Monday, 4 July 2011

செய்திகள் 04/07


உறவு கொண்டாடும் அமெரிக்கா
இலங்கையுடன் அமெரிக்க அரசாங்கம் பேணிவரும் உறவுகளில் எவ்வித பாதிப்புகளும் ஏற்படமாட்டாது என அமெரிக்கா தெரிவித்துள்ளது.
இவ்விரு நாடுகளுக்குமிடையிலான புரிந்துணர்வுகள் நாளுக்கு நாள் அதிகரித்து வருகிறது என இலங்கைக்கான அமெரிக்கத் தூதுவர் பெட்ரிசியா புட்டினாஸ் தெரிவித்துள்ளார்.
அமெரிக்க சுதந்திர தினத்தை முன்னிட்டு வெளியிட்டுள்ள அறிக்கையில் அவர் இதனைத் தெரிவித்துள்ளார்.
இளைஞர் விவகாரங்களை ஊக்குவிப்பது தொடர்பில் இந்த ஆண்டு கொண்டாட்டங்களில் கூடுதல் கவனம் செலுத்தப்படும் என அவர் குறிப்பிட்டுள்ளார்.
இலங்கையின் மொத்த சனத்தொகையில் அரைவாசிக்கும் மேற்பட்டவர்கள் இளைஞர்கள் என அவர் சுட்டிக்காட்டியுள்ளார்.
பல்வேறு வழிகளில் இலங்கை இளைஞர் யுவதிகளுக்கு அமெரிக்கா உதவிகளை வழங்கி வருவதாகவும் குறிப்பிட்டுள்ளார்.
******************
தீர்வு தமிழருக்கே
தேசிய இனப்பிரச்சினைக்கு தமிழ்த் தேசியக் கூட்டமைப்பினால் ஏற்றுக் கொள்ளப்படாத எந்தவொரு தீர்வையும் தமிழ்மக்கள் ஏற்றுக் கொள்ளப் போவதில்லை என்று தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் தெரிவித்துள்ளார்.
கொழும்பு ஆங்கில ஊடகம் ஒன்றுக்கு கருத்து வெளியிட்ட போதே அவர் இவ்வாறு கூறியுள்ளார்.
தமிழ்த் தேசியக் கூட்டமைப்பு தமிழ் மக்களின் ஏகபிரதிநிதிகள் அல்ல.
ஆனால் முன்னைய தேர்தல்களின் மூலம் தமிழ்மக்கள் கூட்டமைப்பின் மீதான தமது நம்பிக்கையை வெளிப்படுத்தியுள்ளனர் எனறும் அவர் சுட்டிக்காட்டியுள்ளார்.
தமிழ்த் தேசியக் கூட்டமைப்பினால் ஏற்றுக் கொள்ளப்படாத எந்தவொரு தீர்வையும் தமிழ்மக்கள் ஏற்றுக் கொள்ளமாட்டார்கள் என்றும் அவர் கூறியுள்ளார்.
தாம் தமிழ்மக்களின் ஏக பிரதிநிதிகளாக இல்லாது போனாலும், தமிழ்மக்களின் உண்மையான பிரதிநிதிகள் என்றும் அவர்கள் தங்கள் மீது நம்பிக்கை வைத்துள்ளனர் என்றும் சுமந்திரன் மேலும் தெரிவித்துள்ளார்.
******************
மீண்டும் மரமேற தயாராகும் வேதாளம்
அரசியல் தீர்வு யோசனைகளைத் தயாரிப்பதற்கான உத்தேச நாடாளுமன்றத் தெரிவுக் குழுவில் கலந்துகொள்வதா, இல்லையா என்ற தமது உத்தியோகபூர்வ நிலைப்பாட்டை அரசியல் கட்சிகள் தெரிவிக்கவேண்டும் என்று அரசு கேட்டுக்கொண்டது.
அமைச்சரும் சபை முதல்வருமான நிமால் சிறிபால டிசில்வா இது தொடர்பாக கோரிக்கை விடுத்துள்ளார்.
அரசியல் தீர்வு தொடர்பான நாடாளுமன்றத் தெரிவுக்குழுவில் கலந்துகொள்வது தொடர்பாக எதிர்க்கட்சிகள் தெரிவித்திருக்கும் கருத்துக்களை தாம் ஊடகங்களின் வாயிலாக அறிந்ததாகவும், அநேகமாக எதிர்க்கட்சிகள் இந்தத் தெரிவுக்குழுவில் கலந்துகொள்ளப் போவதில்லை என்றே கூறியிருக்கின்றன என்றும் நிமால் சிறிபால டி சில்வா தெரிவித்துள்ளார்.
ஊடகங்களில் வெளியாகியிருக்கும் கருத்துகளைக் கொண்டு அரசு ஒரு முடிவுக்கு வர முடியாது.
தெரிவுக்குழுவில் இடம்பெறுவது தொடர்பாகத் தமது உத்தியோகபூர்வ நிலைப்பாட்டை அரசியல் கட்சிகள் நாடாளுமன்றில் தெரிவிக்கவேண்டும் என்றும் அவர் வலியுறுத்தியுள்ளார்.
தெரிவுக்குழுவை எதிர்ப்பதாக எந்தவோர் அரசியல் கட்சியும் அரசிடம் உத்தியோகபூர்வமாக அறிவிக்கவில்லை.
அவர்கள் அவ்வாறு அறிவிக்கும்வரை ஊடக அறிக்கையை மாத்திரம் வைத்துக்கொண்டு அரசு ஒரு முடிவுக்கு வராது.
அக்கட்சிகள் உடனடியாக தமது உத்தியோகபூர்வ நிலைப்பாட்டை அறிவிக்கவேண்டும் எனவும் தெரிவித்துள்ளார்.
நாடாளுமன்றத் தெரிவுக்குழுவை அமைப்பதற்கான தனது தீர்மானத்தை அரசு நாளை நாடாளுமன்றில் சமர்ப்பிக்கும் என்று தெரிவிக்கப்படுகின்றது.
இத் தெரிவுக்குழுவில் அரசைச் சேர்ந்த 31 உறுப்பினர்களும் எதிர்க்கட்சிகளைச் சேர்ந்த 12 உறுப்பினர்களுமாக 43 உறுப்பினர்கள் அடங்குவர்.
தெரிவுக்குழுவில் இடம்பெறப்போவதில்லை என்று ஜே.வி.பி. அறிவித்துவிட்டது.
தெரிவுக்குழு அமைக்கப்பட்டதன் பின்னரே இது தொடர்பாக ஒரு முடிவுக்கு வர முடியும் என்று ஐக்கிய தேசியக்கட்சி தெரிவித்துள்ளது.
தமிழ்த் தேசியக் கூட்டமைப்பு இது தொடர்பாக இன்னும் உத்தியோகபூர்வ அறிவிப்பு எதனையும் விடுக்கவில்லை.
தமது அரசியல் உயர்பீடம் இது தொடர்பாக இறுதி முடிவை எடுக்கும் என்று ஸ்ரீலங்கா முஸ்லிம் காங்கிரஸ் தெரிவித்துள்ளது.
இருப்பினும், எதிர்க்கட்சிகள் அனைத்தும் தெரிவுக்குழுவை எதிர்ப்பது போன்ற நிலைப்பாட்டை வெளிப்படுத்தி வருகின்றன என்பது குறிப்பிடத்தக்கது.
******************
பாதாள உலக குழு தலைவர் ஒருவர் சுட்டுக்கொலை
பாதாள உலகக் குழுகக்களின் பிரபல தலைவர்களில் ஒருவரான நெலுவ பிரியந்த சுட்டுக் கொல்லப்பட்டுள்ளார்.
விசேட அதிரடிப்படையினர் மீது துப்பாக்கிப் பிரயோகம் மேற்கொள்ள முயற்சித்த போதே அவர் சுட்டுக் கொல்லப்பட்டுள்ளார்.
சுமார் 25 கொலைகளுடன் தொடர்புபட்ட பாதள உலக குழுத் தலைவர்களில் ஒருவரான நெலுவ பிரியந்த நேற்றிரவு சூரியவௌ பகுதியில் வைத்து காவல்துறை விசேட அதிரடிப்படை பிரிவினராலேயே சுட்டுக்கொல்லப்பட்டுள்ளார்.
நேற்றுக்காலை கைது செய்யப்பட்ட நெலுவ பிரியந்த, விசாரணைகளை அடுத்து ஆயுதம் பதுக்கி வைக்கப்பட்டதாக அவர் கூறிய இடமான சூரியகந்த மோர்னிங்கந்த என்ற இடத்திற்கு அழைத்து செல்லப்பட்டுள்ளார்.
அங்கு சென்ற போது அங்கு மறைத்து வைக்கப்பட்ட துப்பாக்கியினால் விசேட அதிரடிப் படையினரை சுடுவதற்கு அவர் முயன்றுள்ளார்.
இதனையடுத்து விசேட அதிரடிப்படையினர் நடத்திய சூட்டுச் சம்பவத்தில் காயமுற்ற அவர், சூரியவௌ வைத்தியசாலைக்கு அழைத்துச் செல்லும் வழியில் உயிரிழந்துள்ளார்.
நெழுவ பிரியந்த பல கொலை வழக்குகளுடன், போதை பொருட் கடத்தல்களுடன் சம்பத்தப்பட்டவர் என தெரிவிக்கப்படுகிறது.
அத்துடன் மாகாண சபை உறுப்பினர் ஒருவரின் கொலை வழக்குடனும் இவர் சம்பந்தப்பட்டவர் எனத் தெரிவிக்கப்படுகிறது.
