Friday, 8 July 2011

செய்திகள் 08/07


அதிகரித்து வரும் சீன ஆதிக்கம்
இந்து சமுத்திரத்தில் தனது செல்வாக்கை அதிகரித்துக்கொள்ள விரும்பும் சீனா, இலங்கைக்கான உதவிகளை 2005 ஆம் ஆண்டிலிருந்து சடுதியாக அதிகரித்துள்ளதாக அமெரிக்க நாடாளுமன்ற ஆய்வறிக்கையொன்றில் தெரிவிக்கப்பட்டுள்ளது.
அத்துடன் போர்க் குற்றங்கள் தொடர்பாக குற்றவியல் விசாரணை நடத்த வேண்டும் என ஐ.நாவும் சர்வதேச சமூகமும் நிர்ப்பந்திப்பது எதிர்மறையான விளைவை ஏற்படுத்தலாம் எனவும் அவ்வறிக்கையில் கூறப்பட்டுள்ளது.
சில ஆய்வாளர்கள் மற்றும் அவதானிப்பாளர்களின் கருத்தின்படி, சீனா தனது முத்து மாலை கடல் தந்திரோபாயத்தின் ஒரு பகுதியாக இந்து சமுத்திரத்தின் வடபிராந்திய துறைமுக அணுகலை விருத்தி செய்வதற்காக இலங்கை அரசாங்கத்துடனான செல்வாக்கை நாடுவதாக அவ்வறிக்கையில் குறிப்பிடப்பட்டுள்ளது.
இப்பிராந்தியத்தில் துறைமுகங்களை அமைக்கும் சீனாவின் முயற்சி குறித்து இந்திய பாதுகாப்பு திட்டமிடலாளர்கள் கவலை கொண்டுள்ளதாக தெரிவிக்கப்படுகிவதாகவும் இலங்கை தொடர்பான 8 பக்கங்கள் கொண்ட இவ்வறிக்கையில் குறிப்பிடப்பட்டுள்ளது.
இலங்கையின் தென்கிழக்கு கரையோரத்தில் ஹம்பாந்தோட்டையில் துறைமுகம் அமைப்பதற்காக குறிப்பிடத்தக்க முதலீடுகளை செய்துள்ளதாக தெரிவிக்கப்படுகிறது.
பாகிஸ்தானின் கவாடர், பங்களாதேஷின் சிட்டகொங், பர்மாவின் சிட்டாவே ஆகிய துறைமுகங்களை அமைப்பதற்கு சீனா உதவியதாக தெரிவிக்கப்படுகிறது.
இலங்கையில் இடம்பெற்ற போர்க் குற்றங்கள் குறித்து விசாரிப்பதற்கான விசாரணைக் குழுவை அமைக்க வேண்டும் என்ற மனித உரிமை அமைப்புகளினதும் பல நாடுகளினதும் கோரிக்கையை வீட்டோ அந்தஸ்துள்ள இரு நாடுகளின் எதிர்ப்பு காரணமாக பாதுகாப்பு சபை நிறைவேற்றும் வாய்ப்பு குறைவு எனவும் அவ்வறிக்கை தெரிவித்துள்ளது.
****************
விமல் வீரவன்சவின் புதிய கண்டுபிடிப்பு
பல்கலைக்கழக விரிவுரையாளர்கள் சமபள உயர்வுகோரி மேற்கொண்டு வரும் போராட்டங்களின் பின்னணியில் அமெரிக்காவின் துணை வெளிவிவகாரச் செயலாளர் றோபேட் ஒ பிளேக் செயற்பட்டு வருவதாக அமைச்சர் விமல்வீரவன்ஸ குற்றம் சாட்டியுள்ளார்.
பொரளையில் நேற்றுமுன்தினம் இடம்பெற்ற வைபவம் ஒன்றில் உரையாற்றும் போது அமைச்சர் விமல் வீரவன்ஸ இவ்வாறு தெரிவித்துள்ளார்.
அரசாங்கத்தால் வழங்கமுடியாத சம்பள விகிதத்தை உயர்த்தக் கோரி விரிவுரையாளர்கள் போராட்டத்தில் ஈடுபடுவதன் பின்னணியில் அமெரிக்காவின் துணை வெளிவிவகாரச் செயலாளர் றொபேட் ஒ பிளேக்கின் அனுசரணையுடன் இயங்கும் அரசசார்பற்ற நிறுவனங்களே செயற்பட்டு வருகின்றன.
ஆனால் இந்த போராட்டத்தை விரிவுரையாளர்கள் அல்லாத சிறுபான்மை குழுவே மேற்கொண்டு வருகின்றது.
ஊதிய உயர்வு வழங்கப்படும். ஆனால் இவர்கள் கேட்கும் சம்பள உயர்வு விகிதம் சாத்தியமற்றது.
நாட்டை சீர்குலைப்பதற்கு அரச சார்பற்ற நிறுவனங்கள் பல்கலைகழகங்களில் இருந்து தமது போராட்டத்தை ஆரம்பித்துள்ளனர் என அவர் மேலும் தெரிவித்தார்.
****************
அரசை எச்சரித்த சம்பந்தன்
வடக்கு மற்றும் கிழக்கு மாகாணங்களில் தமிழர்களுக்கு எதிராக அரங்கேற்றப்படுகின்ற அனைத்து நடவடிக்கைகளையும் அரசு நிறுத்த வேண்டும் என தமிழ்த் தேசியக் கூட்டமைப்பு வலியுறுத்தியுள்ளது.
அப்படி நிறுத்தாவிட்டால் தனது தலைமையில் தமிழ் மக்களை ஒன்று திரட்டி அரச எதிர்ப்பு பிரசாரங்களை ஆரம்பிப்போம் என்றும் அரசும் தோற்கடிக்கப்படும் எனவும் தமிழ்த் தேசியக் கூட்டமைப்பின் தலைவர் இரா.சம்பந்தன் நாடாளுமன்றில் தெரிவித்தார்.
வடக்கு, கிழக்கு மாகாணங்களில் தற்போதைய நிலைவரம் மற்றும் அரசியல் தீர்வு தொடர்பான சபை ஒத்திவைப்புவேளை பிரேரணையை நேற்று நாடாளுமன்றில் முன்வைத்து உரையாற்றிய போதே அவர் இவ்வாறு சூளுரைத்தார்.
தமிழ் மக்களுக்கு எதிராகக் கட்டவிழ்த்து விடப்பட்ட தொடர்ச்சியான வன்முறைகள், தமிழ் மக்களின் நியாயமான அரசியல் மற்றும் ஏனைய அபிலாஷைகளை அரசியல் ரீதியாக நிறைவேற்றத் தவறியமை மற்றும் நாடு எந்த அரசமைப்பின் கீழ் சுதந்திரம் அடைந்ததோ அந்த அரசமைப்பை நீக்கிவிட்டு தமிழ் மக்களின் கருத்தொருமிப்பின்றிப் புதிய அரசமைப்பை இயற்றியமை ஆகியவையே சுய நிர்ணய உரிமைக்கான கோரிக்கைக்கும் சுமார் மூன்று தசாப்தகாலம் நீடித்த தமிழ் இளைஞர்களின் ஆயுதப் பேராட்டங்களுக்கும் இட்டுச்சென்றது.
இந்தப் பிணக்கு சம்பந்தப்பட்ட பிரதான விடயங்களைக் கையாளுவதற்கும் நீண்ட காலமாகப் புரையோடிப் போயுள்ள இந்தப் பிரச்சினைக்கு ஏற்றுக்கொள்ளக்கூடிய அரசியல் தீர்வொன்றை உருவாக்குவதற்கும் பல நடவடிக்கைகள் ஆரம்பிக்கப்பட்டுள்ளன.
ஆயுதப் போர் நடைபெற்ற காலம் முழுவதும் குறிப்பாக அதன் இறுதி வருடங்களிலும், இறுதிக் கட்டங்களிலும் அதிக எண்ணிக்கையான தமிழ்மக்கள் கொல்லப்பட்டு அல்லது அங்கவீனமாக்கப்பட்டு பல இலட்சக்கணக்கான தமிழ்மக்கள் இடப்பெயர்வுக்கு உட்பட்டு, அவர்களுடைய வீடுகளும், ஏனைய சொத்துகளும் அழிக்கப்பட்டு, அவர்கள் நிர்க்கதிக்குள்ளாக்கப்பட்டு அடிப்படை வசதிகளுடன் தமது வாழ்வை மீளத் தொடங்க முடியாது உள்ளது.
தற்போதைய சூழ்நிலையில் தம்மைத் தாமே காத்துக்கொள்ள முடியாதுள்ள இந்தளவு பெரும் எண்ணிக்கையிலான மக்கள் தமது வாழ்க்கையை மீளக் கட்டியெழுப்பக்கூடிய வகையில் அவர்களது அவசர தேவைகளை நிவர்த்தி செய்யக்கூடிய எந்தவொரு வடிவமைக்கப்பட்ட நிகழ்ச்சிநிரலும் இல்லாதுள்ளது.
இந்தப் பிரச்சினைகள் அனைத்தையும் தீர்ப்பதற்கு உரிய நடவடிக்கைகளை எடுக்கவேண்டியது அரசின் கடமை.
முரண்பாட்டுக்குக் காரணமான அடிப்படை விடயங்களைத் தீர்ப்பதற்கான ஏற்றுக்கொள்ளக்கூடியதொரு அரசியல் தீர்வொன்றை துரிதமாகக் காணவேண்டும்.
இடம்பெயர்ந்த மற்றும் பாதிக்கப்பட்ட மக்கள் தமது வாழ்க்கையை மீளக் கட்டியெழுப்பவும் மீள ஆரம்பிக்கவும் உதவும் பொருட்டு வடிவமைக்கப்பட்ட நிகழ்ச்சி நிரலொன்றைத் துரிதகதியில் நடைமுறைப்படுத்த வேண்டும்.
தமிழ் மக்கள் மீது பாதகமான அரசியல், சமூக, பொருளாதார மற்றும் கலாசார தாக்கங்களை ஏற்படுத்துகின்ற பல்வேறு நடவடிக்கைகளை மாற்றியமைப்பதற்கும் சீர்செய்யவும் மற்றும் நிவர்த்திசெய்யவும் அவசர நடவடிக்கைகள் மேற்கொள்ளப்பட வேண்டுமென வலியுறுத்துவதாகவும் சம்பந்தன் தனது உரையில் தெரிவித்துள்ளார்.
****************
விடிவைத் தேடும் யுத்த விதவைகள்
யுத்தம் மற்றும் காரணங்களினால் இலங்கையில் 5 இலட்சத்து 3684 பேர் விதவைகளாகியுள்ளனர்.
இவர்களின் வாழ்க்கைத் தரத்தை மேம்படுத்தவும் சுயதொழில் வாய்ப்புகள் வழங்கவும் உதவிகள் வழங்கவும் பல்வேறு திட்டங்கள் ஆரம்பிக்கப்பட்டுள்ளதோடு இந்த வருடத்தில் 4 கோடி 50 இலட்சம் நிதி ஒதுக்கப்பட்டுள்ளதாக ஆளும் தரப்பு கொரடா அமைச்சர் தினேஷ் குணவர்தன தெரிவித்தார்.
