியை கொழும்பிலுள்ள அமெரிக்கத் தூதரகம் நிராகரித்துள்ளது.
றொபேட் ஓ பிளேக்கின் மீள் பயணத்திட்டம் குறித்து இன்னமும் எந்த அறிவிப்பும் வரவில்லை என்று கொழும்பிலுள்ள அமெரிக்கத் தூதரக ஊடக அதிகாரி கிறிஸ்ரொபர் எல்ம்ஸ் தெரிவித்துள்ளார்.
கடந்தமாத இறுதியில் சிறிலங்கா வரத் திட்மிட்டிருந்த பிளேக் ஐரின் சூறாவளியினால் தனது பயணத்தைப் பிற்போட்டிருந்தார்.
எனினும் அவர் எதிர்வரும் 12ம் நாள் கொழும்பு வரவுள்ளதாக சண்டே ரைம்ஸ் தகவல் வெளியிட்டிருந்தது.
அதேவேளை மற்றொரு கொழும்பு ஊடகம் எதிர்வரும் 14ம் நாள் பிளேக் கொழும்பு வரவுள்ளதாக நேற்று தகவல் வெளியிட்டிருந்தது.
இந்தநிலையிலேயே, பிளேக்கிள் மீள்பயண திட்டம் குறித்து இன்னமும் அறிவிக்கப்படவில்லை எனறு அமெரிக்க துதரக ஊடக அதிகாரி தகவல் வெளியிட்டுள்ளார்.
*******************

மார்தட்டி பொய் சொல்லும் மகிந்த அரசு
நாடு அபிவிருத்தியடைந்து வருவதாக மார்தட்டும் அரசு, பொருட்களின் விலைவாசிகளை அதிகரிக்கின்றது.
வழங்கிய உறுதிமொழிகளை நிறைவேற்றுவதில் காலத்தை இழுத்தடிக்கின்றது.
சர்வதேசத்திடமிருந்து அதிக வட்டிக்கு நாளாந்தம் கடன் பெறுகிறது.
இதுதான் மகிந்த சிந்தனையின் அபிவிருத்தியா என ஜே.வி.பி. கேள்வியயழுப்பியுள்ளது.
அரசின் திட்டமொன்று வெற்றியடைந்தால் அதன் நன்மைகளை நுகரும் அரசு, மஹிந்த சிந்தனைக்கு கிடைத்தவெற்றி என வர்ணிக்கும்.
மாறாக அத்திட்டத்தில் ஏதாவது முறைகேடு இடம்பெற்றால் அந்தப் பழியை அதிகாரிகள் மீது சுமத்தி தப்பித்துக்கொள்வதற்கு முயலும்.
தரம் குறைந்த பெற்றோல் விவகாரத்திலும் இதுவே நடந்தது என்றும் ஜே.வி.பி. சுட்டிக்காட்டியுள்ளது.
ஜே.வி.பியின் செய்தியாளர் மாநாடு பத்தரமுல்லையிலுள்ள அதன் தலைமையகத்தில் நேற்று இடம்பெற்றது.
*******************

ஆட்சி மாற்றம் தேவை - ஜே.வி.பி
நாட்டில் ஆட்சி மாற்றத்தை ஏற்படுத்த நடவடிக்கை எடுக்கப்பட வேண்டுமென ஜே.வி.பி கட்சி கோரிக்கை விடுத்துள்ளது.
மாற்றுக் கொள்கையுடைய பொருளாதாரக் கட்டமைப்பு ஒன்றை நாட்டில் அமுல்படுத்துவதற்கு ஆட்சி மாற்றம் அவசியமானது என ஜே.வி.பி.யின் பொதுச் செயலாளர் ரில்வின் சில்வா தெரிவித்துள்ளார்.
பத்தரமுல்ல பெலவத்த பிரதேசத்தில் அமைந்துள்ள கட்சித் தலைமைக் காரியாலயத்தில் நடைபெற்ற ஊடகவியலாளர் மாநாட்டில் கலந்து கொண்ட போது அவர் இதனைக் குறிப்பிட்டுள்ளார்.
பிற்போக்கான செல்வந்தர்களது வர்க்கத்தினால் நாட்டை அபிவிருத்தி செய்ய முடியாது.
தற்போதைய ஆட்சியாளர்கள் போலியான தேசிய பொருளாதாரமொன்றை வெளிக்காட்டுகின்றனர்.
ஐக்கிய தேசியக் கட்சி பின்பற்றிய பொருளாதாரக் கொள்கைகளையே தற்போதைய ஆட்சியாளர்களும் பின்பற்றுகின்றனர்.
சோசலிச கொள்கைகளின் அடிப்படையிலான நாட்டுக்கு பொருத்தமுடைய பொருளாதார முறைமையொன்றை அறிமுகப்படுத்த வேண்டியது அவசியமானது என அவர் குறிப்பிட்டுள்ளார்.
போலியான அபிவிருத்தி என்று மக்களை ஆட்சியாளர்கள் ஏமாற்றுகின்றனர்.
அரசாங்கத்தின் அபிவிருத்தி தொடர்பான பிரச்சாரங்கள் வெறும் மாயையே என அவர் சுட்டிக்காட்டியுள்ளார்.
அரச ஊழியர்களுக்கு ஊதிய உயர்வு வழங்குவதாக அரசுத் தலைவர் அளித்த வாக்குறுதி இதுவரையில் நிறைவேற்றப்படவில்லை என அவர் குறிப்பிட்டுள்ளார்.
பெருமளவிலான இளைஞர் யுவதிகள் வேலை வாய்ப்பின்றி அவதியுறுவதாகவும் அவர் குற்றம் சுமத்தியுள்ளார்.
*******************

விற்பதற்கு எதுவுமில்லாத மகிந்த ஆட்சி - சரத்
எதிர்வரும் காலங்களில் வெளிநாட்டவர்களுக்கு நிலங்களை விற்கப்போவதில்லை என அரசாங்கம் தற்போது அறிவித்துள்ளது.
அதன்படி தற்போது விற்பதற்கு இங்கு எஞ்சியுள்ள நிலங்கள் என்று எதுவுமே இல்லை என முன்னாள் இராணுவ தளபதி சரத் பொன்சேகா தெரிவித்துள்ளார்.
100 ஏக்கர் நிலப்பரப்பை விற்று 50ஆயிரம் மில்லியனை அரசு தன் வசப்படுத்தியது.
அரசு இராணுவத்தினரது வீடுகள், சிறைச்சாலை இடங்கள் என எல்லாவற்றையும் விற்று தீர்த்து விட்டது.
இவ்வாறு மக்களின் சொத்துக்களை அரசு கொள்ளையடிக்கிறது.
லிபியாவில், எகிப்தில் கடாபி மற்றும் முபாரக் போன்றோரும் இதைத் தான் செய்தனர்.
மக்கள் இதனை புரிந்து கொள்ள வேண்டும் என நேற்று முன்தினம் சிகிச்சைக்காக கொழும்பிலுள்ள தனியார் மருத்துவமனைக்கு சென்ற வேளை அங்கிருந்த மக்களுக்களிடம் சரத் பொன்சேகா தெரிவித்துள்ளார்.
*******************








Monday, 5 September 2011

செய்திகள் 05/09


யார் பயங்கரவாதி?
இராணுவ முகாம் மற்றும் காவல் நிலையங்கள் மீது தாக்குதல் நடத்துபவர்கள் பயங்கரவாதிகள் எனவும் அவ்வாறானவர்களுக்கு எதிராக பயங்கரவாத சட்டங்களின் கீழ் நடவடிக்கை எடுக்கப்படும் என ஸ்ரீலங்கா இராணுவம் தெரிவித்துள்ளது.
அண்மையில் இராணுவ முகாம்களை தாக்கமுற்பட்ட சுமார் 120 பேர் யாழ்ப்பாணத்தில் கைது செய்யப்பட்டுள்ளனர் என இராணுவப் பேச்சாளர் பிரிகேடியர் நிஹால் ஹப்புஹாராச்சி தெரிவித்துள்ளார்.
மேலும் பாதுகாப்பு தரப்பினர் மீது தாக்குதல் மேற்கொள்வதானது தீவிரவாத நடவடிக்கை என தெரிவித்த அவர் இவ்வாறான செயற்பாடு முற்றிலும் தவறானதொரு விடயம் எனவும் அதனை செய்பவர்களுக்கு எதிராக பயங்கரவாத தடுப்புச் சட்டத்தின் கீழ் நடவடிக்கை எடுக்கப்படும் என்வும் தெரிவித்துள்ளார்.
இந்நிலையில், பயங்கரவாதத்தினை தோற்கடித்தது போலவே நாட்டின் அமைதிக்கு பங்கம் விளைவிப்பவர்களுக்கு எதிராக இராணுவத்தினர் நடவடிக்கைகளை முன்னெடுப்பர் என அண்மையில் பாதுகாப்பு செயலாளர் தெரிவித்திருந்தார்.
அத்தோடு தீவிரவாதத்தை ஒழிக்க இராணுவத்தினர் எவ்வாறு செயற்பட்டனர் என்பதனை பொதுமக்கள் மறந்துவிடக்கூடாது என தெரிவித்த அவர் இராணுவத்தினருடன் கேலிக்கூத்தாடவும் முயற்சிக்கக்கூடாது என குறிப்பிட்டிருந்தார்.
தற்போது போலியான மர்ம மனிதன் பதற்றம் யாழ்ப்பாணத்தில் இல்லை எனவும் காவல்துறையினரும் இராணுவத்தினரும் அனைத்து நிலைமைகளையும் கட்டுப்பாட்டுக்குள் கொண்டு வந்துள்ளனர் எனவும் இராணுவப் பேச்சாளர் பிரிகேடியர் நிஹால் ஹப்புஹாராச்சி தெரிவித்துள்ளார்.
*****************