******************
தமிழ் மாணவர் புறக்கணிப்பு
ஈழத்தமிழ் மக்களின் உரிமைப் போராட்டம் எங்கிருந்துஆரம்பித்ததோ, அதற்கு எவைகள் காரணிகளாக இருந்தனவோ அந்த இடத்துக்கும் அந்தக் காரணிகளுக்கும் மீண்டும் தமிழினத்தைக் கொண்டு செல்லும் நடவடிக்கைகளை சிறிலங்கா சிங்கள அரசு ஆரம்பித்து விட்டது என தமிழ்த் தேசியக் கூட்டமைப்புத் தெரிவித்துள்ளது.
இதற்கு ஓர் உதாரணமே பல்கலைக்கழக மாணவர் அனுமதியில் தமிழ் மாணவர்களுக்கு விழுந்துள்ள அடி என தமிழ்த் தேசியக் கூட்டமைப்பின் நாடாளுமன்ற உறுப்பினரான செல்வம் அடைக்கலநாதன் தெரிவித்துள்ளார்.
பல்கலைக்கழகத்துக்குத் தமிழ் மாணவர்கள் பெருவாரியாகத் தெரிவாகிச் செல்வதனைத் தடை செய்யும் நோக்கத்தின் முதல் கட்டமாக வன்னித் தேர்தல் மாவட்டத்தில் சிறிலங்கா அரசு இந்த நடவடிக்கையை ஆரம்பித்துள்ளதாகவும் அவர் குற்றம்சாட்டினார்.
வவுனியா, மன்னார், முல்லைத்தீவு ஆகிய நிர்வாக மாவட்டங்களை உள்ளடக்கிய வன்னித் தேர்தல் மாவட்டத்திலிருந்து பல்கலைக்கழகங்களுக்கு உள்வாங்கப்பட்ட மாணவர்களின் எண்ணிக்கை இந்த வருடம் குறைக்கப்பட்டுள்ளது.
இந்த விடயம் தொடர்பில் தான் செவ்வாய்க்கிழமை பாராளுமன்றத்திலும் தெரிவிக்கவுள்ளதாகவும் அவர் குறிப்பிட்டுள்ளார்.
இந்த அனுமதி குறைப்பானது இன்று வன்னி, நாளை யாழ்ப்பாணம், மறுதினம் மட்டக்களப்பு என்று தொடர்ந்தாலும் ஆச்சரியப்படுவதற்கு இல்லை.
யுத்தம் காரணமாகப் பாரிய அழிவைச் சந்தித்த வன்னியிலேயே சிறிலங்கா அரசு இந்தப் பாரபட்சத்தை ஆரம்பித்து வைக்கிறதென்றால் ஏனைய தமிழ்ப் பகுதிகள் தொடர்பில் கூறத் தேவை என்றும் அவர் தெரிவித்தார்.
இந்தத் தீர்மானம் குறித்த முடிவுகளை மீள்பரிசீலனை செய்யுமாறு பல்கலைக்கழக மானிய ஆணைக்குழு தலைவரிடம் அவர் கோரிக்கை விடுத்துள்ளார்.
******************
தீர்வை வலியுறுத்தும் பீடாதிபதி
வடக்கில் வாழும் மக்கள் நிம்மதியாக வாழும் வகையில் அவர்கள் மீது விசேட கவனம் செலுத்தி அரசியல் தீர்வு ஒன்றை வழங்கவேண்டும் என மல்வத்தை பீடாதிபதி வேண்டுகோள் விடுத்துள்ளார்.
அரசு தமது அறிவுரைகளை உதாசீனம் செய்தால் பழைய நிலைமை மீண்டும் ஏற்படலாம் என மல்வத்த பீடாதிபதி திப்பட்டுவாவே ஸ்ரீ சித்தார்த்த சுமங்கல தேரர் தெரிவித்துள்ளார்.
மலையக மக்கள் முன்னணி அரசியல் பிரிவுத் தலைவர் வே.இராதாகிருஷ்ணன் உட்பட ம.ம.முன்னணி தூதுக்குழுவினர் சமீபத்தில் அஸ்கிரிய, மல்வத்தை பீடாதிபதிகளைச் சந்தித்துப் பேச்சு நடத்தினர்.
இதன்போதே மல்வத்த பீடாதிபதி இவ்வாறு தெரிவித்துள்ளார்.
நாட்டிலுள்ள பல்கலைக்கழகங்களை இன்று இழுத்து மூடும் நிலைமையே உருவாகியுள்ளது.
நாட்டின் பல்கலைக்கழகங்களைப் பேணிப் பாதுகாக்கத் திராணியற்றவர்கள் இன்று கட்டணம் செலுத்தி அங்கு வெளிநாட்டு மாணவர்கள் பயில்வதற்கு வாய்ப்புகளை உருவாக்க முனைந்துள்ளனர்.
மலையக மக்களின் பிரச்சினைகள் குறித்தும் தான் நன்கறிவேன் எனத் தெரிவித்த அவர் அவர்களுக்காக தானும் தலையிட்டுச் செயற்பட்டுள்ளதாகச் சுட்டிக்காட்டியுள்ளார்.
வடக்கைப் பொறுத்தவரை அந்த மக்களின் பிரச்சினைகள் இன்னமும் தீர்த்து வைக்கப்படவில்லை.
தனக்கும் வட பகுதிக்குச் செல்லச் சந்தர்ப்பம் கிடைத்தது. தான் அவர்களது பிரச்சினைகள் பற்றி அறிந்துள்ளேன் என்றும் தெரிவித்தார்.
வடக்கின் பிரச்சினை பற்றி தாம் தொடர்ச்சியாக அரசுக்கு அறிவுறுத்தி வருவதாகவும் தமது கருத்துகள் எதையும் அரச தரப்பினர் கேட்பதாக இல்லை என்றும் தெரிவித்துள்ளார்.
******************
யாழில் தொடரும் கொலைகள்
கடந்த ஆறு மாதங்களில் யாழ்ப்பாணத்தில் 30 பேர் கொலை செய்யப்பட்டுள்ளனர்.
இது போருக்குப் பின்னர் மேற்கொள்ளப்படும் மீள்கட்டுமான நடவடிக்கைகளுக்கு ஒரு கெட்டசகுனம் என்று கொழும்பு வார இதழ் ஒன்று கருத்து வெளியிட்டுள்ளது.
இதுகுறித்து கொழும்பு ஆங்கில வாரஇதழில் எழுதப்பட்டுள்ள பத்தியில் யாழ்.குடாநாட்டின் விவசாய நகரான ஆவரங்காலில் உள்ள வீட்டில் இருந்து ஜுன் 25ம் நாள் தனது உந்துருளியில் 30 வயதான பாலச்சந்திரன் சற்குணநாதன் புறப்பட்டுச் சென்றிருந்தார்.
மறுநாள் கடந்த ஞாயிற்றுக்கிழமை காலை அந்த வீட்டில் இருந்து 2 கி.மீ தொலைவில் உள்ள புத்தூரில் விளையாட்டு மைதானத்தின் கோல் கம்பம் ஒன்றில் அவரது சடலம் தொங்கிக் கொண்டிருந்தது.
அந்தச் சடலத்தில் சித்திரவதை செய்யப்பட்டதற்கான தடயங்கள் இருந்தன.
அவரது இரண்டு கைகளிலும் இருந்த நகங்கள் பிடுங்கி எடுக்கப்பட்டிருந்ததாக தனது பிரேத பரிசோதனை அறிக்கையில் சட்ட மருத்துவர் எஸ்.சிவரூபன் கூறியுள்ளார்.
நைலோன் கயிற்றால் கழுத்தில் தொங்க விடப்பட்டிருந்த அவர் தற்கொலை செய்து கொண்டதற்கான தடயங்கள் இல்லை என்றும் கூறியுள்ளார். விசாரணைகள் இன்னமும் தொடர்கின்றன.
யாழ்.குடாநாட்டில் 50ஆயிரம் படையினரும், காவல்துறையினரும் நிலை கொண்டுள்ள நிலையிலும் இதுபோன்ற சம்பவங்கள் திரும்பத் திரும்ப இடம்பெறுவது பாரிய கேள்வியை எழுப்புகிறது.
போர் முடிந்து இரண்டு ஆண்டுகள் நிறைவடைந்துள்ள நிலையிலும் அங்கு இயல்புநிலை மீள உருவாக்கப்படவில்லை.
கடந்த ஆறு மாதங்களில் குறைந்தது 30 கொலைகள் யாழ்ப்பாணத்தில் இடம்பெற்றுள்ளன. இவற்றில் நான்கு சிறிலங்கா படையினரும் அடங்குவர்.
உள்ளூராட்சிசபைத் தேர்தல்கள் இந்த மாதம் அங்கு நடக்கவுள்ளன.
அடுத்த ஆண்டு தொடக்கத்தில் வடக்கு மாகாணசபைக்கு தேர்தல் நடத்தப்படும் என்று சிறிலங்கா அதிபர் மகிந்த ராஜபக்ச அறிவித்துள்ளார்.
இந்தநிலையில் யாழ்ப்பாணத்தில் வன்முறைகள் அதிகரித்து வருவது மக்கள் மத்தியில் மேலும் அச்சத்தை உருவாக்குவதுடன், குழப்ப நிலையையும் உருவாக்கும். இது ஒன்றும் இரகசியமானது அல்ல.
இது போருக்குப் பிந்திய மீள்கட்டுமான நடவடிக்கைகளுக்கு ஒரு கெட்ட சகுனத்தை காட்டுகிறது என்று அந்தப் பத்தியில் மேலும் கூறப்பட்டுள்ளது
******************
தேர்தல் பிரச்சாரம் தீவிரம்
எஞ்சிய உள்ளூராட்சி சபைகளுக்கான தேர்தலுக்கு இன்னும் 19 நாட்களே உள்ள நிலையில் தேர்தல் நடைபெறவுள்ள பிரதேங்களில் அரசியல் கட்சிகளும் சுயேட்சை குழுக்களும் தீவிரமாக பிரசாரங்களை முன்னெடுத்து வருகின்றன.
