Tuesday, 12 July 2011

செய்திகள் 12/07

தொடரும் இந்திய மௌனம்!
சிறிலங்காவின் கொலைக்களங்கள் ஆவணப்படம் இந்தியத் தொலைக்காட்சியல் ஒளிபரப்பாகி நான்கு நாட்களாகி விட்ட பின்னரும், இந்த மனிதஉரிமை மீறல்கள் தொடர்பாக இந்திய அரசாங்கம் எந்தக் கருத்தையும் வெளியிடவில்லை என்று இந்திய ஊடகமான இந்தியா ருடே தகவல் வெளியிட்டுள்ளது.
தமிழர்களுக்கு எதிராக சிறிலங்கா இராணுவம் நிகழ்த்திய கொடூரங்கள் குறித்த சாட்சியங்களை ஹெட்லைன்ஸ் ருடே தொலைக்காட்சி ஒளிபரப்பாகி நான்கு நாட்களாகி விட்டன.
ஆனாலும் இந்தியா தொடர்ந்து இதுபற்றி மௌனம் சாதித்து வருவதாகவும் இந்தியா ருடே குற்றம்சாட்டியுள்ளது.
அதேவேளை, இவை விடுதலைப் புலிகளால் இழைக்கப்பட்டவை என்று சிறிலங்கா கூறியுள்ளது என்றும் அந்த ஊடகம் தெரிவித்துள்ளது.
சனல்- 4 தொலைகாட்சி ஒளிபரப்பிய சிறிலங்காவின் கொலைக்களங்கள் என்ற- மனிதகுலத்துக்கு எதிரான குற்றங்களின் சாட்சியான- ஆவணப்படத்தை ஹெட்லைன்ஸ் ருடே தொலைக்காட்சி கடந்த வியாழக்கிழமை ஒளிபரப்பியது.
இரண்டு ஆண்டுகளுக்கு முன்னர் தமிழ்ப் போராளிகளுக்கு எதிராக சிறிலங்கா படைகளால் நடத்தப்பட்ட போரின்போது போர்க்குற்றங்கள் நிகழ்ந்துள்ளதை இந்த ஆவணப்படத்தில் இடம்பெற்றுள்ள காட்சிகள் உறுதி செய்வதாகவும் 'இந்தியா ருடே' தெரிவித்துள்ளது.
ஆனாலும் இநதிய வெளிவிவகார அமைச்சு இதுபற்றிக் கருத்து வெளியிடுவதைத் தவிர்த்து வருகிறது.
இந்திய வெளிவிவகாரச் செயலர் நிருபமா ராவிடம் இது குறித்துக் கேட்டபோது அவர், இந்த விவகாரம் குறித்து தான் கருத்து வெளியிடப் போவதில்லை என்று கூறிவிட்டார் என்றும் இந்தியா ருடே மேலும் தகவல் வெளியிட்டுள்ளது.
*******************
பாதுகாப்பு வேண்டும்?
உள்ளூராட்சி சபைத்தேர்தலில் யாழ்ப்பாணம் கிளிநொச்சி முல்லைத்தீவு மாவட்டங்களில் போட்டியிடும் தமிழ்த்தேசிய கூட்டமைப்பு வேட்பாளர்களுக்கு உரிய பாதுகாப்பு வழங்க நடவடிக்கை எடுக்கப்படும் என்று தேர்தல்கள் ஆணையாளர் மஹிந்த தேசப்பிரிய தமிழ் தேசிய கூட்டமைப்பிடம் உறுதியளித்துள்ளார்.
தமிழ் தேசியகூட்டமைப்பு வேட்பாளர்கள் படையினராலும் ஆயுதக்குழுக்களினாலும் அச்சுறுத்தப்படுகின்றமை தொடர்பாக தமிழ் தேசியக் கூட்டமைப்பு செய்த முறைப்பாட்டுக்கு தேர்தல்கள் ஆணையாளர் பதிலளித்திருப்பதாக கூட்டமைப்பு பாராளுமன்ற உறுப்பினர் சுமந்திரன் தெரிவித்துள்ளார்.
உள்ளுராட்சி சபைத்தேர்தல்கள் சுதந்திரமாகவும் நீதியாகவும் இடம்பெற தேர்தல்கள் திணைக்களம் நடவடிக்கை எடுக்கும் என்றும் வேட்பாளர்களை அச்சுறுத்தும் நபர்கள், குழுக்கள் கைது செய்யப்பட்டு சட்டத்தின் முன் நிறுத்தப்படுவார்கள் எனவும் ஆணையாளர் உறுதியளித்துள்ளதாக சுமந்திரன் கூறியுள்ளளார்.
வடபகுதியில் போட்டியிடும் அரசதரப்பு வேட்பாளர்கள் அல்லாத ஏனைய கட்சி வேட்பாளர்கள் அச்சுறுத்தப்படுகின்றமை தொடர்பாக ஐக்கியதேசிய கட்சி, ஜே.வி.பி ஆகிய கட்சிகளும் தேர்தல்கள் ஆணையாளரிடம் முறைப்பாடு செய்துள்ளமை குறிப்பிடத்தக்கது.
*******************
யார் மக்களின் உண்மையான பிரதிநிதிகள்?
வடக்கில் மக்களை அச்சுறுத்தி கூட்டமைப்புக்கு வாக்களிக்க விடாமல் தடுத்து, தமிழ் மக்களின் ஏகப் பிரதிநிதிகள் தொடர்பான மாயையை உருவாக்க அரசு முயற்சிக்கின்றது.
பின்னர் இவர்களுடன் பேச்சு நடத்தி அரசுக்குத் தேவையான தீர்வைத் தமிழ் மக்கள் மீது திணிப்பதே அரசின் நோக்கம் என்று புதிய இடதுசாரி முன்னணியின் தலைவர் விக்கிரமபாகு கருணாரட்ன தெரிவித்தார்.
இது தொடர்பாக அவர் மேலும் தெரிவிக்கையில், வடக்கில் தமிழ்த் தேசியக் கூட்டமைப்புக்கு எதிராகத் தொடர்ந்தும் திட்டமிட்டபடி வன்முறைச் சம்பவங்கள் கட்டவிழ்த்து விடப்படுகின்றன.
இதனை தாம் வன்மையாகக் கண்டிப்பதாக தெரிவித்துள்ளார்.
இதற்கு எதிர்ப்புத் தெரிவித்து தாம் தெற்கில் மாபெரும் ஆர்ப்பாட்டம் ஒன்றை முன்னெடுக்கவுள்ளதாகவும் குறிப்பிட்டார்.
ஜனநாயக மக்கள் முன்னணி, நவசமசமாஜக் கட்சி, தமிழ்த் தேசியக் கூட்டமைப்பு ஆகியன இதில் பங்கேற்கும்.
அரசுக்கும் தமிழ்த் தேசியக் கூட்டமைப்புக்கு இடையில் இனப் பிரச்சினைக்கு அரசியல் தீர்வு காண்பது தொடர்பாக நடைபெற்றுவரும் பேச்சுகளை திசை திருப்பும் முயற்சியில் அரசு ஈடுபட்டுள்ளது.
வடக்கு, கிழக்கு மக்களுக்கு அந்தப் பிரதேச மக்களின் நம்பிக்கையை வென்ற கட்சி என்ற அடிப்படையில் கூட்டமைப்புடன் பேசியே அரசியல் தீர்வை அரசு வழங்கவேண்டும் என சர்வதேசம் கூறியுள்ளது.
இதனைத் தடுத்து நிறுத்தும் முயற்சியில் அரசு ஈடுபட்டுள்ளது.
நடைபெறவுள்ள தேர்தலில் வடக்கு மக்களின் வாக்குகளைப் பலவந்தமாகப் பறித்து, கூட்டமைப்பின் அரசியல் செல்வாக்கைச் சீர்குலைத்து, அவர்கள் ஏகப் பிரதிநிதிகள் அல்லர் என்பதை எடுத்துக் காட்டுவதே அரசின் நோக்கமாக உள்ளது.
அதற்காகவே கூட்டமைப்புக்கு எதிராகத் தொடர்ந்தும் வன்முறைச் சம்பவங்கள் கட்டவிழ்த்து விடப்பட்டுள்ளன.
இவ்வாறு அரசு வாக்குகளைக் கொள்ளையடித்துக் கொண்டு, தமிழ் மக்களின் ஏகப் பிரதிநிதிகள் கூட்டமைப்பினர் அல்லர், அப் பிரதேச மக்கள் தங்களுக்கும் வாக்களித்துள்ளனர் என சர்வதேசத்துக்குக் கூற முயற்சிக்கின்றது எனவும் சுட்டிக்காட்டியுள்ளார்.
*******************
மக்களை அச்சுறுத்தும் அரசு!
வடக்கில் தொடர்ச்சியாக இடம்பெற்றுவரும் தேர்தல் வன்முறைச் சம்பவங்களால் தேர்தல் பிரசாரக் கூட்டங்களில் கலந்துகொள்வதற்கு மக்கள் அஞ்சுகின்றனர்.
எனவே, வடக்கில் அரசியல் சுதந்திரத்தை நிலைநாட்டி நீதியானதும், நியாயமானதுமான தேர்தலை நடத்துவதற்கு வழிசமைத்துக் கொடுக்க வேண்டியது அரசின் கடமை என்று நீதியானதும், நியாயமானதுமான தேர்தல்களுக்கான மக்கள் இயக்கமான கபே அமைப்பின் நிறைவேற்றுப்பணிப்பாளர் கீர்த்தி தென்னக்கோன் தெரிவித்துள்ளார்.
உள்ளூராட்சி சபைத் தேர்தல் நடவடிக்கைகளைக் கண்காணிப்பதற்காக வடக்கின் பல பகுதிகளுக்கு கபே அமைப்பினர் விஜயம் செய்தனர்.
அப்பிரதேசங்களின் நிலைமைகள் தொடர்பாகக் கருத்து வெளியிடும்போதே அவர் இதனைத் தெரிவித்தார்.