ஊடகவியலாளர்கள் மீது தொடரும் அச்சுறுத்தல்
ஊடகவியலாளர்களுக்கு விடுக்கப்படும் அச்சுறுத்தல்கள் இறுதியில் கடத்தல் அல்லது கொலையாக மாறுவது சாதாரண சம்பவங்களாக இருப்பதால் லங்காதீப ஊடகவியலாளர்களுக்கு விடுக்கப்பட்ட அச்சுறுத்தல் குறித்து விரிவான விசாரணைகளை நடத்துமாறு ஐக்கிய ஊடக ஒன்றியம் வெளியிட்டுள்ள அறிக்கையில் தெரிவிக்கப்பட்டுள்ளது.
லங்காதீப ஊடகவியலாளரான கிரிஷான் ஜயருக் என்பவருக்கு விடுக்கப்பட்ட அச்சுறுத்தல் தொடர்பாகவே இந்த அறிக்கை வெளியிடப்பட்டுள்ளது.
குறித்த ஊடகவியலாளருக்கு தொலைபேசி மூலம் விடுக்கப்பட்ட இந்த அச்சுறுத்தலை வன்மையாகக் கண்டிப்பதாகவும் ஐக்கிய ஊடக ஒன்றியம் தனது அறிக்கையில் தெரிவித்துள்ளது.
லங்காதீப சிங்கள நாளிதழின் மாத்தறை பிராந்திய செய்தியாளர் கிரிஷான் ஜயருக்கிற்கு, தென் மாகாண சபையின் ஐக்கிய மக்கள் சுதந்திர முன்னணியின் உறுப்பினர் அருண குணவர்தனவினால் தொலைபேசி மூலம் மரண அச்சுறுத்தல் விடுத்திருந்தார்
*****************


சான்றுகள் பதிவாகலாம் என அஞ்சும் படையினர்!
யாழ் நகரில் பாதுகாப்பு கமராக்கள் பொருத்தப்படுவது தொடர்பில் எதுவித தீர்மானங்கள் அறிவிக்கப்படவில்லை என யாழ். மாவட்ட கட்டளைத் தளபதி மஹிந்த ஹத்துருசிங்க தெரிவித்துள்ளார்.
யாழ்ப்பாண நகரின் பாதுகாப்பைப் பலப்படுத்தும் வகையிலும் முக்கிய பகுதிகளைக் கண்காணிக்கவும் பாதுகாப்பு கமராக்கள் பொருத்த தீர்மானம் எடுக்கப்பட்டுள்ளதாக வெளியான கருத்தை அடுத்து அவர் அவ்வாறு பதிலளித்தார்.
இந்நிலையில், கொழும்பு நகரில் பாதுகாப்பு சோதனைச்சாவடிகளை அகற்றிய பின்னர், முக்கிய இடங்களில் கண்காணிப்பு காணொளிப்பதிவுக் கருவிகள் பொருத்தப்பட்டு கண்காணிக்கப்பட்டு வருகின்றமை குறிப்பிடத்தக்கது.
அண்மைக்காலமாக வடக்கில் மர்ம மனிதன் சர்சையால் பொதுமக்களுக்கும் - இராணுவத்தினர் மற்றும் காவல்துறையினருக்கும் இடையில் மோதல் சம்பவங்கள் இடம்பெற்று வருகின்றமையும் குறிப்பிடத்தக்கது.
*****************

ஐநா நடவடிக்கை எடுக்குமா?
அடுத்த வாரம் ஜெனிவாவில் ஆரம்பமாகவுள்ள ஐக்கிய நாடுகள் சபையின் மனித உரிமைகள் கூட்டத் தொடரில் இலங்கைக்கு எதிராகத் தீர்மானம் நிறைவேற்றப்பட்டால் அதனை நடைமுறைப்படுத்துவது எவ்வாறு என்பது குறித்து ஐ.நா. செயலாளர் நாயகம் தீவிரமாக ஆலோசனை நடத்தி வருகிறார் என்று ஐ.நாவுடன் தொடர்புடைய உயர்மட்ட இராஜதந்திர வட்டாரங்கள் தெரிவித்துள்ளன.
இது தொடர்பில் தனது ஆலோசர்களுடன் பான் கீமூன் தொடர்ச்சியாகப் பல சந்திப்புக்களை ஏற்கனவே நடத்தி இருக்கின்றார் என்றும் அந்த வட்டாரங்கள் தெரிவித்தன.
இதனால் ஸ்ரீலங்கா அரசும் தனது எதிர் நடவடிக்கைகளை முடுக்கி விட்டுள்ளது.
எதிர்வரும் 12ஆம் திகதி ஐ.நா. மனித உரிமைகள் சபையின் 18ஆவது கூட்டத் தொடர் ஆரம்பமாகிறது.
அந்த அமர்வில், இலங்கையில் இடம்பெற்ற மனித உரிமை மீறல்கள் விவகாரமே முக்கியமாக விவாதிக்கப்படவேண்டுமென அமெரிக்கா, பிரிட்டன் உட்பட்டப் பல நாடுகள் இராஜதந்திர அழுத்தங்களைப் பிரயோகித்து வருகின்றன.
இதனால் இலங்கைக்கு எதிரான தீர்மானங்கள் மேற்குலகநாடுகளால் இந்தக் கூட்டத் தொடரில் முன்வைக்கப்படலாம் என்று எதிர்பார்க்கப்படுகிறது.
ஏற்கனவே 2009ஆம் ஆண்டு போர் முடிந்த கையோடு மனித உரிமைகள் சபையில் இவ்வாறு மேற்கு நாடுகளால் கொண்டுவரப்பட்ட இதுபோன்றதொரு தீர்மானம் இலங்கையால் முறியடிக்கப்பட்டது.
அத்துடன் இலங்கையில் போருக்குப் பிந்திய அபிவிருத்திக்கு உதவவேண்டும் என்று இலங்கை ஆதரவு நாடுகள் முன்வைத்த தீர்மானம் நிறைவேற்றப்பட்டது.
இலங்கைக்கு ஆதரவான அந்தத் தீர்மானத்தை அன்று இந்தியா, சீனா, ரஷ்யா, பாகிஸ்தான் ஆகிய நாடுகளுடன் மத்திய கிழக்கு நாடுகள் மற்றும் ஆபிரிக்க நாடுகள் என்பன ஆதரித்தன.
எனினும் அதன் பின்னர் போர்க் குற்றச்சாட்டுக்களில் இலங்கை ஈடுபட்டது என்பதற்கான நம்பகமான ஆதாரங்கள் உள்ளன என்று ஐ.நா. பொதுச் செயலாளரால் நியமிக்கப்பட்ட நிபுணர்கள் குழு வெளியிட்ட அறிக்கை மற்றும் பிரிட்டனின் சனல்4 தொலைக்காட்சி வெளியிட்ட சிறிலங்காவின் கொலைக்களம் ஆவணப்படம் என்பன வெளியாகிய நிலையில் உலகின் கருத்து இன்று பெருமளவில் மாற்றமடைந்துள்ளன.
இந்தக் குற்றச்சாட்டுக்கள் தொடர்பாக சர்வதேச தரத்திலான விசாரணையை நடத்துமாறு மேற்குலக நாடுகள் இலங்கை அரசை வலியுறுத்தி வந்தபோதும் கடந்த இரண்டு ஆண்டுகளுக்கும் மேலாக அரசு அவ்வாறான ஒரு விசாரணையை நடத்த அடியோடு மறுத்து வருவதுடன் போர்க் குற்றங்கள் எவையும் இங்கு இடம்பெறவில்லை என்றும் திரும்பத் திரும்பக் கூறிவருகிறது.
இத்தகைய பின்னணியிலேயே தற்போது மீண்டும் இலங்கை மீது ஐ.நா. மனித உரிமைகள் சபையில் தீர்மானம் நிறைவேற்ற முயற்சிகள் மேற்கொள்ளப்படுகின்றன.
அவ்வாறான ஒரு நிலையில் என்ன செய்வது, தீர்மானம் நிறைவேற்றப்பட்டால் அதனை எப்படி நடைமுறைப்படுத்துவது என்பன தொடர்பாகவே பான் கீமூன் ஆலோசனை நடத்தி வருகிறார்.
நிறைவேற்றப்படும் தீர்மானம் சர்வதேச விசாரணைக் குழு ஒன்றை நியமிக்கும்படி கோரும் என்றே அனேகமாக எதிர்பார்க்கப்படும் நிலையில், மனித உரிமை மீறல்கள் குறித்து விசாரிக்கும் அத்தகைய குழுவை எவ்வாறு நியமிப்பது, அதற்கான சட்டதிட்டங்கள் என்ன, விசாரணைக்கான காலவரையறை, உள்ளடக்கப்படும் உறுப்பினர்கள் எண்ணிக்கை என்பன உட்பட்டப் பல விடயங்களையே ஐ.நா. செயலாளர் ஆராய்ந்திருக்கிறார் என்று தெரியவருகிறது.
ஐ.நா. செயலரின் இந்த நடவடிக்கைகள் குறித்து ஐ.நாவுக்கான இலங்கை தூதரகம் இலங்கை அரசுக்கு அறிவித்திருப்பதாகவும் இராஜதந்திர வட்டாரங்கள் மூலம் தகவல் வெளியாகியுள்ளது.
*****************