இதன்படி யாழ்ப்பாணம், கிளிநொச்சி மாட்டங்களில் பிரசார நடவடிக்கைகளை ஆரம்பித்துள்ள ஐக்கிய மக்கள் சுதந்திரக் கூட்டமைப்பினர் இம்மாவட்டங்களில் மக்கள் சந்திப்புகளை நடத்துவதற்கு நடவடிக்கைகளை மேற்கொண்டு வருகின்றனர்.
இதேவேளை ஐக்கிய தேசியக் கட்சியின் பிரசாரக் குழுவினர் கிராமங்கள் தோறும் சென்று மக்களைத் தெளிவுபடுத்தும் நடவடிக்கைகளை முன்னெடுத்து பிரசாரங்களை மேற்கொள்கின்றனர்.
இதனிடையே மக்கள் விடுதலை முன்னணி வட மாகாணத்திலேயே தமது பிரசாரங்களைத் தீவிரமாக முன்னெடுத்துச் செல்கின்றது.
இதேவேளை, உள்ளூராட்சித் தேர்தல்கள் நடைபெறவுள்ள பிரதேசங்களில் ஒரே கட்சி வேட்பாளர்களிடையேயும் மற்றும் ஆதரவாளர்களுக்கு இடையேயும் மோதல்களும் முரண்பாடுகளும் அதிகரித்து வருவதாகத் தேர்தல்கள் கண்காணிப்பாளர்கள் தெரிவிக்கின்றனர்.
இவ்வாறான மோதல் சம்பவங்கள் குறித்து தங்களுக்கு பல முறைப்பாடுகள் கிடைக்கப்பெற்றுள்ளதாகச் சுதந்திரமானதும் சமாதானத்திற்குமான மக்கள் அமைப்பின் ஊடகப் பேச்சாளர் கீர்த்தி தென்னக்கோன் தெரிவித்துள்ளார்
******************






Sunday, 3 July 2011

செய்திகள் 03/07


பார்த்த பின்னர் என்ன செய்வார்? உறங்குவாரா? உருப்படியாக ஏதும் செய்வாரா?
அமெரிக்கா சென்றுள்ள ஐக்கிய தேசியக் கட்சித் தலைவர் ரணில் விக்கிரமசிங்கவும் ஐ.நா.செயலாளர் நாயகம் பான்கீமூனும் ஒன்றாக இருந்து இலங்கையின் கொலைக்களம் சனல் 4 ஆவணத் திரைப்படத்தை பார்வையிடுவர் என்று அறிவிக்கப்பட்டுள்ளது.
நாளை மறுதினம் பான் கீ மூனைச் சந்தித்து ரணில் பேச்சு நடத்தவுள்ளார்.
அந்த நேரத்தில் இருவரும் ஒன்றாக அமர்ந்து போர்க் குற்றங்கள் மற்றும் திகிலூட்டும் காட்சிகள் அடங்கிய இந்த ஆவணப்படத்தை பார்ப்பதற்கு ஏற்பாடு செய்யப்பட்டுள்ளது.
அமெரிக்காவில் ரணில், அரசின் உயர்மட்டத் தவைர்கள் மற்றும் பல்வேறு தரப்பினருடனும் பேச்சுக்களை நடத்தி வருகின்றார்.
விஜயத்தின் இறுதியாக நாளை மறுதினம் ஐ.நாவின் செயலாளர் நாயகம் பான் கீ மூனைச் சந்தித்து கலந்துரையாடல்களை நடத்தவுள்ளார்.
கடந்த மாதம் 15 ஆம் திகதி சனல் 4 தொலைக்காட்சி வெளியிட்ட இலங்கையின் கொலைக்களம் ஆவணப் படம் இதுவரை தாம் பார்க்கவில்லை என்று பான் கீ மூன் தெரிவித்திருந்தார் என்பது குறிப்பிடத்தக்கது.
***************
போராட்டம் வெடிக்கும் - எச்சரிக்கும் மாவை!
தமிழ் மக்களின் அபிலாஷைகளைப் பூர்த்தி செய்யக்கூடிய தீர்வு ஒன்றை வழங்க இலங்கை அரசு மறுக்குமானால் அல்லது தொடர்ந்தும் தமிழ் மக்களை ஏமாற்றுமானால் ஜனநாயக ரீதியான போராட்டம் வெடிக்கும் என மாவை சேனாதிராஜா தெரிவித்துள்ளார்..
இந்தப் போராட்டத்துக்கு இந்தியா உள்ளிட்ட சர்வதேச சமூகம் ஆதரவை வழங்கும் என்ற முழு நம்பிக்கையும் தமக்கு உண்டு எனறும் அவர் குறிப்பிட்டுள்ளார்.
தமிழ்த் தேசியக் கூட்டமைப்பின் இணைச் செயலாளரும் நாடாளுமன்ற உறுப்பினருமான மாவை சேனாதிராசா இத்தகவலைத் தெரிவித்தார்.
ஏழாலை உதயசூரியன் சனசமூக நிலைய மண்டபத்தில் இடம்பெற்ற உள்ளூராட்சிச்சபைத் தேர்தல் பிரசாரக் கூட்டத்தில் உரையாற்றுகையில் அவர் இதனைத் தெரிவித்தார்.
தமிழ் மக்களின் நிலங்கள் எழுந்தமானமாக ஆக்கிரமிக்கப்பட்டு இராணுவ முகாம்களும் இராணுவ குடியிருப்புகளும் ஆங்காங்கே அமைக்கப்படுகின்றன.
தமிழ் மக்கள் பாரம்பரியமாக மீன்பிடி தொழில் செய்த பிரதேசம், விவசாயம் செய்து வந்த நிலங்கள் இன்று சிங்கள மீனவர்களினதும் சிங்கள விவசாயிகளினதும் தொழில் செய்யும் இடங்களாக மாறி வருகின்றன.
புத்தர் சிலைகளும் சின்னங்களும் இந்து கிறிஸ்தவ மக்கள் வாழும் தமிழ்ப் பிரதேசங்களில் எழுந்தமானமாக நிறுவப்படுகின்றன.
இதனால் தமிழ் மக்களின் நிலங்கள் இராணுவ சிங்கள மயமாக்கப்பட்டு வருவது மட்டுமல்ல தமிழர்களின் மொழி மத கலாசாரங்கள் சீரழிக்கப்பட்டு வருகின்றன.
தமிழர்கள் பாரம்பரியமாக வாழ்ந்த தொடர்ச்சியான நிலப்பரப்புகள் இக் காரணங்களால் துண்டாடப்படுகின்றன.
தமிழ் மக்கள் செறிந்து பெரும்பான்மை பலத்துடன் வாழுகின்ற இடங்கள் இத்தகைய நடவடிக்கையினால் அவர்கள் தமது சொந்த நிலத்திலேயே சிறுபான்மையினராக்கப்படும் நிலை உருவாகி உள்ளது.
இத்தகைய செயல்கள் தமிழர்களது அரசியல் வேட்கையை அபிலாஷைகளை மழுங்கடித்தும் சீரழிக்கும் செயல்களாக அமைகின்றன.
தனித்தமிழ் பிரதேசங்களை கலப்பினப் பிரதேசங்களாக மாற்றியமைப்பதே அரசின் இந்த சூழ்ச்சித் திட்டமாகும்.
இதை விரைந்து தடுத்து நிறுத்த வேண்டியவர்களாக இருக்கிறோம் என்றும் தெரிவித்தார்.
இக் கூட்டத்தில் நாடாளுமன்ற உறுப்பினர்களான அ.விநாயகமூர்த்தி, சி.சிறீதரன் உட்பட பலர் உரையாற்றினர்.
***************
இனப்படுகொலைக்கான இந்திய உதவி அதிகரிப்பு!
ஸ்ரீலங்கா இராணுவத்திற்கு மேலும் உதவிகளை வழங்க இந்தியா முன்வந்துள்ளது.
இந்திய பாதுகாப்புப் படை பயிற்சி நிறுவனங்கள் இராணுவக் கல்லூரிகள் முதலியவற்றில் ஸ்ரீலங்கா இராணுவத்தினருக்கு கூடுதலான ஆசனங்களை ஒதுக்குவதற்கு இந்தியா தீர்மானித்துள்ளது.
அத்துடன் கிளர்ச்சி முறியடிப்பு அனுபவங்களையும் இந்தியா பகிர்ந்துகொள்ளவுள்ளது.
வெள்ளிக்கிழமை இந்தியாவில் முடிவுற்ற இலங்கை இந்திய இராணுவ அதிகாரிகளுக்கிடையிலான 3 நாள் பேச்சுவார்த்தையின்போது இத்தீர்மானங்கள் அறிவிக்கப்பட்டன.
மனிதாபிமான உதவிகள் மற்றும் அனர்த்த நிவாரணங்களுக்கான அனுபவ மற்றும் ஸ்தாபன கட்டமைப்பையும் இலங்கையுடன் இந்தியா பகிர்ந்துகொள்ளவுள்ளது.
இப்பேச்சுவார்த்தைகளில்ஸ்ரீலங்காவின் சார்பில் இராணுவ செயலாளர் மேஜர் ஜெனரல் எச்.சி.பி. குணதிலக்க தலைமையிலான 5 பேர் கொண்ட இராணுவ அதிகாரிகள் பங்குபற்றினர்.
இந்தியாவின் சார்பில் சர்வதேச கூட்டுறவுக்கான மேலதிக பணிப்பாளர் நாயகம் மேஜர் ஜெனரல் ஐ.பி.சி. சிங் தலைமயிலான குழுவினர் பங்குபற்றினர்.
ஸ்ரீலங்கா அதிகாரிகள் இவ்விஜயத்தின்போது இந்திய இராணுவத் தளபதி ஜெனரல் வி.கே. சிங்கையும் சந்தித்துப் பேசினர்.
***************
தொடரும் அமெரிக்க அழுத்தம் (தமிழருக்கு) தீர்வைப் பெற்றுத் தருமா?