குறிப்பாக வடக்கு மக்கள் தேர்தல் நடவடிக்கைகளில் ஆர்வம் காட்ட அஞ்சுகின்றனர்.
தொடர்ச்சியாக அப்பிரதேசங்களில் இடம்பெற்று வரும் வன்முறைச் சம்பவங்கள்தான் இதற்குப் பிரதான காரணம்.
மக்களின் அரசியல் உரிமைகள் மறுக்கப்பட்டு தேர்தல் நடத்துவதில் எவ்வித பிரயோசனமுமில்லை.
எனவே அரசு வடக்கில் தேர்தல் சுதந்திரத்தை நிலைநாட்டி நீதியானதும், நியாயமானதுமான தேர்தல்களுக்கு வழிசமைத்துக் கொடுக்கவேண்டும்; இது அரசின் கடமையுமாகும் எனவும் சுட்டிக்காட்டினார்.
பிரதான எதிர்க்கட்சிகளுக்கு வடக்கில் தேர்தல் பிரசார நடவடிக்கைகளை முன்னெடுப்பதற்கு ஏதுவான ஓர் சூழ்நிலை அங்கு இல்லை.
தமிழ்த் தேசியக் கூட்டமைப்பு, ஜே.வி.பி. ஆகிய கட்சிகளுக்கு எதிராக வன்முறைகள் கட்டவிழ்த்து விடப்பட்டுள்ளன.
தமிழ்த் தேசியக் கூட்டமைப்பினர் நடத்திய மூன்று பிரதான கூட்டங்களின் போது இராணுவத்தினர் அப்பிரதேசங்களுக்குச் சென்று வீடுவீடாக சோதனையிட்டுள்ளனர்.
பிரசாரக் கூட்டத்துக்கு வரும் மக்களுக்கு இடையூறு ஏற்படுத்தியுள்ளனர்.
இது தொடர்பாக தமக்கு முறைப்பாடுகள் கிடைக்கப்பெற்றுள்ளன எனவும் தெரிவித்துள்ளார்.
*******************
வெளிநாட்டு தேர்தல் கண்காணிப்பாளர் வேண்டும்
எதிர்வரும் 23 ஆம் திகதி இடம்பெறவுள்ள வடக்கு உள்ளுராட்சி தேர்தல் வாக்களிப்பின் போது வெளிநாட்டு கண்காணிப்பாளர்கள் அழைக்கப்படவேண்டும் என்று தமிழ்த் தேசியக் கூட்டமைப்பு கோரியுள்ளது.
இந்தநிலையில் தமது கட்சி மீது வடக்கில் தினந்தோறும் தாக்குதல்களும் வன்முறைகளும் மேற்கொள்ளப்பட்டு வருவதாக தமிழ்த் தேசியக் கூட்டமைப்பு குற்றம் சுமத்தியுள்ளது.
இது தொடர்பில் கடிதம் ஒன்றை தாம் தேர்தல்கள் ஆணையாளருக்கு அனுப்பியுள்ளதாக நாடாளுமன்ற உறுபபினர் ஏ சுமந்திரன் தெரிவித்துள்ளார்.
வடக்கில் உள்ளூட்சி தேர்தலில் போட்டியிடும் தமிழ்த் தேசியக் கூட்டமைபபின் வேட்பாளர்களின் வீடுகளுக்கு கல்லெறி மற்றும் நாய்களை சுட்டு அதன் தலைகளை வீட்டு வாசலில் தொங்கவிடல் போன்ற வன்முறைகள் மேற்கொள்ளப்பட்டுள்ளதாக சுமந்திரன் அந்த கடிதத்தில் தெரிவித்துள்ளார்.
*******************
நட்டஈடு செலுத்த உத்தரவு
இலங்கை பெற்றோலியக் கூட்டுத்தாபனம் சுமார் 162 மில்லியன் அமெரிக்க டொலர்களையும் அதற்கான வட்டியுடன் சேர்த்து ஸ்டான்டர்ட் சார்டர்ட் வங்கிக்கு வழங்க வேண்டும் என லண்டன் நீதிமன்றம் உத்தரவு பிறப்பித்துள்ளது.
ஹெஜிங் உடன்படிக்கையின்படி ஸ்டான்டர்ட் சார்டர்ட் வங்கிக்கு வழங்கப்பட வேண்டிய பணத்தை செலுத்தாததால், அவ்வங்கிக்கு சுமார் 162 மில்லியன் டொலர்களையும் அதற்கான வட்டியையும் இலங்கை பெற்றோலியக் கூட்டுத்தாபனமே வழங்க வேண்டியுள்ளதாக லண்டன் நீதிமன்றமொன்று தெரிவித்துள்ளது.
இது தொடர்பாக சீபெட்கோவிலிருந்து கருத்து கூறுவதற்கு ஒருவரும் கிடைக்கவில்லை எனவும் ஆனால் தமக்கு சாதகமாக தீர்ப்பு கிடைத்ததால் தாம் மகிழ்ச்சியடைவதாக ஸ்டான்டர்ட் சார்டர்ட் வங்கியின் பேச்சாளர் ஒருவர் கூறியதாக ராய்ட்டர்ஸ் செய்திச்சேவை தெரிவித்துள்ளது.
*******************
காமுகர்களின் கொலைகளம்
கதிர்காமத்திற்கு கால்நடையாக சென்ற போது காட்டு மிருகத்தின் தாக்குதலில் தமிழ் பெண் உயிரிழந்ததாக முன்னர் கூறப்பட்ட போதிலும் அப்பெண் இராணுவ சீருடை அணிந்த சிலரால் பாலியல் பலாத்காரம் செய்யப்பட்டு கொல்லப்பட்டதாக தெரியவந்துள்ளது.
இந்த பெண்ணின் உடலில் காணப்படும் காயம் மிருகங்களின் தாக்குதலில் ஏற்பட்ட காயம்போல் காணப்படவில்லையென அவரின் உறவினர்கள் தெரிவித்துள்ளனர்.
தற்போது கதிர்காமம் வைத்தியசாலையின் பிரேத அறையில் வைக்கப்பட்டுள்ள இந்த பெண்ணின் மரணம் தொடர்பாக பிரேத பரிசோதனை மேற்கொள்ளப்பட வேண்டும் என உறவினர்கள் கோரிக்கை விடுத்துள்ளனர்.
இந்த பெண் பாலியல் பலாத்காரம் செய்யப்பட்டு கொலைசெய்யப்பட்டுள்ளதாக கூறும் உறவினர்கள் இது தொடர்பில் உரிய நடவடிக்கையெடுக்குமாறு கோரிக்கை விடுத்துள்ளனர்.
இதேவேளை உயிரிழந்த பெண்ணின் மரண ஓலம் கேட்டபோது அப்பகுதிக்கு பொதுமக்கள் சிலர் சென்றவேளையில் இராணுவ சீருடையில் இருந்த மூவர் அப்பகுதியில் இருந்து ஓடியதை தாம் கண்டதாக தெரிவிக்கின்றனர்.
சம்பவ இடத்திற்கு வந்த இராணுவத்தினரும் வன இலாகா அதிகாரிகளும் உயிரிழந்த பெண்ணின் சடலத்தை சம்பவ இடத்தில் வைத்து எரிக்க முற்பட்டதாகவும், உறவினர்கள் அதற்கு எதிர்ப்பு தெரிவித்ததையடுத்தே சடலம் வைத்தியசாலைக்கு எடுத்து செல்லப்பட்டதாகவும் அப்பெண்ணின் உறவினர்கள் தெரிவிக்கின்றனர்.
*******************
தப்பியயோடியோரை தப்பியோடவுள்ளோர் தேடுதல்?
இராணுவத்திலிருந்து சட்டவிரோதமாக தப்பிச்சென்ற 40 ஆயிரத்துக்கும் அதிகமானவர்களை குறி வைத்து பாரிய தேடுதல் வேட்டை ஆரம்பிக்கப்பட்டுள்ளது.
இவர்கள் நாட்டின் பாதுகாப்புக்கு அச்சுறுத்தலாக இருப்பதோடு அண்மையில் அதிகரித்து வரும் பல்வேறு வகையான குற்றச் செயல்களின் பின்னணியிலும் தொடர்புபட்டுள்ளமை கண்டறியப்பட்டுள்ளது என்று இராணுவ பேச்சாளர் மேஜர் ஜெனரல் உபயமெதவல தெரிவித்தார்.
இதுவரையில் தப்பிச்சென்ற 9 ஆயிரம் பேரை இராணுவ காவல்துறையினர் கைது செய்துள்ளனர்.
ஏனையோரையும் விரைவில் கைது செய்து தண்டனை வழங்ப்படும் எனவும், எனவே தப்பிச் சென்றவர்கள் சரணடைந்து சட்டபூர்வமான விலகலைப் பெற்றுக் கொள்ள வேண்டும் என்றும் அவர் குறிப்பிட்டார்.
கடந்த யுத்த காலப் பகுதியில் பெருந்தொகையான இராணுவத்தினர்  சட்டவிரோதமாக படைகளில் இருந்து தப்பிச்சென்றிருந்தனர்.
இவர்கள் அனைவரையும் கைது செய்யும் நோக்கில் பல தேடுதல் நடவடிக்கைகள் முன்னெடுக்கப்பட்டன.
அது மட்டுமன்றி சட்டபூர்வமான விலகலை பெற்றுக்கொள்ள கால அவகாசமும் வழங்கப்பட்டது.
ஒரு சிலர் சந்தர்ப்பத்தை பயன்படுத்திக் கொண்டு இராணுவத்திலிருந்து உத்தியோகபூர்வமாக விலகிக் கொண்டனர்.
ஆனால் பெருந்தொகையானோர் சரணடையவில்லை.
இதுவரையில் 40 ஆயிரம் பேர் சட்டவிரோதமாக இராணுவத்திலிருந்து தப்பிச் சென்று பொது வாழ்க்கையில் ஈடுபடுகின்றனர்.