வாய்மூல விடைக்காக சிறுவர் அபிவிருத்தி மகளிர் மேம்பாட்டு அமைச்சரிடம் கேட்கப்பட்ட கேள்விக்கு அமைச்சர் சார்பாக பதிலளித்த அவர் இதனைத் தெரிவித்துள்ளார்.
மேல் மாகாணத்தில் ஒரு இலட்சத்து 30ஆயிரத்து 18 விதவைகளும் மத்திய மாகாணத்தில் 65ஆயிரத்து 880 விதவைகளும் ஊவா மாகாணத்தில் 33ஆயிரத்து 531 பேரும் சப்ரகமுவ மாகாணத்தில் 45ஆயிரத்து 989 பேரும் தென் மாகாணத்தில் 58ஆயிரத்து 221 பேரும் வட மேல் மாகாணத்தில் 74ஆயிரத்து 5 பேரும் வட மத்திய மாகாணத்தில் 36ஆயிரத்து 539 விதவைகளும் உள்ளனர்.
இவர்களின் வாழ்க்கைத் தரத்தை மேம்படுத்தவும் சமூக அந்தஸ்தை மேம்படுத்தவும் சுயதொழில் பயிற்சி வழங்கவும் உதவிகள் அளிக்கவும் நடவடிக்கை எடுக்கப்பட்டுள்ளது.
அனைத்து விதவைகளினதும் வாழ்க்கைத் தரத்தை மேம்படுத்த 2011 இல் 4 கோடி 50 இலட்சம் ரூபா ஒதுக்கப்பட்டுள்ளது என அமைச்சர் தெரிவித்துள்ளார்.
ஆனால் நடைமுறையில் அவர்கள் தமது நாளாந்த வாழ்க்கையை கொண்டு செல்ல எந்த அடிப்படை வசதிகளும் அற்றவர்களாகவே வாழ்ந்து கொண்டிருக்கின்றார்கள்.
****************
அவலங்களுக்கு முடிவு என்ன?
வன்னியில் தமிழீழ விடுதலைப்புலிகளுக்கு எதிராக இலங்கை இராணுவத்தால் மேற்கொள்ளப்பட்ட யுத்தத்தில் ஒரு லட்சம் வரையிலான பொதுமக்கள் கொல்லப்பட்டுள்ளமை ஐ.நா. அறிக்கை மற்றும் சர்வதேச செஞ்சிலுவைக் குழு ஆகியன வெளியிட்ட அறிக்கைகளின் மூலம் உறுதிப்படுத்தப்பட்டு உள்ளதாக ரைம்ஸ் ஒப் இந்தியா என்ற ஊடகத்திற்கு வழங்கிய தகவல் ஒன்றில் இந்தியாவின் பெங்களூர் பல்கலைக் கழகத்தின் அரசறிவியற்துறைப் பேராசிரியர் போல் நியூமன் சுட்டிக்காட்டியுள்ளார்.
வன்னிப் போரின்போது இலங்கை இராணுவத்தினரால் அறிவிக்கப்பட்டிருந்த மோதல் தவிர்ப்பு வலயத்திலிருந்து காயமடைந்த சுமார் பதினான்காயிரம் பேரை தாம் அரச பகுதிக்கு சிகிச்சைக்காக வெளியேற்றியிருந்ததாக சர்வதேச செஞ்சிலுவைக் குழு கணிப்பிட்டிருந்தது.
அத்துடன் இப்போரில் சுமார் ஐயாயிரம் பேர் வரை தமது உடலுறுப்புக்களை இழந்திருந்தனர்.
2008ம் ஆண்டில் சுமார் எழுபதாயிரம் மக்கள் கொல்லப்பட்டதாகவும் அது மேலும் குறிப்பிட்டுள்ளதை போல் நியூமன் சுட்டிக் காட்டியுள்ளார்.
அத்துடன் இராணுவத்தினரால் மருத்துவமனைகள், பாடசாலைகள் மற்றும் பொதுக் கட்டிடங்கள் என்பன மீது திட்டமிட்டு தாக்குதல் நடத்தப்பட்டதாகவும் அவர் மேலும் தெரிவித்துள்ளார்.
****************
சந்திப்பின் இரகசியம் என்ன?
ஐக்கிய தேசிய கட்சியின் தலைவர் ரணில் விக்ரமசிங்கவுக்கும், ஐக்கிய நாடுகள் சபையின் பொது செயலாளர் பான் கீ மூனுக்கும் இடையிலான சந்திப்பு தொடர்பில், நேற்றைய தினம் ஐக்கிய நாடுகள் சபையில் கேள்வி எழுப்பப்பட்டுள்ளது.
இந்த சந்திப்பின் போது இலங்கையின் போர்க்குற்றங்கள் தொடர்பில் பேசப்பட்டதா என செய்தியாளர்கள், சபையின் பேச்சாளர் மார்ட்டின் நெசர்கீயிடம் கேள்வி எழுப்பினர்.
இது குறித்து தாம் அறியவில்லை என பதில் வழங்கிய பேச்சாளர், எனினும் இந்த விடயத்தை ஆராய்ந்து பின் அறிவிப்பதாக குறிப்பிட்டார்.
அத்துடன், இந்த சந்திப்பின போது எடுக்கப்பட்ட புகைப்படங்கள் எவையும் வெளியாகவில்லை என கேட்கப்பட்ட கேள்விக்கு பேச்சாளர் பதில் வழங்கவில்லை.
இதேவேளை இந்த சந்திப்பின் போது, சபையின் தலைமை அதிகாரி விஜய்நம்பியாரும் கலந்துக் கொண்டதாக கேள்வி எழுப்பப்பட்டது.
இது குறித்தும் தமக்கு தகவல் கிடைக்கவில்லை என பேச்சாளர் தெரிவித்துள்ளார்.
****************
கொல்லப்பட்ட உண்மையை மறைக்கும் அரசு- ஐதேக!
இறுதி யுத்தத்தின் போது அப்பாவி மக்கள் கொல்லப்பட்டனர். ஆனால் அரசு அதை மறுத்து வருகின்றது என ஐக்கிய தேசியக் கட்சி தெரிவித்துள்ளது.
அப்பாவி மக்கள் கொல்லப்பட்டமை உறுதி. ஆனால் கொல்லப்பட்டவர்களின் எண்ணிக்கை தம்மிடம் இல்லை என்று ஐக்கிய தேசியக் கட்சியின் நாடாளுமன்ற உறுப்பினர் லக்ஷ்மன் கிரியெல்ல நேற்றுத் தெரிவித்தார்.
வடக்கு, கிழக்கில் தற்போது நிலவுகின்ற நிலவரம் தொடர்பாக தமிழ்த் தேசியக் கூட்டமைப்பின் தலைவர் இரா.சம்பந்தன் நேற்று நாடாளுமன்றில் ஒத்திவைப்புவேளை பிரேரணை ஒன்றைக் கொண்டுவந்தார்.
இந்தப் பிரேரணையை வழிமொழிந்து உரையாற்றியபோதே லக்ஷ்மன் கிரியெல்ல நாடாளுமன்ற உறுப்பினர் இதனைக் கூறினார்.
தமிழ் மக்களுக்கான அரசியல் தீர்வைப் பெற்றுத்தருமாறு ஐக்கிய நாடுகள், ஐரோப்பிய ஒன்றியம், அமெரிக்கா ஆகியன வலியுறுத்தி வருகின்றன.
இதில் அரசு பொறுப்புடன் செயற்படவேண்டிய கட்டாயம் உருவாகியுள்ளது.
இனப்பிரச்சினைக்குத் தீர்வுத்திட்டத்தை முன்வைக்க புத்திஜீவிகள் குழு, சர்வகட்சிகள் பிரதிநிதிகள் குழு ஆகியவற்றை மஹிந்த ராஜபக்ஷ நியமித்தார்.
அந்தக் குழுக்களினால் பிரேரிக்கப்பட்ட யோசனைகளை ஐக்கிய தேசியக்கட்சியும், தமிழ்த் தேசியக் கூட்டமைப்பும் வரவேற்றன.
ஆனால் அரசு அவற்றை நடைமுறைப்படுத்தவில்லை.
இந்த நிலையில், நாடாளுமன்றத் தெரிவுக்குழுவை நியமிக்க அரசு முயற்சித்து வருகிறது.
இனப்பிரச்சினைத் தீர்வு தொடர்பாக அரசும், தமிழ்த் தேசியக் கூட்டமைப்பும் தீர்க்கமான இணக்கப்பாட்டுக்கு வந்தால் அதற்கு ஐக்கிய தேசியக் கட்சி பூரண ஆரவளிக்குமே தவிர இடையூறாக இருக்காது.
அதேபோன்று, இனப்பிரச்சினைக்கு இந்த வருடத்துக்குள் அரசு தீர்வு வழங்காவிட்டால் இலங்கை பாரதூரமான பிரச்சினைகளுக்கு முகங்கொடுக்கும் என்பது உறுதி எனவும் தெரிவித்தார்.
இதேவேளை, 18ஆவது அரசமைப்புத் திருத்தத்தைக் கொண்டுவந்தபோது எதிர்க்கட்சிகள் எதிர்த்தன.
ஆனால் தான்தோன்றித்தனமாக அரசு அதை அமுல்படுத்தியது.
இருந்தும், சர்வகட்சிகள் பிரதிநிதிகள் குழு மற்றும் புத்திஜீவிகள் குழு ஆகியவற்றின் யோசனைகளை தாம் ஆதரித்தோம்.
ஆனால் அதை நடைமுறைப்படுத்த அரசு முன்வரவில்லை.
அவற்றை அடிப்படையாகக் கொண்டு ஏன் அரசு அரசியல் தீர்வு வழங்க முடியாது? எனவும் அவர் கேள்வி எழுப்பினார்.
வடக்கிலும், கிழக்கிலும் இன்று இராணுவ ஆட்சியே நிலவுகின்றது.
அனைத்து விடயங்களிலும் இராணுவம் தலையிடுகின்றது.
அங்கு நிலவுகின்ற இராணுவ ஆட்சியை அகற்றி தமிழ் மக்களுடன் நல்லெண்ண சமூக உறவை அரசு ஏற்படுத்திக் கொள்ளவேண்டும்.
அத்துடன், அந்தந்த மாவட்டத்திலுள்ள நாடாளுமன்ற உறுப்பினர்களுக்கு அதிகாரங்கள் வழங்கப்பட வேண்டும் என்றும் அவர் வலியுறுத்தினார்.
****************
ஐநாவைக் கட்டுப்படுத்தும் ஸ்ரீலங்கா
ஐ.நா நிபுணர்குழுவின் போர்க்குற்ற அறிக்கை ஐ.நா மனிதஉரிமைகள் பேரவையில் சமர்ப்பிக்கப்படாது என்று ஸ்ரீலங்கா அரசாங்கம் தெரிவித்துள்ளது.
அவ்வாறு சமர்ப்பிக்கப்பட்டால் கூட அது தோற்கடிக்கப்படும் என்று சிறிலங்கா வெளிவிவகார அமைச்சர் ஜி.எல்.பீரிஸ் தெரிவித்துள்ளார்.
சிறிலங்கா நாடாளுமன்றத்தில் நேற்று உரையாற்றியபோதே அவர் இவ்வாறு கூறியுள்ளார்.