சுதத்திரமான விசாரணைகளை முன்னெடுக்க தவறினால் சர்வதேச விசாரணைக்குத் தள்ளப்படுவது தவிர்க்க முடியாது என ரிச்சார்ட் ஆமிரேச் ரணிலிடம் தெரிவித்துள்ளார்.
அமெரிக்கா சென்றுள்ள எதிர்க்கட்சித் தலைவர் ரணில் விக்கரமசிங்க அமெரிக்க முன்னாள் பிரதி ராஜாங்கச் செயலாளர் ரிச்சர்ட் அமீட்டேஜ்யை சந்தித்துப் பேசியுள்ளார்.
இந்தச் சந்திப்பு நேற்று இடம்பெற்றதாகத் தகவல்கள் வெளியாகி உள்ளன.
ஆமிரேச் உடனான இந்தச் சந்திப்பின் போது இலங்கை அரசியல் நிலவரம் தொடர்பில் இருவரும் நீண்ட நேரம் உரையாடியதாக கொழும்புத் தகவல்கள் தெரிவிக்கின்றன.
இந்தச் சந்திப்பின்போது யுத்தத்தின்; பின்னரான இலங்கையின் அரசியல் நிலவரம் மீள்குடியேற்றப்பட்ட தமிழ் மக்களுக்கான வாழ்வாதார நிலைப்பாடு, அகதிமுகாம்களில் வாழும் மக்களின் நிலைமை மற்றும் செனல் 4 தொலைக் காட்சியின் இலங்கைக் கொலைக்களம் ஆவணக் காணொளி குறித்து கருத்துகள் பரிமாறிக் கொள்ளப்பட்டதாக தெரியவருகிறது.
சர்வதேச ரீதியாகத் சிக்கலான நிலைக்குள் தள்ளப்பட்டுள்ள இலங்கை அரசாங்கம் தன்னைக் குற்றமற்றமற்றவர் என நிரூபிக்கும் வகையில் எந்தப் பின்னடிப்புகளும் இன்றி யுத்தக் குற்றங்கள் தொடர்பிலான குற்றச்சாட்டுகள் குறித்து சுதத்திரமானதும் விரைவானதுமான விசாரணைகளை முன்னெடுக்க வேண்டும் என்று வலியுறுத்தியுள்ள அவர் அவ்வாறு இலங்கை அரசாங்கம் நடந்து கொள்ளத் தவறினால் சர்வதேச ரீதியான விசாரணைக்குத் தள்ளப்படுவது தவிர்க்க முடியாது போய்விடும் என்றும் ரணிலிடம் தெரிவித்தார் என்றும் கூறப்படுகிறது.
இதேவேளை, ரணில் விக்கிரமசிங்கவின் அமெரிக்க விஜயத்தின் நிகழச்சி நிரலுக்கு அப்பாலும் அவர் பல ராஜதந்திரிகளைச் சந்தித்து இலங்கை நிலவரம் தொடர்பில் விளக்கியுள்ளார்.
கனேடிய அரசாங்கத்தின் அமைச்சரான ஜேம்ஸ் மூரையும் அமெரிக்க காங்கிரஸின் உயர் மட்ட அதிகாரிகளையும் அவர் வாஷிங்டனில் சந்தித்துப் பேசியுள்ளார்.
சிறைவைக்கப்பட்டுள்ள முன்னாள் இராணுவத்தளபதி சரத் பொன்சேகா தொடர்பிலும் இந்தச் சந்திப்பின் போது பிரஸ்தாபிக்கப்பட்டதாகத் தெரிய வருகிறது.
இதேவேளை ரணில் விக்கிரமசிங்க பிரதமராக இருந்த சமாதான காலத்தில் அமெரிக்காவுடன் மிக நெருங்கிய உறவுகளைக் கொண்டிருந்தார்.
அப்போது முன்னாள் பிரதி ராஜாங்கச் செயலாளர் ரிச்சர்ட் அமீட்டேஜ் உடன் நட்புடையவராக இருந்தார் என்பதுடன் அப்போதைய காலத்திலேயே இராணுவ ரீதியான மிக முக்கிய ஒப்பந்தங்களை இலங்கை அமரிக்காவுடன் மேற்கொண்டது என்பதும் குறிப்பிடத்தக்கது.
***************
அடிமையாக்க முயற்சியாம் - அழுது வடிக்கும் அமைச்சர்!
போர்க்குற்றச்சாட்டுகள் உட்பட பாரதூரமான குற்றச்சாட்டுக்களை அடிப்படையாக வைத்து இலங்கையை அடிமைப்படுத்திக்கொள்ள சில நாடுகள் முயற்சித்து வருகின்றன என ஸ்ரீலங்கா அமைச்சர் தெரிவித்துள்ளார்.
எனினும் இந்தச் சதிகளுக்கு அடிபணிந்து அந்த நாடுகளிடம் மஹிந்த ராஜபக்ஷ ஒருபோதும் மண்டியிட மாட்டார் என்று பொது நிர்வாக மற்றும் உள்நாட்டலுவல்கள் அமைச்சர் டபிள்யூ.டி.ஜே. செனவிரத்ன தெரிவித்துள்ளார்.
மட்டக்களப்பு மாவட்டத்தின் வாகரை பிரதேசத்தில் 20 மில்லியன் ரூபா செலவில் புதிதாக அமைக்கப்பட்ட பிரதேச செயலகக் கட்டடத்தை வெள்ளிக்கிழமை அமைச்சர் திறந்துவைத்து உரையாற்றுகையிலேயே அமைச்சர் செனவிரத்ன இதனைக் கூறினார்.
அடுத்த ஐந்து ஆண்டுகளுக்குள் ஆசியாவிலுள்ள மிகவும் அபிவிருத்தி அடைந்த நாடுகளின் வரிசையில் இலங்கையை நிறுத்துவதே மஹிந்த ராஜபக்சவின் பிரதான இலக்காக இருக்கின்றது என்றும் தெரிவித்துள்ளார்.
இந்த இலக்கை அடைவதற்காகவே ரஷ்யா, சீனா ஆகிய நாடுகளுடன் மாத்திரமன்றி, ஏனைய உலக நாடுகளுடனும் இணைந்து செயற்பட்டு வருவதாகவும் குறிப்பிட்டுள்ளார்.
எனினும் சில மேற்குலக நாடுகள் இலங்கையை மீண்டும் அடிமைப்படுத்தி, தங்களது கட்டுப்பாட்டுக்குள் கொண்டுவர சதித்திட்டம் தீட்டி வருகின்றன.
எவ்வாறாயினும், மஹிந்த ராஜபக்ச அந்த நாடுகளிடம் ஒருபோதும் மண்டியிட மாட்டார் என்றும் தெரிவித்துள்ளார்.
***************
பிரித்தானிய நாடாளுமன்றத்தில் தமிழர் விவகாரம்
சிறிலங்காவுக்கு எதிரான ஆரம்பநாள் பிரேரணை மீதான விவாதம் ஒன்று பிரித்தானிய நாடாளுமன்றத்தில் நடத்தப்படவுள்ளது.
இதுதொடர்பான பிரேரணை பிரித்தானிய நாடாளுமன்றத்தில் சமர்பிக்கப்படவுள்ளதாக தகவல்கள் தெரிவிக்கின்றன.
இந்த விவாதம் எப்போது நடைபெறும் என்ற சரியான நாளை வெளியிட முடியாது என்று கூறியுள்ள கன்சர்வேட்டிவ் கட்சி நாடாளுமன்ற உறுப்பினர் லீ ஸ்கொட், இந்த விவாதம் பிரித்தானிய நாடாளுமன்றத்தில் நடக்கும் என்று எதிர்பார்க்கப்படுவதாகக் குறிப்பிட்டுள்ளார்.
இந்தப் பிரேரணை மீதான விவாதம் சிறிலங்காவில் உள்ள அனைவருக்கும் அமைதியையும் நீதியையும் கொண்டு வரும் என்றும் அவர் நம்பிக்கை வெளியிட்டுள்ளார்.
சிறிலங்காவுக்கு எதிரான ஆரம்பநாள் பிரேரணையைக் கொண்டு வருவதற்கு ஆதரவாக பிரித்தானியாவின் 52 நாடாளுமன்ற உறுப்பினர்களிடம் கையெழுத்துப் பெறப்பட்டுள்ளது.
சிறிலங்காவில் நீதியையும் உண்மையையும், நல்லிணக்கத்தையும் உறுதிப்படுத்துவதற்கு சுதந்திரமான அனைத்துலகப் பொறிமுறை ஒன்றை ஐ.நா உருவாக்க வேண்டும் என்று இந்தப் பிரேரணை மூலம் கேட்டுக் கொள்ளப்படவுள்ளது.
பிரித்தானிய நாடாளுமன்றத்தில் கொண்டு வரப்படும் இந்தப் பிரேரணைக்கு பெரும்பாலான லிபரல் கட்சி உறுப்பினர்களும் ஆதரவளிப்பார்கள் என்று நம்பப்படுவதாகவும் தகவல்கள் தெரிவிக்கின்றன.
***************
இழுத்தடிப்பில் இணையுமா ஐதேக?
நாடாளுமன்றத் தெரிவுக் குழுவில் இணைந்து கொள்வது குறித்து இன்னமும் தீர்மானிக்கவில்லை என ஐக்கிய தேசியக் கட்சி அறிவித்துள்ளது.
வடக்கு கிழக்கு பிரச்சினைக்கு தீர்வு வழங்காது மேலும் காலத்தை தாழ்த்துவதற்கான முயற்சியாக தாம் இதனை நோக்குவதாக ஐக்கிய தேசியக் கட்சியின் பொதுச் செயலாளர் திஸ்ஸ அத்தநாயக்க தெரிவித்துள்ளார்.
தமிழ்த் தேசியக் கூட்டமைப்பு மட்டுமன்றி ஏனைய கட்சிகளுடனும் பேச்சுவார்த்தை நடத்துவதில் தவறில்லை என அவர் சுட்டிக்காட்டியுள்ளார்.