போர்க் குற்றவாளி நூல் இலவச விநியோகம்
ஐ.நா. நிபுணர் குழு அறிக்கையின் தமிழ் மொழிபெயர்ப்பான போர்க்குற்றவாளி என்ற நூலை தமிழகத்தில் உள்ள அனைத்து அரசியல் கட்சிகளின் நாடாளுமன்ற உறுப்பினர்கள், சட்டமன்ற உறுப்பினர்கள் மற்றும் கட்சியின் முக்கிய தலைவர்கள் ஆகியோருக்கு மனிதம் என்ற மனித உரிமை அமைப்பு அன்பளிப்பாக வழங்கி வருகிறது.
இதனடிப்படையில், முதலில் கம்ய+னிஸ்ட் கட்சியின் நாடாளுமன்ற, சட்டமன்ற உறுப்பினர்கள் மற்றும் கட்சியின் முக்கிய பொறுப்பாளர்களுக்கு 25 போர்க்குற்றவாளி புத்தகங்கள் அன்பளிப்பாக வழங்கப்பட்டன.
அன்பளிப்பின் முதல் பிரதியை கம்ய+னிஸ்ட் கட்சியின் தமிழ் மாநில செயலாளர் தா.பாண்டியன் பெற்றுக் கொண்டு நன்றி தெரிவித்தார்.
ஐ.நா.வின் அறிக்கை முதன் முதலில் தமிழில் கொண்டுவரப்பட்டு இவ்வாறு அரசியல் கட்சிகளின் தலைவர்களுக்கு அன்பளிப்பாகக் கொடுப்பதன் மூலம், மேலும் முழுதாக அறிக்கையைப் புரிந்து கொள்ள உதவும் என்றும் தேவைப்படும் காலத்தில் இதைச் செய்துள்ளதைப் பாராட்டி நன்றி தெரிவிப்பதாக தா.பாண்டியன் தெரிவித்துள்ளார்.
புத்தகத்தை மனிதம் அமைப்பின் சென்னைப் பொறுப்பாளர் சுரேஷ், தா.பாண்டியனிடம் கொடுத்தார்.
மனிதம் சென்னையின் இளைஞர் பிரிவு பொறுப்பாளரும் சட்டத்தரணியுமான கோபால் மற்றும் மனிதம் செயல் இயக்குநர் அக்னி சுப்பிரமணியமும் உடன் இருந்தனர்.
இதேவேளை, மார்க்சிஸ்ட் கட்சியின் நாடாளுமன்ற, சட்டமன்ற உறுப்பினர்கள் மற்றும் கட்சியின் முக்கிய பொறுப்பாளர்களுக்கும் 30 போர்க்குற்றவாளி புத்தகங்கள் அன்பளிப்பாக வழங்கப்பட்டன.
அன்பளிப்பின் முதல் பிரதியை மார்க்சிஸ்ட் கட்சியின் தமிழ் மாநில செயலாளர் ஜி.ராமகிருஷ்ணன் பெற்றுக் கொண்டார்.
மனிதம் அமைப்பு எவ்வித பிரதிபலனும் எதிர்ப்பார்க்காமல், ஐ.நா. அறிக்கையின் தமிழ் மொழிபெயர்ப்பை தங்களது கட்சியினருக்கு கொடுத்துள்ளதை சரியாகப் பயன்படுத்திக் கொள்ளப் போவதாகவும், இதற்கு பாராட்டையும், நன்றியையும் தெரிவித்துக் கொள்வதாகவும் ஜி.ராமகிருஷ்ணன் தெரிவித்தார்.
வரும் வாரங்களில், தமிழகத்தில் உள்ள அனைத்துக் கட்சியின் நாடாளுமன்ற, சட்ட மன்ற உறுப்பினர்கள் மற்றும் கட்சியின் முக்கிய பொறுப்பாளர்களுக்கும் போர்க்குற்றவாளி புத்தகங்கள் கொடுக்கப்பட உள்ளன.
*****************

அம்பலப்படுத்தும் சர்வதேச மன்னிப்புச் சபை
கற்றுக்கொண்ட பாடங்கள் மற்றும் நல்லிணக்க ஆணைக்குழுவின் குறைபாடுகளை அம்பலப்படுத்தப்போவதாக சர்வதேச மன்னிப்புச்சபை தெரிவித்துள்ளது.
நல்லிணக்க ஆணைக்குழுவின் அடிப்படை முரண்பாடுகள் மற்றும் குறைபாடுகள் தொடர்பான தகவல்கள் உள்ளடங்கிய அறிக்கை ஒன்று விரைவில் வெளியிடப்படும் என்றும் சர்வதேச மன்னிப்புச்சபை அறிவித்துள்ளது.
நல்லிணக்க ஆணைக்குழுவின் குறைபாடுகள், எப்போது இவர்களுக்கு நியாயம் கிட்டும் என்ற தலைப்பில் மன்னிப்புச்சபையின் அறிக்கை வெளியிடப்படவுள்ளது.
அதேவேளை, நல்லிணக்க ஆணைக்குழுவிடம் சாட்சியங்களை முன்வைக்குமாறு சர்வதேச மன்னிப்புச்சபை, மனித உரிமை கண்காணிப்பகம் மற்றும் சர்வதேச அனர்த்தக்குழு ஆகியவற்றுக்கு அழைப்பு விடுக்கப்பட்டிருந்தது.
எனினும் அந்த அழைப்பை மூன்று அமைப்புகளும் நிராகரித்தமை குறிப்பிடத்தக்கது
*****************

தியாக தீபத்தின் நினைவேந்தல் நிகழ்வு ஏற்பாடு
தியாக தீபம் லெப்.கேணல் திலீபனின் 24 ஆவது ஆண்டினை முன்னிட்டு நினைவு வணக்க நிகழ்வும், அடையாள உண்ணா விரதமும் பிரித்தானியாவில் நடாத்த ஒழுங்கு செய்யப்பட்டுள்ளது.
பிரித்தானியத் தலைநகர் லண்டனில் உள்ள சிவயோகம் மண்டபத்தில் எதிர்வரும் 26ஆம் திகதி திங்கள் கிழமை காலை 8:00 மணி முதல் மாலை 8:00 மணி வரை நடைபெறவுள்ளது.
பிரித்தானியத் தமிழர் ஒன்றியத்தின் ஏற்பாட்டில் நடைபெறவுள்ள இந்த நிகழ்வில் தாயகத்து உறவுகளின் இன்றைய அவல வாழ்வை நீக்கும் பொருட்டு சர்வதேசத்தின் கவனத்தை ஈர்க்கும் வகையிலேயே அடையாள உண்ணாவிரதம் நடாத்தப்படவுள்ளது.
இந்த நிகழ்வில் அடையாள உண்ணா நிலைப் போராட்டம் ஒருபுறம் நடக்கும் அதே வேளை பாடசாலைப் பிள்ளைகளின் ஆக்கங்களான கவிதைகள், பேச்சுக்கள், எழுச்சிப் பாடல்கள், எழுச்சி நடனங்கள் போன்றனவும் இடம்பெற ஒழுங்குகள் மேற்கொள்ளப்பட்டுள்ளது.
இவ்வருடம் பிரித்தானியாவில் ஒருங்கிணைந்த வகையில் ஒரே இடத்தில் முழுநாள் நிகழ்வாக நடைபெறவுள்ளது.
முழுநாள் நிகழ்வு என்பதால் ஈழ உணர்வாளர்கள் தமது நேரத்திற்குத் தகுந்தவாறு தியாகி திலீபனுக்கும், இம் மாதத்தில் வீரச்சாவைத் தழுவிய மாவீரர்களுக்கும் வீரவணக்கத்தினை செலுத்திக்கொள்ளலாம் எனவும் அறிவிக்கப்பட்டுள்ளது.
*****************


மன்மோகனை கெடுத்த நாரயணன்!
தமிழர் விரோத நிலைப்பாட்டை இந்தியா எடுத்ததற்கு இந்தியப் பிரதமரின் தேசிய பாதுகாப்பு ஆலோசகராக இருந்த எம்.கே.நாராயணனே காரணம் என்று விக்கிலீக்ஸ் தகவல் வெளியிட்டுள்ளதாக இந்திய ஊடகம் ஒன்று செய்தி வெளியிட்டுயிட்டுள்ளது.
இந்தியப் பிரதமர் மன்மோகன்சிங்கின் முக்கியமான ஆலோசகராக எம்.கே.நாராயணனே இருந்ததாகவும், சிறிலங்கா விவகாரத்தில் அவரே சிங்கள சார்பு நிலையை எடுக்குமாறு அவருக்கு ஆலோசனை கூறியதாகவும் விக்கிலீக்ஸ் குறிப்பிட்டுள்ளது.
சீனாவின் கொள்கை தொடர்பாக பொய்யான அச்சமூட்டும் தகவல்களைக் கூறியே எம்.கே. நாராயணன், இந்த முடிவை எடுக்கக் காரணமாக இருந்ததாகவும் அந்தச் செய்தியில் கூறப்பட்டுள்ளது.
இது ஜவர்கர்லால் நேருவை கிருஸ்ணமேனன் தவறாக வழிநடத்தியது போலவே மன்மோகன்சிங்கை எம்.கே.நாராயணன் வழிநடத்தியிருப்பதாகவும் அதில் கூறப்பட்டுள்ளது.
இந்த இருவருமே இந்தியாவின் வெளிவிவகாரக் கொள்கைகளை தவறாக வழிநடத்தியதாகவும் இந்திய ஊடகம் குறிப்பிட்டுள்ளது.
புதுடெல்லியில் உள்ள அமெரிக்கத் தூதுவர் திமோதி ஜே ரோமர் கடந்த 2009 டிசம்பர் 17ம் நாள் அனுப்பிய தகவல் குறிப்பிலேயே எம்.கே நாராயணன் பற்றிய இந்தக் குறிப்பு இடம்பெற்றுள்ளதாகவும் விக்கிலீக்ஸ் தகவல் வெளியிட்டுள்ளது.
*****************