இது இராணுவ சட்டப்படி தண்டனைக்குரிய குற்றமாகும்.
உத்தியோகபூர்வமான விலகலைப் பெற்றுக்கொள்ளாமல் இராணுவத்தினரால் பொது வாழ்லில் ஈடுபட முடியாது என்றும் தெரிவித்துள்ளார்.
*******************

Monday, 11 July 2011

செய்திகள் 11/07

தடுத்து வைக்கப்பட்டோரின் உண்ணாவிரதம்
எவ்வித விசாரணைகளுமின்றித் தாம் நீண்ட காலமாகத் தடுத்து வைக்கப்பட்டுள்ளதாகக் கூறி வவுனியா சிறைச்சாலையைச் சேர்ந்த ஐந்து தமிழ் அரசியல் கைதிகள் இன்று முதல் உண்ணாவிரதத்தில் ஈடுபட்டுள்ளனர்.
தாம் நீண்டகாலமாக பயங்கரவாத தடுப்புச்சட்டத்தின் கீழ் கைது செய்யப்பட்டு தடுத்துவைக்கப்பட்டுள்ள போதிலும் இதுவரையில் தமது விசாரணைகள் மேற்கொள்ளப்படவில்லையென அவர்கள் தெரிவித்துள்ளனர்.
இது தொடர்பில் பல்வேறு தடவைகள் வலியுறுத்தியபோதிலும் இதுவரையில் அது தொடர்பில் எதுவித நடவடிக்கையும் எடுக்கவில்லையென்றும் எனவே தம்மீது சுமத்தப்பட்டுள்ள குற்றச்சாட்டுகள் தொடர்பிலான விசாரணைகள் துரிதப்படுத்தப்பட்டு தமது விடுதலை தொடர்பில் உரிய நடவடிக்கையெடுக்கும் வரை தமது உண்ணாவிரத போராட்டம் தொடரும் எனவும் அவர்கள் தெரிவித்துள்ளனர்.
***************
படையினரை பயன்படுத்தி அச்சுறுத்தல்
வடக்கில் உள்ளூராட்சித் தேர்தலில் போட்டியிடும் எதிர்க்கட்சி வேட்பாளர்களை அச்சமூட்டுவதற்கு சக்திவாய்ந்த சில அரசியல் கட்சிகள் பாதுகாப்புப் படையினரைப் பயன்படுத்துவதாக ஜே.வி.பி. குற்றம் சுமத்தியுள்ளது.
கிளிநொச்சி தர்மபுரம் பகுதியில் தமது ஆதரவாளர்கள் பிரச்சாரம் செய்வதை இக்கட்சிகள் பாதுகாப்புப் படையினரை பயன்படுத்தி தடுத்ததாக ஜே.வி.பி. நாடாளுமன்ற உறுப்பினர் விஜித ஹேரத் நேற்று ஞாயிற்றுக்கிழமை நடைபெற்ற செய்தியாளர் சந்திப்பொன்றில் தெரிவித்தார்.
தமிழ் தேசியக் கூட்டமைப்பு வேட்பாளர் ஒருவரின் நாயொன்று கொல்லப்பட்டு, அதன் தலை குறித்த வேட்பாளரின் வீட்டு வாசலில் தொங்கவிடப்பட்டிருந்தது எனவும் விஜித ஹேரத் கூறினார்.
வடக்கைச் சேர்ந்த பெண்களிடம் அரச சார்ப்பு கருத்துக்களை வெளியிடச் செய்வதற்கு மேற்கொள்ளப்பட்ட முயற்சியொன்று தோல்வியில் முடிவடைந்தது எனவும் அவர் தெரிவித்தார்.
அரச தொலைக்காட்சியொன்றில் அப்பெண்கள் செவ்வி காணப்பட்டபோது, தாம் எதிர்கொள்ளும் சமூக பொருளாதார பிரச்சினைகளையே அவர்கள் வெளிப்படுத்தியதாக அவர் கூறினார்.
சக்திவாய்ந்த கட்சிகள், இத்தகைய ஜனநாயகமற்ற முறையில் பிரச்சாரங்களை மேற்கொள்கின்றன என அவர் குற்றஞ்சாட்டியுள்ளார்.
***************
முறைப்பாட்டில் பயன் என்ன?
சாவகச்சேரி பிரதேச சபையின் தமிழ்த் தேசியக் கூட்டமைப்பு வேட்பாளரின் தீவிர ஆதரவாளரின் வீட்டின் முற்றத்தில் மலர் வளையம் வைக்கப்பட்டதுடன் அவரின் வீட்டுச் சுவரில் ஒட்டப்பட்டிருந்த சுவரொட்டிகள் மீது கழிவு எண்ணெய் ஊற்றப்பட்டதாகத் தெரிவிக்கப்படுகிறது.
இந்தச் சம்பவம் நேற்று அதிகாலை மிருசுவில் தவசிகுளத்தில் இடம்பெற்றுள்ளது.
அதே இடத்தைச் சேர்ந்த கந்தையா அசோகலிங்கம் என்பவர் சம்பவம் குறித்து கொடிகாமம் காவல் நிலையத்தில் முறைப்பாடு செய்தார்.
அங்கு சென்ற காவல்துறையினர் விசாரணைகளை மேற்கொண்டதுடன் மலர் வளையத்தையும் எடுத்துச் சென்றனர்.
***************
தொடரும் அச்சுறுத்தல்!
உள்ளூராட்சி சபைத் தேர்தல்களில் தமிழ்த்தேசியக் கூட்டமைப்பு பிரசாரத்தில் ஈடுபடுவதைத் தடுக்கும் நோக்கத்துடன் கூட்டமைப்பு வேட்பாளர்களை அச்சுறுத்தும் நடவடிக்கைகள் நாளுக்கு நாள் அதிகரித்து வருகின்றன.
இதுகுறித்து தமிழ்த் தேசியக் கூட்டமைப்பு தேர்தல் ஆணையாளரிடம் இன்று எழுத்து மூலம் முறைப்பாடு செய்யும் என தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் தெரிவித்துள்ளார்.
தமிழ்த் தேசியக் கூட்டமைப்புக்கு எதிராக யாழ்.குடாநாட்டில் மேற்கொள்ளப்பட்ட தாக்குதல்கள், வன்முறைச் சம்பவங்கள் ஆகியவற்றைப் பட்டியலிட்டுக் காட்டவும் நடவடிக்கை எடுக்கப்பட்டுள்ளதாகவும் சுமந்திரன் தெரிவித்தார்.
யாழ். குடா நாட்டில் தமிழ்த் தேசியக் கூட்டமைப்பை இந்தத் தேர்தலில் தோற்கடிக்க அடாவடித்தனங்கள் மேற்கொள்ளப்பட்டு வருகின்றன.
கடந்த 16ஆம் திகதி அளவெட்டியில் கூட்டமைப்பின் கலந்துரையாடல் நடைபெற்றுக் கொண்டிருந்த மண்டபத்துக்குள் அத்துமீறிப் புகுந்த இராணுவச் சீருடை அணிந்தோர் அடாவடித்தனத்தில் ஈடுபட்டது.
இது குறித்து விசாரணை மேற்கொண்டு சம்பந்தப்பட்டோர் சட்டத்தின் முன் நிறுத்தப்படுவர் என அரசு அறிவித்தது.
இது தொடர்பான விசாரணைக்கு இரு காவல்துறை குழுக்கள் அமைக்கப்பட்டுள்ளன என காவல்துறை பேச்சாளர் தெரிவித்திருந்தார்.
சம்பவம் இடம்பெற்று ஒரு மாதம் கடந்த பின்னரும் இது தொடர்பாக எந்தவொரு விசாரணையும் நடைபெற்றதாகத் தெரியவில்லை.
இதேவேளை, இப்போது கூட்டமைப்பு வேட்பாளர்கள் அச்சுறுத்தப்படும் சம்பவங்கள் அதிகரித்துள்ளன.
கடந்த புதன்கிழமை இரவு மானிப்பாயில் உள்ளூராட்சித் தேர்தலில் போட்டியிடும் வேட்பாளரது வீட்டுக்கு முன்னால் தலை துண்டிக்கப்பட்ட நாயின் உடல் காணப்பட்டது.
நாயின் தலை வீட்டு வாசலில் தொங்கவிடப்பட்டிருந்தது.
இந்த நிலையில், நேற்று முன்தினம் சனிக்கிழமை அதிகாலை கூட்டமைப்பின் முன்னாள் நாடாளுமன்ற உறுப்பினரும், வல்வெட்டித்துறை நகரசபைக்கு கூட்டமைப்பு சார்பில் போட்டியிடும் வேட்பாளருமான எம்.கே.சிவாஜிலிங்கத்தின் அலுவலகம் மற்றும் வலிகாமம் மேற்கு பிரதேச சபை வேட்பாளர் திருமதி.நா.ஐங்கரனின் வீடு ஆகியவற்றின் மீதும் தாக்குதல்கள் நடத்தப்பட்டுள்ளன.
சிவாஜிலிங்கத்தின் அலுவலகம் மீது சாக்கடைக் கழிவுகள் வீசப்பட்டுள்ளன என்றும் தெரிவித்துள்ளார்.
***************
தபால் மூல வாக்களிப்பு நாளை
64 உள்ளூராட்சி சபைகளுக்கான தபால் மூல வாக்கெடுப்பு நாளை 12ம் திகதி இடம்பெறவிருக்கின்றது.
இத்தேர்தலில் 60 ஆயிரத்து 546 பேர் வாக்களிக்க தகுதி பெற்றிருப்பதாக தேர்தல் செயலக அதிகாரியொருவர் நேற்றுத் தெரிவித்தார்.
இதேவவேளை, இந்த தபால் மூல வாக்களிப்பை கண்காணிக்கும் பணியில் நூறு தொண்டர்களை ஈடுபடுத்தவிருப்பதாக பெப்ரல் அமைப்பின் நிறைவேற்றுப் பணிப்பாளர் ரோகன ஹெட்டியாராச்சி குறிப்பிட்டார்.