ஐ.நா நிபுணர் குழு அறிக்கை தொடர்பாக சில நாடுகள் கொண்டிருந்த நிலைப்பாட்டை மாற்றுவதில் சிறிலங்காவுக்கு வெற்றி கிடைத்திருப்பதாகவும் அவர் தெரிவித்துள்ளார்.
அணிசேரா நாடுகள் அமைப்பில் அங்கம் வகிக்கும் 22 நாடுகள் இந்த அறிக்கைக்கு எதிரான நிலைப்பாட்டைக் கொண்டிருப்பதாகவும் அவர் மேலும் கூறியுள்ளார்.
அத்துடன் சிறிலங்காவின் வெளிவிவகாரச் சேவையில் இராஜதந்திரிகளாக இராணுவ அதிகாரிகளை நியமித்துள்ளதால் தான் அனைத்துலக அழுத்தங்களை சந்திக்க வேண்டியுள்ளதாக ஐதேக நாடாளுமன்ற உறுப்பினர் ஜோன் அமரதுங்க கூறிய குற்றசாட்டையும் ஜி.எல்.பீரிஸ் நிராகரித்துள்ளார்.
ஐ.நாவுக்கான பதில் நிரந்தர வதிவிடப் பிரதிநிதியாக உள்ள மேஜர் ஜெனரல் சவீந்திர சில்வா சனல் 4 குற்றச்சாட்டை முறியடிப்பதில் முக்கிய பங்கு வகிப்பதாகவும் அவர் தெரிவித்துள்ளார்.
மேலும் இராணுவ அதிகாரிகளை வெளிநாடுகளில் இராஜதந்திரிகளாக நியமித்ததால் தான், அங்கு புலிகளை முடக்க முடிந்ததுடன், பல முக்கிய தலைவர்களையும் கைது செய்ய முடிந்துள்ளதாகவும் ஜி.எல்.பீரிஸ் மேலும் கூறியுள்ளார்.
****************
மறைந்த தமிழரிஞருக்கு மக்கள் அஞ்சலி
மறைந்த தமிழறிஞர் பேராசிரியர் கார்த்திகேசு சிவத்தம்பியின் பூதவுடலுக்கு நேற்று இரவு முதல் மக்கள் அஞ்சலி செலுத்திவருகின்றனர்.
நேற்று முன்தினம் இரவு மாரடைப்பினால் மரணமடைந்த பேராசிரியர் சிவத்தம்பியின் பூதவுடல் நேற்று இரவு முதல் தெஹிவளையிலுள்ள அன்னாரது இல்லத்தில் அஞ்சலிக்காக வைக்கப்பட்டுள்ளது.
அன்னாரது பூதவுடல் எதிர்வரும் ஞாயிற்றுக்கிழமை மாலை 4.00 மணிக்கு பொரளை இந்து மயானத்தில் தகனம் செய்யப்படுமென்று உறவினர்கள் அறிவித்துள்ளனர்.
பேராசிரியரின் மறைவையடுத்து உள்நாட்டிலும், வெளிநாட்டிலும் பெரு மளவானோர் அனுதாபம் தெரிவித்துள்ளனர்.
இதேவேளை, பேராசிரியர் கார்த்திகேசு சிவத்தம்பியின் மறைவையொட்டி அவரது பிறந்த மண்ணான கரவெட்டிப் பிரதேசம் ஆழ்ந்த சோகத்தில் மூழ்கியுள்ளது.
அன்னார் ஆரம்பக் கல்வியைப் பயின்ற கரவெட்டி மாணிக்கவாசகர் வித்தியாலயத்தில் அன்னாரின் உருவப்படம் வைக்கப்பட்டு சுடர் ஏற்றப்பட்டு, கறுப்புக்கொடியும் பறக்கவிடப்பட்டுள்ளது.
****************



Thursday, 7 July 2011

செய்திகள் 07/07

தொடரும் இழுத்தடிப்பு!
அரசாங்கத்துக்கும் தமிழ்த் தேசியக் கூட்டமைப்புக்கும் இடையிலான நேற்றைய பேச்சுவார்த்தையின் போது ஏற்கனவே கூட்டமைப்பினால் கேட்கப்பட்டிருந்த கேள்விகளுக்கு எழுத்து மூலம் பதிலளிப்பதற்கென கால அவகாசம் கோரியிருப்பதாக அமைச்சர் நிமல் சிறிபால டி சில்வா தெரிவித்தார்.
இரு தரப்புக்கும் இடையில் தொடர்ந்தும் பேச்சுக்களை நடத்தி, சுமூகமானதொரு தீர்வினை எட்டுவதற்கும் தீர்மானிக்கப்பட்டிருக்கின்ற அதேவேளை, மீண்டும் அடுத்த மாதம் 4 ஆம் திகதி கூடிப் பேசுவதெனவும் இணக்கம் காணப்பட்டிருக்கின்றது என்றும் அவர் குறிப்பிட்டார்.
தமிழர் பிரச்சினை மற்றும் அரசியல் தீர்வு தொடர்பில் அரசாங்கத்துக்கும் தமிழ்த் தேசியக் கூட்டமைப்புக்கும் இடையில் இடம் பெற்றுவருகின்ற தொடர் பேச்சுவார்தத்தையின் 9 ஆவது கட்டப் பேச்சு நேற்று பிற்பகல் பாராளுமன்றக் கட்டடத் தொகுதியில் இடம்பெற்றது.
இதன்போது, தமிழ்த் தேசியக் கூட்டமைப்பின் சார்பில் இரா. சம்பந்தன் மற்றும் எம்.சுமந்திரன் ஆகியோரும் கலந்துகொண்டனர்.
இதேவேளை, அரசாங்கத்தின் சார்பில் அமைச்சர்களான நிமல் சிறிபால டி சில்வா, பேராசியர் ஜீ.எல்.பீரீஸ் மற்றும் சஜின் வாஸ் குணவர்த்தன ஆகியோர் இந்தப் பேச்சில் கலந்துகொண்டனர்.
ஏழாவது சுற்றுப் பேச்சுவார்த்தை வரையில் பேசப்பட்ட இணங்கப்பட்ட விடயங்கள் தொடர்பில் பல கேள்விகளை முன்வைத்த தமிழ்த் தேசியக் கூட்டமைப்பு, அதற்கு அரசாங்கம் எழுத்து மூலமான பதிலைத் தரவேண்டும் என உறுதியாகக் கூறியிருந்த நிலையில் அதற்கு அரசாங்கம் இணக்கம் தெரிவித்திருந்தது.
எனினும், இதுவரையிலும் அரசாங்கத்தினால் எந்தப் பதிலும் அளிக்கப்படவில்லை.
இது தொடர்பாகவும் நேற்றைய பேச்சின் போது கலந்துரையாடப்பட்டதாகத் தெரிவிக்கப்படுகிறது.
இது தொடர்பில் கருத்துத் தெரிவித்த அமைச்சர் நிமல் சிறிபால டி சில்வா, தமிழ்த் தேசியக் கூட்டமைப்பினால் கேட்கப்பட்டிருக்கும் கேள்விகளுக்குப் பதிலளிக்க அரசாங்கம் தயாராக இருக்கின்றது.
எனினும், அதற்கு கால அவகாசம் தேவைப்படுகின்றது.
இதனை தமிழ்த் தேசியக் கூட்டமைப்பிடம் எடுத்துக் கூறியுள்ளோம்.
தமது கோக்கையை கூட்டமைப்பும் ஏற்றுக் கொண்டுள்ளது.
இரு தரப்புக்கிடையிலான அடுத்த சுற்றுப் பேச்சுவார்த்தையை எதிர்வரும் ஆகஸ்ட் மாதம் 4 ஆம் திகதி முன்னெடுப்பதென இங்கு இணக்கம் காணப்பட்டுள்ளது என்றும் அவர் குறிப்பிட்டார்.
நேற்றைய பேச்சுக்களின் போது கலந்துரையாடப்பட்ட விடயங்கள் மற்றும் தீர்மானங்கள் தொடர்பில் இன்று அறிவிக்கப்படவிருப்பதாகவும் தெரியவருகிறது
***************
தெரிவுக்குழுத் திட்டம் பின்போடப்பட்டது!
நாடாளுமன்றத் தெரிவுக் குழு யோசனைத் திட்டம் தற்போதைக்கு முன்வைக்கப்பட மாட்டாது என தெரிவிக்கப்படுகிறது.
தேசிய இனப்பிரச்சினைக்கு தீர்வு காணும் நோக்கில் அரசாங்கத்தினால் நாடாளுமன்றத் தெரிவுக் குழுவொன்றை உருவாக்கும் யோசனைத் திட்டமொன்று முன்வைக்கப்படவிருந்தது.
கடந்த செவ்வாய்க்கிழமை குறித்த இவ் உத்தேச பிரேரணை நாடாளுமன்றில் முன்வைக்கப்படவிருந்தது.
எனினும், இறுதி நேரத்தில் இந்தத் திட்டம் கைவிடப்பட்டுள்ளதாகத் தெரிவிக்கப்படுகிறது.
குறித்த திட்டத்தை முன்வைப்பதற்கு இணக்கம் தெரிவித்து ஆளும் கட்சி நாடாளுமன்ற உறுப்பினர்கள் கையொப்பிட்டுள்ளதாகத் தெரிவிக்கப்படுகிறது.
எதிர்க்கட்சிகளின் எதிர்ப்பலை காரணமாக சில காலத்திற்கு அரசாங்கம் இந்த உத்தேச திட்டத்தை கைவிடத் தீர்மானித்திருக்கலாம் என சுட்டிக்காட்டப்படுகிறது.
***************
இந்திய அழுத்தமா?
இந்திய அரசின் அழுத்தம் காரணமாகவே இலங்கை அரசு நாடாளுமன்றத் தெரிவுக்குழுவை அமைக்கும் பிரேரணையை நேற்று சபையில் சமர்ப்பிக்கவில்லை என்று புதிய இடதுசாரி முன்னணியின் தலைவர் கலாநிதி விக்கிரமபாகு கருணாரட்ன நேற்றுத் தெரிவித்தார்.
அரிசியில் ஆசனிக் அமிலம் அடங்கியுள்ளது, பெற்றோலில் திரவம் கலக்கப்பட்டுள்ளது.
ஆனால், இவை எப்படி நடந்தன என்று தமக்குத் தெரியாது என பொறுப்புவாய்ந்த அமைச்சர்கள் கூறுகின்றனர்.
அமைச்சர் சம்பிக்க ரணவக்க தனக்கு கடவுள் கனவில் கூறினார் எனத் தெரிவிக்கின்றார்.
இந்த அரசை நம்பி எதிர்வரும் தேர்தல்களில் மக்கள் அவர்களுக்கு வாக்களிப்பார்களாயின் அது நமக்கு நாமே வெட்டிக்கொள்ளும் குழியாகும் என்றும் அவர் சுட்டிக்காட்டினார்.
நாடாளுமன்றத் தெரிவுக்குழு அமைக்கும் பிரேரணை சபையில் சமர்ப்பிக்கப்படாமை தொடர்பாகவும், 23ஆம் திகதி நடைபெறவுள்ள உள்ளூராட்சி சபைத் தேர்தல்கள் தொடர்பாகவும் கருத்து வெளியிடும்போதே அவர் இதனைத் தெரிவித்தார்.