காமக் களியாட்ட இனவழிப்புப் படை!
ஹெய்ட்டியில் ஐ.நா அமைதிப்படையில் பணியாற்றிய 100 இற்கும் அதிகமான சிறிலங்கா படையினர் வயது குறைந்த பெண்களை பாலியல் துன்புறுத்தலுக்கு உள்ளாக்கிய குற்றச்சாட்டின் பேரில் நாடு கடத்தப்பட்டதாக அனைத்துலக ஊடகங்கள் தகவல் வெளியிட்டுள்ளன.
2007ம் ஆண்டு டிசம்பர் மாதம் இந்தச் சம்பவம் இடம்பெற்றதாக அனைத்துலக ஊடகங்கள் குறிப்பிட்டுள்ளன.
ஹெய்டியில் பணிக்கு அமர்த்தப்பட்டுள்ள ஐ.நா அமைதிப்படையில் பணியாற்றும் பல்வேறு நாடுகளிதும் படையினர் மீது பாலியல் குற்றச்சாட்டுகள் சுமத்தப்பட்டுள்ளன.
ஐ.நா அமைதிப்படையில் அங்கம் வகிக்கும் நான்கு உருகுவே நாட்டுப் படையினர் ஹெய்டியைச் சேர்ந்த 18 வயது பெண் ஒருவரை பாலியல் வன்புணர்வுக்குட்படுத்தும் காணொலிக் காட்சி ஒன்று வெளியாகி பெரும் அதிர்ச்சியை ஏற்படுத்தியுள்ளது.
இதையடுத்தே 2007 இல் வயது குறைந்த சிறுமிகளை பாலியல் துன்புறுத்தலுக்குள்ளாகிய குற்றச்சாட்டின் பேரில் 100இற்கும் அதிகமான சிறிலங்காப் படையினர் அங்கிருந்து நாடுகடத்தப்பட்ட தகவல் அம்பலமாகியுள்ளது.
ஐ.நா அமைதிப்படையில் பணியாற்றும் சிறிலங்காப் படையினர் மிகவும் ஒழுக்கத்துடன் நடந்து கொள்வதாக அண்மையில் சிறிலங்கா அரசாங்கம் கூறியிருந்தது.
ஐ.நா அமைதிப்படைக்கு மேலதிகமாக 5000 படையினரை- 48 மணிநேர காலஅவகாசத்தில் அனுப்பத் தயாராக இருப்பதாக சிறிலங்கா அரசாங்கம் கூறிவருகின்ற போதும், இதுபோன்ற குற்றச்சாட்டுகளாலேயே ஐ.நா புதிய உடன்பாடு எதையும் செய்யாதிருப்பதாகவும் தகவல்கள் தெரிவிக்கின்றன
*****************

தேடும் யுனிசெப்
சிறிலங்காவில் இடம்பெற்ற இறுதியுத்தத்தின் போது காணாமல்போன பிள்ளைகளைப் தேடி மீளவும் அவர்களது குடும்பங்களுடன் ஒன்றிணைப்பதற்கான திட்டமானது தற்போது மேலும் விரிவாக்கப்பட்டு வருவதாக ஐ.நாவின் சிறுவர் நிதியமான யுனிசெப் தெரிவித்துள்ளது.
இத்திட்டமானது சிறிலங்காவில் நீண்ட காலமாகத் தொடரப்பட்ட உள்நாட்டு யுத்தம் நிறைவுக்குக் கொண்டு வரப்பட்ட 2009 இலிருந்து சிறிலங்கா அரசாங்கத்தின் ஆதரவுடன் மேற்கொள்ளப்பட்டு வருகின்றது.
சிறிலங்காவின் வட பகுதியிலுள்ள இரு மாவட்டங்களில் மேற்கொள்ளப்பட்டு வரும் இத்திட்டமானது தற்போது வடபகுதியின் ஏனைய மாவட்டங்களுக்கும், யுத்தத்தால் பாதிக்கப்பட்ட கிழக்கு மாகாணத்தின் சில பகுதிகளுக்கும் விரிவாக்கப்பட்டு வருகின்றது.
இத்திட்டமானது தாமதமாக மேற்கொள்ளப்பட்டு வருகின்ற போதிலும், தொலைந்து போன சிறார்களைத் தேடிக் கண்டுபிடித்து மீளவும் அவர்களது குடும்பத்தவர்களுடன் ஒன்று சேர்ப்பதில் யுனிசெப் நிறுவனம் கணிசமானளவு வெற்றியைப் பெற்றுக்கொண்டுள்ளது.
இதுவரையில் இத்திட்டத்தின் கீழ் 45 சிறார்கள் மீளவும் அவர்களது குடும்பங்களுடன் இணைக்கப்பட்டுள்ளதாகவும், ஆனால் இன்னமும் 582 சிறார்கள் காணாமற்போனோர் பட்டியலில் உள்ளதாகவும் தெரிவிக்கப்படுகின்றது.
காணாமற்போன சிறார்களைத் தேடிக் கண்டுபிடித்து அவர்களது குடும்பங்களுடன் மீள ஒன்று சேர்ப்பதென்பது இணக்கப்பாட்டு முயற்சியின் போது தேவைப்பாடுடைய ஒன்றாகும் என சிறிலங்காவிற்கான யுனிசெப் பிரதிநிதி றேசா கொசாய்னி தெரிவித்துள்ளார்.
*****************

செய்திகள் 04/09


தமிழர்களை தாக்கும் இனவாத இனவழிப்பு இராணுவம்
உடுவில் ஆலடிப் பகுதியில் மர்ம மனிதனது நடமாட்டத்தினால் வீதிக்கு வந்த பொதுமக்கள் இராணுவத்தினரால் கடுமையாகத் தாக்கப்பட்டுள்ளனர்.
துப்பாக்கிப் பிடி மற்றும் கொட்டன்களால் தாக்கப்பட்டதில் மோசமான காயங்களுக்கு உள்ளான மூவர் நீதிமன்ற உத்தரவின் பேரில் நேற்றுமாலை யாழ். போதனா வைத்தியசாலையில் சேர்க்கப்பட்டனர்.
சந்தேகப்படும்படியாக நடமாடிய நபர்களைத் துரத்திச் சென்றபோதே இராணுவத்தினர் திடீரென வந்து தங்கள் மீது கண்மூடித்தனமாகத் தாக்குதல் நடத்தினர் என்று அந்தப் பகுதி மக்கள் நாடாளுமன்ற உறுப்பினர் ஈ.சரவணபவனிடம் தெரிவித்தனர்.
நேற்றுப் பகல் நாடாளுமன்ற உறுப்பினர் நேரில் சென்று அந்த மக்களைச் சந்தித்து நிலைமைகளைக் கேட்டறிந்தார்.
இராணுவத்தினர் கை, கால்களில் மட்டுமன்றி தமது பிறப்பு உறுப்புக்களை இலக்கு வைத்தும் தாக்கினர் என்றும் மக்கள் முறையிட்டனர்.
தாக்குதலின் பின்னர் தாம் பிடித்த மூவரை இராணுவத்தினர் மானிப்பாய் காவல்துறையினரிடம் ஒப்படைத்தனர்.
காவல்துறையினர் அவர்களை மல்லாகம் நீதிமன்றில் முன்னிலைப்படுத்தினர்.
அவர்கள் மூவரையும் யாழ்.போதனா வைத்தியசாலைக்குக் கொண்டு சென்று மருத்துவ பரிசோதனைக்கு உட்படுத்துமாறு நீதிபதி உத்தரவிட்டார்.
எதிர்வரும் செவ்வாய்க்கிழமை மருத்துவ அறிக்கையுடன் அவர்களை மீண்டும் நீதிமன்றில் முன்னிலைப்படுத்துமாறும் உத்தரவிட்டார்.
வலிகாமம் வடக்கு உயர்பாதுகாப்பு வலயத்துள் அடங்கும் மயிலிட்டிப் பகுதியிலிருந்து இடம்பெயர்ந்து உடுவில் ஆலடியில் வசித்த மக்கள் மீதே தாக்குதல் நடத்தப்பட்டுள்ளது.
******************