எனினும், பேச்சுவார்த்தைகள் ஆக்கபூர்வமானதாக அமைய வேண்டுமென வலியுறுத்தியுள்ளார்.
பிரச்சினையிலிருந்து தப்பித்துச் செல்வதற்காக அரசாங்கம் இவ்வாறான முயற்சிகளை மேற்கொண்டால் அதற்கு இடமளிக்கப்படக் கூடாது என அவர் வலியுறுத்தியுள்ளார்.
***************
மீளக் குடியேற்றம் தொடர்பில் மகிந்தவின் பொய் அம்பலம்!
வடக்கில் சுமார் இரண்டு லட்சம் இடம்பெயர் மக்கள் இன்னமும் மீள் குடியேற்றப்படவில்லை என ஐக்கிய நாடுகளின் அகதிகளுக்கான முகவர் நிறுவனம் தெரிவித்துள்ளது.
சர்வதேச அகதிகள் தினத்தை முன்னிட்டு வெளியிடப்பட்ட அறிக்கையில் இந்த விடயங்கள் குறிப்பிடப்பட்டுள்ளன.
நம்பகரமான தரவு மூலங்களின் அடிப்படையில் இந்த புள்ளி விபரத் தகவல் வெளியிடப்பட்டுள்ளதாக அகதிகளுக்கான முகவர் நிறுவனத்தின் அதிகாரி எலினா பெர்ட்டெரி தெரிவித்துள்ளார்.
புத்தளம் பிரதேசத்தில் இடம்பெயர்ந்து வாழும் மக்கள் மீள் குடியேற்றப்பட்டால் இந்த எண்ணிக்கை வெகுவாக வீழ்ச்சியடையும் என எதிர்பார்க்கப்படுகிறது.
யாழ்ப்பாணத்தில் 1 லட்சத்து 2ஆயிரம் பேரும், புத்தளத்தில் 55ஆயிரத்து 400 பேரும், வவுனியாவில் 37ஆயிரம் பேரும் இன்னமும் மீள் குடியேற்றப்படவில்லை என சுட்டிக்காட்டப்படுகிறது.
மீள்குடியேறுவோருக்கு ஐக்கிய நாடுகளின் அகதிகளுக்கான முகவர் நிறுவனம் தலா 25ஆயிரம் ரூபா வழங்கி வருகின்றமை குறிப்பிடத்தக்கது.
***************

Saturday, 2 July 2011

செய்திகள் 02/07


தவறைத் தீர்மானிப்பது எப்படி?
இலங்கையில் நடைபெற்ற யுத்தத்தின் இறுதிக் கட்டத்தின் போதான தனது சொந்தச் செயற்பாடுகளை எவ்வாறு மீளாய்வு செய்வது என்பதைத் தீர்மானிப்பதற்கான பணிகள் ஆரம்பிக்கப்பட்டுள்ளதாக ஐ.நா. நேற்று தெரிவித்துள்ளது.
தமது சொந்த நடவடிக்கைகளை எப்படி மீளாய்வு செய்வது என்பதை தீர்மானிப்பதற்கான பணிகளை ஐ.நா. செயலகம் ஆரம்பித்துள்ளது.
இந்த மீளாய்வுக்கான வகைகள் குறித்து ஆராய்வதற்காக ஐ.நா.வின் பல்வேறு முகவரகங்களை செயலகத்திலுள்ள அதிகாரிகள் அணுகியுள்ளனர்.
எனவே இப்பணி ஆரம்பிக்கப்பட்டுள்ளது. ஆனால் மீளாய்வு இன்னும் ஆரம்பமாகவில்லை என ஐ.நா. செயலாளர் நாயகத்தின் பதில் பிரதிப் பேச்சாளர் பர்ஹான் ஹக் நியூயோர்க்கில் செய்தியாளர்களிடம் தெரிவித்துள்ளார்.
*****************
மகிந்த அரசு வீடு செல்ல நேரிடும்!
அமெரிக்கா மற்றும் இந்திய அரசுகள் விடுத்துள்ள வேண்டுகோளுக்கிணங்க இலங்கை அரசு விரைவில் தமிழ் மக்களுக்கான அரசியல் தீர்வை வழங்க முன்வரவேண்டும். இல்லையேல், அமெரிக்காவும், இந்தியாவும் இணைந்து மஹிந்த அரசை வீட்டுக்கு அனுப்பும் நாள் வெகு தொலைவில் இல்லை என புதிய இடதுசாரி முன்னணித் தலைவர் விக்கிரமபாகு கருணாரட்ன தெரிவித்துள்ளார்.
நாடாளுமன்ற தெரிவுக்குழுவை அமைப்பதற்குப் பிரதான எதிர்க்கட்சிகள் கடும் எதிர்ப்பைத் தெரிவித்துள்ளன.
அத்துடன், தாம் அங்கம் வகிக்கப் போவதில்லை என்றும் திட்டவட்டமாக கூறியுள்ளன.
எனினும், அரசு நாடாளுமன்ற தெரிவுக்குழுவை அமைக்கும் முயற்சியில் தொடர்ந்தும் ஈடுபட்டு வருகின்றது.
தெரிவுக்குழுவை அமைப்பதற்கான பிரேரணையை அரசு 5ஆம் திகதி நாடாளுமன்றத்தில் சமர்ப்பிக்க உள்ளது.
இந்தக் குழுவில் 31 உறுப்பினர்களை உள்ளடக்குவதற்கும் அரசு தீர்மானித்துள்ளது.
அரசிடம் அரசியல் தீர்வு ஒன்று இல்லாததன் காரணமாகவே அரசு காலத்தை இழுத்தடிக்கின்றது.
இதனை மேலும் இழுத்தடிக்கவே நாடாளுமன்றத் தெரிவுக்குழுவை அரசு நியமிக்க முனைகிறது என அரசியல் ஆய்வாளர்கள் குற்றம் சுமத்தியுள்ளனர்.
இந்நிலையில், அரசிடம் உண்மையாகவே அரசியல் தீர்வு உள்ளதா, அப்படி இருந்தால் ஏன் காலத்தை இழுத்தடிக்கின்றது, இதனால் அரசுக்கு சர்வதேச அழுத்தங்கள் ஏற்படுமா என கேட்டபோதே விக்கிரமபாகு இதனைத் தெரிவித்தார்.
தமிழ் மக்களின் இனப்பிரச்சினைக்கான தீர்வு தொடர்பில் தமிழ்த் தேசியக் கூட்டமைப்புடன் இணைந்து செயற்படுமாறே அமெரிக்கா வலியுறுத்தியுள்ளது.
அண்மையில் இலங்கை சென்ற ரொபட் ஓ பிளேக்கிடம் அரசு இது விடயம் தொடர்பில் இணங்கியது.
இந்தியாவும் இதனையே கூறியுள்ளது.
ஆனால், அரசு தற்போது தமிழ் மக்களின் ஏகப் பிரதிநிதிகள் என்று எவரும் இல்லை எனக் கூறுகின்றது.
அதனாலேயே நாடாளுமன்றத் தெரிவுக்குழுவை நியமித்து அதனூடாகத் தீர்வு வழங்கப்படும் எனக் கூறி வருகின்றது.
ஏகப் பிரதிநிதிகள் யார் என்பதை தேர்தலே தீர்மானிக்கும்.
வடக்கு, கிழக்கு மக்கள் கூட்டமைப்பினர்தான் தங்களின் ஏகப் பிரதிநிதிகள் என்பதை தங்களின் வாக்குரிமை மூலம் நிரூபித்துள்ளனர்.
உண்மையாகவே தீர்வு இருந்தால் கூட்டமைப்பினருடன் பேசி வடக்கு, கிழக்கு மக்களுக்கு அரசு அரசியல் தீர்வை வழங்க முன்வரவேண்டும். இதுவே தமிழ் மக்களின் எதிர்பார்ப்பாகும் எனவும் அவர் தெரிவித்துள்ளார்.
*****************
கொள்ளையை தடுக்க முடியாத பயங்கரவாத முறியடிப்புப் படை!
மட்டக்களப்பு மாவட்டத்தில் தற்போது இடம்பெற்று வரும் குற்றச் செயல்களுடன் அரசியல்வாதிகளுக்குத் தொடர்புள்ளதாக கிழக்கு கட்டளை தளபதி மேஜர் ஜெனரல் பொனிபஸ் பெரேரா தெரிவித்துள்ளார்.
மட்டக்களப்பில் இன்னும் சில குழுக்களிடம் ஆயுதங்கள் உள்ளன.
இந்த ஆயுதங்களை உடனடியாக ஒப்படைக்க வேண்டும். இல்லையேல் தேடி அழிப்போம் எனவும் அவர் தெரிவித்தார்.
வெள்ளிக்கிழமை காலை மட்டக்களப்பு டேர்பா மண்டபத்தில் நடைபெற்ற மட்டக்களப்பிலுள்ள வங்கி உத்தியோகத்தர்கள், தமிழ் அரசியல் கட்சிகளின் பிரதிநிதிகளுக்கான கூட்டத்தில் உரையாற்றும் போதே அவர் இதனைத் தெரிவித்தார்.
ஆயுதம் வைத்திருப்பவர்கள் தொடர்பில் தங்களுக்கு நம்கமான சில தகவல்கள் கிடைத்துள்ளன.
ஆயுதம் வைத்திருப்பவர்களை கண்டு பிடித்து அவற்றை களைந்து சட்டத்தின் முன் நிறுத்துவோம் எனவும் தெரிவித்தார்.
மட்டக்களப்பு புதூரில் இடம்பெற்ற வங்கிக்கொள்ளை சம்பவமானது தேசிய பாதுகாப்புக்கு அச்சுறுத்தல் ஏற்படுத்தப்பட்ட சம்பவமாகும் எனவும் அவர் குறிப்பிட்டார்.