பிரதான எதிர்க்கட்சிகளின் எதிர்ப்புக் காரணமாகவே அரசு நாடாளுமன்ற தெரிவுக்குழுவை அமைக்கும் பிரேரணையை நேற்று சபையில் சமர்ப்பிக்கவில்லை எனக் கூறுப்படுவதில் எவ்வித உண்மையுமில்லை.
இந்திய அரசின் அழுத்தம் காரணமாகவே அரசு பிரேரணையை சபையில் சமர்ப்பிக்கவில்லை. இதுவே உண்மை எனவும் விக்கிரமபாகு கருணாரட்ன தெரிவித்துள்ளார்.
முன்னாள் இந்திய வெளியுறவுச் செயலர் நிருபமாராவ் மஹிந்த ராஜபக்சவுடன் தொலைபேசியில் தொடர்புகொண்டு, அரசு ஏற்கனவே இந்திய அரசுக்கு வழங்கிய உறுதிமொழிகளுக்கமைய தமிழ் மக்களுக்குத் தீர்வை வழங்க முன்வரவேண்டும் என கடுந்தொனியில் வலியுறுத்தினார் என தனக்கு அறியவந்துள்ளது என்றும் குறிப்பிட்டுள்ளார்.
***************
பாலியல் போராயுதம்!
சிறிலங்கா உள்ளிட்ட சில நாடுகளில் சிறுபான்மையினப் பெண்கள் மீது பாலியல் வல்லுறவு போரின் போதான ஒரு ஆயுதமாகப் பயன்படுத்தப்படுவதாக அனைத்துலக சிறுபான்மையினர் உரிமைகளுக்கான குழு சுட்டிக்காட்டியுள்ளது.
இந்த அமைப்பு நேற்று லண்டனில் வெளியிட்ட 2011ம் ஆண்டுக்கான அறிக்கையிலேயே இவ்வாறு குறிப்பிடப்பட்டுள்ளது.
சுதேச மற்றும் சிறுபான்மை இனக்குழுமங்களைச் சேர்ந்த பெண்கள் பாலியல் வல்லுறவு மற்றும் ஏனைய வடிவங்களிலான பாலியல் கொடுமைகளையும் சித்திரவதைகள், கொலைகளையும் சந்திப்பதாகவும் அனைத்துலக சிறுபான்மையினர் உரிமைகளுக்கான குழுவின் அறிக்கையில் கூறப்பட்டுள்ளது.
சிறுபான்மையினர் மற்றும் சுதேச இனக்குழுமங்களைச் சேர்ந்தவர்கள் என்ற காரணத்துக்காவே இந்தப் பெண்கள் இத்தகைய கொடுமைகளை எதிர்கொள்வதாகவும் இந்த சுட்டிக்காட்டியுள்ளது.
சிறுபான்மையின மற்றும் சுதேச இனக்குழுமங்களைச் சேர்ந்த பெண்கள் மீதான வன்முறைகள் அதிகரித்து வருவதாகவும், தெரிவித்துள்ள இந்த அமைப்பு அமைதியான நிலையை விடவும் போரின் போது தான் இவர்கள் அதிகம் பாதிக்கப்படுவதாகவும் கூறியுள்ளது.
சிறிலங்கா, ஈராக், ஆப்கானிஸ்தான்,கொங்கோ, கௌதமாலா, சூடான், சோமாலியா,கொலம்பியா, கிர்கிஸ்தான், பர்மா போன்ற நாடுகளில் இத்தகைய நிலைமை காணப்படுவதாகவும் அனைத்துலக சிறுபான்மையினர் உரிமைகளுக்கான குழுவின் அறிக்கையில் கூறப்பட்டுள்ளது.
போரின்போது இந்த நாடுகளில் சிறுபான்மையினப் பெண்கள் மீது பாலியல் வல்லுறவுகள் ஒரு ஆயுதமாகப் பயன்படுத்தப்படுவதாகவும் இந்த அமைப்பு சுட்டிக்காட்டியுள்ளது.
***************
நாடு திரும்பிய மகிந்தவின் தூதுவர்
எதிர்க்கட்சி தலைவர் ரணில் விக்கிரமசிங்க தமது அமெரிக்க பயணத்தை முடித்துக்கொண்டு இன்று அதிகாலை நாடு திரும்பினார்.
ரணில் விக்கிரமசிங்க தமது பயணத்தின் போது அமெரிக்க ராஜதந்திரிகளுடனும் ஐக்கிய நாடுகளின் செயலாளர் பான் கீ மூனுடனும் பேச்சுவார்த்தை நடத்தியிருந்தார்.
ரணில் விக்கிரமசிங்கவுடன் ஐ.நாவுக்கான இலங்கையின் பிரதி வதிவிடப் பிரதிநிதி மேஜர் ஜெனரல் சவேந்திரசில்வாவும் இந்தச் சந்திப்புக்காக பான் கீமூனின் செயலகத்துக்குச் சென்றிருந்தார் என்றும் தகவல்கள் தெரிவிக்கின்றன.
இந்தச் சந்திப்பின்போது புகைப்படம் எடுப்பதற்கு ஊடகவியலாளர்கள் அனுமதிக்கப்படவில்லை.
இந்தச் சந்திப்பை புகைப்படம் எடுப்பதற்கு அனுமதிக்குமாறு ஊடகவியலாளர்கள் விடுத்த வேண்டுகோள் நிராகரிக்கப்பட்டதாகவும் கூறப்படுகிறது.
கடந்தவாரம் இஸ்ரேலிய எதிர்க்கட்சித் தலைவர் சிபிலிவ்னி, ஐ.நா. செயலாளர் நாயகம் பான் கீமூனைச் சந்தித்தபோது அதை புகைப்படம் எடுக்க அனுமதித்த ஐ.நா. அதிகாரிகள் இந்தச் சந்திப்பை புகைப்படம் எடுக்க ஊடகவியலாளர்களை அனுமதிக்கவில்லை என்பது குறிப்பிடத்தக்கது.
அதேவேளை, வழக்கமாக ஐ.நா. செயலாளர் நாயகத்தின் சந்திப்புகள் தொடர்பாக அவரது அதிகாரபூர்வ இணையதளத்தில் புகைப்படங்கள் வெளியிடப்படுவது வழக்கமாக இருந்தாலும், அதிலும் எந்தப் புகைப்படமும் வெளியிடப்படவில்லை.
இந்தச் சந்திப்புப் பற்றிய தகவல்களும் அதில் பிரசுரிக்கப்படவில்லை என்பதும் குறிப்பிடத்தக்கது.
***************
வேட்பாளரை அச்சுறுத்தும் மர்ம நபர்கள்
யாழ். மானிப்பாயில் தமிழ்த் தேசியக் கூட்டமைப்பின் வலிகாமம் தென்மேற்கு பிரதேச சபை வேட்பாளரின் வீட்டில் நாய் ஒன்றை வெட்டி எறிந்து நேற்று இரவு மர்ம நபர்கள் சிலர் அட்டகாசம் புரிந்துள்ளனர்.
மானிப்பாய் பிரதேசத்தில் உள்ள கட்டுடை பகுதியில் தமிழ்த் தேசியக் கூட்டமைப்பின் வலி.தென்மேற்கு பிரதேச சபை வேட்பாளரான ஓய்வுபெற்ற கிராம சேவையாளர் ச.சிவகுமாரின் வீட்டில் நேற்றிரவு மர்ம நபர்கள் சிலரால் நாய் ஒன்று வெட்டப்பட்டு உடல் வீட்டின் வாசற் கதவருகில் போடப்பட்டதுடன் நாயின் தலையை தடியில் செருகி வாயிற் கதவில் கட்டியிருந்தனர்.
அத்துடன், வாயிற் கதவையும் மர்ம நபர்கள் இரும்புச் சங்கிலியால் பிணைத்து பூட்டினால் பூட்டியிருந்தனர்.
காலையில் மர்ம நபர்கள் சிலர் காணியின் சுவரில் ஒட்டப்பட்டிருந்த சுவரொட்டிகளைக் கிழித்ததுடன், நேற்றிரவு இத்தகைய அட்டகாசத்தையும் மர்ம நபர்கள் புரிந்ததாகவும் வேட்பாளர் சிவகுமாரினால் தெரிவிக்கப்பட்டது.
இது தொடர்பாக மானிப்பாய் காவல் நிலையத்தில் முறைப்பாடு செய்யப்பட்டுள்ளது.
***************
அதிகாரம் வழங்காமல் தீர்வில்லை!
மாகாணசபைகளுக்கு அதிகாரங்களை வழங்குவதன் மூலம் வடக்கு கிழக்கு பிரச்சினைக்கு தீர்வு காண முடியாது என சிரேஸ்ட சட்டத்தரணி கொமின் தயாசிறி தெரிவித்துள்ளார்.
செனல்4 ஊடகத்தின் காணொளி போலியானது என்ற போதிலம் வெறுமனே அதனை நிராகரிப்பதன் மூலம் மட்டும் குற்றச்சாட்டுக்களிலிருந்து மீள முடியாது எனவும், அவற்றைப் பொய்பிக்கக் கூடிய ஆதாரங்கள் முன்வைக்கப்பட வேண்டும் என அவர் சுட்டிக்காட்டியுள்ளார்.
அரசாங்கம் விரிவான விசாரணைகளை நடத்தி சர்வதேச ரீதியாக எழும் குற்றச்சாட்டுக்களை முறியடிக்க நடவடிக்கை எடுக்க வேண்டுமென அவர் குறிப்பிட்டுள்ளார்.
சர்வதேச விசாரணைகளுக்கு அனுமதி அளித்தல் நாட்டின் சுயாதீனத்தன்மைக்கு குந்தகம் ஏற்படக் கூடுமென அவர் சுட்டிக்காட்டியுள்ளார்.
போரின் பின்னர் சர்வதேச சமூகத்தின் அழுத்தங்கள் அதிகரிப்பதற்கு இலங்கை தூதுவராலயங்களின் குறைபாடே பிரதான காரணி என அவர் சுட்டிக்காட்டியுள்ளார்.
போர் இடம்பெற்ற காலத்தில் வெளிவிவகார அமைச்சின் பணிகளை அரசுத் தலைவர் நேரடியாக கண்காணித்து வந்ததாகவும் பின்னர் அந்த நடைமுறையில் மாற்றம் ஏற்படுத்தப்பட்டதாகவும் அவர் குறிப்பிட்டுள்ளார்.
13ம் திருத்தச் சட்ட மூலத்தை நடைமுறைப்படுத்த அனுமதிக்கக் கூடாது எனவும் அது இந்தியாவின் விருப்பத்திற்கு அமைய உருவாக்கப்பட்ட யோசனைத் திட்டமாகும் எனவும் அவர் தெரிவித்துள்ளார்.
அரசியல்வாதிகளுக்கு அதிகாரத்தை வழங்காது தமிழ் மக்களுக்கு அதிகாரங்கள் வழங்கப்படக் கூடிய வகையிலான தீர்வுத் திட்டமொன்று முன்வைக்கப்பட வேண்டுமென அவர் வலியுறுத்தியுள்ளார்.
***************
அரசின் நோக்கம் என்ன?