வாக்காளத்து வாங்கும் கூட்டம் தயார்?
இந்த மாத நடுப்பகுதியில் ஜெனீவாவில் நடைபெற உள்ள ஐக்கிய நாடுகள் சபை மனித உரிமைகள் மாநாட்டில், இலங்கைக்கு எதிராக மனித உரிமை மீறல் குற்றச்சாட்டுக்கள் எழுப்பப்படும் என்று தீவிரமாக எதிர்பார்க்கப்படும் நிலையில், நிலைமையைச் சமாளிக்க யாழ். அரச அதிபர் திருமதி இமெல்டா சுகுமாரை நேரடி சாட்சியாகக் களம் இறக்க அரசு நடவடிக்கை எடுத்துள்ளது.
இதற்காக இந்தோனேஷியத் தலைநகர் மணிலாவில் தற்போது நடைபெற்றுவரும் உலக உணவுத்திட்ட கருத்தரங்கில் கலந்துகொண்டுள்ள இமெல்டா, அங்கிருந்து நேரடியாக ஜெனீவா செல்வார் என்று வெளிவிவகார அமைச்சு அதிகாரி ஒருவர் தெரிவித்தார்.
வன்னியில் போர் தீவிரமாக நடைபெற்ற காலப்பகுதியில் முல்லைத்தீவில் அரச அதிபராக இருந்த திருமதி இமெல்டா சுகுமார் இறுதிவரை கடமையாற்றியவர்.
அப்போது எறிகணைத் தாக்குதலில் காயமடைந்தும் இருந்தார்.
எனவேதான் அவரை இறுதிப் போர் குறித்த அரச தரப்பு சாட்சியாக ஜெனீவாவில் முன்நிறுத்த அரச தரப்புத் தீர்மானித்துள்ளது.
போரின் நேரடிச் சாட்சி என்ற வகையில் அரசு மீதான குற்றச்சாட்டுக்களைத் தமிழர் ஒருவரை வைத்தே முறியடிக்க அரசு இராஜதந்திர ரீதியில் திட்டமிட்டுள்ளது என்று கொழும்பில் உள்ள மேற்குலக ராஜதந்திரி ஒருவர் தெரிவித்தார்.
போரின் பின்னர் அரசு மேற்கொண்ட நல்லிணக்க முயற்சிகள் மற்றும் தமிழர் பகுதிகளில் மேற்கொள்ளப்பட்ட அபிவிருத்தித் திட்டங்கள் என்பவற்றை முன்னிறுத்தியே ஜெனீவாவில் அரச தரப்பு தன்னை நியாயப்படுத்தும் என்று அமைச்சர் மஹிந்த சமரசிங்க தெரிவித்திருந்தார்.
இதற்கமைவாக, வடக்கில் கண்ணிவெடி அகற்றப்பட்ட பிரதேசங்களின் முழுமையான விவரம் மற்றும் மீளக்குடியமர்த்தப்பட்ட மக்களின் விவரங்கள் என்பவற்றை வடக்கில் உள்ள அரச செயலகங்களில் இருந்து அரசு பெற்றுக் கொண்டுள்ளதாக அறியப்படுகிறது.
******************
இராணுவத்தை அகற்ற கோரிக்கை
மக்கள் குடியிருப்புக்களுக்கு மத்தியிலிருந்து இராணுவத்தினரை அகற்றி அவர்களை பிரதான முகாம்களுக்குள் மட்டும் முடக்குவதே, யாழ்ப்பாணத்திலும் வடக்கு, கிழக்கின் ஏனைய பகுதிகளிலும் இன்று காணப்படும் குழப்ப நிலைகளைத் தீர்க்க இருக்கும் ஒரே வழி.
அதனைச் செய்யவில்லையேல், மக்கள் கிளர்ந்து இந்தப் பகுதிகளில் மீண்டும் ஒரு வன்முறை ஏற்படவே அது வழிவகுக்கும் என்று யாழ்.மாவட்ட தமிழ்த் தேசியக் கூட்டமைப்பு நாடாளுமன்ற உறுப்பினர் ஈ.சரவணபவன் தெரிவித்துள்ளார்.
மானிப்பாய் பகுதியில் நேற்றுமுன்தினம் இரவு படையினரால் தாக்கிக் காயப்படுத்தப்பட்ட மக்களை நேரில் சென்று பார்வையிட்டுப் பேசிய பின்னர் அவர் விடுத்த அறிக்கையிலேயே இதனைத் தெரிவித்துள்ளார்.
போர் முடிவடைந்து மூன்று வருடங்கள் ஆகிவிட்ட நிலையிலும் வடக்குகிழக்கு பகுதிகளில் இராணுவத்தினரை முகாம்களுக்கு முடக்க அரசு தவறியதே தற்போது இந்தப் பகுதிகளில் ஏற்பட்டுள்ள குழப்பங்கள் எல்லாவற்றுக்கும் காரணம்.
சிவில் சமூகத்துக்குள் இராணுவம் தேவையில்லை.
வடக்கு கிழக்கில் இராணுவம் குடிமனைகளுக்கு நடுவில் ஆங்காங்கே சிறிய கொட்டகைகளிலும் மினி முகாம்களிலும் சிறிய சிறிய முகாம்களிலும் இருப்பதுதான் இப்போதைய குழப்பங்கள் எல்லாவற்றுக்கும் காரணம்.
இவ்வாறு இருக்கும் இராணுவத்தினர்தான் கிறிஸ் பூதமாக அல்லது மர்ம மனிதர்களாக தமது வீடுகளுக்குள் நடமாடுகிறார்கள் என்று மக்கள் உறுதியாக நம்புகிறார்கள்.
சந்தேகத்துக்கு இடமாக நடமாடுபவர்களைத் துரத்திச் செல்லும் ஒவ்வொரு தடவையும், எங்காக இருந்தாலும் இராணுவத்தினர் அந்த இடங்களுக்கு வந்துவிடுகிறார்களே? அது எப்படி? என்று மக்கள் எழுப்பும் கேள்வி நியாயமானதே.
இராணுவத்தினரும் சும்மா வருவதில்லை. கொட்டன்கள், பொல்லுகளுடனேயே வருகிறார்கள். அவர்கள் மக்களைத் தாக்குவதிலேயே குறியாக இருக்கிறார்கள்.
அவசரகாலச் சட்டம் நீக்கப்பட்ட நிலையில் பொதுமக்களைச் சோதனையிடுவதற்கும் அவர்களைத் தாக்குவதற்கும் இராணுவத்தினருக்கு யார் அதிகாரம் கொடுத்தது? எனவும் அவர் கேள்வி எழுப்பியுள்ளார்.
தமிழர்களுக்கு எதிராக இனவாதம் ஊட்டி வளர்க்கப்பட்ட சிங்கள இராணுவம், இப்போது போர் இல்லாத நிலையில் தனது வெறியைத் தீர்த்துக் கொள்வதை நோக்கமாகக் கொண்டே இதுபோன்ற மர்ம மனிதர்கள் விவகாரத்தை உருவாக்கி, மக்கள் மீது தாக்குதல்களை நடத்தி வருகிறார்கள் என்று குற்றஞ்சாட்டுவதற்கு எல்லா நியாயங்களும் இருக்கின்றன எனவும் அவர் சுட்டிக்காட்டியுள்ளார்.
அரசுத் தலைவரும் அரசும் நாட்டில் அமைதி நிலவ வேண்டும் என்று உண்மையில் விரும்பினால் இராணுவத்தினரை முகாம்களுக்குள் முடக்க உடனடியாக நடவடிக்கை எடுக்க வேண்டும்.
இல்லையேல் மக்கள் கிளர்ந்தெழுவதைத் தடுக்க முடியாது.
நீங்கள் விரைந்து செயற்படவில்லை எனில், அவர்கள் விரைந்து முடிவெடுப்பார்கள் எனவும் நாடாளுமன்ற உறுப்பினர் சரவணபவன் தெரிவித்துள்ளார்.
******************
தன்மானமிழந்த ஸ்ரீலங்கா அமைச்சர்கள்
18 ஆவது அரசியலமைப்புக்கு ஆதரவு வழங்கியதன் மூலம் அமைச்சர்கள் தன்மானத்தை இழந்துள்ளதாக முன்னாள் இராணுவத் தளபதி சரத் பொன்சேக்கா தெரிவித்துள்ளார்.
இந்த நடவடிக்கையால் நாட்டின் கௌரவத்தையும் மக்களின் கௌரவத்தையும் இழக்க நேரிட்டுள்ளதாக அவர் கூறியுள்ளார்.
தோள்பட்டையில் ஏற்பட்டுள்ள உபாதைக்கு உடற்கூற்று சிகிச்சைகளை பெற்றுக் கொள்வதற்காக கொழும்பிலுள்ள தனியார் வைத்தியசாலைக்கு அழைத்து வரப்பட்ட போதே சரத் பொன்சேக்கா இந்தக் கருத்துக்களை வெளியிட்டார்.
மக்களுக்காக தொடர்ந்தும் அர்ப்பணிப்புடன் செயற்பட எண்ணியுள்ளதாக தெரிவித்த அவர் அழகானதொரு நாட்டை உருவாக்கிக் கொடுப்பதாகவும் கூறியுள்ளார்.
******************
கையெழுத்திட தயங்கும் ஸ்ரீலங்கா
சட்டவிரோதமான காணாமல் போதல் தொடர்பான ஐக்கிய நாடுகள் சாசனத்தில் இலங்கை கைச்சாத்திட வேண்டும் என்று ஐக்கிய நாடுகள் சபையின் நடவடிக்கை குழு வலியுறுத்தலை விடுத்துள்ளது.
இந்தக்குழு இலங்கைக்கு வருகைத்தர பல தடவைகள் அனுமதி கோரியபோதும் அதற்கான அனுமதியை இலங்கை வழங்கவில்லை என்று சட்டவிரோதமாக காணாமல் போனோர் தொடர்பிலான ஐக்கிய நாடுகள் நிறுவனத்தின் உறுபபினர் மார்டிஸ் ஜோசு பெல்லாடோ தெரிவித்துள்ளார்.
எதிர்வரும் ஒக்டோபர் 16 ஆம் திகதி ஜெனீவாவில் நடைபெறும் நிறுவன நிகழ்வுக்கு வருமாறு இலங்கை அரசாங்கத்துக்கு அழைப்பு விடுக்கப்பட்டுள்ளது.
எனினும் அந்த நிகழ்வில் பங்கேற்க முடியாது என்று இலங்கை அரசாங்கம் பதிலளித்துள்ளது.
இது தொடர்பில் இரண்டு ஞாபகமூட்டல் கடிதங்களை ஐக்கிய நாடுகளின் சட்டவிரோத காணாமல் போவோர் தொடர்பான நடவடிக்கைக்குழு, இலங்கைக்கு அனுப்பியபோதும் அதற்கு இலங்கை அரசாங்கம் பதிலளிக்கவில்லை.
இலங்கையில் காணாமல் போனோர் தொடர்பில் 12ஆயிரத்து, 230 முறைப்பாடுகளை ஐக்கிய நாடுகளின் காணாமல் போனோர் நடவடிக்கை குழு கொண்டிருக்கிறது.
இதில் 40 முறைப்பாடுகள் தொடர்பில் தகவல்கள் கிடைக்கப்பெற்றுள்ளன.
6ஆயிரத்து 535 முறைப்பாடுகள் தொடர்பில் இலங்கை அரசாங்கம் விசாரணைனைகளை மேற்கொள்வதாக அறிவித்துள்ளது.
எனினும் 5ஆயிரத்து 653 முறைப்பாடுகள் தொடர்பில் எவ்வித தகவல்களும் கிடைக்கவில்லை.
இதேவேளை இலங்கை அரசாங்கம் தமது எல்லைக்குட்பட்ட பகுதியில் சட்டவிரோத காணாமல் போதல் சம்பவங்களை கட்டுப்படுத்துமாறு பலதடவைகளாக இலங்கை அரசாங்கத்திடம் கோரிக்கை விடுத்துள்ளமை குறிப்பிடத்தக்கது.
******************
அச்சமடைந்துள்ள மகிந்த!
ஐ.நா பொதுச்சபைக் கூட்டத்தில் பங்கேற்கச் செல்லும் போது ஹொஸ்டனில் தனது குடும்பத்தினரை சந்திப்பதற்கு சிறிலங்கா அதிபர் மகிந்த ராஜபக்ச போட்டிருந்த திட்டம் திடீரெனக் கைவிடப்பட்டுள்ளது.