இந்நிலையில், தபால் மூல வாக்களிப்பை அமைதியாகவும், நீதியாகவும் நடத்துவதற்கு தேவையான சகல பாதுகாப்பு ஏற்பாடுகளும் மேற்கொள்ளப்பட்டிருப்பதாக தேர்தல்களுக்குப் பொறுப்பான பிரதி காவல்துறை மா அதிபர் பி.கே.காமினி நவரட்ண தெரிவித்துள்ளார்.
***************
அரசுக்குள் குழப்பம்!
இந்தியாவின் ஹெட்லைன்ஸ் ருடே தொலைக்காட்சியில் மறுஒளிபரப்பான சிறிலங்காவின் கொலைக்களங்கள் ஆவணப்படத்துடன் இணைந்து நடத்தப்பட்ட விவாதத்தில் சிறிலங்கா இராணுவப் பேச்சாளர் மேஜர் ஜெனரல் உபய மெடவெல பங்கேற்றது பெரும் சர்ச்சையை தோற்றுவித்துள்ளது.
இதன் காரணமாக சிறிலங்கா வெளிவிவகார அமைச்சும் பாதுகாப்பு அமைச்சும் ஒன்றின் மீது ஒன்று குற்றம்சாட்டியுள்ளதுடன், முறுகலான நிலை ஒன்றும் ஏற்பட்டிருப்பதாக ஆங்கில ஊடகம் ஒன்று தகவல் வெளியிட்டுள்ளது.
சிறிலங்காவின் போர்க்குற்றங்கள் என்ற ஆவணப்படத்துடன் இணைந்ததாக நேரடி விவாத நிகழ்வு ஒன்றையும் ஹெட்லைன்ஸ் ருடே தொலைக்காட்சி ஒளிபரப்பியிருந்தது.
கடந்த 8ம் நாள் இரவு இடம்பெற்ற இந்த நேரலை விவாதத்தில் சிறிலங்காவின் இராணுவப் பேச்சாளர் மேஜர் ஜெனரல் உபய மெடவெல செய்மதித் தொழில்நுட்பத்தின் மூலம் பங்கேற்றிருந்தார்.
சென்னையில் இருந்து இந்த நிகழ்ச்சி நேரலையாக ஒளிப்பரப்பப்பட்டது.
இந்த விவாதத்தில் கேட்கப்பட்ட கேள்விகளுக்கு சிறிலங்கா இராணுவப் பேச்சாளர் உரிய வகையில் பதிலளிக்கவில்லை என்றும் நிகழ்ச்சியில் எதிர்த்தரப்பில் எழுப்பப்பட்ட பல வாதங்களுக்கு அவர் பொருத்தமான பதில் கூறாமல் விட்டதாகவும் சிறிலங்கா வெளிவிவகார அமைச்சின் மூத்த அதிகாரிகள் குற்றம்சாட்டியுள்ளனர்.
அதேவேளை, இந்த நிகழ்ச்சி முழுவதுமே விடுதலைப் புலிகளுக்கு சார்பாகவே நடத்தப்பட்டதாகவும், நிகழ்ச்சியின் பின்னணியில் விடுதலைப் புலிகளின் கொடியும் கூட காண்பிக்கப்பட்டதாகவும் சிறிலங்கா பாதுகாப்பு அமைச்சு அதிகாரிகள் கூறியுள்ளனர்.
இராணுவப் பேச்சாளர் இந்த நிகழ்ச்சியில் பங்கேற்றதன் மூலம் அது பக்கச்சார்பற்றது என்ற அங்கீகாரத்தைப் பெற்றுக் கொண்டுள்ளதாகவும், இதற்கான சந்தர்ப்பத்தை வழங்கியது சிறிலங்கா அரசின் தரப்பில் இழைக்கப்பட்ட மிகப்பெரிய தவறு என்றும் சிறிலங்கா பாதுகாப்புச் செயலர் கோத்தாபய ராஜபக்ச தெரிவித்துள்ளார்.
இந்த நிகழ்ச்சியில் இராணுவப் பேச்சாளரே பதிலளிக்க வேண்டும் என்று சிறிலங்கா வெளிவிவகார அமைச்சின் மூத்த அதிகாரிகளே அழுத்தம் கொடுத்துள்ளனர்.
இந்த நிகழ்ச்சி குறித்து முழுமையாக ஆராயாமல், இராணுவப் பேச்சாளரை இதில் பங்கேற்க வைப்பதற்காக சிறிலங்கா அதிபர் ஊடாக வெளிவிவகார அமைச்சு மேற்கொண்ட நடவடிக்கை பாதகமான விளைவுகளை ஏற்படுத்தியுள்ளதாகவும் கோத்தாபய ராஜபக்ச குற்றம்சாட்டியுள்ளார்
நிகழ்ச்சியின் மைய நோக்கத்தை புரிந்து கொள்ளாமல், சிறிலங்கா அதிபரின் மூலம் இந்த நிகழ்ச்சியில் இராணுவப் பேச்சாளரை பங்கேற்க வைத்தது வெளிவிவகார அமைச்சு செய்த மிகவும் மோசமான முட்டாள்தனமான காரியம் என்றும் அவர் மேலும் விமர்சித்துள்ளார்.
இந்தியாவின் முன்னாள் வெளிவிவகார அமைச்சர் ஜஸ்வந்த் சிங், பிரித்தானியாவின் முன்ளாள் வெளிவிவகார அமைச்சர் டேவிட் மில்லிபான்ட், அமெரிக்க இராஜாங்கத் திணைக்களப் பேச்சாளர் மார்க் ரோனர், அதிமுக நாடாளுமன்ற உறுப்பினர் தம்பித்துரை, காங்கிரஸ் கட்சிப் பேச்சாளர் அபிசேக் பானு, நடிகரும் சட்டமன்ற உறுப்பினருமான சரத்குமார், கேணல் ஹரிகரன் ஆகியோர் பங்கேற்ற இந்த நிகழ்ச்சியை ராகுல் கன்வால் ஒருங்கிணைத்து நடத்தியிருந்தார்.
இந்த நிகழ்ச்சியில் பங்கேற்றவர்களில் பெரும்பாலானவர்கள் சிறிலங்காவில் போர்க்குற்றங்கள் நடந்திருந்தால், அனைத்துலக விசாரணைகளுக்கு அனுமதிக்கப்பட வேண்டும் என்றே கருத்து வெளியிட்டிருந்ததாகவும் ஆங்கில ஊடகம் மேலும் தகவல் வெளியிட்டுள்ளது.
***************
தீர்வு வழங்கத் தவறும் அரசு
தமிழ் மக்களின் பிரச்சினைகளுக்கு தீர்வு வழங்க அரசாங்கம் தவறியுள்ளதாக தேசிய தொழிற்சங்க சம்மேளனத்தின் தலைவர் கே.டி. லால்காந்த தெரிவித்துள்ளார்.
தமிழ் மக்களின் பிரச்சினைகளுக்கு தீர்வு காண்பதனை விடவும், அரசாங்கம் தனது இருப்பை உறுதி செய்துகொள்வதற்கு கூடுதல் ஆர்வம் காட்டி வருவதாகக் குறிப்பிட்டுள்ளார்.
நாட்டுக்கு சேவையாற்றக் கூடிய முற்போக்கான தலைவர்களை உருவாக்க வேண்டியது மக்களின் கடமையாகும் என அவர் தெரிவித்துள்ளார்.
அரசாங்கத்தின் உத்தேச நாடாளுமன்ற தீர்வுத் திட்ட யோசனை வெற்றியளிக்காது என்பது யாவரும் அறிந்ததே என அவர் சுட்டிக்காட்டியுள்ளார்.
தமிழ் மக்களை மீள் குடியேற்றுதல், காணாமல் போனவர்கள் பற்றிய தகவல்களை வழங்குதல், கைது செய்யப்பட்டு தடுத்து வைக்கப்பட்டுள்ளவர்களை விடுதலை செய்தல், குற்றச் செயல்களில் ஈடுபட்டவர்களுக்கு எதிராக வழக்குத் தொடர்தல், வடக்கில் இராணுவ ஆட்சிய நீக்கி, சிவில் நிர்வாகத்தை ஏற்படுத்தல் போன்ற முக்கிய விடயங்கள் குறித்து அரசாங்கம் உரிய கவனம் செலுத்தவில்லை என அவர் தெரிவித்துள்ளார்.
அரசாங்கத்தின் இவ்வாறான உதாசீனமான போக்கே சர்வதேச சக்திகள் இலங்கை விவகாரத்தில் தலையீடு செய்ய ஏதுவாகின்றது என அவர் சுட்டிக்காட்டியுள்ளார்.
***************
லியாம் பொக்ஸ் நாடு திரும்பினார்
இருநாள் உத்தியோகபூர்வ விஜயத்தை மேற்கொண்டு இலங்கைக்கு சென்றிருந்த பிரித்தானியாவின் பாதுகாப்புத் துறை அமைச்சர் லியாம் பொக்ஸ் நேற்று ஞாயிற்றுக்கிழமை நாடு திரும்பினார்.
பிரத்தானியாவின் பாதுகாப்புத்துறை அமைச்சர் தலைமையிலான குழுவினர் கட்டுநாயக்க விமான நிலையத்திலிருந்து விசேட விமானத்தின் மூலமாக நேற்றுக்காலை 10.15 மணியளவில் டோஹா கட்டார் நோக்கி புறப்பட்டு சென்றதாக விமான நிலைய வட்டாரங்கள் தெரிவித்தன.
உத்தியோகபூர்வ விஜயம் ஒன்றை மேற்கொண்டு வெள்ளிக்கிழமை இரவு இலங்கைக்கு சென்றிருந்த லியாம் பொக்ஸ் முன்னாள் வெளிவிவகார அமைச்சர் லக்ஷ்மன் கதிர்காமரின் நினைவு பேருரையில் கலந்துகொண்டு நினைவு சொற்பொழிவாற்றினார்.