யுத்தத்தால் இடம்பெயர்ந்த மக்களை மீள்குடியேற்றம் செய்யும் மீள்குடியேற்ற அமைச்சுக்கு 170 கோடி ரூபா மட்டுமே ஒதுக்கப்பட்டிருக்கும் நிலையில் பாதுகாப்பு படைத் தலைமையக புதிய கட்டிடத்தை மட்டும் நிர்மாணிப்பதற்கென 2000 கோடி ரூபாவை அரசாங்கம் செலவிடுவதாக ஐக்கிய தேசியக் கட்சி நாடாளுமன்ற உறுப்பினர் கலாநிதி ஹர்ச டி சில்வா தெரிவித்துள்ளார்.
பாராளுமன்றத்தில் நேற்று புதன்கிழமை நடைபெற்ற பாதுகாப்பு அமைச்சுக்கான குறைநிரப்பு பிரேரணை மீதான விவாதத்தில் பேசும் போதே ஹர்ச டி சில்வா இந்த தகவலை வெளியிட்டார்.
2011 ஆம் ஆண்டுக்கான வரவுசெலவு திட்டத்தின் மூலம் பாதுகாப்பு செலவினங்களுக்கென 215.2 பில்லியன் ரூபா ஒதுக்கப்பட்டுள்ளது.
இது மொத்தச் செலவினத்தின் 20 சதவீதமாகும்.
தற்போது இந்த 20 பில்லியன் ரூபாவும் ஒதுக்கப்படுகிறது.
இதன் மூலம் பாதுகாப்பு அமைச்சுக்கான மொத்த செலவின் 235.2 பில்லியன் ரூபாவாக அதிகரித்துள்ளது.
ஆகவே, மொத்தச் செலவினத்தில் பாதுகாப்பு செலவினம் 21.8 சதவீதமாக அதிகரித்துள்ளது.
எனினும் வரவு செலவுத் திட்டத்தின் மூலம் மீள்குடியேற்ற அமைச்சுக்கென்று 1.7 பில்லியன் ரூபா மட்டுமே ஒதுக்கப்பட்டிருக்கிறது.
30 வருடகால யுத்தத்தில் இடம்பெயர்ந்தவர்களை மீள்குடியேற்றம் செய்ய இந்த தொகையே ஒதுக்கப்பட்டிருக்கிறது.
இவ்வாறான நிலையில் செலவு செய்வதில் எதற்கு முன்னுரிமை வழங்கப்பட வேண்டும் என்பது பற்றி சிந்திக்க வேண்டியுள்ளது எனவும் தெரிவித்துள்ளார்.
***************


Wednesday, 6 July 2011

செய்திகள் 06/07

ஓப்புக் கொண்டால் மட்டும் போதாது!
இலங்கையில் இடம்பெற்ற இறுதி கட்ட யுத்தத்தின் போது ஐயாயிரம் பொதுமக்கள் கொல்லப்பட்டதாக இலங்கையில் யுத்தம் நடந்த போது சமாதானச் செயலகத்தின் பணிப்பாளராக கடைமையாற்றியவரும் தற்போதைய பாராளுமன்ற உறுப்பினறுமான ராஜீவ விஜயசிங்க தெரிவித்துள்ளார்.
இலங்கையின் உள்நாட்டு யுத்தத்தின் இறுதி மாதங்களில் நடைபெற்ற படை நடவடிக்கைகளை மனித நேய மீட்பு நடவடிக்கைகள் என இலங்கை அரசு வர்ணித்து வந்துள்ளது.
படை நடவடிக்கைகள் காரணமாக பொதுமக்களுக்கு உயிரிழப்பு ஏற்படக் கூடாது என்பதே தமது கொள்கையாக இருந்தது என்றும் அது கூறி வந்தது.
பொதுமக்கள் யாரும் கொல்லப்படவில்லை என்று அந்நாட்டுத் தலைவர்கள் கூறிவந்தனர்.
ஆனால் இதனை மனித நேய அமைப்புக்கள் நிராகரித்தன.
யுத்தம் முடிந்து 26 மாதங்களான பின்னர் அரசுக்கு எத்தனை பொதுமக்கள் கொல்லப்பட்டனர் என்பது குறித்து இப்போதாவது தெரியுமா என்ற கேள்விக்கு பதிலளித்த ராஜீவ விஜயசிங்க ஒட்டு மொத்தமாக 5 ஆயிரம் பேர் கொல்லப்பட்டிருக்கலாம் என்றார்.
இதில் பொரும்பான்மையானவர்கள் டிசம்பர் 2008 ஆம் ஆண்டுக்கும் மே 2009 ஆம் ஆண்டுக்கும் இடைப்பட்ட காலத்தில் கொல்லப்பட்டிருக்கலாம் என்றும் அவர் தெரிவித்தார்.
ஐ.நா பொதுச் செயலாளர் நாயகத்தால் நியமிக்கப்பட்ட நிபுணர் குழுவும் பிற அமைப்புக்களும் இறுதி யுத்தத்தில் நாற்பதாயிரம் பேர்வரை உயிரிழந்திருக்கலாம் என்று கணித்துள்ளனர்.
இலங்கை அரசு பொதுமக்கள் தரப்புக்கு உயிர் இழப்பு இல்லை என்று கூறி வரும் நிலையில் அரசின் மூத்த அதிகாரி தற்போது பீபீசிக்கு வழங்கிய செவ்வியில் ஐந்தாயிரம் பேர் வரை கொல்லப்பட்டனர் என்று கூறியுள்ளமை குறிப்பிடத்தக்கது.
***************
இரகசியத்தை இன்னும் காக்க விரும்பும் மூன்?
சிறிலங்காவின் எதிர்க்கட்சித் தலைவர் ரணில் விக்கிரமசிங்க நேற்று நியுயோர்க்கில் ஐ.நா பொதுச்செயலர் பான் கீ மூனைச் சந்தித்துப் பேச்சு நடத்தியுள்ளார்.
நேற்றுப் பிற்பகல் 3.30 மணியளவில் இந்தச் சந்திப்பு இடம்பெற்றதாக அங்கிருந்து கிடைக்கும் தகவல்கள் தெரிவிக்கின்றன.
ரணில் விக்கிரமசிங்கவுடன் ஐ.நாவுக்கான சிறிலங்காவின் பிரதி வதிவிடப் பிரதிநிதி மேஜர் ஜெனரல் சவீந்திர சில்வாவும் இந்தச் சந்திப்புக்காக பான் கீ மூனின் செயலகத்துக்குச் சென்றிருந்தார் என்றும் தகவல்கள் தெரிவிக்கின்றன.
இந்தச் சந்திப்பின் போது ஒளிப்படம் எடுப்பதற்கு ஊடகவியலாளர்கள் அனுமதிக்கப்படவில்லை என்றும் தெரிவிக்கப்படுகிறது.
இந்தச் சந்திப்பை ஒளிப்படம் எடுப்பதற்கு அனுமதிக்குமாறு ஊடகவியலாளர்கள் விடுத்த வேண்டுகோள் நிராகரிக்கப்பட்டுள்ளதாகவும் கூறப்படுகிறது.
கடந்தவாரம் இஸ்ரேலிய எதிர்க்கட்சித் தலைவர் சிபி லிவ்னி, ஐ.நா பொதுச் செயலர் பான் கீ மூனைச் சந்தித்த போது அதை ஒளிப்படம் எடுக்க அனுமதித்த ஐ.நா அதிகாரிகள் நேற்றைய சந்திப்பை ஒளிப்படம் எடுக்க ஊடகவியலாளர்களை அனுமதிக்கவில்லை என்பது குறிப்பிடத்தக்கது.
அதேவேளை வழக்கமாக ஐ.நா பொதுச்செயலரின் சந்திப்புகள் தொடர்பாக அவரது அதிகாரபூர்வ இணையத்தளத்தில் ஒளிபடங்கள் வெளியிடப்படுவது வழக்கமாக இருந்தாலும்- அதிலும் எந்த ஒளிப்படமும் வெளியிடப்படவில்லை.
இந்தச் சந்திப்புப் பற்றிய தகவல்களும் அதில் பிரசுரிக்கப்படவில்லை என்பதும் குறிப்பிடத்தக்கது.
***************
அதிகாரப்பகிர்வு அறிக்கை கிடைக்குமா?
அதிகாரப் பகிர்வு தொடர்பான அரசாங்கத்தின் எழுத்து மூலப் பதிலறிக்கை தமிழ்த் தேசியக் கூட்டமைப்பிடம் இன்று வழங்கப்படும் என்று தெரிய வருகின்றது.
தமிழ் மக்களுக்கான அதிகாரப் பகிர்வு தொடர்பாக தமிழ்த் தேசியக் கூட்டமைப்பின் பிரதிநிதிகளுக்கும், அரசாங்கத்தின் பிரதிநிதிகளுக்குமிடையில் இன்று மாலை நடைபெறும் கலந்துரையாடலின் போதே பிரஸ்தாப பதிலறிக்கையை அரசாங்கம் வழங்கவுள்ளது.
இருதரப்புப் பிரதிநிதிகளுக்கிடையிலான பிரஸ்தாப கலந்துரையாடல் இன்று மாலை ரெசுத் தலைவர் செயலகத்தில் நடைபெறவுள்ளது.
இவ்விடயம் தொடர்பில் அரசாங்கத் தரப்பு பிரதிநிதிகள் மற்றும் தமிழ்த் தேசியக் கூட்டமைப்பின் பிரதிநிதிகளுக்கிடையில் இதுவரை ஏழு கலந்துரையாடல்கள் நடைபெற்றுள்ளன.
இன்று எட்டாவது சுற்று கலந்துரையாடல் நடைபெறவுள்ளது.
இதற்கிடையே தமிழ்த் தேசியக் கூட்டமைப்பு எதிர்த்துள்ள போதிலும், அதிகாரப் பரவலாக்கல் தொடர்பான நாடாளுமன்றத் தெரிவுக்குழு தொடர்பான அரசாங்கத்தின் யோசனைக்கு தமிழ், முஸ்லிம் கட்சிகளின் ஆதரவு கிடைத்து வருவதாகவும் அரசாங்கம் அறிவித்துள்ளது.
***************
தீர்வு கூட்டமைப்புக்கு ஊடாகவே!
தமிழர்களுக்கான அரசியல் தீர்வு தமிழ்த் தேசியக் கூட்டமைப்பின் ஊடாகவே வழங்கப்படவேண்டும் என செல்வம் அடைக்கலநாதன் தெரிவித்துள்ளார்.
தமிழ்த் தேசியக் கூட்டமைப்புதான் தமிழர்களின் குரலாக ஒலித்து வருகின்றது. தீர்வைப் பெறுவதற்காக அரசுடன் பேச்சுக்களை நடத்தி வருகின்றது என்றும் கூட்டமைப்பின் நாடாளுமன்ற உறுப்பினர் செல்வம் அடைக்கலநாதன் நாடாளுமன்றில் நேற்று இடம்பெற்ற அவசரகாலச்சட்ட நீடிப்பு பிரேரணை மீதான விவாதத்தில் கலந்துகொண்டு உரையாற்றியபோது கூறினார்.
அவசரகாலச்சட்டம் தொடர்ந்தும் நடைமுறையில் இருப்பதால் எமது தமிழ் மக்கள் மிகவும் துன்பத்தை அனுபவிக்கின்றனர்.
தமிழர்களைத் தொடர்ந்தும் அடிமையாக வைத்திருக்க வேண்டும் என்பதற்காகவே அரசு அவசரகாலச்சட்டத்தைத் தொடர்ந்தும் நடைமுறைப்படுத்துகின்றது.