எதிர்வரும் 13ம் நாள் நியுயோர்க்கில் ஆரம்பமாகும் ஐ.நா பொதுச்சபைக் கூட்டத்தில் பங்கேற்கச் செல்லும் போது, சில நாட்கள் முன்னதாவே ஹொஸ்டனுக்குச் சென்று குடும்பத்தினருடன் சில நாட்களை கழிக்க சிறிலங்கா அதிபர் திட்டமிட்டிருந்தார்.
தற்போது அந்தத் திட்டம் கைவிடப்பட்டு ஐ.நா பொதுச்சபைக் கூட்டத்தின் நிகழ்ச்சி நிரலை ஒட்டி மாற்றியமைக்கப்பட்டுள்ளது.
ஐ.நா பொதுச்சபையில் உரையாற்ற சிறிலங்கா அதிபருக்கு செப்ரெம்பர் 23ம் நாள் நேரம் ஒதுக்கப்பட்டுள்ளது.
எனவே அவர், பொதுச்சபையின் ஆரம்ப அமர்வுகளில் பங்கேற்கமாட்டார் என்று தகவல்கள் தெரிவிக்கின்றன.
சிறிலங்கா அதிபர் மகிந்த ராஜபக்ச அமெரிக்காவில் அதிக நாட்கள் தங்கியிருப்பதைத் தவிர்க்க முடிவு செய்துள்ளதாக கூறப்படுகிறது.
அமெரிக்க நீதிமன்றம் ஒன்றில் சிறிலங்கா அதிபருக்கு எதிராக தொடுக்கப்பட்டுள்ள வழக்குகளின் மீது அவருக்கு எதிரான நடவடிக்கை எடுக்கப்படலாம் என்ற அச்சத்தினாலேயே அவர் அமெரிக்கப் பயணத்தை சுருக்கியிருப்பதாகவும் தகவல்கள் தெரிவிக்கின்றன.
******************
கொழும்பு செல்லும் பிளேக்
அமெரிக்காவின உதவி இராஜாங்கச் செயலர் றொபேட் ஓ பிளேக் மூன்ற நாள் பயணமாக செப்ரெம்பர் 12ம் நாள் கொழும்பு செல்லவுள்ளார்.
கடந்த மாத இறுதியில் கொழும்பு வரத் திட்டமிட்டிருந்த பிளேக் ஐரின் சூறாவளியினால் தனது பயணங்களைப் பிற்போட்டிருந்தார்.
தற்போது அவர் தனது பயணத் திட்டங்களை மாற்றியமைத்து எதிர்வரும் 12ம் நாள் கொழும்பு செல்வதற்கு ஒழுங்குகளைச் செய்துள்ளதாக கொழும்பு ஊடகத் தகவல்கள் தெரிவிக்கின்றன.
கொழும்பு செல்லும் பிளேக் இரண்டு விடயங்களை வலியுறுத்தவுள்ளதாக முன்னர் தகவல்கள் வெளியாகியிருந்தன.
நல்லிணக்க ஆணைக்குழுவின் அறிக்கையை ஐ.நா மனிதஉரிமைகள் பேரவையில் விவாதத்துக்கு கொண்டு செல்வது குறித்தும் தமிழ்த் தேசியக் கூட்டமைப்புடனான பேச்சுக்களை மீளத் தொடங்குவது குறித்தும் சிறிலங்கா அரசிடம் அவர் வலியுறுத்துவார் என்று தகவல்கள் வெளியாகியிருந்தன.
நல்லிணக்க ஆணைக்குழுவின் அறிக்கையை அடுத்த ஆண்டு மார்ச் மாதம் நடைபெறவுள்ள 19வது கூட்டத்தொடரில் விவாதிப்பது குறித்த தீர்மானத்தை எதிர்வரும் 12ம் நாள் தொடங்கும் 18வது கூட்டத்தொடரில் கொண்டு வருவது குறித்து அமெரிக்கா இராஜதந்திர வழிமுறைகளின் ஊடாக சிறிலங்காவுக்குத் தெரியப்படுத்தியிருந்தது.
ஆனால் அது சிறிலங்கா விவகாரத்தை அனைத்துலக மயப்படுத்தி விடும் என்பதால், மகிந்த ராஜபக்ச அரசாங்கம் அந்தத் திட்டத்தை உடனடியாகவே நிராகரித்து விட்டது.
எனினும் இந்தப் பயணத்தின் போது பிளேக் அமெரிக்காவின் நிலைப்பாட்டை இறுக்கமாக வலியுறுத்துவார் என்றும் சிறிலங்காவின் நிலைப்பாட்டை மீளாய்வு செய்யுமாறு அழுத்தம் கொடுப்பார் என்றும் எதிர்பார்க்கப்படுகிறது.
இதற்கிடையே, தொடர்ச்சியாக மறுத்து வருவதால் மற்றொரு நாடு சிறிலங்காவுக்கு எதிரான தீர்மானத்தைக் கொண்டு வரலாம் என்று கவலையும் சிறிலங்கா வெளிவிவகார அமைச்சின் உயரதிகாரிகள் மத்தியில் தோன்றியுள்ளது.
மூன்று நாள் சிறிலங்கா பயணத்தின் போது யாழ்ப்பாணத்துக்கும் செல்ல திட்டமிட்டுள்ள பிளேக், கொழும்பில் இருந்து செப்ரெம்பர் 14ம் நாள் புதுடெல்லி செல்லவுள்ளார்.
அங்கு அவர் தூதுவர் நிலையில் அல்லாத அமெரிக்க அதிகாரிகளுடன் கலந்துரையாடல்களை நடத்தவுள்ளார்.
******************
பதறியடித்து பறந்து திரியும் பீரிஸ்!
அமெரிக்காவின் உதவி இராஜாங்கச் செயலர் றொபேட் ஓ பிளேக் எதிர்வரும் 12ம் நாள் கொழும்பு செல்லத் திட்டமிட்டுள்ளதால், சிறிலங்கா வெளிவிவகார அமைச்சர் ஜி.எல்.பீரிஸ் தனது ஜெனிவா பயணத் திட்டங்களை கைவிட்டு அவசரமாகக் கொழும்பு திரும்பவுள்ளார்.
சிங்கப்பூர், தென்கொரியா, பிரித்தானியா, சேர்பியா உள்ளிட்ட நாடுகளுக்கான பயணத்தின் முடிவில் ஜெனிவாவில் நடைபெறும் ஐ.நா மனிதஉரிமைகள் பேரவைக் கூட்டத்தொடரில் பங்கேற்க வெளிவிவகார அமைச்சர் பீரிஸ் திட்டமிட்டிருந்தார்.
ஆனால் அவரது பயணத் திட்டம் பிளேக்கின் வருகையால் குழம்பிப் போயுள்ளது.
அமெரிக்காவின் உதவி இராஜாங்கச் செயலர் றொபேட் ஓ பிளேக் செப்ரெம்பர் 12ம் நாள் கொழும்பு வருவதால், சிறிலங்கா வெளிவிவகார அமைச்சர் பீரிஸ் ஜெனிவா பயணத்தை பாதியில் நிறுத்தி விட்டு கொழும்பு திரும்பவுள்ளார்.
செப்ரெம்பர் 11ம் நாள் ஜெனிவா செல்லும் அவர் அன்றைய நாள் மட்டுமே அங்கு தங்கியிருப்பார்.
அதுவும் ஐ.நா மனிதஉரிமைகள் பேரவைக் கூட்டத்தில் பங்கேற்க ஜெனிவா வரும் பிரதிநிதிகள் பலருக்கும் மதிய மற்றும் இரவு விருந்து அளிப்பதற்காகவே அவர் ஜெனிவாவில் தங்கியிருப்பார் என்றும் தகவல்கள் தெரிவிக்கின்றன.
அதன்பின்னர் அவர் உடனடியாகவே கொழும்பு திரும்பவுள்ளார்.
******************
ம(h)து போசனமளிக்கும் ஸ்ரீலங்கா!
ஐ.நா மனிதஉரிமைகள் பேரவையில் அங்கம் வகிக்கும் நாடுகளின் தூதுவர்கள் மற்றும் இராஜதந்திரிகளுக்கு கொழும்பில் இரவு விருந்து கொடுத்து வளைத்துப் போடும் முயற்சியில் சிறிலங்கா அரசாங்கம் ஈடுபட்டதாக தகவல்கள் வெளியாகியுள்ளன.
ஜெனிவாவில் நடைபெறும் ஐ.நா மனிதஉரிமைகள் பேரவைக் கூட்டத்தொடரில் சிறிலங்கா சார்பில் பங்கேற்கும் குழுவுக்குத் தலைமை தாங்கும் அமைச்சர் மகிந்த சமரசிங்கவே இந்த இரவு விருந்துக்கு ஏற்பாடு செய்துள்ளார்.
அமைச்சர் நிமால் சிறிபால டி சில்வா, சிறிலங்கா அரசின் மூத்த சட்ட ஆலோசகர் மொகான் பீரிஸ் ஆகியோரும் இந்த விருந்துபசாரத்தில் பங்கேற்றிருந்தனர்.
காலிமுகத்திடல் விடுதியில் நடந்த இந்த இரவு விருந்துக்கு ஐ.நா மனித உரிமைகள் பேரவையில் அங்கம் வகிக்கும் நாடுகளின் பிரதிநிதிகள் அழைக்கப்பட்டிருந்தனர்.
பங்களாதேஸ், கியூபா, சீனா, இந்தியா, இந்தோனேசியா, மாலைதீவு, நோர்வே, கட்டார், ரஸ்யா, சவூதிஅரேபியா, சுவிற்சர்லாந்து, தாய்லாந்து, அமெரிக்கா உள்ளிட்ட நாடுகளின் பிரதிநிதிகள் இந்த இரவு விருந்தில் கலந்து கொண்டுள்ளனர்.
அதேவேளை ஐ.நா மனிதஉரிமைகள் பேரவையின் உறுப்பு நாடுகளுடனான இராஜதந்திரத் தொடர்புகளை வலுப்படுத்திக் கொள்வதே சிறிலங்காவின் தற்போதைய இலக்கு என்று சிறிலங்கா வெளிவிவகார அமைச்சின் அதிகாரி ஒருவர் தகவல் வெளியிட்டுள்ளார்.
ஜெனிவாவில் ஐ.நா மனிதஉரிமைகள் பேரவையின் 18வது கூட்டத்தொடர் எதிர்வரும் 12ம்நாள் ஆரம்பமாகி 30ம் நாள் வரை தொடர்ந்து நடைபெறும்.
இந்தக் கூட்டத்தொடரில் சிறிலங்காவில் இடம்பெற்ற போர்க்குற்றங்கள் மற்றும் ஐ.நா நிபுணர் குழுவின் அறிக்கை ஆகியன தொடர்பான தீர்மானம் கொண்டு வரப்படலாம் என்பதால், சிறிலங்கா அரசு அதனை முறியடிப்பதற்கான முயற்சிகளை கடந்தவாரம் உச்சவேகத்தில் முடுக்கி விட்டிருந்ததாக கொழும்பு ஆங்கில வாரஇதழ் ஒன்று தகவல் வெளியிட்டுள்ளது.
இதற்கிடையே, ஜெனிவா கூட்டத்தொடரில் பங்கேற்கும் மகிந்த சமரசிங்க தலைமையிலான சிறிலங்கா பிரதிநிதிகள் குழு எதிர்வரும் 8ம் நாள் கொழும்பில் இருந்து புறப்படவுள்ளது.
அமைச்சர்கள் நிமால் சிறிபால டி சில்வா, அனுர பிரியதர்சன யாப்பா, அமைச்சரவையின் சட்டஆலோசகர் மொகான் பீரிஸ் மற்றும் வெளிவிவகார அமைச்சின் மூத்த அதிகாரிகளும் இந்தக் குழுவில் இடம்பெறவுள்ளனர்.
முன்னதாகவே, ஜெனிவா செல்லும் சிறிலங்கா பிரதிநிதிகள் குழு அங்கு ஐ.நா மற்றும் வெளிநாட்டு இராஜதந்திரிகளைச் சந்தித்து சிறிலங்காவில் ஏற்பட்டுள்ள முன்னேற்றங்கள், அவசரகாலச்சட்டம் நீக்கப்பட்டுள்ளது, வடக்கு கிழக்கு நிலைமைகள் குறித்து விளக்கமளிக்கவும் திட்டமிட்டுள்ளது.
******************