இலங்கைக்கு விஜயத்தின் போது அவர் வெளிவிவகார அமைச்சர் ஜி.எல் பீரிஸ், பொருளாதார அமைச்சர் பஷில் ராஜபக்ஷ ஆகியோரை சந்தித்து பேச்சுவார்த்தை நடத்தியதுடன் அரசுத் தலைவர் மஹிந்த ராஜபக்ஷவையும் சனிக்கிழமை காலை சந்தித்து பேச்சுவார்த்தை நடத்தியுள்ளார்.
அரசுத் தலைவருடனான பேச்சுவார்த்தையின் போது பல்தரப்பட்ட விடயங்கள் தொடர்பில் இருவரும் விரிவாக ஆராய்ந்துள்ளதுடன் இலங்கை மன்ற கல்லூரியில் நடைபெற்ற லக்ஷ்மன் கதிர்காமரின் நினைவு சொற்பொழிவில் கற்றறிந்த பாடங்களுக்கான நல்லிணக்க ஆணைக்குழுவின் இறுதியறிக்கையை நவம்பர் மாத்திற்குள் எதிர்பார்ப்பதாகவும் அவர் தெரிவித்துள்ளார்.
இதேவேளை லியாம் பொக்ஸ் எதிர்க்கட்சி பிரதிநிதிகளை சந்தித்து பேச்சுவார்த்தை நடத்துவார் என்று எதிர்பார்க்கப்பட்டபோதிலும் அவர் எதிர்தரப்பில் எவரையும் சந்திக்கவில்லை என தெரிவிக்கப்படுகின்றது.
***************

Sunday, 10 July 2011

செய்திகள் 10/07

தமிழறிஞரின் இறுதிக் கிரியையகள் இன்று
கடந்த புதன்கிழமை காலமான, தமிழ் பேரறிஞர் கார்த்திகேசு சிவத்தம்பியின் இறுதிக்கிரியைகள் இன்று ஞாயிற்றுக்கிழமை நடைபெறவுள்ளன.
தெஹிவளை வண்டேவர்ட் பிளேஸிலுள்ள அவரின் இல்லத்தில் இன்று நண்பகல் ஈமக்கிரியைகள் நடைபெறும் எனவும், பிற்பகல் 4 மணிக்கு பூதவுடல் தகனக் கிரியைகளுக்காக பொரளை பொதுமயானத்திற்கு கொண்டு செல்லப்படும் எனவும் அவரின் குடும்பத்தினர் அறிவித்துள்ளனர்.
மறைந்த பேராசிரியர் கார்த்திகேசு சிவத்தம்பியின் பூதவுடல் பெருந்திரளான மக்களின் கண்ணீர் அஞ்சலியுடன் இன்று மாலை அக்கியில் சங்கமமாகின்றது.
கடந்த செவ்வாய்க்கிழமை இரவு 8.20 க்கு இவ்வுலகை விட்டு உயிர்நீத்த பேராசிரியர் சிவத்தம்பியின் பிரிவுச் செய்தி கேட்டு தமிழ் உலகே உறைந்து போயுள்ளது.
தமிழை வளர்க்க தனது இறுதிமூச்சு வரை பாடுபட்ட அன்னாரின் பூதவுடலுக்கு அஞ்சலி செலுத்துவதற்கு இன, மத, பாகுபாடு இன்றி மக்கள் வெள்ளம் அன்னாரின் இல்லம் நோக்கி திரண்ட வண்ணம் உள்ளனர்.
யாழில் இருந்து அன்னாரின் மறைவுச் செய்தி கேட்டு அஞ்சலி செலுத்துவதற்காக, பேராசிரியர்கள், பல்கலைக்கழக விரிவுரையாளர்கள், மாணவர்கள், இலக்கிய ஆர்வலர்கள், அன்னாரின் வழிப்படுத்தப்பட்டு, வளப்படுத்தப்பட்ட கல்விமான்கள் எனப்பெருந் திரளானோர் கொழும்பை நோக்கி படையெடுத்த வண்ண முள்ளனர்.
இந்நிலையில் புலம்பெயர் நாடுகளில் உள்ள தமிழ் உறவுகள் தமது ஆழ்ந்த இரங்கல்களைத் தெரிவித்த வண்ணமுள்ளனர்.
தமிழக முன்னாள் முதல்வர் மு. கருணாநிதியும் தனது இரங்கல்களை தெரிவித்துள்ள அதேவேளை, தமிழக அரசியல்வாதிகள் வைகோ, பழநெடுமாறன், உட்பட பெருமளவானோர் அன்னாரின் இழப்பை ஈடுசெய்ய முடியாது எனத் தமது இரங்கல் செய்திகளை அனுப்பிய வண்ணமுள்ளனர்.
இந்நிலையில் இன்று மாலை தெஹிவளை வெண்டவர்ட் பிளேசில் உள்ள அன்னாரின் இல்லத்தில் சமயச் சடங்குகள், கிரியைகள் நடைபெற்று, பெருந்திரளான மக்களின் கண்ணீர் அஞ்சலிக்கு மத்தியில் அக்கினியில் சங்கமமாகிறார்.
**************
நீதிக்காக குரல் கொடுப்போம் - பிரித்தானிய பாராளுமன்றம்
தமிழ் மக்களுக்கு நீதியும் நியாயமும் கிடைக்கும் வரை தாம் ஓயமாட்டோம் என பிரித்தானிய நாடாளுமன்றத்தின் 52 நாடாளுமன்ற உறுப்பினர்களைக் கொண்ட தமிழர்களுக்கான குழு கூறியுள்ளது.
தமிழ் மக்களுக்கான நீதியை நிலை நாட்ட சர்வதேச விசாரணை ஒன்றே தேவை எனவும் அந்த குழு கூறியுள்ளது.
குழுவின் தற்போதைய தலைவரான லீஸ் ஸ்கொட் கையெழுத்திட்ட உத்தியோகபூர்வ அறிக்கை வெளியாகியுள்ளது.
**************
விசாரணையை வலியுறுத்திய பொக்ஸ்
இலங்கை மீது சுமத்தப்பட்டுள்ள சர்வதேச மனித உரிமைகள் மீறல் மற்றும் மனிதாபிதானத்துக்கு எதிரான குற்றச்சாட்டுக்களை தீவிரமான முறையில் எடுத்துக்கொண்டு, இலங்கை அரசாங்கம் உரியமுறையில் கவனத்தில் எடுத்து விசாரணைகளை மேற்கொள்ளவேண்டும் என்று பிரித்தானிய பாதுகாப்பு செயலாளர் லியாம் பொக்ஸ் கோரியுள்ளார்.
கதிர்காமர் நிலையத்தில் நேற்று நடைபெற்ற சொற்பொழிவின் போது அவர் இந்தக் கோரிக்கையை விடுத்தார்.
இலங்கையில் அமைக்கப்பட்டுள்ள நல்லிணக்க ஆணைக்குழு இனங்களுக்கு இடையில் இணக்கத்தை கொண்டு வர முக்கிய பங்கை வகிக்கவேண்டும் என்றும் அவர் இதன்;போது கேட்டுக்கொண்டார்.
அந்தக்குழு அனைத்து சாட்சியங்களையும் உரிய முறையில் விசாரணை செய்து இலங்கை அரசாங்கத்துக்கு இறுதி பரிந்துரையை செய்யவேண்டும் என்றும் லியாம் பொக்ஸ் கோரிக்கை விடுத்தார்.
இந்தக்குழு எதிர்வரும் நவம்பர் மாதத்தில் தமது பரிந்துரைகளை இலங்கை அரசாங்கத்துக்கு வழங்கும் என்று தாம் எதிர்பார்ப்பதாகவும் அவர் நம்பிக்கை வெளியிட்டார்.
சமாதானத்துக்கான அனைத்து நடவடிக்கைகளும் எடுக்கப்படவேண்டும்.
பேச்சு சுதந்திரம் எழுத்துச் சுதந்திரம் உட்பட்ட அனைத்தும் உரிய முறையில் செயலாக்கம் பெற்று சட்டத்தின் கீழ் பயத்தில் இருந்து விடுதலை கிடைக்கவேண்டும் என்று லியாம் பொக்ஸ் கேட்டுக்கொண்டார்.
**************
சிங்கள மக்களுக்கு நாடகமாடும் ஸ்ரீலங்காவின் உள்ளுர் சண்டித்தனம் ஏமாற்றே!
சிறிலங்காவின் கொலைக்களங்கள் என்ற ஆவணப்படத்தை ஒளிபரப்பியதற்காக சனல் 4 தொலைக்காட்சிக்கு எதிராக சிறிலங்கா அரசாங்கத்தினால் சட்டநடவடிக்கை எடுக்க முடியாது என்று சிறிலங்காவின் முன்னாள் தலைமை நீதியரசர் சரத் என் சில்வா தெரிவித்துள்ளார்.
இந்தக் காணொலியில் இடம்பெற்றுள்ள எவரேனும் வேண்டுமானால் பிரித்தானியா நீதிமன்றத்தில் மானநட்ட வழக்குத் தொடர முடியுமே தவிர, ஒரு அரசாங்கத்தினால் வெளிநாடுகளில் அத்தகைய வழக்கைத் தாக்கல் செய்ய முடியாது என்றும் அவர் கூறியுள்ளார்.
சிறிலங்காவின் கொலைக்களங்கள் ஆவணப்படத்தை வெளியிட்டு நாட்டின் பெயரைகட களங்கப்படுத்தியதற்காக சனல் 4 தொலைக்காட்சி மன்னிப்புக் கோர வேண்டும் அல்லது நட்டஈடு தர வேண்டும் என்று கோரி பிரித்தானியாவில் வழக்குத் தொடரப் போவதாக சிறிலங்கா அரசாங்கம் கூறி வருகிறது.