இந்த நாட்டில் மக்கள் சுதந்திரமாக வாழ்கின்றனர். ஜனநாயகம் வேறூன்றி உள்ளது. அபிவிருத்தி இடம்பெறுகின்றது என்று கூறிக்கொண்டு ஒவ்வொரு மாதமும் அவசரகாலச்சட்டம் புதுப்பிக்கப்படுகின்றது.
பயங்கரவாதம் முற்றாகத் தோற்கடிக்கப்பட்டுவிட்டது என்று அரசு கூறுகின்றது.
ஏதோவொரு விதத்தில் பயங்கரவாதம் தொடர்கிறது என்றும் கூறுகின்றது.
அவசரகாலச்சட்டத்தை நீடிப்பதற்காகவே அரசு இவ்வாறு கூறுகின்றது.
இந்த அவசரகாலச்சட்டம் நடைமுறையில் இருப்பதால் வடக்கு கிழக்கு மக்கள் கடும் துன்பத்தை அனுபவித்து வருகின்றனர்.
மீண்டும் கைதுகள் இடம்பெறுகின்றன. மீள்குடியேற்றப்பட்ட கிராமங்களில் படையினரின் நிர்வாகம் இடம்பெறுகின்றது.
இந்த அவசரகாலச்சட்டத்தால் வடக்கு, கிழக்கில் அரச நிர்வாகம் செயலிழந்து போயுள்ளது.
தமிழர்களுக்கு எதிராக இழைக்கப்படும் இவ்வாறான கொடுமைகளைத் தமிழ்த் தேசியக் கூட்டமைப்பு தட்டிக் கேட்டால் அது நிராகரிக்கப்படுகின்றது.
இந்த நாட்டில் சிங்கள மக்கள் அனுபவிக்கும் அனைத்து உரிமைகளும் எமது மக்களுக்கும் உண்டு.
அவற்றை அனுபவிக்க அரசு இடமளிக்க வேண்டும். தமிழ்த் தேசியக் கூட்டமைப்புதான் தமிழர்களின் பிரச்சினைகளுக்காகக் குரல் எழுப்புகின்றது.
அரசியல் தீர்வைப் பெற்றுக்கொடுப்பதற்காக அரசு பேச்சு நடத்துகின்றது.
தமிழ்த் தேசியக் கூட்டமைப்பின் ஊடாகவே தமிழர்களுக்கு அரசியல் தீர்வு கிடைக்கவேண்டும் என்றும் அவர் தனது உரையில் தெரிவித்துள்ளார்.
***************
தொடரும் அவசரகாலச் சட்டம்
அவசரகாலச் சட்டம் நேற்று செவ்வாய்க்கிழமை பாராளுமன்றத்தில் 56 மேலதிக வாக்குகளால் நிறைவேற்றப்பட்டது.
பிரேரணைக்கு ஆதரவாக 95 வாக்குகளும் எதிராக 39 வாக்களும் கிடைக்கப்பெற்றதையடுத்து பிரேரணை மேலதிக வாக்குகளால் நிறைவேற்றப்பட்டதாக பிரதி சபாநாயகர் சந்திமவீரக்கொடி அறிவித்தார்.
அவசரகாலச் சட்டத்தை மேலும் ஒரு மாதத்திற்கு நீடிப்பதற்கான பிரேரணை நேற்று சபையில் பிரதமர் தி.மு.ஜயரட்ணவினால் சமர்ப்பிக்கப்பட்டது.
இருதரப்புவாத பிரதிவாதங்களின் பின்னர் தமிழ்த் தேசியக் கூட்டமைப்பின் தலைவரும் நாடாளுமன்ற உறுப்பினருமான ஆர்.சம்பந்தன் பிரேரணையை வாக்கெடுப்புக்கு விடுமாறு சபையில் கேட்டுக் கொண்டார்.
இதன் பிரகாரம் கோரம் ஒலிக்கப்பட்டு பிரேரணை வாக்கெடுப்புக்கு விடப்பட்டது. பிரேரணைக்கு ஆதரவாக 95 வாக்குகள் கிடைக்கப்பெற்றன.
ஐக்கிய தேசியக்கட்சி, தமிழ்த் தேசியக் கூட்டமைப்பு மற்றும் ஜனநாயக தேசியக் கூட்டணி ஆகியவற்றைச் சேர்ந்த நாடாளுமன்ற உறுப்பினர்கள் பிரேரணைக்கு எதிராக வாக்களித்தனர்.
இதன்பிரகாரம் 39 வாக்குகள் கிடைக்கப்பெற்றன.
இதன்போது பிரேரணை மேலதிக வாக்குகளால் நிறைவேற்றப்பட்டதாக சபைக்கு தலைமை தாங்கிய பிரதி சபாநாயகர் சந்திமவீரக்கொடி அறிவித்தார்.
***************
தமிழர்களை இழிவுபடுத்தும் படையினர்
தமிழ்ப் பெண் அரசியல் கைதிகளை நீதிமன்றத்துக்கு அழைத்துச்செல்லும் போது பெண் இராணுவச் சிப்பாய்கள் பகிரங்க இடத்தில் அவர்களைச் சோதனையிடுவதனால் கைதிகள் வெட்கத்தால் கூனிக் குறுகிப்போவதாகத் தெரிவிக்கப்படுகிறது.
பல ஆண்கள் பார்த்திருக்க சோதனையிடுவதால் பெண் கைதிகள் உளவியல் ரீதியில் பாதிக்கப்பட்டு சுகயீனம் அடைகின்றனர் என "நாம் இலங்கையர்'' அமைப்பு விசனம் தெரிவிக்கின்றது.
நீதிமன்ற விசாரணைகளுக்காக தமிழ் அரசியல் கைதிகள் நீதிமன்றத்துக்கு அழைத்துச் செல்லப்படுவதற்கு முன்னரும், சிறைச்சாலைக்கு அழைத்துச் செல்லப்பட்ட பின்னரும் அதிகாரிகள் அவர்களை சோதனையிடுவது வழக்கம்.
தனி அறையில் வைத்தே அவர்களை இராணுவத்தினர் சோதனையிட வேண்டும்.
ஆனால் தமிழ்க் கைதிகளின் நிலை மாறுபட்டதாகவே உள்ளது.
இவர்கள் நீதிமன்ற விசாரணைக்காக அழைத்துச் செல்லப்படும் போதும், மீண்டும் சிறைச்சாலை திரும்பும் போதும் பல்வேறு இன்னல்களை உடல், உள ரீதியாக எதிர்நோக்குகின்றனர் என நாம் இலங்கையர் அமைப்பு தெரிவிக்கின்றது.
***************

இந்திய நிலைப்பாடு என்ன?
சிறிலங்காவின் உள்நாட்டு விவகாரங்களில் இந்தியா எந்த வழியிலும் தலையிடாது. ஆனால், அங்கு நிரந்தர அமைதிய ஏற்பட எல்லாவிதமான உதவிகளையும் செய்யும் என்று இந்திய வெளிவிவகாரச் செயலர் நிருபமா ராவ் தெரிவித்துள்ளார்.
புதுடெல்லி சென்றுள்ள சிறிலங்காவின் ஊடக ஆசிரியர்களைச் சந்தித்துக் கலந்துரையாடிய போதே அவர் இவ்வாறு கூறியுள்ளார்.
புதுடெல்லி சவுத்புளொக் செயலகத்தில் நடைபெற்ற இந்தச் சந்திப்பில் இந்திய வெளிவிவகார இணைச் செயலர் விஷ்ணு பிரசாத், இணைச் செயலர் சுரேஷ் பிரான் சிறிங்லா ஆகியோரும் கலந்து கொண்டனர்.
இந்தச் சந்திப்பில் கருத்து வெளியிட்ட நிருபமா ராவ், சிறிலங்காவில் நிரந்தர அமைதி ஏற்பட வேண்டும் என்பதில் இந்தியா உறுதியுடனும் ஆர்வத்துடனும் இருப்பதாகவும், இதற்காக எத்தகைய அழுத்தங்களையும் இந்தியா கொடுக்காது என்றும் தெரிவித்துள்ளார்.
இனப்பிரச்சினைக்கு 13வது திருத்தத்துக்கும் அதிகமான அதிகாரங்களுடன்- ஒற்றையாட்சிக்குள்- அரசியல்தீர்வு காணப்பட வேண்டும் என்பதே இந்தியாவின் நிலைப்பாடு என்றும் அவர் கூறியுள்ளார்.
தெற்காசிய பிராந்தியத்தின் பெரிய அண்ணனாக இருக்க இந்தியா விரும்பவில்லை என்றும் இந்தப் பிராந்தியத்தில் உள்ள அனைத்து நாடுகளுடனும் நட்புறவுடன் செயற்படவே விரும்புவதாகவும் நிருபமா ராவ் தெரிவித்துள்ளார்.
13வது திருத்தச் சட்டத்தை நடைமுறைப்படுத்துவது குறித்து சிறிலங்கா அரசாங்கமும், மக்களுமே தீர்மானிக்க வேண்டும்.
அந்தப் பொறுப்பு சிறிலங்காவிடமே உள்ளது. தமிழ்த் தேசியக் கூட்டமைப்பை அண்மையில் சந்தித்த போது இதனையே வலியுறுத்தியதாகவும் அவர் அவர் குறிப்பிட்டுள்ளார்.
தமிழ்த் தேசியக் கூட்டமைப்புக்கும் சிறிலங்கா அரசுக்கும் இடையில் நடைபெற்று வரும் பேச்சுக்கள் மூலம் தேசியப்பிரச்சினைக்கு அனைவரும் ஏற்றுக் கொள்ளத்தக்க தீர்வு காணப்பட்டால் இந்தியா மகிழ்ச்சியடையும் என்றும் அவர் தெரிவித்துள்ளார்.
வடக்கையும் கிழக்கையும் இணைக்கும் திட்டத்தை 1987ம் ஆண்டில் இந்தியா முன்வைத்தது. ஆனால் சிறிலங்காவின் நீதிமன்றத் தீர்ப்புக்கமைய வடக்கும், கிழக்கும் பிரிக்கப்பட்டுள்ளன.
இந்த மாகாணங்களை இணைக்க வேண்டுமா இல்லையா என்பதை சிறிலங்கா அரசாங்கமும், அரசியல் கட்சிகளுமே தீர்மானிக்க வேண்டும்.
இதில் இந்தியா, எந்த வகையிலும் தலையிடாது என்றும் இந்திய வெளிவிவகாரச் செயலர் மேலும் கூறியுள்ளார்.
சிறிலங்காவில் நிரந்தர அமைதி ஏற்பட வேண்டும் என்பதே இந்தியாவின் நோக்கம் என்று குறிப்பிட்டுள்ள நிருபமா ராவ், சிறிலங்காவில் தமிழ் மக்களுக்கு உரிமையை வழங்கி, ஏனைய சமூகங்களுடன் நல்லிணக்கத்தை ஏற்படுத்தும் வகையில் தீர்வை எட்ட வேண்டிய பொறுப்பு சிறிலங்கா அரசாங்கத்துக்கு உள்ளது என்றும் தெரிவித்துள்ளார்.