Saturday, 3 September 2011

செய்திகள் 03/09


ஐநா என்ன செய்யும்?
ஐநா நிபுணர் குழு அறிக்கையை ஐநா சபையின் வேறு நிறுவனங்களுக்கு சமர்ப்பிப்பது குறித்து ஐநா செயலாளர் நாயகம் பான் கீ மூன் ஆராய்ந்து வருவதாக தெரிவிக்கப்படுகிறது.
நிபுணர் குழு தொடர்பிலான அடுத்தக் கட்ட நடவடிக்கைக்கு பான் கீ மூன் தயாராகி வருவதாக அவருடைய பதில் பேச்சாளர் பர்ஹான் ஹக் தெரிவித்துள்ளார்.
நிபுணர் குழு அறிக்கை ஐக்கிய நாடுகளின் மனித உரிமைப் பேரவையில் சமர்ப்பிக்கப்படுமா என ஊடகவியலாளர் ஒருவர் எழுப்பிய கேள்விக்கு பதிலளித்த போது அவர் இதனைக் குறிப்பிட்டுள்ளார்.
இதேவேளை, நிபுணர் குழு அறிக்கை தொடர்பில் பான் கீ மூன், எதிர்க்கட்சித் தலைவர் ரணில் விக்ரமசிங்கவுடன் பேச்சுவார்த்தை நடத்தியதை பர்ஹான் ஹக் உறுதிப்படுத்தியுள்ளார்
**************

பொய்யுரைக்க தயாராகும் ஸ்ரீலங்கா!
சனல்-4 தொலைக்காட்சி தயாரித்து வெளியிட்ட சிறிலங்காவின் கொலைக்களங்கள் ஆவணப்படத்துக்குப் போட்டியாக, சிறிலங்கா அரசாங்கம் தயாரித்துள்ள ஆவணப்படமும் ஐ.நா வளாகத்தில் காண்பிக்கப்படவுள்ளது.
'டுநைள யுபசநநன ருpழn' என்ற பெயரில் சிறிலங்கா பாதுகாப்பு அமைச்சு தயாரித்துள்ள இந்த ஆவணப்படத்தை ஐ.நா வளாகத்தில் னுயப ர்யஅஅயசளமதழடன மண்டபத்தில் எதிர்வரும் செப்ரெம்பர் 6ம் நாள் பிற்பகல் 2 மணியளவில் திரையிடப்படவுள்ளதாக அறிவிக்கப்பட்டுள்ளது.
இந்த நிகழ்வில் பங்கேற்குமாறு ஐ.நா வை தளமாகக் கொண்டு செயற்படும் ஊடகவியலாளர்களுக்கு அழைப்பு விடுக்கப்பட்டுள்ளது.
இந்த ஆவணப்படம் திரையிடப்பட்ட பின்னர் ஐ.நாவுக்கான சிறிலங்காவின் வதிபிடப் பிரதிநிதி கலாநிதி பாலித கொஹன்னவும், பிரதி வதிவிடப் பிரதிநிதி மேஜர் ஜெனரல் சவீந்திர சில்வாவும் கேள்விகளுக்குப் பதிலளிக்கவுள்ளனர்.
சிறிலங்காவின் கொலைக்களங்கள் ஆவணப்படம் ஐ.நா வளாகத்தில் உள்ள தேவாலய நிலையத்தில் திரையிடப்பட்டிருந்தது.
அதற்குப் போட்டியாகவே சிறிலங்கா அரசும் இந்த ஆவணப்படத்தை முதல் அவென்யூவில் திரையிடவுள்ளது.
இதன்மூலம் ஐ.நா வளாகத்தை சிறிலங்கா அரசு பரப்புரைக் களமாக மாற்ற முனைவதாக குற்றச்சாட்டுகள் எழுந்துள்ளன
**************

கேள்விக்கு என்ன பதில்?
ஐக்கிய நாடுகளின் மனித உரிமைகள் சபையில் இலங்கைக்கு எதிராக மனித உரிமை மீறல்கள் தொடர்பான குற்றச்சாட்டுகள் வைக்கப்பட்டால் உரிய பதில்களைத் தெளிவாக வழங்கத் அரசு தயாராகவே உள்ளது என்று மாநாட்டிற்குச் செல்லும் குழுவில் பங்குபெறும் அமைச்சர் நிமல் சிறிபால டிசில்வா தெரிவித்துள்ளார்.
சர்வதேச மட்டத்தில் இலங்கை விவகாரம் தொடர்பில் பல்வேறு நாடுகள் வௌ;வேறான கருத்துக்களை முன்வைத்து வருகின்ற நிலையில் இலங்கைக்கு ஆதரவாக சில நாடுகளும் எதிராக பல நாடுகளும் குரல் கொடுத்து வருகின்றன.
ஐக்கிய நாடுகள் சபை இலங்கை மீது சுயாதீன விசாரணை தேவை என்பதைத் தொடர்ந்து வலியுறுத்தி வருகின்றது.
இந்த நிலையில் ஜெனிவாவில் எதிர்வரும் 12ஆம் திகதி ஐ.நா. மனித உரிமைகள் சபையின் 18 ஆவது கூட்டத் தொடர் நடைபெறவுள்ளது.
இலங்கை விவகாரத்தில் சர்வதேசத்துக்குத் தகுந்த பதில் வழங்கப்படுமா என்று அமைச்சர் நிமால் சிறிபால டி சில்வாவிடம் வினவியபோது ஜெனிவா மாநாட்டின்போது தகுந்த பதில் வழங்கத் தயாராகவுள்ளதாக தெரிவித்துள்ளார்.
**************