இது குறித்து கருத்து வெளியிட்டுள்ள சிறிலங்காவின் முன்னாள் தலைமை நீதியரசர் சரத் என் சில்வா, வெளிநாட்டுத் தொலைக்காட்சி ஒன்றுக்கு எதிராக சிறிலங்கா அரசாங்கம் சட்ட நடவடிக்கை எடுப்பதானால், எல்லை விவகாரங்கள் அல்லது மனிதஉரிமைகள் தொடர்பான விவகாரங்கள் குறித்தே அனைத்துலக நீதிமன்றம் ஒன்றில் வழக்குத் தொடர முடியும் என்று கூறியுள்ளார்.
இந்தக் காணொலிக்கு எதிராக சிறிலங்கா அரசாங்கம் நீதிமன்றத்துக்குச் செல்ல முடியும் என்று கருதினால், தமது நாடுகளை விமர்சித்ததாகக் கூறி பிரித்தானியா, அமெரிக்கா போன்ற நாடுகள் சிறிலங்காவை நீதிமன்றத்துக்கு இழுக்க முடியும் என்றும் அவர் சுட்டிக்காட்டியுள்ளார்.
அதேவேளை பிரித்தானியாவின் ஒளிபரப்பு அதிகாரசபைக்கு இதுபற்றி நடவடிக்கை எடுக்குமாறு கோரி சிறிலங்கா அரசாங்கம் கடிதம் எழுதலாம் என்றும் சரத் என் சில்வா மேலும் தெரிவித்துள்ளார்.
**************
அனுமதிக்காக அமைதி காத்திருக்கும் பூனை
அனைத்துலக சமூகத்தின் கவலைகளுக்கு பதிலளிப்பதற்கு சிறிலங்காவுக்கு மேலதிக காலஅவகாசத்தை வழங்க ஐ.நா பொதுச்செயலர் பான் கீ மூன் இணக்கம் தெரிவித்துள்ளார்.
ஆனால், இதற்கென காலவரையறையற்ற காலத்தை வழங்க முடியாது என்றும் அவர் கண்டிப்பாகக் கூறியுள்ளார்.
கடந்த செவ்வாய்க்கிழமை நியுயோர்க்கில் ஐ.நா பொதுச்செயலர் பான் கீ மூனை சிறிலங்காவின் எதிர்க்கட்சித் தலைவர் ரணில் விக்கிரமசிங்க சந்தித்துப் பேசிய போதே அவர் இவ்வாறு தெரிவித்துள்ளார்.
போருக்குப் பிந்திய சூழலில் அரசியல் தீர்வு ஒன்றுக்கு சிறிலங்கா அரசாங்கம் முயற்சிகளை மேற்கொண்டிருப்பதாகவும், எனவே மேலதிக கால அவகாசத்தை வழங்க வேண்டும் என்றும் பான் கீ மூனிடம் ரணில் விக்கிரமசிங்க கேட்டிருந்தார்.
ஐ.நா பொதுசெயலர் எதிர்க்கட்சித் தலைவர்களைச் சந்திக்கும் வழக்கத்தைக் கொண்டிராத நிலையில், அசாதாரணமான வகையில் ரணில் விக்கிரசிங்கவுடனான சந்திப்பு இடம்பெற்றுள்ளது.
இந்தச் சந்திப்பில் ஐ.நா பொதுச்செயலருடன் அவரது தலைமை அதிகாரி விஜய் நம்பியாரும், ரணில் விக்கிரமசிங்கவுடன் அமெரிக்காவுக்கான சிறிலங்காவின் முன்னாள் தூதுவர் தேவிந்த சுபசிங்கவும் கலந்து கொண்டிருந்தனர்.
இந்தச்சந்திப்பின் போது போரின் இறுதிக் கட்டத்தில் இடம்பெற்ற மனிதஉரிமை மீறல் குற்றச்சாட்டுகளுக்கு பதிலளிப்பது குறித்து கலந்துரையாடப்பட்டுள்ளது.
இதன்போது கருத்து வெளியிட்டுள்ள ஐ.நா பொதுச்செயலர் குற்றச்சாட்டுகள் குறித்து விசாரணை நடத்த சிறிலங்கா அரசாங்கம் உறுதியான நடவடிக்கையை எடுக்க வேண்டும் என்றும் தற்போது மேற்கொள்ளப்படும் நடவடிக்கைகள் போதாது என்றும் கண்டிப்பாக கூறியுள்ளார்.
ஐ.நாவிலோ அதற்கு வெளியிலோ சிறிலங்கா விவகாரம் காணாமற் போய்விடப் போவதில்லை என்றும் தாம் இன்னமும் இதுபற்றிய தீர்மானம் ஒன்றுக்கு வரவில்லை என்றும் பான் கீ மூன் மேலும் கூறியுள்ளார்.
அத்துடன் சிறிலங்காவில் போரின் போது என்ன நடந்தது என்பது மட்டுமே ஐ.நாவின் கவலைகள் அல்ல, பொதுப்படையான மனித உரிமை விவகாரங்கள், பரந்துபட்ட ஜனநாயகம் ஆகியவை கூட ஐ.நாவின் கரிசனையாக உள்ளது என்றும் ஐ.நா பொதுச்செயலர் ரணில் விக்கிரமசிங்கவிடம் கூறியுள்ளார்.
ஐ.நா பொதுச்செயலருடனான இந்தச் சந்திப்புத் தொடர்பாக சிறிலங்கா அதிபர் மகிந்த ராஜபக்சவை சந்தித்து விளக்கிக் கூறவுள்ளதாக ரணில் விக்கிரமசிங்க தெரிவித்துள்ளார்.
**************
குப்பைக் கூடைக்கு செல்லத் தயாராகும் தெரிவுக்குழுத் திட்டம்
தேசிய இனப்பிரச்சினைக்கு தீர்வு காணும் நோக்கில் அரசாங்கத்தினால் திட்டமிடப்பட்டுள்ள நாடாளுமன்றத் தெரிவுக்குழு அமைக்கும் யோசனை பெரும்பாலும் கைவிடப்படலாம் என எதிர்பார்க்கப்படுவதாக லங்காதீப பத்திரிகை செய்தி வெளியிட்டுள்ளது.
இந்த யோசனைத் திட்டம் பெரும்பாலும் கைவிடப்படலாம் என அரசியல் வட்டாரத் தகவல்கள் தெரிவிப்பதாக குறித்த பத்திரிகை சுட்டிக்காட்டியுள்ளது.
தமிழ்த் தேசியக் கூட்டமைப்பு இந்த நாடாளுமன்றக் குழுவில் அங்கம் வகிக்கப் போவதில்லை என அறிவித்துள்ளதாகவும், தமிழ்த் தேசியக் கூட்டமைப்பின் பங்களிப்பு இன்றி நாடாளுமன்றத் தெரிவுக்குழு அமைப்பில் அர்த்தமில்லை என இந்தியா அறிவித்துள்ளதாகவும் சுட்டிக்காட்டப்படுகிறது.
எனினும் தமிழ் தேசியக் கூட்டமைப்பின் ஆதரவுடன் இந்த நாடாளுமன்ற தெரிவுக்குழுவை முன்னெடுக்க அரசாங்கம் எண்ணம் கொண்டிருப்பதாக அரசாங்க தரப்புகள் தெரிவித்துள்ளன.
தேசியப் பிரச்சினைக்கு தீர்வு காணும் செயன்முறையில் தமிழ்த் தேசியக் கூட்டமைப்பின் பங்களிப்பு முக்கியமானது என இந்தியா வலியுறுத்தியுள்ளது.
ஐக்கிய தேசியக் கட்சி நாடாளுமன்றத் தெரிவுக்குழுவில் அங்கம் வகிக்கக் கூடிய சாத்தியமும் மிகவும் குறைவாகக் காணப்படுவதாகக் குறிப்பிடப்படுகிறது.
இதன்படி, தெரிவுக்குழுவிற்கு பதிலாக பேச்சுவார்த்தை ஊடாக தீர்வுத் திட்டமொன்றை முன்வைப்பதற்கு அரசாங்கம் கவனம் செலுத்த தீர்மானித்துள்ளது.
இதேவேளை, அண்மையில் நடைபெற்ற அமைச்சரவை தீர்மானங்களை அறிவிக்கும் ஊடகவியலாளர் சந்திப்பின் போது தெரிவுக்குழு நிச்சயமாக நியமிக்கப்படும் என அமைச்சர் கெஹலிய ரம்புக்வெல்ல தெரிவித்துள்ளார்.
**************
மன்னாரில் கொள்ளை ஆரம்பம்
மன்னார் வளைகுடாவில் பெற்றோலிய பொருள் ஆய்வுப் பணிகளில் புதிய மாற்றங்களுடன் ஓகஸ்டில் தொடங்க இருக்கின்றது.
இதற்காக துழையிடும் பணிகளை மேற்கொள்ள ஜப்பான் நாட்டின் ஐந்தாம் தலைமுறை தொழில் நுட்ப வசதிகளைக்கொண்ட கப்பல் மன்னாரை நோக்கி பயணித்துள்ளது.
இதற்கிடையில் ஏற்கனவே முன்வைக்கப்பட்ட திட்டத்தில் எண்ணெய் அகழ்வு இட அமைவில் சில மாற்றங்களை ஏற்படுத்த, அகழ்வுப்பணிகளை மேற்கொள்ளும் கெயார்ன் நிறுவனம் கோரி இருந்தது.
இந்த நிலையில், திட்டமிடப்பட்டதற்கு மாறாக மூன்று கினறுகளை தோண்டவும், ஆய்வு செய்யும் இடத்தை மாற்றவும், அரசாங்கம் அனுமதி வழங்கியுள்ளதாக, நிறுவனத்தின் பேச்சாளர் ஒருவர் தெரிவித்துள்ளார்.
**************
தமிழரின் பயணத்தைக் கூட பொறுக்க முடியவில்லை
வெள்ளவத்தையிலிருந்து யாழ்ப்பாணம் செல்லும் தனியார் பஸ்கள் இனிமேல் இராமகிருஷ்ண மிஷன் முன்பாகவுள்ள தரிப்பிடத்திலிருந்து புறப்படவேண்டுமென முடிவு செய்யப்பட்டுள்ளது.