சிறிலங்கா போரில் வெற்றி கண்டு விட்ட போதிலும் அமைதியை ஏற்படுத்துவதில் இன்னமும் வெற்றி காணவில்லை என்றும் அவர் குறிப்பிட்டுள்ளார்.
எல்லைதாண்டி மீன்பிடிக்கும் மீனவர்களை சிறிலங்கா மனிதாபிமானத்துடன் நடத்த வேண்டும் என்றும் நிருபமா ராவ் வலியுறுத்தியுள்ளார்.
எல்லைதாண்டும் மீனவர்கள் மீது துப்பாக்கிச் சூடு நடத்தப்படுவதை எந்த வகையிலும் ஏற்க முடியாது என்றும் அவர் திட்டவட்டமாகத் தெரிவித்துள்ளார்.
பாதிக்கப்பட்ட தமிழர்களுக்காக வடக்கில் இந்தியா கட்டிக் கொடுக்கவுள்ள 50,000 வீடுகளில் 20 வீடுகள் இந்த மாத இறுதிக்குள் கையளிக்கப்படும் என்றும் 1000 வீடுகள் இந்த ஆண்டு முடிவடைவதற்குள் பொதுமக்களிடம் கையளிக்கப்படும் என்றும் நிருபமாராவ் தெரிவித்துள்ளார்.
அம்பாந்தோட்டை துறைமுகத்தில் சீனாவின் முதலீடுகள் குறித்து இந்தியா பொறாமைப்படவோ ஆத்திரப்படவோ இல்லை என்றும் குறிப்பிட்டுள்ள அவர், இரு நாடுகளுக்கிடையிலும் நட்புறவும், எல்லைப் பிரச்சினைகளும் இருந்து வருவதாகவும் அவர் கூறியுள்ளார்.
தமிழ்நாட்டில் ஆறரைக் கோடி மக்கள் இருக்கிறார்கள். அவர்கள் இந்த நாட்டின் ஒரு பகுதியினர்.
மத்திய அரசின் மீது அவர்கள் தமது அழுத்தங்களைக் கொண்டு வரும்போது இந்தியாவின் நடவடிக்கைகள் குறித்து சிறிலங்கா புரிந்து கொண்டு செயற்பட வேண்டும் என்றும் அவர் மேலும் தெரிவித்துள்ளார்.
தமிழ்நாடு அரசு எந்தத் தீர்மானத்தையும் நிறைவேற்றலாம். அல்லது கோரிக்கைகளை முன்வைக்கலாம்.
ஆனால், இறுதித் தீர்மானத்தை எடுப்பது மத்திய அரசாங்கமே என்றும் அவர் மேலும் கூறியுள்ளார்.
***************



Tuesday, 5 July 2011

செய்திகள் 05/07


கரும்புலிகள் தினம் இன்று!

காலக்கருக்கலில் வந்துதித்த நெருப்புச் சூரியர்களின் நினைவு நாள் இன்றாகும்.
கந்தகத்தை நெஞ்சில் சமந்து சாவுக்கு தேதி குறித்து சிரித்தபடி கையசைத்து விடைபெறும் சந்தன மேனியினரின் நினைவுகள் சுமந்து வணங்கும் நாள் இன்றாகும்.
1987 ஆம் ஆண்டு முதல் தேசியத் தலைவனின் எண்ணக்கருவில் பிரவசமான நெருப்புக்குழந்தைகள் இவர்கள்.
செயற்கரிய ஈகத்தை மிக எளிதில் செய்து விட்டு முகம் காட்டாமலே செல்கின்ற ஈசைக் செம்மல்களை நினைவு கூரும் இந்hளில் உலகெங்கும் உள்ள தன்மானத் தமிழர்கள் அவர்களை நினைவு கூர்ந்து வணக்க நிகழ்வுகள் பலவற்றை ஒழுங்கு செய்துள்ளனர்.
விலை மதிப்பற்ற மனித உயிர்களை எதிர் கால சந்ததியினரின் சுதந்திரத்திற்காகவும் சுபீட்சமான நிம்மதியான வாழ்வுக்காகவும் ஈகம் செய்து சரித்திரத்தில் நிலையான இடத்தினைப் பிடித்தவர்கள்.
தமிழீழப் போராட்டத்தில் காலத்திற்குக் காலம் எதிர்வரும் தடைகளை நீக்கிட தடைநீக்கிகளாக தேசியத் தலைவனின் எண்ண வீச்சிலிருந்து உருவானவர்கள் கரும்புலிகள்.
1987 ஆம் ஆண்டு யூலை 5ஆம் திகதி நெல்லியடி மகாவித்தியாலயத்தில் முகாமிட்டு எம் மக்களுக்கு இடையூறு பல விளைவித்து வந்த சிங்கள இராணுவத்தினரின் முகாமினுள் புகுந்து சின்னாபின்னமாக்கிய முதல் கரும்புலி மாவீரன் கப்டன் மில்லரின் நினைவாக ஆண்டு தோறும் யூலை 5 ஆம் திகதி கரும்புலிநாள் கடைப்பிடிக்கப்பட்டு வருகின்றது.
வரலாற்றினை வழிநடத்த வரலாறாகவே ஆனவர்களை நின்றொரு கணம் நினைத்தொரு பொழுது விழி உகுக்கும் கண்ணீர் பூக்களால் அர்ச்சித்து இரும்புப்பூக்களைத் தொழுதெழும்காலமிது.
காற்றில் கரைந்தவர்களுக்கு நடுகல் நட்டு தொழுதெழும் வேளை அவர்கள் கனவுகளை நனவாக்கிட உறுதியெடுத்துக் கொள்வோம்.
****************

அவுஸ்திரேலியாவில் சனல்4வின் "ஸ்ரீலங்காவின் கொலைக்களம்"
சிறிலங்கா அரசாங்கத்தின் கடும் எதிர்ப்புகளைப் புறக்கணித்து அவுஸ்ரேலியாவின் ஏபிசி தொலைக்காட்சி சிறிலங்காவின் கொலைக்களங்கள் ஆவணப்படத்தை நேற்று ஒளிபரப்பியுள்ளது.
ஏபிசி தொலைக்காட்சியில் ஒளிபரப்பாகி வரும் நான்கு கோணங்கள் என்ற புலனாய்வு நிகழ்ச்சியிலேயே இந்த ஆணவப்படம் நேற்றிரவு 8.30 மணியளவில் ஒளிபரப்பப்பட்டுள்ளது.
இந்த ஆவணப்படம் மீண்டும் இன்றிரவு 11.35 மணியளவில் ஏபிசி தொலைக்காட்சியின் முதலாவது அலைவரிசையில் ஒளிபரப்பாகவுள்ளதாகவும் அறிவிக்கப்பட்டுள்ளது.
அத்துடன் சனிக்கிழமைகளில் இரவு 8 மணிக்கு ஒளிபரப்பாகும் ஏபிசி நியூஸ் 24 அலைவரிசையிலும் சிறிலங்காவின் கொலைக்களங்கள் ஆவணப்படம் ஒளிபரப்பப்படவுள்ளது.
அத்துடன் ஏபிசி தொலைக்காட்சி இந்த ஆவணப்படத்தை அவுஸ்ரேலியாவில் வசிப்பவர்கள் மட்டும் பார்வையிடும் வகையில் தமது இணைத்தளத்திலும் வெளியிட்டுள்ளது.
ஏபிசி தொலைக்காட்சி இந்த ஆவணப்படத்தை ஒளிபரப்பாமல் செய்வதற்கு சிறிலங்கா அரசாங்கம் கடும் முயற்சிகளை மேற்கொண்டிருந்த போதும் அது வெற்றி பெறவில்லை என்பது குறிப்பிடத்தக்கது.
சிறிலங்காவின் கொலைக்களங்கள் ஆவணப்படம் ஏபிசி தொலைக்காட்சியில் ஒளிபரப்பானதை அடுத்து அவுஸ்ரேலியாவில் சிறிலங்காவுக்கு எதிரான உணர்வலைகளைத் தோற்றுவித்திருப்பதாகவும் தகவல்கள் தெரிவிக்கின்றன.
இதற்கிடையே இந்தியாவில் எதிர்வரும் வியாழன், வெள்ளி, சனிக்கிழமைகளில் ஹெட்லைன்ஸ் ருடே தொலைக்காட்சியில் இந்த ஆவணப்படம் ஒளிபரப்பாகவுள்ளது.
இந்தியத் தொலைக்காட்சியில் இந்த ஆவணப்படம் ஒளிபரப்பாவதைத் தடுக்கும் நகர்வுகளில் ஈடுபட்டுள்ள சிறிலங்கா அரசாங்கம் புதுடெல்லியுடன் தொடர்புகளை ஏற்படுத்தியுள்ளதாகவும் தகவல்கள் தெரிவிக்கின்றன.
****************
அவுஸ்திரேலியாவின் கருத்து?
இலங்கையில் இடம்பெற்ற உள்நாட்டு யுத்தத்தின் போது பொதுமக்கள் மீதான கொடூரங்கள் தொடர்பான புதிய தகவல்கள் ஆச்சரியப்பட வைப்பதாக அவுஸ்திரேலியாவின் வெளிவிவகார அமைச்சர் கெவின் ரூட் தெரிவித்துள்ளார். 
பிரித்தானிய தொலைக்காட்சியொன்று இலங்கை மக்கள் மீதான இராணுவத்தினரின் தாக்குதல்கள் தொடர்பான ஆவணப்படமொன்றை ஒளிபரப்பு செய்துள்ளது.
யுத்தத்தின் போது சுமார் 40ஆயிரம் பொதுமக்கள் கொல்லப்பட்டதாக ஐக்கிய நாடுகள் சபையின் பொதுச் செயலாளரினால் நியமிக்கப்பட்டிருந்த நிபுணர் குழு நம்பத்தகுந்த ஆதாரங்களுடன் அறிக்கை வெளியிட்டது.
இது தொடர்பில் ஐக்கிய நாடுகள் மனித உரிமை ஆணைக்குழு மீள் விசாரணை செய்ய வேண்டும் என அவர் குறிப்பிட்டார்.
அவர்களின் கருத்தை தான் நம்புவதாகவும் இருப்பினும் இந்த ஆதாரங்கள் போதுமானதாக இல்லை என்றும் கூறிய அவர் அவுஸ்திரேலிய அரசும் இந்த நிலைபாட்டுடனேயே காணப்படுகின்றது எனத் தெரிவித்துள்ளார்.
ஜெனீவாவிலுள்ள அவுஸ்ரேலிய உயர் ஸ்தாகனிகராலயத்தின் ஊடாக மனித உரிமை ஆணையகத்திற்கு இந்த ஆதாரங்கள் தொடர்பில் மீள் ஆய்வு செய்ய வேண்டும் என தான் கோரவுள்ளதாக வெளிவிவகார அமைச்சர் கெவின் ரூட் குறிப்பிட்டார்.
****************
இந்தியாவின் நழுவல்!
இலங்கைக்கு எதிராக ஐ.நா.நிபுணர்கள் குழுவினால் தெரிவிக்கப்பட்டுள்ள போர்க் குற்றம் தொடர்பான குற்றச்சாட்டுகள் தொடர்பாக தமது நிலைப்பாடு என்ன என்பதை இலங்கை அரசாங்கமே சர்வதேசத்துக்குத் வெளிப்படுத்த வேண்டும் எனத் தெரிவித்திருக்கும் இந்தியா, 13 ஆவது திருத்தம் தொடர்பாகவும் இலங்கையே இறுதி முடிவை எடுக்க வேண்டும் எனத் தெரிவித்திருக்கின்றது.