தாக்கத்தின் வெளிப்பாடு உணர்த்தும் உண்மைகள்!
பொறுப்புடைமை விவகாரம் குறித்து, இலங்கை அரசுக்கும் சர்வதேச சமூகத்திற்கும் இடையில் நடைபெறும் பரிமாற்றங்கள் நாட்டின் கைத்தொழில்துறைக்கு கடும் பின்விளைவுகளை ஏற்படுத்தலாம் என தனியார் துறையினர் அச்சம் தெரிவித்துள்ளனர்.
ஐ.நா. செயலாளர் நாயகத்திற்கான நிபுணர் குழுவின் ஆலோசினை அறிக்கை தொடர்பான இலங்கை தனியார்துறையின் மதிப்பீடு எனும் அறிக்கையில் இந்த அச்சம் வெளியிடப்பட்டுள்ளது.
சர்வதேச சமூகத்துடனான அரசாங்கத்தின் இடைவினைகளானவை, சிறு வர்த்தகர்கள் மீது ஏற்படுத்தம் தாக்கத்தை இந்த அறிக்கையில் மதிப்பீடு செய்யப்பட்டுள்ளது.
ஐரோப்பிய ஒன்றியத்தின் ஜி.எஸ்.பி. பிளஸ் வரிச்சலுகை இழப்பானது ஆடை தயாரிப்பு ஏற்றுமதித் துறையிலுள்ள சிறு பங்காளர்களை ஒரு மட்டத்தில் உணரப்பட்டது.
அமெரிக்கா திட்டமிட்டுள்ள பொருளாதார தடைகளும் அமுல்படுத்தப்பட்டால் அவை மக்களை பாதிக்கும் என அவ்வறிக்கையில் குறிப்பிடப்பட்டுள்ளது.
ஐ.நா. நிபுணர் குழுவின் அறிக்கையின் தண்டிக்கும் தன்மையானது கடந்தவற்றை மீண்டும் கிளறுவதாகவே அமையும் என தனியார் துறையினரின் அறிக்கை தெரிவித்துள்ளது.
அதேவேளை, கற்றுக்கொண்ட பாடங்கள் மற்றும் நல்லிணக்க ஆணைக்குழுவின் இடைக்கால அறிக்கையானது துல்லியம் என்ற நிலையிலிருந்து தொலைவில் இருப்பதாகவும் குறிப்பிடப்பட்டுள்ளது.
இச்செயன்முறைக்கு சிவில் சமூகம் மற்றும் ஊடகங்களின் பங்குபற்றுலுடன் பொது தனியார் பங்குடைமையுடன் கூடிய பொறிமுறையொன்று வேண்டும் எனவும் அவ்வறிக்கையில் தெரிவிக்கப்பட்டுள்ளது.
இலங்கை வர்த்தக சம்மேளனம், இலங்கை வர்த்தக சங்கம் மற்றும் கைத்தொழில் கூட்டமைப்பு, இலங்கை தேசிய வர்த்தக சம்மேளனம், கூட்டு ஆடைக்கைத்தொழில் ஒன்றியம் ஆகியன இந்த அறிக்கையை அங்கீகரித்துள்ளன.
**************

அடக்குமுறைக்கான அறிவிப்பு!
வடக்கில் நிறுவப்பட்டுள்ள எந்தவொரு இராணுவ முகாமும் அகற்றப்பட மாட்டாது என பாதுகாப்பு தரப்பினர் அறிவித்துள்ளனர்.
பாதுகாப்பு நோக்கத்திற்காக வடக்கில் இராணுவ முகாம்கள் அமைக்கப்பட்டுள்ளதாகக் குறிப்பிட்டுள்ளனர்.
வடக்கில் அமைக்கப்பட்டுள்ள இராணுவ முகாம்களை அகற்றுமாறு தமிழ்த் தேசியக் கூட்டமைப்பினர் இந்தியாவிடம் கோரிக்கை விடுத்துள்ளதாக திவயின செய்தி வெளியிட்டுள்ளது.
இந்திய பிரதமர் மன்மோகன் சிங்கிடம் இந்த கோரிக்கை விடுக்கப்பட்டுள்ளதாக தெரிவிக்கப்படுகிறது.
தமிழ்த் தேசியக் கூட்டமைப்பின் இந்த கோரிக்கை தொடர்பில் பாதுகாப்புச் செயலளார் கோதபாய ராஜபக்ஷ கவனம் செலுத்தி வருவதாக குறித்த சிங்களப் பத்திரிகை சுட்டிக்காட்டியுள்ளது.
**************

கிறிஸ்பூத வடிவில் தொடரும் தாக்குதல்கள்
யாழ். பல்கலைக்கழக மாணவர்கள் இருவரை நேற்று இரவு இராணுவத்தினர் தாக்கினர் என்ற குற்றச்சாட்டு மாணவர்களால் தெரிவிக்கப்பட்டுள்ளது.
கிறீஸ் பூத விவகாரமே இந்தத் தாக்குதலுக்கு வழிவகுத்தது என்று மாணவர்கள் தரப்பில் தெரிவிக்கப்பட்டது.
இரவு 10.30 மணியளவில் சம்பவம் இடம்பெற்றுள்ளது.
யாழ். பல்கலைக்கழகப் பெண்கள் விடுதியின் மீது யாரோ விஷமிகள் கல்வீசியதை அடுத்து அவர்கள் தகவல் கொடுத்ததன் பேரில் ஆண்கள் விடுதியில் இருந்து மாணவர்கள் சிலர் பெண்கள் விடுதி இருந்த இடத்துக்கு விரைந்து வந்துள்ளனர்.
மாணவர்கள் அந்தப் பகுதிக்கு வந்தபோது, திடீரென இரண்டு ட்ரக்குகளில் அங்கு வந்த இராணுவத்தினர் தம்மில் இருவரைத் தாக்கினர் என்று மாணவர்கள் கூறினர்.
உடனடியாக சம்பவ இடத்துக்கு விரைந்த விடுதிக் காப்பாளர், மாணவர்களை ஏன் தாக்குகிறீர்கள் என்று இராணுவத்தினரிடம் கடுமை காட்டியதும், அவர்கள் கொட்டன்களுடன் நின்றார்கள் அதனால் தாக்கினோம் என்று படையினர் பதிலளித்தனர் எனவும் கூறப்பட்டது.
இந்தச் சம்பவத்தைத் தொடர்ந்து பல்கலைக்கழக விடுதிகளைச் சுற்றிய பகுதிகளில் இராணுவக் காவல் பலப்படுத்தப்பட்டிருந்தது.
**************

பாரமுகமான அரசும் பழிவாங்கும் படையும்!
யாழ் குடாநாட்டில் மர்ம மனிதனின் நடமாட்டம் அதிகரித்திருப்பதனால் மக்கள் பெரும் அச்சத்தில் உறைந்து போயுள்ளதாக தமிழ்த்தேசிய கூட்டமைப்பின் இணைச்செயலர் சுரேஷ் பிரேமசந்திரன் தெரிவித்துள்ளார்.
மர்ம மனிதர்களைத் துரத்திச் சென்றபோது, அவர்கள் இராணுவ முகாம்களுக்குள் ஓடி மறைந்ததையடுத்து, இராணுவத்தினரால் தாக்கப்பட்டு படுகாயமடைந்து, சிகிச்சை பெற்று வருபவர்களை அவர் யாழ் போதனா வைத்தியசாலையில் சென்று பார்வையிட்டுள்ளார்.
அதன் பின்னர், யாழ் மாவட்டத்தி;ல் மர்ம மனிதர்களின் அட்டகாசம் இடம்பெற்ற பல பகுதிகளுக்கும் சென்று மக்களின் நிலைமை மற்றும் மர்ம மனிதன் விவகாரத்தினால் ஏற்பட்டுள்ள நிலைமைகளையும் அவர் நேரில் கண்டறிந்துள்ளார்.
பொதுமக்களின் கவலைகளையும் உணர்வுகளையும் அவர் கேட்டறிந்துள்ளார்.
இந்த விஜயம் குறித்தும், மக்களின் நிலைமைகள் குறித்தும் அவர் கூறுகையில் பல கிராமங்களிலும் பதட்ட நிலைமை காணப்படுவதாகவும், அங்கு மக்கள் அச்சத்தில் உறைந்து போயிருப்பதாகவும் தெரிவித்தார்.
மக்கள் எல்லோருமே அச்சத்துடன் வாழ்கின்ற ஒரு துர்ப்பாக்கியமான நிலைமையே காணப்படுகின்றது.
பெண்கள் யாரும் வீடுகளில் இரவில் தங்குவதில்லை.
கிராமத்தவர்கள் ஒன்று கூடி ஒரே இடத்தில் இரவைக் கழிக்க வேண்டிய நிலைமையில் இருக்கின்றார்கள்.
பெண்களும் குழந்தைகளும் இவ்வாறு கிராமங்களில் ஒரே இடத்தில் இரவைக்கழிக்கும் அதேவேளை, ஆண்கள் இரவு முழுதும் கண்விழித்திருந்து காவல் புரிகின்றார்கள்.
இதனால் நித்திரையின்றி, களைத்துப் போயிருக்கும் அவர்கள் மறுநாள் பகலில் வேலைக்குச் செல்ல முடியாத நிலைமையும் ஏற்பட்டுள்ளது.
இதனால் பல குடும்பங்கள் வறுமை நி;லைக்குத் தள்ளப்பட்டுள்ளன.
இந்த விடயம் தொடர்பாக அரசாங்கத்தின் கவனத்தி;ற்கு கொண்டு வந்துள்ள போதிலும், அரசாங்கம் எந்தவிதமான நடவடிக்கைகளையும் எடுக்கவில்லை.
இந்த விடயத்தில் பாராமுகமாக இருக்கின்ற அரசாங்கத்தின் போக்கு குறித்து சர்வதேச நாடுகளின் கவனத்திற்குக் கொண்டு வருவதற்கும் தமிழ்த்தேசிய கூட்டமைப்பு தீர்மானித்துள்ளது என்றும் யாழ் மாவட்ட நாடாளுமன்ற உறுப்பினர் சுரேஷ் பி;ரேமச்சந்திரன் தெரிவித்துள்ளார்.
**************