வெள்ளவத்தை காவல் நிலையத்தில் நேற்று சனிக்கிழமை முற்பகல் உதவி காவல்துறை அத்தியட்சர் தலைமையில் நடைபெற்ற கொழும்பு - யாழ்.தனியார் பஸ் உரிமையாளர்களுடனான சந்திப்பின் போதே இந்த முடிவு எடுக்கப்பட்டுள்ளது.
கொழும்புக்கும் யாழ்ப்பாணத்துக்குமிடையே வெள்ளவத்தையிலிருந்து சேவையிலீடுபடும் தனியார் பஸ்கள் வெள்ளவத்தை காலி வீதியிலிருந்து செல்வது காவல்துறையினரால் கடந்த இரு தினங்கள் தடுக்கப்பட்டன.
இதனால் பயணிகள் பெரும் சிரமங்களை எதிர்கொண்ட அதேசமயம், பஸ் உரிமையாளர்களும் தமது அதிருப்தியை வெளியிட்டனர். இதையடுத்தே இக்கூட்டம் நடைபெற்றது.
இதன்போது தற்காலிகமாக இராமகிருஷ்ண மிஷன் முன்பாக பயணிகளை புறப்படும் நேரத்துக்கு பஸ்களை கொண்டுவந்து ஏற்றிச் செல்லமுடியுமென்றும் பகல் வேளையில் கடற்கரை வீதியில் பஸ்களை நிறுத்தக்கூடாதென்றும் முடிவெடுக்கப்பட்டது.
காலி வீதியில் எந்தவொரு பயணியையும் ஏற்றிச் செல்ல முடியாதெனவும் இராமகிருஷ்ண மிஷனுக்கு அண்மையாகவுள்ள கடற்படை முகாமுள்ள இடத்தை பஸ்தரிப்பிடமாக்க பாதுகாப்பு அமைச்சின் அனுமதியுடன் பெற்று தருவதாகவும் உதவி காவல்துறை அத்தியட்சர் பிரியந்த தலைமையில் இடம்பெற்ற கூட்டத்தில் தெரிவிக்கப்பட்டுள்ளது.
**************








Saturday, 9 July 2011

செய்திகள் 09/07

குற்றம் சாட்டும் ஐதேக
சனல்4 காணொளி தொடர்பில் அரசாங்கம் உரிய நடவடிக்கை எடுக்கத் தவறியுள்ளதாக ஐக்கிய தேசியக் கட்சி அறிவித்துள்ளது.
நாட்டின் நற்பெயருக்கு களங்கம் ஏற்படாத வகையில் நடவடிக்கை எடுக்கப்பட வேண்டியது அவசியமானது என ஐக்கிய தேசியக் கட்சியின் பொதுச் செயலாளர் திஸ்ஸ அத்தநாயக்க தெரிவித்துள்ளார்.
இராஜதந்திர வழிமுறைகளைப் பின்பற்றி அரசாங்கம் நடவடிக்கை எடுக்க வேண்டியது அவசியமானது என அவர் சுட்டிக்காட்டியுள்ளார்.
இரண்டு ஆண்டுகளுக்கு முன்னர் சனல்4 ஊடகம் இவ்வாறான ஓர் காணொளியை ஒளிபரப்புச் செய்ததாகவும், அப்போது அந்த ஊடகத்திற்கு எதிராக சட்ட நடவடிக்கை எடுக்கப்படும் என அரசாங்கம் அறிவித்திருந்ததாகவும் அவர் தெரிவித்துள்ளார்.
எனினும், இதுவரையில் எவ்வித சட்ட நடவடிக்கையும் எடுக்கப்படவில்லை என அவர் குறிப்பிட்டுள்ளார்.
இந்தக் குற்றச்சாட்டுக்களை பொய்ப்பிப்பதற்கு பல்வேறு வழிகள் காணப்பட்ட போதிலும் அரசாங்கம் அந்த வழிகளை பின்பற்றத் தவறியுள்ளதாகத் தெரிவித்துள்ளார்.
**************
செஞ்சிலுவைச் சங்கம் செயற்படுமா?
இலங்கை செங்சிலுவை சங்கத்தின் முல்லைத்தீவு கிளையின் செயற்பாடுகள் மீண்டும் ஆரம்பிக்கப்பட்டுள்ளன.
இதன் ஒரு கட்டமாக முல்லைத்தீவு மாவட்ட பிராந்திய சுகாதார சேவை பணிப்பாளர் பணிமனை பிரிவிற்கு உட்பட்டவர்களுக்கான இதய சுவாச மீள உயிர்ப்பித்தல் பயிற்சி தொடர்பான கருத்தரங்கு நேற்று இடம்பெற்றுள்ளது.
முல்லைத்தீவு மாவட்ட பிராந்திய சுகாதார சேவை பணிப்பாளர் பணிமனையில் இந்த கருத்தரங்கு நடைபெற்றது.
இதற்கான ஏற்பாடுகளை முல்லைத்தீவு கிளையின் நிறைவேற்று அதிகாரி எஸ்.சதீஸ்வரன் மற்றும் மாவட்ட சுகாதார தினைக்களத்தினர் இனைந்து மேற்கொண்டிருந்தனர்.
இந்த நிகழ்வில் சுகாதார வைத்திய அதிகாரிகள், பொது சுகாதார பரிசோதகர்கள் மற்றும் மருத்துவ தாதியர்கள் உள்ளிட்டோர் பங்குபற்றினர்.
**************
ஸ்ரீலங்காவுக்கு பொக்ஸ்
பிரித்தானிய பாதுகாப்பு செயலாளர் லியம் பொக்ஸ் நேற்று இரவு இலங்கையை சென்றடைந்தார்.
அவர் இன்று லக்ஷ்மன் கதிர்காமர் நினைவு சொற்பொழிவு நிகழ்த்த உள்ளமை குறிப்பிடத்தக்கது.
லியாம் பொக்ஸ் இரண்டு நாட்கள் இலங்கையில் தங்கியிருப்பார் என பிரிட்டன் தகவல்கள் தெரிவிக்கின்றன.
மஹிந்த ராஜபக்ஷ மற்றும் வெளிவிவகார அமைச்சர் ஜீ.எல்.பீரிஸ் ஆகியோருடன் லியாம் பொக்ஸ் பேச்சுவார்த்தை நடத்துவார் என எதிர்பார்க்கப்படுகிறது.
2002ம் ஆண்டு முன்னாள் அரசுத் தலைவர் சந்திரிக்காவிற்கும், முன்னாள் பிரதமர் ரணில் விக்ரமசிங்கவிற்கும் இடையில் இணக்கப்பாட்டை ஏற்படுத்தும் முனைப்புக்களில் லியாம் பொக்ஸின் பங்களிப்பு முதன்மையானது என சுட்டிக்காட்டப்படுகிறது.
சனல்4 காணொளி விவகாரம் மற்றும் பிரிட்டனின் மனித உரிமை மீறல் குற்றச்சாட்டுக்கள் ஆகியவற்றின் பின்னணியில் லியாம் பொக்ஸ் இலங்கைக்கு விஜயம் செய்துள்ளமை குறிப்பிடத்தக்கது.
லக்ஷ்மன் கதிர்காமர் நினைவுப் பேருரையில் கலந்துகொள்வதற்காக கடந்த ஆண்டு இலங்கைக்கு விஜயம் செய்ய லியாம் பொக்ஸ் திட்டடமிட்டிருந்த போதிலும் இறுதி நேரத்தில் பயணத்தை கைவிட்டார்.
**************
தமிழக சட்டசபையில் திரையிடுக
இலங்கையின் இறுதிக்கட்ட யுத்தத்தின்போது இடம்பெற்றதாகக் கூறப்படும் யுத்தகுற்றங்கள் மற்றும் மனித உரிமை மீறல்களை வெளிக்கொணரும் சனல் 4 ஆவணத் திரைப்படத்தை தமிழக சட்டசபையில் திரையிடுமாறு உலகத் தமிழர் பேரவையின் ஊடகப்பேச்சாளர் எஸ்.சுரேந்திரன் தமிழக முதல்வர் செல்வி ஜெயலலிதாவிடம் வேண்டுகோள் விடுத்துள்ளார்.
சனல் -4 நிர்வாகம் தாம் வெளியிட்ட இந்த ஆவணத் திரைப்படத்தின் இரண்டு பிரதிகளைத் தம்மிடம் ஒப்படைத்துள்ளது எனவும், அதில் ஒன்றை தமிழக முதலமைச்சருக்கும் மற்றொன்றை இந்திய அரசுக்கும் வழங்குமாறு தம்மிடம் கேட்டுக்கொண்டதாகவும் எஸ்.சுரேந்திரன் இணையதளமொன்றுக்கு வழங்கியுள்ள பேட்டியில் தெரிவித்துள்ளார்.
**************
இந்தியாவை அரவணைக்கும் பீரிஸ்
சிறிலங்கா மீது இந்தியா ஆதிக்கம் செலுத்தவில்லை, உதவி செய்வதற்கே முன்வந்துள்ளது என்று சிறிலங்கா வெளிவிவகார அமைச்சர் ஜி.எல்.பீரிஸ் தெரிவித்துள்ளார்.
சிறிலங்கா நாடாளுமன்றத்தில் நேற்று ஒத்திவைப்பு வேளை பிரேரணை ஒன்றுக்குப் பதிலளித்துப் பேசும் போதே அவர் இவ்வாறு கூறியுள்ளார்.
இந்தியாவுடன் இணைந்து கூட்டறிக்கையே வெளியிடப்பட்டது. இது உடன்பாடு அல்ல. சிறிலங்காவின் தேசியப் பிரச்சினைக்கு உதவவே இந்தியா விரும்புகிறது என்றும் தெரிவித்தார்.