*****************
மலேசிய மக்கள் சக்திக் கட்சி வேண்டுகோள்
சிறிலங்காவிலும் பலஸ்தீனத்திலும் இடம்பெற்ற போர்க்குற்றங்களுக்கு எதிராக ஐ.நா நடவடிக்கை எடுக்க வேண்டும் என்று மலேசிய மக்கள் சக்தி கட்சி வேண்டுகோள் விடுத்துள்ளது.
நேற்று கோலாலம்பூரில் உள்ள ஐ.நா பணியகத்துக்கு மூன்று பேருந்துகளில் சென்ற மலேசிய மக்கள் சக்தி கட்சியைச் சேர்ந்த உறுப்பினர்கள் இதுதொடர்பான மனுவொன்றைக் கையளித்துள்ளனர்.
கட்சியின் பொதுச்செயலர் ஆர்.கண்ணன் தலைமையிலான இந்தக் குழுவினர் மலேசியாவுக்கான ஐ.நா செயலக பாதுகாப்பு அதிகாரி தேவேந்திர பட்டேலிடம் இரண்டு பக்க மனுவைக் கையளித்தனர்.
இந்த மனுவில் சிறிலங்காவில் மகிந்த ராஜபக்ச அரசாங்கத்தினால் தமிழர்களுக்கு எதிராக மேற்கொள்ளப்பட்டுள்ள போர்க்குற்றங்கள் மற்றும் இனப்படுகொலைகள் பட்டியலிடப்பட்டுள்ளதாகவும் ஆர்.கண்ணன் தெரிவித்துள்ளார்.
சிறிலங்காவில் மோசமான மனிதஉரிமை மீறல்கள் இடம்பெற்றுள்ள அதிர்ச்சியான சாட்சியங்களை ஐ.நா அறிக்கை வெளிப்படுத்தியுள்ள நிலையில், அதன் அடிப்படையில் மகிந்த ராஜபக்ச மீதும் அவரது அரசாங்கத்தின் மீதும் அனைத்துலக குற்றவியல் நீதிமன்றில் ஐ.நா நடவடிக்கை எடுக்க முடியும் என்று அவர் மேலும் கூறியுள்ளார்.
சிறிலங்காவில் முதலீடு செய்துள்ள மூன்றாவது பெரிய நாடான மலேசியா, தமிழர்களை நியாயமாக நடத்துமாறு சிறிலங்காவுக்கு அழுத்தம் கொடுக்க வேண்டும் என்றும் ஆர்.கண்ணன் வலியுறுத்தியுள்ளார்.
போர்க்குற்றங்களுக்கு எதிரான நிலைப்பாட்டை மலேசியா எடுக்க வேண்டும் என்றும் அவர் மேலும் கேட்டுக் கொண்டுள்ளார்.
இந்த மனுவைக் கையளிக்கும் நிகழ்வில் மலேசிய மக்கள் சக்தி கட்சியின் பிரதித் தலைவர் வனெசன் மைக்கல், இளைஞர் அணி தலைவர் ராமு உள்ளிட்ட சுமார் 80 இற்கும் அதிகமானோர் கலந்து கொண்டனர்.
*****************
பதிலுக்கு காட்சி வெளியிடும் பதிலளிக்க முடியாத அரசு!
சிறிலங்காப் படையினரால் தமிழர்கள் சுட்டுப்படுகொலை செய்யப்படும் காட்சியை உள்ளடக்கிய சனல் 4 தொலைக்காட்சி ஒளிபரப்பிய காணொளியின் மூலப்பிரதி என்று கூறி சிறலங்கா பாதுகாப்பு அமைச்சு காணொளிப்பதிவு ஒன்றை வெளியிட்டுள்ளது.
சிறிலங்காவில் நேற்றிரவு சுவர்ணவாகினி தொலைக்காட்சியில் இந்தக் காணொளிப் பதிவு ஒளிபரப்பப்பட்டது.
இந்தக் காணொலி சீருடை அணிந்தவர்கள் தமிழில் உரையாடிக் கொண்டு ஆண்களையும் பெண்களையும் சுட்டுக்கொல்வது போன்ற காட்சியை உள்ளடக்கியுள்ளது.
சனல் 4 வெளியிட்ட உண்மையான காணொளிப் பதிவில் சீருடை அணிந்த சிறிலங்காப் படையினர் சிங்களத்தில் உரையாடிக் கொண்டே ஆண்களையும் பெண்களையும் சுட்டுக்கொல்வது பதிவாகியுள்ளது குறிப்பிடத்தக்கது.
இதுதொடர்பாக கருத்து வெளியிட்டுள்ள சிறிலங்கா இராணுரவப் பேச்சாளர் மேஜர் ஜெனரல் உபய மெடவெல, இதுவே மூலப்பிரதி என்றும் சிறிலங்கா பாதுகாப்பு அமைச்சு இதனை பிரித்தானியாவில் இருந்து பெற்றுக் கொண்டதாகவும் கூறியுள்ளார்.
சனல் 4 வெளியிட்ட ஆவணப்படம் போலியானது என்று கூறிவரும் சிறிலங்கா அரசாங்கம் இதுதொடர்பான குற்றச்சாட்டுகளை அடியோடு நிராகரித்துள்ளது.
சனல்4 ஆவணப்படம் அனைத்துலக ரீதியாக சிறிலங்காவுக்கு பெரும் நெருக்கடியை ஏற்படுத்தியுள்ள நிலையிலேயே போலியானதொரு காணொளிப் பதிவை வெளியிட்டு குழப்பம் ஏற்படுத்த முனைவதாக கருதப்படுகிறது.
நேற்றிரவு சுவர்ணவாகினி தொலைக்காட்சிக்கு இந்தக் காணொளியை வழங்கியுள்ள சிறிலங்கா பாதுகாப்பு அமைச்சு, அரச ஊடகங்களிலோ அல்லது பாதுகாப்பு அமைச்சின் அதிகாரபூர்வ இணையத்தளத்திலோ இதுவரை அந்தக் காணொளியை வெளியிடவில்லை என்பதும் குறிப்பிடத்தக்கது.
சிறிலங்கா அரசாங்கம் சனல் 4 காணொளிப் பதிவு போலியானது திருத்தம் செய்யப்பட்டது என்று கூறினாலும், அது உண்மையானதே என்று அனைத்துலக வல்லுனர்கள் உறுதி செய்திருப்பதாக சனல் 4 தொலைக்காட்சியும் ஐ.நாவின் உயரதிகாரிகளும் கூறியிருப்பது குறிப்பிடத்தக்கது.
*****************
சித்திரவதை தொடர்கின்றது! ஏற்றுக் கொள்ளுமா கனேடிய அரசு?
கனடாவின் குடியுரிமையை பெற்ற இலங்கை தமிழர் ஒருவர் இலங்கையின் சிறையில் சித்திரவதை செய்யப்பட்டதாக தெ நெசனல் போஸ்ட் செய்தி வெளியிட்டுள்ளது.
சுமார் 3 ஆண்டுகளாக 40 வயதான ரோய் மனோஜ்குமார் சமாதானம் என்பவர் இலங்கை சிறையில் வைக்கப்பட்டிருந்தார்.
இந்தநிலையில் தாம் ஆயுதம் கடத்தியதாக பொய்யான வாக்குமூலம் வழங்கும் வரை சித்திரவதை செய்யப்பட்டதாகவும் பயமுறுத்தப்பட்டதாக அவர் குறிப்பிட்டுள்ளார்.
தற்போது கனடாவுக்கு திரும்பியுள்ள அவர், தாம் இலங்கையில் மூன்று இடங்களுக்கு அழைத்து செல்லப்பட்டு அடைக்கப்பட்டதாக குறிப்பிட்டுள்ளார்.
தாம் மிகமோசமான முறையில் இலங்கையின் பயங்கராத தடுப்பு பிரிவினரால் நடத்தப்பட்டதாக அவர் குறிப்பி;ட்டுள்ளார்.
இலங்கை அரசாங்கம், அதன் மேல் சுமத்தப்பட்டுள்ள போர்க் குற்றச்சாட்டுக்களை நிராகரித்து வருகிறது.
எனினும் அந்த நாட்டின் சிறைகளில் சித்திரவதைகள் இடம்பெறுவதற்கு தாம் ஒரு சாட்சி என்று மனேஜ்குமார் குறிப்பிட்டுள்ளார்.
இலங்கையின் பயங்கரவாத தடுப்புபிரிவினர் தமிழ் வர்த்தகர்களிடம் கப்பம் பெறுகின்றனர்.
அத்துடன் பணம் பறிப்பதற்காக எப்போது பயங்கரவாத தடுப்பு பிரிவில் 50 பேர் வரை தடுத்து வைக்கப்பட்டு விசாரணை செய்யப்படடு வருகிறார்கள் என்றும் மனோஜ்குமார் தெரிவித்துள்ளார்.
*****************
தீர்வைக் குழப்பத் தீர்மானம்!
தேசிய இனப்பிரச்சினைக்கு தீர்வு காணும் நோக்கில் நாடாளுமன்றத் தெரிவுக் குழு அமைக்கப்பட வேண்டும் என்ற யோசனைத் திட்டத்திற்கு ஸ்ரீலங்கா சுதந்திரக் கட்சி பூரண ஆதரவளிக்கும் என தெரிவிக்கப்படுகிறது.
இந்த யோசனைத் திட்டத்திற்கு பூரண ஆதரவளிப்பது என கட்சி உறுப்பினர்கள் ஏகமனதாகத் தீர்மானித்துள்ளனர்.
நாடாளுமன்றத் தெரிவுக் குழுவிற்காக விசேட குழுவொன்றை நியமிப்பது குறித்தும் கவனம் செலுத்தப்பட்டுள்ளது.