இலங்கை மற்றும் மாலைதீவு ஆகிய நாடுகளிலிருந்து இந்தியத் தலைநகர் புதுடில்லிக்கு விஜயம் செய்துள்ள பத்திரிகை ஆசிரியர்கள் மற்றும் சிரேஷ்ட ஊடகவியலாளர்கள் மத்தியில் நேற்றைய தினம் உரையாற்றிய போதே இந்தியாவின் வெளிவிவகாரச் செயலாளர் நிருபமா ராவ் இந்தக் கருத்துகளை முன்வைத்தார்.
ஐ.நா.நிபுணர் குழுவினால் தயாரிக்கப்பட்டுள்ள இலங்கையின் போர்க் குற்றம் பற்றிய அறிக்கை எதிர்வரும் செப்டெம்பர் மாதம் நடைபெறவிருக்கும் ஐ.நா.பாதுகாப்புச் சபைக் கூட்டத்தில் எடுத்துக் கொள்ளப்பட்டு இலங்கைக்கு எதிரான தீர்மானம் ஏதாவது எடுக்கப்படும் பட்சத்தில் இலங்கையைப் பாதுகாக்க இந்தியா முன்வருமா என இலங்கைப் பத்திரிகையாளர் ஒருவர் எழுப்பிய கேள்விக்குப் பதிலளித்த போதே நிருபமா ராவ் இதனைத் தெரிவித்தார்.
புதுடில்லியில் சவுத்புளொக் எனப்படும் வெளிவிவகார அமைச்சு அலுவலகத்தில் இடம்பெற்ற இந்தச் சந்திப்பில் இலங்கை மற்றும் மாலைதீவுடனான இந்தியாவின் உறவுகள் தொடர்பாக விளக்கமளிக்கப்பட்டது.
இதில் இந்திய வெளிவிவகார அமைச்சின் இணைச் செயலாளர் விஷ்ணு பிரசாத் மற்றும் ஹர்ஷ் சிறிங்லா ஆகியோரும் கலந்துகொண்டிருந்தார்கள்.
இந்தியாவைப் பொறுத்தவரையில் அதன் அண்டை நாடுகளான மாலைதீவு மற்றும் இலங்கையுடனான உறவுகள் முக்கியமானவை எனத் தெரிவித்த நிருபமா ராவ், அவற்றுடனான பொருளாதார மற்றும் அரசியல் உறவுகளை வலுப்படுத்துவதற்கு முக்கியத்துவம் கொடுக்கப்படுவதாகத் தெரிவித்தார்.
மறைமுக வேலைத்திட்டம் எதனையும் அடிப்படையாகக் கொண்டு இதற்கான செயற்பாடுகளை இந்தியா மேற்கொள்ளவில்லை எனவும் தெரிவித்த அவர், இவ்விடயத்தில் ஊடகங்களின் பங்களிப்பின் அவசியத்தையும் வலியுறுத்தினார்.
இலங்கையின் நலன்விரும்பியாகவே இந்தியா இருக்கின்றது எனவும் தெரிவித்த அவர், போரினால் பாதிக்கப்பட்ட பகுதிகளில் வீடமைப்பு மற்றும் வடபகுதியில் இந்தியா மேற்கொள்ளும் திட்டங்களையும் விளக்கினார்
****************
தமிழ்க் கூட்டமைப்பின் நிலைப்பாடு?
அரசியல் தீர்வு யோசனையைத் தயாரிப்பதற்கான உத்தேச நாடாளுமன்றத் தெரிவுக்குழுவில் அங்கம் வகிப்பதா, இல்லையா என்று தமிழ்த் தேசியக் கூட்டமைப்பு நாளை கொழும்பில் கூடிதீர்மானிக்கும் என்று தமிழ்த் தேசியக் கூட்டமைப்பின் பேச்சாளர் சுரேஷ் பிரேமச்சந்திரன் தெரிவித்துள்ளார்.
பிரதான எதிர்க்கட்சிகளின் அதிருப்திக்கும் எதிர்ப்புகளுக்கும் மத்தியில் இனப்பிரச்சினைக்கான தீர்வுத்திட்டத்தைத் தயாரிப்பதற்கான உத்தேச நாடாளுமன்றத் தெரிவுக்குழு அமைப்பது தொடர்பான பிரேரணை இன்று கூடவுள்ள நாடாளுமன்றில் சமர்ப்பிக்கப்படும் என்று சபாநாயகர் செயலக வட்டாரங்கள் தெரிவிக்கின்றன.
எனினும், நாடாளுமன்றத் தெரிவுக்குழு அமைக்கும் திட்டத்துக்கு எதிரணியினர் தமது நிலைப்பாட்டை உத்தியோகபூர்வமாகத் தெரிவிக்கவில்லை என்றும், அதனால், நாடாளுமன்றில் இது தொடர்பான நிலைப்பாடுகளை கட்சிகள் அறிவிக்க வேண்டும் என்று அமைச்சர் நிமல் சிறிபால டி சில்வா கேட்டுக்கொண்டார்.
இந்த நிலையில் நாடாளுமன்றத் தெரிவுக்குழு அமைக்கும் விடயம் தொடர்பிலான இறுதி முடிவு நாளை எடுக்கப்படும் என்று தமிழ்த் தேசியக் கூட்டமைப்பின் பேச்சாளர் சுரேஷ் பிரேமச்சந்திரன் கூறினார்.
இதேவேளை, நாடாளுமன்றத் தெரிவுக்குழு அமைக்கும் அரசின் யோசனைக்குப் பிரதான எதிர்க்கட்சியான ஐக்கிய தேசியக் கட்சி தனது எதிர்ப்பை வெளியிட்டிருந்தது.
அத்துடன் தெரிவுக்குழுவை பகிஷ்கரிப்பதாகவும் ஐ.தே.கவின் பொதுச் செயலாளர் திஸ்ஸ அத்தநாயக்க கூறியிருந்தார்.
இருப்பினும், இது தொடர்பான இறுதி முடிவு 7ஆம் திகதியின் பின்னர் எடுக்கப்படும் என்று திஸ்ஸ அத்தநாயக்க நேற்றுக் கூறினார்.
இத் தெரிவுக்குழுத் திட்டத்துக்கு ஜே.வி.பி. எதிர்ப்பை கடந்த வாரம் வெளியிட்டிருந்தது.
****************
அரசுத் தலைவரின் அதிகாரம் என்ன?
கடந்த காலங்களில் தமிழர்களை அடக்குவதற்கு தன்னுடைய நிறைவேற்று அதிகாரத்தை பயன்படுத்திய அரசுத் தலைவர் தமிழர்களுக்கான அரசியல் தீர்வை முன்வைப்பதற்கு மட்டும் தெரிவுக் குழுவை அமைத்து காலத்தை இழுத்தடிக்க முனைவது ஏன்? என மட்டக்களப்பு மாவட்ட தமிழ்த் தேசியக் கூட்டமைப்பின் பாராளுமன்ற உறுப்பினர் பா.அரியநேத்திரன் கேள்வி எழுப்பியுள்ளார்.
தெரிவுக்குழு காலத்தை இழுத்தடிக்கும் நடவடிக்கையாகும்.
இது போன்ற தெரிவுக் குழுக்களை கடந்த 61வருடங்களாக தமிழர்கள் பார்த்திருக்கிறார்கள், பேசியிருக்கிறார்கள், ஆனால் இதுவரை நடந்தது ஒன்றுமில்லை.
இதுபோன்ற எத்தனை குழுக்களை அமைத்தாலும் தமிழர்களின் உரிமைகளை இலங்கை அரசு தரப்போவதில்லை.
மாறாக காலத்தை இழுத்தடித்து சர்வதேசத்தையும் தமிழர்களையும் ஏமாற்றுவதற்கே இந்த தெரிவுக் குழு அமைக்கப்படுகின்றது.
தமிழர்களை அடக்கி ஆட்சி செய்வதற்கு நிறைவேற்று அதிகாரத்தை பயன்படுத்திய அரசுத் தலைவர் தமிழர்களுக்கான அரசியல் தீர்வை பெற்றுக்கொடுப்பதற்கு மட்டும் ஏன் தனது நிறைவேற்று அதிகாரத்தை பயன்படுத்த முடியாது.
இந்தியாவின் அழுத்தத்தையும் மீறி தெரிவுக்குழு அமைக்கும் அரசுத் தலைவரின் முடிவு தமிழ் மக்களுக்கான தீர்வை வழங்குவதற்கு அரசுத் தலைவர்க்கு விருப்பம் இல்லை என்பதையே காட்டுகின்றது என்றும் அவர் தெரிவித்துள்ளார்.
****************
மீள் குடியமரும் மக்களின் அவலம்!
வடமராட்சி கிழக்கில் மீள் குடியமர்வதற்குக் அழைத்துச் செல்லப்பட்ட மக்கள் தொடர்ந்தும் அப்பகுதிப் பாடசாலைகளில் அடிப்படை வசதிகளற்ற நிலையில் தங்கவைக்கப்பட்டுள்ளனர்.
வடமராட்சி கிழக்கிலிருந்து இடம்பெயர்ந்து வன்னியில் தங்கியிருந்த மக்கள் இறுதியாக முள்ளிவாய்க்காலில் இருந்து அல்லாரை நலன்புரி முகாமில் 2 வருட காலமாக தங்கியிருந்தனர்.
இம்மக்களை மீள் குடியமர்வதற்கு சனிக்கிழமை நண்பகல் ஆயத்தமாக இருக்குமாறு இராணுவத்தினரால் தெரிவிக்கப்பட்டு அன்று நள்ளிரவு 1 மணியளவில் வாகனத்தில் ஏற்றி அதிகாலை 3, 4 மணிக்கு வெற்றிலைக்கேணி பரமேஸ்வரா வித்தியாலயத்திலும் அரசினர் தமிழ் கலவன் பாடசாலையிலும் தங்கவைக்கப்பட்டுள்ளனர்.
இங்கு 418 குடும்பங்களைச் சேர்ந்த 1425 அங்கத்தவர்கள் தங்கவைக்கப்பட்டுள்ளனர்.
போக்கறுப்பு, கட்டைக்காடு, வெற்றிலைக்கேணி பகுதிகளைச் சேர்ந்த மக்களே இவ்வாறு தங்கவைக்கப்பட்டுள்ளனர்.
இம்மக்களை அப்பகுதி இராணுவத்தினர் நீண்ட நேரமாக விசாரணை மேற்கொண்டு புகைப்படம் எடுத்துக்கொண்டதாகவும் இவர்களுக்கு எவ்விதமான அடிப்படை வசதிகளும் செய்துகொடுக்கப்படவில்லை.
இம்மக்கள் இன்னும் ஓரிரு தினங்களில் அவர்களது சொந்த இடங்களுக்கு அனுப்பி வைக்கப்படுவார்கள் எனவும், அதுவரை அவர்களுக்கு சமைத்த உணவுகளைத் தாம் வழங்கவுள்ளதாக மருதங்கேணி உதவி அரசாங்க அதிபர் பணிமனை தெரிவித்துள்ளது.
****************