தேசிய ரீதியான ஒரு தீர்வையே காண நாடாளுமன்றத் தெரிவுக்குழுவை நியமிக்க முடிவு செய்துள்ளதாகவும் குறிப்பிட்டார்.
இது காலத்தை இழுத்தடிக்கும் வேலை என சிலர் எண்ணலாம். ஆனால் உண்மையில் இது காலத்தை இழுத்தடிக்கும் வேலையல்ல. தீர்வை மிக விரைவாக பெற்றுக் கொடுப்பதே தமது நோக்கம் என்றும் விளக்கமளித்துள்ளார்.
இப்போது புலிகளின் இராணுவ ரீதியான தாக்குதல்கள் இல்லாவிட்டாலும் அவர்கள் வேறுவிதமான தாக்குதல்களை தொடர்ந்துள்ளனர்.
பொருளாதார ரீதியாக தம்மைப் பலமிழக்கச் செய்ய முற்படுகிறார்கள் எனவும் குறிப்பிட்டார்.
சிறிலங்காவுக்கு வரும் வெளிநாட்டுச் சுற்றுலாப் பயணிகளை தடுக்க முற்படுகின்றனர்.
சூடானுடன் சிறிலங்காவைச் சிலர் ஒப்பிட முற்படுகின்றனர். ஆனால் சூடானுடன் சிறிலங்காவை ஒப்பிட முடியாது.
நாடு கடந்த அரசு என்று எதுவும் கிடையாது. இவ்வாறான ஒன்றை எந்த நாடும் ஏற்றுக் கொள்ளவும் இல்லை.
சிறிலங்காவின் 50 வீதத்துக்கும் அதிகமான ஏற்றுமதிகள் ஐரோப்பிய நாடுகளுக்கே செல்லுகின்றன.
எனவே பொருளாதார ரீதியில், உலகமயமாக்கல் ரீதியில்- இந்த நாடுகளுடன் இணைந்து தமது பொருளாதாரத்தை வலுப்படுத்திக் கொள்ள வேண்டும்.
அதற்காக அந்த நாடுகளுக்கு தாம் அடிபணிகிறோம் என்று பொருளல்ல என்றும் விளக்கமளித்துள்ளார்.
இந்தியாவைக் தொடர்பாக குரோத மனப்பான்மையுடன் பார்க்க வேண்டாம். இந்தியாவை ஒதுக்கி விட்டு சிறிலங்காவினால் பொருளாதார வளர்ச்சி இலக்கை எட்டமுடியாது.
இந்தியா ஊடாகத் தான் தமது இலக்கை அடைய முடியும் என்றும் சிறிலங்கா வெளிவிவகார அமைச்சர் மேலும் கூறியுள்ளார்.
**************
கூட்டமைப்பை தீய சக்தி என்று வர்ணித்த படைத்தளபதி
தமிழ்த் தேசியக் கூட்டமைப்பின் பரப்புரைக் கூட்டத்தின் மீது சிறிலங்காப் படையினரை ஏவிவிட்டுத் தாக்குதல் நடத்திய யாழ்.படைகளின் தளபதி மேஜர் ஜெனரல் மகிந்த ஹத்துருசிங்க, கூட்டமைப்பை தீயசக்தி என்று விமர்சித்துள்ளார்.
கொழும்பு அரச ஊடகம் ஒன்றுக்கு வழங்கியுள்ள செவ்வி ஒன்றிலேயே அவர் தமிழ்த் தேசியக் கூட்டமைப்பை தீயசக்திகள் என்று வர்ணித்துள்ளார்.
யாழ்ப்பாணத்தில் பாதுகாப்பற்ற சூழல் காணப்படுவதாகவும், இயல்பு நிலை உருவாகவில்லை என்றும் கூறப்படும் குற்றச்சாட்டுகள் தொடர்பாக கருத்து வெளியிட்டபோதே மேஜர் ஜெனரல் மகிநத ஹத்துருசிங்க இவ்வாறு குறிப்பிட்டுள்ளார்.
யாழ். குடாநாட்டில் வன்முறைச் சம்பவங்கள் அதிகரித்துள்ளதாக சிலர் பரப்புரைகளை மேற்கொண்டு வருவதாகவும், இத்தகைய செய்திகளில் எந்த உண்மையும் கிடையாது என்றும் மேலும் தெரிவித்துள்ளார்.
தேர்தல் காலங்களில் இது போன்ற பரப்புரைகளில் தமிழ்த் தேசிய கூட்டமைப்பு உள்ளிட்ட சில தீயசக்திகள் ஈடுபடுவது வழக்கமே என்றும் அரசியல் நலன் கருதியே அவர்கள் இத்தகைய பரப்புரைகளில் ஈடுபடுவதாகவும் மேஜர் ஜெனரல் மகிந்த ஹத்துருசிங்க கூறியுள்ளார்.
தனிப்பட்ட சம்பவங்களையும் சிலர் அரசியல் மயப்படுத்த முயற்சிப்பதாகவும் குற்றம்சாட்டியுள்ள யாழ். படைகளின் தளபதி, சிறிலங்கா அரசின் அபிவிருத்திச் செயற்பாடுகளை விரும்பாத சிலரே இது போன்ற உண்மைக்குப் புறம்பான பரப்புரைகளை மேற்கொண்டு வருவதாகவும் குற்றம்சாட்டியுள்ளார்.
**************
கூட்டமைப்பை நசுக்கும் ஸ்ரீலங்கா அரசின் நடவடிக்கை
வடக்கில் தமிழ்த் தேசிய கூட்டமைப்பின் தேர்தல் பிரசார நடவடிக்கைகளை பல்வேறு வகையிலும் இடையூறுகளை ஏற்படுத்தி முடக்குவதற்கு அரச தரப்பு முயன்று வருவதுடன் இந்த நடவடிக்கைகளுக்கு இராணுவத்தினரை மறைமுகமாக ஈடுபடுத்துகின்றது என்று நீதியானதும் நியாயமானதுமான தேர்தலுக்கான கபே அமைப்பு குற்றம் சாட்டியுள்ளது.
இது தொடர்பாக அந்த அமைப்பின் நிறைவேற்றுப் பணிப்பாளர் கீர்த்தி தென்னக்கோன் நேற்று தெரிவித்துள்ள தகவலில் தெற்கிலும், அரசியல் அச்சுறுத்தல்கள், வன்முறைச் சம்பவங்கள் இடம்பெறுகின்றன.
ஆனால், அவை ஒரே கட்சிக்கு எதிராகத் தொடர்ந்தும் இடம்பெறுவதில்லை.
ஆனால், வடக்கில் அவ்வாறு இல்லை. கூட்டமைப்புக்கு எதிராகத் தொடர்ந்தும் அச்சுறுத்தல்கள், வன்முறைகள் என்பன திட்டமிட்டபடி கட்டவிழ்த்து விடப்படுகின்றன என்று தெரிவித்துள்ளார்.
கூட்டமைப்பினர் தேர்தல் பிரசார நடவடிக்கைகளை முன்னெடுக்க முனையும் போது, அந்தப் பிரதேசத்தை அண்டிய பிரதேசங்களில் இராணுவத்தினரும், காவல்துறையினரும் வீடுகளுக்குச் சென்று சோதனை நடவடிக்கையில் ஈடுபடுகின்றனர்.
இதனால், மக்கள் அச்சத்தில் பிரசாரக் கூட்டங்களில் கலந்து கொள்வதில்லை. இவ்வாறு இடம்பெறுவதை திட்டமிட்ட சதி என்றே கூறலாம்.
வடக்கில் அரச தரப்பு தேர்தல் பிரசாரங்களை முன்னெடுத்து வருகின்றது.
கிளிநொச்சியில் நேற்று முன்தினம் நடைபெற்ற தேர்தல் பிரசார நடவடிக்கையின்போது அதிகளவான அரச சொத்துகளை சம்பந்தப்பட்ட தரப்பினர் பாவித்துள்ளனர்.
இவ்வாறான நடவடிக்கைகள் கண்டிக்கப்பட வேண்டியவையாகும் எனவும் தெரிவித்தார்.
அரசு வடக்கில் சுதந்திரமாகத் தேர்தல் நடவடிக்கைகளை முன்னெடுத்துச் செல்வது போன்று ஏனைய அரசியல் கட்சிகளுக்கும் வழிசமைத்துக் கொடுக்கவேண்டும்.
வடக்கில் இன்னும் அரசியல் சுதந்திரம் நிலைநாட்டப்படவில்லை. அதனை நிலைநாட்டுவதற்கு அரசு நடவடிக்கை எடுக்கவேண்டும்.
யாழ். குடாநாட்டில் தேர்தல் நிலவரங்கள் தொடர்பில் ஆய்வு செய்வதற்காக தான் இன்று சனிக்கிழமை அங்கு செல்லவுள்ளதாகவும் அவர் தெரிவித்துள்ளார்.
**************
கல்லெறியும் காடையர்
சாவகச்சேரி நகரசபை, பிரதேசசபை ஆகியவற்றில் போட்டியிடும் தமிழ்த் தேசியக் கூட்டமைப்பு வேட்பாளர்களின் வீடுகளுக்கு கடந்த சில தினங்களாக இரவு வேளையில் கல்வீச்சு நடத்தப்படுவதாக தெரிவிக்கப்பட்டது.
சாவகச்சேரி பிரதேச சபையின் வேட்பாளர் கணபதிப்பிள்ளை யோகராசாவின் வரணி இயற்றாலை வீட்டின் மீதும் வேட்பாளர் சுந்தரம் என்பவரின் குடமியன் வீட்டின் மீதும் கடந்த 6 ஆம் திகதியும் சாவகச்சேரி நகரசபை வேட்பாளர் இ.தேவசகாயம்பிள்ளை என்பவரின் வீட்டின் மீது 7 ம் திகதியும் கற்கள் எறிந்த சம்பவங்கள் இடம்பெற்றுள்ளன என்று கூட்டமைப்பு வட்டாரங்கள் தெரிவித்தன.
**************