மஹிந்த ராஜபக்ஷ தலைமையில் ஸ்ரீலங்கா சுதந்திரக் கட்சியின் மத்திய செயற்குழுக் கூட்டம் நடைபெற்ற போது இந்தத் தீர்மானங்கள் எடுக்கப்பட்டுள்ளன.
*****************
பாதுகாப்புக் கோரும் பாதுகாப்பற்றோர்!
உயிரச்சுறுத்தலை எதிர்கொண்டுள்ள சுதந்திர வர்த்தக வலய ஊழியர்களுக்குப் போதுமான பாதுகாப்பை வழங்குமாறு கோரி அரசியல்கட்சிகளின் கூட்டு ஆர்ப்பாட்டமொன்று நடைபெறவுள்ளது.
தனியார் ஓய்வூதியச் சட்டத்திற்கு எதிராக அண்மையில் கட்டுநாயக்க சுதந்திர வர்த்தக வலயத்தில் நடைபெற்ற ஆர்ப்பாட்டங்களின் பின்னணியில் செயற்பட்ட முக்கியஸ்தர்கள் என்ற சந்தேகத்தின் பேரில் சுமார் ஐநூறு வரையான ஊழியர்கள் தற்போது உயிரச்சுறுத்தலை எதிர்கொண்டுள்ளனர்.
அதன் காரணமாக அவர்கள் அனைவரும் ஒன்றிணைந்து எழுத்து வடிவ ஆவணமொன்றில் கையொப்பமிட்டு, தங்கள் பாதுகாப்பை உறுதிப்படுத்துமாறு கோரி முறைப்பாடொன்றைச் செய்துள்ளனர்.
எனவே அவர்களைப் பாதுகாக்கும் விடயத்தில் இலங்கை மனித உரிமைகள் ஆணைக்குழுவைத் தலையிடக் கோரும் விசேட மகஜர் ஒன்றை அரசியல் கட்சிகளின் கூட்டமைப்பு மனித உரிமைகள் ஆணைக்குழுவிடம் கையளித்துள்ளது.
ஐக்கிய தேசியக்கட்சி, புதிய இடதுசாரி முன்னணி, ஐக்கிய சோசலிஷ முன்னணி ஆகிய கட்சிகளும் சுதந்திரத்திற்கான மேடை அமைப்பும் ஒன்றிணைந்தே பிரஸ்தாப அரசியல் கட்சிக் கூட்டணி உருவாக்கப்பட்டுள்ளமை குறிப்பிடத்தக்கது.
*****************


Friday, 1 July 2011

செய்திகள் 01/07


விரைந்து விசாரிக்க கோரிக்கை
போர்க்குற்றச்சாட்டுகளை விசாரிக்க சிறிலங்கா அரசாங்கம் அதிக காலம் எடுத்துக் கொள்ளக் கூடாது என்று கூறியுள்ள ஐ.நா மனித உரிமைகள் ஆணையாளர் நவிபிள்ளை, நம்பகமான விசாரணையை முன்னெடுக்கத் தவறினால் அனைத்துலக நடவடிக்கைக்கு வழிவகுக்கும் என்றும் எச்சரித்துள்ளார்.
குற்றச்சாட்டுகள் தொடர்பாக சிறிலங்கா தீவிரமாக விசாரிக்க வேண்டும் என்று ஐ.நா மனிதஉரிமைகள் பேரவையின் உறுப்பு நாடுகள் மத்தியில் வலுவான எதிர்பார்ப்பு இருப்பதாகவும் அவர் மேலும் கூறியுள்ளார்.
சிறிலங்காவில் முன்னர் நடத்தப்பட்ட உள்ளக விசாரணைகள் முழுமை பெறாமல் தோல்வியடைந்ததாகவும் அவர் சுட்டிக்காட்டியுள்ளார்.
அத்தகைய விசாரணை அறிக்கைகள் பகிரங்கமாக வெளியிடப்படவில்லை என்றும், ஒருவருக்கேனும் தண்டனையை கொடுக்கப்படவில்லை என்றும் ஐ.நா மனிதஉரிமைகள் ஆணையாளர் குற்றம்சாட்டியுள்ளார்.
அதுபோன்றே மீண்டும் நடந்தால், அனைத்துலக சமூகத்தின் தலையீட்டின் மூலம் மேலதிக நடவடிக்கை எடுக்கப்படும் என்று எச்சரித்துள்ள நவிபிள்ளை, ஐ.நா மனிதஉரிமைகள் பேரவை இந்த விவகாரத்தில் தீவிரமாகச் செயற்படும் என்று தான் உறுதியாக நம்புவதாகவும் கூறியுள்ளார்.
போர்க்குற்றங்கள் தொடர்பாக சிறிலங்கா விரைவான விசாரணைகளை நடத்த வேண்டும் என்று கடந்த செவ்வாயன்று அமெரிக்கா வலியுறுத்தியிருந்த நிலையிலேயே, ஐ.நா மனித உரிமைகள் ஆணையாளரின் இந்த எச்சரிக்கை வெளிவந்துள்ளது.
**************
தமிழ் மக்களின் ஏகப் பிரதிநிதிகளாக மாறத்துடிக்கும் அரசு!
அரசாங்கமோ அரசுத் தலைவரோ தமிழ் மக்களின் ஏகப் பிரதிநிதியாக எவரையும் ஏற்றுக் கொள்ளவில்லை என ஸ்ரீலங்கா அமைச்சர் தெரிவித்துள்ளார்.
சகலரும் மக்கள் பிரதிநிதிகள் என்பதாலேயே இனப்பிரச்சினைத் தீர்வுக்காக பாராளுமன்றத் தெரிவுக்குழுவொன்றை நியமிக்கத் தீர்மானிக்கப்பட்டுள்ளதாக ஐக்கிய மக்கள் சுதந்திர முன்னணியின் பொதுச் செயலாளர் அமைச்சர் சுசில் பிரேம்ஜயந்த் தெரிவித்தார்.
கொழும்பில் நேற்று நடைபெற்ற அமைச்சரவைத் தீர்மானத்தை அறிவிக்கும் செய்தியாளர் மாநாட்டில் இது தொடர்பில் தெளிவுபடுத்திய அமைச்சர், 2009 மே மாதத்திற்கு முன்பிருந்த நிலை நாட்டில் இன்றில்லை. மாற்றங்கள் இடம்பெற்றுள்ளன எனத் தெரிவித்தார்.
இத்தகைய சூழலில் பாராளுமன்றத் தெரிவுக்குழு ஒன்றின் மூலம் சிறந்த தீர்வொன்றைப் பெற்றுக் கொடுக்க முடியும் என்ற நம்பிக்கை அரசாங்கத்திற்கு உள்ளது எனவும் அமைச்சர் தெரிவித்தார்.
அமைச்சரவை முடிவுகளைத் தீர்மானிக்கும் செய்தியாளர் மாநாடு பதில் அமைச்சரவைப் பேச்சாளர் அநுர பிரியதர்ஷன யாப்பாவின் தலைமையில் நேற்று தகவல் திணைக்களத்தில் நடைபெற்றது.
இம் மாநாட்டில் கலந்து கொண்டு கருத்து தெரிவித்த அமைச்சர் சுசில் பிரேம் ஜயந்த் மேலும் கருத்து தெரிவிக்கையில், தற்போது பயங்கரவாதம் இல்லை. சகலரும் சுதந்திரமாக கருத்துத் தெரிவிக்கக்கூடிய நிலை உள்ளது.
இனப்பிரச்சினைக்கான தீர்வு தொடர்பில் அரசாங்கம் அதன் கருத்துக்களையும் யோசனைகளையும் முன்வைக்கும்.
அதே போன்று பாராளுமன்றத்தில் அங்கம் வகிக்கும் சகல கட்சிகளும் மக்கள் பிரதிநிதிகளும் தமது கருத்துக்களையும் யோசனைகளையும் சுதந்திரமாக தெரிவிக்க முடியும் எனத் தெரிவித்துள்ளார்.
குழப்பமான தேர்தல்களை நடத்தி தமிழ் மக்களின் வாக்குகளைச் சூறையாடி அரைகுறைத் தீர்வையும் திணித்து தமிழ் மக்களையும் சர்வதேச சமூகத்தையும் ஏமாற்ற முனையும் ஸ்ரீலங்கா அரசாங்கத்தின் திட்டம் நேற்றைய அமைச்சரவை முடிவுகளை அறிவிக்ககும் மகாநாட்டில் அம்பலமாகியுள்ளது என அவதானிகள் சுட்டிக்காட்டியுள்ளனர்.
**************
அமெரிக்காவில் ரணில்
அமெரிக்காவிற்கான விஜயத்தை மேற்கொண்டுள்ள எதிர்கட்சித் தலைவர் ரணில் விக்கிரமசிங்க, அமெரிக்க ராஜாங்க திணைக்களத்தின் தெற்கு மற்றும் மத்திய ஆசிய நடவடிக்கை காரியாலயத்திற்கான பிரதி துணை செயலாளர் பேராசிரியர் அலிசியா அயர்சை சந்தித்துள்ளார்.
இருவருக்கும் இடையிலான கலந்துரையாடல் நேற்று இடம்பெற்றுள்ளது.
இதன்போது, இலங்கையின் சமகால அரசியல் நடவடிக்கைகள் குறித்து எதிர்கட்சித் தலைவர், பேராசிரியர் அலிசியா அயர்சுக்கு விளக்கமளித்துள்ளார்.
இதேவேளை, அண்மையில் கட்டுநாயக்கவில் இடம்பெற்ற சம்பவங்கள் மற்றும், சனல்4 தொலைக்காட்சியில் ஒளிபரப்பான ஆவணப்படம் தொடர்பிலும் இருதரப்பினரும் கருத்துக்களை பறிமாறிக்கொண்டதாக தெரிவிக்கப்பட்டுள்ளது.
இதேவேளை, ஐக்கிய தேசிய கட்சித் தலைவர் ரணில் விக்கிரமசிங்க, ஐக்கிய நாடுகள் சபையின் செயலாளர் நாயகம் பான் கீ மூனை எதிர்வரும் 5ஆம் திகதி சந்தித்து கலந்துரையாடவுள்ளார்.
இந்த சந்திப்பு நியூயோர்க்கில் நடைபெறவுள்ளதாக இன்னர் சிற்றி பிரஸ் தெரிவித்துள்ளது
**************
அமெரிக்காவிற்கு பதில் வழங்க முடியாது - அடம்பிடிக்கும் அமைச்சர்
போர்க்குற்ற குற்றச்சாட்டுக்கள் தொடர்பான அமெரிக்க இராஜாங்க திணைக்களத்தின் எச்சரிக்கைக்கு அரசாங்கம் பதில் வழங்க வேண்டிய அவசியம் இல்லையென சிறீலங்கா அமைச்சர் கெஹெலிய ரம்புக்வெல குறிப்பிட்டுள்ளார்.
சர்வதேச அழுத்தங்கள் எதற்கும் சிறீலங்கா அரசாங்கம் அடிபாணியாதென அரச அதிபர் மஹிந்த ராஜபக்ச தெளிவாக கூறிவிட்ட நிலையில் மீண்டும் மீண்டும் ஆலோசனை வழங்குவது, எச்சரிக்கை செய்வது போன்ற அறிக்கைகள் வெளியிடுவதை அமெரிக்கா போன்ற நாடுகள் தவிர்க்க வேண்டுமென அமைச்சர் கூறியிருக்கின்றார்.
சிறீலங்காவில் புரியப்பட்ட போர்க்குற்றங்கள் குறித்து அரசு விரைவில் நடவடிக்கை எடுக்காவிட்டால், சர்வதேச ரீதியாக நடவடிக்கை எடுக்கப்படவேண்டுமென்ற அழுத்தம் அதிகரிக்குமென அமெரிக்க இராஜாங்கத் திணைக்களம் தெரிவித்திருந்தது.
இது தொடர்பாக ஊடகங்களுக்கு கருத்து வெளியிட்ட அமைச்சர் கெஹெலிய ரம்புக்வெல, சிறீலங்கா படையினர் குற்றம் புரிந்திருந்தால் அதற்கு எதிராக சட்ட நடவடிக்கை எடுக்க வேண்டியது சிறீலங்கா அரசாங்கத்தின் பொறுப்பெனவும், படையினர் மீது விசாரணை நடத்துமாறு கூட சர்வதேச நாடுகள் அழுத்தம் கொடுக்க முடியாதெனவும் குறிப்பிட்டார்.
ஐக்கிய நாடுகள் அமைப்பில் அங்கம் வகிக்கும் நாடுகள் அனைத்துக்கும் ஒரேமாதிரியான நடைமுறை பின்பற்றப்பட வேண்டுமெனவும், பெரிய நாடுகள் சிறிய நாடுகள் மீது தமது பலத்தை பிரயோகிப்பதை யாராலும் ஏற்க முடியாதெனவும் சிறீலங்கா அமைச்சர் கெஹெலிய ரம்புக்வெல மேலும் குறிப்பிட்டார்.
**************
மனித உரிமை மீறலை கவனிக்க நேரமற்ற ஐநா செயலர்!
சனல்4 தொலைக்காட்சி வெளியிட்டுள்ள சிறிலங்காவின் கொலைக்களங்கள் ஆவணப்படத்தை நேரம் கிடைக்கும் போது ஐ.நா பொதுச்செயலர் பான் கீ மூன் பார்வையிடுவார் என்று அவரது பதில் பிரதிப் பேச்சாளர் பர்ஹான் ஹக் தெரிவித்துள்ளார்.
இந்த ஆணவப்படத்தை பான் கீ மூன் பார்வையிட்டாரா என்று எழுப்பப்பட்ட கேள்வி ஒன்றுக்குப் பதிலளிக்கையிலேயே பர்ஹான் ஹக் இவ்வாறு கூறியுள்ளார்.
இந்த ஆவணப்படத்தை ஐ.நா பொதுசெயலருடன் பகிர்ந்து கொண்டுள்ளதாகக் குறிப்பிட்ட ஹக், நேரம் கிடைக்கும் போது அவர் அதைப் பார்வையிடுவார் என்று எதிர்பார்ப்பதாகவும் குறிப்பிட்டுள்ளார்.
**************
வடக்கில் சிவில் நிர்வாகம் வேண்டும்!
வடக்கில் சிவில் நிர்வாகம் ஏற்படுத்தப்பட வேண்டும் என ஜே.வி.பி கட்சி வலியுறுத்தியுள்ளது.
வடக்கு கிழக்கில் இன்னமும் முழுமையாக சிவில் நிர்வாகம்ஏற்படுத்தப்படவில்லை எனவும் இராணுவத்தினரே நிர்வாகம் மேற்கொண்டு வருவதாகவும் ஜே.வி.பிநாடாளுமன்ற உறுப்பினர் அனுரகுமார திஸாநாயக்க தெரிவித்துள்ளார்.
போர் நிறைவடைந்து இரண்டு ஆண்டுகள் கடந்துள்ள நிலையிலும் தொடர்ந்தும் வடக்கு கிழக்கில் இராணுவத்தினர் நிலை நிறுத்தப்பட்டிருப்பது மக்களின் இயல்பு வாழ்க்கைக்கு பெரும் இடையூறாக அமைந்துள்ளது என சுட்டிக்காட்டியுள்ளார்.
இராணுவத்தினரின் நடவடிக்கைகளினால் பிரதேசத்தில் மீண்டும் குழப்பங்கள் ஏற்பட வாய்ப்பு இருப்பதாக அவர் எச்சரிக்கை விடுத்துள்ளார்.
வடக்கு கிழக்கில் தாக்குதல்கள் அச்சுறுத்தல்கள் மிரட்டல்கள் போன்ற சம்பவங்களின் எண்ணிக்கை உயர்வடைந்துள்ளதாகக் குறிப்பிட்டுள்ளார்.
இந்த நிலைமைகள் குறித்து அரசாங்கம் தெளிவுடன் செயற்படாவிட்டால் அனர்த்தங்கள் ஏற்படக் கூடுமென எச்சரிக்கை விடுத்துள்ளார்.
**************
முஸ்லீம்களின் கோரிக்கை!
தமிழ்த் தேசியக் கூட்டமைப்புக்கும் அரசாங்கத்துக்குமிடையில் நடைபெற்று பெற்று வரும் பேச்சுவார்த்தைகளில் ஸ்ரீலங்கா முஸ்லிம் காங்கிரஸ{ம் ஒரு தரப்பாகக் கலந்து கொள்ள வேண்டுமென்பதே அவர்களின் கோரிக்கையாக இருந்தால் அதனை ஏற்றுக் கொள்ள முடியாது என சிவாஜிலிங்கம் தெரிவித்துள்ளார்.
அவ்வாறு கலந்து கொள்வதன் மூலம் மனத்தடைகளையே தோற்றுவிக்கும் என டெலோ இயக்கத்தின் அரசியல் தலைவரும் முன்னாள் நாடாளுமன்ற உறுப்பினருமான எம். கே. சிவாஜிலிங்கம் தெரிவித்துள்ளார்.
தற்போது அரசு- கூட்டமைப்பு நடத்தி வரும் பேச்சுவார்த்தைகளில் தாமும் பங்கு கொள்ள வேண்டுமென ஸ்ரீலங்கா முஸ்லிம் காங்கிரஸ் வலுவான கோரிக்கையை முன்வைத்துள்ளது.
இந்த விடயம் தொடர்பில் கருத்துக் கூறுகையிலேயே சிவாஜிலிங்கம் இவ்வாறு தெரிவித்துள்ளார்.
ஸ்ரீலங்கா முஸ்லிம் காங்கிரஸ் அரசாங்கத்துடன் சேர்ந்து செயற்படும் ஒரு கட்சி.
இந்த நிலையில் அவர்களும் பேச வேண்டுமானால் அரசாங்கத்துடன் நேரடியாகவோ மறைமுகமாகவோ அல்லது தமிழ்த் தேசியக் கூட்டமைப்புக்குச் சமாந்திரமாகவோ பேசிக் கொள்ளலாம்.
இந்த விடயத்தில் தாம் தடையாக இருக்கப் போவதில்லை. ஆனால், தற்போது இடம்பெற்று வரும் பேச்சுவார்த்தைகளில் தாமும் ஒரு தரப்பாகக் கலந்து கொள்ள வேண்டுமென்று அடம்பிடித்தால் அது மனத்தடைகளையே தோற்றுவிக்கும் எனவும் சுட்டிக்காட்டியுள்ளார்.
தற்போது இடம்பெற்று வரும் பேச்சுவார்த்தைகளில் தமிழ் மக்களின் தாயகத்துக்கு என்ன கொடுப்பது என்று பேசப்பட்டுத் தீர்மானிக்கப்படுமாயின் அதில் முஸ்லிம்களுக்கு என்ன பங்கு கொடுப்பது என்பது பற்றி முஸ்லிம் காங்கிரசுடனும் பேசித்தான் முடிவெடுக்கப்படும்.
வடக்கு, கிழக்கு தமிழ் பேசும் மக்கள் தாயகம் என்ற கோட்பாட்டின் அடிப்படையில் முஸ்லிம்களுக்கும் அனைத்து உரிமைகளும் உண்டு.
அவர்களைக் குறைத்து மதிப்பிட முடியாது. அத்துடன் முஸ்லிம்களின் சம்மதம் இல்லாமல் ஒருபோதும் இணைந்த வட,கிழக்கையும் பெறமுடியாது.
எது எவ்வாறெனினும் இறுதித் தீர்வு என்று ஒன்று எட்டப்படுமானால் அது முஸ்லிம் மக்களின் அபிலாஷைகளையும் உள்ளடக்கியதாகவே அமையும் எனவும் அவர் தெரிவித்துள்ளார்.
**************